الشهر ده مرت تلاتين سنة على ما يسمى بانتفاضة الحرامية...أنا فاكرة أول مرة سمعت التعبير ده
و سألت عليه أمي ..ساعتها قالتلي ان الأسعار غليت قوي في السبعينات و الناس ما استحملتش الزيادة فعملوا مظاهرات و بهدلوا الدنيا و بعدين الحكومة رجعت الأسعار زي ماكانت
بس ماحدش فهمني ليه لما الناس يعترضوا على رفع الأسعار يقولوا عليهم حرامية؟..طب لو هم مش حرامية ..طب ليه كل الناس لسه لغاية النهاردة بتسمي الأحداث دي بالإسم ده؟
لما كنت صغيرة و أمي حكتلي الحكاية بالطريقة دي..اتهيألي ان الحكومة لما رجعت الأسعار زي ماكانت ساعتها ..ان الأسعار دي لسه ماتحركتش لغاية الوقت الحاضر
ما هو يا جماعة واحد زائد واحد يساوي اتنين
يعني لو الحكومة -لاسمح الله- رجعت زودت الأسعار كان زمان الناس عملوا مظاهرات تانية..صح؟..صح؟
للأسف غلط و أكبر غلط
اللي حصل أياميها على ما أعرف ان رغيف العيش مثلا ..ارتفع تمنه من 5 مليم ل7 فقامت الدنيا و ماقعدتش ..أمال اليومين دول ايه اللي بيحصل ده؟...أو بالأصح ..ايه اللي مابيحصلش؟
الناس زمان كانت غير دلوقت؟ والا الدم اللي كان بيجري في عروق المصريين دلوقتي بأه كركدية؟
يعني 1000 واحد أكلهم السمك في البحر الأحمر..و كام ألف اتحرقوا و اتقطعوا و اندهسوا في القطورات
بيلموا مننا كل يوم فلوس يعملولنا بيها مستشفى سرطان تعالجنا بفلوسنا بعد ما جابولنا المرض
الكيلو من أي سلعة كمالية ترفيهية زي البصل و الطماطم و صل 5 و 6 جنية
شقق مافيش جواز ماتلاقيش تعليم دماغك ..مافيش وقت للكلام الفارغ ده..علاج ايه و قرف ايه اللي هتوجعوا دماغنا بيه؟ اللي عايز يتعالج يطلع بره ..روحوا الهند العلاج هناك ببلاش يمكن ربنا يكرمكوا و تركبوا فيل و الا تسلموا على أميتاب باتشان و بعدين انتوا هتنهبوا؟ ما اهم الجماعة بيعملولكوا تعديلات دستورية أهه ..هي صحيح هتخلي الدستور أطين من دلوقت ..لكن أهي ناس بتحاول..هيقطعوا نفسهم يعني؟
و حياتكم انتوا لو دي بلد محترمه كان زمان الشعب معلق البهوات اللي عملوا فيه كل ده في المشانق في ميدان عام ليلة راس السنة و يطفوا النور و هييييييه هابي نيو يير ..بايدينا في راس السنة بدل ماتبقى بإيدين الأمريكان في العيد الكبيرلكن خلاااااااص..مافيش
ليه مافيش؟..لأن مافيش قيادة..مافيش معارضة عليها الطلا
حتى الإخوان اللي كان الناس حاطين عليهم أمل..طلعوا مجرد أبواق..يهدوا الدنيا على راس فاروق حسني عشان الحجاب ..لكن عبارة ..قطر..دم ملوث..و هما مالهم طالما ماحدش مس الحجاب يبقى كل شئ تمام
طب ايه العمل..البلد فرغت من الدم؟..فرغت من القيادات.؟..فرغت من الرجالة اللي ممكن يجيبوا فجر جديد؟
خلاص ماعادش فيه رجالة في البلد غير البطل المصري الأوحد
..محمد أبو تريكة؟؟؟؟؟؟
عليه العوض
