Saturday, December 16, 2006

جيش الإخوان..في الطريق إليكم









الصورة دي طبعا بقت معروفة و مشهورة لكل واحد في مصر ..لكن عشان خاطر اصحابي اللي ربنا بيحبهم و عايشين
بره مصر ..أنا هاديكو 3 إختيارات تحاولوا تختاروا منهم الإجابة الصحيحة
مين دووووول؟...و بيعملوا ايييييه؟
أ-أعضاء حماس في فلسطين بيتحدوا القوات الإسرائيلية
ب-أعضاء جيش المهدي في العراق بيتحدوا القوات الأمريكية
ج-أعضاء حزب الله بيستعرضوا قوتهم

و الإجابة هي ...لا توجد إجابة صحيحة..و لا يوجد تفسير سليم.و لا توجد عقول حكيمة في مصر الآن
دول بأه يا سيدي طلبة..آه و الله العظيم طلبة في جامعة الأزهر بيعترضوا على فصل 5 طلاب من أعضاء الإتحاد الحر ..و مش عايزة نباهة ..المفصولين و المتظاهرين كلهم من الإخوان المسلمين
و رغم اني اديت صوتي في الإنتخابات اللي فاتت لمرشحين الغخوانوزيي زي ناس كتير كنت بافرح كل اما اعرف ان عدد كراسيهم بيزيد

لكنني كان هيجيلي انهيار عصبي أول ما شفت فيديو المظاهرة دي في العاشرة مساء
الطابور العسكري و الوجوه المختفية ورا أقنعة سودا و العصابات السودا على الرؤوس و استعراضات الكاراتية و الكونج فو خلت دقات قلبي تعلى لدرجة انها غطت على صوت تفكيري
في الأول كدبت نفسي و قلت دول غلطوا في الشريط ..أكيد ده شريط من العراق أو من فلسطين و حطوه غلط
لكن للأسف للأسف للأسف..دول طلبة تنظيم الإخوان

و انا اول مرة أستخدم كلمة تنظيم دي ..كنت باعتبرهم في الأول مجرد حزب ديني ..له شعبية كبيرة حتى لو لم يتم الإعتراف به من قبل الحكومة
لكن اللي شفته ده مالوش غير وصف واحد..تنظيم مسلح..انا كنت باتخنق من اللي بيوصفهم بالوصف ده و كنت باقول حتى لو كان في تارخهم عنف فالناس اتغيرت و طريقتهم بقت غير زمان..لكن يظهر الوضع غير كده خالص

و اللي انا مستغرباله كمان ..الصمت اللي غلف الموقف ده ..مع انه في رأيي كان يستدعي إعتراضات قد اللي حصلت على موضوع فاروق حسني و يمكن أكتر

مع ان فيه دلوقتي 3 دول هي فلسطين و العراق و لبنان مرشحة لحرب أهلية
مش عارفة ليه بدأت أحس انهم بقوا 4
اللي بيدخلوا هنا عارفين كويس موقفي من الحكومة..بس دلوقتي بقيت حاسة ان مش بس الحاضر هو اللي بايظ..ده المستقبل كمان

بالبلدي كده يعني..كده خربانة و كده خربانة

Friday, December 01, 2006

لا تعتب علي...إعتب ع القمر





بعد البوست اللي فات و الخناقة الجامدة بتاعته

و تعليقاته اللي عدت المائة تعليق

و الدخول في مناقشات دينية مع اني حذرت منها في أول البوست

و بعد اتفاق معظم أعضاء الخناقة على ان انا غلطانة

غلطانة عشان ما اخدتش جنب ضد التاني و مادخلتش في الخناقة أنا كمان

بصراحة أعصابي تعبت

أكيد انت كمان لو تابعت الخناقة دي أعصابك برضه تعبت

و لو سألتني كصيدلانية محترمة و خبيرة في تعب الأعصاب

العلاج ايه يا دكتورة

أقولك .....فيروز

فلو سمحت ..افتح السماعة إذا كنت قافلها

و استرخي في الكرسي بتاعك كده ....و اسمع

و لو كنت لسه عايز تعتب على حد

من فضلك
-
-
-

لاتعتب علي....إعتب ع القمر

Monday, November 20, 2006

روقة الجن...أول الغيث قطرة







بدون التطرق لموضوع حرية الرأي و مين من حقه يقول ايه و امتى

و بدون التطرق لفرضية الحجاب من عدمه..لأنها مسأله محسومة و الرغي فيها كتير مش هيقدم ولا هيأخر ولا هيغير شئ

و بدون التطرق لشخصية الوزير الفنان الشيك الأمور و تقيمها أو تقييم فنه ..اذا كان اللي بيعمله ده فن


عايزة أسأل سؤال بسيط

الأخ فاروق ده بقاله في منصبه 19 سنة ..جوه الحكومة المصرية اللي من المعروف عن وزراءها جميعا منذ قبل التاريخ و حتى الآن انك ماتعرفش تاخد منهم لا حق و لا باطل في أي موضوع يتسألوا عنه
كلهم هيقولولك كده كلام عايم عن أي مسأله تسألهم عليها و مش هيتحيزوا في أي شئ يقولوه الا الى طبقات الشعب العاملة و الناس الغلابة الطيبين
الطيبين دي على فكرة معناها العبط اللي مابيعترضوش على أي مصيبة تتحط فوق دماغهم لأنهم استحلوا الضرب ع القفا-
ماعلينا ..المهم امتى أي حد سمع أي وزير بيتدخل في مسألة دينية معظم المصريين متفقين عليها و يقول تصريح عكس الإتفاق
لااااااا يمممكككككن..ازاي يا جماعه ؟..دا راجل سياسي و عارف و خابز الشعب ده اللي قاعد على قلبه بقاله 19 سنة
عارف انك تعمل كل اللي انت عايزة و بعدين تعمل حفل تكريم لحفظة القرءان الكريم ..فتاكل بعقل الناس حلاوة
عارف ان أي مسؤل يطلع يقول تصريح يقوم حاطط جواه آيه من القرءان فالناس تقول مش معقول يا ناس يكون حرامي ده بيستشهد بالقرءان
عارف ان كتير من الممثلين أو الممثلات أو حتى الرقاصات لازم ينشروا خبر عودتهم من العمرة في كل الجرايد و المجلات عشان يزودوا رصيدهم عند الجمهور
استخدام الدين في التقرب من أفراد الشعب المصري لعبة قديمة و معروفة و مضمونة كمان


عشان كده مش عارفه الراجل ده فجأه جت له لوثة و نسى كل الدروس اللي اتعلمها في الوسط السياسي المصري ؟
الحقيقة فيه نظرية تانية للي حصل ده و هي طبعا نظرية المؤامرة ..الحاجه الوحيده اللي بنؤمن بيها إيمان تام بعد ربنا سبحانه و تعالى
يعني التوقيت اللي اتقالت فيه التصريحات..نفس الأسبوع اللي هيخطب فيه الريس و هيطلب من مجلسي الشعب و الشورى تغيير الدستور و بالذات المادة 76
نظرية "عصا موسى" الشهيرة ارمي موضوع للناس يتشغلوا فيه و الإخوان يفضلوا يقدموا استجوابات و طلبات لسحب الثقة و خليهم يبعدوا عن تعديلات المادة 76
تفتكروا الحكومة بتضحي بروقة و بتعملوا كبش الفداء عشان تريح دماغها من الإخوان وقت مناقشة التعديلات؟
محتاجين يعني اللفة الطويلة دي؟؟
مش عارفة ...برضه جايز


المهم بأه مش تصريحات الوزير لكن النبرة اللي ابتدت تعلى وتظهر في تلميحات و تصريحات كل المسؤلين
تسمعها في الجامعة و في النقابات و في التلفزيون الحكومي و تقراها في الجرايد و المجلات
و هي ربط أي شئ إسلامي بالإخوان المسلمين...المنقبات تبع الإخوان الملتحين تبع الإخوان ..لحد ماوصلت دلوقتي ان المحجبات كمان هم نتاج الفكر الإخواني
و أي واحده اتحجبت يبقى اتمارس عليها ضغوط على الأقل معنوية عن طريق ملصقات الحجاب قبل الحساب و شرايط الكاسيت اللي بتتكلم عن الحجاب
و خطب الشيوخ في الجوامع ..اللي بينسوا ان الأوقاف هي اللي بتعلمهم و الأزهر هو اللي بخرجهم
و أصبح الكلام عن أي شئء اسلامي يساوي الكلام في السياسة


هي ظاهرة طبعا بدأت من زمان من أيام قفل الجوامع بعد العشاء و منع الدعاة و طردهم خارج البلد
لكن انتقلت الأصوات الرافضة كمان للحجاب و قريب قوي هنسمع كلام كتير في وسائل الإعلام المصرية عن عدم أهمية الحجاب بل و دلالته على التطرف

كل ده من أجل محاربة ما يتصورونه عن المد الإسلامي (الجديد) في الشارع المصري و تخيلهم انهم كده هيوقفوا حركة الإخوان و يحجموها حتى لا تزداد تأثيرا في الشارع المصري و بالتالي في السياسة المصرية

لكل اللي بيقولوا اننا مش هنكون تونس تانية ..أقولهم البشاير هلت ..لما وزير مصري يكسر التابوهات الثابتة من عشرات السنين و يهاجم الحجاب و يوصفه بالتخلف يبقى مش هيعدي كتير لما تلاقي بقية الوزراء يتبنوا نفس الموقف وواحده واحده الأمر هيستفحل و نلاقي واحده محجبه ممنوعه من أداء وظيفتها أو أداء امتحاناتها بسبب ارتدائهها لهذا الزي (الطائفي) المسمى بالحجاب


مش بس الحجاب ..خد بالك و انت بتصلي العشا في بيتكم ..خد بالك و انت بتقرا سورة يس قبل ماتنام.. خد بالك و انت بتسمي قبل ماتتعشى مع ولادك ..إتأكد الأول ان ماحدش شايفك و مافيش حد م الجيران هيبلغ عنك أمن الدولة


أول الغيث قطرة


عمار يا مصر

Tuesday, November 07, 2006

من فضلك ..لو سمحت





من فضلك لو سمحت يا أخ لو سمحتي يا أخت
انا باطلب منكم و بترجاكم ..انتوا ليه منشفين دماغكم كده؟ ليه موش عايزين تتحركوا؟
يئستوا ؟

زهقتوا ؟

مش عشاني ..عشانكوا

مافيش حاجه بعيده على ربنا ..ممكن ..والله ممكن ..ليه لأ
أمال بتدخلوا هنا ليه
امال كل اما يتفتح موضوع الفساد و التمديد و التوريث بتتحمسوا و تتكلموا ليه؟
هي أخرتها اننا نكلم بعض؟..و نسمع بعض؟..وبس
طب مانجرب
نحاول ليه لأ؟
مش هانخسر كتير..كلها مشوار كله على بعضه مش هيعدي نص ساعة مشوار صغير للقسم
أيوة القسم...ليه؟
كل اللي عدى سنه 18 سنة قدامه فرصة من دلوقتي لغاية آخر يناير يسجل اسمه في الكشوف و يطلع البطاقة الإنتخابية
من فضلك يا أخ انت ..ليه بتقول يوووه؟
وانتي ليه بتهزي دماغك و تتنهدي و تبصي للسقف؟
طب استنوا استنوا ..هدوا نفسكوا

يا جماعه الموضوع سهل جدا و عن تجربة مابياخدش وقت خااالص
دانا اللي بنت رحت و عملتها ..انت يااللي راجل ملو هدومك خايف ليه؟
وانتي ؟ ..خايفة تدخلي القسم؟
مش بعبع يعني و مش بيتلككوا و مستنيينك عشان يعتقلوكي ..عندهم كتير..و التعامل كله مع الموظفين مش مع الشرطة خالص
كل اللي محتاجينه صورة البطاقة و بس و تروحوا تملوا استمارة واحده و بعدها باسبوعين تروحوا تستلموا البطاقة بتاعتكم

طب لازمتها ايه؟
أقولكم ..دلوقتي طبعا يتهيألكم مالهاش لازمة ..مافيش انتخابات ولا حاجه تحتاجها
أقولكم ..ساعة مابيبقى فيه انتخابات و يبقى نفسكوا يبقى فيه بطاقة عشان تنزلوا تنتخبوا بيكون باب الإستخراج للبطاقات مغلق
هتقولولي لسسسسه 4 سنين على انتخابات مجلس الشعب و 5 على انتخابات الرئاسة ..يعني لسه بدري مش هاقولكم غير جملة واحده..الأعمار بيد الله ...أظن مفهومة

هتقولولي صوتنا مش هيغير حاجه
هقولكم الناس في انتخابات المجلس اللي فاتت قبل المرحلة النهائية - بتاعت التزوير و مصطفى الفقي- الناس قالت كلمتها و اتسمعت
فوق التمانين من الإخوان و فوق المائة من المستقلين نجحوا رغم انف الحزب
صحيح المستقلين انضموا بعد كده للحزب -أو أجبروا على الإنضمام مش فارقة- لكن ده النهاردة ممكن بكرة كل حاجة تتغيرو البلد تتغير

و مش هتتغير طول ماحنا حاطين إيدينا على خدنا و بنتفرج من بعيد

يمكن في يوم من الأيام انا وانت وانتي واللي زينا يقدروا ينتخبوا حكومة ونظام مختلف

حكومة توفرلنا أمن عشان ماحدش يتحرش بينا في الشارع

حكومة ماتوفرش حماية لواحد اتسبب في قتل ألف واحد في عبارة و تسهله هروبه

حكومه ما يبقاش أهون شئ عليها هو الشعب اللي المفروض بتخدمه

حكومه مايسيبش رئيسها الناس بتموت و يروح يتفرج على ماتش كورة

حكومة ماتلومش الغلابة المحروقين في قطر انهم هم اللي أغبيا و مابيعرفوش يركبوا قطارات

حكومة ما تغليش البنزين و السولار على كيفها و تتحرق البلد باللي فيه
احكومة ما تسامحش في دم ولادها اللي بيتقتلوا ع الحدود و تكتفي بالشجب والإستنكار

حكومة تحكم بلد يتقدر فيه العلم و المتعلمين و ماتبقاش الغلبة للعيبة الكورة و الراقصات

يا رب ماكون بانفخ في قربة مقطوعة
ماهي مش هتبقى فرسة و قطع نفس ع الفاضي

من فضلك ..لو سمحت
من فضلك ..لو سمحتي
روحوا طلعوا البطاقة الإنتخابية

يمكن

Tuesday, October 31, 2006

ليـــــــــــــــــــــــــــــــــــــــه؟؟؟؟؟







الموضوع نفسه بأه معروف..التحرش الجنسي الجماعي في أول أيام العيد بوسط البلد..أول ماجيت أستأنف الكتابة تاني في البلوج كنت مجهزة التدوينة اللي فاتت دي على اساس حاجه خفيفة بما اننا في أيام العيد..
بلاش تعقيد ولا سياسة ولا حوادث..عيد باه كل سنة وانتي طيبة يا سوسة مالوش لازمة تنكدي على الناس ..الا اني ماكنتش واخده بالي ان العيد دلوقتي ماعدش مرادف للكحك و البسكوت و العيدية والفسح و الملاهي و زيارات القرايب..لا..العيد دلوقتي بأه مرادف لحاجات تانية خااالص
ماكنتش واخده بالي ان العيد بأه مرادف للثورة..وياريتها ثورة من بتاع تعيش مصر حرة مستقرة ..لأ دي ثورة من بتاع تعيش بنات مصر ملطشة للي رايح واللي جاي
وياريتها بس بنات مصر ..لأ دي أي انثى بغض النظر عن الجنسية او الدين أو الشكل أو اللبس أو حتى الحالة الإجتماعية
مصرية بأه سعودية منقبة او كاشفة شعرها بنوتة او حتى متجوزة ..أهو أي شئ ماشي في الشارع يحمل في وصفه تاء التأنيث
الموضوع عند مالك

و الصور في الوعي المصري عند وائل عباس

الجميل هو التعتيم التاااام في كل وسائل الإعلام ..يادوب عمودين في المصري اليوم..و يوم السبت كانت منى الشاذلي مستضيفة احدى الناقدات في برنامجها "العاشرة مساءا" بدأت الناقدة كلامها بوصف الحادثة فاستغربت منى الشاذلي جدا و قالت فين؟...امتى؟...انا شخصيا ذهلت انها واحده جوة المجال الإعلامي و ماسمعتش حتى عن الموضوع..و أول مالاقيت ايميل البرنامج على الشاشة رحت باعته ايميل بعناويين مواقع مالك ووائل و لينكات المواضيع و الصور عندهم..و أكيد ناس كتير عملوا كده لأن العاشرة مساءا تاني يوم قدمت تقرير و كان بيتكلم فيه مالك

لكن ليه التجاهل الإعلامي؟؟؟

هو سهل يعني ان واحده او اتنين او خمسة يتهتك عرضهم و يتقلعوا ملط في الشارع؟؟
عادي يعني؟؟..طب امال فتاة العتبة اللي كانوا قالبين الدنيا بسببها من كام سنة كانت اهم من دول ؟؟
والا لازم البنات يتسيح دمها عشان حد يتحرك ؟؟

فيه مدونات كتير بتقول .عادي بيحصل كده كل سنة

عادي ازاي يعني..يعني واحده حامل ماشية جنب جوزها يشدوها و يقطعوا هدومها؟
واحده لابسه عبايه و نقاب يقلعوها ملط؟؟
أطفال 10 و 11 سنة عايزين يشاركوا و ينزلوا تحت الهدوم؟؟

طب السبب ايه يعني؟

حد يقول ضاربين و مخدرين ..أيوة يعني عاملين جروب على جوجل واتفقوا يتقابلوا بالميات في وسط البلد؟
اسرائيل نقتهم و عملت عليهم تجارب استثارة جنسية؟
أكلوا فراخ كانت متزغطة فياجرا؟
أنا معلوماتي انهم بيأكلوا الفراخ حبوب منع الحمل ..يمكن بيأكلوهم فياجرا كمان؟...جايز

والا هما شباب مصر بقوا كده؟؟؟؟؟؟؟؟؟؟؟

ردوا عليا يا شباب يا للي بتدخلوا المدونة لوسمحتم..ماهم دول شباب زيكم ..من سنكم و تعليمكم و مستواكم ..ماهو ماتقنعونيش انهم "قلة مندسة و منحرفة" والكلام الكبير ده

شباب عادي زيكم و شافوا فرصه سانحة

يعني هو كل الشباب و الرجاله كده؟؟مستننين بس فرصه؟

يعني كل طالب بيبص كده لزميلته في الجامعه؟
كل موظف بيبص كده لزميلته في المكتب؟
كل بياع بيبص كده للست اللي بيبعلها؟
كل واحد راكب في اتوبيس بيبص كده للبنت اللي قاعده جنبه؟

كل الرجاله بيبصوا كده للستات و مستنيين الفرصة؟

يعني لو ماحدش هيقفشك..لو ماحدش هايعرفك ..لو البنت هتخاف و مش هتقدر تتكلم لو مش هتعلي صوتها و تفضحك..لو مش معاها حد يدافع عنها..لو انت وصحابك شلة جامده و ماحدش يقدر يكلمكم

لو توفرت الظروف دي كلها هتعمل كده؟؟

لو مش محجبة يبقى مبررك انها هي اللي جابته لنفسها
ولو محجبة هتقنع نفسك انها مش ضروري مؤدبة يعني و بعدين ايه اللي ممشيها في الشارع لوحدها
و المبرر الكبييير الجااااامد ..طب وانا هاعمل ايه ..مانتوا شايفيين ظروفي..طول النهار الفيديو كليب و الأغاني العريانة..و قنوات السيكس في الدش..و المواقع اياها بتاع النت
..أعمل ايه بس؟

زي مايكون حد شال مخه و حط بداله فردت جزمة و مابقاش عارف الفرق بين الصح و الغلط و مابقاش قادر يسيطر على غرايزة و بقه مرفوع عنه القلم و من حقه يمد ايده على أي واحده في الشارع حتى لو منقبه لمجرد انه شاف "بوس الواوا " ع الريق

ناس تانية هتقولك ..النظام و القهر السياسي و تقييد الحرية و المادة 76

طب انتوا شوفوا الصور دي مناظر ناس بتفهم في اي حاجه في البطيخ؟

واااضح اننا لازم نقف وقفة حداد و نبطل الكلام البايخ بتاع الأفلام و المسلسلات العبيطة اللي بيصرفوا عليها ملايين كل سنة

الكلام العبيط ده بتاع المروؤة و الشهامه و المجدعه و الشاب المصري العترة.."وانا ممكن ابيع جتتي ..كله الا بنات حتتي"والكلام الإكسبايرد ده

كاااااان ...كله كاااان.. ماعدش يا فندم و بطلوا ينتجوه ..المصنع قفل

عندي فكرة ....تيجي نستورد شهامة من الصين؟؟؟

بس برضه حد يقوللي اللي حصل ده ليــــــــــــــــــــــــــــــــــــــــــــــــه؟

Wednesday, October 25, 2006

كل سنة وانتوا طيبين




وحشتوني جدا جدا جداااااا

وحشني التدوين وحشتني تعليقاتكم و ساعات خناقاتكم مع بعض

الحياة من غير تدوين وحشة جدا ..كأن حد قطع لساني..بس خلاص الحياة هترجع مليانه حروف و كلمات بعد ما كانت غرقانه في الكنافه و القطايف و الشربات

رمضان ماكانش ينفع يشاركه حد يا جماعه ..شهر كريم جدا بس عايز شغل جامد و اجتهاد ..حاولت أوفيه حقه يا رب أكون قربت شوية ع الأقل

كتير من التسامح ..قليل من الخناقات..انتوا عارفينني ممكن يعدي شهر بحاله من غير ما حاجه تفرسني و انطلق...طبعا ما يصحش

خناقة رقم 1:
الأبطال:
سواق التاكس و انا
-معلش يا أبلة مش هاقدر أدخل الشارع
- ليه يا أسطى فيه حفر و الا ايه؟-
لأ بس انا صايم .لسسسسه هادخل الشارع و ارجع أخرج منه تاني..خديها على رجليكي يا أبلة بأه و خلصي
-
ياااااااسلااااام .. (أطلع ورقة و قلم) هو انت نمرتك يا أسطى أولها 5 و الا 4 أصلي ما خادتش بالي

دقيقة و كان واصل لحد بيتنا و خد القرشين و اتكل

خناقة رقم 2:
الأبطال:
بتاع القطايف و برضه انا
- لو سمحت ..القطايف اللي انا خدتها منك دي بتفك-
يا فتاح يا عليم ..اللهم اني صايم..يعني ايه يا أبلة بتفك
-
يعني ما بتلزقش في بعضها و بتفك في الزيت
-
أوففففف..اللهم اني صايم ..يعني عايزة ايه دلوقت؟
-يا اما تجيب غيرها يا اما ترجعلي الفلوس لو سمحت
-أوففففف..اللهم اني صايم ..كل العجينة واحده و بعدين ماحدش اشتكى منها غيرك يبقى انتي اللي مابتعرفيش تعمليها
-
جرى ايه يا اخ انت ..أولا هو مافيش حد صايم الا انت و الا ايه (صوتي يعلى عشان اسمع الناس اللي بتشتري) مش كفايه ان القطايف بتاعتك بايظة و بتتفك و الكنافه معجنة و مابتستويش و السمبوسك كمان...
-
طب بس بس بس ..اتفضلي يا أبلة ادي فلوسك اهي و فوقها صباعين جلاش كمان
-
شكرا لحضرتك(شوفوا الأدب) و الجلاش خليهولك(صوتي يعلى تاني) الجلاش كمان بايظ



خناقة رقم 3
:
الأبطال:
واحدة ست جنبي في الصلاة و ...مش عايزة نصاحة طبعا أنا

-لو سمحتي بطلي تشديني من هدومي و انا باصلي
- الحق عليا با خليكي تعدلي الصف انت كده هتبوظي صلاتنا كلنا
-
انا باساوي الصف كويس ..بس انت بتشديني من هدومي وانا ساجده ..عايزاني اساوي الصف وانا ساجده ازاي يعني؟
-
ايوة تساويه ما تساويهوش ليه
- يا ستي ما ينفعش ..طب اشوف الصف ازاي وانا ساجده عشان اساويه و بعدين لو انا طولي مثلا متر و نص و حضرتك متر الا ربع يبقى ازاي نسجد على نفس المسافة..ماينفعش
-أنا ..أنا متر الا ربع..انت لعلمك بقه صلاتك مش مقبولة ..و طول مانتي بتقاوحي كده العند هايوصلك للكفر
-كمان هتكفريني...شكررررا..أنا هاروح اصلي في بيتنا أحسن...سلام


يعني دي حبة خناقات بسيطة كده..ربنا يغفرلي و يهديني .حد دعالي في ليلة القدر اني ابطل اتفرس؟؟؟
لو نسيتوا ابقوا فكروني أفكركوا السنة الجاية انشاء الله



كل سنة وانتوا طيبين

Sunday, September 24, 2006

Friday, September 22, 2006

هتشربوه يعني هتشربوه






أظن بعد مؤتمر الحزب الوطني الأخير ده اللي ماكنتش فاهماله هدف و لا معنى و لا طعم..ما عدش ينفع بأه يبقى فيه جوانا بارقة أمل ان جيمي مش جاي..كل حاجه في المؤتمر تكاد تصرخ ..هتجيبها كده ...هتجيلها كده ..هيا كده ..من أول طلعته البهية من فوق المنصة اللي ملطوعالنا في كل الجرايد و نشرات الأخبار لحد تأكيدات معظم أعضاء الحزب الموقر ..انه من حقه يترشح و لو اترشح ..ده مش هيبقى توريث ..الشعب هو اللي هيختاره
في برنامج القاهرة اليوم مثلا كان حسام البدراوي يجاهر بها صريحه ..هو حر يترشح و الناس حره و هترشحه..آه هترشحه و ده شئ مفروغ منه


طب تخيل كده بكره الصبح بابا حسني - بعد الشر بعد الشر بعد الشر- اتكل ..(ايه ده مين بيقول يا رب؟...ياعسكري خده ع الحجز )......كنا بنققول ايه ؟..آه لو حصل يعني بعد الشر عنه و انشالله اللي يكرهوه و بغض النظر عن آراء العلماء اللي بتؤكد انه مش من الفصيلة اللي بتموت وان بطارياته ليثيوم و مدى الحياة ..لكن هنفرض فرضا حصل ..هيحصل ايه؟؟؟؟
الدستور بيقول الأحزاب اللي ليها نسبة محدده من مقاعد مجلس الشعب هي اللي من حقها ترشح عضو منها ..حتى لو من كرم أخلاق (رجال ) الحزب الوطني سمحوا لكل الأحزاب يتقدموا بمرشحين -..هنفاجأ بلسته زي اللسته بتاع السنة اللي فاتت فيها شخصيات هلامية مالهاش أي لازمة ..و اللي له لازمه هيتحبس..و نلاقي الحزب الوطني هيعمل تمثيلية ظريفة زي بتاع اليمن ..و النبي يا جيمي تترشح ..لا ياجماعه مش عايز ..و مش عايز ليه يا جيمي داحنا هنريحك ..ياجماعة لا عندي النية و لا الرغبة ...و رحمة أبوك مانت قايل لأ ,خلاص بأه حلفناك بالغالي ..آه لو ماكنتوش بس تحلفوني ...حاضر يا جماعه ..أنا مش عشاني ..أنا عشان مصر


و حركة كفاية تعمل مظاهرة .. و يمكن الإخوان يعملوا اعتصام و يقعدوا يدعوا عليهم في صيام الإتنين و الخميس ..و بعدين ؟...و بعدين؟................بس خلاص..خلاويص على رأي نيللي
الناس المثقفة هيتسد نفسهم و مش هيروحوا ينتخبوا (كالعاده) و كل اللي هيعملوه انهم هيهزوا دماغهم و يمصمصوا شفايفهم و يقولوا ..آدي اللي كنا عاملين حسابه..و الناس اللي بتاخد عشرة جنية عشان يدوا صوتهم كتير ..و الأمن اللي بيمنع الناس يدخلوا اللجان أكتر ...و الناس باه اللي عندها بطاقة انتخاب و بيروحوا عشان خايفين من الغرامة هيبصوا يلاقوا لستة أسامي ما يعرفوش منها غير واحد بس..و بعبقرية المصري المعروفة في كل المجالات و بالحكمة الزلية اللي مخليه مافيش حد بيتعامل معانا الا لازم يدينا على قفانا و احنا نقوله كمان ..هيختار الراجل أو الست دول اللي يعرفه ..ما هي الحكمة بتقول اللي نعرفه أحسن من اللي مانعرفوش


و البعض بصراحه له آراء عبقرية عظيمة ..زي الراجل اللي اتصل بالقاهرة اليوم و قال ...يا جماعه ده واحد عايش مع ريسنا و معاشرة كرئيس أكتر من 25 سنة ..يعني عنده خبره عظيمة مستقيها من ريسنا الحكيم ..يبقى ليه نضيع خبرة كبيرة زي دي على مصر ..ليه مانستفدش منه ؟؟؟ ..و بعدين مافيش توريث ولا حاجه ..الريس لو كان عايز يورث كان ورث علاء ..لكن جمال هو اللي خبره و بصيرة و لازم مانضيعهاش على نفسناو من هنا ..


و من موقعي هذا ..أهنئ الشعب المصري جملة و أفرادا بتولي الرئيس جمال مبارك و من وراءه تامر جمال مبارك اللي هيكون طبعا عاشر أبوه بتاع 30 سنة و استفاد من خبرته و ده مش معناه ان الحكم في مصر هيمشي على أساس التوريث لأن لو جمال عايز يورث الحكم كان ورث ابنه لؤي (انت عارفين انه البكري)..و هلما جرةفياللا يا حبيبي انت و هو...غمض عينيك و سد مناخيرك و اشرب...مر شوية صحيح بس مفيد عشان تخف و تبقى حلو...تخف من إيه ؟ من اللوثة اللي انت عايش فيها و التهيؤات اللي بتجيلك ان السيناريو ده مش هيحصل...هيحصل غصب عنك و هتشرب ..يعني هتشرب

-------------------------------------------------------------------
إقرأوا أيضا موضوعي عن مصلحتكم في
أن يتولى جمال مبارك حكم مصر
هنا

Wednesday, September 13, 2006

بتضحك على مين ..ياااد؟

يعني ضحكنا على أباهاتنا و عملنا نفسنا بنذاكر...و هو مش شايف جوة الكتاب "رجل المستحيل"
و ضحكنا على الجيران و بصينا في الأرض و قاله الواد مؤدب و بيغض البصر ..و هما مش عارفين انه مدي بنتهم معاد بعد نص ساعه ع الكورنيش
و ضحكنا على الحموات قبل الجواز و البنت عملت نفسها أرق م النسمه و مابتفتحش بقها ..و هما مش عارفين انها ناوية بعد الجواز تخلص منهم القديم و الجديد
و ضحكنا على رؤساءنا و فاهمناهم اننا مقتولين في الشغل .. وهما مش داريانين اننا مقضينها نوم و مش شايفين ساندوتشات الفول جوه درج المكتب مونسه الدوسيهات
لكن كماااااان هنضحك على ربنا؟؟؟
استغفر الله
-------------------------------------------------------------------------------
مابحبش أحط فيديوهات ع المدونة عشان أصدقائي اللي بيدخلوا بالديال أب
بس ما اقدرتش مااوريكوش الفيديو الفزيع ده
اللهم طهرنا من النفاق و الرياء
آآآآآآمييييييين

Friday, September 08, 2006

كلنا ليلى.......الإشارة حمرا



في منطقتنا العربية باختصار ...البنت خيبة..من أول لحظه تصل فيها البنت الى الحياة ..أبوها اللي بيبقى واقف خارج أوضة الولاده ..أو حجرة العمليات ..يفرك يديه في حماسه و يجوب المكان ..رايح جاي ..مستني الممرضه ..أو الداية حسب حالته الإقتصادية..حتى تخرج و تبشره ..ألف مبروك ..فتنفرج شفتيه عن ابتسامة سعاده ..ما تلبث أن تختفي بمجرد ان يعرف نوع المولود ..بنت؟ ..ينطقها بخيبة أمل و يكاد يطلب من الممرضة الذهاب و التأكد مرة أخرى ..يمكن غلطت و الا نظرها ضعيف..و تنطلق أمه لتواسيه بالحنية المعروفه للحموات ..معلش يا بني اللي تجيب البنت بكرة انشاء الله تجيب الولد ..يعني بالبلدي ..هارد لك يا كابتشن ..خيرها في غيرها انشاء الله

و يدخل يهني البنية الوالده ..بابتسامه مش هاين عليها تطلع على خلقته ..و البنية مابتبقاش ناقصة ساعات تعمل نفسها لسه مدروخه م البنج حتى لو مش واخده بنج ..و أمها بتبقى مش عارفه تودي وشها فين ....و تقعد تمدح في البنت عشان تداري على خيبة بنتها - من وجهة نظر حماتها الأرشانه
هتقولولي الحاجات دي قديمه و ماعادتش بتحصل ..أقولكم والنعمه بتحصل ..و انا حاضرة أكتر من 3 مواقف من دي على مدى السنتين اللي فاتوا و الزوج بيبقى دكتور أو صيدلي ..و مرة واحد فيهم قعد يقول يا جماعه كل اللي يجيبه ربنا كويس ..الحمد لله ..و شوفته واقف على جنب و عينيه مرغرغه بالدموع ..رغم انه كان عارف من السونار انها بنت ..الا انه و لآخر لحظه بيمني نفسه ان السونار يطلع غلط و يجيله الولد اللي هيبقى يورث الأبعدية انشاء الله

و تعيش البنت و تترعرع داخل مجتمع بتسمع فيه سعاد حسني بتقولها البنت زي الولد ما هيش كمالة عدد ....لكن كل اللي بتقابله في حياتها يخليها تتأكد ان سعاد حسني دي اكيد كانت عايشه في السويد أو جاية من كوكب تاني

طب اسأل أي أب أو أم عن بنتهم ..يقولولك عسل و سكر ..احنا مابنفرقش بينها و بين أخوها أبدا ..لكن جواهم تعريف البنت ايه؟؟
طب بلاش تسألهم ..إسأل أي بنت ...بلاش أي بنت ..إسألني أنا...صحيح عمر ما حد منعني من حاجه ..لكن ده لأني من صغري ..عارفه حدودي .....و حدودي دي بتضيق يوم بعد يوم و سنة بعد سنه








وانا في إعدادي ..جت مدرسة العربي تحاول تعمل فريق تمثيل و عرضت عليا ..بصتلها كأنها مجنونة ..تمثيل ؟..تمثيل ايه ..البنات المحترمين ما يمثلوش ..عيب
وانا في ثانوية عامه..كل اللي حواليا قالولي ادخلي طب ..قلتلهم باقتناع ساعتها ..الطب مش مناسب للبنات ..أنا هادخل صيدله ..عايزينني أدخل طب و ابات بره البيت في نباتشيات ..عيب
دانا حتى ماحاولتش أفكر أدخل إعلام أو سياسة و اقتصاد ..ببساطه لأنها خارج محافظتي ..و بنت تخرج من محافظتها و تروح القاهرة و تقعد في بلد من غير أهلها....عيب
بعد ما اتخرجت ..جالي عرض أشتغل في شركة أدوية ...بس ازاي يعني ..بنت تقعد طول النهار في الشارع و تخش عيادات و تقعد مع رجاله في مكاتبهم لوحدها ...عيييييييب

وفي يوم حد جابلي عقد و سفر بره..كنت هطرده من قدامي ..بنت تسافر بره لوحدها ..اتجنيت..عيييييييييييييب

و كل ده من غير ماسأل حد و لا حد يجبرني على حاجه ..و ده مش دليل على اني مقتنعه بالأفكار دي ..أياميها كان في صراع جوايا ..بين رغبتي في عمل الحاجات دي كلها و بين غسيل المخ اللي اتعرضتله طول حياتي اللي بيخللي جرس انذار يدق في دماغي كل اما أحاول أعمل حاجه نفسي فيها...اشارة حمرا باحطها بنفسي قدام أي فكرة تهف على دماغي و مش متناسبة مع اللي اتربيت عليه طول حياتي

وايه اللي اتربيت عليه انا و بنات كتير جدا..الدونية ..و الخجل من كوني بنت ....حاسة دايما ان الخطر على بعد خطوة و المشاكل بتطل من كل باب...حاسة ان مش من حقي أعمل حاجات كتير ..و لا حتى من حقي اعترض على كده

طب انا مرة كنت عايزة أرشح نفسي في انتخابات اتحاد الطلبة ..بس خفت ..قلت اما أجس النبض و أحاول أعرف آراء اللي حواليا و ليا أمل والا لأ ..طبعا استبعدت الولاد ..قلت لو هانجح يبقى بالبنات ..رحت أتكلم مع زمايلي و كانت التعليقات..شوفي يا حبيبتي ..أنا باحبك آه بس انا ما أقدرش أدي صوتي لبنت ..طب ليه؟...البنات بصراحه ماينفعوش في الحاجات دي ..الولاد و بس ..طب انتي شفتي نموذج فاشل لبنت دخلت الإتحاد و ماعملتش حاجه ..أمممم لأ ...طب مين من الولاد يعني عمل حاجه مهمة تخليكي تصوتيله ...ولا حاجه هو حد بيعمل حاجه أصلا ...طيب مادام ماحدش كده كده هايعمل حاجه يبقى ليه ماتصوتليش ...اصوت لبنت ؟لايمكن الولاد بس اللي أصوتلهم

يعني حتى مش مقتنعين بنفسنا ..شايفين اننا مواطنين من الدرجه التانية ..مش الرجاله بس اللي بيعملوا كده ..لأ احنا كمان
..
قريب باه بدأت أفوق م الكلام ده ..لكن لسه كتير عايشين في نفس الواقع و لسه كتير هييجوا و هايعيشوه ..و الضغط ده و الأفكار دي بتسيب في نفوسنا آثار كبيرة.. ..الظروف بتقولك اخرجي و اتعلمي واشتغلي ..و جواكي الإشارة الحمرا اللي بتخوفك من كل شئ و بتتهمك بالعيب لو حاولتي تخرجي لحظة من القطيع اللي انتي ماشية وراه ..طب لما أحس اني ماليش لازمة واني مواطنة من الدرجه التانية وبإني مشكله اهلي عايزين يخلصوا منها مع اول عريس و ان
أي حاجه عايزة أعملها فيها شبهة ابداع او تفرد أواختلاف تبقى عيب و ما يصحش و مش من حقي ..طب مانا لازم تبقى ثقتي في نفسي صفر ع الشمال
مش بس الرجاله في مجتمعنا بيبصوا للستات عموما على انهم أقل منهم..لأ ده الستات كمان بأه عندهم اقتناع كامل انهم فئة من الدرجه النانية..قول لأي واحده على دكتورة كويسة ..تقوللك و هي الدكاترة الستات دول بيفهموا ..طب مدرسة خصوصية لأبنك ...لاااا يا راجل يا بلاش...بنات كتير لو قلتلهم حضروا ماجستير و الا دكتوراة ..ترد فورا ..ليه هو انا راجل؟...فقدنا الثقة في نفسنا و في كل جنسنا من كتر الزن على وداننا اننا ماننفعش في حاجه غير اننا نتجوز و نربي عيال فقط لا غير

و بصراحه مانقدرش نطلب من حد يثق فينا و يدينا حقنا ..الا لما نغير أفكارنا عن نفسنا الأول ..و سا عتها المجتمع كله كمان هيثق فينا و يفتحلنا كل الطرق ..من غير أي إشارات حمرا




...

Thursday, September 07, 2006

csi & er & بني مزار

مبدئيا نعرف المسلسلين دول لضحايا التلفزيون المصري..و طبعا معروف ان التلفزيون المصري سبب لأجيال ورا اجيال أمراض عقلية مستعصية أخطر بكتير من سرطانات يوسف والي ..اي آر اختصار لجملة " إيميرجينسي رووم " أو غرفة الطوارئ ..يعني الجزء م المستشفى اللي بتروحله الحالات المستعجلة من حوادث و غيره .. و ده مسلسل أمريكاني بدأ يتزاع من يجي 14 سنة و لسه مستمر ..و هو من أشهر المسلسلات في العالم


طب ايه سي إس آي ؟؟ ده اختصار كمان "حصة انجليزي
معلش" ..اختصار لجملة " كرايم سيين انفستيجيشان" يعني التحقيق في موقع الجريمة ..رفع البصمات و أخذ عينات الدم و ال دي ان ايه و الحركات دي .. و ده مسلسل كمان من أشهر المسلسلات و بقاله بيتعرض ييجي 6-7 سنين


المسلسلين دول انا اتفرج على حلقة منهم و اتفتح في العياط و مالقاش حد يسدني الا لو داسوا على رجلي الشمال ..مش عشان بتأثر بالجرايم و الجثث و الحالات المرضية و القصص دي ..لالااااا ..دانا جامده جدا و اعجبكم و لا يأثر فيا الكلام ده...أنا بصراحه بعيط و اتقهر على اللي بيحصل للبني آدمين في مصر ..أنا عشان باشتغل في مستشفى و شايفة قدامي كل يوم ازاي المرضى و ساعات الموتى في مصر بيتعاملوا ..بيجيلي حالة هلع لو حاسيت بشوية برد و الا لو قربت م البوتاجاز أو حتى و انا باعدي الشارع ..بخاف موت ..بس مش م الموت ..بخاف أدخل مستشفى و يحصل فيا اللي باشوفه بيحصل في الناس


طب تعالوا نقارن بين اللي بيحصل عندنا و عندهم ..هتقولولي بتقارني واقعنا بمسلسلاتهم ..أقولكم سوري ما شفتش واقعهم بعيني بس كمان انا عارفه ان المسلسلات دي بتعبرعن جزء كبير من اللي بيحصل في الحقيقة عندهم


في مسلسل إي آر..بيبتدي
تعاملهم مع الحاله في ان عربية الإسعاف بتتصل بالمستشفى و تبلغهم انا معايا مريض اسمه كذا و ضغطه كذا و فصيلة دمه كذا و حالته كذا..على ماييجوا يكونوا الممرضات حضروا الدم و المعدات و استنوا العربية برة المستشفى و لو كان المريض لما وصل قلبه واقف تلاقي الدكتور نط فوقه و هو ع النقاله و يبتدي يعمله تنفس صناعي و هما جرينه على أوضة العمليات عشان مايضيعوش وقت..و حتى لو المريض ده غرقان مثلا و بقاله ربع ساعه قلبه واقف ..تلاقيهم عمالين يدوا صدمات و حقن و دم و ممكن بعد مده تلاقي المريض قلبه بدأ يدق تاني


طب تعالوا نقارن عندنا ...المريض أصلا مابيلاقيش عربية اسعاف تنقله و لو حصلت حادثة و طلبت الإسعاف ..زيهم زي النجده و المطافي ما بيردوش على موبايلات و ما بيستجيبوش غير بعد الإتصال التالت (لضمان الجدية).. و ماتلاقيهومش يجوا جري الا لو كان في الحادثة أجانب..و لما تتكل على الله و تنقل المريض بنفسك للمستشفى أولا لو حالته خطيرة مافيش مستشفى هيرضى يستقبله "زي مايكونوا بيستقبلوا الأصحاء فقط " ..و لو دخل أول حاجه يقولولك ..تأمين ادفع في الخزنة و يستنوك لما تدفع الأول قبل مايعالجوا المريض..بيصر دم بأه ..مصارينه طالعه بره..عينيه قربت تلزق في قفاه ..مش مشكلتهم..و بعدين يقولولك روح هات ..شاش و قطن و بلاستر و رباط ضاغط و جبس و سرينجات و مكروكروم و ياريت سندوتشين مخ من عند الراجل اللي جنب المستشفى و انت راجع ...و بعدين يطلعوا يقولولك ..دم .. عايزين دم ..تعالى اتبرع و ياريت 5-6 معاك..نصيحه عبيلهم كيس صلصة طماطم ..كده كده هيبيعوه و مش هايدوه للمريض اللي انت جايبه....و ممكن قبل ما المريض يدخل العمليات ..تلاقي دكتور جه يقيسله النبض ما يلاقيش ..أو ممرضه ترفع ايده و تسيبها تترزع زي الأفلام و يغطوا وشه و يقولوا البقية في حياتك ....طب يا عم حاول ..صدمتين كهربة كده و الا حقنه لتنشيط القلب و الا حاجه ..لاااا
دماغنا بأه ..فيه منه كتيير ..الدنيا مش هتقف يعني
..


في سي إس آي بأه ..الموضوع أنكت بكتير ..دول بييجوا بعد ما الحادثه تحصل و مايبقاش فيه مريض ..بيبأه فيه اسم الله عليكم كده ..قتيل ..ييجوا بأه يلموا ..دم..بصمات..شعرايه لونها أشقر على كتف الجاكته ..زي ما كانت ماما بتعمل مع بابا ..فتله لونها غير لون البنطلون..و بعدين يبعتوا ده كله للمعمل و يقعدوا يحللوا فيه ..و يبعتوا اسم الله على مقامكم الجثة للمشرحه ..في المشرحه يشقوا الجثه كده بقصه شيك جدا على شكل حرف واي ..و يطلعوا كل اللي فيها ..الراجل ده مضروب بالرصاص ..لكن لأ بص الدم مانزلش بعد الرصاصه يعني كان ميت قبلها ..ده مخنوق ...الجثة دي بأه فيها خرم جنب الودن وواحد تني في الصباع الكبير ..ده اثر تيار كهربي ..ده ميت متكهرب
دانا مرة شفت حلقة خدوا بصمات القاتل من فوق رقبة الضحية اللي كان خانقها
و مرة واحد ضرب واحد بالبوكس في صدره ..شالوا الجلد و خدوا بصمة البوكس بتاعه من على الأنسجه اللي تحت الجلد


شوفوا بأه المحاكمة بتاع بني مزار و قارنوا ...يومين عشان يعرفوا الواد مقاس رجله 42 والا 45 ..لأ و بعتوا جابوا خبير جزم ..ألا خبير جزم ده يبقى خريج ايه ؟..و الا عامل دكتوراه في البلغ والا ايه النظام يعني؟
و الجلابيه اللي خدوها يحللوها ..قال قصوا كل الحتت اللي فيها الدم و حللوها و دابت يا عيني و هما بيحللوها ..و النبي ايه ..ليه بيحللوها في ماية نار؟؟
لأو الأنكت الراجل بتاع المعمل قالك أصل انا مالقيناش بصمات عشان البيوت كانت من الطوب اللبن ...وهي أصلا بيوت أسمنت و باينه في الصور ...و بعدين ماااشي هاديك عقلي و امشي حافية ...مافيش باب ؟؟...مافيش شباك سرير الواد اتركن عليه و هو بيقول بسم الله الله أكبر و بيغز...اذا كان اللي بيتكلم مجنون فالمستمع عاقل

رغم ان القضية حتى بعد حكم البراءة ده لسه ماخلصتش ..بس بتوع الداخلية مش هيطلعوا نفسهم عيال يعني..و الواد ده هيشيلها هيشيله
ا


أما عن المصري ..حي أو ميت ..فالصراحه ...مالوش لازمة
لنا الله

Friday, September 01, 2006

يهدي من يشاء









شفتوا فيلم "مملكة الجنة" ..مش معقول تبقى بتعتبر نفسك مثقف و تسمع عن الفيلم ده و ماتشوفوش..في السينما ..دي في دي ..مضروب من ع النت ..مش هتغلب يعني....المهم قرب النهاية و بعد انتصار المسلمين على الصليبيين اللي موجودين جوة القدس ..خرج "أورلاندو بلوم" قائد جيش الصليبيين عشان يتفاوض مع صلاح الدين على شروط الإستسلام له و للي معاه ..قبل ما يخرج بأه كان فيه معاه رجل دين مسيحي ..الراجل ده قاله حاجه عبقرية جدا..قاله قول لصلاح الدين انك أسلمت..و بعد كده ابقى ارجع في كلامك

جملة عبقرية..كاتب الحوار ده أكيد له معرفه جامده بالمسلمين و نفسيتهم..المشهد ده يكاد يكون اتكرر بتفاصيل مختلفه شوية الأسبوع اللي فات في غزة..الجماعة المسلحه اللي خطفت اتنين صحفيين من شبكة "فوكس الأمريكية"..و حلفت مليون يمين ماهم سايبينهم الا لما أمريكا تفرج عن الأسرى العرب و المسلمين في السجون الأمريكية...مش عارفه ليه الأمريكان و الصحافه الأمريكية و العربية كان رد فعلها ع الموضوع ده طنااااااااش ...و طبعا مسألة الطنااش دي .. و إسم الجماعه اللي عمر ما حد سمع عنه قبل كده ..و حسب ثوابت نظرية المؤامرة اللي هي الحاجه الوحيدة اللي بنؤمن بيها بعد ربنا..و بسبب اللي حصل بعد كده اللي هاحكيلكم عليه ..توصل الكثيرين الى استنتاج ان الموضوع كله فبركة و تمثيل في تمثيل

بس عموما مش موضوعنا نفتش في أصل الموضوع ...المهم ان بعد اختطاف الناس دي بمدة و قبل انتهاء المهلة اللي كانت الجماعة مدياها للمجتمع الدولي كله قبل ما تدبحهم زي الفراخ ..إذا بشريط فيديو يشق الغبار و يسطع على شاشات القنوات الإخبارية كسطوع البرق في الليالي السوداء..الصحفيين أسلموا يا رجالة ...إلحق يا جدع حلق يا جدع فرق شربات و بنبوني ع العربيات في الإشارات .. الله أكبر ..ظهر الحق...و يزيعولكم الفيديو ..الصحفي الكبير كان اسمه ستيف غيره و خلاه خالد ..و الصغير كان اسمه أولاف ..فجأه بأه يعقوب ..و كل واحد منهم متصور رافع صباعه و بيشهد ان لا إله إلا الله و أن محمد رسول الله ..و كل واحد فيهم كاتب رسالة من 3-4 صفح فلوسكاب موجهة لبوش و بلير بينتقدوا فيها موقفهم و بيدينوا اعتداءهم على أطفال و نساء و رجال المسلمين ...كلام يقطع القلب و يخلي عينيك تدمع و انت بتسمعه ....و بعدها بيوم أو يومين ..يفاجأ الجميع بالإفراج عنهم دون قيد أو شرط




أول حاجه عملها الإتنين بعد ما خرجوا انهم عقدوا مؤتمر صحفي كبير أذاعوا فيه و بكل فخر ..انهم ما أسلموش و لا حاجه و كانوا مضطرين يعملوا كده عشان حسوا بالتهديد لحياتهم و ان ده كان المخرج الوحيد ليهم من أيادي الإرهابيين الإسلاميين اللي كانوا خاطفينهم
ياااااولااد الـ..........فضيحه ..الواحد و هو قاعد يتفرج حس انه في نص هدومه...الإتنين لعبوها صح جدااا ..زي ما هو مفهوم و مشهور عن المسلميين عاطفييتهم الشديدة من ناحية دينهم ..و الناس في كل العالم فاهمة ده جدا و بتستغله من مئات السنين ..و مش عارفه ليه احنا دايما بننفعل قوي بالموضوع ده ..من أيااام الحمله الفرنسية ...لما نابليون لبس كام سبحه في رقبته و دار مع الدراويش في مولد النبي و الناس هللت و قالت أشهر اسلامه .وبعديها بشوية قالوا ان هتلر كمان أسلم...مرورا بالإشاعات المتوالية زي ان.يوري جاجارين سمع الآدان فوق القمر..وانه أسلم في السر ..و ان منتخب فرنسا كله أسلم و خايف يقول ..دانا مرة سمعت حد بيقول ان بابا الفاتيكان أسلم في السر عشان كده كتب في وصيته انه يندفن في التراب مش في تابوت

مش عارفه هو سبب انقياد الناس ورا الإشاعات دي ايه بالظبط؟..هو انت بتحب الشخص ده عشان كده فرحانله انه أسلم و ربنا هداه ..و الا حاسس ان ده هيخليه يعمل دعايه كويسه للإسلام بره ..يمكن يحسن من صورته في عيون الغرب ؟؟؟
طب لو كان كده ..يبقى تفرح ليه لما يقولوا ان مايكل جاكسون مثلا أسلم ..دانا لما سمعت الإشاعه دي ..قعدت أدعي يا رب مايكونش صحيح يا رب مايكونش بجد ..هو احنا ناقصين؟....و الله ماتريقه و لا باكره الهدايه لحد ..بس انا شايفه ان الإسلام مش محتاج دعاية من مايكل جاكسون يعني ...و لا بحس بفرح لما أسمع حكاية من دي ..لأن لا الإسلام هيزيد لما الناس دي تسلم و لا هيخس لو طلع الكلام مش صحيح...ساعات بحس ان فيه ناس كتير بتمثلهم الحكاية دي تأكيد لمعتقداتهم ..يعني بالبلدي ..بيقول بينه و بين نفسه ان مادام "تيري هنري
" أسلم يبقى أنا صح ..مش الكل طبعا بس فيه ناس كده ..حتى لو في اللا وعي




أنا ما بقولش يعني اني منزهه عن الموضوع ده ..طب انا هاحكيلكوا حكاية ظريفة حصلتلي وانا صغيرة ...كنت في أولى ابتدائي و كنت باشوف المدرسة في حصة الدين بتقسمنا نصين المسيحيين يتجمعوا في فصل عشان ياخدوا حصة الدين بتاعهم ..رحت سألت ماما ..هو ايه الفرق بين المسلم و المسيحي ؟؟ ماما قالت لي ان المسلم بيقول لا إله الا الله و ان محمد رسول الله ..رحت المدرسة تاني يوم و كنا في حصة الرسم و ماجد صاحبي كان عايز يستلف مني قلم رصاص و انا ماردتش عشان كنت بارسم بيه و لما قعد يلح ..جت في دماغي فكرة ..قلتله لو عايز القلم قول أشهد ان لا إله إلا الله و أن محمد رسول الله ..الواد بصلي ببراءه كده و قاللي يعني أقول كده و تديهولي ..قلتله آه ..و لسه بيقول أشـ.....صرخت فيه و قلتله أوعى تقول كده ياله لحسن تبقى مسلم ...مش عارفه ايه اللي خلاني اعمل كده ..فيه ناس أنا عارفاهم هيقولوا ان عيلتي هي اللي كانت ملياني و مأهلاني ..بس أنا أقسم بالله ماحصل ..الكلام اللي ماما قالتهولي زي ماقلتلكم كده بس ...تخيلوا ان طفله عندها 6 سنين ماتعرفش يعني ايه مسلم و مسيحي تحاول تأسلم زميلها المسيحي...يظهر فيه حاجه في جيناتنا بتخلينا نعمل كده ..أو يمكن دي رغبة انسانية طبيعية بتخللي الواحد يبقى عايز الناس كلها تبقى زيه .. أو تبقى كلها زي بعضها و خلاص

بس برضه الموقف ده بيقول ان فيه حاجه في الفطرة ..في عقلنا بتقولنا دايما ان الموضوع مش بالبساطة دي ..مش واحد تقعد تكلمه يومين تاني يوم يبقى مسلم..يعني بالعقل كده ..طب أمال ليه بنصدق على طول و بنطبل و نزمر لكل خبر من دول من غير مانتأكد


طب إيه الحل ..؟....و الله مانا عارفه ..ايه الحل اللي يخلينا مانخدش كل حاجه بعاطفيه شديدة و خصوصا في المسائل الدينية ..لحد امتى الناس هتفضل تضحك علينا و تسجدنا باسم الدين ...؟...نابليون يمطوح دماغه يمين و شمال و يصرخ مدااااد ..تركيا تفضل محتلانا 500 سنة و ماحدش عايز يقوم يحررنا عشان مسلمين زينا ..و في الآخر اتنين صحفيين يضحكوا على أشاوسة الجهاد الإسلامي المسلح و بعد ما يسيبوهم يطلعولهم لسانهم و يقولولهم ..... ...عليكوا واحد

Friday, August 25, 2006

سوسة على صفحات الجرائد





ويل يا ويل ...ويل يا ويل...النداء الشعبي المصري الصميم .اللي ماحدش عارف بالظبط معناه
ايه ..و لكنه كان أول شئ أجده على لساني أول مالقيت اسمي و موضوعي في الجرنال...الحكاية م الأول ....من أسبوع كده و في إطار حملة الدعايه الفظيعه اللي انشاء الله هتوديني في داهية و اللي كان عاملها بابا للبلوج ..سألني خالي ..طب ماتعرفيش توصلي الكلام ده للجرايد..قلتله ياريت ..بس إزاي ..ممكن أبقى أبعت على إيميل حد من الكتاب و يمكن لو عجبه ينشر حته منه و الا حاجه..قالي و ماله حاولي ..قلت يا رب...أتاري ايه؟..أبواب السما كانت مفتوحة...لو كنت أعرف دانا كنت دعيت دعاا..كنت دعيت لنفسي و دعيت على كل الناس اللي مغلبني و مغلبنكم ..لكن معلش بقه خيرها في غيرها

المهم بعد الكلام ده يجي بإسبوع وانا فاتحه البلوج بابص ع الكومينتات لقيت ..هيرو.. كاتب لي رساله بيقوللي ان موضوع "فعلها البطل شعبولا" منشور في جريدة "العربي "...نعممممم..إزاي يعني ؟..بجد ؟..و بعلو صوتي صرخت ..بااااابااااا...إنزل هات جرنال العربي حالا ...إشمعنى يعني...بيقولوا فيه موضوع منشور ليا هناك..أوعي يكون الموضوع اياه ..يا دي النيلة ما قولنا مسحناه .ده موضوع تاني إنزل بس

و نزل بابا و جاب الجورنال ..مسكته كده و سميت و قعدت ادور .. أدور ..مش لاقيه حاجه..أصل عندي عادة مهببه اني مافتحش الجورنال غير م الآخر ..أصلكوا عارفين الصفحة الأولى في الأهرام و الأخبار كلها أخبار متفبركة و أونطه عن اللي انتوا عارفينهم ..و انهم اكتشفوا على جدران المعابد ان قدماء المصريين كانوا أول من لعب البلاي ستيشن و إن الإنسان الأول كان أصلا م المنوفيه و القصص اللي انتوا عارفينها دي ..فضلت أدور مش لاقيه حاجه و بدور على ايه ؟؟سطر أو سطرين ..لحد ماوصلت لصفحة 5..قسم التحقيقات..وببص لقيتلكم ايه..نص صفحة متقسمه على 3 أجزاء..ع الشمال خالص مقال لروائي اسمه رؤوف مسعد ..في النص مقال منقول من "عشرينات" و ع اليمين مقالي ...تخيلوا حجمه و الا بنط الإسم ..منور كده وواضح ..الله لا يوريكوا اللي حصللي ...أصووووت و أتنطط..أهه يا بابا أهه..و بابا يضحك و يضرب كف على كف و يقول البت اتهبلت..ماتتخيلوش السعادة اللي كنت فيها ..بجد كان نفسي في الحكاية دي جدا ..رغم ان أصحابي و قرايبي و المجتمع و الناس اللي حواليه مايعرفوش مين سوسة المفروسة دي ..بس كفايه إن أنا عارفه و طبعا بابا تولى أمر بقية البشرية..يتهيألي الجريدة ارتفعت أرقام توزيعها بسبب بابا..مش قلتلكوا هيوديني في داهية الراجل ده

طبعا ما يفوتنيش ان أنا أشكر "عشرينات" كتابا و قراءا..و هي المكان الأول اللي اتولدت فيه سوسة المفروسة..قبلهم ماكنتش كتخيله ان حد ممكن يتكلم بصراحة في كل المجالات..و قبلهم ماكنتش أعرف ان فيه شباب بتفهم في اللي بيحصل حواليها و مصممة تغيره..و لولا قرائها و تعليقاتهم اللي كانت دايما بتشجعني .ماكانتش جاتلي الشجاعه اني أعمل بلوج..ولا كان هيبقالي الشرف اني اتعرف عليكوا

أنا عارفه ان الموضوع بالنسبة لناس كتير منكم يمكن عادي او بسيط ..بس بالنسبة لي كان حلم اني أشوف كلام كان مجرد فكرة بتدور جوة دماغي..إتحول لحروف ملموسة على صفحات جريدة الكل يقدر يقراها..و أقدر أحتفظ بيها للأبد......يا رب كل واحد فيكوا عنده حلم و لو بسيط ولو مايهمش حد غيره ..يحققه

لينك المقال في الجريده أهه للي عايز يتفرج..بس الجريده الورق أحلى

http://www.al-araby.com/investigations.htm

http://www.al-araby.com/articles/1022/060820-1022-inv07.htm

Monday, August 21, 2006

أحمدي نجاد إتكلم يا ..مييييينز






أخيرا سمح محمود أحمدي نجاد - الرئيس الإيراني المنتخب- بإجراء حديث تلفزيوني مع إحدي القنوات
الأمريكية و هي قناة سي بي إس و برنامجها الأشهر " 60 دقيقة " ..فقد عاد مذيع البرنامج - مايك والاس- من تقاعده أو إعتزاله لإجراء هذا الحديث الذي يعتبر نادر بالنسبة للرئيس الإيراني ..فهو لم يقدم سوى حديث واحد لإحدى الصحف الأمريكية و لم يدلي قط بأي حديث تلفزيوني لقناة أمريكية

قناة إم . بي. سي الرابعه أعادت إذاعة الحديث يوم الجمعه اللي فات ..الساعة 1 بعد منتصف الليل (عشان ماحدش يشوفه) مصحوبا بالترجمة...طبعا المذيع مابقاش مصدق نفسه انه قاعدمع نجاد..و الذي يعتبرعلى أعلى قائمة أعداء أمريكا الحاليين ..فقد إحتل بجداره محل ..عمكوا صدام حسين-الله يرحمه مقدما-و طبعا هو كل يوم حارق دم عمكوا التاني بوش ..اللي نفسه و منى عينه ينشرله صورة قي السجن بملابسه الداخلية زي بتاع عمكوا صدام ..و عمال يجر في شكلة و بيسويله حرب صغنتوته كده على قده على نار هادية

المهم الحديث بدأ ..و نجاد قاعد قدام المذيع ..قمممممر ..آه و الله الراجل قمور و تحس انه لسه طالع من فيلم هندي من بتوع عمكوا أميتاب باتشان (إنتوا عمامكوا كتروا كده ليه ؟) ما علينا ..الراجل متواضع و بشوش كده و شيك و أجمل ما فيه بساطته في لبسه..حتى و هما قاعدين حد من مساعدين نجاد بعتله ورقة صغيرة..المذيع الرخم قاله أنا لازم أعرف بتقول إيه الورقة؟..قاله بيقولولي أعدل الجاكيت ..المذيع قاله آه فعلا شيك قوي الجاكت ده ..نجاد قاله حاجه كده معناها "مانا لابسلك اللي ع الحبل ..كان لابس جاكت بيج مفتوح و تحته قميص فاتح و بنطلون بني ..حاجه بسيطه و شيك ..مش زي حد نعرفه يوم ما حب يعمل روش و صغنطوط و يقدر يستحمل 6 سنين كمان ..راح عامل حركة جبارة و قلع الكرافتة...تا تا تا تاااااا..و إلحق يا جدع ..حلق يا حدع ..احنا خلاص دخلنا عصر الروشنة..و عمكوا هيكل يصرخ (مش قلتلكم عمامكم كتروا)..إرفعوا أيديكم عن الرئيس ..زي مايكون نزل الإنتخابات ببرمودة والا حاجه ..قال يعني بقه لما يقلع الكرافته هيبقى روش و الا هيحس بالشباب يعني " هاي شلة"( ياادي النيلة ..كده برضه جرجرتوني في الكلام ..يا جدعان لسه متصالحه مع بابا مش حكاية بقه ..خلاص أسكت يا لساني ...هشششش)..المهم

الراحل يجيبه يمين ..يجيبه شمال ..مش عارف ياخد منه لا حق و لا باطل ..و نجاد قاعد قدامه يبتسمله ابتسامه تفرس ..يقوله إسرائيل ..نجاد يدخله في المشكلة النووية ..يقوله حزب الله انت بتموله ..يقوله ما أمريكا بتمول إسرائيل ..يقوله انت عايز تنتج قنبلة نووية ..يقوله احنا عايزين وقود عن طريق النووي و امريكا مش موافقه عشان عايزة تسيطر على كل موارد الوقود ..و بعدين بوش بتاعكم ده مابيفكرش غير في الحرب و مابيحلش أي مشكلة غير بالقنابل و انا بعتله رساله صغنتوته كده من 42 صفحه مش عارف ماردش عليها ليه؟

في نص الكلام المذيع زهق و قاله انت بتلف و تدور كتير ..خليك شجاع و جاوب بصراحه .. أن أن أن أااان..أنا قلت نجاد هيشيله هيلا بيلا و يرميه في الشارع ..بس ايه؟..آم مبتسمله ابتسامه واسعه كده و قاله ..أنا متشكر جدا ان انت جيت كل المسافه دي من أمريكا عشان تعلمني الشجاعه ...يااااه و جون وجون وجون ..أكنهم اتنين قاعدين ع القهوة بيلعبوا طاولة و بيحبسوا على بعض

وكل اما نجاد يطول شوية في إجابة سؤال ..الراجل الرخم يقفل عليه ..نجاد قاله انت مزعل نفسك ليه يا أخينا قاله انا أزعل دانا ليا الشرف اني قاعد معاك ,هو اناكنت أطول ..نجاد قاله انت شكلك كده زعلان لأني مابقولش اللي انت عايزني أقوله ..قاله لأ إزاي؟دانا عايزك تقول اللي عندك كله بس اختصر..نجاد شكله كان عايز يقلبه ..و فعلا قلبه بحتة طريقة ..قاله معلش سوري لازم أخلص المقابلة دلوقتي ..قاله ليه لسه بدري ..نجاد قاله سوري لازم أقوم عشان وقت العشا دخل و لازم أصليه حاضر ....ياسلام يا سلام ..طب بذمتكوا عمركوا شفته حد هنا .أ.ااااااااا..بلاش بلاش ..إنتوا أكيد فاهمين ..المعنى في بطن الشاعر

والله الراجل عسل ..مسلي كده..طب تصدقوا تصدقوا انه عمل بلوج بيكتب فيه ..آه و النعمه ..بلوج زي بتاعنا كده و تقدر تسيبله تعليق في العمود اللي على يمين الصفحه ..هوكتب موضوع واحد بيحكي فيه قصة حياته ..مش زي اللي مش عارفين أصولهم و مصريين والا إنجليز و الا منايفه (يووووه هش بقه قولنا) ..انا كان نفسي أسيب تعليق بس مش عارفه ..هو ده يخش تحت بند التخابر مع جهات أجنبيه والا حاجه ..مش عارفه بقه أنا زهقت ..كل الطرق تؤدي إلى طرة

بس انا عجبتني قوي فكرة البلوج دي ..عنوانه أهه على فكرة لو عايزين تشوفوه و تبعتوا رساله عليه ..و اللي يبعت يقول عشان نعد عليه من واحد لعشرة ونشوف هيرجع تاني و الا نبقى نعمله خاتمه ..ماحنا هنقسم نفسنا ..جزء يبعت رسايل و جزء يعمل خاتمة و جزء يبلغ
البوليس

العنوان أهه
http://www.ahmadinejad.ir/





اللي أنا بافكر فيه بقه ..أنت و هو و هي كمواطنين في البلد دي (أه انتوا مواطنين ..انتوا نسيتوا والا ايه؟) يعني لو حبيتوا انكوا تعملوا لـ -شخص ما- بلوج في هذا الوقع الإفتراضي ..الشخص ده يبقى مين ..و إسم البلوج هيبقى إيه و الجمله اللي تحت الإسم هتكون إيه ...ياللا نعملها تاج .. و الا بلاش نعملها مسابقة تبع وزارة الإعلام بتاعتي (أنظر البوست اللي قبل قبل اللي فات )..و جوايز المسابقه..هي هياها ..عندكوا الخيار مفتوح ..من أول الفنانة القديرة فيفي عبده إلى السيدة"---" انتوا عارفين
و من الفنان المتألق شعبولا و حتى فخامة "--" برضه انتوا عارفين

يالا بقه ورونا الشطارة و شدوا حيلكم .....الجايزة تستاهل و الا ايه

نموذج الإجابة

:الشخصية

: إسم البلوج

: الجملة التي تعبر عن المحتوى

: صورة البروفايل

وزارة الإعلام الكلبوزية تتمنى لكم حظا سعيدا

Thursday, August 17, 2006

تاج الجزيرة

التاج الرهيب المنتشر انتشار المنايفه في الحكومة..وصل أخيرا الي مدونتي المتواضعه عن طريق سويدي باشا ..بعد مدة من بحلقتي في المدونات الصديقة و حسدي الشديد للي بيتبعتلهم التاج ده ..مع إني بصراحة ماكنتش فاهمة في الأول يعني ايه و بصراحة لغاية دلوقتي مش فاهمة هو فايدته ايه بالظبط و له مرحلة تانية ولا لأ ..يعني فيه حد مثلا هياخده و يعمل بيه إحصائية ؟؟..أو ينشر مقتطفات منه ..أو يستنتج منه حاجه؟ و الا هو كده و خلاص

مش مهم مش مهم..البني آدم ده طماع قوي ..يعني مش كفاية اتبعتلي ..كمان عايزة أفهم ؟؟؟..فراغة عين بقه هنعمل إيه؟ ..المهم آدي التاج و آدي الإجابات

ـ هل أنت راض عن مدونتك شكلاً وموضوعاً؟
إلى حد كبير ..مع اني كان نفسي تبقى مميزة أكتر في الشكل ..مسيري أفضى و أعملها تصميم محصلش حاجة فرايحي كده مشخلعة

ـــ هل تعلم أسرتك الصغيرة بأمر مدونتك؟
آآآآه جيت ع الوجع..طبعا مش محتاجه احكي الحكاية تاني ..بابا و البوست اللي حلف عليا لألغيه..بس برضه كنت محتاجه حد بفرملني شوية و يكون قلبه عليا ..مش قصدي ان اللي بيقروا مش قلبهم عليا بس أكيد يعني زيهم زيي بنحب نتفرج و نقرا أكتر من اننا ننصح

ـــ هل تجد حرجاً فى أن تُخبر صديقاً عن مدونتك؟ هل تعتبرها أمرا خاصا بك؟
و الله أنا يأست من أصحابي و إذا كنت أجد حرج فبصراحه آه ..بجد حرج من جهلهم المستحكم ..فيه ناس منهم لغاية دلوقت مايعرفوش يعني ايه ايميل يقوموا يعرفوا يعني ايه بلوج ..صلي ع النبي..بالنسبة لأني باعتبرها أمر خاص ..لأ خالص ..انا مدونتي بعون الله بقت مشهورة في وجه بحري كله..ربنا يستر

ـــ هل تسببت المدونات بتغيير إيجابى لأفكارك؟ اعطنى مثال فى حالة الإجابة نعم
أكيد غيرت أفكاري بطريقة إيجابيه ..على الأقل أقنعتني ان فيه ناس من جيلنا بيفهموا و بيحسوا مش كله فيديو كليب و موبايلات و مواقع من اللي انت عارفها..الناس اللي بتكتب قصة و شعر انا كنت فاكراهم استشهدوا في النكسة أو انتحروا بعدها ..الناس بتوع المظاهرات بقه أنا كنت فاكراهم ماتولدوش خالص ...ده غير الآراء الجميلة و المتزنة و الأسلوب الراقي في الحواراللي بين المدونين و بعضهم و الثقافة الواسعه اللي عند كتير منهم و و التمرد من قيود المجتمع اللي بتفرض علينا نمشي ورا بعض زي قطيع البقر ..كل دي حاجات كنت فاكراها مش موجوده في جيلنا ..لكن المدونات خلتني أكتشفنا من جديد

ـــ هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
الأولوية للي بيردوا عندي و بعدين للي بيردوا عند اللي بيردوا عندي (إيه اللخبطة دي؟) ..بس طبعا أحب أتجول في المدونات الإخرى عشان أتعرف على وجهات نظر أكتر و أكتسب حاجات جديدة و أحاول أطور مدونتي و أكتسب معلومات و أصدقاء جدد

ـــ ماذا يعنى لك عداد الزوار.. هل تهتم بوضعه فى مدونتك؟
أحب جدا موضوع العداد ده ..خصوصا اللي بيفرق بين زياراتك و زيارات الناس عن طريق ال آي بي مثلا و اللي بيوري الزوار جايين من أي دولة ..لكن الأهم عندي الناس اللي بيعلقوا هم دول اللي باهتم بعددهم ..على الأقل الواحد يحس انه مش بيدن في مالطا

ـــ هل حاولت تخيل شكل اصدقائك المدونين؟

كل واحد باتخيله في الصورة اللي حاطتها في البروفايل ..يعني
السويدي هو الطفل الأحول الجميل ده..و كلبوزة القطة السيامي ..و زنجولا الطفل الموبتأس ده ..و بحب مصر باتخيله مكرمش زي الصورة ..أظرف واحد بقه إبراهيم..تخيل لما تتخيل انك بتكلم حصان!!..و ساعات لما أشوف صورة لحد من المدونين بجد أتصدم..لالا صورة البروفايل أحلى

ـ هل ترى فائدة حقيقية للتدوين؟
أعظم فوايده بالنسبة لي هي الفضفضة..انا أصلي لو ماتكلمتش أو كتبت أموت..و لأني مفروسة من كل حاجه فدايما عندي كلام كتير..و من فوايده التانية طبعا..التواصل بين الشباب و بعضه في إطار أحلى بكتير من الشات و حتى المنتديات..كمان في التعرف على وجهات نظر مختلفة ساعات كتير ما بتوصلناش عن طريق و سايل الإعلام

ــ هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
متفاعل جدا..آخر الأخبار انا دلوقت ماباخدهاش غير م المدونات..و التفاعل نسبته كبيرة جدا و في نفس لحظة وقوع الأحداث

ـــ هل يزعجك وجود نقد بمدونتك ؟ أم تشعر انه ظاهرة صحية؟
كل واحد بيحب ان كل الناس تحبه و توافق على وجهة نظرة ..لكن النقد مهم جدا عشان الواحد يعرف اخطاؤه و عشان يتعرف على وجهات نظر الناس من حواليه ..المهم انه يكون في إطار الذوق

ـــ هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
أنا لا أتحاشى المدونات السياسية ....بس مش متابعة دايمه ليها ..إلا لو كان فيه حدث يستدعي..و موضوع الإعتقال ده استغربتله جدا لإني كنت فاكرة الحكومة مابتعتقلش غير الإخوان و ماكنتش أعرف ان فيه حد يعرض نفسه للإعتقال في الزمن ده بإرادته ..لكن أنا على حد علمي ان المدونين اللي اعتقلوا ..أعتقلوا في مظاهرات مش بسبب مدونتهم

ـــ هل فكرت فى مصير مدونتك حال وفاتك؟
لما أبطل أكتب ..إعرفوا ان أنا مت
أنا ماعنديش حد أقدر أسيبله الباسورد ..و بعدين مش عايزه حد يكتب بعدي لأنه أكيد مش هيعبر عن وجهة نظري ..ومش عايزة حد يبلغكم بوفاتي ..مش طالبة نكد

ــ تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟
أغاني ساعات تعبر عن حالتي النفسية و ساعات عن محتوي بوست و ساعات حاجه عجباني و خلاص ..و لازم تكون مميزة و مش عند حد ..يعني مش مطرطشة في كل حتة

ـــ اكتب اسماء خمسة مدونين ليقوموا بهذا الاسقصاء بعدك

حبايبنا كتير ..بس فيه ناس منهم اتبعتلهم التاج و عملوه..هاحاول اكتب من اللي متهيألي ماتبعتلهومش
يبقوا كالآتي

بحب مصر
.

Saturday, August 12, 2006

القطط العميا









أنا باعترفلكم إني غبية...غبية جدا كمان..و دي أول مرة في حياتي أعترف بكده..و السبب ان بابا سألني انتي بتعملي ايه ع النت كل يوم ؟..فبغبائي المستحكم وريتله المدونة...الصراحة عجبته جدا ..موضوع مرسى مطروح و موضوعات شعبولا و الأفلام السخنة ..لدرجة انه نقل إسم المدونة ووزعه على كل أصحابه عشان هما أو ولادهم يدخلوا و يتفرجوا ع المواهب.. وأنا أقوله يابابا بلااااش ..هتوديني في داهية ..و الراجل الطيب مش فاهم أنا باقول كده ليه؟...ماهو مش عارف نيتي السودة و المواضيع المنيلة اللي بتزن في دماغي نفسها تطلع و تنط على صفحات المدونة...لحد ما لقيته من يومين قايم من ع الكومبيوتر أصفر الوجه جاحظ العينين مذهول السحنة...فيه ايه يا عم الحاج ؟؟..الراجل بصلي شوية كده كأنه بيشوفني لأول مرة ..و خد نفس عميييييق و فجأة انطلق زي المدفع الرشاش...ايه اللي انتي بتهببيه ده؟ انتي اتجنيتي ف عقلك؟..عايزاهم يجوا يسحبوكي ع المعتقل؟..انتي ماشفتيش الكرنك؟..ماعداش عليكي الهجامة..ماتأثرتيش بأي فيلم من أفلام التعذيب بتاع نادية الجندي؟؟....فيه ايه بس يا بابا ايه اللي حصل؟...مش عارفه ايه اللي حصل ؟ انت فاكرة نفسك هدى شعراوي والا نبوية موسى (مين نبوية موسى دي؟) ..يابايا يا حبيبي و الله مافيها حاجه مانا كتبت الكلام ده قبل كده في عشرينات ماجراش حاجة, وبعدين الناس بتكتب أكتر من كده بكتير و ماحدش بيجراله حاجه ..أنا ماليش دعوة بالناس كل اللي انا عايزة ان الهباب اللي انتي كاتباه ده يتشال ..

خلصت المناقشه على اني قلت ..ماشي انشاء الله ..و طناش يعني ..بس يعيني بدأت ألاحظ ان بابا كل اما الباب يخبط يقوم يتنفض- خايف ييجوا ياخدوني- وكل شوية الاقيه يبصلي كأنه خلاص بيودعني ..والله الراجل صعب عليا ..بس برضه كرامتي و الفرسه اللي جوايا والتمرد و النار اللي ف دمي خلاني مش قادرة أمسح البوست ..بس قررت اني أكتب بوست جديد فوقه يعني كحل وسط انه يخف الموضوع على بابا شوية

و هي دي من رأيى مشكلة الجيل اللي فات ..مش مصدقين ان الأمور اتغيرت شوية ..الحقيقة رغم كل المشاكل و البلاوي اللي موجودة في مصر الا اني باعترف اني باكتب و انا مش خايفة و ان اللي بنكتبه دلوقتي لا يمكن كان حد يقدر يكتبه من سنتين اتنين بس و هو مش خايف على نفسه...قناعتي دي جتلي في لحظة ما شفت مظاهرة لكفاية ع الجزيرة مباشر..كانوا بيهتفوا و يقولوا ( يسقط ..يسقط حسني مبارك) ..أنا كان هيغمى عليا ..مش مصدقه و عايزة أمد ايدي جوة التلفزيون احطها على بقهم ..انتوا اتجنيتوا؟ بتقولوا ايه ..و استنيت ان بتوع الأمن المركزي يفتحوا عليهم الرشاشات ...مافتحوش.. استنى حد يجي يلمهم ع المعتقلات ..ماتلموش..أستنى ان حد ييجي يشد الكاميرا بتاع الجزيرة و يرميها في الأرض ماحصلش ..في اللحظة دي حسيت ان فيه حاجه اتغيرت و فيه ابواب كتيرة اتفتحت..دانا زمان كنت ساعات و انا باسمع النشرة باسرح و لما يقولوا اسم الريس ..أقول عليه الصلاة و السلام

لكن بابا و كل اللي في سنة مش مقتنعين ..ده حتى في الإنتخابات الأخيرة خاف يدي صوته لحد تاني لايكون متراقب ..و في انتخابات مجلس الشعب ادى صوته لمرشح الحزب و كان تبريره ..هو ده اللي أعرفه و بعدين مش عايزين مشاكل

النظام اللي احنا كنا عايشين فيه في مصر السنين اللي فاتت دي كلها كان مخلي الناس مش بس قطط مغمضه ..لأ قطط عميا ..بس دلوقتي إدوا القطط فرصة انها تفتح شوية ...و لو حتى بعين واحدة
بيني و بينكم ..هاكتب برضه اللي انا عايزاه..ماهو يا إما كده يا إما هموت م الفرسة اللي انا فيها

------------------------------------------------------------------------------------------------


هم يبكي و هم يضحك



موضوع ظريف قوي بتاع العيال المصريين في أمريكا ده ..انا لما سمعت الموضوع أول مرة قعدت أااااااضحك ..لما عيطت من كتر الضحك

الموضوع للي ما يعرفوش ان جامعة المنصورة عملت تبادل مع جامعة أمريكية يروح عدد من طلاب الجامعه لأمريكا عشان يتدربوا لمدة شهر و يتعرفوا على آخر الطرق الحديثه في التعليم هناك وييجي عدد من الطلبة الأمريكان عشان يجيلهم تخلف هنا...

المهم المسؤلين في جامعة المنصورة -يظهر- من منطلق ثقتهم الفزيعه في الطلبه بتوعهم ومعرفتهم بالصفات الأصيلة للمواطن المصري اللي ترميه في أي حته فيفوت في الحديد ..بعتوا لأمريكا 17 طالب ..من غير مشرف
وصلوا العيال أمريكا من هنا و هوووب 11 واحد منهم فكوا م المطار..الجامعه الأمريكية تستنى العيال ال 17 يجوا مالقيوش غير 6 ..طب و الباقي؟؟..كل سنة و انت طيب يا باشا ,شافوا مصلحتهم..خليك لذيذ بقه و ماتقفش في وش مستقبلهم ..دول جايين و ناويين و النية لله انهم هيرفعولكم شأن أمريكا بأفكارهم العبقرية و ذكاءهم الخرافي ..أو ع الأقل خالص هينضفولكوا الأطباق اللي بتاكلوا فيها ..فايدة لينا و ليكوا يعني

طبعا البهوات العباقرة ماتخيلوش للحظة اللي هيجرا بعدها ... ومش هارشين ان اللي كان بيحصل قبل 11 سبتمبر غير اللي بيحصل بعده يا فالح انت و هو ..الراجل مدير الجامعه بلغ البوليس..إمسك يا جدع حلق يا جدع ..العيال دول إرهابيين إسلاميين و أعضاء في خلية و جايين يفجروا أمريكا من جوة...و الإف .بي.آي عملت نشرات بصورهم و اتحطت ملصقات بأسماؤهم و أوصافهم في كل أنحاء أمريكا و التلفزيونات تذييع طول النهار

المهم 4 اتقبض عليهم و اتنين ياعيني هروا على نفسهم و جروا سلموا نفسهم لأقرب قسم شرطة وجاري البحث عن الباقي

يااا عباقرة يا مفتحين ..طب واحد يهرب ..اتنين ..مش 11 ..خلاص اليأس وصل للدرجة دي..خد عندك بقه اعتقال و تحقيق و ايه رأيك في حماس و انت مع حزب الله و الا ضده و ايه صلتك بتنظيم القاعده و بتشجع الأهلي و الا الزمالك..و بتحب روبي و الا هيفا...و أكيد هيتعملهم قضية ممكن جدا ياخدوا فيها حبس ..و ما أدراك كا السجون الأمريكية ..العيال هترجع بايظه خالص ..ده إذا رجعوا و ما تشحنوش على جوانتاناموا و الا حاجه..و حظهم الإسود ان الموضوع جاي بعد حكاية كشف مؤامرة تفجير الطائرات اللي في انجلترا ..يعني شكلهم كده زي مايكونوا المجموعه التانية اللي هتنفذ في أمريكا
اللي يفرسك بقه ان العيال دي معظمهم من أسر بسيطه و بعضهم من قرى.....و أهلهم أكيد كانوا معظمهم عارفين ان العيال دي هتفلق ..ماهو كل واحد فيهم دافع 22 الف جنيه عشان الكورس اللي هياخدوه في شهر في أمريكا؟؟ مافتكرش انهم ماكانوش عارفين..ما هو 22 ألف جنيه دي مابتجيش بالساهل و لا تتدفع لعيل عايز يتعلم انجليزي.متهيألي اعتبروه عقد عمل و بيشتروه ..مع إن العيال كلهم لا معاهم شهادات و لا كملوا تعليمهم يعني كبيرهم يغسلوا اطباق..ده لو حد سابهم يغسلوها

يعني كل الكلام اللي بيتقال عن أمريكا و اضطهاد العرب و العداء للإسلام و المسلمين والناس اللي بتقلع ملط و تتفتش في المطارات لمجرد ان شكلهم شرق أوسطي .. و كل الحاجات دي ما خلتش دماغكوا تشتغل شوية و تفكر ان انتوا كده رايحين في داهية لا محالة؟؟؟

بس برضه مش قادرة ألوم عليهم ..اليأس م البلد و احوالها يخلي الواحد يرمي نفسه في المحيط

Thursday, August 10, 2006

تفتكروا ميييين؟؟

باركولي يا جماعه ..أنا خلاص بقيت وزيرة..أه و الله ..بعد انضمامي لحركة "كلابيز من أجل التغيير" - التي انضميت اليها عن طريق الإنتماء و ليس الوزن- من علي مجلس الحركة المكون من الرئيسة "كلبوزة لكن سمباتيك" و رئيس الوزراء
"zangoolaaa"
بمنصب " وزيرة الإعلام" و هي تتضمن إدارتي الإعلان و الدش و أنا بمزيج من الفرح و الإحساس بالمسؤلية قبلت الترشيح و بدأت خطوات جادة من أجل الإعداد لبرنامج إعلامي جديد سيغير مفاهيم الإعلام في المنطقة.... و كانت أولى خطواتي المباركة هي انشاء شركة سينمائية لإنتاج الأفلام التاريخية و التي تعاني المنطقه من نقص حاد فيها - اللهم الا الأفلام اللي بتتذاع في 23 يوليو و 6 أكتوبر و الحاجات دي- و اللي التلفزيونات العربيه بتعتمد في اذاعتها على الحس الوطني الفزيع لدى المواطن العربي اللي بيخليه ينفعل مع أي فيلم في أي مناسبة مش ضروري الخاصة بيه ...يعني مثلا يزيعوا "رد قلبي" يوم 6 أكتوبر جايز ..يزيعوا "الرصاصة لاتزال في جيبي " يوم 23 يوليو ..ممكن ...أو يزيعوا " الناصر صلاح الدين" يوم عيد ميلاد الريس أو حتى يوم تحرير سينا...ياعم هو حد فاهم حاجة ..إديها ما ترحمهاش

لكن أنا و من نطاق إحساسي بالمسؤلية...قررت انشاء شركة انتاج سينمائي للأفلام التاريخية تتحدث عن الشخصيات التي نجهل الكثير من تفاصيل حياتها..و لكن المطلوب من المشاهد ليس فقط الفرجه و انما أيضا "تشغيل المخ" ...لذلك فلن يتضمن الفيلم اسم الشخصية .. و انما المطلوب من المشاهد التوصل بنفسه الى إسم الشخصية و إرسال الحل الصحيح على ص ب 45 (يعني الحل يتكتب على صندل بني مقاس 45) و يرسل بالبريدالمستعجل.....و سيربح الفائز الفرصة في تمضية أسبوع من أحلى أسابيع عمره في الفندق العالمي الجديد المقام بمنطقة "طرة" السياحية العالمية










تم إلغاء بقية البوست بناءا على توجيهات الحاج "والد سوسة " و العاقبة عندكم في المسرات


ملحوظة:أنا اللي جبت ده كله لنفسي

Wednesday, August 02, 2006

أفلام الصيف الساخنة..إحجز مقدما

و لأن هذا الصيف هو صيف سيريالي بكل المقاييس..فكلنا نشعر و كأننا نحيى داخل حلم..و بالأحرى..فيلم و لأنه
لم يكن منا من يتخيل انه و في عام 2006 تحترق المنطقه بنار الحرب..بعد ان حاولوا إقناعنا لسنوات عديده أن حرب أكتوبر هي آخر الحروب بين العرب و إسرائيل ..و أن الطريق بين أي عاصمه عربية و تل أبيب أصبح مفروشا بأغصان الزيتون.. و بعد ما خدرونا بالإتفاقيات إبتداءا من كامب ديفيد مرورا بغزة و أريحا و واي ريفر و انتهاءا بالكويز ..انقلبت الطاولة على دماغ أهاليهم بعد ان امتدت يد الصديق الإسرائيلي الشقي ..و أصبح أمرا مفروغا منه أن الدور جاي.. جاي.. حتى بعد أن تنصل الجميع لحزب الله ..آخر من يدافع عن الشرف العربي-إن وجد- و أصبحنا في إنتظار أي تلكيكه تتلكك بها إسرائيل ..من عينة "انت دوست على ضلي و انت ماشي"....فليس لنا حيلة و ليس لنا إختيار سوى الفرجه سويا على أحدث الأفلام التي تعرض في الشرق الأوسط
انتظارا لفيلم قريب تكون لنا فيه .....البطولة المطلقه






عودة الندلة






غبي منه فيه



وش إجرام




دموع في عيون وقحة





الأحضان الدافئة






ربع دستة أشرار






جعلوني مجرما






العار





آخر الرجال المحترمين