Saturday, July 29, 2006

فعلها البطل ..شعبولا



فتحت البلوج و بصيت بصه على تعليقات الموضوع اللي فات لقيت تعليقين جداد من "بحب مصر " و
بيقولولي فيه ان"dead man"
القائد الركن شعبولا خرج عن صمته و أدلى بدلوة في الأزمة الحاليه و خرج بتصريح غنائي فخيم...تركت الكومبيوتر و جريت ع الدش و فتحت "ميلودي ارابيا" لأجده هناك ..نصير المقاومة الوحيد في الوطن العربي ..صوت النضال..ضمير الشعب..منور ع الشاشة و بتتذاع الأغنية (زي مايكون قلبي حاسس) ناديت على بابايا و أخويا ..شعبان عمل أغنية ..شعبان عمل أغنية ..بابا كان نايم ..قام جري م النوم أخويا كان عنده رانديفو وبعد ماكان نازل ع السلم رجع تاني و قرر انه يلطع الجو ...مش وقته شعبان بيغني....و جلسنا احنا التلاته مركزين جدا في غنى شعبان و في الكلام اللي بيقوله ..نضحك تارة و نحرك رأسنا موافقين تارة أخرى(تارة يعني مرة بالمناسبه) ..و في محتوى الأغنيه ما معناه ..هو انا مش قلتلكم قبل كده..هو انا هافضل أفهم فيكوا لإمتى يا حمير...و يعترض فيها على ضرب المنار و استهداف الجزيرة ( يا سلام ع الوعي يا شعبان)..و لينهي كل ذلك بجملته الأيقونية (بس خلاص) و لكنه يزيد في الآخر (...أنا زهقت) ...ضربة ف قلبكوا يا عرب زهقتوا الراجل ...يعني يبقى كويس لما يفيض بيه و يروح يحترف بره و تضيع علينا ثروة قومية زي دي؟؟؟؟؟؟؟

و الآن أنا أؤكد لكم أن مصير هذه الحرب قد تغير في اللحظه التي قرر شعبولا فيها الخروج عن صمته و دعم المقاومة....انه النداء الذي كانت تنتظرة جحافيل الشعب العربي (ماحدش يقوللي يعني ايه جحافيل دي عشان ماعرفش)..فقد كان الكل يدير مؤشرات الراديو .. و يبحث بجنون بين قنوات التلفزيون....الى ان سمع الجميع نداء شعبان

وهكذا إستمع شعبولا الى نداء "قلبي" ليقطع كل الألسنه و يكمم كل الأفواة و يسكت كل الأصوات التي كانت تردد أن "سعد الصغير " قد رماه من فوق عرشه ...الا ان عرش شعبان الأساسي في قلوبنا ووجداننا سيظل دائما في دعوته الدائمه للجهاد و كشفه المتواصل لألاعيب الصهاينه و الأمريكان...و مهما كانت قوة جهازهم المخابراتي .. و سيطرتهم الإعلاميه ..إلا انهم لا يستطيعون ابدا ان يضعوا يدهم على ضمير الوطن ............يا فارسهم يا شعبولا.

و بما أن شعبولا خلاص اتكلم ..ما عدش ليكوا حجه بقه يا حكامنا عشان تشجبوا و تستنكروا الحرب في لبنان..خلاص شعبان شال عنكوا الحرج و قالها....و لا عاد ليكوا حجه يا شباب تخافوا تطلعوا في مظاهرات..شعبان قالها..و لا عاد فيه حجه لأثرياء العرب يخافوا يلموا تبرعات ...شعبان قالها..شعبان قالها ....قالها البطل شعبولا

Sunday, July 23, 2006

نصر الله ....و شعبولا





أثارت حالة التباته و التناحه التي يعيشها كل العرب في داخلي تساؤلات كثيرة..هو احنا خلاص جتتنا نحست ..ما عدناش بنحس خالص..اتعودنا ع الإهانه و على الضرب على القفا للدرجه دي..بقينا بنحول القناة- من الزهق مش من التأثر- لما ييجي خبر عن انفجارات في العراق أو اجتياح في فلسطين عادي يعني و ايه الجديد؟؟..ست قاعده تلطم على وشها ..راجل قاعد يعيط على عيل من عياله..جثة طفل ماكملش سنه راسه طارت من قذيفة مدفع..حول القناه يا عم حول خلونا نشوف اخر أخبار تامر حسني و اخر فساتين اليسا

بس اذا كنا اتعودنا من زمان على موضوع العراق و فلسطين ده الغريب اننا ناخد موضوع انضمام دول تانيه للقائمه السوده بالبساطه دي ..حتى ايام اجتياح العراق كان فيه تأثر و اهتمام اكتر من كده بمراحل..عمرو خالد كان عامل برنامج نار..جمع المساعدات من كل مكان في مصر ..و المظاهرات كانت على ودنه و الهتافات تقطع القلب...لكن دلوقت زي مانكون مضروبين على رؤسنا او كإن حد ساقينا حاجه أصفرة....

طب ايه السبب؟؟؟

أولا : المونولوج الهايل اللي طلع غناه الثلاثي المرح: الحلو المصري و القمر السعودي و الأمور الأردني بأصوات هي مزيج من نقيق الضفاضع و نهيق الحمير..و اللي تسابقوا من أول واحد يطلع يقوله قبل التاني تنفيذا لأوامر سيدهم الكبير والحلو بتاعنا كان نفسه يسبق و يزيد في تأكده من توريث العسل الصغير بس السعودي سبق الكل (ربنا يجعله في ميزانه يوم القيامه). مش انتوا كنتم زعلانين من موضوع الشجب و الإستنكار و بتقولوا دي سلبيه..ياللا يا سيدي ولا شجب و لا استنكار إلا إذا كان لحزب الله.وطبعا التنصل من حزب الله بالطريقه دي يخلي أي حد في المنطقه يخاف حتى يجيب سيرتهم ليتهموه بالخروج عن الصف و الوقوف ضد الإتحاد العالمي للقضاء على الإرهاب و مش بعيد يسقطوه في امتحانات أولى ثانوي زي الاء ..و هو ماصدق عدٌاها

ثانيا: الطائفيه اللي هي الداء المستحكم اللي بيسري في عروقنا من قبل التاريخ...زمان كان انت تبع رع و الا آمون؟؟ دلوقتي انت مسيحي و الا مسلم ..لأ و الأدهى ...انت سني و الا شيعي؟؟
وطبعا احنا سنة ..نبقى دح ..و حزب الله شيعه يبقوا كخ...و أي حد هيشجب الحرب و الا يحاول يرفع صوته بشعار يحيي بيه حزب الله يبقى خلاص خرج من المله و احتمال يقيموا عليه الحد

ثالثا: حالة غسيل المخ المستمرة اللي بيقوم بيها خبراء الغسيل في الأنظمه العربيه.....بص في عينيا نااااام ناااام .شد اللحاف و اتغطى..احنا مش حمل أمريكا ..إحنا مش اد إسرائيل..لو دخلنا معاهم في حرب ..هنمووووووت كلنا ..احنا ضعفااااا ..ضعفاااا .و الحل عشان نبقى أقويا هو :.........................ما فيش فايده و مافيش حل ....أحسن حاجه اننا نوطي نبوس جزمة أمريكا و نمشي جنب الحيط.....و عشان ما نعلى و نعلى ونعلى...لازم نطاطي نطاطي نطاطي
و ابعد عن القضايا لتتبهدل يا ضنايا

ده حتى الفنانين اللي كانوا بيتلككوا على أي مناسبه يرزعولهم فيها أغنيه و يقعدوا يتشنجوا و يعيطوا في الكليبات ..طناااااش....ولا حتى اللبنانيات ..يعني حتي لا" نانسي" راضيه تطبطب و تدلع و لا "هايفا" راضيه تبوس الواوا بتاع لبنان....لأن الحكومات العربيه عامله حظر على كل الأغاني اللي ممكن تثير حماس الإرهابيين أمثالنا اللهم إلا أغنية مروة

الصراحه راحه يا روحي.........و إنت مابتعرفش
الصراحه راحه ياسيدي.........و إنت مابتقدرش


رابعا: الشعوب العربيه من بعد عبد الناصر ما عدتش بتدي ودنها لأي سياسي بيخطب أو يتكلم ..وأصبحت الدول العربيه لا تطلع على أحداثها السياسيه من خلال الجزيرة أو العربيه بل من خلال ميلودي.....و بالأخص من خلال أغاني شعبان عبد الرحيم
يعني آخر انفعال حصل للعرب ضد إسرائيل كان من خلال أغنية "أنا بكره إسرائيل" ...هذه الأغنية اللي غيرت وجه السياسة المصرية وودت عمرو موسى في الكازوزة....و فيه ناس كتير ماكانتش تعرف مثلا محمد الدرة إلا لما سمعت شعبولا بيغني له ......

يعني لو فرضنا إن شعبان عمل أغنيه دلوقتي عن لبنان هتلاقيها بكرة على كل لسان و الناس كلها بتتكلم أكتر عشر مرات من كلامهم أو انتباههم للقاء "حسن نصر الله " مع قناة العربيه اللي مر على ناس كتير مرور الكرام...و هتلاقي الناس في أي فرح منفعلين و متحمسين و نازلين رقص على أنغام الأغنيه الجهاديه بتاعة شعبان ..و اهو كله جهاد

إيه اللي حصل لنا خلانا ناخد موقفنا السياسي و الإجتماعي –بل و ساعات- الديني من شوية جهله و ساقطين ...الشعوب العربيه الآن شعوب بتفهم بوسطها و بتنفعل و تجاهد في الأفراح و النايت كلابز

نحن نشجب العدوان على فلسطين)...إفتح القوس....(نحن نشجب العدوان على فلسطين و العراق)...إفتح القوس.....(نحن نشجب العدوان على فلسطين و العراق و لبنان ) .....إفتح القوس ...و ياريت تسيبه مفتوح

الدور قرب علينا و إحنا مش واخدين بالنا.............مستنيين شعبولا يقوللنا

Friday, July 14, 2006

ياااااا فرج الله

أخيرا وبعد أكثر من أسبوعين من الحرمان من النت ....تمت بنجاح عملية التحرر من براثن الإستعمار المسمى بال (دايال أب) بعد الإنسحاب الأحادي الجانب من جهة الراجل صاحب السايبر القديم...حقيقي الواحد مابيقدرش النعمه إلا لو راحت من قدامه..المهم ها أنا قد عدت إلى قواعدي و زي ما وعدتكم آدي حكاية سوسة المفروسة في مرسى مطروح
-------------------------------------------------------------------------------
ليلة السفر
طبعا دخلت في دوامة التجهيز و تقفيل الشنط و هي المهمة اللي فجأه لقيتها كلها فوق راسي لأن العنصر الرجالي في البيت المتمثل في أخويا و بابايا – و كالعادة الرجالية المتأصلة منذ قبل التاريخ- اتلككوا انهم عايزين يشوفوا ماتش الكورة و مايقدروش يستغنوا عنه (ده كاس العالم و ما بيجيش الا كل اربع سنين- واحنا هنشوف الناس دي فين تاني- معلش معلش ليكي عندنا يوم نعمل احنا كل حاجه لما تكوني عايزة تشوفي أوشين والا حاجه) طبعا ما حبتش ادخل في نقاشات كتيرة حوالين المفروض و الواقع و المسؤليه و المشاركه و نفي تهمة الفرجه على أوشين (قال اوشين قال) ..لأن ماكانش فيه وقت ولا كان عندي دماغ وقتها .....المهم بعد معركة تقفيل الشنط و إعادة جردها و القعاد عليها عشان أعرف أقفل السوسته خلص الماتش و قرروا اننا نسافر عشان نلحق وقتنا
لجنه ع الطريق

.طلعنا الساعة 2 بالليل وكان نفسي احكيلكم على الطريق و اللي حصل فيه إلا اني رحت في غيبوبة من النوم في منتصف المسافة من دخولي العربيه و استقراري النهائي على الكنبة اللي ورا و ماحستش بنفسي إلا تاني يوم قبل مرسى مطروح ب 30-40 كيلو والعربيه بتهدي قبل لجنة مرور ع الطريق مكونة من عسكري واحد واقف لوحده في وسط الصحرا جنب اللجنة و معاهوش صريخ ابن يومين ..العسكري بص كده ع العربيه و هيا جايه من بعيد و ابتسم ابتسامه واسعه كشفت عن اللون البرتقالي الناصع المميز لقطران السجاير السوبر الفرط المتراكم على اسنانه....قلت في نفسي ده باين عليه عسكري وشة سمح أو انه حضر الدورات التدريبيه على الإبتسام في وجه المواطنين اللي كان عاملها الدكتور نظيف ( ربنا ينظفه زي ماهو منظف جيوبنا) المهم العسكري بص لأخويا وهو بيبتسم وقاله (اركن على جنب) اخويا بصله بذهول كده وقاله ليه؟ قاله الحزام ..بص اخويا للحزام اللي هو لابسه و قاله ماله؟ قاله مش مظبوط ..ماله يعني__اركن بس اركن.....ركنا على جنب و لاحت ليا فرصة الإنتقام من معركة تقفيل الشنط السابق ذكرها فاتفتحت: أيوة كده هو ده الأمن و تنظيم المرور ..شفت أهو ده واحد بيقوم بواجبه على أتم وجه..ماهموش انه لوحده و كان ممكن يعدينا من غير ماحد ياخد باله لكن الواجب و الأمانه ..عموما أحسن عشان بعد كده تبقوا تحطوا الحزام مظبوط...انتوا أصلا مهملين ..مانتوا لو كنتوا تبطلوا تكبير الدماغ ماكانتش تتسحب رخصكم دلوقتي) بصلي أخويا زي مايكون بيبص لواحده مجنونه و نزل م العربيه وقف جنب الراجل..ايه يا عمنا مانت معدي قدامك 60 عربيه ماحدش لا رابط حزام ولا حتى عبرك و هدى عشان اللجنه و الا عشان يعني نمرنا لاهي قاهرة ولا جيزه ....لا يا بيه ده
شغلي وواجبي والله ماتفرق معايا النمر ولا انك راكب 128 ولا حاجه من دي أبدا...طب و الحل...ولا حاجه راضيني و اتكل على
الله
أخويا طلع من جيبه10جنيه و ادهاله الراجل رفع ايده تعظيم سلام و قاله بالسلامه ياباشا ........يا حبيبتي يا مصر..شوفته الرخاء اللي إحنا عايشين فيه؟ ب 10جنيه فقط لا غير تأخذ رتبة الباشاوية و تتم تحيتك من قبل وزارة الداخلية...و على رأي المثل(الشرطة في خدمة الشعب) خصوصا لو الشعب معاه ورقه ب 10 جنيه

أول يوم
مش هضيع وقتكوا في أول يوم ده لأنه كله ضاع بسبب ماتش غانا والبرازيل الساعه 6 و مش عارفه فرنسا و مين الساعه 10 و بعدين رجعنا البيت و نمنا لحد الصبح............تمت

كليوبترا


....

تاني يوم طلعنا على حمام كليوبترا ...ماكناش مزنوقين ولا حاجه .حمام كليوبترا ده من أهم المزارات الموجوده في مرسى مطروح وهو بجد مكان في منتهى الجمال و طبعا كالعاده مكان غير مستغل سياحيا على الإطلاق زي مانتوا شايفين في الصورة المنظر رائع الصخرتين اللي موجودين جوة البحر لو أ ي نحات محترف حب يعمل حاجه أجمل من كدهاكيد مش هيعرف يطلعهم بالجمال ده الا انه الله سبحانه و تعالى
...
الصخرة الي ع الشمال هي اللي جواها الحمام بس لازم تخلي بالكم وانتوا رايحين المسافه بتاع 5 متر و كل الصخور اللي ف الأرض بتزحلق جدا و يحدث كل 20-30 ثانيه ان يقوم احد الزوار بأداء قفزة بهلوانيه هايله في الهواء يندب بعدها في الماء غالبا في وضع زرع البصل الشهير اما الناس اللي بتفضل انها تتفرج ع المكان من ع الشط فدول بيتفرغوا لتصوير و تقييم أجمل الشقلبظات ..ولو فيه مدرب جمباز هناك أكيد هيكتشف العديد من المواهب الأوليمبيه
....الحمام نفسه جوة الصخرة عبارة عن نفق على الجانب اليمين ينتهي بشباك مستطيل قريب من الأرض تندفع جواه الميه و بتصب جوه كهف عالي السقف و منخفض الأرضيه و ده اللي كانت بتقعد فيه كليوبترا عشان الجواري يحموها فيه (بالعسل بقه بالليفه و الحجر مش موضوعنا) و بعدين فيه فتحه ع الشمال بتخرج منها الميه للبحر تاني.....طبعا كان نفسي اصورلكم الكهف من جوه بس كان فيه شلة شباب قاعدين و متنحين في الحمام و مش راضيين يتعتعوا احتمال عايشين أصلا في عشوائيات و ما بتجلهمش ميه و لقوها فرصة يستحموا جمعااااء أو إحتمال كانوا بيعملوا حاجة تانيه (ما هي كلمة حمام ليها معنى تاني غير الإستحمام) و عندما وصلت بيا الأفكار إلى هذه النقطه خدت ديلي في اسناني و خرجت (هو دخول الحمام زي طلوعه)؟
شط الغرام

بحب اتنين سوا يا هنايا ف حبهم... بحب اتنين سوا يا هنايا ف حبهم
....................الميه و الهوا طول عمري جنبهم.................
يا ساكني مطروح جنيه ف بحركم... يا ساكني مطروح جنيه ف بحركم
............الناس تيجي و تروح و انا عاشقه حيكم...........
اتنين حبايب الروح شبكوني ف حبكم...دول للعليل دوا
.............................الميه والهوا.........................

الأغنيه الشهيرة اللي كانت ليلى مراد بتغنيها وهي قاعده على صخرة قدام البحر و الشاب الروش حسين صدقي واقف وراها و هي مش واخده بالها (او يمكن كانت واخده بالها و قلباه مش فاكرة بالظبط) ...المهم ان الفيلم ده و الأغنيه دي شهروا الشط شهره خياليه و بعد مرور أكتر من نصف قرن ع الفيلم إلا ان الناس لسه لغاية دلوقت أول ما تيجي مرسى مطروح بتسأل عن الصخرة دي و لازم تزورها.....يقوموا يروحوا شط الغرام يلاقوا الصخرة اللي ف الصورة دي فيفهموا إن ليلى مراد اكيد كانت من قوم عاد إذا كانت قدرت تطلع ع الصخرة دي بالسهوله اللي كانت في الفيلم ..لأ و تغني كمان ..يقوم الناس يجيلها صدمه عصبيه فيرموا نفسهم من فوق الصخرة و ينتحروا و يتضح في الآخر في بيان الداخليه انهم مختلين عقليا

....


كان هذا هو الموجز و إليكم الأخبار بالتفصيل.....القصه و ما فيها بقه إن شط الغرام باظ و اتبهدل و البحر كله فتفتق ذهن المحافظه (حلوة تفتق دي مش كده) عن فكرة عبقريه ..انهم ينقوا شط حلو كده عليه صخرة شكلها مميز و يسموه شط الغرام ..هو يعني حد هياخد باله...بس الصراحه الصخرة شكلها حلو بس ارتفاعها ما بيشجعش حد انه يعيش دور الست ليلى و يطلع يتصور فوقها ..بس فيه حدث لازم بيحصل هناك في أي وقت هتروحوا هتلاقوا شوية شباب متهور بيطلعوا و ينطوا من فوق وتلاقي كل الناس واقفه تحت الصخرة دي و مجهزة الكاميرات و الموبايلات عشان يخدوا صورة ليهم و هم بيعملوا الأعمال البهلوانيه...و العيال بيبقوا ولا كرم جابر في الأولمبياد و يقعدوا يتشقلبوا في الهوا و يطرطشوا و اللي ينزل على جنبه و اللي ينزل على نفوخه وطبعا مافيش داعي اقولكم ان لا فيه حد بيقولهم كده غلط ولا فيه أي مستشفى في محيط 10 كيلو عشان لو حد حصله حاجه يلحقوه..والعيال مابيهمهومش تخيل كده لو انت فوق و فيه تحتك 20-25 واحد
مستنينك تنط عشان يصوروك هتعمل ايه يعني لازم تضحي بنفسك عشان الجمهور (انا مش عشاني انا عشان مصر
عجيبه


....

والعجب العجاب ان المنطقه دي مش مستغله سياحيا ....تشكيلات صخريه لاتقوللي كهوف لبنان ولا غيره مناظر الجبل في منتهى الجمال منظر البحر في حضن الجبل يخليك اول ماتشوفه من كتر جماله عايز تعيط أو ترمي نفسك جواه من فوق الجبل ...مش عارفه المستثمرين غايب عنهم المنطقه دي ازاي ؟...دي حاجه كده من معجزات الخالق و انا لو معايا شوية فلوس ..يااااسلاااام ..قرية و فندق و رياضات مائيه و تلفريك من فوق الجبل لحد الشط و رحلات جوه الجبل و تسلق صخورة وهيصه.....بس برضه كويس انهم معميين عنه خللي الفقرا من الأطباء و المهندسين يعرفوا يروحوا يصيفوا في حته نضيفه بعيدا عن شرم و الغردقه و بورتو مارينا


....



طبعا الأمر ما يسلمش من شوية متخلفين صمموا انهم يبوظوا الجمال ده بكتابة أسماؤهم أو حفرها ع الصخور ..حاجات من عينة محمد أبو سريع للذكرى الخالده و متولي السبع بيحب دينا (مش عارفه تركب ازاي) .....لكن أظرف المكتوب كان واحد ليبي اسمه عماد حافر اسمه
بالعربي و الإنجليزي وجنبه التاريخ 62/6/2006...يظهر الشهر في ليبيا بقه 70 يوم

في ضيافة روميل

و روميل بالنسبة للإخوة الجهله ضحايا التعليم الحكومي..هو قائد القوات الألمانيه اللي كانت متواجده في المنطقه دي أيام الحرب العالميه و اللي كانوا بيسموه تعلب الصحراء من كتر ذكاؤه و دهاؤه وفضلوا ينقوا عليه كده لحد مانهزموا الألمان في الحرب
قبل ماتدخلوا على الشط هتلاقوا متحف روميل و هي المغارة اللي كان روميل مستخبي فيها و بيدير منها الحرب وهتلاقوا جواها مكتبه و نياشينه و مسدسين على بندقيه و خرايط و خطط مكتوبه بخطه و بالطو مترب كده مش هاين عليهم يرمموه و شوية صور لروميل و بعض القاده الألمان.....طبعا الموضوع كله مش مهم بالنسبه لنا بس بالنسبه للألمان أكيد مهم و للإنجليز كمان و السياح الأوروبيين بيروحوا آخر الدنيا عشان يشوفوا حاجات أتفه من كده بكتير و ممكن وزارة السياحه تستغل المكان ده ...يعني زيارة لمغارة روميل على سفاري ف الصحرا على استجمام في البحر على زيارة لمقابر العلمين يبقى برنامج و يجيب سياح ..لكن طبعا لأننا أساسا عندنا آثار مرطرطه و بنرمي فيها يمين و شمال واقتصادنا بمب و الحياة بمبي الدخول للمتحف ب50 قرش و بيقفل الساعه 4

آخر يوم
عدينا ع الأبيض سريعا سريع وبعدين طلعنا ع البوسيت الشط بتاع الناس الكويسين...الشمسيه و ال3 كراسي اللي في كل الشطوط ب5 جنيه
هنا ب32وبعد الساعه 5 بيبقى ب 16 جنيه بس خدوا بالكم الميه غويطه جدا يعني لو مالكوش في العوم خليكوا ع الشط بكرامتكم احسن

آخر نصيحه

....

اللي يروح مرسى مطروح يبقى عايز هدوووء ما فيش هيصه كتير زي بقية المصايف و الفسح بالليل مش كتير (سينما-كورنيش- وفيه صالة بولينج صغيرة) إلا إذا نزلت إسكندرية ودي مسافه طويله شوية ..بس أنا شخصيا بقولكم لازم تروحوا واللي ماشافش مطروح فاته نص عمره أنا بعد ماروحتها لايمكن أروح أي مكان تاني

Tuesday, July 04, 2006

ايييه الحر دهههههه؟!!!!!!

السلام عليكم يا جماعه
والله وحشتوني كلكم كنت كل اما اشوف سايبر في مطروح ابقى نفسي ادخل ع البلوج و اشوف عاملين ايه من غيري ....ياللا اهي الأيام عدت قوام و رجعنا الى قواعدنا سااالمين
بس اييه الحر الفظيع ده؟؟؟؟؟ داحنا كنا ساقعانين هناك ...اما مطروح حلوة حلاوة !!! اللي راح اكيد عارف و اللي لسه مارحش انا هعمل قريب موضوع كامل بالصور عن كل الشواطئ فيه مناظر تحفه
بس استنوا عليا شوية عشان السايبر اللي انا مشتركه فيه الحمدلله ضرب تفليسه و انا دلوقتي لاجئه عند شيماء صاحبتي بكتب من عندها ع الكومبيوتر بتاع جوزها من وراه و هو مش موجود ... و عماله تبرقلي عشان الفاتورة
بس هتتحل انشاء الله هشترك تبع السنترال الاسبوع الجاي مش هاسيبكم
اهه عايزه ارحب بالناس اللي دخلت جديد
مي و اياكش تولع ومحمد السيد film69
أهلا بيكم دايما و يارب دايما تيجوا على طول
أصدقائي الأوفياء : احمد الشقيري و سيبها على الله
والله فيكم الخير
انتظروني بقه قريب و معايا صور مرسى مطروح