Saturday, July 29, 2006

فعلها البطل ..شعبولا



فتحت البلوج و بصيت بصه على تعليقات الموضوع اللي فات لقيت تعليقين جداد من "بحب مصر " و
بيقولولي فيه ان"dead man"
القائد الركن شعبولا خرج عن صمته و أدلى بدلوة في الأزمة الحاليه و خرج بتصريح غنائي فخيم...تركت الكومبيوتر و جريت ع الدش و فتحت "ميلودي ارابيا" لأجده هناك ..نصير المقاومة الوحيد في الوطن العربي ..صوت النضال..ضمير الشعب..منور ع الشاشة و بتتذاع الأغنية (زي مايكون قلبي حاسس) ناديت على بابايا و أخويا ..شعبان عمل أغنية ..شعبان عمل أغنية ..بابا كان نايم ..قام جري م النوم أخويا كان عنده رانديفو وبعد ماكان نازل ع السلم رجع تاني و قرر انه يلطع الجو ...مش وقته شعبان بيغني....و جلسنا احنا التلاته مركزين جدا في غنى شعبان و في الكلام اللي بيقوله ..نضحك تارة و نحرك رأسنا موافقين تارة أخرى(تارة يعني مرة بالمناسبه) ..و في محتوى الأغنيه ما معناه ..هو انا مش قلتلكم قبل كده..هو انا هافضل أفهم فيكوا لإمتى يا حمير...و يعترض فيها على ضرب المنار و استهداف الجزيرة ( يا سلام ع الوعي يا شعبان)..و لينهي كل ذلك بجملته الأيقونية (بس خلاص) و لكنه يزيد في الآخر (...أنا زهقت) ...ضربة ف قلبكوا يا عرب زهقتوا الراجل ...يعني يبقى كويس لما يفيض بيه و يروح يحترف بره و تضيع علينا ثروة قومية زي دي؟؟؟؟؟؟؟

و الآن أنا أؤكد لكم أن مصير هذه الحرب قد تغير في اللحظه التي قرر شعبولا فيها الخروج عن صمته و دعم المقاومة....انه النداء الذي كانت تنتظرة جحافيل الشعب العربي (ماحدش يقوللي يعني ايه جحافيل دي عشان ماعرفش)..فقد كان الكل يدير مؤشرات الراديو .. و يبحث بجنون بين قنوات التلفزيون....الى ان سمع الجميع نداء شعبان

وهكذا إستمع شعبولا الى نداء "قلبي" ليقطع كل الألسنه و يكمم كل الأفواة و يسكت كل الأصوات التي كانت تردد أن "سعد الصغير " قد رماه من فوق عرشه ...الا ان عرش شعبان الأساسي في قلوبنا ووجداننا سيظل دائما في دعوته الدائمه للجهاد و كشفه المتواصل لألاعيب الصهاينه و الأمريكان...و مهما كانت قوة جهازهم المخابراتي .. و سيطرتهم الإعلاميه ..إلا انهم لا يستطيعون ابدا ان يضعوا يدهم على ضمير الوطن ............يا فارسهم يا شعبولا.

و بما أن شعبولا خلاص اتكلم ..ما عدش ليكوا حجه بقه يا حكامنا عشان تشجبوا و تستنكروا الحرب في لبنان..خلاص شعبان شال عنكوا الحرج و قالها....و لا عاد ليكوا حجه يا شباب تخافوا تطلعوا في مظاهرات..شعبان قالها..و لا عاد فيه حجه لأثرياء العرب يخافوا يلموا تبرعات ...شعبان قالها..شعبان قالها ....قالها البطل شعبولا

25 comments:

Aladdin said...

If you're a sha3bolla fan, you may visit Abu Tarek's 'official' website, and listen to Sha3bolla's new 'marketing strategy'!!!

Dr. Tantawy said...

rabena yeshfy ya soosa :) ya benty eftekrelna 7aga 3edla ..
bsara7a aham 7aga fel mawdo3 :) en akhoky sab el randevoo 3shan sha3bola .. el mawdo3 keda khatar gedan :))))

Nouran said...

مش الصورة دي كانت بتاعة بوحة ؟؟
الحمد لله ان شعبان اتكلم مين هيتكلم غير شعبولا حبيب المصريين والحمد لله انه مكسفكيش ونزل الاغنية علطول ومخلناش نستنى اكتر من كده

أُكتب بالرصاص said...

عندما يكون شعبولا هو صوت وضمير الامة ، يبقى على الامة السلام

لما الجاهل ده اللي لابس طن ذهب معبر عن رأي مائتين وخمسين مليون عربي، يبقى عليه العوض

الكلمة كلمتنا نحن ،

فين المثقفين

فين المتدينين

فين اصحاب الرأي والفكر والقضايا

شكرا يا شعبولا
ولكنك لست لسان الامة ولا ضميرها

يا أخوانا ، التحرك لازم يجي مننا نحن

واحنا في ايدينا حاجات كتيرة نعملها

المقاطعة

الدعاء

العودة للأصول

تبيه الامة

عرض القضية وتدويلها

الدعم المادي والمعنوي

كل واحد في موقعه شايل سلاحة

الكاتب شايل قلمه

العامل شايل أخلاصه وضميره واتقانه

الموظف شايل شرفه ونزاهته

الطالب شايل سلاح علمه

الاباء سلاح تربية ابناهم

الامهات المحافظة على البيوت

الدكاترة ، المهندسين ، المحامين ،

والله كل واحد فينا في ايده سلاح

والامة لو اتصلحت من الفرد للمجموعة للأمة كلها ، هيتم التغيييير

كلمه said...

alhamdullaaaaaaaaaaaaah 3mlha elbatal ....

howa sa7ee7 mesh fahem 7aga men ely be2olha ..bs eshta y3ni elmohem elnefs

rbna y5leek lena ya sha3bol ya rafe3 rayetna ... bas 5alas :)

Anonymous said...

شكرا كتير ليكى يا سوسة على زيارتك ليا وواضح ان انا وانتى عندنا نفس الاحساس بالقرف من زعمائنا الاشاوس اللى خللوا واحد زى شعبولا المبجل يحط راسهم فى الوحل بعد ما بقا لة هو كلمة وهو الجاهل اللى لا بيعرف يقرا ولا يكتب يا حسرة ولاهو خريج جامعة الملك فلان ولا السلطان علان

Ahmed Shokeir said...

مشي انتي ياسوسة ولاشعبولا اللي بس مفروسين ، دي الناس كلها مفروسة
شعبان زهق وانتي مفروسة وكلنا قرفنا

Anonymous said...

مقالة ساخرة وجميلة:)

Polka Dotted said...

sha3bola da motreb elmonasba wa kol monasba !!
matestahwenesh bel ragel dah :D

soosa el-mafroosa said...

aladdin

woow, what a marketing strategy>>may b because he finally understands what's he singing about

zangoolaaa

ooooskot...mesh heya kaman tele3et kant betetfarag 3ala sha3bolla we2alabetoh

nouran

اة كانت صورة بوحة ...بس بالذمه مش القرون أحلى على شعبان ..قمر يا خواتي...و طبعا ما كسفنيش ..لازم يبقى عندك ثقة بالوعي بتاع شعبان

soosa el-mafroosa said...

itstoolate

تعليق جميل كالعاده ..بس للأسف شعبان أصبح رغم عدم فهمه لما يغني هو الوحيد المعترض على مذابح لبنان ..شفت ريسنا النهارده قاللك إن مذبحة قانا تصرف "غير مسؤول" ..يعني م الآخر بيقول لأولمرت ..يا سم كده

كلمه

aywa kedah ed3y l sha3bollah ....rabena ye7'alleh we yensoroh 3ala meen ye3adeeh ....aaameeen

shahrzad

نورتي يا عسل ....ما هو لو كان اتعلم ماكانش قاال...الله يلعن التعليم اللي بيعلم الجبن

soosa el-mafroosa said...

ahmed shokeir

طب و اخرتها؟؟؟ انا زهقت م الفرسه و نفسي أرجع تاني زي الناس الطبيعيين .. بس يظهر اني هافضل مفروسة على طول ..ربنا يحلها من عنده

yahya_ayash

شكرا:)))

عطر الورد

أهلا بيك و طبعا يشرفني نبقى أصحاب

batabeet

عاجبني إسمك جدااااا...أصلوا بيفكرني باسم كانت ماما -الله يرحمها- بتدلعني بيه

بالذمه مش شعبولا ده ما فيش منه ..قوللهم يا بنتي لحسن مش مصدقين

اروي الطويل said...

بصراحة الراجل ده لما بشوفه بشمئز (بقرف يعنى) ايه اللى عاجبكوا فيه لا صوت ولا شكل يا بنتى دا بيركب الموجه عاوز يلم فلوس وخلاص طب بالله عليكى واحد لا بس دهب زى ده مفكراه زعلان عليهم فوقووووووووووا ده فرحان هيلم فلوس وهيييه

اروي الطويل said...

وعلى فكرة جحافل يعنى العدد الكبير او الجمع الذى يفوق المائة

Anonymous said...

سلااااااااام
اهوه ياستي انتي سوسه المفروسه وانا الاروبه ....
,
كويس انك وضحتي موضوع " بس خلاص" انا بقولها علي
طوووول من قبل مااعرف شعبولا , اسمعها من بعيد
الزق في صاحبها
في حين ان مدونتي عكس المعني , ماعلينا
وبس خلاص.....

Anonymous said...

شعبولا هو اللي عارف يوصل صوت الشعب للفضائيات و العالم الغربي و الدولي

هو الامل
هو بكرة
هو الصمود
هو الجهاد
هو شعبولا القلة

انا اتفرست يا سوسة

soosa el-mafroosa said...

حاول تفتكرني

شكرا ع الزيارة ..ووجهة نظر تحترم على الأقل الراجل لما قال انا باكره اسرائيل كان أصدق من ناس كتير و جاب
م الآخر

أروى الطويل

يا بنتي ما هو ده الغرض م المقال ..هو انا يعني كنت من عشاق المحروس ..أنا بقولك شوفي احنا وصلنا الجبن لحد فين ما فيش حد بيعترض من أول الحكام مرورا بكل الطبقات المتعلمه ..خلاص دخلونا عشة الفراخ و كمموا بقنا و ماعدش لينا حتى حق الإعتراض..و ما حدش اتشجع و اعترض غير الجاهل !!!!

soosa el-mafroosa said...

هوووبه الأروبه

أهلا بيكي و الله منورة ..مش انت هووبة بتاعت عشرينات؟؟ أنا بفرح بالعشريناتيه جدااا

و ياللا يا ستي نعمل حزب ..يعني سوسة المفروسة و هووبه الأروبة و قوقة المبقوقه .. و الله نعمل جو جامد

اه صحيح انا مافهمتش ؟..هو انت عندك مدونه ؟...لو عندك قوليلي عنوانها


epitaph

ليه كده؟؟ احنا هنقطع على بعض و الا ايه؟؟؟ انا اللي واخده توكيل الفرس في البلد ممكن انت تبقي مقهورة او مفقوعه ..حاجه كده يعني

آه معلش انا عايزة اسألك هو اسمك معناه ايه ..معلش اذا كان معروف ..انا أحب اعرفه لأن ده هيخلينا أفهمك أكتر و انشاء الله نبقى أصحاب

كلبوزة لكن سمباتيك said...

رغم كل ما يقال عنه الا انه ذكي
عرف الناس عايزة ايه
تحية لكي يا سوسة
و تحية لمؤلف الاغنية و للاسطي شعبان و لكل من ساهم في هذا العمل
خالص تحياتي

Anonymous said...

ماشي يا سوسة يا مفروسة
انا ابقي المفقوعة اللي مرفوع ضغطها
:)
يا ستي
ابيتاف: epitaph
يعني اللي بيتكتب علي شاهد القبر
inscription on a tombstone
فيه اول بوست علي المدونة بتاعتي...عليه اسباب اختياري..بل و حبي..للكلمة دي
لو تحبي تشوفيه طبعا
:)

kalam 7or said...

معلش انى دخلت عليكوا من غير ما استئذن بس الموضوع عجبنى جدا ورايي الشخصى مع انى ما بحبش شعبان ولا قنوات الاغانى ان الاغنية دى هتتشال على طول علشان ما تكدرش الامن العام واذا كان كلام الاغنية زى ما قولتى كده تبقى حركة كويسة منه والله ..... ومعلش اعذرونى مرة تانية اسف

kalam 7or said...

انا ضفت مدونتك عندى لو موش موافقه قولى وانا اشيلها على طول

farida said...

عزيزتي سوسه
مدونتك ممتعه و مهضومه كيف بيقولوا باللبناني .. ربنا معاهم
سمعت الأغنيه و عندك حق
بس احنا طول تاريخنا بنغني يا سوسوه و مابنعملش حاجه غير الغنا
و
آه يا قلبي .. آه يا قلبي
إسرائيلي ضربني في قلبي
آه يا قلبي

المهم لا تغيبي عن الكتابه فمدونتك ممتعه

soosa el-mafroosa said...

صبارة
معلش ما خدتش بالي م الإسم ..العتب ع النظر
بالنسبة لعشرينات ...انا انشغلت شوية في موضوع البلوج ده و ساعات مابلاقيش حاجه تشد و اعلق عليها

بس على فكرة "ولاد البلد" اتنشر لي فيها موضوع مطروح في كلام بلوجرز ..ابقى بصي عليه

كلبوزة

و الله انت احلى كلبوزة شفتها بس موضوع ذكاء شعبان ده فيه اختلاف على اساس ان اللي بيكتبله الكلام هو اللي ذكي ..بس برضه برافو عليه انو بيرضى يغنيه و ما بيخافش

soosa el-mafroosa said...

epitaph

أحييك بشده على اختيارك الإسم ده..معناه جميل جدا بطريقه تخوف "مزيج جميل من السمو و الرهبه" برافو

kalam 7or

أهلا بيك في المدونة في أي وقت ..و يشرفني طبعا انك تضيفني عندك و طبعا انا كمان هاضيفك عندي...و بالنسبة للأغنية رغم انها برضه مسيسة و مابيجيبش سيرة حزب الله و لا نصر الله ..بس برضه ذاعوها يومين و دلوقتي بطلوا

farida

أهلا بيكي وشكرا ع المديح ..القدر عرفنا على بعض بعد موضوع الغلط اياه وده من حسن حظي ...بالنسبة للغني اهو تفريغ شحنه ع الأقل مادام مافيش في ادينا حاجه تانيه نعملها