Wednesday, October 25, 2006

كل سنة وانتوا طيبين




وحشتوني جدا جدا جداااااا

وحشني التدوين وحشتني تعليقاتكم و ساعات خناقاتكم مع بعض

الحياة من غير تدوين وحشة جدا ..كأن حد قطع لساني..بس خلاص الحياة هترجع مليانه حروف و كلمات بعد ما كانت غرقانه في الكنافه و القطايف و الشربات

رمضان ماكانش ينفع يشاركه حد يا جماعه ..شهر كريم جدا بس عايز شغل جامد و اجتهاد ..حاولت أوفيه حقه يا رب أكون قربت شوية ع الأقل

كتير من التسامح ..قليل من الخناقات..انتوا عارفينني ممكن يعدي شهر بحاله من غير ما حاجه تفرسني و انطلق...طبعا ما يصحش

خناقة رقم 1:
الأبطال:
سواق التاكس و انا
-معلش يا أبلة مش هاقدر أدخل الشارع
- ليه يا أسطى فيه حفر و الا ايه؟-
لأ بس انا صايم .لسسسسه هادخل الشارع و ارجع أخرج منه تاني..خديها على رجليكي يا أبلة بأه و خلصي
-
ياااااااسلااااام .. (أطلع ورقة و قلم) هو انت نمرتك يا أسطى أولها 5 و الا 4 أصلي ما خادتش بالي

دقيقة و كان واصل لحد بيتنا و خد القرشين و اتكل

خناقة رقم 2:
الأبطال:
بتاع القطايف و برضه انا
- لو سمحت ..القطايف اللي انا خدتها منك دي بتفك-
يا فتاح يا عليم ..اللهم اني صايم..يعني ايه يا أبلة بتفك
-
يعني ما بتلزقش في بعضها و بتفك في الزيت
-
أوففففف..اللهم اني صايم ..يعني عايزة ايه دلوقت؟
-يا اما تجيب غيرها يا اما ترجعلي الفلوس لو سمحت
-أوففففف..اللهم اني صايم ..كل العجينة واحده و بعدين ماحدش اشتكى منها غيرك يبقى انتي اللي مابتعرفيش تعمليها
-
جرى ايه يا اخ انت ..أولا هو مافيش حد صايم الا انت و الا ايه (صوتي يعلى عشان اسمع الناس اللي بتشتري) مش كفايه ان القطايف بتاعتك بايظة و بتتفك و الكنافه معجنة و مابتستويش و السمبوسك كمان...
-
طب بس بس بس ..اتفضلي يا أبلة ادي فلوسك اهي و فوقها صباعين جلاش كمان
-
شكرا لحضرتك(شوفوا الأدب) و الجلاش خليهولك(صوتي يعلى تاني) الجلاش كمان بايظ



خناقة رقم 3
:
الأبطال:
واحدة ست جنبي في الصلاة و ...مش عايزة نصاحة طبعا أنا

-لو سمحتي بطلي تشديني من هدومي و انا باصلي
- الحق عليا با خليكي تعدلي الصف انت كده هتبوظي صلاتنا كلنا
-
انا باساوي الصف كويس ..بس انت بتشديني من هدومي وانا ساجده ..عايزاني اساوي الصف وانا ساجده ازاي يعني؟
-
ايوة تساويه ما تساويهوش ليه
- يا ستي ما ينفعش ..طب اشوف الصف ازاي وانا ساجده عشان اساويه و بعدين لو انا طولي مثلا متر و نص و حضرتك متر الا ربع يبقى ازاي نسجد على نفس المسافة..ماينفعش
-أنا ..أنا متر الا ربع..انت لعلمك بقه صلاتك مش مقبولة ..و طول مانتي بتقاوحي كده العند هايوصلك للكفر
-كمان هتكفريني...شكررررا..أنا هاروح اصلي في بيتنا أحسن...سلام


يعني دي حبة خناقات بسيطة كده..ربنا يغفرلي و يهديني .حد دعالي في ليلة القدر اني ابطل اتفرس؟؟؟
لو نسيتوا ابقوا فكروني أفكركوا السنة الجاية انشاء الله



كل سنة وانتوا طيبين

44 comments:

Mongey said...

حمد لله علي السلامة
مرحب بيكي
كل سنة وانت طيبة
و حل التلات مشاهد دول
خصوصا الحتة بتاعت صوتي يعلي

HANY said...

كل عام وأنتم جميعا بخير
وتقبل الله منا ومنكم صالح الاعمال

وعود أحمد ان شاء الله

وتقبلى تحياتى

Anonymous said...

عييييييد سعييييد
كل سنة وانتى طيبة يا مفروسة
والعيد الجاى يكون ربنا تاب عليكى من الفرسة
قولى امين

وعود احمد للتدوين يا شابة

متتأخريش كدة تانى يا بنتى

كل سنة وانتى بالف خير والاسرة كمان
سلميلى على بابا

إيمــــان ســعد said...

كل سنة و انتى طيبة يا سوسة

و لا تقلقى ان شاء الله الذنب مغفور في شهر الخير كله

و عيد سعيد عليكي و بلاش اكل كحك و بسكويت كتير

تحياتي

KazaBaza said...

عود احمد

يلا الناس كلها مستنيه الجديد
مفيش حجج تانيه رمضان خلص

ياء said...

كل عام وانت بخير

ربيع said...

نياه نياه نياه
بتفكرني بخطبتي ، هي اللي ممكن تتخانق مع سواق التاكسي و تعمل نعاه الحركة دي ، انا لو سواق تاكسي هاديلك الرخصة و اقولك وريني عاتعملي ايه
كمان موضوع القطايف ، الطبيعي انك بتسيبي الزيت يسخن ، يقدح ، يبقبق ، و بعدين تحطي القطايف
اما موضوع الصلاة فانا موش فاهم؟ يعني هي كانت عايزه تسرقك؟
اه كمان خطيبتي عندها شهر رمضان ده مالوش اخ ، لا شغل و لا خروج و لا أي حاجه ، و تولع الدنيا بجاز انا عايزه اختم القران

Anonymous said...

لووول
إنتي مش سهلة برضه يا سوسة
بتقوليلها انتي متر الا ربع بس بالذوق يعني
ضحكت موت ونا باقراها
اما بالنسبة للقطايف فهي مش ذنب الراجل
الرك على اللي بيقفلها

أُكتب بالرصاص said...

تصدقي بالله
انا قلت برضه مش معقول سوسة تغيب الشهر ده كله على بوست واحد
اكيد بترقد
وبتحوش الشهر وترجع تحكلي لنا على اللي عملته

بصراحة

نصايح مفيدة للتعامل مع الخلق

حلو قوي حكاية القطايف دي
انا لو منك كنت كمان اخدت الجلاش
احسن من عنيه


:)
متر إلا ربع ؟
:)))
كويس انها مضربتكيش بحاجة

عبدالله مفتاح said...

كل سنة وانتي طيبه
جامد اوي موضوع القطايف اللي بتفك
ده لما ماما بتقولي ارجع حاجه حاجه بكون مدايق جدا
ههههههههه

^ H@fSS@^ said...

سوسه المفروسة
عجبتني حلولك لاخدك حقك
الحمد لله في ناس زي بتاخد حقها بالدراع
عليتي معنوياتي
انتي عسل
تحياتشي

Amr Ahmed said...

هاي سوسة حمد لله علي السلامة اولا انا باهنيكي علي مدونتك ويمكن انتي من اكتر الناساللي شجعتني اعمل مدونتي انا كنت متابع مدونتك قبل التوقف واكيد ان شاء الله بعد العودة وبعدين هدي اخلاقك شوية..........خلاص اوعي تضربي شكلك ايدك تقيلة.ادعيلي باتوفيق في التدوين وااحب اسمع رايك في مودنتي........كل سنة وانتي طيبة

Ma 3lina said...

kol sana we enty we kol el moslmeen taybeen

i missed ur topics alot we kol shiwia afta7 ymken tekony katbty 7aga

about the fights bet3et el konafa di to7fa awii shaklk rabety el ragel

m3rfsh afre7 en bi7sel feeky keda 3lshan tekteblna el 7agat el 7elwa di wala ad3ilak rabna yb3dek 3an el bifrsoky:)

الأميره أوسه said...

ههههههههه
أنا جيت
عيد كويس عليكى
أنا لز منك كنت ضربت الست اللى بتصلى جنبى دى بالمطوه فى وشها
والراجل الكنافانى كنت رشيته بمية نار
وسواق التاكسى كنت أتبليت عليه أنه عاكسنى وحاول يعمل أستغفر الله العظيم
أنت عارفه أد أيه أنا متسامــحه
فى حــقى وبحب كل البشر
فى رمضان أنا متخانقتش مع حد خالص
يدوب الجيران عشان بحدفهم بالبومب
وأرمى عليهم صواريخ فبالكونتهم ولعت
طيب بذمتك فيها أيه
مش بلعب
تــيجى نغنى بقا
العيد فرخه
كاك كاك كاك

علا من غزة said...


هاهاها

كل العمايل دي في الناس يا سوسة حرام عليكي ,, تلاقيهم هما ال اتفرسوا منك فرسة جامدة جدا ..
تعرفي اكتر حاجة فرستني في رمضان هي ايه .. الناس الي بتاخد رمضان حجة للكسل والنوم طول النهار وعدم المذاكرة وييييه ,, كأن رمضان هو اجازة نص السنة بس جات بدري شوية

ياللا المهم احنا عيدنا قبلكم بيوم :)

وحدة قومية عربية مهلبية مش معقولة

وتحياتي ليكي

همس الليل said...

هو مش بردو الشياطين بتبقى متسلسة فى رمضان ؟؟؟
يلا كل رمضان وانت طيبة

3rby said...

سوسة حبيبتي
سمد لله عالحلامة
وحشتيني ووحشتني كتاباتك المطرقعة
انا بقه اتخانقت كمية خناقات في رمضان لدرجة اني كسلت اكتبها لانكوا ماكنتوش هاتعيشوا علشان تعلقوا:)
حكاية الصلاة ديه بتحصل كتييير جدا
عندي جد(عم امي) دمه مسخرة
كان مره بيصلي...اللي واقف جمبه كل شوية يحط رجله علي رجل جدي...جدي يحاسب رجله ويتاخر عالتاني...كذا مره...لحد ما ساب الصلاة وقاله(بعد لافسخك نصين)
ههه

Tamer Nabil Moussa said...

حمد لله علي السلامة


وكل سنة وانتى طيب وبصحة وسلامة

تحياتى

أحمد المصري said...

كل سنة وانت طيبة وبطلي فرسة بقى لحسن الخناقات تكتر رمضان الجاي 00تقبل الله صالح عملك في رمضان 00مع تحياتي 00
والسلام عليكم0

Lion king said...

السلام عليكم
رمضان شهر جميل
لكن الناس هي الي بتعكره
بانها موش طايقة نفسها وضايق خلقها
والحجات دي بالرغم من ان الواحد لازم يكون اكتر رحمه
ومودة وحب للناس

Anonymous said...

طب واحدة واحدة بقى

اولا بتاع التاكسى يا سوسة حقه ميدخلش الشارع هههههه ومش عافية يعنى الشارع مطبات او ممكن مش هيعرف يطلع من عندكم عشان ضيق الشارع وكده

نيجى للمغلوب على امره بتاع القطايف شكل الزيت هو اللى مش حلو يا سوسة هههههههههه او متقدحش صح يعنى وده اللى خل القطايف تفك

اما الست اللى بتصلى دى وبتشدك وانتى تقوليلها متر الا ربع والحوار اللى بينكم جوا الجامع ده مكنش مفروض يحصل كنتى اصبرى لما تخلصوا صلاة وبعد لما تخلصوا تكلميها وكده

وفى الاخر اقولك دايما منصورة يا بنتى

كازانوفا

tota said...

سوسة
وحشتينا وطولتى الغيبة

تصدقى ان لازم توريهم المخالب علشان يعرفو ان مش كل قطة مش بتخربش

بس احسدك على ردود افعالك فى رمضان على قد ما اخذتى حقك بس من غير غلط فى حد ما عدا صاحبتنا اللى متر الا ربع معلش سامحيها بقى وجهة نظرها كانت قصيرة

تحياتى

Nouran said...

والله الحياة من غير تدوين تخنق بجد
كل سنة وانت طيبة يا جميل

3rby said...

تقريبا كده سوسة هاتغيب تاني
اععععع
قلتلك خدي مضاد حيوي لسيجنال تو
:)

شــــمـس الديـن said...

السلام عليكم و رحمة الله و بركاتة

كل عام و حضرتك بخير
التدوينة اللي فاتت دي جميلة اوي بجد و حلولها جميلة

احسن حاجة صراحة ان حضرتك مش سسلبية ...بعني بتاخدي حقك , لاني اعرف بنات كتيرة جدا بيحبوا يتجنوا المشاكل و بيسكتوا عن حقهم كتير اوي

بس عايزة اعرف
هوا رقم التاكسي كان هيفرق في ايه و الراجل خاف ليه ؟؟؟

بالنسبة للقطايف ...العيب في القطايف مش في الزيت لان القطايف فعلا ساعات مش بتمسك في بعضها علشان بتكون اتهوت ... و المفروض القطايف تبقي صابحة و متتهواش علشان تلزق في بعضها صح

بالنسبة للست في المصلي ...الست دي مكانتش عايزة تسوي الصف لان تسوية الصف بتبقي بشكل مختلف تماما دي تقريبا كانت عايز تنشلك بس غشيمة

علي كل ...كل عام و حضرتك بخير :)

Anonymous said...

loooooooooooooooooooooool

متر الا ربع؟؟؟

ههههههههههههههههههههههههه

اجدع حاجة كمان..بتاعة التاكسي

بس اخاف اعمل معاه كدة
يخبطني بحاجة
هههههه

كل سنة و انتي طيبة

ROMIL said...

سوسة المفروسة
جميله التدوينه ولو كنتي فعلا في الحقيقه كده فأنا أحييكي
فعلا سوسه

soosa el-mafroosa said...

mongey

الله يسلمك كل سنة و انت طيب
عشلن تعرفوا اننا بنات جامده بناخد حقنا بلساننا


hany

تقبل الله منا و منكم

مين أحمد ده؟

شهروزة

شهروزة حبيبتشي

ايوة كده ادعيلي انا تعبت م الفرسة جدددااا

مش هتأخر تاني انشاء الله

غير رمضان الجاي

مش هاسلملك على بابا ..انتي حلوة و الراجل في سن خطر:))

soosa el-mafroosa said...

بنت سعد

ربنا يغفر لي يا رب على الأقل اللي عملته السنة اللي فاتت ما هو كل رمضان يمسح الذنوب اللي قبله

ماتخافيش مش هاكل كحك كتير

أصل انا اللي عاملاه

kazabaza

برضه أحمد...؟

مين أحمد ده يا جدعن لعيب كورة والا حد من لجنة السياسات؟

مافيش حجج يا فندم خلاص

أوعدك

yehia

كل سنة و انت و العائلة بخير انشاء الله

soosa el-mafroosa said...

spring

ابقى عرفني بخطيبتك ..شكلنا ممكن نبقى صحاب

و نؤسس سوا جمعية المرأة المتوحشة

وائل عباس

ايه النور ده ؟؟

وائل عباس عندنا ..يا مرحبا يا مرحبا
المدونة نورت يا باشا و الله

انا ماكانش قصدي انرفز الست دي و الله بس فرستني و انا لما باتفرس مابعرفش امسك لساني خاااالص

القطايف على فكرة كانت بتفك قبل حتى ما اخلص قفلها
العجينة كانت ناشفة بايته او اتحطت في الهوا كتير و بكده ماتقفلش

أكتب بالرصاص

عشمك طلع في محله

الصراحه الجلاش شكله كان مايشجعش ..لو كان حلو كنت خدته طبعا أحسن من عينيه الإتنين

الست بتاع الصلاة انا جريت من قدامها لإنها كانت بدات تجذ على سنانها..انا كان ممكن اتخانق بس ماكانش معايا حد يمسح الدم

soosa el-mafroosa said...

عبدالله مفتاح

كل سنة و انت طيب

بتضايق ليه من ماما؟ نفذ بس النصايح بتاعتي و يا اما هيرجعلك فلوسك يا اما هايفسحك:))

hafsa

منورة يا حفصة

تعالى انضمي معانا لجمعية المراة المتوحشة

هو ده الحل في الزمان ده ..تاخدي حقك بدراعك عشان مافيش حد هياخدهولك

قبلاتشي

ceaser

دانا عندي مخزون كبييييييير...عايز حبة؟

soosa el-mafroosa said...

miro

مبروك ع المدونة ..انشاء الله تبقى جامده جدا

و يشرفني يا فندم انك تتابع المدونة ..و بالنسبة لإيدي ..لا و الله دانا غالبانة و اي حد هايهوش هاخد ديلي في اسناني و طييران

انا باخد حقي بدماغي ...بالحيلة يعني مش بالروسية

ma-3alina

منورة يا زميلة..مش زميلة في الشقاء الصيدلي برضه

ربنا يفرجها علينا و عليكي يا رب

بتاع الكنافة اتربى طبعا و كنت كل اما عادي في الشارع يزغرلي و حاسة انه عايز يحطني ع الصينية بتاع الكنافه دي اللي بتلف

ادعيلي ربنا يفك فرستي لحسن خلاص تعبت

سلام يا دكترة

ironcobra40

يخرب عقلي ليه بس..هو انا حلتي غيره؟؟

كل سنة و انت طيب

soosa el-mafroosa said...

aoossa

اووووووسة ..ازيك يا روحي وحشاني مووت مووت مووت

انا عارفه التسامح اللي هو احسن حاجه فيكي

الحقيقة مية النار شحة في السوق ..و المطواة كنت مسلفاها لاخويا يقضي بها مصلحه
بس ملحوقة رمضان الجاي

العبي يا روحي و الا يهمك الدنيا مليانة بلكونات لكن ماعندناش غير اوسة واحده بس

3ola

الرفيقة علا من أرض الجهاد

منورة يا لولا و الله

دي نقطة من حنفية يا لولا و الله دا الفرس كان على ودنة في رمضان امال لو حكيتلكوا عن البهوات الطول بعرض اللي كانوا بيصرفوا من عندي ادوية و كمية الإستعباط تحت غطاء الصوم(حلوة تحت غطاء دي ..حد فاهم حاجه (..
ما علينا كل سنة وانت طيبة و سلميلي على كل اللي عندكوا و خليهم يبطلوا ضرب في بعض

soosa el-mafroosa said...

cat_eyes

قصدك ايه يعني ؟؟..احم احم ..يعني انا...؟؟؟؟

ماشي يا ستي مقبولة

3rby

عربي الشاب الروش ابو جل في شعره

ليك وحشة و الله

طب اكتب شوية خناقات مشاركة وجدانية يعني

بس جدك ده عسل و الله ..سلملي عليه

tamer

الله يسلمك

كل سنة و انت و الأسرة الكريمة بخير

soosa el-mafroosa said...

د/أحمد المصري

كل سنة و انت طيب يا دكتور

نفسي و الله ابطل اتفرس بس اعمل ايه ؟؟؟جيناتي كده

ادعيلي

lionking

قصدك انا يعني اللي بعكره

دانا طييييبة امال بقيت الناس تقول عليهم ايه؟

كازانوفا

كل سنة وانت طيب يا كازانوفا

واحده واحده انت باه

اولا بتاع التاكسي كان بيستهبل لأن الشارع كان طوله يجي ميت متر وانا مش واخده تاكس و دافعه الشئ الفلاني عشان امشي ميت متر على رجلي و بعدين لو كده كان لازم يقوللي قبل ماركب مش بعد ما وصلت

القطايف يا سيدي كانت ناشفة و اتهوت أكتر من اللازم أو اتسابت في الهوا كتير لحد مانشفت و بكده ماتلزقش

بس هاتعرف منين ..هو انت بتعملها؟..انت و كل الرجاله بتاكلوا و بس...عيني علينا يا مكسورات الجناح

الست بتاع الصلاة ..مانا كنت بكلمها بعد الصلاة بتاع العشا و قبل التراوييح ومارضيتش اتخانق و سيبتلها الجامع كله و مشيت
اعمل ايه اكتر من كده

soosa el-mafroosa said...

tota

توتا توتا..انت كمان و حشتيني يا سكرة

اخخ نسيت اربي ضوافري عشان اجتماع الجمعية ..مش مشكلة نعض بعض

الست بتاع الصلاة انا هربت من قدامها ..الحكمة بتقول ..احترس من كل من اقترب من الأرض

قبلاتشي

nouran

اه و الله الحياة من غيره تخنق و تعل

كل سنة وانت منورانا يا شمعه

3rby

لم التعابين يا عربي

كل سنة وانت طيب

soosa el-mafroosa said...

شمس الدين

كل سنة وانت طيبة

الحمدلله موضوع السلبية ده مش موجود فيا خااالص ...و ده اللي موديني في داهية

رقم التاكسي المفروض اني ممكن أعمل بيه محضر في القسم للسواق..بس طبعا ولا عمري كنت هاعملها

شكرا لدفاعك عن موقفي مع بتاع القطايف..أيوة كده مايعرفش مأسات القطايف اللي بتتفك دي غير اللي بيتدبس في عمايلها زينا

تفتكري الست كانت عايزة تنشلني ..جايز برضه ..بس دي كده تبقى غشيمة فعلا

epitaph

كل سنة وانتي طيبة يا ابيتاف

و الله وحشتني لمتكوا يا بنات ..بجد بحبكم

كل سنة وانتي طيبة و لو محتاجاني في اي خناقه ..اطمني وراكي ستات


romil

شكرا يا فندم ع التحية

الكلام ده متوقع من رجل عسكري زيك

دانكشن يا هر

saso said...

ياااة عليكي
انا بطلت الصلاة في الجامع من الحركة الشهيرة دي ولو اتكلمتي صلاتك مش نافعة
طيب هاصليها في بيتنا وهتنفع ان شاء الله.. ده غير صلاة العيد في الشارع والناس مقتنعة ان ده طبيعي تبقي بنت وبتصلي في الشارع والناس رايحة جاية.. ما علينا
بجد بجد رمضان كان هادي اوييييييييييي عندك

Polka Dotted said...

Kol sana wenty tayeba ya gameeeeeeela
ba2alek keter mo7'tafeya:D

مفلس افندى الرايق said...

اخيرا ظهرتى

ولا بلاش اعلى صوتى لتعملى معايا زى بتاع القطايف ولا التاكسى

ههههههههههههه
تصدقى انا دلوقتى حسيت ان مصر لسه بخير
ايوه كده لازم تاخدى حقك من غير اى احراج مادام معاكى الحق

Dr. Tantawy said...

ده أقل واجب في العيد هههههه
كنتي تعالي احكيلك عاللي حصل عندنا :) محنا جيران و الجار للجار هههههه مناظر لا يعلم بيها الا اللي خلقها

المهم اني قضيت العيد مذاكره الحمدلله

كل سنه و انتي طيبه :))

ذو النون المصري said...

حلوه حكاية القطايف اللي بتفك دي
انااستحاله اروح ارجع اي حاجه اشتريتها لاني بتوقع دائما سلوكيات غير منضبطه من البياع
عايز يبيع و خلاص و بياعته في الغالب علي يمين الطلاق اروح انا ارجع له ما اشتريته ؟ لا يمكن
تحياتي لكي و للجميع

Yasmine Adel Fouad said...

بجد الخناقات كوميدية جدا

صحيح انا مش بحب ارجع حاجة اشتريتها لنفس سبب ذو النون بس لو كلنا سكتنا يبقى خربت

اما موضوع التاكسى فبحييكى عليه

و الست اللى طولها متر الا ربع

جرحتيها فى مشاعرها يا شيخة

عموما العيد ماطلعش بعد وسط البلد سعيد

بس العيد الجاى فرستك تقل يا اوختشى و تلعب البلية معاكى

القيصر said...

احب انا ابدى اعجابى بمواضعتك الحرة دى واتمنى انك تشرفينى فى مدونتىالمتواضعه كمبتدأ فى التدوين
شكرا