Friday, August 25, 2006

سوسة على صفحات الجرائد





ويل يا ويل ...ويل يا ويل...النداء الشعبي المصري الصميم .اللي ماحدش عارف بالظبط معناه
ايه ..و لكنه كان أول شئ أجده على لساني أول مالقيت اسمي و موضوعي في الجرنال...الحكاية م الأول ....من أسبوع كده و في إطار حملة الدعايه الفظيعه اللي انشاء الله هتوديني في داهية و اللي كان عاملها بابا للبلوج ..سألني خالي ..طب ماتعرفيش توصلي الكلام ده للجرايد..قلتله ياريت ..بس إزاي ..ممكن أبقى أبعت على إيميل حد من الكتاب و يمكن لو عجبه ينشر حته منه و الا حاجه..قالي و ماله حاولي ..قلت يا رب...أتاري ايه؟..أبواب السما كانت مفتوحة...لو كنت أعرف دانا كنت دعيت دعاا..كنت دعيت لنفسي و دعيت على كل الناس اللي مغلبني و مغلبنكم ..لكن معلش بقه خيرها في غيرها

المهم بعد الكلام ده يجي بإسبوع وانا فاتحه البلوج بابص ع الكومينتات لقيت ..هيرو.. كاتب لي رساله بيقوللي ان موضوع "فعلها البطل شعبولا" منشور في جريدة "العربي "...نعممممم..إزاي يعني ؟..بجد ؟..و بعلو صوتي صرخت ..بااااابااااا...إنزل هات جرنال العربي حالا ...إشمعنى يعني...بيقولوا فيه موضوع منشور ليا هناك..أوعي يكون الموضوع اياه ..يا دي النيلة ما قولنا مسحناه .ده موضوع تاني إنزل بس

و نزل بابا و جاب الجورنال ..مسكته كده و سميت و قعدت ادور .. أدور ..مش لاقيه حاجه..أصل عندي عادة مهببه اني مافتحش الجورنال غير م الآخر ..أصلكوا عارفين الصفحة الأولى في الأهرام و الأخبار كلها أخبار متفبركة و أونطه عن اللي انتوا عارفينهم ..و انهم اكتشفوا على جدران المعابد ان قدماء المصريين كانوا أول من لعب البلاي ستيشن و إن الإنسان الأول كان أصلا م المنوفيه و القصص اللي انتوا عارفينها دي ..فضلت أدور مش لاقيه حاجه و بدور على ايه ؟؟سطر أو سطرين ..لحد ماوصلت لصفحة 5..قسم التحقيقات..وببص لقيتلكم ايه..نص صفحة متقسمه على 3 أجزاء..ع الشمال خالص مقال لروائي اسمه رؤوف مسعد ..في النص مقال منقول من "عشرينات" و ع اليمين مقالي ...تخيلوا حجمه و الا بنط الإسم ..منور كده وواضح ..الله لا يوريكوا اللي حصللي ...أصووووت و أتنطط..أهه يا بابا أهه..و بابا يضحك و يضرب كف على كف و يقول البت اتهبلت..ماتتخيلوش السعادة اللي كنت فيها ..بجد كان نفسي في الحكاية دي جدا ..رغم ان أصحابي و قرايبي و المجتمع و الناس اللي حواليه مايعرفوش مين سوسة المفروسة دي ..بس كفايه إن أنا عارفه و طبعا بابا تولى أمر بقية البشرية..يتهيألي الجريدة ارتفعت أرقام توزيعها بسبب بابا..مش قلتلكوا هيوديني في داهية الراجل ده

طبعا ما يفوتنيش ان أنا أشكر "عشرينات" كتابا و قراءا..و هي المكان الأول اللي اتولدت فيه سوسة المفروسة..قبلهم ماكنتش كتخيله ان حد ممكن يتكلم بصراحة في كل المجالات..و قبلهم ماكنتش أعرف ان فيه شباب بتفهم في اللي بيحصل حواليها و مصممة تغيره..و لولا قرائها و تعليقاتهم اللي كانت دايما بتشجعني .ماكانتش جاتلي الشجاعه اني أعمل بلوج..ولا كان هيبقالي الشرف اني اتعرف عليكوا

أنا عارفه ان الموضوع بالنسبة لناس كتير منكم يمكن عادي او بسيط ..بس بالنسبة لي كان حلم اني أشوف كلام كان مجرد فكرة بتدور جوة دماغي..إتحول لحروف ملموسة على صفحات جريدة الكل يقدر يقراها..و أقدر أحتفظ بيها للأبد......يا رب كل واحد فيكوا عنده حلم و لو بسيط ولو مايهمش حد غيره ..يحققه

لينك المقال في الجريده أهه للي عايز يتفرج..بس الجريده الورق أحلى

http://www.al-araby.com/investigations.htm

http://www.al-araby.com/articles/1022/060820-1022-inv07.htm

57 comments:

Lasto-adri *Blue* said...

قلت ابارك وأهنى

الف مبروك وعقبال ما تبقى صفحة كاملة ان شاء الله

Ahmed Shokeir said...

بسم الله ماشاء الله
والله حاجة تفرح دلوقتي المدونين عمالين يكتسحوا ويثبتوا ذاتهم

بالرغم من خفة دم بوست شعبولا وماوراءه من معنى ولكن كان نفسي يكون بوست أحمدي نجاد هو اللي منشور

بصراحة من البوستات القليلة اللي قريتها على أصحابي وعجبتهم

مبروك ياسوسة

Nouran said...

مبرووووووووووووووووك والله لانزلها ف النشرة دلوقتي هوا انزلها انا فرحتلك اوي ع فكرة ده اانا عملت فرح لما اسم شمعة بس نزل ف الجرنان واتقال ع التلفزيون انت من حقك توزعي شرباات ع كل البلوجرز
ومبروووووووووووووك تاني مرة

كلبوزة لكن سمباتيك said...

لولولولولولولوي
الف مبروك
و انت من هذا المزنق لازم تقدمي كل دعم لوزارتك المباركة


اخترناكي اخترناكي
يا سوسة و احنا وراكي
ابقي اكتبي اسمي المرة الجاية
بس لو اتقبض عليكي حتبرا منك:)
سلامي لبابا
خالص تحياتي

الأميره أوسه said...

هيهههههههههههههههه
تعيش سوســــــــــــــــــــه
الــــــــــــــمفروسـه
الف مبروك
عارفه لو مكنوش زكروا أسمك كنت روحت رفعت عليهم قضية نفقه وخدت العيال أقصد المحررين وربيتهم عندى فى المدونه
لوولولولوووووووووولو
ألف نهار أبيض ياسوسه عقبالنا لما نمسك الصحافه فى البلد وأنا أمسك الصحافه الصفراء وكلبوزه الصحافه الحمراءء
بدل المدونات اللى بتنشرها على سطوح الجيران متنسيش بقا الحلاوه
سلمى على بابا ياسوسه وقوليله مش عاوز عروسه أصله وش حلو والنعمه
وأبقا زى مامتك
العووووواف

الأميره أوسه said...

صحيح شوفتى صورة أحمد سكر
بصى كده هو بيعمل أيه
أيه يا أحمد أنت بتستحما فى البلوج
لا ده باينه بيرش على نفسه جاز
والله منا عارفه بيعمل أيه
يا حول الله يارب كان كويس

Ahmoss said...

الف مبروك يا سوسة
صحيح أنا لي سؤال ..... عايز أعرف انتي بتشتغلي إيه ولا طالبة في أي تخصص؟
أصلي بصراحة شايفك موهوبة وهازعل جداً لو كنت طبيبة أسنان مثلاً لأن ده يعني أن فعلاً المواهب عندنا بتتوجه غلط
مبروك مرة أخرى

محمد أبو زيد said...

ألف مبروك
وعقبااااااااال ما تبقي رئيس تحرير قد الدنيا

Anonymous said...

مصرى متغرب
الف مبروك ياسوسة وعقبال يارب مايبقى جرنال بالكامل زى الاسبوع او الدستور او حتى الوفد بس انا كان نفسى وانتى بتدعى وبما انها كانت ساعة اجابة وابواب السما مفتوحة ماتنسيش تدعى لشعب مصر ان ربنا يخلصوا من الى بالى بالك ايوة اقصد اللمبى

Less than perfect said...

مبروك يا سوسة

أنا كمان شوفت الموضوع فى العربى و قعدت أوريه للعيله..خاصة ان بوست شعبولا ده كان حلو جدا

karakib said...

mabrok ya sosa |:D wy 3o2bal ma yetnesher lik tany wy talet wy rabe3

antouk

NoOR said...

الف مبروك وعقبال ما تبقي كاتبه في جرنان محترم - اكيد مش من جرايد الحكومه يعني- واوعدك هبقي اجيب الجرنان

أُكتب بالرصاص said...

والله وباضت لك في القفص يا أوسة ...قصدي يا سوسة

طيب هما نشروا المقال بس والا المقال بالتعليقات بتاعته
لاني فاكر اني كتبت بوقين حلوين تعليقا على المقال اللي ما قرئتهوش اصلا

على فكرة
انت ممكن ترفعي قضية على الجرنال علشان نشر حاجة لك بدون ما يرجع لك
وتقبضي تعويض محترم غير بقى الشهرة العريضة
:))))
إحنا جايين نهدي النفوس

HANY said...

مبروك يا جميل وأوعى تنسينا بقى لما يتقبض عليكى ابقى افتكرينا كده ولو حتى بسنتين سجن

مبروك مره تانية

Anonymous said...

هيييييييييييييييييييييه
مبرووووووووووووووووووك يا سوسة
شايفة يا بنتي برج الجدي
ح توصلي يا بنتي
ويبقالك جريدة بتاعتك
وانا اخد صفحة الفن لو سمحتي
وكلابيزو صفحة المطبخ
واوسة صفحة المرأة
ههههه

لا واستني هنا
انا باقرأ الجرنال زيك من الاخر
ههه عادة غريبة
وايه اللي سيادتك كاتباه هنا ده
بلاي ستيشن ايه و الانسان الاول
ههههههه
انا وقعت من الضحك
و التعليقات كمان
ههههه

سلامي يا قمر
زغرطوا يا بنات
لولولولييييييييييييي

hero said...

شفتي يا سوسة كلامي طلع صح
مبروك يا ستي

توهة said...

ألف نهار مبرووووووووووك
اللى أعطاكى يعطينا
شوفتى وشى حلو عليكى إزاى أول ماعلقت عندك نزلك مقال فى الجرايد
حد عايز بقى يتنشرله مقال فألعق عنده


يالله أهو كله بثوابه أوعدنا يا رب بركاتك يا فنتازيا

الدرويشه فانتازياااااااااااااا

توهة said...

على فكره مش عارفه أعملك لينك عندنا خالص كل مأدخلك البلوج يتعفرت إيه الحكايه انتى مفيرسه لينكك ولا إيه


مداااااااااااااد فانتازيا مدد

الدرويشه فانتازيا

سيبها على الله said...

ياللا ياسوسة يامفروسة ...على الاقل يكون لينا واسطة وتنشر لنا حاجة دة احنا كمان غلابا...
سوسة والله فرحتلك من كل قلبى ويارب انام واصحى الصبح والاقيك صحفية اد الدنيا بس ياريت ماتغيريش اسمك...يفضل سوسة المفروسة واللى كان له فضل كبير عليك..المهم ماتنسناش ياسوسة وحنا درب كفاح واحد ....
خاص تمنياتى لك بمزيد ومزيد من النجاح والتوفيق

...دنيتي said...

مبروووووكك
والله انتي فعلا تستاهلي :)

Khaled gad said...

مبروك يا سوسة.. بجد حاجة تفرح و تدى أمل فى التدوين
ياريت القصة دى تنتشر علشان تحمس كل الشباب انهم يدونوا

ابعتى الموضوع ده لوائل عباس صاحب مدونة الوعى المصرى خليه ينزلهالك فى العدد الجاى و برضه ابعتيها لمالك ينزلهالك فى موقع كفاية و ابعتيها لعلاء ينزلها عنده برضه

لو عملتى كده مدونتك هتشتهر جداااااا

دلوقتى بعد الشهرة بقى عليكى مسئوليات كتير

انا فرحتى فرحتين علشان مدونة زميلة و صيدلانية زميلة برضه

دلوقتى كل المدونين هيبعتوا للجرايد علشان ينشرولهم و هتبقى موضه

Ahmoss said...

يا سوسة مدام إنتي صوتك أصبح واصل للناس أرجوكي زوري مدونتي وساعديني في الموضوع الأخير ,,, شكراً ومبروك

كلمه said...

2lf mabrook ya m3lm .......matetswresh 2na fre7t 2d 2eh :D

Anonymous said...

اتنين مبروك يا سوسة يا مفروسة..
مبروك ليكى وأنتى عارفة ليه..

والمبروك التانى ليا ولو عاوز تعرفى ليه ادخلى على الموضوع ده وشوفى كده أخر التطورات

http://www.rewayatnet.net/forum/showthread.php?t=21822

ودى الصفحة التانية

http://www.rewayatnet.net/forum/showthread.php?p=428545#post428545

:)

soosa el-mafroosa said...

lasto-adri*blue*

أول تعليق هنا و كده بقوا مناسبتين سعيدتين

ahmed shokeir

شكرا يا فندم..طالما عجبك بوست نجاد .و شرف ليا انه عجبك.دعواتك يمكن يتنشر..

nouran

شكرا يا شمعتنا ..أا شفت النشرة ..مردودالك انشاء الله .و الشربات عندي ماتقلقيش

كلبوزة

ماشي يا ريسة ..حلوة الزغاريط..بس مش حلو البيع ..معانا في الفرح و في السجن هتخلعي ..مش قصول دي يا زعيمة..و بعدين لعلمك أنا من أول قلم هاقوول على طول

soosa el-mafroosa said...

aoossa

الله يخليكي يا أوسه يا أوختي ..عقبالك يارب ..أصيلة ياختي مانجيلكيش في قواضي و لا نفقة و لا حاجه من دي ..بابا مش عايز عرايس و لو جاتله عروسة هطفشها ..خلينا حبايب أحسن

آه شوفتي الصورة بتاع أحمد ..يا عيني يظهر من كتر البترول بتاع السعودية بيوزعوه ع الناس عشان يولعوا في نفسهم ...أمال لو كان قاعد هنا في مصر كان عمل ايه؟؟

ahmos

الله يبارك فيك..إشمعنى يعني طبيبة أسنان ..عموما مابعدتش كتير أنا للأسف صيدلانية ..أخطأت الطريق معلش ..الأمل في الأجيال الجاية انشاء الله

محمد أبو زيد

شكرا ..من بقك لباب السما

مصري مغترب

الله يبارك فيك ..يا رب يا رب يبقى عندي جرنال و أنا أشبرقكم كلكم

ههههههههه
حلو اللمبي ده ..ملعوبة

soosa el-mafroosa said...

eni_ra7ela

ألف شكر ..أول تعليق ..المدونة نورت
و سلامي للعيلة

karakib

شكرا يا أنتوك..يارب يارب ..إدعيلي

noor

لو بقيت كاتبة في جرنال أوعدك أنا هاشتريلك الجرنال على حسابي كل يوم

mizo

شكلك كده م المنوفيه و هتبلغ عني ...صح؟؟

soosa el-mafroosa said...

اكتب بالرصاص

ايه ده ايه ده؟..يعني إيه ما قرتش البوست ..ده بقه مشهور و الناس كلها قرته ..لأ كده هازعل ...بس على فكرة اتنشر لوحده من غير التعليقات

hany

الله يبارك فيك ..سنتين بس ؟ ..ليك علي انشاء الله مش أقل من 25

epitaph

الله يبارك فيكي يا جميل ..يعجبني فيكي انك دايما بتفتكري اللي حواليكي ..بس انتوا قسمتوا الجورنال و الا ايه ..إدعيلي انت بس و انا أديكوا الجورنال كله مش عايزة غير صفحة الحوادث و الإعلانات

hero

وش السعد ..و الله وشك حلو..ألف شكر انت أول واحد بلغتني و الا ماكنتش هاعرف خالص ..شككككرا

فانتازيا

بركاتك يا ستنا...وشك سعد علينا ..خليكي ورانا كده لما نوصل لل سي ان ان

بس لازم تضيفيني عندك و الله مانا مفيرسا اللينك و لا حاجه..وناس كتير ضايفاني..حاولي تاني بس

soosa el-mafroosa said...

سيبها على الله

ألف شكر ..على فكرة انت ليك مكانه خاصه عشان انت أول واحد علق في البلوج ..شكرا و دعاوتكم

دنيتي

شكرا يا جميل..الله خليكي

بحب مصر

الله يبارك فيك يا زميل..وائل عباس و مالك ؟؟؟مممممممم مش عارفه أنا أصلي ماشيه جنب الحيط عموما اشاور عقلي و أقولك

على فكرة أنا مابعتلهمش حاجه ...هما اللي نشروا لوحدهم

كلمه

ماشي يا ريس.. أدام الله الود..منورنا كده على طول

الغريب

شكرا يا غريب ..إيه الكلام الحلو ده ...أخجلتم تواضعنا

أحمد

شكر ليك و مبروك و شكرا في نفس الوقت ..انت تشرفنا في أي وقت و تاخد أي حاجه ولا يهمك..بس مع كتابة اسم البلوج زي مابتعمل ..مشكور

farida said...

زغروطه حلوه و طويله
علشانك يا جميل
الف مبروك فعلا
انتي تستهالي جدا
خفة دمك شربات
عقبال ما تكتبي في الصحافه


احلى حاجه فيكي ياسوسه طريقة وصفك للموقف
حسيت اني معاكم في بيتكم واقفه اتنطط على الكنبه و ماسكه الجرنال في ايدي

يا حبيبتي الف مبروك و عقبال كل بوست
يتنشر في احسن الجرايد

عمر said...

مبروك عاليكى ياست سوسه عقبال الصفحه الاولى

salateenoo said...

مبروك...
لكن هل مفيد لك فعلا ان تنشر إحدى تدويناتك على صفحات الجرائد....
هل اصبح الغرض من المدونات هو الوصول إلى الصحف المنشورة...مش عارف...
انا كان متهيألي إن المدونات دي حاجة شخصية....

الأميره أوسه said...

على فكره الموضوع نزل فى مدونة علاء
بس صحيح أنت دكتوره صيدليه
زى شهرزاد كده
طيب فين الترامادول والذى منه
الناس لبعضيها
وبعدين مطفشيش العرايس بتوع بباكى
حرام كده خلى الراجل يتبسط

Anonymous said...

سووووووووووووسة
الف مروك يا حبيبتى واللة لسة اللى فتحت البوست دة دلوقتى وشفت الجريدة من هنا كمان..ايوة كدة خللى الناس تعرف ان فيه حد لسة عايش فى المخروبة دى...عقبال رئاسة التحرير يا سوسة..بس اوعى تنسينا يختى وقتها..اصل الكراسى بتغير ههههههه...واللة انا عن نفسى الموضوه دة لة اهمية كبيرة اوى متتصوريش ازاى...اولا لان هنا مبقاش مقتصر علينا احنا بس البلوجرز يعنى...ثانيا بقا يا حلوة خللى بابا يمسك نفسه شوية احسن ريحتك تفحفح كدة ويعرفوا يشدوكى من قفاكى ازاى...الف الف مبروك وسلم لى على بابا ...اموووة اموووة

Dr. Tantawy said...

ألف مبرووووووك

الواحد فعلا مبيكونش متوقع ولا مستنى انه يتنشرله اي حاجه لكن وقت ما بيشوف شغله على صحفه مجله او جرنان بيكون فرحان بيها جدا :)) عارفه اول مره يتنشرلي موضوع عملت ايه :)) بروزته و علقته على الحيطه هههه و كنت على وشك ادبح فرخه و اوزعها على الفقرا
مش هحبطك في فرحه اول موضوع لأنها بجد بتكون بالدنيا كلها .. لكن اهم حاجه .. خلي نشر مواضيعك دايما يكون بموافقتك انتي .. متخليش العيال اللي ماسكين الجرايد اليومين دول يستسهلوا و ياخدوا موضوعات من عندك و ينشروها .. اوكي يا باشا

Dr. Tantawy said...

نسيت اقولك .. همه كانوا تايهين عنك فين من زمان :))) بجد من اول يوم قرأتلك فيه كنت شايف انك تستحقي تبقى كاتبه في جرنان من النوعيه اللي بنحب نقراها زي الدستور او اضحك للدنيا
يالله ربنا يجعلها فاتحه خير عليكي

عبدالله مفتاح said...

مبروك يا سوسة الف مبروك انا حاسس بشعورك
لان الموضوع ده حصل معايا بردو لقيت تعليق ليا منشور في العربي بردو
وبعت لمجلة الشباب مرة اقتراح واتنشر
شعور جميل ان الواحد يقرا كلامه وتحتيه اسمه

Khaled gad said...
This comment has been removed by a blog administrator.
Ayyam said...

ألف مبروك ياسوسه ديه حاجه تفرح طبعاً وأتمنى إن شاء الله أن يكون تأثير المدونات إيجابى على القراء بتوع الجريده ويزيد عدد المدونين بالملايين
أحلى سلامات

sherefins said...

الناس مقامات ناس بتكتب عشان الناس تقراء وناس تكتب عشان يتاخد اللورق المكتوب عليه عشان يتفرش علي السفره ساعه الاكل وانت البلوج بتاعك من النوعيه الاولي شدي حيلك وربنا يوفقك انت وكل البلوجز اصحاب الاراء الجيده

tota said...

سوسة
مبروك عليكى
انت صاحبة اسلوب مميز واقل شىء ان ينشر لك فى صحيفة يقرئها الملايين
يعنى خرجتى لمجال العالمية
الف مبروك عليكى ولينا
تحياتى

lastknight said...

الف الف مبروك يا سوسه ... فعلا فرحان بيكى قوى .. و باركى لباباكى قوى بالنيابه عنى .. قوليله عمو فارس قديم بيقولك مبروك .. و عقبال ماتفرح بيها و هى عروسه .. و قوليله أن ربنا أنعم عليه ببنت موهوبه فعلا .. فبلاش يضيق عليكى فى الكتابه ..
ألف مبروك و عقبال ما أشوف بنتى ناجحه زيك كده

Adel said...

هو في ايه يا سوسة ايه اللي حصل الواحد دماغه مقلوبة هي الخلق دي بتهلل ليه هو احنا خدنا كاس الامم تاني ولا الليمبي مات قولي قادر يا كريم ولا هما فرحانين لك علشان موضوعك نزل في الجورنان .... والله عيب المفرض ان احنا ما نهنكيش انت احنا نهنيء الجورنان اللي لطش كلامك ههههههههه ويارب يا ستي كده لما الاقي عندك جرنان ننشف عليه البطاطس انا نافوخي لاسع والله لسه راجع من رحلة استجمام في معهد القلب فواضح انهم سقوني حاجة مبروك لغاية ما اجيبلك الزيارة والواجب واجي

اروي الطويل said...

والله انتى عسل خالص بس حرام عليكى بطنى وجعنى من كتر الضحك وبعدين انا خايفة عليكى وانتى فاهمانى يا قمر

soosa el-mafroosa said...

mizo

ماشي يا سيدي ..هاصدق المرة دي..يا رب يا سيدي تبقى وزير عشان لو حصل حاجه أبقى آخد منك كرت يمكن ينفعني

farida

شكرا يا قمر..و الله دانتي تنوري الصالة بتاعنا

إبـ راهـ يـ م

ألف شكر يا دكتور ..أخجلتم تواضعنا

Anonymous said...

where are you lovely soosa,,,it's been a while now...hope you're ok..capri gal...dear..can you contact me on my email pleas.e.because I could find yours,,!! it's important dear.thankss in advance..w mat3'beesh 3alina!!

soosa el-mafroosa said...

عمر

شكرا يا عمر..سلملي على بابا


salateeno

كل واحد بيحب الناس تقرا كلامه ..عشان كده كلنا بنفرح مثلا بالتعليقات اللي بتجيلنا على البوستات زي تعليقك ده

aoossa

شفته..أيوة يا بنتي صيدلانية و عينيا الإتنين ليكي ..مش عايزة باركينول؟

بابا مستريح كده ..و بعدين ياختي مش عايزة مرات أب ..هو أنا ناقصة

soosa el-mafroosa said...

shahrzad

شكرا يا عسل ..بابا ؟..مانا بقولك شكله كده هيوديني في داهية

zangoolaaa

ألف شكر يا زنجولا باشا..تصدق حلوة موضوع البروزة دي ..هاعملها

إدعيلي كده أكتب في حتة من دول انشاء الله

فاقد الهوية

منور البلوج و الله يبارك فيك ..و أهلا بيك في عالم التدوين

soosa el-mafroosa said...

عبد الله مفتاح

شكرا يا عبد الله و عقبال مايتنشرلك كمان و كمان

بحب مصر

ألف مبروك ع المدونة الجديدة

حاول تفتكرني

و انا رقبتي سدادة يا رجاله

ayyam

شكرا ع التهنئة و على حضورك للمدونة

soosa el-mafroosa said...

sherefins
ألف شكر ع التشجيع ..منورنا دايما انشاء الله

tota

ألف شكر يا قمر ..عقبالك

lastknigh

ألف شكر يا عمو ..هاقول لبابا شكلكم هتبقوا صحاب ..ربنا يبارك في بنتك يارب


المزاجنجي

حمدالله ع السلامه ..ايه يا راجل معهد قلب ايه و بتاع ايه؟ ...أمال فين الشباب بأه

عايز تنشف ع الجرنال البطاطس مافيش مانع بس تقراه الأول ..أنا مستنيه الزيارة

أروى الطويل

و النبي انت اللي سكر ..متخافيش ..كله في الخفيف

epitaph

i will contact you

Adel said...

شكلي كده جيت احج وهاجاور انت مالكيش حل عموم كنت جاي ازور وامسي واطمئن عليكي لقيتك عاملة بوست تحفة وانا علقت عليه تعليق مقتضب بس انت فتحتي باب واسع قوي وممكن نكتب فيه للصبح نهايته اقعدي بالعافية لغاية لما ارجع لك ببوست من العيار التخين ده وربنا يقدرنا ونبقى على مستواك وعموما انا فاضح الدنيا وبقول ان انا اعرف المفروسة دي واهو نتمحك فيك يا باشا ربنا يخليكي للغلابة

دسوقي said...

ألف مبروك ياست سوسة وعقبال المفروسين التانيين
طالب طب مفروس

soosa el-mafroosa said...

المزاجنجي

ربنا يخليك اخجلتم تواضعنا..بس أوعى حد م اللي بتقولهم يطلع امن دوله

د/دسوقي

انت كمان مفروس..أهلا تعالى فضفض هنا تجمع المفاريس

eZz said...

mabrouk ya sosa :) sharaftena

Anonymous said...

الف مبروك

Anonymous said...

الف مبروك ياسوسة بجد يا سوسة جربى حظك فى الصحف المعارضة هتبقى حاجة هايلة جدا

صوت من مصر said...

سوسه فعلا مدونه لها الاهميه للمتابعه ارجو منك متابعه مدونتى
http://sotmser22.blogspot.com/