Friday, July 14, 2006

ياااااا فرج الله

أخيرا وبعد أكثر من أسبوعين من الحرمان من النت ....تمت بنجاح عملية التحرر من براثن الإستعمار المسمى بال (دايال أب) بعد الإنسحاب الأحادي الجانب من جهة الراجل صاحب السايبر القديم...حقيقي الواحد مابيقدرش النعمه إلا لو راحت من قدامه..المهم ها أنا قد عدت إلى قواعدي و زي ما وعدتكم آدي حكاية سوسة المفروسة في مرسى مطروح
-------------------------------------------------------------------------------
ليلة السفر
طبعا دخلت في دوامة التجهيز و تقفيل الشنط و هي المهمة اللي فجأه لقيتها كلها فوق راسي لأن العنصر الرجالي في البيت المتمثل في أخويا و بابايا – و كالعادة الرجالية المتأصلة منذ قبل التاريخ- اتلككوا انهم عايزين يشوفوا ماتش الكورة و مايقدروش يستغنوا عنه (ده كاس العالم و ما بيجيش الا كل اربع سنين- واحنا هنشوف الناس دي فين تاني- معلش معلش ليكي عندنا يوم نعمل احنا كل حاجه لما تكوني عايزة تشوفي أوشين والا حاجه) طبعا ما حبتش ادخل في نقاشات كتيرة حوالين المفروض و الواقع و المسؤليه و المشاركه و نفي تهمة الفرجه على أوشين (قال اوشين قال) ..لأن ماكانش فيه وقت ولا كان عندي دماغ وقتها .....المهم بعد معركة تقفيل الشنط و إعادة جردها و القعاد عليها عشان أعرف أقفل السوسته خلص الماتش و قرروا اننا نسافر عشان نلحق وقتنا
لجنه ع الطريق

.طلعنا الساعة 2 بالليل وكان نفسي احكيلكم على الطريق و اللي حصل فيه إلا اني رحت في غيبوبة من النوم في منتصف المسافة من دخولي العربيه و استقراري النهائي على الكنبة اللي ورا و ماحستش بنفسي إلا تاني يوم قبل مرسى مطروح ب 30-40 كيلو والعربيه بتهدي قبل لجنة مرور ع الطريق مكونة من عسكري واحد واقف لوحده في وسط الصحرا جنب اللجنة و معاهوش صريخ ابن يومين ..العسكري بص كده ع العربيه و هيا جايه من بعيد و ابتسم ابتسامه واسعه كشفت عن اللون البرتقالي الناصع المميز لقطران السجاير السوبر الفرط المتراكم على اسنانه....قلت في نفسي ده باين عليه عسكري وشة سمح أو انه حضر الدورات التدريبيه على الإبتسام في وجه المواطنين اللي كان عاملها الدكتور نظيف ( ربنا ينظفه زي ماهو منظف جيوبنا) المهم العسكري بص لأخويا وهو بيبتسم وقاله (اركن على جنب) اخويا بصله بذهول كده وقاله ليه؟ قاله الحزام ..بص اخويا للحزام اللي هو لابسه و قاله ماله؟ قاله مش مظبوط ..ماله يعني__اركن بس اركن.....ركنا على جنب و لاحت ليا فرصة الإنتقام من معركة تقفيل الشنط السابق ذكرها فاتفتحت: أيوة كده هو ده الأمن و تنظيم المرور ..شفت أهو ده واحد بيقوم بواجبه على أتم وجه..ماهموش انه لوحده و كان ممكن يعدينا من غير ماحد ياخد باله لكن الواجب و الأمانه ..عموما أحسن عشان بعد كده تبقوا تحطوا الحزام مظبوط...انتوا أصلا مهملين ..مانتوا لو كنتوا تبطلوا تكبير الدماغ ماكانتش تتسحب رخصكم دلوقتي) بصلي أخويا زي مايكون بيبص لواحده مجنونه و نزل م العربيه وقف جنب الراجل..ايه يا عمنا مانت معدي قدامك 60 عربيه ماحدش لا رابط حزام ولا حتى عبرك و هدى عشان اللجنه و الا عشان يعني نمرنا لاهي قاهرة ولا جيزه ....لا يا بيه ده
شغلي وواجبي والله ماتفرق معايا النمر ولا انك راكب 128 ولا حاجه من دي أبدا...طب و الحل...ولا حاجه راضيني و اتكل على
الله
أخويا طلع من جيبه10جنيه و ادهاله الراجل رفع ايده تعظيم سلام و قاله بالسلامه ياباشا ........يا حبيبتي يا مصر..شوفته الرخاء اللي إحنا عايشين فيه؟ ب 10جنيه فقط لا غير تأخذ رتبة الباشاوية و تتم تحيتك من قبل وزارة الداخلية...و على رأي المثل(الشرطة في خدمة الشعب) خصوصا لو الشعب معاه ورقه ب 10 جنيه

أول يوم
مش هضيع وقتكوا في أول يوم ده لأنه كله ضاع بسبب ماتش غانا والبرازيل الساعه 6 و مش عارفه فرنسا و مين الساعه 10 و بعدين رجعنا البيت و نمنا لحد الصبح............تمت

كليوبترا


....

تاني يوم طلعنا على حمام كليوبترا ...ماكناش مزنوقين ولا حاجه .حمام كليوبترا ده من أهم المزارات الموجوده في مرسى مطروح وهو بجد مكان في منتهى الجمال و طبعا كالعاده مكان غير مستغل سياحيا على الإطلاق زي مانتوا شايفين في الصورة المنظر رائع الصخرتين اللي موجودين جوة البحر لو أ ي نحات محترف حب يعمل حاجه أجمل من كدهاكيد مش هيعرف يطلعهم بالجمال ده الا انه الله سبحانه و تعالى
...
الصخرة الي ع الشمال هي اللي جواها الحمام بس لازم تخلي بالكم وانتوا رايحين المسافه بتاع 5 متر و كل الصخور اللي ف الأرض بتزحلق جدا و يحدث كل 20-30 ثانيه ان يقوم احد الزوار بأداء قفزة بهلوانيه هايله في الهواء يندب بعدها في الماء غالبا في وضع زرع البصل الشهير اما الناس اللي بتفضل انها تتفرج ع المكان من ع الشط فدول بيتفرغوا لتصوير و تقييم أجمل الشقلبظات ..ولو فيه مدرب جمباز هناك أكيد هيكتشف العديد من المواهب الأوليمبيه
....الحمام نفسه جوة الصخرة عبارة عن نفق على الجانب اليمين ينتهي بشباك مستطيل قريب من الأرض تندفع جواه الميه و بتصب جوه كهف عالي السقف و منخفض الأرضيه و ده اللي كانت بتقعد فيه كليوبترا عشان الجواري يحموها فيه (بالعسل بقه بالليفه و الحجر مش موضوعنا) و بعدين فيه فتحه ع الشمال بتخرج منها الميه للبحر تاني.....طبعا كان نفسي اصورلكم الكهف من جوه بس كان فيه شلة شباب قاعدين و متنحين في الحمام و مش راضيين يتعتعوا احتمال عايشين أصلا في عشوائيات و ما بتجلهمش ميه و لقوها فرصة يستحموا جمعااااء أو إحتمال كانوا بيعملوا حاجة تانيه (ما هي كلمة حمام ليها معنى تاني غير الإستحمام) و عندما وصلت بيا الأفكار إلى هذه النقطه خدت ديلي في اسناني و خرجت (هو دخول الحمام زي طلوعه)؟
شط الغرام

بحب اتنين سوا يا هنايا ف حبهم... بحب اتنين سوا يا هنايا ف حبهم
....................الميه و الهوا طول عمري جنبهم.................
يا ساكني مطروح جنيه ف بحركم... يا ساكني مطروح جنيه ف بحركم
............الناس تيجي و تروح و انا عاشقه حيكم...........
اتنين حبايب الروح شبكوني ف حبكم...دول للعليل دوا
.............................الميه والهوا.........................

الأغنيه الشهيرة اللي كانت ليلى مراد بتغنيها وهي قاعده على صخرة قدام البحر و الشاب الروش حسين صدقي واقف وراها و هي مش واخده بالها (او يمكن كانت واخده بالها و قلباه مش فاكرة بالظبط) ...المهم ان الفيلم ده و الأغنيه دي شهروا الشط شهره خياليه و بعد مرور أكتر من نصف قرن ع الفيلم إلا ان الناس لسه لغاية دلوقت أول ما تيجي مرسى مطروح بتسأل عن الصخرة دي و لازم تزورها.....يقوموا يروحوا شط الغرام يلاقوا الصخرة اللي ف الصورة دي فيفهموا إن ليلى مراد اكيد كانت من قوم عاد إذا كانت قدرت تطلع ع الصخرة دي بالسهوله اللي كانت في الفيلم ..لأ و تغني كمان ..يقوم الناس يجيلها صدمه عصبيه فيرموا نفسهم من فوق الصخرة و ينتحروا و يتضح في الآخر في بيان الداخليه انهم مختلين عقليا

....


كان هذا هو الموجز و إليكم الأخبار بالتفصيل.....القصه و ما فيها بقه إن شط الغرام باظ و اتبهدل و البحر كله فتفتق ذهن المحافظه (حلوة تفتق دي مش كده) عن فكرة عبقريه ..انهم ينقوا شط حلو كده عليه صخرة شكلها مميز و يسموه شط الغرام ..هو يعني حد هياخد باله...بس الصراحه الصخرة شكلها حلو بس ارتفاعها ما بيشجعش حد انه يعيش دور الست ليلى و يطلع يتصور فوقها ..بس فيه حدث لازم بيحصل هناك في أي وقت هتروحوا هتلاقوا شوية شباب متهور بيطلعوا و ينطوا من فوق وتلاقي كل الناس واقفه تحت الصخرة دي و مجهزة الكاميرات و الموبايلات عشان يخدوا صورة ليهم و هم بيعملوا الأعمال البهلوانيه...و العيال بيبقوا ولا كرم جابر في الأولمبياد و يقعدوا يتشقلبوا في الهوا و يطرطشوا و اللي ينزل على جنبه و اللي ينزل على نفوخه وطبعا مافيش داعي اقولكم ان لا فيه حد بيقولهم كده غلط ولا فيه أي مستشفى في محيط 10 كيلو عشان لو حد حصله حاجه يلحقوه..والعيال مابيهمهومش تخيل كده لو انت فوق و فيه تحتك 20-25 واحد
مستنينك تنط عشان يصوروك هتعمل ايه يعني لازم تضحي بنفسك عشان الجمهور (انا مش عشاني انا عشان مصر
عجيبه


....

والعجب العجاب ان المنطقه دي مش مستغله سياحيا ....تشكيلات صخريه لاتقوللي كهوف لبنان ولا غيره مناظر الجبل في منتهى الجمال منظر البحر في حضن الجبل يخليك اول ماتشوفه من كتر جماله عايز تعيط أو ترمي نفسك جواه من فوق الجبل ...مش عارفه المستثمرين غايب عنهم المنطقه دي ازاي ؟...دي حاجه كده من معجزات الخالق و انا لو معايا شوية فلوس ..يااااسلاااام ..قرية و فندق و رياضات مائيه و تلفريك من فوق الجبل لحد الشط و رحلات جوه الجبل و تسلق صخورة وهيصه.....بس برضه كويس انهم معميين عنه خللي الفقرا من الأطباء و المهندسين يعرفوا يروحوا يصيفوا في حته نضيفه بعيدا عن شرم و الغردقه و بورتو مارينا


....



طبعا الأمر ما يسلمش من شوية متخلفين صمموا انهم يبوظوا الجمال ده بكتابة أسماؤهم أو حفرها ع الصخور ..حاجات من عينة محمد أبو سريع للذكرى الخالده و متولي السبع بيحب دينا (مش عارفه تركب ازاي) .....لكن أظرف المكتوب كان واحد ليبي اسمه عماد حافر اسمه
بالعربي و الإنجليزي وجنبه التاريخ 62/6/2006...يظهر الشهر في ليبيا بقه 70 يوم

في ضيافة روميل

و روميل بالنسبة للإخوة الجهله ضحايا التعليم الحكومي..هو قائد القوات الألمانيه اللي كانت متواجده في المنطقه دي أيام الحرب العالميه و اللي كانوا بيسموه تعلب الصحراء من كتر ذكاؤه و دهاؤه وفضلوا ينقوا عليه كده لحد مانهزموا الألمان في الحرب
قبل ماتدخلوا على الشط هتلاقوا متحف روميل و هي المغارة اللي كان روميل مستخبي فيها و بيدير منها الحرب وهتلاقوا جواها مكتبه و نياشينه و مسدسين على بندقيه و خرايط و خطط مكتوبه بخطه و بالطو مترب كده مش هاين عليهم يرمموه و شوية صور لروميل و بعض القاده الألمان.....طبعا الموضوع كله مش مهم بالنسبه لنا بس بالنسبه للألمان أكيد مهم و للإنجليز كمان و السياح الأوروبيين بيروحوا آخر الدنيا عشان يشوفوا حاجات أتفه من كده بكتير و ممكن وزارة السياحه تستغل المكان ده ...يعني زيارة لمغارة روميل على سفاري ف الصحرا على استجمام في البحر على زيارة لمقابر العلمين يبقى برنامج و يجيب سياح ..لكن طبعا لأننا أساسا عندنا آثار مرطرطه و بنرمي فيها يمين و شمال واقتصادنا بمب و الحياة بمبي الدخول للمتحف ب50 قرش و بيقفل الساعه 4

آخر يوم
عدينا ع الأبيض سريعا سريع وبعدين طلعنا ع البوسيت الشط بتاع الناس الكويسين...الشمسيه و ال3 كراسي اللي في كل الشطوط ب5 جنيه
هنا ب32وبعد الساعه 5 بيبقى ب 16 جنيه بس خدوا بالكم الميه غويطه جدا يعني لو مالكوش في العوم خليكوا ع الشط بكرامتكم احسن

آخر نصيحه

....

اللي يروح مرسى مطروح يبقى عايز هدوووء ما فيش هيصه كتير زي بقية المصايف و الفسح بالليل مش كتير (سينما-كورنيش- وفيه صالة بولينج صغيرة) إلا إذا نزلت إسكندرية ودي مسافه طويله شوية ..بس أنا شخصيا بقولكم لازم تروحوا واللي ماشافش مطروح فاته نص عمره أنا بعد ماروحتها لايمكن أروح أي مكان تاني

37 comments:

Anonymous said...

هاى سوسه موضوع مرسى مطروح دة هايل وجميل جدا0 وحكايه الصور كمان جامدة 0 ربنا يوفقك 0 انتى عارفانى؟؟؟؟؟؟؟؟؟؟

بنت عمتك said...

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

soosa el-mafroosa said...

ياااا أهلا وسهلا ايوة كده البلوج نور ..لا و الله طلعتي عند كلمتك ..ياللا اعملي بلوج انتي كمان عشان نبقى زمايل..ونورينا كده على طول

Anonymous said...

انا عارف ان دمك خفيف من عشرينات بس الصراحه انت عسل يا سوسه يا مفروسه وبتتمتعي برشاقه وخفه في صياغة مواضيعك زي الكتاب المحترفين
طيب اسيبك بقي واروح ايه اخر الاخبار مع حزب الله وعشرينات

حمدي... صديق من عشرينات

عمتك said...

حبيبتى بنت اخى
ما هذا الجمال فعلا رائع والله الموفق

Gbalawy said...

ربنا يزود رحلاتك
بس صدقينى فى اجمل من مرسى مطروح بس انتى بنظرتك واسلوبك خلتيها مكان رائع وبرده يمكن معاكى حق فالجمال شىء نسبى

تحياتى

كلمه said...

a5er marah ro7t matroo7 kont 3ayel ebn 5 seneen ....w esra7a kont maf2oo3 menha 2wy.... 3shan makansh feh tv fel shaleh :D
loool... bas shaklha dlwa2ty ba2et agmad ta3ni kaman sanateen hateb2a (ket3ah men aoropa):D

shoowbash said...

هااااااااااي

يعني اروح اصيف في مرسي مطروح علي طمانتك؟؟؟؟
:))

soosa el-mafroosa said...

حمدي ...من عشرينات

منور المدونه بشكل غير طبيعي..اصدقائي من عشرينات لهم مكانه خاصه ..دي برضه عشرة

عمتي

حلو التجمع العائلي ده على الاقل ع النت لو مش نافع في الحقيقه ..يارب ديما متجمعين

gblawy
مطروح اجمل مكان شفته لحد دلوقت لو انت شفت اماكن احلى ادعيلي اشوفها ....اه صحيح انا اول مرة ا يقابلني حد شاف شلاتين ..شكلها حلو يمكن اجي ازورك هناك

كلمه

بقه عشان تليفزيون تكره البلد باللي فيها ..بس عموما لو رحت دلوقتي هتستمتع بيها جدا ..وبعدين الدنيا مليانه قهاوي يا عمنا لو زنقت معاك على موضوع التلفزيون ده ..الحق روح بقه قبل ما تبيقى قطعه من اوروبا و باسعار اوروبا

shoowbash

هاااااي ..على ضمانتي طبعا و صدقني مش هتندم ابدا ...و ابقى ادعيلي

أُكتب بالرصاص said...

صقفة كبيرة هنا يا جدعان

الموضوع جميل والكلمات اجمل
ومرسى مطروح اجمل واجمل

أويدك
فعلاً طبيعة ساحرة ومياه نظيفة وهدوء
وحشتني مرسى مطروح من اكثر من خمس سنوات

على كل حال
انا عديت هنا بالصدفة قلت ادخل اشوف في ايه
عجبني البلوج جدا
برافو
برافو

أُكتب بالرصاص said...

نسيت اعلق على حاجة
الصخرة اللي في الصورة والشباب المختل بيختل من عليها
دي مش في شاطي الغرام ،
دي في عجيبة

وانا لما زرت شاطء الغرام ، قلت يا ميت خسارة عليك يا مصر
منتهى القذارة
غير الاستغلال وتأجير الشماسي بطريقة فجة
بالاضافة ان العربية عرزت فيها
طبعا مش ذنب الحكومة ،
ولكن ..
مافيش حد تاني نعلق عليه المصايب غيرها

حامل المسك said...

شو هل جمال خيتوا
ماشاء الله
مبدعه عن جد
كوني بخير

النوبى said...

والله انا بعد الكلام الجميل والصور الاجمل
هطير على مرسى مطروح
بس انتى المسؤله

--------
ملحوظه
انا شايف ان التعليقات اغلبها عائليه صح
---------
النوبي
رئيس جمهوريه اسوان العربيه المتحده

أُكتب بالرصاص said...

أدب الرحلات من ارقى انواع الادب
وخاصة إذا كان يحوي حس فكاهي

وده ما لمسته هنا

ياريت تزودي انتاجك حبتين

Mamdouh Dorrah said...

شكلها كانت رحلة هايلة

soosa el-mafroosa said...

itstoolate
شكرا ع التشجيع والله رفعت روحي المعنويه ..بالنسبه للصخرة هي موجوده في شط الغرام اصلي مصوراها بايدي يمكن من 5 سنين كانت في عجيبه ؟ احتمال ...ماهي الارض كرويه تلف حول نفسها ..بس لو تحب نرجعها تاني يا فندم نرجعها مافيش مشاكل..يارب يبقى البلوج ديما عند حسن ظن

حامل المسك

اول معلق ع البلوج من خارج مصر...شكرا للتشجيع ..ايوة كده هي دي الوحده العربيه بصحيح

النوبي
على ضمانتي انطلق الى مطروح..وايه موضوع جمهورية اسوان دي ..هو انا نمت اد ايه؟؟؟
بالنسبه للتعليقات هي مش معظمها عائليه ولا حاجه...هي كلها عائليه لان اي حد بيدخل و يعلق انا باعتبره م العيله..انت مثلا باعتبرك اخويا الكبير (حلوة مش كده ..احرجتك)
------------------------------
سوسة المفروسة
خريجة مدرسة القرع المباشر


cortex
فعلا كانت رحله هايله ....عقبالكم

MAKSOFA said...

اللة علي جمالك يامصر

taty said...

سوسة اكتبيلي ايميلك في اعز الناس عشان ابعتلك اغنية حي على الفلاح

sally said...

your name atracted me from a comment you left on another site. so I came to your site and you are right. I donot live in egypt anymore for the past 25 years ,every year I visit only , last year I went sharam elshesh it is ok but a year before I went same place as you did and it was wonderful. my kids love it too , frist day they refuse to leave the hotel and I went alone to the peach when I came back I told them it is really nice they smile and said ya nice for egyption means not even clean , as they born and live in canada so I show them the pictures from the vidio camera they could not belive it , and finally they came with me and they change the amage they had about egypt . and I am glad it is not bessy and noisy I like it quite.
would be nice if the roke is smaller and ya it could be romantic place , but really how can anyone be romantic in egypt , with all respect everyone is looking at everyone. anyway I enjyed your pictures and story..wish you all the best..I also like alexandra only when I have someone who know where to go..and would be better if he is romantic..just kidding..

Mamdouh Dorrah said...

هوه في حد يسيب اسكندرية و يروح حتة تانية؟

Epitaph said...

lesa rag3a mn matroo7 - el obyed - ana kaman.,,,

wahm..w zay mawsftiha keda ya amr

eslobek 7elw awyyyyy masha Allah

w damek zay el 3asal..!

insha Allah,,,mosh a7'r zyara lel blog el gameel beta3ek,,

best wishes ya gameela :)

Epitaph said...

معلهش سؤال

اسم الأغنية ايه؟

بحبها موت
ومش فاكرة اسمها
ونفسي اعملها
download 3andi

شكرا يا جميلة

soosa el-mafroosa said...

maksofa
شكرا لزيارتك ..منورة
taty
شكرا لردك و اهتمامك يا عسل
sally
أهلا بيكي ..انا عارفه ان اللي بره مصربيبقى مشتاقلها جدا ..وبرافو عليكي انك لسه بتيجي و بتجيبي الأولاد معاكي..حقيقي مرسى مطروح جميله و تناسب كل الأذواق و لسه تحسي انها بكر لسه ما اصابهاش اللي اصاب بقيت المدن الساحليه

بالنسبه لاسكندريه ..هي برضه جميلع بس زحمه شوية و بالنسبه للرومانسيين للأسف كلهم استشهدوا في 67 ..ادعيلهم بالرحمه



cortex

و ليه التحيز ده ..عموما هي برضه جميله بس في أماكن أحلى

epitaph
شكرا يا عسل ع الزيارة ..نورينا كده على طول..و شكرا ع المديح احنا باين علينا هنبقى اصحاب..الأغنية اسمها بحلم معاك

Sampateek said...

الله عليكي يا سوسة
فعلا نجحتي تحببينا في مطروح
انا زرتها من حوال 12 سنة كان عيبها الوحيد الكارتة ام حصان
لان الحصان بيعمل حاجات في الشارع ريحتها مش ولابد
بالذات الفندق اللي كنت نازلة فيه كان في مطلع و يظهر الطلوع بيعمل مع الحصان نتيجة مسهلة و علينا نتيجة منيلة
يلا حصل خير
خالص تحياتي

soosa el-mafroosa said...

كلبوزة لكن سمباتيك

شكرا لزيارتك على فكرة انا بقالي سنتين بروح مطروح و ماشفتش خلال المدة كلها الا كارته واحده....هما خلاص انقرضوا ..روحي ماتخافيش..ابقي نورينا هنا على طول..أوكي

بحب مصر said...

انا لسه راجع من مطروح من كام ساعة و بجد اللى مارحش مطروح فاته كتيييييييير جدا

Ahmoss said...

Hi sosa,,
I liked it specially the part you are talking about 3ageeba.
I am writing from LA, USA and you will not believe our beaches ...tedrab elli henna belgazma el2adeema

soosa el-mafroosa said...

بحب مصر

جمد الله ع السلامه..مش كده برضه مطروح دي ماتتسابش

ahmos
أهلا بيك

هو انت تقصد ان الشواطئ في مصر تضرب بتاع أمريكا بالجزمه و الا العكس؟؟
لو تقصد ان شواطئنا أحسن ..كويس جدا إعمل دعايا بقه و ابعتلنا شوية أمريكان ..عندك البوست أهه لو تحب تنسخ الصور و تعمل بيها دعايه ..و ماله...و اهو كله بثوابه

أروى الطويل said...

انا كنت حطه تعليق هنا راح فين على العموم انتى دمك خفيف اوى وبنت نكته

soosa el-mafroosa said...

شكرا يا أروى..من بعض ما عندكم..شكرا يا عسل ع الزيارة ..هستناكي على طول

Mohamed Mehrez said...

على فكرة انا نطيت الصخرة دي
واتصورت فيديو
طبعا كان اخواتي ووالدتي معترضين اني انط
ضحكت عليهم وسهيتهم وروحت نطيتها مرتين
بعد كده قلت لا انا لازم اتصور...روحت ناديت اخويا الكبير وقلت له انا نطيتها ولازم تصورني فيديو
بعد شد وجذب وافق انه يجي يصورني

اللي نفسي انطها بقى..صخرة كليوباترا...ان شاء الله اعمل المغامرة دي السنة دي

ههههههههه

hgv brbv said...

شيء غريب جدا في كلامك!!!
أولا تحاولين قدر الإمكان أن تبدين مهمة..أن ينظر لك الناس على أنك:(متفتحةـ متحررة ـ مثقفة ـ ذكية) بينما أنت ــ للأسف ـ لست أية واحدة من هؤلاء!
ثانيا في حديثك عن روميل قلتِ:
((((طبعا الموضوع كله مش مهم بالنسبه لنا بس بالنسبه للألمان أكيد مهم و للإنجليز كمان و السياح الأوروبيين بيروحوا آخر الدنيا عشان يشوفوا حاجات أتفه من كده بكتير ))))
حقا..بعد الفقرة تلك أردت أن أقتلك ببساطة،و ذلك لأن هذه الأشياء تاريخ..كلمة (مش مهم بالنسبة لنا)هي دعوة للجهل،بل و أكثر أنواع الجهل جلبا للعار..فوجود فرصة كهذه ـ أي وجود متحف روميل في مصر ـ يجعلنا بالتأكيد أحق الناس برؤيتها من ألأأجانب
هذه نقطة أولى
ثاني النقاط انك تقولين(حاجات أتفه من كده)لا أدري كيف تقولين عن متحف روميل (تفاهة)إلا إذا كنتِ أنت تافهة أصلا
تعريفك بروميل أضحكني كثيرا..تعريف ــ ببساطة ــ ساذج
فقط..لا تحاولي الظهور بمظهر المثقفة..و لا ترتدي حلة أكبر منك.

Ayyam said...

شكراً سوسه على العرض الطيب فعلاً تستاهل الزياره. فى مصر فى أماكن رائعه الحقيقه ...أنا مرحتش مطروح خالص لأنى من عشاق الغطس وعلشان كده فبروح البحر الأحمر. بس المره الجايه أديها غطس فى البحر الأبيض ليه لأ

Anonymous said...

Very nice site! »

belhana said...

مجهود رائع

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

Anonymous said...

After getting more than 10000 visitors/day to my website I thought your soosamafroosa.blogspot.com website also need unstoppable flow of traffic...

Use this BRAND NEW software and get all the traffic for your website you will ever need ...

= = > > http://get-massive-autopilot-traffic.com

In testing phase it generated 867,981 visitors and $540,340.

Then another $86,299.13 in 90 days to be exact. That's $958.88 a
day!!

And all it took was 10 minutes to set up and run.

But how does it work??

You just configure the system, click the mouse button a few
times, activate the software, copy and paste a few links and
you're done!!

Click the link BELOW as you're about to witness a software that
could be a MAJOR turning point to your success.

= = > > http://get-massive-autopilot-traffic.com

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول