Saturday, July 21, 2007

حب و عرفان...لماما سوزان







الأسبوع اللي فات في نشرة أخبار حتى لا تذهب وراء الشمس ..كنت كتبت نبذه عن الحملة الإنسانيه اللي بدأتها ماما سوزان لمحاربة الختان



لكن الأسبوع ده بصراحة انسانيتها و كرمها فاقوا كل توقعاتي لنجدها تقوم بعمل انساني نبيل آخر..بتبنيها حالة هند..الطفلة ذات ال11 عاما التي حملت و انجبت طفلة على أثر الإعتداء عليها..كانت تعليمات الأم الحانية بنقل الأسرة بأكملها الى مدينة جديدة و عطاؤهم ضقة بديلة مع صرف 1000 جنيه للأب لمساعدته على بدء حياة جديدة



الحقيقة قعدت أتحيل مستشارين ماما سوزان و هما بيبلغوها بالحالة دي..أكيد رد فعلها اللي حصل و قتها هو هواه اللي حصل وقت مابلغوها بموضوع بدور و قضية الختان..بكاء و شحتفة ووضع اليد على الرأس و مش بعيد في ساعة عصرية كشفت راسها و دعت على اللي كان السبب


زبالة


و قعدت أفكر..طب ليه المستشارين دول مش بيقلولها على بقية الحاجات اللي بتحصل في البلد..ماهي الست مش هتقطع نفسها يعني...يعني أكيد لو عرفت ان فيه أطفال شوارع و بنات و شباب مصدر أكلهم الوحيد من الزبالة ..كانت عملتلهم حملة...لو عرفت ان فيه قرى و مدن كاملة كل سكنها تقريبا بيعانوا من الفشل الكلوي لأنهم ماشربوش كباية ماية نضيفة بقالهم أكتر من تلاتين سنة..كانت ادت ميسدكول لوزير الري و حلت المشكلة..لو بس بلغها علم ان نسبة سرطان الأطفال في مصر من أعلى النسب في الشرق الأوسط لدرجة انهم بيعملوا مستشفى طويلة عريضة و بيلموا فلوسها من الأطفال في المدارس و الجامعات تطبيقا لنظرية" من دقنه و افتله "على أساس انهم هما اللي هيتعالجوا فيها مستقبلا..كانت رهنت اسورتين من الشبكة اللي جابهالها بابا حسني و بنت لنا 4-5 مستشفيات



لكن يا جماعة ..قولوا للست ..عرفوها..هي مش فاضية تنزل البرلس ولا تروح قلعة الكبش..يعني لو بس تبلغوها هيا هتتصرف على طول



خصوصا اليومين دول ..الست تحسوا انها شادة حيلها بعد ماكانت كسلت شوية الكام سنة اللي فاتوا...خصوصا بعد ما ديجا ظهرت على الساحة..ماما سوزان صحيح أمنا كلنا لكن برضه واحدة ست..بصت للبنت كده لقتها صغيورة و روشة و بتضرب شعرها فحلقي و بتلبس فساتين بكتف واحد و بتلعب كرة قدم ..قالت لأ بأه مابدهاش ..هتاكل الجو مني بأه و الا ايه.


.و هوووب..حملة القراءة للجميع فيها يسرا و أبو تريكة..حملة ضد الختان فيها المفتي..حملة الطفل أولا و دائما لتحسين الخدمات الصحية للتلاميذ بعتت جابتلها ناس من انجلترا...و بعدين موضوع شقة هند و عيلتها



يا سلاااام ..شفتوا الست ..دينامو...صحيح هي كوعت شوية الفترة اللي فاتت ..لكن المنافسة بتسخن..و الحاجة أم الإختراع



صحيح يا ماما سوزان ..لا هايدي ولا ديجا...ده الدهن في العتاقي


Friday, July 06, 2007

حتى لا تذهب وراء الشمس

288


1


يقول بعض المغرضين أنه الأسبوع اللي فات 7 تلاميذ بين سن السابعة و التاسعة دخلوا مستشفى تعليمي لأخذ جرعات من الأنسولين لعلاجهم من مرض السكر ..و لأن المستشفى مستشفى تعليمي مصري كما يجب ان يكون ..أصيب التلاميذ السبعة بفيروس سي...ياسسسسلام..طب ما جايز العيال السبعة دول راحوا يحلقوا عند حلاق واحد..جايز هما السبعة عملوا نقل دم ..جايزاحدى الدول المعادية نقتهم من بين الشعب المصري و حقنتهم بالفيروس من أجل الإضرار بمستقبل الشعب المصري..ياسسسلام لااازم يعني يكون المستشفى هي السبب ...مش كفاية الحكومة بتعالجكم ببلاش...ايه البطر ده؟...جتكوا القرف ماليتوا البلد


2


بررررضه الإسبوع للي فات قلة مندسة من أبناء محافظة كفر الشيخ طلعوا على الطريق الساحلي الدولي و قطعوا الطريق..و منعوا ان أي حد يعدي...ليه يا بيه منك له؟...قال ايه.. الماية مقطوعة عندهم بقالها 11 يوم...ياسسسلام..ده ايه الرعونة دي.. ايه عدم تحمل المسؤولية ده..فييين الصبر..فييين الجلد..فييين احفاد الفراعنة..ماحدش فيهم فكر لحظة في أجدادةالفراعنة كانوا عايشين إزاي؟..ولا كان عندهم صرف صحي و لا كهربا يعني حتى ماكانوش يقدروا يشغلوا لا مروحة ولا تكييف..ده غير ان ماكانش عندهم تلاجات ولا ديب فريزر..و مع ذلك حد منهم اشتكى؟..حد إعترض؟..بالعكس بنوا لكم أهرامات و معابد لسه عايشين من خيرها لحد دلوقت..ايه يعني لما تعيشوا عيشة الأجداد 11 يوم؟..دول حتى ماكملوش أسبوعين.الناس دول.مافكروش انهم يعلموا عيالهم قيمة الصبر و تحمل الصعاب..مافكروش في منظر البلد خصوصا الأجانب و العرب اللي ماشيين على الطريق رايحين مارينا..مافكروش منظرنا قدامهم هيبقى عامل ازاي؟

و بعدين ايه يعني مافيش ماية...اشربوا بيبسي يا أخي..جتكوا البلاوي بوظتوا منظر البلد


3


إلى الأخوة المحموقين قوي بسبب رفع العلم الإسرائيلي في ستاد القاهرة بعد حصول منتخب إسرائيل المشارك في البطولة الدولية لسلاح الشيش على المركز التالت...نؤكد لهم مرة أخرى أن إسرائيل دولة صديقة و بيننا و بينها إتفاقية سلام ..و بعدين مين في الدنيا أجدر من إسرائيل عشان ندعوها تحتك بالمنتخب الوطني في لعبة "السلاح"...متهيألي الكل عارف ان موضوع السلاح ده لعبتها...و بعدين يا خويا منك له ليها..محروقين قوي من العلم المرفوع في الإستاد ..طب ماهو مرفوع على سفارتهم من 78 ..صحيح على رأي المثل..قال يا بابا علمني الغتاتة ..قاله تعال في الهايفة واتصدر


4


السيدة سوزان مبارك تبنت بنفسها حملة شعبية ضد ظاهرة الختان..و الحملة تجئ في هذه الأيام بعد وفاة طفلة بسبب جرعة بنج زائدة أثناء إجراءها للعملية ..واحد رخم هيقوللي و هي الحملة دي ماعملتهاش قرينة الرئيس من زمان ليه؟..أقولله إن السيدة قرينة الرئيس أول مرة تسمع عن الموضوع ده ..لأنها طبعا لو كان عندها خبر ماكانتش أبدا إتأخرت...هي بس كانت مشغولة شوية مع قرينة الرئيس القادمة بتلف معاها على الدكاترة عشان تطمن على الوريث إبن الوريث..و بهذه المناسبة السعيدة سوف نذيع بعد النشرة الأغنية الوطنية الهادفة

كايدة العزال أنا من يومي...إيوة أه


5


يووووه كل أما حد يقع من البلكونة في إحدى الدول الصديقة تعملولنا هليله و تقعدوا تقولوا مخابرات و تجيبوا سيرة إسرائيل الشقيقة..هو انت مخكوا مش هينضف أبدا من نظريات المؤامرة دي..طب و احنا نعملكوا ايه اذا كنتوا حتى مش عارفين تقفوا في البلكونات زي بقية خلق الله..نعملكوا مادة و ندرسها في المدارس و نسميها "التربيةالبلكونية" أمركوا عجيب والله...و بالنسبة لصديق النشرة اللي باعتلي ايميل فيه سؤال مهم أحب أطمنه....اطمن يا أستاذ يحيى سعيد مرزوق.

.قصر القبة... ..ليس به بلكونات



و الى اللقاء مع نشرة اخرى من قناة الحزب الوطني الإخبارية حيث شعارنا



حتى لا تذهب وراء الشمس

.

.