Thursday, February 15, 2007

غسيل مخ








من أيام موضوع تحرشات وسط البلد اللي قامت بسبب وسط دينا و سعد الصغير ..و موضوع عماد الكبير اللي خلا الناس تبطل تشتري مقشات لغاية لما مصانع المقشات قفلت و من بعد كل كليبات التعذيب اللي ظهرت على المدونات ووصلت لوسائل الإعلام الرئيسية -من بعد ده كله بأه فيه إحساس قوي كده بين المدونين ان احنا صاحيين قوي و مابنفوتش حاجة و ماحدش لامؤخذه يقدر يضحك علينا


احنا لينا جهاز إعلام خاص بينا و مالناش دعوة بالعالم اللي بره عالمنا دي خالصو لو حاول حد فيهم يصهين على موضوع أو يطنشه..مين ده اللي يعديهاله ..لا دانتا ماتعرفنيش دانا المدون الجن اللي ماتفوتنيش فوته
آه و الله الإحساس ده عند ناس كتير...لكن مهما كانت ثقة الناس دي في نفسها..برضه و لو ..اللي ماسكين الإعلام عندنا دول يا جماعة أساتذة .بالتعاون مع الأجهزة المعنية - وخدوا بالكم من الأجهزة المعنية دي-الناس دي في أكثر الأوقات بتمشينا بره في نفس الطابور مع بقية القطيع المسمى الشعب المصري

قضايا يتسلط عليها الضوء و قضايا تندفن بالحيا..و نظرية عصا موسى الشهيرة بافتعال حدث أو قضية و تكبيرها و تسليط الضوء عليها لغاية لما بقية القضايا مهما كانت أهميتها..تبان تافهة و مالهاش لازمة جنب القضية المفتعلة دي..
و الناس الناصحة اللي زينا و زي بقية الشعب المصري الفهلوي بتقع في الفخ و هاتك يا كلام و مناقشات و محاورات بكل الجدية و الإهتمام لغاية لما الأجهزة المعنية تقرر انها تشغل الناس بقضية جديدة يغطوا بيها على حاجة جديدة أو على نفس القضية اللي هما أصلا إخترعوها من لاشئ

هالة سرحان,هدم الأقصى ,أكياس الدم الفاسدة,سفاح المعادي و إنفلونزا الطيور
دول شوية القضايا اللي شغلت الناس في الفترة الأخيرة
حديث المدينة على رأي السمج مفيد فوزي
طبعا مفيش مبرر لشرح أسباب عدم وجود التعديلات الدستورية كموضوع من المواضيع اللي تهم الناس ..لأنه بساطه..مايهمهومش

الدنيا اتشالت و اتهبدت على موضوع سفاح المعادي و بعدين ..هسسسسسسس
وسائل الإعلام عن بكرة أبيها فتحت موضوع أكياس الدم الفاسدة و بعدين ..هششششششش
انفلونزا الطيور التركيز اللي كان عليها السنة اللي فاتت يوهمك ان خلاص الناس عماله تطب ساكتة في الشوارع و رغم ان الموضوع استفحل بصورة مخيفة السنة دي بالذات بالنسبة للإصابات البشرية و الوفيات الناتجة عنها ..إلا اننا ماسمعناش أي حد بيجيب سيرتها السنة دي ..لأنها ببساطة ماعادوش محتاجينها يشغلوا بيها التاس..فيه مواضيع تانية أهم

مواضيع أهم زي إيه؟؟؟هدم الأقصى؟؟لااااااااااااااااااااااا

مصر و الدول العربية و الإسلامية اللي قامت عن بكرة أبيها في مظاهرات و شجب و اعتراضات و لم تبرعات أيام مقتل الدرة ..لم تحرك ساكنا و هي شايفة الجرافات الإسرائيلية بتبتدي أول سطر في قصة تانية من قصص المهانة العربية محاولة تانية من محاولات هدم رموز الإسلام و المسح بكرامتنا تراب المنطقة كلها
ماشفناش حد يعني طلع و اعترض و لا شجب و لا عيط ولا غنى و لا إعتصم ..اللهم إلا مظاهرات الأزهر اللي بقت عادة أكتر منها فعل إيجابي

كل ده ليه ؟؟لأن "الأجهزة المعنية" لسه مش شايفه فايدة للتركيز على الموضوع لأن التركيز عليه غالبا هيؤجج المشاعر الإسلامية عند الشعب المصري و ده معناه ارتفاع ضمني للإخوان اللي بيعرفوا دايما يتصرفوا في مواقف زي دي بما يزيد من شعبيتهم..طب و ليه وجع الدماغ..سك يا عم ع الموضوع و إخترع موضوع جديد

هالة سرحان..موضوع ظريف و مسلي و هيخلي الناس تقول و تتناقش و تتكلم و تنسى أي حاجة تانية
هالة سرحان...لسسسسسسه فاكر
قال يعني هالة زرقان دي أول مرة تتكلم في المواضيع اللي زي وشها دي..قال يعني ماهياش شايلة لواء تلويث سمعة مصر على مدى 20 سنة و من خلال 3 قنواتقال يعني مفاجأة للجميع ان معدين البرامج و مقدميها بيفبركوا مواضيعها و ضيوفها و تقاريرها
هي صحيح دقت أول مسمار في نعشها لما جابت سيرة ظباط الداخلية و قالت ان بعضهم بيشغل البنات دول و بيقبض من وراهم-بس الموضوع هيتكتم عليه و هيخلص هيخلص..بعلاقاتها بأه ..بفلوس الوليد..أهه هيخلص في وقته و في معاده و لما يلاقوا حاجة غيره يشغلوا بيها الناس

و نرجع تاني نمشي زي القطيع و نقطع في أي حتة لحمة يرموهالنا على الأرض عشان نفضل موطيين و مانرفعش عيوننا ولا رؤوسنا......أبدا

53 comments:

واحـــد مـــــن الـنـــاس said...

ساعات مبيبقاش في تفسير للحاجات اللي حوالينا غير نظرية المؤامرة ده ناتج من احساسنا بالقهر المستمر
وان الدنيا كلها واقفة ضدنا
اشمعنى احنا بس اللي كده ؟؟
بحد

الواحد حاسسس انه في دوامة
طيب يا سوسة
ممكن اسألك واقولك
مين هوا الشخص اللي بيختار الاحداث اللي عايز الرأي العام يركز عليها ؟؟
يا ترى هوا الريس ؟؟

يعني الريس ذكي للدرجة دي ؟؟
معتقدش

اومال مين ؟؟
مين اللي واقف مع الاعلام ده ؟؟
بجد مين ؟؟؟

Dr Sayed said...

الأخت العزيزة المفروسة سوسة


صدقينى من أول ما بدأت أوعى للى بيحصل فى بلدنا وانا موقن تمام اليقين ان اى موضوع يتم تبنيه من قبل الاعلام والصحافة وتحسى كدة ان قلبهم ع البلد ومصلحتها بيكون "غالبا" تمويه عن مصيبة أكبر عشان كده لازم اول مانلاحظ ده ألا ننجرف مع "القطيع" أو على الأقل ان نحاول


ربنا يصبرك . . . ويصبرنا

Utopian said...

جبتي فيه جون

عندك كل الحق

تحياتي

عـلا - من غـزة said...




بصي يا ستي , الكلام ده مش بس عندنا في البلاد العربية , ده حتى بره ,,

يعني مين مثلا في اوروبا ولا امريكا من الشعب العادي عارف ايه الي بيحصل في بلده او حتى في العالم؟

معظم وسائل الاعلام اذا كان مش كلها , بتشتغل بالاسلوب ده

يعني كافي جدا في بلادنا موجة برامج الغناء والاكاديميات بانواعها انها تموت عند الناس اي ادراك او وعي باي موضوع تاني


وحتى بالنسبة للمدونين ! ما زلت بحس ان التدوين لم يبلغ تلك الاهمية لتسليط الضوء على شيء معين ,, لأن في ناس مالهاش في السكة دي ولا بتعرفها اصلا !

مش عارفة ,, انا مش كتير بحب اقتنع بنظرية المؤامرة ,, بس احيانا ما بيكونش فيه اي تفسير تاني للي بيجرى حوالينا

حاقول ايه بس ! تحياتي

Dr. Tantawy said...

صباح الروقان و الدماغ العاليه :)) نفسي ابقى رايق كده و اقعد احلل و ادور ورا كل حاجه .. والله ساعتها ممكن ييجي مني هههههه

موضوع لذيذ بجد .. يعني زي ما بيقولو السهل الممتنع :) كل واحد فينا تقريبا عارف ان دي العظمه اللي بيرموهالنا كل شويه .. بس محاولتش افكر في الموضوع بطريقه متسلسله كده زي ما عملتي

تشكري يا بنتي .. وكل من عليها فاااااان

مريض نفسى said...

مش كفاية البرامج اللى زى الاسهال اللى نازلة فتاوى ودعوةللتخريف والجهل
كمان عايزاهم يقفلوا النوافذ القلليلة الى بتدعو للتنوير ونشر الثقافة
عجيب امر سعادتك واللة

فارس عبدالفتاح said...

يا اخ مصري مغترب محدش بيسمع حسك ليه عيزين نشوفك ونسمع منك يا راجل


الاخت سوسة الموضوع ده انا اتناقشت فيه مع مجموعة من المصريين وبعض اصدقائي الذين يسكنون معنا فى الشقة التى نقييم فيها فى دولة الكويت

وحاولت اقنعهم بنفس الكلام اللي انت بتقولية واكثر من كده كمان


ويوجد برنامج وثائقي تسجيلي حي على قناة الجزيرةاسمه ( حرب الصور ) يؤرخ للحروب الامريكية مثل حرب فيتنام وحرب غزو كوبا وعن ازمة خليج الخنازير وكيفية فبركتها وكيفية اظهار الحقيقة المضاضة هذا فى الجز الاول


اما الجز الثاني فهو عن حرب الخليج وغيرها من الحروب الامريكية

ارجو ان تشاهدي هذا البرنامج الوثائقي التسجيلي وانه يزاع يوم الثلاثاء الساعة الثانية عشر مساء

اذا كنتي تعرفين اميل الاخ مصري مغترب يا ريت تعطهوني وشكرا

semsema89 said...

سلام عليكم جميعا

ازيك يا سوسه :)..... بجد يا سوسه انتى عندك حق انا سمعت فعلا قبل كدا من دودى ان الحاجات دى كله مقصوده طبقا لنظريه العصفوره ... الى هيا يشغلونا بحاجه علشان يبعدونا عن حاجه اهم .... زى مابيعملو فى الاطفال لما يكونو عايزين يشغلوهم عن حاجه او ياخدو منهم حاجه فيقولولهم بصو العصفوره.... وطبعا يعملو الى عايزينه
وموضوع التعديلات الدستوريه دى .... انا فعلا معرفش عنهه اى حاجه غير ان فيهه تغييرات .. لكن تغيرات فى ايه ... اى دونت نو ... وللاسف الاعلام مش مصلط عليهه اى ضوء ومصلت على الحاجات التانيه الى اقل اهميه .... ممكن تكون مهمه بس طبعا المفروض " الاهم ثم المهم"
وبجد لو عايزه اكتر شرحا للمساله دى .. ممكن ةتسالى دودى لانهه فاهمه الموضوع دا اكتر منى ... وبجد كلامهه كان رائع جدا وفتح مخى على حاجات كتيييييير وطبعا بحاول اقول للى اعرفهم عن الموضوع دا علشان ناخد بالنا ..... بس المشكله يا سوسه انى وكتير من الناس نعرف الموضوع دا وبردو بمنتهى السذاجه بننصاق ليه كل ميشغلونا بيه تانى .... معرفش ليه؟؟ هل بننسى ولا ايه ؟؟ الله اعلم

بس بجد اى حد يعرف اى حاجه فى مساله التغيرات الدستوريه دى ...يقول علشان نعرف لاننا تقريبا منعرفش ايييييييييييييييى حاجه :(

على العموم .... يسلم ايدك يا سوسه وربنا يهديكى وترجعى تانى مش مفروسه لانك شكلك كدا هتطولى فى الحاله دى مادام الحال على ما هو عليه

سلاااااااااام

kaed said...

اولا إزيك ياسوسة عاملة إية لسة برضة مفروسة
المهم إن من علامات إفلاس أى نظام سياسى هى شغل الرأى العام بقضايا ملهاش دعوة بالسياسة أو الحكم ودة اللى بيحصل عندنا دلوقت

ذو النون المصري said...

انا قرات كتاب عقل جديد لعالم جديد
ترجمة الدكتور /احمد مستجير
و من ضمن ما قاله في الكتاب عن الكيفيه التي يعمل بها مخ الانسان انه يهتم بصوره كبيره بالقضايا الطبوليه اي التي لها صوت عالي جدا و يهتم بالقضايا المثاره حديثا لا القضايا الهامه او المصيريه
و ضرب لذلك مثلا وهو القنبله النوويه حينما القيت علي هيروشيما و نجازاكي فقد اثارت الدنيا كلها بالعدد الهائل من القتلي التي خلفته وراءها رغم ان قتلي هذه الحرب كان عشرات اضعاف من ماتوا بالقنبله لكن لانها كانت احدث مؤثر فقد اثارت الانتباه بينما باقي المؤثرات كانت قد تحولت الي عاده فلم ينتبه اليها احد
هذه الحقيقه النفسيه يعمل علي استغلالها النظام السياسي في كل بلاد العالم

NoOR said...

انتي جبتي من الاخر

الله عليكي ومعاكي حق في موضوع ضباط الشرطه دي قرصه ودن لهاله علشان متغلطش في حبايب حبيب

فارس عبدالفتاح said...

انا اسف يا اخت سوسة المحترمة


جالك كلمي عن موضوع رفع السلاح كحل اخير لقد تم الصلح بين حركة فتح وحركة حماس فى السعودية على ان يتم انشاء حكومة وحدة وطنية


لكن للاسف فى اعتقادي انه هذه الحكومة لان تدوم طويل

لانه يوج خلاف مرجعيات بين حماس الاسلامية الثورية وبين فتح الثورية القومية التى اصبح بيرقراطية بدل من ثورية


وشكرا


السيف اصدق انباء من الكتب فى حد الحد بين الجد واللعب

فارس عبدالفتاح

قلم جاف said...

أحيي شجاعتك..

.:.-=- ELGaZaLy-=-.:. said...

اولا دى اول زيارة ليا...وان شاء الله مش هاتكون الاخيرة

معاكي حق في موضوع ضباط الشرطه دة

وجراة فى الطرح وانسيابية تحسدى عليها

farida said...

لو قلت لك اني كنت حكتب نفس الموضوع مش ممكن نفس الفكر اللي كنت عاوزه اكتب عنه
كتبتيه انتي بإسلوبك الأجمل و الأقرب للقلب

عمرك أطول من عمري يا سوسه

من فضلك ما تتأخريش في الكتابه بالشكل ده

و بعد إذنك حكتب عن البوست بتاعك في مدونتي
و فرتي عليا الوقت
:)

تحياتي

soosa el-mafroosa said...

واحد من الناس

الريس ذكي؟؟
مش عارفة
أنا بطلت من زمان أعتبره بني آدم زينا
الراجل مابيموتش ولا بيتغير

أنا قربت أصدقك انه مات من زمان و اللي موجود ده بديل زي بتاع عمنا صدام الله يديله على قد نيته و اللي عمله

انت لو شفت فيلم الهروب بتاع احمد زكي تحس ان الإعلام كله موجه من عند حبيب و حبيايبه

dr sayed

ربنا يصبرنا جميعا
و يقوينا
و يحفظنا من اننا نبقى
فرد من القطيع

utopian

شكرا ليك

علا

كلامك صحيح
لكن الناس اللي بيعتبروا نفسهم مثقفين و بيشغلوا دماغهم و بيحاولوا يدوروا على وجهة النظر التانية
و بيبحثوا وراء كل موضوع

لكن هنا اللي بيعتبروا نفسهم مثقفين و عباقرة زيهم زي بقية القطيع

soosa el-mafroosa said...

dr.tantawy

ده شغل بنات بعيد عنك

التفصيل والتفصيص في كل موضوع ده لعبتنا ..أمااال

ركزلنا انت بس في كاركاتيراتك على المواضيع اللي بيؤدوها دي

و يبقى عليهم واحد بجد

مريض نفسي

طبعا يا فندم طبعا

عموما ماتقلقش
نافذة هالة سرحان اللي بتدعوا للتنوير

هتتفتح تاني قريب

ببركات الراعي الأول للثقافة و الحضارة العربية و الإسلامية

الوليد بن طلال

فارس عبد الفتاح

مصري مغترب مالوش للأسف إيميل عندي

بس هو كان ليه مدونة بس مش بيكتب دايما فيها

جربها كده عنوانها اهه

http://masrrymetgharb.blogspot.com/

البرنامج هحاول أتابعة و شكرا على التنوية

semsema89

للأسف أنا مش عارفة عنوان المدونة اللي انتي بتقولي عليها
يا ريت تكتبيهولي

موضوع التغييرات الدستورية مش فارق مع أي حد

لأن الناس عندهم شعور ضمني انها مش هتقدر عليهم
وهيعملوا اللي في دماغهم و ماحدش هيقدر يقوللهم بم

عرفة من مده عملت بوست عشان الناس تطلع بطايق انتخابية

خدت كلام في جنابي لما شبعت
حتى اللي شجعوا الموضوع أنا متأكده ان معظمهم برضه ماعملوهاش

هما نجحوا نجاح ساحق انهم يموتوا الأمل جوا الناس

و هنحتاج وقت مش قليل عشان نقوم من موتتنا

soosa el-mafroosa said...

kaed

هي مش بس علامة إفلاس النظام

هي علامة إفلاسنا إحنا كمان

ما هو إحنا اللي بننشغل

ذو النون المصري

تمام
واضح انه كتاب قيم

بس برضه بتلاقي شوية ناس كده في كل بلد بيدوروا ورا القضايا اللي مسكوت عنها

اللي بيسموها القضايا الباردة و بيحاولوا يدوروا وراها

هنا مافيش غير القطيع ماشي ورا بعضه و خلاص

noor

بكره تلاقيها عاملة حلقة كاملة عن الساهرون من أجل عيون الوطن

و صافي يا لبن

و سلملي على الحبايب كلهم

فارس عبد الفتاح

نتمنى لهم الخير

و ربنا يستر ع اللي جاي

هما ماسكين في هدوم بعض من جهة

و الجرافات شغالة في جهة تانية

ربنا يستر

soosa el-mafroosa said...

قلم جاف

شكرا ليك

elgazaly

انشاء الله ماتبقاش
آخر زيارة

فيه ناس كتير بدأت تشوف موضوع الظباط ده

أشكرك على الكلام الرقيق

farida

من القلب للقلب رسول

و من العقل للعقل برضه

المدونة كلها بتاعتك يا فريدة انتي عارفة

تحياتي يا قمر

Amr Ahmed said...

يا سوسة العزيزة

هي دي السياسة

هما بيعتيبروا ده امن قومي

وعلي فكرة ده ذكاء يحسب لهم

لانه فعلا بيجيب نتيجة

يعني موضوع هالة سرحان

الواحد خسارة ينطق فيه بحرف
لكنه حديث المصريين حاليا

تحياتي ليكي

وبلاش تتاخري علينا

Islamist Bloke said...

استاذة ورئيسة قسم
نظرتى فيكي ما خيبتش يا سوسة
بتفهمي بتفهمي يعني

أضيفي بأة يا ستى الى معلوماتك:

الموضوع ده مش بيتنفذ بس عن طريق الاعلام (الصحف والتليفزيون والفضائيات والراديو) لا ده كمان عن طريق المساجد وأئمة الأوقاف ومنهم اللى عارف الهدف ده وبيتكلم باللى بيتقال له ومنهم اللى عايز يعمل غرض نبيل وهدفه نشر الدعوة بس بياكل الطعم وبيمشى فى السكة دي

عايز اقولك مثال بس فيه حاجة اهم

انتى عارفة طبعا ان امريكا بتتطحن فى العراق
يعني الشيعة بيضربوا فى السنة والسنة بيضربوا فى الامريكان والشيعة سوا والحكومة العراقية بتضرب فى السنة وساعات لما الشيعة يعملوا الغلط تقوم تعمل عليهم حملات محدودة والامريكان بيضربوا فى الاتنين وهكذا

امريكا بيموت منهم كل يوم عشرات وسيبك من ارقامهم وموضوع ال 3 الاف جندي ده ... اضربي فى 10 اضعاف يا سوسة والامريكان عارفين كدة كويس ومش هيقعدوا كتير
طيب تفتكرى امريكا اللى عملت المستحيلات عشان تأمن وجودها فى المنطقة عشان البترول وأمن اسرائيل وخيرات المنطقة دي كلها...تفتكرى امريكا تسيب مصالحها فى العراق بالساهل كدة؟
وكمان العراق هيبقى مستنقع للجماعات والارهاب العالمي بجد بجد خاصة ان امريكا دلوئتى بقت عاملة زي المقناطيس اللى بيجمع حواليه كل اللى له حساب قديم مع امريكا عشان يصفيه معاها فى العراق
طالبان بتبعت ناس للعراق والجماعات السلفية فى سوريا والاردن والسعودية واليمن والخليج كله ومصر والجزائر وكل ده ... كل المقاتلين دول بيروحوا عشان يصطادوا امريكا فى العراق

طيب والحل؟
الحل هو ارسال جيش عربي او قوة حفظ سلام عربية للعراق تحت مسميين:
الاول:
حفظ السلام وحقن دماء الشعب العراقى وانهاء العنف الطائفى
الثانى:
مقاومة المد الشيعي بالمنطقة وايقاف الهلال الشيعي الذي تسعى ايران لتكوينه بعد ان تمكنت من العراق و لبنان وسوريا وشمال السعودية والبحرين

لاحظى بأة دور أئمة المساجد ايام حرب لبنان
كل الكلام عن عقائد الشيعة الخبثاء وشرح عقائد الروافض واعلام الناس انهم كفار -وهم فعلا كفرة - وعقيدة البذاء عندهم وانهم بيسبوا الشيخين أبا بكر وعمر ويلعنون عائشة ويكفرون كل الصحابة - 140 الف صحابى- الا 5 فقط و و و و .........
الكلام حق والمفروض الأئمة يقولوا كدة بعد افتتان الناس بحسن نصر وصواريخ البمب اللى كانوا بيرموها على شمال اسرائيل والكلام ده والفيلم اللى اتعمل وقتها ده
لكن التمهيد لتحرك عربي بقيادة مصرية لايقاف ايران عند حدها شغال
وكل يوم دلوئتى الاعلام يقول لنا انه تم القبض على جاسوس ايراني... او منظمة ايرانية... او مكتب للحرس الايراني فى القاهرة ... او منشورات تدعو للتشيع ونشر عقائد الشيعة فى مصر السنية...والكلام عن النووى بدأ لما ايران اصبح عندها قوة نووية وان لازم يكون عندنا مفاعل نووى لتحقيق التوازن بالمنطقة والكلام ده
امريكا قالت مستعدين نديكم مفاعل بكيسه لسة جديد نوفى ونشغله لكم كمان
وابو علاء طلع وقال لن نقف متفرجين وايران تمتلك الاسلحة النووية وتهددنا

وبكرة الجيش المصرى يروح العراق تحت غطاء اعلامي مكثف لحشد قلوب الشعب على محاربة الروافض وايقاف المد الرافضى فى الشرق الاوسط والامبراطورية الفارسية الجديدة
ودس السم شغال والاعلام شغال والمخطط تمام التمام ومش ناقص غير احمد عمر هاشم - او خليفته الجديد- يقف يعيط فى مجلس الشعب زي ما عيط سنة 91 وهو بيقول انقذوا شعب الكويت من العراق...المرة دي هيكون الكلام انقذوا شعوب المنطقة من الخطر الرافضى...وكله لمصلحة ماما أمريكا

ااااااااه يا مصر

ولسة يا سوسة

Stangallina said...

Nice Topic ya Soosa ,, we a7aieeky 3ala mawade3ek el hadfa ,, atmanna ashoof el comment beta3ek ,, fe el mowadana el mowatawad3a beta3ty ,, thanx so much
& have a nice day

Ehab said...

طبعا مفيش شك ان الريس بيفهم كويس جدا طبعا مش لحاله بيفهم و لكن بمساعدة "الأجهزة المعنية" و دول كتير و متنوعين و في كل مكان موجودين و حتي لو مش تبع الاجهزة دي بشكل رسمي برضوه هاتلاقي ناس متطوعة علشان تكون "معنية" بالفساد و التضليل و التنويم المغنطيسي اللي احنا فيه ، أحيانا بتكون وسائل الأعلام (عصر الحريات بالكاتشب) مجرد "تنفيس" بابور والع و لو مفيش تنفيس ممكن ينفجر (ممكن يكون مش كتير من الشباب الصغير يعرفوا شكل البابور و طريقة تشغيله) لو حب يشوفه يروح باب الشعرية و النحاسين ، او يشوفه في معظم الشوارع و البيوت و المدونات المصرية ، برافو عليكي و استمري مفروسه و مشحونه كده و من غير ما يهديكي أي تنفيس .

islamist bloke said...

على فكرة يا سوسة فيه مقال منشور فى المصرى اليوم وفى موقع مصريون بلا حدود للدكتور حسن نافعة بيقول فيه نفس اللى بتقوليه بالظبط
فعلا يبدو ان كلنا بدأنا نلتفت للموضوع وان شاء الله مش هينضحك علينا تانى
رابط الموضوع

http://12.47.45.221/article.aspx?ArticleID=48435&r=t


والموضوع نفسه أهو

من مشروع النهضة العربية.. إلي برنامج «هالة شو»

بقلم د. حسن نافعة ١٨/٢/٢٠٠٧
قضيت أكثر من أسبوع متنقلا بين القاهرة وعمان وبيروت، ورغم قصر المسافة الزمنية التي تفصل بين هذه العواصم الثلاث، والتي لا تتجاوز بالكاد نفس المسافة الزمنية التي تفصل بين القاهرة وأسوان، إلا أن المسافة النفسية بينها راحت تتسع علي نحو يثير القلق ويكاد يكون غير قابل للتصديق،

ولا أظن أنني أبالغ إذا قلت أن المواطن العربي بدأ وهو يتنقل بين العواصم العربية المختلفة، وبالذات بين القاهرة وأي عاصمة عربية أخري يحس علي نحو متزايد بوجود تلك الهوة النفسية الكبيرة كأنه يتنقل بين عوالم،

وربما كواكب مختلفة لا تمت لبعضها البعض بصلة، والواقع أن هذا الإحساس سيطر علي تماما مرتين لبعض الوقت عقب وصولي إلي عمان قادما من القاهرة، ثم عاد ليسيطر علي مرة أخري عقب عودتي إلي القاهرة قادما من بيروت،

وفي كلتا الحالتين بدت لي عاصمة المعز، وكأنها تنتمي إلي عالم أو إلي كوكب آخر، بعد أن أدارت ظهرها تماما للعرب والعروبة، بل بدت لي وكأنها تحاول أن تهرب حتي من نفسها بالانشغال إلي درجة الاستغراق في صغائر الأمور، فحين غادرتها في بداية الأسبوع الأول من هذا الشهر كانت القاهرة تبدو مشغولة إلي درجة الاستغراق الكامل في حكاية اسمها «سفاح المعادي» بعد أن كانت قد فرغت بالكاد من الانشغال بحكاية أخري اسمها «التوربيني»،

وحين عدت إليها بعد ثمانية أيام فقط وجدتها منشغلة إلي حد الاستغراق الكامل في حكاية جديدة اسمها «هالة شو»، لكنني حين وصلت إلي عمان ومنها إلي بيروت وجدت العاصمتين منشغلتين بأمور أكثر جدية وخطورة وتطرحان تساؤلات قلقة حول أسباب غياب الدور المصري،

بل إن مصر الرسمية بدت في نظر البعض وكأنها تحاول أن تبني بينها وبين الدول العربية جدارا عازلا يرونه أكثر خطورة وضررا علي الطرفين من جدار الفصل العنصري الذي تبنيه إسرائيل فعلا بينها وبين الفلسطينيين!.

في بداية إقامتي في عمان دعاني المعهد الدبلوماسي لإلقاء محاضرة عن «آفاق التسوية السياسية في ظل التطورات الإقليمية والعالمية الراهنة», وفي نهايتها شاركت في ورشة عمل نظمها برنامج دراسات التنمية في جامعة بيرزيت الفلسطينية بعنوان «دور المجتمع المدني في تعزيز الديمقراطية: الحاجات والأولويات» انصبت في واقع الأمر حول بحث إمكانية تجمع قوي اليسار والوسط الفلسطيني في تيار ثالث يملأ الفراغ السياسي ويوازن بين فتح وحماس، وبينما أتاحت لي محاضرة المعهد الدبلوماسي فرصة مهمة للتحاور مع نخبة من السياسيين والدبلوماسيين، الحاليين منهم والسابقين حول مجمل ما يجري في عالمنا العربي خاصة في العراق ولبنان وفلسطين،

فقد أتاحت لي المشاركة في ورشة العمل الخاصة بجامعة بيرزيت فرصة اللقاء بعدد كبير من الأكاديميين والنشطاء السياسيين الفلسطينيين والاستماع منهم مباشرة لتقييم لما يجري علي الساحة الفلسطينية، خصوصا في ضوء الاقتتال الذي كان ما يزال دائرا بين فتح وحماس في ذلك الوقت.

في بيروت شاركت في ندوتين منفصلتين، الأولي بعنوان «المساءلة والمحاسبة: تشريعاتها وآلياتها في الأقطار العربية», ونظمتها «المنظمة العربية لمكافحة الفساد» التي يقودها الدكتور سليم الحص، رئيس الوزراء اللبناني الأسبق،

والثانية بعنوان: «مستقبل الوطن العربي في القرن الحادي والعشرين» ونظمها مركز دراسات الوحدة العربية الذي يديره الدكتور خير الدين حسيب، الوزير والمفكر العراقي المعروف، وبينما جمعت الندوة الأولي عددا من الأكاديميين والممارسين العرب في مجالات الإدارة والقانون والسياسة من المهتمين بقضايا مكافحة الفساد في الدول العربية، ضمت الندوة الثانية عددا من المفكرين المهتمين بصياغة «مشروع حضاري نهضوي عربي»،

ورغم أن «المنظمة العربية لمكافحة الفساد» حديثة النشأة، إلا أنها تكافح بجدية للتأسيس لشبكة قادرة علي دراسة وكشف ومكافحة الفساد في العالم العربي، أما مركز دراسات الوحدة العربية فهو أحد أهم وأقدم مراكز صناعة الفكر في العالم العربي، إن لم يكن أهمها علي الإطلاق، ووراءه تراث علمي ضخم بلغ ما يقرب من أربعمائة كتاب منشور،

وحرصا منه علي متابعة مشروع «استشراف مستقبل الوطن العربي» كان تقريره النهائي قد صدر عام ١٩٨٨ قام المركز بتنظيم ندوة ضخمة عقدت في مدينة فاس المغربية في إبريل عام ٢٠٠١ تحت عنوان: «نحو مشروع حضاري عربي» وعهد بأعمالها إلي لجنة تسترشد بها في صياغة مشروع للنهضة يطرح للنقاش علي أوسع نطاق ممكن في العالم العربي، وتعتبر ندوة بيروت الأخيرة والمصغرة حلقة ختامية في سلسلة الجهود الرامية لإخراج هذا المشروع في شكله النهائي،

في تلك الأجواء المفعمة بالجدية كان بوسع المرء أن يستمع إلي تشخيص لعلل كثيرة أصابت الأمة, وأن يتعرف علي جراحها المفتوحة علي مصراعيها في العراق وفلسطين ولبنان وغيرها, وأن يستمع إلي صدي الأنين الصادر من أعماق شعوبها المحشورة بين استبداد الداخل وأطماع الخارج يتردد بين العواصم العربية علي السنة المشاركين في تلك الفعاليات الفكرية المختلفة، ومع ذلك لم تكن الصورة كلها قاتمة تماما حيث كانت نبرة تفاؤل تفوح بين الحين والآخر من هذا المفكر أو ذاك لتذكرنا ببطولات مقاومة صنعت ما يشبه المعجزات، رغم الضغوط والعتمة وقلة الموارد والإمكانات،

ورغم ما ينتاب هذه الندوات عادة من تكرار يبعث علي الملل ويذكرنا أحيانا بأن النخب الثقافة هي أقرب، لأن تكون جزءاً من المشكلة وليس الحل، إلا أن الجدية التي اتسم بها عدد لا بأس به من الأبحاث والمداخلات أكدت علي أن قطاعا لا يستهان به من هذه النخبة بدأت تأخذ التحديات التي تواجه النظام العربي في المرحلة الراهنة علي محمل الجد.

وللإنصاف يمكن القول إن جدية القضايا والمداخلات التي طرحت في ندوات ولقاءات عمان وبيروت لم تكن هي أكثر ما لفت نظري في تلك الزيارة، فالواقع أن شوارع هاتين العاصمتين العربيتين، واللتين تفتقران إلي كل أنواع الموارد فيما عدا حيوية وذكاء شعبيهما، بدت لي خالية تماما من أكوام القمامة، ومن عربات الأمن المركزي، ومن فوضي المرور،

ولم أعثر في وسائل إعلامهما علي أي محاولة لافتعال وسيلة لإشغال الرأي العام بتفائه الأمور، ولذلك فحين عدت إلي مصر بدت الصدمة كبيرة هذه المرة، فقد ذكرتني أكوام الزبالة المتراكمة فوق أرصفة الشوارع في أرقي أحياء القاهرة، وعربات الأمن المركزي المكدسة في طوابير طويلة أمام الجامعات والوزارات والسفارات، وفوضي المرور الضاربة في كل مكان، بأننا صحيح في مصر،

وبأن النظام السياسي والإداري لهذا البلد العريق لم يعد معنيا بأي شيء آخر سوي أمنه الشخصي، ومع ذلك فإن آخر ما كنت أتوقعه أن أجد الجميع في مصر، سواء علي مستوي النخبة أو علي مستوي الناس العاديين، مشغولين إلي درجة الهوس بحلقة خاصة من برنامج هالة شو ومومساتها المزيفة بثته إحدي قنوات روتانا كواحدة من حلقات أربع يفترض أنها تعالج مشكلات بنات الليل في مصر!.

لست ضد أي مناقشة علنية لأمراض المجتمع وآفاته بكل صراحة ووضوح وشفافية، فالمناقشة هي السبيل الوحيد لمعاجة صحية لكل أنواع الأوبئة الاجتماعية أيا كانت درجة حساسيتها، شريطة أن تكون هذه المناقشة علمية وجادة ومنزهة عن الهوي والغرض والمصلحة الشخصية، غير أن أي مناقشة من هذا النوع يجب أن تبني علي معلومات أمينة وصادقة، وليس علي معلومات مزيفة أو مفبركة أو مزورة، وأن تأخذ حجمها وحيزها المعتاد دون تجاوز، وألا تتحول إلي وسيلة للابتزاز وإلهاء الناس والمجتمعات عن قضاياها وأحلامها الكبري،

ومن الواضح أن عددا من وسائل الإعلام، سواء المقروءة أو المسموعة أو المرئية، التي ظهرت خلال السنوات القليلة الماضية، وعلي الأخص أنواع معينة من الفضائيات التي تكاثرت مؤخرا في سماء المنطقة العربية، تعمل جاهدة لتشتيت ذهن الشباب وإفراغ طاقتهم فيما لا طائل ولا نفع حقيقي من ورائه، لكن إلي أي مدي تبدو تلك السياسة مقصودة أو مخططة أو مدعومة من جانب النظام الحاكم؟.

هذا سؤال قد تصعب الإجابة عنه، ومع ذلك فحين ييث برنامج كهذا في أعقاب سلسلة جرائم فضائحية بدأت بالتوربينو وانتهت بسفاح المعادي، في وقت يبدو فيه الداخل السياسي مشتعلا بالمواجهة مع جماعة الإخوان المسلمين, وتبدو فيه المنطقة، وكأنها علي شفا حفرة من النار وعلي وشك أن تشتعل فيها فتنة طائفية هائلة وربما حرب إقليمية شاملة، فمن الصعب التعامل مع حدث من هذا القبيل وكأنه مجرد صدفة!.

غير أن أكثر ما يحز في النفس، في هذا الصدد، أن تبدو مصر مشغولة إلي حد الاستغراق الكامل في تفاهات من هذا النوع في وقت يبدو فيه غيرنا مشغولا باستنفار الأمة وبدعوة مناضليها للجهاد المقدس لإنقاذ المسجد الأقصي، أو بدعوة مفكريها للمساهمة في صياغة وإقرار «مشروع حضاري نهضوي عربي»، وأيا كان الأمر فمن الواضح أن المسافة النفسية التي تفصل مصر الرسمية الآن عن بقية العالم العربي باتت تعادل ذات المسافة التي تفصل بين «المشروع الحضاري النهضوي العربي» وبرنامج «هالة شو».

Gid-Do - جدو said...

العزيزة سوسة
احب اعرفك حاجة بخصوص مدونتك وهى

it is working fine with Mozilla Firefox browser

but if you use Microsoft Internet Explorer you can not see you blog.

فارس عبدالفتاح said...

islamist bloke said…إلى الأخ المحترم /


بصراحة المقال ده طرح سؤال ولم يطرح الإجابة مع أن الإجابة سهلة وبسيطة جدا

أولا الكاتب الذي لا اعرفه تعود على الندوات المؤتمرات وورش العمل وغيرها من الكلام الغير مجدي أو بمعني اصح الغير نافع أو عملي .

يتكلم عن ندوات في مش عارف بيروت وعمان والقاهرة وورش عمل وندوات وأخبار ومجتمعات وثقافات والكلام اللي لا يودي ولا يجيب .

المهم السؤال الذي طرحة يقول بالحرف الواحد وأنا سوف اقتبس ما قال بالحرف /

ومن الواضح أن عددا من وسائل الإعلام، سواء المقروءة أو المسموعة أو المرئية، التي ظهرت خلال السنوات القليلة الماضية، وعلي الأخص أنواع معينة من الفضائيات التي تكاثرت مؤخرا في سماء المنطقة العربية، تعمل جاهدة لتشتيت ذهن الشباب وإفراغ طاقتهم فيما لا طائل ولا نفع حقيقي من ورائه، لكن إلي أي مدي تبدو تلك السياسة مقصودة أو مخططة أو مدعومة من جانب النظام الحاكم؟.

هذا سؤال قد تصعب الإجابة عنه ....... انتهي

ويتكلم الأخ الكاتب عن دور مصر في العالم العربي ويقول بالحرف الواحد /

بل إن مصر الرسمية بدت في نظر البعض وكأنها تحاول أن تبني بينها وبين الدول العربية جدارا عازلا يرونه أكثر خطورة وضررا علي الطرفين من جدار الفصل العنصري الذي تبنيه إسرائيل فعلا بينها وبين الفلسطينيين!. ............ انتهي

ويتكلم عن المجتمع المغيب حتى النخبة المثقفة من الأمة المصرية والعربية ويقصد بذلك الإخوة أمثاله بتوع الندوات وبتوع المواسم الثقافية وورش العمل والمحاضرات والمناقشات وغيرها من المسميات .

وهنا أسئل سؤال واحد وأريد أجابه كافيه لهذا السؤال / أن الأمة العربية أصيبت بشي سمعت عنه من الشيخ المحترم رحمة الله محمد عبد الحميد كشك يقول : وأنا لا اذكر مقدمة المقولة يقول أذا أصيبت امة في عقلها ( ...... رزقت الجدل ومنعت العمل .... ) .

فهل الندوات والمؤتمرات الثقافية تتمخض عنها شيء عملي ملموس يساعد الأمة العربية والإسلامية في مصائبها المحزنة التي تستدعي العار .

هذا هو السؤال ولا أريدك أن تقول لي والله أصلى الثقافة هي دي اللي هتبعث الروح في جسد الأمة من جديد وان الثقافة هي أملنا الوحيد وان الثقافة هي الشيء الوحيد الذي موجود بين أيدينا وهو المجال الوحيد الذي تركوه لنا الحكام العرب ولم يبقي شيء أخري غير الثقافة .

اههههههههههههههههههه والله العظيم حاجة غريبة وعجيبة .

الإجابة على سؤال الأخ الكاتب إذا أراد أن تسترد مصر موقعها الريادي والقيادي في العالم والمنطقة العربية وبعث روح الفكر القومي العربي الذي مات بموت الزعيم البطل جمال عبدا لناصر وان تصحي الأمة العربية من سباتها العميق وان وان وان وان .

أقول أولا : نقض معاهدة كمب ديفيد السياسية منها والعسكرية جملة وتفصيلا ،،،، التي وقعها الخائن العربي المصري الكبير للأسف محمد أنور السادات .

ثانيا : وهذا ليس ضروري ولكن ينظر فيه من قبل العسكريين والسياسيين المحترمين في مصر أمثال الدكتور محمد حسنين هيكل ، هو أن تعقد مصر تحالف قوي مع إيران وتركيا وان تخرج القوات المسلحة المصرية من قمقم الخوف الذي رسخه أنور السادات وتذهب إلى العراق مع قوات تركية إيرانية تحت مسمي قوات حفظ سلام بقيادة مصرية عربية .

ثم بعد ذلك تخرج القوات الإيرانية والتركية ثم المصرية بعد أن تكون قد خرجت أمريكا من العراق .

وانظر يا أخي الفاضل إلى زهرة شباب العرب القوميين والشباب العربي المسلم في جميع أنحاء الأراضي العربية والإسلامية المحتلة التي تستشهد وتقاوم وتدافع ببسالة ورجولة ولا نعرف حتى أسمائهم .

وشكرا ً.

سمسم said...

من السي اي ايه

الي الكي جي بي

ومنه الي الكي جي ون

وحبيبنا في اسكتلانديارد

مطلوب القبض علي سوسة المفروسة

السبب: انها فهمت اكتر من المطلوب

واصبحت خطر علي الماتريكس
***********************
تااااااااااااااااااااااااااج
****************************
ممكن تسألي نفسك بجد آذيتي مين النهاردة

ورفع إيدوه للسما ونكش شعره ودعا عليكي؟!

أيتها الفارسة الأنجلوساكسونية(متسأليش معناها إيه عشان معرفش)...اليك هذا التاج

إما ان تجوبيه وإما سجن المغووووول مدي الحياة مع حسن الهلالي جوز ياسمينة، اللي خانوه بدران، اللي كان شغال مع السيد شاهين، اللي هو كمال الشناوي
*********************

اسم مدونتك؟

لماذا اخترته.. ماذا تقصد به؟

هل فكرت في إغلاق المدونة.. والسبب؟

صورتك ف المدونة، رمزيتها؟

طبيعة كتابتك في المدونة بشكل عام..

سياسة.. قصة.. عبث.. كلام فاضي؟

لماذا تدون أصلاً؟

أحلى جملة قيلت لك في وصف مدونتك؟

التعليقات بالنسبة لك.. أهميتها؟

أحلى بوست كتبته.. ضع اللينك.. ثم اذكر لماذا؟

أفضل مدونة قرأتها.. يمكن اختيار عدة مدونات؟

أفضل بوست قرأته.. يمكن اختيار أكثر من بوست.. ومتنساش اللينك؟

هل خسرت صديق بسبب كتابة هنا؟

حد قل أدبه ف التعليق.. إيه رد فعلك؟

أسوأ مدونة.. الإجابة إجبارية.. ويمكن اختيار عدة مدونات.. هي كتيرة أصلاً :) ؟

أسوأ بوست.. لازم تجاوب.. ويسمح بتعدد الاختيارات؟

أسوأ مدون.. ما هو حاتجاوب حاتجاوب؟

انشر الآن بشكل حصري بوست لم تجرؤ على نشره من قبل.. مش محتاج أقول إجباري؟

masrry metgharb said...

عزيزتى سوسة

اولا انا اعتذر عن التأخير بس والله كنت مشغول جدا الفترة الى فاتت

يا استاذة الموضوع معروف من التسعينات وواضح وضوح الشمس وكمان تمت مناقشته فى فيلم الهروب للراحل أحمد زكى

العمليه ماشية معاهم حلاوة يعنى اى حاجه عايزين يخبوها يلهو الشعب فى حاجة تانية والامثله انتى ذكرتيها فى البوست بتاعك والى يضايق وينرفز ويخليكى تتفرسى اكتر ان طريقتهم بتنجح كل مرة وبدون عناء او تعب زى الراجل الى كل خمس دقايق يضرب واحد على قفاه ويقولو انا اسف اصل انت شكل واحد صحبى كنت بحسبك هو والتانى يصدق وبعدين يضربه تانى والتانى برده يصدق وهكذا احنا على طول مصدقين بالعكس احنا بنبقى مستنيين يعنى كل ما تطلع كارثه دلوقتى وهما ما شاء الله كتير ويحبو يدفنوها بقينا نصحى كل يوم نشوف الناس العفاريت دول هايلهونا فى اية علشان مانخدش بالنا من الى هايعملوه
وكل الكوارث الى اتكلمتى عنها فى البوست بتاعك فعلا اتنست مين لسه فاكر العبارة والتعديلات الدستوريه واكياس الدماء الملوثه وغيرها ؟؟
خلينا احسن فى هاله ولما تتعدل وتبطل تنبش ورا الاجهزة الامنيه نبقى ننيم موضوعها ونلهى الناس فى اى حاجه
وانا على فكرة باتصالاتى الواسعه عرفت من الكنترول ان الحاجه الجديده الى هايلبخو بيها الشعب مرتبطة بالكورة
ايوه احمد حسن راجع بعد الاحتراف وكل الناس هايبقى همهم يعرفو هايلعب للاهلى ولا للزمالك وده موضوع ممكن ياخد من شهر الى 3 شهور
على فكرة انا شاكك ان يكون فى اداره فى الداخليه زى امن الدوله كده بس اسمها تنويم الشعب ويطلع الضابط الكبير يقول مقدم تنويم شعب ابراهيم البرعى يافندم

انا بس قبل ما تسألى ايه الحل ملاحظ ان كل بوستاتك بتودينا على نفس النتيجه

التتتتتتتتتتتغييييييييييييييير

واهم مافى التغيير هو ايجاد البديل وهذا يعود بينا الى البوست الى فات وردى عليكى بخصوص البديل .

انا هاسيبك بقى علشان اكلم العصفورة بتاعتى علشان اعرف هايلهونا فى ايه بعد احمد حسن


عزيزى فارس عبدالفتاح اميلى
mosamier@gmail.com
mosamier2005@hotmail.com

شجره الدر said...

يعنى طيب تفتكرى احنا ورانا ايه
غير اننا نقعد نرغى على احداث مالهاش لزمه اصلا
بتبقى فعلا زى برنامج حديث المدينه
الماسخ صوره وموضوعا
ولما نبقة نلاقى حاجه نتشغل فيها تانيه ننسى الاولانيه تماما
بالظبط زى شويه عيال
انا فاكره
من ايام انفلوانزا الطيور
مرورا بحادث غرق عباره السلام
بالرسومات المسيئه عن الرسول
كل ده ورا بعضه
وسفاح المعادى
واكياس الدم
و و و
ايه ولا ايه
ربنا يسترها معانا
بس هيسترها ازاى مع شعب قتالين قتلا

أحمد المصري said...

هوا ده فعلا الموضوع اللي يحرق الدم00
إن معدش فيه دم أصلا 00كل ماحد يشخشخ
الشخليلة نجري وراه وننسى الأهم 00موضوه هالة سرحان فعلا مهم لكن احنا جرينا وراه وتابعناه زيادة عن اللزوم
وعلى رأي د/طنطاوي00كل من عليها
فاااااااااااااان 00لو حسينا بدا يمكن مكناش زي كده0
موضوع جميل كالعادة00في انتظار المزيد0
مع تحياتي00
والسلام عليكم0

www.blogs4arab.com said...

يسعدنا تشريفك
www.blogs4arab.com

كراكيب عادل said...

سوسه المفروسة من تاني بتفرسي في الناس ارحميهم كفايه الي هما فية

الناس بتكلم نفسها يسعدني مرورك ومرور زوار في اطار نفس الموضوع بس احنا بنهدي النفوس ههههههههههههههههه

sahar said...

انا اكتر حاجة مضايقاني بجد ان مصر دخلت في دائرة السفاحين والقتله
بعدما كنا نتغني بالامن والمان اللي احنا عايشين فيه

أُكتب بالرصاص said...

سوسا

مبورككك
على النيو لوووك

soosa el-mafroosa said...

amr ahmed

المشكلة ان الكل بيقع في المطب
يعني جهلة مثقفين مش فارقة

islamist bloke

الله يخليك
أخجلتم تواضعنا

في أمريكا عشان فيه قطبين بتلاقي ناس بتداري و ناس تانية بتحاول تكشف المستور

انما هنا ..ربنا يخلي الحزب الوطني

بنشوف بعنيه و بنسمع بودانه ولا عزاء للمعارضة

تحليلك للموقف في العراق مثير للإهتمام و لو إني باشوف انه مستبعد الجيش المصري يروح أي حتة
بعد ماخدنا على قفانا في موضوع الكويت و طلعنا من المولد بلا حمص

soosa el-mafroosa said...

stangallina

شكرا ليك

انشاء الله قريب

ehab

للأسف الفساد زي الأخطبوط له ألف ذراع

و ماشاء الله دي الحاجة الوحيدة اللي هما بيفلحوا فيها

يعني ممكن ياخدوا جايزة نوبل في التنويم المغناطيسي

هافضل مفروسة ..هاعمل ايه يعني؟

islamist bloke

يا سلام ..توارد أفكار

كويس ان فيه ناس بتاخد بالها من عملية التعمية اللي حاصلة
عقبال الباقي

gid-do-جدو

هي كانت مشكلة في التمبليت يا جدو
و انا رميته من الشباك و جبت واحد جديد

soosa el-mafroosa said...

فارس عبد الفتاح

الدم الحامي حامي

بس تفتكر ممكن اللي بتقوله ده يحصل

لا حد هيقدر ينقض معاهدة كامب ديفيد
و لا يتهيألي الجيش عنده إستعداد يروح في أي حتة
اللهم إلا إذا كنت تقصد قياداته لما يروحوا مارينا
تحياتي

سمسم

ماشي ..و ادي حل التاج

في البوست الجاي

soosa el-mafroosa said...

masrry metgharb

أنا كمان باعتذر عن التأخير في الرد

المدونة كانت مضروبة بالنووي

نبقى خالصين

فعلا احنا كلنا بننضرب على قفانا كل 5 دقايق
و ساعات كل 5 ثواني

و الكورة أسها حاجة

من أيام رضا عبد العال زمان قوي

و بعديه المحروس إبراهيم سعيد

و عمرو سماكة

و مش عارفة مين تاني

و الكل بيتكلم و الكل بيتناقش و لا كأننا هناكل من وراهم عيش

شجرة الدر

لا و اليومين دول موضوع الشجرة ماشي معاهم آخر حلاوة

و النبي شعب فاضي

تحياتي

soosa el-mafroosa said...

د/أحمد المصري

هي دي المشكلة فينا
ماهو يا إما نختار

الشخشيخة و الا اليويو؟؟؟

كله محصل بعضه

blog4arab

حااااضر

كراكيب عادل

حقك عليا

بس مين يتفرس معايا يعني غيركم

ماشي يا سيدي هتفرس أنا لوحدي

المهم تكونوا بخير

سلامات

soosa el-mafroosa said...

sahar

مصر لا دخلت في نطاق السفاحين و لا غيره

اللي في المعادي ده

مجرد عيل مختل بنشوفهم كل يوم في أي شارع في الدنيا

لكن وسائل الإعلام كالعادة نفخت في الموضوع لغاية لما بأه أد الهرم

و بعدين ؟؟

ايه اللي حصل

لا اتقبض عليه و لا عدنا بنسمع عنه حاجة

عشان بأه فيه موضوع غيره يشغل الناس و يأدي الغرض

و آدي كل اللعبة

أكتب بالرصاص

شكرا ليك

ده بس من ذوقك

hamasat said...

سوسه الجريئة عجبني اوي اسلوب كتابتك الجميل والنقد اللاذع لاوضاع بلدنا الحبيب وعجبني اكثر وولد داخلي بريق امل في التغيير ان في الكثير من الاحباب فاهمين العبه صح بس السؤال يا جميلة كيف السبيل للتغيير مش كفايه نعرف ونحس ونحلل السلبيات اللي حوالينا لا احنا محتاجين نفكر ازاي نتخلص منها ونغيرها لان السفينه بتغرق بسرعه اوي وعيني عليكي يا بلدي

soosa el-mafroosa said...

hamasat

أهلا بيكي

الكلام هو الخطوة الأولى
و المستقبل هيجيب بعدها خطوات أكبر

إنشاء الله

ibn nasser - ابن ناصر said...

انا اعتقد زي ماقولتي حكاية هاله سرحان مفتعله من ظباط الشرط بس كتها داهيه هي واعلامها التافه وفعلا بصي علي القضايا اللي بتشغل بال الشعب المصري تقولي مش نظام فاسد لأ مافيش نظام اساسا ,,وشكرا علي موضوعك

جبهة التهييس الشعبية said...

الحرية للعريف الوطني محمد خلف

Amr Ahmed said...

مبروك يا باشا علي النيو لوك

ما شاء الله روعة

تحياتي

سفاح الفراخ said...

السلام عليكم
بصي ياسوسه انت كلامك زي الفل و اوعي تخافي غير من الي خلقك طول ماانتي ماشيه صح و قلبك ابيض و دعاء الوالدين ربنا هينصرك
و اصلا الوليه الي اسمها هاله سرحان دي مش كويسه ربنا ياخد جوزها علشان
المفروض يخليها تحترم نفسها
بكره هعدي قبل صلاه العصر اشقر علي المدونه بتعتك
سلام

فارس عبدالفتاح said...

تحياتي واحترامي للشعب المصري والشباب المصري على وجه الخصوص


والله العظيم رايت وعاشرت جنسيات كثيرة عربية واسيوية


ولم اري اخف دم واحله روح ذي المصريي

الحمد لله حمدا كثيرا على اني مواطن مصري مع كل ما اعنية من السياسة المصرية


تحية كبير للاخ سفاح الفراخ

وياتري الفرخ هي الشعب المصري والسفاح هو حسني مبارك


وتحيتي الكبيرة الى

جبهة التهييس الشعبية


وعاشت مصر وعاش شعب مصر

ام العيال said...

how are you
i miss u sooo mush

stop watching tv
men masader 3elmeya
it's damage the brain cell
haaaaa

malo el kartoon
gamel
we mafehosh seyasa wala hala

i wish i was a kid :

pegasuselmasry said...

الحمد لله انا عرفت دلوقتى سبب انتشار مصانع الصابون و المنظفات فى مصر
علشان نغسل عقول الناس

ياخوفى على البلد دى
شوية و هيبقى المخ ده شئ نادر الوجود ممكن صعب حتى تشتريه
الوطن هيدخل على منعطف ملعون مش معروف ايه النهاية بتاعته و ربنا يسترها فعلا على البلد دى

Amr Ahmed said...

حملة انقذو الاقصي من الزملاء المدونين
قاسم افندي
http://kassemafandi.blogspot.com/

كلبوزة لكن سمباتيك
http://kalbozza.blogspot.com/

كراكيب عادل said...

كالعادة

اقف مشدود امام مواضيعك

كازانوفا said...

مبدعة يا بنتى والله هقولك ايه تانى يعنى

واحلى حاجة اخترتيها ومن اللى انا موافقك فيها هو الغبى اللى اسمه عبد الكريم ده ل بقى وايه تلاقى حبة مدونين ملاطيش بيدفعوا عنه و كأن كل المدونون معصومين من الغلط مفروض غلط يبقى لازم ينحاسب يا استاذة

وشكرا :)

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول