Monday, March 02, 2009

طب ينفع كده؟



يعني أمك و بحبحت معاك بكلمتين ..تقفلها ع الوحدة؟..تمسك في كلمتين قالتهم بحسن نية و تبروزهم و تحطهملي صفحة أولى؟


http://www.moheet.com/show_news.aspx?nid=227478&pg=1


الست غلطت ..عادي بتحصل ..بقالها مده في شرم الشيخ فمش ملمس معاها قوي يعني إيه إهتمامات سيادتك إنت و هو ..مالها هي و مال العيش ..دخلها إيه في أنابيب البوتجاز..بطالة إيه و زحمة إيه و أزمة سكن إزاي يعني؟..تقرف نفسها هي ليه بالسرطان و همه التقيل ؟ ..تلوث إيه و جهل إيه و مرض إيه ؟..مش معقول يعني هييجي في دماغها إن 60 % منكم لسه لغاية النهاردة مش لاقيين كوباية ماية


تعرف منين هي الكلامة ده يعني ؟..ما انتوا مابتتكلموش ..ماحدش بيقول لها ..لا حد بيبعتلها مسج ولا بيضيفها ع الفيس بوك
الحقيقة الوحيدة اللي شايفاها و متأكده منها هي خطورة قضية الإتجار بالبشر ..فكان لازم "تكسر حاجز الصمت الدولي" و تتكلم ..رصاصتين في الهوا و شوية ألوان من اللي بتبرق في السما دي و برستيج قدام أصحابها الأجانب برضه .


أيوة "إحنا ضد الإتجار بالبشر" ..كلنا حكومة و شعبا ..جمعاااااااااااااااااء
و بكره هيعملوا حملة قومية يقوم على أساسها كل تلميذ في الإبتدائي و الإعدادي و الثانوي و كل طالب في الجامعة و كل موظف قطاع عام و قطاع خاص بالتبرع ب350 جنيه من مصروفه عشان يحرر أي مزة روسي أو سريلانكي أو فلبيني باعوها أو إشتروها في دولة صديكة شكيكة عميكة
من أجل حقوق الإنسان و حقوق الأجانب و حقوق العمالة و حقوق عين شمس


بالمناسبة لو حد خبيث حب يلمح إن إحنا ممكن يتطبق علينا هذا القانون الرحيم و ينوبنا من الحب جانب على أساس إن الشعب كله أساسا ملكية خاصة و بيتورث ..و هيتورث و ماحدش هيقتح بقه ..أحب أقوله إن ده ما إسموش إتجار بالبشر ..لأن الإتجار معناه إن فيه طرف هيبيعنا لطرف تاني و ده الحمدلله مش هيحصل ..مش عشان إحنا سعرنا غالي يعني و لا حاجة ..بس عشان مافيش عروض و ماحدش راضي يهوب ناحيتنا أو يشترينا ..يعني من الآخر إحنا بضاعة راكده و الناس الأصلة دول مستحمليننا بالعافية

فهمتوا بأه؟

10 comments:

أخـــ مسلمة ـــت said...

آه فهمنا خلاص

تحليل دكيك جدا بصراحة
عندك حق فعلا
وبعدين يعني الست هتعمل ايه اكتر من كده؟
مش كفاية عليها القراءة للجميع
واقرا لطفلك

ده بغض النظر عن ان الناس اصلا مش لاقية عيش للجميع ولا اكل لطفلك

تحياتي ليكي يا قمر
ربنا يخليكي لمصر

mohra said...

الخبر نفسه مش ظاهر على اللينك بس المعنى وصل

t3ban said...

و يرتني ما فهمت صراحة

فارس عبدالفتاح said...

اخبارك يا سوسة

لكي من اخوكي الصغير كل اههههههه بلاش الصغير الكبير كل التقدير والاحترام والمودة

انا مش فاهم حاجة الوصلة الموجودة مش عن الموضوع اللى انت كتباه مع اني معنديش فكره عنه بس انا عارف اسلوب الديماغوجية بتاع النظام المصري والست دي بالذات هي وابنها .

المهم

انا بضحك بجد على كلمته المزة الروسية والفلبيينة

والدول الصديكة والشكيكة والعميكة

وحقوق العمال والاجانب وحقوق عين شمس

بس انا بختلف معاك في موضوع احنا اتبعنا من زمان يا دكترة اتبعنا

على فكرة اعجبت بكلمة جمعاااااااااء

اهههههااهاههها


فعلا شيء لا يصدكة عكل

اهههاهاههههههاه

ذو النون المصري said...

اهلا سوسه
غايبه بقالك شهر و زياده
اللينك الموجود بالصفحه اعتقد انه بره الموضوع خالص
عموما الست دي هي و عيالها الاتنين و مرات ابنها التاني اكيد في دنيا غير دنيتنا خالص
و ايه اصلا اللي هيخليها تفكر فينا؟
المفروض ان كل ام بتفكر في مستقبل ابنها و هي بتفكر في مستقبل وراثة جمال للحكم
اهي ام زي كل الامهات

مهندس مصري بيحب مصر said...

أصل لينك الأهرام صلاحيته 24 ساعة بس
و بعدها بيتغير الخبر بخبر جديد من العدد الجديد للجرنان

عموماً حسب اللي فهمته من كلامك هيا بتتكلم في خيال علمي ملوش علاقة بالواقع خالص

سلام يا دكتورة و ما تغيبيش علينا كتير

soosa el-mafroosa said...

تمام يا جماعة
عطل فني

تم تغيير اللينك
بلاها الأهرام خالص
اللينك أبو صلاحية 24 ساعة
ده حتى أخبارها صلاحيتها 24 سنة
اللي يفتح جرنال من سنة 85 هيلاقي العناوين هي هيا يقوموا يغيروا اللينكات كل 24 ساعة
ما علينا
تم التعديل
و العاقبة عندكم في المسرات

Anonymous said...

يا عالم مفيش امل الا لو غييرنا الدستور و اى رئسي يحكم 4 سنين بس
و بحد اقصى فترتين
غير كده
انسى يا عمرو

قلم جاف said...

من المسلي أن يكون الكثيرون من رافضي الاتجار بالبشر هم من محترفي المتاجرة بالبشر!

Bassem said...

لا لا لهذا الهراء ثانية

اللهم ولي من يصلح