Friday, October 31, 2008

نهى و فاروق و أشياء أخرى

من أعمال الوزير المثقف الفنان الديمقراطي الليبرالي العالمي فاروق حسني







1-و إذا كانت نهى رشدي صحيح إسرائيلية ..رغم إنها أثبتت إن ده مش صحيح..لكن حتى إذا كانت..هل من حقك تمد إيدك و تتحرش بيها في الشارع؟..دي رخصة مثلا والا حاجة؟



2- روقة الجن رجع تاني و بيصرح بإن الأديان الأرضية لازم تحترم و اللي بينكرها جاهل و متخلف ..حد يفهمني الراجل ده لسه قاعد على كرسي الوزارة ليه لحد دلوقت؟..ما فيش في البلد مثقف غيره والا عشان مصر تثبت إنها متسامحة مع المواطنين السيكو سيكو والا إيه بالظبط؟


3-شرطة المترو قبضوا على شابين كسروا زجاج فرملة الطوارئ و شدوها عشان المترو قفل و فصل أم عن بنتها الطفلة الصغيرة..الإتنين دول إتقبض عليهم بعد الجريمة البشعة اللي عملوها دي في الوقت اللي ماحدش عارف فيه مصير السواق اللي قفل الباب على رجل شابة و إتسبب في إنفصال راسها عن جسمها و مقتلها الأسبوع اللي فات قبل شهر من جوازها ..لكن عموما بنحيي إدارة مترو الأنفاق ..على الأقل فرملة الطوارئ إشتغلت المرة دي



4-مدرس في المحلة نزل ضرب في 15 تلميذ بعصاية المقشة و العيال إتنقلوا للمستشفى ..15 تلميذ ..في سنة ستة ؟...المشكلة مش في إنه ضربهم ..المشكلة إنهم سكتوله ..كانوا إتلموا عليه هم ال15 و ظبطوه ...إيه العيال الخرعة دي؟

22 comments:

AHMED SAMIR said...

نهى فاروق.....غامضة ومريبة
فاروق حسني.....دة العادي بتاعه
مترو الانفاق.......حظهم ان الفرملة اشتغلت دة شيء نادر حدوثه
عيال المحلة....انتي مش عارفة الاجسام اليومين دول عاملة ازاي..تحسي ان العيال عندها بلهارسيا مزمنه
تحياتي

ihapoof said...

أنا مش هعلق على البوست .. أنا بس غايظنى أوى الصوره

اللوحات بتاعت الفنان ده كلها كده تحس أن عيل صغير اللى رسمها فى حصه الرسم
مش معقوله التع*** حتى فى الفن

هو عشان وزير يعنى ؟ :)

بنحيبااك يا روووووقه

Geddo Iskandar said...

lol :D

نهي فاروق -ماري جبرائيل - جولدا مائير ... يلعن أبو الإزدواجية !!

فوفو بقى خلاص بيودع ... أدينا مستنينه الكام شهر دول على ما يغيرو الوزارة ... مش خلاص ظرفوه شلوت اليونسكو ده - دي معناها إنه باي باي خلاص
إعتبريها حلاوة روح ... أو فرفرة ;)

نيران said...

اللوحة بتاعة العبقري ابن العباقرة.. هبلة اوي
و للأسف مش قادرة اعمل فيها البت التجريدية اللي بتفهم في الفن.. عشان دا لو فن.. يبقى ابو الفن..

نهى فاروق.. اللي حصل معاها مرفوض بكل المقاييس، و إشاعة ان محاميتها ناوية تسيبها و تدافع عن المتهم اللي فعليا اتحكم عليه دا عبط.

الاتنين بتوع المترو.. عشان يحرموا يمنعوا المصايب عن الشعب المصري
و ادي جزاة الحكومة اللي عاملة فرامل بتشتغل.

عيال المحلة..
طب ما حاجة و سبعين مليون مواطن بياخدوا على قفاهم من حكومة واحدة..
مش كان المفروض يتلموا عليها يضبطوها

تحياتي

محمد عبد الغفار said...

متأكده ان الرسم ده بتاع الوزير مش بتاع عبد الرحمن ابنى

محمد عبد الغفار said...
This comment has been removed by the author.
momken said...

من أعمال الوزير المثقف الفنان الديمقراطي الليبرالي العالمي فاروق حسني
ـــــــــــــــــــــــــــ


والله زعلان منك

دى فاضل نقول عليه الصلاه والسلام

دهيه تشيله هو وكل الحكومه الى شيلاه
انا بدعى ربنا ياخدوة اليونيسكو علشان نخلص منه


وزاره التربيه والتعليم ريحتها طلعت جداً
وكل يوم فيها نصيبه
من ساعه تصرب اسئله ثانويه عامه
لحد مقتل الطفل اسلام
لحد الخمستاشر دول

ياوزير التعليم

الى عنده دم اجدع من الى عنده وزاررررره


تحياتى

tota said...
This comment has been removed by the author.
tota said...

ازيك اولا ووحشانى جدا
الصورة كلها ابداع مش عارفة ازاى مشوفتيش فيها الروح مش الرسم ركزى كده وشوفى وانتى هتعرفى لو معرفتيش روحى عند الخالة بهانة تفكلك العمل علشان تشوفى الارواح

ووجود روقة فى الوزارة اثبات لنظرية النشوء والارتقاء ان الانسان كان اصله قرد

حلال التحرش باى واحدة لا تحمل الديانة المصرية والله اعلم ده حسب قرائاتى المتعدده فى كتب فقه السلاطين

الولاد يلعبوا ليه فى الفرامل افرض انها ما شتغلتش مش كان زمان الدنيا قامت مقعدتش على ان ليه الفرامل ما شتغلتش ومين لعب فيها ولمصلحة مين يكون فى فرامل مش شغالة فى المترو ومش مهم الست وعيالها هى دى مين دى من العائلة المالكة ولا حاجة

وزارة التربية والتعليم تؤمن ان التعليم تهذيب واصلاح ومن لم يربيه ابوه وامه تربيه الوزارة ومدرسيهاواللى عنده كلمة حلوة يقولهاوالا يناله من التهذيب ما يستحقه

بنعلم العيال ليه ما يقعدوا فى البيوت بكرامتهم بدل ما يخرجوا ويرجعوا بعاهات او ميرجعوش

واجعة قلبى انتى ما انا كنت ساكتة وفى حالى اقول فيكى ايه دلوقتى
وحشتينى

يا مراكبي said...

حلوة نشرة أخبار الأشياء الأخرى دي

أحلاهم رابع حاجة

كانوا إتلموا عليه وظبطوه .. هههههه

حلوة اللوحة جدا .. أنا مش عارف إزاي إنتي مش فاهماها .. إتثقفوا شوية بقى

ساعد نسرين الايمن said...

لوحة غريبة
وامراة ترفض التحرش
وفرملة تودي الي سجن شابين
وعصاية مقشة في الفصل
تبقي انتي اكيد اكيد في مصر

فاروق حسني هو الفنان السيكو سيكو الذي لا يشيخ
بينما نهي فاروق هي المراة الحديدية
الشابين اخطاوا فكان لازم يذهبوا حيث التهذيب والتاديب والاصلاح
بينما رئيس هيئة المترو ياخد مكافاة علي عمله اللي ربنا هيعاقبه عليه في الاخرة
المدرس : مش معقول يفضل ينضرب من مراته وبس
لازم يرد

في النهاية
انت مدونة زي العسل فعلا

حكيم النيل said...

بوست جميل لكن بالنسبة للوحات فاروق حسنى مااعتقدش ان ليها علاقة بموقفه السياسى تقييم دى مايكونش مرتبط بدى
لكن عموما المدونة رائعة

صدى الصمت - عاشقة الورد - said...

يا ترى انتى متأكدة إن اللوحة منشورة صح؟ أصل أنا إفتكرتها مقلوبة

Ahmed Shokeir said...

بالرغ من من إختلاف موقفي عن الجميع في فاروق حسني

إلا ان الصورة مش عارف ليه بتديني إيحاءات قلة أدب

موناليزا said...

نهى بنت جدعة بغض النظر عن جنسيتها
فاروق بدون تعليق
والباقى حسبى الله ونعم الوكيل

موناليزا said...

نهى بنت جدعة بغض النظر عن جنسيتها
فاروق بدون تعليق
والباقى حسبى الله ونعم الوكيل

gandweel said...

كتبوا عليكو في المجلة دي

http://www.shabab20.net/أنترنتيـات/tabid/153/newsid554/202/orgMid/554/language/ar-JO/Default.aspx

ذو النون المصري said...

روقه الجن و اول الغيث قطره
فاكره طبعا البوست ده
و باعتبره البوست التاريخي في هذه المدونه لانه كان فعلا ملحمه حواريه كانت الاروع حتي الان
و اعتقد انه كان السبب في معرفتي بالكثير من الناس هنا بعضهم صاحبته و بعضهم ابتعددت عنه

FREE EGYPT said...

فلتسمحي لى بهذه المساحة الإعلانية

اذا أردت ان تكتشف من وراء مقتل سعاد حسنى ، فالاجابة لدى فى المدونة

سري للغاية
www.toptop-secret.blogspot.com

SaSo said...

لا بس اللوحه جامده,فين الكتالوج بتاعها؟
يخربيت ميتين ابداعاته

Anonymous said...

دردشة شات بنت مصر ، دردشة مصرية - مجتمع مصري ترفيهي للمرأة المصرية
دردشة
بنت مصر
شات بنت مصر
دردشة بنت مصر
شات مصرى
دردشه مصريه
شات بنات مصر
دردشة مصرية
دردشة بنات مصر
بنت مصر
دردشة مصر
شات مصر
شات بنت مصر - دليل الدردشات
دردشة بنت مصر،شات بنت مصر،بنت مصر،العاب بنت مصر
دردشة بنت مصر،شات بنت مصر،بنت مصر،يوتيوب بنت مصر
شات بنت مصر،دردشة بنت مصر،بنت مصر،جوال بنت مصر
بنت مصر،دردشة شات بنت مصر،توبيكات بنت مصر
دردشة بنت مصر،شات بنت مصر،بنت مصر،مطبخ سيدتى بنت مصر
دردشة بنت مصر،شات بنت مصر،بنت مصر،الازياء والموضة بنت مصر
شات بنت مصر،صور الماسنجر،صور دردشة بنت مصر
شات،شات كتابى،شات بنت مصر،شات مصرى،مصري

milla said...

very good blog, with much information and very comprehensive look details, it reminded me buy viagra that is very good too!