Thursday, June 15, 2006

يوم ما رحت اعمل بطاقة انتخابية!!!!!!!!!!!!!!!!!

  • فى انتخابات مجلس الشغب الاخيرة وانا قاعدة في حالي في الشغل لا بيا ولا عليا فوجئت بموظفة من الموظفات بتدخل المكتب و تنادي عليا و تديني كارت صغير كده مكتوب عليه اسمي و تحته رقم و على ضهر الكارت ده صورة كبيره لمرشح الحزب الوطني في الدايرة بتاعنا ...ولما استفسرت
  • : ايه ده ? قالت لي دي بطافتك الانتخابية
  • بس انا ماليش بطاقة انتخابية ..ما طلعتهاش
  • -انتي كده متايده في الكشوف واحنا طلعنالك البطاقة دي مؤقته عشان تنتخبي بيها على ماتطلعي الاصلية-
  • انتوا مين ?
  • -الحزب
  • - طب والحزب ماله يدور على اسمي ليه في الكشوف و يطلعلي بطايق
  • -هو الحزب كده وظيفته يخدم الشعب مش بدل ما تروحي و تبهدلي نفسك..و بعدين الحزب بيحاول يشجع الشباب ان يكون لهم دور في الحياة السياسية و يبقوا ايجابيين
  • -يااا سلاااااام-
  • اه امال ايه مل تنسيش بقى طبعا هتختاري الحاج /..... م الورقة رمز الهلال
  • - امال طبعا ده الحاج غالي علينا قوي
طبعا ما فيش لزوم اقول اني فعلا رحت انتخبت بكارت الحاج بس كاغلبية ابناء دايرتي اخترت مرشح الاخوان...لا لشيء الا لانه مش حزب وطني

و مافيش لزوم برضه اني اقولكم ان مرشح الاخوان اكتسحه (اصل لجنتنا كانت في المرحلة التانية قبل التزوير على ايدك الشمال)
المهم قلت طب يا بنتي بعد الانتخابات لازم بقى تروحي تطلعي البطاقة الاصلية عشان يبقى لك وزن في المجتمع و صوتك يبقى مسموع
( او م الاخر عشان انزل اتفرج ع اللي بيحصل يوم النتخابات اصلي فضولية واموت في الحاجات دي)
المهم قعدت اتحايل ع العيال اصحابي ان حد ييجي معايا...ابدا...يا عيال ده بيبقى يوم حلو..لا...ياولاد عشان يبقى لكم صوت في البلد...مش عايزين يا ستي احنا مبسوطين كده..يا جماعه عشان لو(.....) بعد الشر بعد الشر اتكل تروحوا تصوتوا وتختاره الخليفة الجديد....يا ستي بس هو يتكل و احنا نصوتلك عليه 3 ايام بلياليهم

المهم ماحدش رضى ييجي معايا غير واحدة بس فضولية زيي و بتحب تتفرج

قول ما وصلنا القسم العسكري اللي ع الباب بصلنا باهتمام-بنات بقى و هو شكله كده شهم و يحب يخدم....خير يا جماعة...عايزين لو سمحت نعمل بطايق انتخابوهنا بصلنا العسكري حتة بصصصصصة...حاجة كده بتجمع بين القرف و الاشمئزاز و الشفقة و الاتهام و بصلنا من فوق لتحت زي مانكون ممسوكين في حملة ادابو رفع ايده لفوق حتى اننا اتهيالنا انه هيدينا بالالم بص اتضح انه بيشاور ..جوة...طب فين بالظبط لو سمحت....جووووة
بعد شخطة العسكري و نظراته لينا كنا هنروح و نفضها سيره بس انا قعدت اشجع صاحبتي و اقولها معلش ده هو بس تلاقيه فلاح و غشيم..بس بيني وبين نفسي كنت بايظه خالص...واكتشفت ساعتها حقيقة كانت غايبة عني في وسط الحماسة اللي كانت واخداني...ان دي كانت اول مرة في حياتي ادخل قسم...وجت في دماغي على طول صورة سعاد حسني والصول و هو ب..... ( انتوا فاهمين بقى) في فيلم الكرنك فبدات ارتعش بس ماكنتس عايزة ابين لصاحبتي ...اصل انا الللي جايباها بقى و عاملة 7 رجالة في بعض

المهم دخلنا المكتب و اول ما قلنا للموظفين اننا عايزين نعمل البطاقة ارتفعت رؤوس ال 3 موظفين و قاعدوا يبصوا لبعض و يبصولنا و لما لقونا ثابتين على موقفنا و مابنتراجعش قام الكبير بتاعهم ياخد بيانتنا..اساميكم..صاحبتي قالتله اسمها :سالي......سالي? ايه سالي ده يعني ايه? و يسموكي سالي ليه? البت حبك عليها العياط و انا ماسكاها من دراعها :اثبتي يا سالي ولا يهمك ده هو عايز يطفشك ما تديلوش الفرصة

المهم بعد كل العقبات و الرخامة والتلامة ونظام التطفيش اخيرا خدوا بيانتنا و قالولنا ابقوا تعالوا بعد شهر و نص اسالوا عليها.....لكن مين ده داحنا خرجنا من هنا و البت سالي فتحت حلقها عليا على وسعه....عليكي و ع الديمقراطية وع الوعي السياسي
و الايجابية...منك لله يا شيخه بهدلتينا بهدلة تجار الفراخ ...روحي ربنا يرزقك بعبارة تكون رافعة علم بنما
ما اقدرتش افتح بقي...انا لو مكانها كنت قلت قد كده عشر مرات

و ادي كلام اللي يسمع كلام لجنة السياسات

9 comments:

سيبها على الله said...

الاخت سوسة المفروسة
الحمد لله ان النظام فى مصر استطاع ان يكون منا مجاميع اغلبهم مفروسين من النظام وعلى فكرة انا اكبر واحد مفروس من النظام ومفروس اكتر من شلة البلطجية اللى فى الحزب الوطنى..
عموما تجربتك هذة انا شخصيا احييك عليها من كل قلبى لا لشيئ الا لانه هناك من الرجال من يخافون ان يقدموا على هذا العمل واذكر اننى واجهت الموقف حينما توفى والدى وذهبت الى قسم البوليس لالغى بطاقة والدى الانتخابية وكانت نظراتهم الى توحى اننى واحد من الحرامية رغم انهم يعرفون انهم هم الحرامية لانهم طول عمرهم وهم ياخذون اصوات الموتى لصالح الحزب الوطنى حزب الفساد والفاسدين حزب البلطجة السياسية...المهم مش حا اكتر اكتر من كده احييك من كل قلبى واتمنى ان تثبتى على هذا المبدأ وتستطيعى ان تقنعى الآخرين بما فعلتيه فيكفينا من السلبية ما اوصلنا الى خراب البلد والبلاد ونحن المسئولون امام الله وامام الوطن لاننا نمثل الطبقة المثقفة فى مصر تمنياتى وتحيتى لك مرة ثانية

soosa el-mafroosa said...

شكرا جدا لانك ما قولتليش زي ما كل اصحابي قالولي( و انت تروحي ليه اصلا ما هما هيزوروا هيزوروا) لان الناس تحس انها ماتت من جواها و ما عدش عندها امل في اي حاجة و رغم ان الكل مفروس زي مانا مفروسة انما ماشيين في الدنيا زي مايكونوا مضروبين على رؤوسهم و محدش عايز حتى يرفع صابع و يغير حاله..لما بقيت حاسه بعد ما طلعت البطاقه اني فتحت عكا

سيبها على الله said...

الاخت سوسة
العيب الاكبر فينا هو الخوف وهذا بالطبع نتيجة الممارسات القذرة والتى يتبعها النظام او السلطة ضد الشعب وصدقينى لو النظام وجد العين الحمرة من شعبنا لما تجرأ على عمليات السحل التى يتبعها ضد شبابنا ورجالنا وحتى نسائنا...هذا نظام يعيش على الاعتماد على اسلوب البلطجة السياسية وباذن الله تعالى سوف يختفى كل ذلك بصحوة شعبية طال انتظارها طويلا..
مع ارق تحياتى

Ahmed Shokeir said...

شكلنا كده قريب هانشوفك في وسط البلد او واقفة قدام نادي القضاه

مبروك عليكي المدونة الجديدة وبالتوفيق

soosa el-mafroosa said...

شكرا ليك يا اخ احمد على زيارة المدونة ..انا زرت مدونتك و وجدتها في منتها الجمال و بعد اذنك هاضيفها عندي
اما عن موضوع وسط البلد و نادي القضاه فوالله نفسي بس روتانا لسه جايبه "الكرنك" من يومين و كل اما اشوفه اشيل الفكرة من دماغي تماما...ربنا يستر على ولايلنا

أُكتب بالرصاص said...

على فكرة انا بقالي ساعة قاعد هنا
مدونة جميلة وخفيفة

تعجبني الايجابية

انت ايجابية والايجابيون قليلو

soosa el-mafroosa said...

itstoolate
شكرا ع التشجيع خصوصا و ان كل اصحابي مش بيقولوا عليا ايجابيه لن بيقولوا عليا مجنونة

أُكتب بالرصاص said...

ما انا برضه كنت عايز أقول كده ، ولكن ذوقياً
خُففت إلى إيجابية
وما الايجابيون إلا مجانين
وما المجانين إلا ايجابيون تمردوا على الاوضاع التي يعتبرها بعض العقلاء....

ايه اللي انا باقوله ده

انا ماليش دعوة
انا ماشي

soosa el-mafroosa said...

كده طلعت في الآخر زيهم ..ماشي يا عم ربنا يسامحك