Monday, November 10, 2008

جوه فصل خمسة أول




و إيه يعني أوباما كسب الإنتخابات المريكية

و إيه يعني هيبقى أول رئيس أسود للبيت الأبيض

مش مهم خالص إنه خرج من أقلية مستبعد إعتلاءها لكرسي الرئاسة

مش محتاجين ننبهر كل الإنبهار ده بيه لأننا عندنا حد نجح في إنه يعمل الل عمله منذ مايقرب من 20 سنة

الزمن كان 1989 المكان هو 5/1 و الشخص هو حضرتي

فشخصي العظيم تم إنتخابه في عام 89 لرئاسة فصل 5/1 رغم إني كنت من أقلية أقلية يعني

واحدة من 6 بنات في فصل فيه 47 ولد

قصة كفاح عظيمة بدأتها من أولى إبتدائي بعد ما كونت تشكيل عصابي من كل بلطجية الفصل كنت أنا زعيمته,,مرورا بأوقات كتير كنت باطنش أكتب أسامي الناس على السبورة عشان ما ياكلولهمش 3-4 خرازانات على لريق

إنتهاءا بالخطة الإنتخابية الجبارة لتوفير سندوتشات اللانشون و الجبنة الرومي لمراكز القوى في الفصل على حساب السيد الوالد

لكن بغض النظر عن كل الخطوات الذكية المغلفة بالذكاء الحزب وطني دي

كان فيه 47 ولد ..إنتخبوا بنت من 6 بنات في الفصل...عشان تبقى رئيستهم

كان فيه مجموعة من المصريين إنتخبوا إنتخاب حر و إختاروا بإرادتهم شخص لمجرد إنهم شايفين إنه الأصلح و مافيش حد حاول يأثر عليهم و لا يمنعهم من ممارسة الحق ده

لما كبروا ال47 ولد دول


مين اللي خلاهم سلبيين و غير مباليين



و مين الي خلاهم يصنفوا المرشحين على حسب دينهم أو جنسهم مش على أساس صلاحيتهم

مين اللي خلاهم يكرهوا يأدوا دورهم و ينسوا يعني إيه بطاقة إنتخابية و لجنة و صوت؟

مين اللي كتم و لسه بيكتم صوتهم

و لمصلحة مين

الإجابة يمكن واضحة ..بس برضه لازم أسأل نفسي السؤال




بابص لبلدنا و أحوالها الإنتخابية

و ديمقراطيتها التي تدعو للرثاء


و أتمنى من جوايا لو كانت بلدنا كلها جوه فصل خمسة أول

( يمكن ساعتها أبقى أنا رئيستها ؟..والا بلاش أنا ليا أهل عايزينني يا خويا)



20 comments:

حمدى جعوان said...

بارييييت يا سوسة ياريت مصر كلها 5/1 ويلا ياستى تبقى الرئيسه ولا يهمك.. " بس خلى بالك اكبد هيخترعولك تهمه يعنى " ولازم مقالتك دى توصل لاوباما باشا علشان يعرف ان فى بنت مصرية عملت اللى هو عمله قبله بسنيييين .. " كنت هنسى انا فضلت اقرا كلمة "مايكلولهمش " خمشتاشر مره على ما فهمتها.

AHMED SAMIR said...

اللي خلى ال 47 ولد كدة
انهم حسوا انهم مالهمش لزمة...صوتهم زي الساعة الاوميجا لا بتقدم ولا بتأخر
اللي عمل فيهم كدة هو اللي همش دورهم وحسسهم انهم كائنات مهمشة
كفاية بقى ماتقلبيش علينا المواجع

None said...

والله عندك حق

أحمد سعيد بسيوني said...

ياريت كنا كلنا في فصل خامسة اول

صاحب المضيفة said...

خليكي في 5/1 احسن


اهلك اولى بيكي برضو


:):):):):)



تحياتي

momken said...

ههههههههههههه

والله انتى فقريه

طيب ممكن اكون فقرى زيك واقولك يمكن السبعه واربعين ندموا على فعلهم المشين
والغلطه الغريبه الى ارتكوها لما اختاروكى
هههههههههههههه
طيب متزعليش

السبعه وارعين سالبين فى تصويتهم

هل انتى ايجابيه فى ترشيح نفسك
ولا انتى اكثر سلبيه منهم؟؟؟

لما السبعه واربعين دول يلاقوا شويه ناس مضحكين مرشحين نفسهم لرئاسه الجمهوريه
الى زى مش عارف ايه الصباحى
والتانى بتاع الوفد الى بينادى بتداول السلطه وهو مش عارف يعمل تداول سلطه فى حزبه
والاستاذه الغريبه فى شكلها وارائها وكمان مش عايشه فمصر

تفتكرى ممكن يختاروا مين
اعتقد ان الاشرف ليهم السلبيه

تحياتى

صدى الصمت - عاشقة الورد - said...

فكرة البوست جميلة وجديدة وشقية
ربنا يوفقك ، تحياتى

Anonymous said...

مفروسه هانم انا طبعا اؤيدك تأييد تام بس على فكره هما ممكن يكونوا هيختاروا الحلوه اللي هتشيل بلاويهم
بس جايز تحصل.. يقولوا جايز تعمل حاجه مقدرش حد فينا يعملها و في الحالتين مش خسرانين جايز يكسبوا لكن كده كده هي اصلا بايزه .. محاوله جيده جدا منك
و اخبار بقى خامسه اول ..سلام يا جميل

Anonymous said...

نسيت اوقع ..مروه فايز.. لحسن تشبطي في جميل

عاشقه وغلبانه said...

من علي اخر دكه في فصل 5/1 نحيكم
الواحد نسي الحاجات دي السبوره والطباشير والسندوتشات في وسط الحصه واقف علي التلاميذ نكتب الاسامي
ذكريات....
خلينا في هم الانتخابات
مش عارفه بيعملوها ليه طالما هو اللي بينجح عالطول
يارب اعيش واشوف يوم انتخابات مصر زي امريكا كده
تحياتي ياجميل

ذو النون المصري said...

لسه فاكره فصل خمسه اول؟؟؟؟؟؟؟؟؟؟
احنا كمان في الفصول الابتدائيه و الاعداديه كنا بننتخب علي اساس بعيد تماما عن الدين لكن لما كبرنا و بقينا في ثانوي امخاخنا اتعوجت
و كان مجهود التربيه و التعليم طوال سنوات دراستنا هي عوجة الامخاخ مش عدلها

السينيور said...

ما بلاش
خليكي جنب الحيط احسن
او جواه مش مهم

فارس عبدالفتاح said...

على فكرة انا في حياتي لم انتخب احد ولم ارشح نفسي لانتخابات في حياتي كلها

وهذا ليس سلبياً كما يعتقد بعض الناس ولكن للاسف انا لا اصلح لهذا الامر

ولم انتخب احد لاني لم اجد الشخص الذي اراهن عليه اطلاقاً

وهذا الامر ما لم استطيع ان افهمه الى الان طول و31 سنة لم اجد انسان فعلاً استطيع ان اراهن عليه وان اعلق عليه جميع امالي او بعضها حتى

مهندس مصري بيحب مصر said...

انا قريت التدوينة دي من زمان و مش عارف ليه معلقتش عليها ساعتها
المهم
بتقولي يا ست سوسة ايه ؟

كان فيه مجموعة من المصريين إنتخبوا إنتخاب حر و إختاروا بإرادتهم شخص لمجرد إنهم شايفين إنه الأصلح و مافيش حد حاول يأثر عليهم و لا يمنعهم من ممارسة الحق ده

طيب و كلامك اللي قبله ده

توفير سندوتشات اللانشون و الجبنة الرومي لمراكز القوى في الفصل على حساب السيد الوالد

مش رشوة انتخابية زي الحزب الوطني زي ما قلتي بنفسك

:)

كلامك دليل ان عيوب شعبنا الإنتخابية موجودة فيه من الصغر و منقوشة على الحجر جوه دماغه
:)

حلوة الدنيا said...

كل عام وأنت والأسرة والأمة الأسلامية بخير

ذو النون المصري said...

كل سنه و انتي طيبه

afreet said...

لكل صيادلة مصر انضموا لحملة صيادلة ضد الدخلاء من اجل الأرتقاء بالصيدلي المصري


http://www.facebook.com/group.php?gid=45199985756

Anonymous said...

اوباما ده مش باين له ملامح الله اعلم ده هيبقى اية

دا كفيا انه كان مسلم وارتدت دا دى لوحدة نقطة سودا فيه

اما احنا بقا بنغير الرئيس كل 30 سنة وممكن اكتر عشان احنا ناس بنثبت ع مبدئنا

فارس عبدالفتاح said...

سلام عليكم


انت فين يا دكتر والله العظيم انا مشتاءلك ونفسي ترجعي زي الاول واكثر

على فكرة انت اجوزتي ولا اتخطبتي عشان كده مبتفكريش في المدونه وفي الناس اللى بتسال عليكي

طيب قلينا حتى نقول لك الف مبروك او حتى تعزمينا حتى أونطا


ربنا يوفقك ويكرمك يا رب
انت بنت حلال وتستاهلي كل خير


سلام عليكم

قلم جاف said...

الديمقراطية لدينا مسلية ولذيذة .. بل إنها تجعلك تشكين في جدوى الديمقراطية أصلاً.. أنا شخصياً من خلال متابعتي المتواضعة للممارسات "الديمقراطية" في النقابات والأندية الرياضية والاتحادات الطلابية وحتى في الفصول الدراسية لم أعد أعرف إن كانت الديمقراطية هي حكم الشعب أم حكم الشلة ، حكم الجماعة أم حكم المجموعة ، حكم الأغلبية أم حكم المؤثرين..