معلش يا جماعه هغيب عنكم اسبوع.....عقبال عندكم هصيف ..مرسى مطروح تناديني ولابد ان البي النداء....انتوا مش غرب بقه البيت بيتكم خدوا راحتكم ع الآااااااااااخر

!!!!!!!!!مطرب المرحلة!!!!!!!!!!!

يا مصري ليه دنياك لخابيط و الغلب محيط

والعنكبوت عشش ع الحيط و سرح ع الغيط

يامصري قوم هش الوطاويط ,كفاياك تخبيط

صعبه الحياة والحل بسيط ,حبة تخطيط

------------------------------------------------

فتحت باب استيرادك و صرفت فوق ضعف ايرادك

حلي للخواجه استكرادك, سابك بتقرا في اورادك

وده قشطك و نزل تشفيط

------------------------------------------------

يا مصري ليه دنياك لخابيط و الغلب محيط

والعنكبوت عشش ع الحيط و سرح ع الغيط

يامصري قوم هش الوطاويط ,كفاياك تخبيط

صعبه الحياة والحل بسيط ,حبة تخطيط

--------------------------------------------------

وليه بترشي و تتساهل و تبيع حقوقك بالساهل

تستاهل النار تستاهل يا حويط و يحسبك الجاهل

ساهل و ساهي و غبي و عبيط

----------------------------------------------------

يا مصري ليه دنياك لخابيط و الغلب محيط

والعنكبوت عشش ع الحيط و سرح ع الغيط

يامصري قوم هش الوطاويط ,كفاياك تخبيط

صعبه الحياة والحل بسيط ,حبة تخطيط

--------------------------------------------------

مش كلامي ..ومش عارفه بصراحه بالظبط كلام مين..بس دي اغنية غناها علي الحجار في التسعينات في شريط (تجيش نعيش) ..الكلام مباشر و يوجع خصوصا الكوبليه بتاع الرشاوي ده...بس انا مش متخيله ازاي اغنيه زي دي نزلت عادي كده في الشريط من غير ما حد يعترض!!!!!يعني تخيلوا كده لو حد نزل اغنيه زي دي دلوقت في عصر "تبقى انت اكيد اكيد في مصر " و "ارمي حمولك عليا و انا اشيل عنك شوية"و " لو كنا بنحبها " و الحاجات دي..ده كان يبقى المطرب ده نهار اهله بالالوان الطبيعيه!!!!!!!!!و بعدين اصلا ما فيش حد عنده الجراة ييجي ناحية السياسة من قريب او بعيد ..حتى "محمد منير" ايام الانتخابات الرئاسية لما طلعوا اشاعه انه عمل اغنيه ل"ايمن نور" جري بسرعه نفى الاشاعه "المغرضه" دي و عمل اغنيه خايبه زيه زي التانيين
تحس كده ان فيه مطربين ساعات بيارخوا للمرحله اللي هما عايشين فيهايعني مثلا

"سيد درويش" ايام ثورة 19"

عبد الحليم" ايام 23 يوليو

"الشيخ امام و الفاجومي" في انتفاضة السبعينات

لكن دلوقتي تفتكروا مين هو الامل لتاريخ المرحلة???.........غالبا........"شعبان عبد الرحيم"

انتوا مش عارفين مصلحتكم

كثر الكلام مؤخرا عن عملية التوريث التي تلوح في افق مستقبل مص و تشنج الكثيرون و علت اصواتهم بالرفض و الشجب و الاستنكار لهذه النية المبيتة...و انا هنا اقول للجميع :......انتوا مش عارفين مصلحتكم..........
فمن راي ان تولي سيادة الرئيس (جيمي) لقيادة البلد سوف يترتب عليه الكثير و الكثير منالفوائد لمصرنا الحبيبة ,,فمثلا:

1-سيتم توفير الكثير و الكثير من ميزانية وزارة الاعلام حيث لن تكون هناك حاجة لتاليف و تلحين اوبريتات جديدة يتغنى فيها محمد العزبي و علي الحجار و سعد الصغير بلقب الرئيس....لان الاوبريتات موجودة اصلا و كلها بتقول ..يا مبارك يا مبارك...يعني هيا هيا...بينما ستكون هناك مشكله حقيقية اذا تولى رئيس جديد يحمل لقبا مش ولابد يتعب الشعراء و الملحنين في ايجاد قافيه مناسبه له

2-يعرف (جيمي ) الجميع ويعرفه الجميع بداية من "اونكل" فتحي سرور و"اونكل" كمال الشاذلي و "اونكل" حبيب العادلي وهذا سيساعد على اندماجه في وظائف الحكم بشكل اسرع من اي واحد جديد لسسسسه هيتعرف على كل الاونكلات دول

3-اصدقاء جمال و نسايبه كلهم من رجال الاعمال ذوي الثقل في البلد يعني لو الميزانية في اي سنة (لا قدرالله) خرمت سيكون من السهل ان يجمع هؤلاء قرشين في منديل لينقذوا البلد بينما اي رئيس جديد من بتوع الحرية و الديمقراطية و الحاجات دي هيكون اكيد فقران و اصابه فقرانين زيه و يمكن يجلبوا الفقر ع البلد

4-من اهم مميزات جمال العلاقة المميزة التي تجمعه مع امبراطور الحديد في مصر (احمد عز) يعني لو فيه اي مواطن مزنوق في سيخين حديد يقول بس للريس (جيمي) و هو يجيبله سيخين هوا و معاهم خزوق هديه..لكن اي رئيس تاني تسمحوا تقولولي هيجيبلكم خوازيق منين?????

5- قام جمال مؤخرا بخطبة الانسة خديجه الجمال و هنا يسترعي انتباهنا الاسم المميز ذو الصبغه الاسلامية (خديجه) و هو هنا يختلف حتى عن والده الذي اختار زوجه ذات اصول انجليزيه و تحمل اسما ذو صبغه اجنبيه ....و هنا تتضح شخصية (جيمي) ذات الصبغه الدينيه و ربما بعد عدة سنوات في الحكم تظهر له زبيبه و يطلق على نفسه لقب (الرئيس المؤمن) كاحد سابقيه و هذا سيعطي مصر مزيدا من الثقل بين الدول الاسلاميه المجاورة

6- واخيرا و ليس اخرا وجود (حمال) في سدة الحكم سيضمن استمرار ابناء المنوفية في حكم البلاد وكلنا يعلم لن مصر لا ينصلح حالها الا اذا حكمها (المنوفيون)

يوم ما رحت اعمل بطاقة انتخابية!!!!!!!!!!!!!!!!!

• فى انتخابات مجلس الشغب الاخيرة وانا قاعدة في حالي في الشغل لا بيا ولا عليا فوجئت بموظفة من الموظفات بتدخل المكتب و تنادي عليا و تديني كارت صغير كده مكتوب عليه اسمي و تحته رقم و على ضهر الكارت ده صورة كبيره لمرشح الحزب الوطني في الدايرة بتاعنا ...ولما استفسرت
• : ايه ده ? قالت لي دي بطافتك الانتخابية
• بس انا ماليش بطاقة انتخابية ..ما طلعتهاش
• -انتي كده متايده في الكشوف واحنا طلعنالك البطاقة دي مؤقته عشان تنتخبي بيها على ماتطلعي الاصلية-
• انتوا مين ?
• -الحزب
• - طب والحزب ماله يدور على اسمي ليه في الكشوف و يطلعلي بطايق
• -هو الحزب كده وظيفته يخدم الشعب مش بدل ما تروحي و تبهدلي نفسك..و بعدين الحزب بيحاول يشجع الشباب ان يكون لهم دور في الحياة السياسية و يبقوا ايجابيين
• -يااا سلاااااام-
• اه امال ايه مل تنسيش بقى طبعا هتختاري الحاج /..... م الورقة رمز الهلال
• - امال طبعا ده الحاج غالي علينا قوي
  

طبعا ما فيش لزوم اقول اني فعلا رحت انتخبت بكارت الحاج بس كاغلبية ابناء دايرتي اخترت مرشح الاخوان...لا لشيء الا لانه مش حزب وطني

و مافيش لزوم برضه اني اقولكم ان مرشح الاخوان اكتسحه (اصل لجنتنا كانت في المرحلة التانية قبل التزوير على ايدك الشمال)
المهم قلت طب يا بنتي بعد الانتخابات لازم بقى تروحي تطلعي البطاقة الاصلية عشان يبقى لك وزن في المجتمع و صوتك يبقى مسموع

( او م الاخر عشان انزل اتفرج ع اللي بيحصل يوم النتخابات اصلي فضولية واموت في الحاجات دي)

المهم قعدت اتحايل ع العيال اصحابي ان حد ييجي معايا...ابدا...يا عيال ده بيبقى يوم حلو..لا...ياولاد عشان يبقى لكم صوت في البلد...مش عايزين يا ستي احنا مبسوطين كده..يا جماعه عشان لو(.....) بعد الشر بعد الشر اتكل تروحوا تصوتوا وتختاره الخليفة الجديد....يا ستي بس هو يتكل و احنا نصوتلك عليه 3 ايام بلياليهم

المهم ماحدش رضى ييجي معايا غير واحدة بس فضولية زيي و بتحب تتفرج

قول ما وصلنا القسم العسكري اللي ع الباب بصلنا باهتمام-بنات بقى و هو شكله كده شهم و يحب يخدم....خير يا جماعة...عايزين لو سمحت نعمل بطايق انتخابوهنا بصلنا العسكري حتة بصصصصصة...حاجة كده بتجمع بين القرف و الاشمئزاز و الشفقة و الاتهام و بصلنا من فوق لتحت زي مانكون ممسوكين في حملة ادابو رفع ايده لفوق حتى اننا اتهيالنا انه هيدينا بالالم بص اتضح انه بيشاور ..جوة...طب فين بالظبط لو سمحت....جووووة

بعد شخطة العسكري و نظراته لينا كنا هنروح و نفضها سيره بس انا قعدت اشجع صاحبتي و اقولها معلش ده هو بس تلاقيه فلاح و غشيم..بس بيني وبين نفسي كنت بايظه خالص...واكتشفت ساعتها حقيقة كانت غايبة عني في وسط الحماسة اللي كانت واخداني...ان دي كانت اول مرة في حياتي ادخل قسم...وجت في دماغي على طول صورة سعاد حسني والصول و هو ب..... ( انتوا فاهمين بقى) في فيلم الكرنك فبدات ارتعش بس ماكنتس عايزة ابين لصاحبتي ...اصل انا الللي جايباها بقى و عاملة 7 رجالة في بعض

المهم دخلنا المكتب و اول ما قلنا للموظفين اننا عايزين نعمل البطاقة ارتفعت رؤوس ال 3 موظفين و قاعدوا يبصوا لبعض و يبصولنا و لما لقونا ثابتين على موقفنا و مابنتراجعش قام الكبير بتاعهم ياخد بيانتنا..اساميكم..صاحبتي قالتله اسمها :سالي......سالي? ايه سالي ده يعني ايه? و يسموكي سالي ليه? البت حبك عليها العياط و انا ماسكاها من دراعها :اثبتي يا سالي ولا يهمك ده هو عايز يطفشك ما تديلوش الفرصة

المهم بعد كل العقبات و الرخامة والتلامة ونظام التطفيش اخيرا خدوا بيانتنا و قالولنا ابقوا تعالوا بعد شهر و نص اسالوا عليها.....لكن مين ده داحنا خرجنا من هنا و البت سالي فتحت حلقها عليا على وسعه....عليكي و ع الديمقراطية وع الوعي السياسي

و الايجابية...منك لله يا شيخه بهدلتينا بهدلة تجار الفراخ ...روحي ربنا يرزقك بعبارة تكون رافعة علم بنما

ما اقدرتش افتح بقي...انا لو مكانها كنت قلت قد كده عشر مرات

و ادي كلام اللي يسمع كلام لجنة السياسات

اول الكلام

هذه هي اول تدويناتي ....لقد بهرني عالم التدوين حقا ببساطته و سهولته و تاثيره ...من الذي كان يمكن ان يتخيل ان الانسان يستطيع الفضفضه على النت و تصل فضفضته هذه الى جميع الناس بمجرد ضغطة زر...انا لم اشعر بمثل هذه الحرية من قبل...ادامها الله علينا نعمة و حفظها من الزوال....اااميين