جمهوملكية ..زي الكتاب مابيقول

مصداقا لقول جدتي الله يرحمها "إن فات عليك الغصب خليه بجميلة" فأنا من مدونتي هذه و من موقعي هذا أتقدم بخالص التهاني و الأمنيات
القلبية -و اللي في القلب في القلب- لفخامة سمو ولي العهد الأخ جيمي و فخامة سمو السيدة الأولى -مستقبلا- ديجا...شفتوا الدلع جيمي و ديجا في أسامي ألافرنكة أكتر من كده توحي بالتقدم و إقتحام القرن الواحد و العشرين من أوسع أبوابه

فقد قرر جيمي أخيرا و بعد مدة تقرب من السنة إستغلها في تكوين نفسها و الدخول في عدة جمعيات من أجل سداد أقساط التلاجة و السخان

قرر أخيرا كتب كتابه على الآنسة ديجا يوم 28 أبريل الحالي

طب ده كتب الكتاب ..طب و الفرح إمتى؟

خدوا عندكوا بقة ..و الله إنتوا ماتعرفوا أنا ماسكة نفسي من العياط إزاي و انا بكتب السطور دي..متأثرة متأثرة يعني...جيمي الإبن البار المطيع المحب الحنون قرر إن دخلته تبقى يوم عيد ميلاد الأب الحنون بابا حسني
يوم 4 مايو الميمون

إهئ إهئ إهئ ..أااااااااااااااااااااااااه

(فاصل من العياط و الشحتفة)

شفتوا الحب وصل لغاية إيه شفتوا حاجة زي كده في أي حتة بالذمة ده ولا حتى أوروبا ولا الدول المتقدمة..

بس يا جماعة بما إني زي ماقلتلكوا كده قررت إني أخلي الغصب بجميلة فانا قررت إني أكون جمعية جديدة تدين بالولاء للجمهوملكية المصرية و المباركة لولي العهد و حرم ولي العهد ..في مقابل شوية مطالب بسيطة جدا

بما إنها بقت توارث و جمهوملكية و كلنا إعترفنا ضمنيا بولي العهد ..فخليها جمهوملكية زي الكتاب مابيقول

يعني مثلا لازم يوم كتب الكتاب يبقى أجازة ..أما الأفراح فتمتد لسبعة أيام .تاخد فيها كل المدارس و المصالح الحكومية أجازة طويلة للإحتفال بالعرس الميمون

سمو ولي العهد ليلة الفرح يخرج على الناس بحصان أبيض أو إف-16 بيضا مش هنختلف و يرمي على الشعب 20-30 كيلو دهب من الأصلي بتاع سويسرا ده و ياريت فخامة أبو ولي العهد برضه يرش رشة بمناسبة عيد ميلاد جنابه ال79-ربنا يطول في عمره ياااااااارب

تقوم الدولة بإصدار قرار بإن أي ولد إسمه جمال على إسم ولي العهد و أي بنت إسمها خديجة على إسم مرات ولي العهد يتم إعفاءهم من مصاريف التعليم مدى الحياة إكراما للإسمين الكريمين دول و دي هتبقى غالبا الفرصة الوحيدة اللي تسمح لأبناء الطبقات المتوسطة و الدنيا بالتعليم بعد تنفيذ خطة الدولة في إلغاء مجانية التعليم إلا لأبناء الناس الكويسين

يتم مد الولائم التي تتكون من اللحمة المحشية باللحمة و ذلك مدة أيام الفرح السبع على ان يتم تقسيم الشعب كله على السبع أيام دول بحيث إن الشعب المصري كله يدوق اللحمة على الأقل مرة واحدة في حياته و بعد كده يبقى يحلف باليوم ده و يشيلها جميلة لولي العهد إنه كان السبب في إنه داق اللحمة و اللي قاله سنين و سنين بيسمع عنها بس في الأساطير

و طبعا ماينفعش الموضوع يعدي من غير شوية بقششة كده ع الموظفين يعني يمكن ربنا يكرمه ولي العهد و يدي تعليمات انهم يطبقوا الكادر اللي بيقولوا عليه ده ..أو ممكن يعمل زي ولي العهد الليبي اللي طلع مرة الصبح و قرر إن كل مرتبات الموظفين بالدولة هتزيد 250% .

..يعني هي ليبيا كانت احسن مننا والا يعني ولي العهد الليبي أحسن من المصري والا ايه؟


أمال يا جماعة ما هو لازم نطلع بأي فايدة من الموضوع امال يعني نفضل هبل كده و نطلع من المولد بلا حمص

أهو شوية مطالب حتى لو هايفة بس في النهاية أحسن من نبح الصوت و الزعيق و الصويت و بعدين برضه هينفذوا الخطة الحكيمة بتاعهم..جمهوملكية جمهوملكية ..بس نعيش

عاشت الجمهوملكية المصرية
عاشت الجمهوملكية المصرية
عاشت الجمهوملكية المصرية