Thursday, August 17, 2006

تاج الجزيرة

التاج الرهيب المنتشر انتشار المنايفه في الحكومة..وصل أخيرا الي مدونتي المتواضعه عن طريق سويدي باشا ..بعد مدة من بحلقتي في المدونات الصديقة و حسدي الشديد للي بيتبعتلهم التاج ده ..مع إني بصراحة ماكنتش فاهمة في الأول يعني ايه و بصراحة لغاية دلوقتي مش فاهمة هو فايدته ايه بالظبط و له مرحلة تانية ولا لأ ..يعني فيه حد مثلا هياخده و يعمل بيه إحصائية ؟؟..أو ينشر مقتطفات منه ..أو يستنتج منه حاجه؟ و الا هو كده و خلاص

مش مهم مش مهم..البني آدم ده طماع قوي ..يعني مش كفاية اتبعتلي ..كمان عايزة أفهم ؟؟؟..فراغة عين بقه هنعمل إيه؟ ..المهم آدي التاج و آدي الإجابات

ـ هل أنت راض عن مدونتك شكلاً وموضوعاً؟
إلى حد كبير ..مع اني كان نفسي تبقى مميزة أكتر في الشكل ..مسيري أفضى و أعملها تصميم محصلش حاجة فرايحي كده مشخلعة

ـــ هل تعلم أسرتك الصغيرة بأمر مدونتك؟
آآآآه جيت ع الوجع..طبعا مش محتاجه احكي الحكاية تاني ..بابا و البوست اللي حلف عليا لألغيه..بس برضه كنت محتاجه حد بفرملني شوية و يكون قلبه عليا ..مش قصدي ان اللي بيقروا مش قلبهم عليا بس أكيد يعني زيهم زيي بنحب نتفرج و نقرا أكتر من اننا ننصح

ـــ هل تجد حرجاً فى أن تُخبر صديقاً عن مدونتك؟ هل تعتبرها أمرا خاصا بك؟
و الله أنا يأست من أصحابي و إذا كنت أجد حرج فبصراحه آه ..بجد حرج من جهلهم المستحكم ..فيه ناس منهم لغاية دلوقت مايعرفوش يعني ايه ايميل يقوموا يعرفوا يعني ايه بلوج ..صلي ع النبي..بالنسبة لأني باعتبرها أمر خاص ..لأ خالص ..انا مدونتي بعون الله بقت مشهورة في وجه بحري كله..ربنا يستر

ـــ هل تسببت المدونات بتغيير إيجابى لأفكارك؟ اعطنى مثال فى حالة الإجابة نعم
أكيد غيرت أفكاري بطريقة إيجابيه ..على الأقل أقنعتني ان فيه ناس من جيلنا بيفهموا و بيحسوا مش كله فيديو كليب و موبايلات و مواقع من اللي انت عارفها..الناس اللي بتكتب قصة و شعر انا كنت فاكراهم استشهدوا في النكسة أو انتحروا بعدها ..الناس بتوع المظاهرات بقه أنا كنت فاكراهم ماتولدوش خالص ...ده غير الآراء الجميلة و المتزنة و الأسلوب الراقي في الحواراللي بين المدونين و بعضهم و الثقافة الواسعه اللي عند كتير منهم و و التمرد من قيود المجتمع اللي بتفرض علينا نمشي ورا بعض زي قطيع البقر ..كل دي حاجات كنت فاكراها مش موجوده في جيلنا ..لكن المدونات خلتني أكتشفنا من جديد

ـــ هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
الأولوية للي بيردوا عندي و بعدين للي بيردوا عند اللي بيردوا عندي (إيه اللخبطة دي؟) ..بس طبعا أحب أتجول في المدونات الإخرى عشان أتعرف على وجهات نظر أكتر و أكتسب حاجات جديدة و أحاول أطور مدونتي و أكتسب معلومات و أصدقاء جدد

ـــ ماذا يعنى لك عداد الزوار.. هل تهتم بوضعه فى مدونتك؟
أحب جدا موضوع العداد ده ..خصوصا اللي بيفرق بين زياراتك و زيارات الناس عن طريق ال آي بي مثلا و اللي بيوري الزوار جايين من أي دولة ..لكن الأهم عندي الناس اللي بيعلقوا هم دول اللي باهتم بعددهم ..على الأقل الواحد يحس انه مش بيدن في مالطا

ـــ هل حاولت تخيل شكل اصدقائك المدونين؟

كل واحد باتخيله في الصورة اللي حاطتها في البروفايل ..يعني
السويدي هو الطفل الأحول الجميل ده..و كلبوزة القطة السيامي ..و زنجولا الطفل الموبتأس ده ..و بحب مصر باتخيله مكرمش زي الصورة ..أظرف واحد بقه إبراهيم..تخيل لما تتخيل انك بتكلم حصان!!..و ساعات لما أشوف صورة لحد من المدونين بجد أتصدم..لالا صورة البروفايل أحلى

ـ هل ترى فائدة حقيقية للتدوين؟
أعظم فوايده بالنسبة لي هي الفضفضة..انا أصلي لو ماتكلمتش أو كتبت أموت..و لأني مفروسة من كل حاجه فدايما عندي كلام كتير..و من فوايده التانية طبعا..التواصل بين الشباب و بعضه في إطار أحلى بكتير من الشات و حتى المنتديات..كمان في التعرف على وجهات نظر مختلفة ساعات كتير ما بتوصلناش عن طريق و سايل الإعلام

ــ هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
متفاعل جدا..آخر الأخبار انا دلوقت ماباخدهاش غير م المدونات..و التفاعل نسبته كبيرة جدا و في نفس لحظة وقوع الأحداث

ـــ هل يزعجك وجود نقد بمدونتك ؟ أم تشعر انه ظاهرة صحية؟
كل واحد بيحب ان كل الناس تحبه و توافق على وجهة نظرة ..لكن النقد مهم جدا عشان الواحد يعرف اخطاؤه و عشان يتعرف على وجهات نظر الناس من حواليه ..المهم انه يكون في إطار الذوق

ـــ هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
أنا لا أتحاشى المدونات السياسية ....بس مش متابعة دايمه ليها ..إلا لو كان فيه حدث يستدعي..و موضوع الإعتقال ده استغربتله جدا لإني كنت فاكرة الحكومة مابتعتقلش غير الإخوان و ماكنتش أعرف ان فيه حد يعرض نفسه للإعتقال في الزمن ده بإرادته ..لكن أنا على حد علمي ان المدونين اللي اعتقلوا ..أعتقلوا في مظاهرات مش بسبب مدونتهم

ـــ هل فكرت فى مصير مدونتك حال وفاتك؟
لما أبطل أكتب ..إعرفوا ان أنا مت
أنا ماعنديش حد أقدر أسيبله الباسورد ..و بعدين مش عايزه حد يكتب بعدي لأنه أكيد مش هيعبر عن وجهة نظري ..ومش عايزة حد يبلغكم بوفاتي ..مش طالبة نكد

ــ تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟
أغاني ساعات تعبر عن حالتي النفسية و ساعات عن محتوي بوست و ساعات حاجه عجباني و خلاص ..و لازم تكون مميزة و مش عند حد ..يعني مش مطرطشة في كل حتة

ـــ اكتب اسماء خمسة مدونين ليقوموا بهذا الاسقصاء بعدك

حبايبنا كتير ..بس فيه ناس منهم اتبعتلهم التاج و عملوه..هاحاول اكتب من اللي متهيألي ماتبعتلهومش
يبقوا كالآتي

بحب مصر
.

19 comments:

Anonymous said...
This comment has been removed by a blog administrator.
el_assel said...

هاي سوسة
مدونتك بجد جميلة وواقعية واعتقد ان اي واحد حتكون اجابته نفس تقريبا نفس الاجابات بتاعتك
hope 2 visit my blog

أجدع واحد في الشارع said...

مشركه جميله جدا

Dr. Tantawy said...

طفل مبتأس :)) هههههه فيكي الخير .. انا هعملك استجواب في المجلس الاسبوع الجاي ههههه
انا بفكر اعمل تاج انا كمان يكون اسئلته جامده ايه رأيك ؟؟ هههه

Anonymous said...

أجوبة مقنعة، أسألك قبل أن تبدإ التدوين أين كنت تكتبين؟
دمت بخير

tota said...

يا سوسة
احسنت يا بنت ابا سوسة
الكلام منطقى وعقلانى جدا واسلوبك كمان فى الكتابة جميل
تخيلى احنا كمان بنتخيلك ايه من خلال البروفايل بتاعك
تحياتى

m_elsewedy said...

ههههههههههههههههه
طفل احول وجميل؟
ماشى ماشى
:D
يا بنتى اجاباتك خلتنى عامل كدة
:D
طبعا مش هاقولك عايز حق التاج ولا حاجة بس اعملى حسابك التاج الجاى بفلوس
:P

Khaled gad said...

بقى انا مكرمش يا دكتوره
ده انا لسه فى عز شبابى
كده هتطيرى البنات اللى بيدخلوا مدونتى
و بعدين مين صاحب الاسئلة دى و بيسألها ليه
هى أسئلة كويسة و ممكن ابقى اجاوب عليها عندى فى المدونة
بس فعلا اجابات معظم المدونين هتكون متشابهة

m_elsewedy said...

الواضح انك شحورتينا خالص يا سوسة
هانرفع قضية عليكى
:D

صاحب الأسئلة دى هى
"حلم"
http://tayarawara2.blogspot.com/

soosa el-mafroosa said...

إبـ راهـ يـ م
zangoolaaa
سويدي
بحب مصر

بالراحة شوية زعلانين ليه ؟..هز مين اللي اختار الصور دي؟ ..أنا و الا انتم ؟...و بعدين و الله دي صور جميلة و انا باحبها...يعني ابراهيم كده بحسه متمرد و نفسه يخرم السقف و يطير زي سوبرمان
زنجولا باين عليه فنان مع سنة شجن كده
سويدي واضح انه دماااغ و مكبر ع الآخر
بحب مصر باحس انه قلبه ع البلد و ع الناس الغلابة

يعني ده اللي باحس بيه لما أشوف صورة البروفايل بتاعكم ...فهمتوا ؟ ..ماحدش يزعل بقه

soosa el-mafroosa said...
This comment has been removed by a blog administrator.
soosa el-mafroosa said...

el_assel

شكرا على زيارتك ..مدونتك فعلا جميلة فغيها أحاسيس راقية و شعر جميل

ابن الشارع

شكرا ..نورتنا

أومرزوك

أهلا بيك ..أنا مش كاتبة محترفة إذا كان ده سؤالك..بس انا باكتب عادي يعني في المواقع و المنتديات خصوصا موقع "عشرينات"...مستنينك تنورنا على طول

soosa el-mafroosa said...

tota
شكرا يا توتة ..أنا بحب صورة البروفايل بتاعك جدا و حاسة كمان انك شبهها ..هو انت مدونتك مش شغالة ليه؟
أكيد لو كتبتي فيها هتبقى جميلة جدا

mizo

معلش ..لساني طويل و مش عارفة أحكمه ..بس بجد هما كتير كده ليه؟

wanna b a bride said...

حلو ده ..بس لازمته ايه؟
فيه سحب و جوايز في الأخر يعني والا ايه؟

m_elsewedy said...

فعلا انا مكبر دماغى على الاخر ومنعزل عن الحياة بتاعت بقيت البشر
:D
بس الصبح شغل وبس وبقيت اليوم مكبر دماغى

الأميره أوسه said...

سوسه
ردودك حلوه
هو أنتى صحيح صيدلانيه
طيب مش تقولى
ده أنا دايخه على شريط ترامادول
ولا حتى قنينة كودافين
ياريت تبعتيهم مع السيد وزير الصحه
عشان مش فاضيه بعمل محشى كرنب
يستاهل بوقك المسمسم
العواف

Anonymous said...

لأ أجاباتك دمها خفيف ولزيزه والمدونه بشكل عام جيده للغايه
go on

أُكتب بالرصاص said...

أوسا

ناقص تطلبي نها شريطين ابو صليبة


بأقول لك ايه
سيبك من الصنف ده


عندي بانجو محوج إنما أيه




ازيك يا سوسا

soosa el-mafroosa said...

سويدي

ماشي يا عم الدماغ
:D

AOOSSA

منورة يا أوختشي .. والنبي ده عندي ليكي شوية حبوب إنما أيه عسل و خصوصا حبوب الصراصير ..ناخديها من هنا و تجري ورا الناس بالشبشب في الشارع و تفشي غلك فيهم ..قوليلي بس العنوان وانا جيبلك اللي انت عايزاه على عيني

WANNA B A BRIDE

نورتي .. والله انا برضه ماعرف لازمته

WA3D EL 3OYOUN

شكرا جزيلا مستنيين على طول ..ماشي

أكتب بالرصاص

الله يسلمك ..انت هتقطع علينا الزباين ..ماتسيبنا نسترزق

حاول تفتكرني

ايه الكلام الجميل ده ..و الله أثر فيا ..دايما كده المدونة منورة بيكم