Saturday, April 07, 2007

جمهوملكية ..زي الكتاب مابيقول





مصداقا لقول جدتي الله يرحمها "إن فات عليك الغصب خليه بجميلة" فأنا من مدونتي هذه و من موقعي هذا أتقدم بخالص التهاني و الأمنيات
القلبية -و اللي في القلب في القلب- لفخامة سمو ولي العهد الأخ جيمي و فخامة سمو السيدة الأولى -مستقبلا- ديجا...شفتوا الدلع جيمي و ديجا في أسامي ألافرنكة أكتر من كده توحي بالتقدم و إقتحام القرن الواحد و العشرين من أوسع أبوابه

فقد قرر جيمي أخيرا و بعد مدة تقرب من السنة إستغلها في تكوين نفسها و الدخول في عدة جمعيات من أجل سداد أقساط التلاجة و السخان

قرر أخيرا كتب كتابه على الآنسة ديجا يوم 28 أبريل الحالي

طب ده كتب الكتاب ..طب و الفرح إمتى؟

خدوا عندكوا بقة ..و الله إنتوا ماتعرفوا أنا ماسكة نفسي من العياط إزاي و انا بكتب السطور دي..متأثرة متأثرة يعني...جيمي الإبن البار المطيع المحب الحنون قرر إن دخلته تبقى يوم عيد ميلاد الأب الحنون بابا حسني
يوم 4 مايو الميمون

إهئ إهئ إهئ ..أااااااااااااااااااااااااه

(فاصل من العياط و الشحتفة)

شفتوا الحب وصل لغاية إيه شفتوا حاجة زي كده في أي حتة بالذمة ده ولا حتى أوروبا ولا الدول المتقدمة..

بس يا جماعة بما إني زي ماقلتلكوا كده قررت إني أخلي الغصب بجميلة فانا قررت إني أكون جمعية جديدة تدين بالولاء للجمهوملكية المصرية و المباركة لولي العهد و حرم ولي العهد ..في مقابل شوية مطالب بسيطة جدا

بما إنها بقت توارث و جمهوملكية و كلنا إعترفنا ضمنيا بولي العهد ..فخليها جمهوملكية زي الكتاب مابيقول

يعني مثلا لازم يوم كتب الكتاب يبقى أجازة ..أما الأفراح فتمتد لسبعة أيام .تاخد فيها كل المدارس و المصالح الحكومية أجازة طويلة للإحتفال بالعرس الميمون

سمو ولي العهد ليلة الفرح يخرج على الناس بحصان أبيض أو إف-16 بيضا مش هنختلف و يرمي على الشعب 20-30 كيلو دهب من الأصلي بتاع سويسرا ده و ياريت فخامة أبو ولي العهد برضه يرش رشة بمناسبة عيد ميلاد جنابه ال79-ربنا يطول في عمره ياااااااارب

تقوم الدولة بإصدار قرار بإن أي ولد إسمه جمال على إسم ولي العهد و أي بنت إسمها خديجة على إسم مرات ولي العهد يتم إعفاءهم من مصاريف التعليم مدى الحياة إكراما للإسمين الكريمين دول و دي هتبقى غالبا الفرصة الوحيدة اللي تسمح لأبناء الطبقات المتوسطة و الدنيا بالتعليم بعد تنفيذ خطة الدولة في إلغاء مجانية التعليم إلا لأبناء الناس الكويسين

يتم مد الولائم التي تتكون من اللحمة المحشية باللحمة و ذلك مدة أيام الفرح السبع على ان يتم تقسيم الشعب كله على السبع أيام دول بحيث إن الشعب المصري كله يدوق اللحمة على الأقل مرة واحدة في حياته و بعد كده يبقى يحلف باليوم ده و يشيلها جميلة لولي العهد إنه كان السبب في إنه داق اللحمة و اللي قاله سنين و سنين بيسمع عنها بس في الأساطير

و طبعا ماينفعش الموضوع يعدي من غير شوية بقششة كده ع الموظفين يعني يمكن ربنا يكرمه ولي العهد و يدي تعليمات انهم يطبقوا الكادر اللي بيقولوا عليه ده ..أو ممكن يعمل زي ولي العهد الليبي اللي طلع مرة الصبح و قرر إن كل مرتبات الموظفين بالدولة هتزيد
250% .
..يعني هي ليبيا كانت احسن مننا والا يعني ولي العهد الليبي أحسن من المصري والا ايه؟


أمال يا جماعة ما هو لازم نطلع بأي فايدة من الموضوع امال يعني نفضل هبل كده و نطلع من المولد بلا حمص

أهو شوية مطالب حتى لو هايفة بس في النهاية أحسن من نبح الصوت و الزعيق و الصويت و بعدين برضه هينفذوا الخطة الحكيمة بتاعهم..جمهوملكية جمهوملكية ..بس نعيش

عاشت الجمهوملكية المصرية
عاشت الجمهوملكية المصرية
عاشت الجمهوملكية المصرية


83 comments:

maged stephen said...

نبح الصوت و الزعيق و الصويت
فعلا يا سوسة هو ده التعريف الصح

ولى النعم said...

سوسة هانم المفروسة

وعلشان اخلاصك لحضرتوتنا وولائك لابن حضرتوتنا نهدى حضرتكم تاج الجزيرة ومنحكم لقب سوسة هانم المفروسة

التوقيع
ولى النعم

محمود سعيد said...

يا عيش

يعيش
يعيش


يا قرفى :-(

مصر هى أمى said...

سوسة المفروسة

حضرتك نسيتى اهم حاجة ان هيئة البريد تصدر طوابع مخصوصة بهذم المناسبة وعليها صورة الفرح باعتباره عيد قومى
وتانى حاجة البنك المركزى يطبع عملة بهذم المناسبة الميمونة برده
ولا هيا مش ميمونة ردى ما تخافيش ميمونة ولا لأ

ذو النون المصري said...

سوسه هانم
يوم الخميس الماضي كان مولد بلدنا شغال و عمران و الحمص كان علي قفا مين يشيل
قفا و دماغ كمان
الامر مدهش جدا يعني كل شيء بيدبروه لنا او بمعني اصح لهم و احنا مش عارف ايه حكايتنا بالظبط
مستنيين ايه تحديدا؟
لكن جايز امام مكرهم يكون ربنا مدبر لهم مكره و هو خير الماكرين
هل سيكون حلنا الوحيد هو ان ننتظر مكر الله؟
شيء غريب فعلا امرنا هذا
اعتقد ان جيمي و ديجا بينظروا للفلاح المصري الان علي انه
ادب يوك
خرسيس برسيس

ذو النون المصري said...

اه
انا مررت لك تاج عندي
تحياتي

يا مراكبي said...

إنتي عايزة تفهمينا إن العروسة ماكانش عليها أوضة النوم وطقم الحلل والصيني وألا إيه؟

أرجو التوضيح

مـحـمـد مـفـيـد said...

مع الانبطاح علي الارض مع البكاء والحسره من القادم

مبروك يا جيمي

Anonymous said...

نعم نعم انتى عاوزاهم كمان يصرفوا على الشعب من جيوبهم ويأكلكوا كمان يا دكتورة!!!!!!!! لا دا بعدك دى كلها كام يوم كدا وهاتسمعى الاخبار الناس كلها لازم تشارك فى فرح ولى العهد واهم حاجة النقطة وحطى تحت دى مليون خط بس هما لسه ما حددوهاش هاتبقى كام فيه ناس بيقولوا 100 جنيه للفرد وناس تانية بيقولو 1000 جنيه المهم انهم يلموا النقطة واحنا موش مشكلة تجينا نقطة ويجعله عامر (وش بيغمز)

Anonymous said...

نسيت اقولك يا دكتورة ممكن نقبل الهدايا العينية يعنى دكتورة اد الدنيا زيك كدا تروح تلم كل الحبوب الزرقا اللى هندها لزوم المزاج العالى وتحطهم فى علبة هدايا شيك كدا وتقدمهم هدية متواضعة وما فيش مانع لو حطيتى معاهم حتتين السيغة اللى لابساهم اهو كله هاينفع لازم تعملى كدا احسن تلاقى جماعة بيخبطوا عليكى فى وش الفجر ولا حاجة ويجعله عامر

Amr Ahmed said...

سوسة حمدالله علي السلامة

ايوه صحيح ماهو كده كده هيخصل
يبقي نوافق بكرامتنا احسن

انا اؤيدك

يللا وادينا نطلع باي مصحلة

مش فاهم حاجة said...

من الوضع راقدا
ابعث تحياتى الخاصة
لولى النعم فى القطر المصر السعيد

واتبنى لة زواجا سعيدا
وان يسرع باخراج ولى العهد الجديد
وانى يسميعة حسنى
على اسم جدة

Ma-3lina said...

الله الله عليكى هوا دا الكلام لازم نستفيد حاجة من الموضوع دا

والف مبروك للعروسين

ســــــردية said...

اصدقائي الأعزاء
نظراً لأنشغالي الشديد ولحتى نهية العام قررت دمج مدونتي سردية وسرديات مصرية وإليكم العنوان الجديد
http://maraseel60.blogspot.com

Islamist Bloke said...

تفتكرى هيورث بجد يا سوسة؟

ممكن؟

طيب والمعارصة؟ والاخوان؟ والشعب؟ والاسلاميين؟ والجيش؟ والشرطة؟ والقضاة؟

كل دول بح؟

اذا كلهم اختفوا او اصبحوا عملاء او مقهورين

لنا الله

حسن محمود said...

لالالالا
أطمنى
أن شاءالله مافيش توريث

خالى عندك أمل
المهم انتى ماقلتيش أنهى كتاب ده اللى بيقول؟

واحـــد مـــــن الـنـــاس said...

يعيش جمال مبارك في قصر القبة

يعيش

يعيش


يعيييييييييش


قولو ورايا يالله

وانتي كمان يا سوسة

شهيدة said...

أهلا سوسة

أفكارك جميلة جدا ومبتكرة عشان احياء مناسبة وطنية كهذه

لو كنت أقدر أروح مصر وأشارك معاكم فرحتكم
بس العين بصيرة والايد قصيرة

مبروك من وراء البحار ارسلها لكم

هههه

تحياتي

فارس عبدالفتاح said...

لا تعليق

عبدالله said...

ربنا يستر في موضوع النقطه ده ياتري هيدفعوا كل راس كام
وربنا يستر مش يضحوا بكام الف راس بالمناسبه السعيده
ربنا يبعد عنا شرهم و ياخدهم

تحياتي

محمد العنانى said...

ايو يا خائنه اصحابك المدونين والمقاطعين والمرابطين ومستنين الفرج
عايزه يوم كتب الكتاب اجازه وكمان سبع ايام فرح
ليه ننوس عينو هيطلع ايه
رئيس يعنى ولا رئيس يعنى
هههههههههههه
انا حاسس من الاول انك معاهم
وشكلى هلبس حزام ناسف وانفجر فى مدونتك
انتى مع مين معنا ولا معانا
ههههههههههه
تحياتى
بس قبل ما امشى
ده مش حلم
ولا وحقيقه
ده ..........
انسى
اكيد انتى مش فى مصر

HANY said...

سوسة : مبروك الشكل الجديد للمدونة

ثانيا : الف مبروك يا ريس ولابنك اسم النبى حارسه

ثالثا : عقبالنا جميعا

رابعا : الدعوة للخواجات واباطرةالوطنى , وممنوع دخول المصريين

ihapoof said...

hi sosa

hya mesh tahyeesa bas wallahi gamda geddan w 3amalya ..

malakya malakya .. malakya mnofya .. ay 7aga .. el mohem netla3 mnha b2ai 7asana ..

nice post

soosa el-mafroosa said...

maged stephan

معلش أهي ناس بتفضفض و تنفس عن اللي جواها معذورين

بس انا قررت أبقى عملية ..مش كده أحسن

soosa el-mafroosa said...

ولي النعم

تشكرات أفندينا
أطال الله في عمر سعادتكم
و أبعد الشعب الخنزقور عن سكتكم

soosa el-mafroosa said...

محمود سعيد

من غير ماتقرف و لا حاجة
حد يقرف من اهلة و أحبابه

soosa el-mafroosa said...

مصر هي أمي

هو إقتراح معقول

بس لازم يبقى فيه فايدة لينا من وراه

لازم ندور على مصلحتنا

يعني بعد ما يسكوا العملة التذكارية دي
ممكن يوزعوها علينا في عيد العمال و الا حاجة

ندورلنا على أي سبوبة من الموضوع يعني

soosa el-mafroosa said...

ذو النون المصري باشا

كلنا مستنيين فرج ربنا

متواكلين ..بس و الله غلابة فيه في إيدينا إيه نعمله

على فكرة بيقولك ديجا دي مرة كانت في حفلة و وواحد بيكلمها عن الربع جنيه المخروم
و هيا مش مصدقه إن فيه حاجة إسمها كده

يعني هي مش بتبص للفلاح المصري

هي ماتعرفوش أساسا

soosa el-mafroosa said...

يا مراكبي

الأوضه كان عليها التنجيد سيادتك

و ستاير الصالون

soosa el-mafroosa said...

محمد مفيد

و شوية لطيم على صويت لو سمحت

soosa el-mafroosa said...

anonymous

آه صحيييييييييييييح

تصدق أنا مش واخدة بالي من موضوع النقطة دي

طب النقطة دي مش هتتوزع و الا حاجة

تلت للعريس و تلت للرقاصة و تلت للمحل

عايزيني اودلهم حبوب زرقة..طب و ليه ؟

غحنا ناقصين جيل تالت؟

soosa el-mafroosa said...

amr ahmed

الله يسلمك يا عمرو

ياللا يا عمرو

هاعتبرك من الأعضاء المؤسسين لجمعية تأيد جيمي و خديجة

بيدي و بيد عمرو

soosa el-mafroosa said...

مش فاهم حاجة

الله مانت فاهم كل حاجة أهه

انا يسرني إني أعرف إن فيه في البلد شباب واعي كده

أيوة كده يا جماعة
و شعارنا هو

أبجني تجدني

soosa el-mafroosa said...

ma-3alina

أيوة يا بنتي و لازم الصيادلة اللي زيينا
يبقوا في أول الصفوف

ماحنا طول عمرنا واعيين

soosa el-mafroosa said...

سردية
ok

soosa el-mafroosa said...

islamist bloke

المعارضو الإخوان و الشعب و الإسلاميين

مجرد أصوات عالية للأسف

الجيش و الشرطة

مصلحتهم مع الوريث

أنا أسمع إنه مظبط اموره مع الجميع

هي حلها الوحيد من عند ربنا

soosa el-mafroosa said...

حسن محمود

الله يطمنك
بس إنت جايب التأكيد ده منين

الكتاب ..الكتاب؟

مش عارفه و الله هما دايما يقولوا كده في ماتشات الكورة

soosa el-mafroosa said...

واحد من الناس

يعيش يعيش يعيش

و ده الكلام

خليني أسمع أصواتكم عالية يا شباب

أنا و أنتم و من بعدنا الطوفان

soosa el-mafroosa said...

شهيدة

حبك لولي عهدنا واصلنا من أي أرض و أي مكان

الشعب العربي كله لازم يتحد في المناسبة القومية دي

لأن جيمي مش بس هينقل مصر نقله جامده

ده واضح إنه مركز ع المنطقة كلها

soosa el-mafroosa said...

فارس عبد الفتاح

نورت

soosa el-mafroosa said...

عبدالله

أنا برضه خايفة من موضوع النقطة دي

تفتكر هيلموا من العيال بتوع المدارس زي مادفعوهم حق مستشفى السرطان؟

و الله شكلنا هنشيل الليلة

الحمد لله انا خلصت دراسة

بس ممكن برضه يخصموا من التأمينات

soosa el-mafroosa said...

محمد العناني

يا أستاذي و لا خاينة ولا حاجة

هيا هتحصل هتحصل

يبقى نرسم الإبتسامة و نطلع بأي مصلحة

و قالوا ضربوا الأعور على عينه
قال خسرانة خسرانة

نطلع بأي فتافيت

و بعدين مالهم جيمي و ديجا و النبي قمامير

شيك كده و فوتوجينيك

انتوا هتلاقوا احلى منهم؟

soosa el-mafroosa said...

hany

عاش من شافك

الله يبارك فيك

إحنا مش عايزين دعوات اهم حاجة إنه يتجوز و يستقر
عشان يفوق للمسؤلية الكبيرة الملقاه على عاتقة

ربنا ياخد الشعب اللي مغلب العيلة المالكة ده يا أخي

أهم حاجة إنهم يرتاحوا و يفرحوا و يزقططوا


غحنا لينا بركة الا هما؟؟؟؟

soosa el-mafroosa said...

ihapoof

أهلا بيك ..منور

هي ملكية منوفية فعلا

و أي حسنة تيجي من ورا الموضوع
احسن من البلوشي

لازم نبقى شعب مطأطأ كده و نساير أمورنا

أمال إيه؟

أحمد العربي said...

يا نهار ابيض دا انا عامل موضوع عن فرح جيمي ابو شنة ورنة برضة ع المدونة بتاعتي ...علي العموم يا محاسن الصدف



بس ياسوسة ولا يهمك العروسة للعريس والجري للمعارضين

Anima said...

في الأول ما كنتش عارفة مين دول أصلي من كثر ما بشوف قتلى و جرحى في الأخبار ما بقيتش بتفرج عليها
لما قريت الموضوع فهمت إنه ولي عهد مصر هههههههههههه ربنا يبارك لكم فيه
هي ما لقيتش غير اللون ده اللي في شعرها؟؟؟؟؟؟؟؟

Marwa said...

الموضوع رائع وربنا يستر وتكون خديجة بنت ناس وما تبهدلش جيمي علشان ده في الاخر هيطلع على دماغنا يعني لو في يوم كده عكننت مزاجه هيطلع على مين ؟ علينا طبعا الشعب المحترم
وبالرفاق والبنين
تحياتي

عـلا - من غـزة said...



طول عمرك زوق وتعرفي الاصول يا سوسة


fnan_geology said...

وتحيه للعروسين

من طنط سوسه وعمو الفنان واحمد ومحمد ويوسف المصرى

وبنقولهم مبروك ونسمع اغنيه ست الحبيب يا حناننا انتى يا مصر

والمصريون يمتنعون

وسلاااااااااااام

امام الجيل said...

الف مبروك للعروسين ويا رب يعيشو تلتميت سنة ويخلفو رئيسات ورؤساء يملوا علينا حياتنا ليوم الدين
ويخلوا مصر متقدمة كمان وكمان
ولا عزاء للبشر

حسام مراد said...

الف مبروك للعروسين
على فكره الدعوه للجميع شعب مصر كله هايروح عشان الكرم اللى انتى بتقولى عليها مش لحمه يابنتى لحمه لحمه لحمه

حسام مراد
شغال
اتمنى انك تنورينى فى شغال ويارب تعجبك
http://7ossampts.blogspot.com
سلام

kaed said...

انا بقى حوستى حوسة ياسوسة
أصل أخوكى متنيل و معزوم فى الفرح ومش عارف أعمل إية
أجيبلة نملية و لا قصرية زرع و لا أطبقلة خمسين جنى فى جيبة
أنا مش عارف أعمل إية

zordeak said...

هع هع هع هع


:D

Anonymous said...

hi sosa ana hawalt tany al araby mush rady yaktb

صديق قديم said...

ايه ده هما برضه بيكتبوا الكتاب زيينا كده و بيجيبوا عفش و حاجات زى دى و الله العظيم طيب ممكن تقوليلنا ياترى الجواز كان تقليدى ولا عن حب و لو انى متاكد ان اللى زى دوول مايعرفوش الحب ....اذا كانوا مايعرفوش ربنا و ان شاء الله لن يحدث ما يرموا اليه

و ما رميت اذ رميت و لكن الله رمى
و ايه اخرى
انهم يكديدون كيداً و اكيد كيدا
و بالقول المأثور
تقدرون و تضحك الاقدار

أميرة البلطجية said...

وانا كمان يا سوية بأيد هذه المطالب وبهتف مع الشعب ابو جزمة بكعب
يا
يعيش
يا
يعيش
تحياتي ليكي ومدونة زي العسل

soosa el-mafroosa said...

أحمد العربي

واضح ان العقول العبقرية اللي زينا بتفكر بنفس الطريقة

او يمكن الفرسة جمعانا سوا

soosa el-mafroosa said...

anima

حد مايعرفهمش..الحكام الجداد للشرق الأوسط بإذن الله

اللون ده معلش أصلها هي و مامتها خمسوا في إزازة اوكسجين

soosa el-mafroosa said...

marwa

خديجة طبعا بنت ناس

امال خريجة جامعة أمريكية و بتلعب كورة قدم

يعني بنت ناس بالتلاتة

soosa el-mafroosa said...

علا-من غزة

ده بس من ذوقك يا حبيبتي

soosa el-mafroosa said...

fnan_geology

و لو سمحت التهنئة تنزل على روتانا سينما

أوعى تفتح عينيك

soosa el-mafroosa said...

امام الجيل

كل المشاعر الفياضة دي يا جماعة

دليل على أصالة الشعب المصري

هنيئا لك بنا يا ريس جيمي

soosa el-mafroosa said...

حسام مراد

لحمة يا دنيا لحمة

يا جماعة عندي مصادر خاصة بموضوع اللحمة ده ماتقلقوش

soosa el-mafroosa said...

kaed

أحسن حاجة تجيبله مفتاح للأنبوبة

مهم جدا و حيوي و كل العرايس و العرسان بينسوه

إسمع كلامي بس

soosa el-mafroosa said...

zordeak

منور

soosa el-mafroosa said...

anonymous
عربي او إنجليزي إكتبوا اللي يعجيكم و كله هيوصل إنشاء الله

soosa el-mafroosa said...

صديق قديم

الله لازم طبعايكتبوا الكتاب امال هيكتبوا إيه؟

و لازم يجيبوا برضه عفش إلا إذا كانوا هيقعدوا مع ماما سوزان في الشوقة

اهم يونسوها برضه

soosa el-mafroosa said...

أميرةالبلطجية

أيوة ياميرة إنتي إنضمامك للحركة دي هيكون مفيد جدا

إنت عارفة موضوع البلطجة ده ماشي حلاوة في البلد اليومين دول

هنعملك زعيمة

REEMOO said...

الليه عيد
يعنى العريس هيتجوز
وزى ما العريس هيتجوز اكيد العروس هتتجوز
العريس متين والعروسه متينه
ياللى غويت المتين سيبك من المتينه
لا المتين بينفع ولا المتينه على الاصل دور
:) تحياتى

CrAzY-bOy said...

بوست لذيذ

تحياتى

sendrlla said...

كلامك مقنع فعلا وحلو موضوع الطوابع بمناسبه الفرح اللى نوهت عنه مصر هى امى

صاحب البوابــة said...

حتى لو كانت ملكية

فمع هؤلاء الفاسدين

ستصبح أسوأ مملكة

تحياتي

ذو النون المصري said...

سواء كانت ملكيه او جمهوريه هتكون سيئه جدا
لكن انا لا اعتقد ان الحكايه اتظبطت مع الجيش ولا حاجه
مين في الجيش ممكن يظبط معاهم؟
وزير الدفاع مثلا
و كبار القاده
انا شخصيا لا اعتقد ان كل القاده في نفس واحد يرضوا يتحكموا بواحد نص راجل
لو حصل ده
ممكن يكون لحد الراجل ميموت
و بعدها جيمي و ديجه يروحوا لامهم
سوزان و مين؟؟؟؟؟؟؟؟؟
مين صحيح ام ديجا؟

Islamist Bloke said...

انتى فين

مش بتكتبي لية

طمنينا

Nouran said...

نعيش لمصر ونموت لمصر مصر ومصر وتحيا مصر اهئ اهئ اهئ
هو الفرح امتى ؟
ايه ده ربنا يديهم ع قد نيتهم :((

Anonymous said...

ها نغنيله كلمات الشاعر الكبير احمد فؤاد نجم اللى بيقول فيها مبروك يا عريسنا...
يابو شنه و رنه
يا و اخدنا وراثه...
افرح و اتهنى
و اطلع من جنه...
حود علي جنه
مش فارقه معانا...
و لا هاريه بدنّا
و لا تاعبه قلوبنا...
و لا فاقعه بضانّا
يا عريس الغفله...
اطلب و اتمني
ما حناش كارهينك...
لكن عارفينك
هاتكمل دينك...
و تطلع دينّا

harmless said...

شر البلية ما يضحك
عسى الله ان يرد كيدهم ويمحق مكرهم
اما عن الشعب
فمافيش فايده

SoRsaRaa said...

ههههههههههههههه
معقوله شعب المدونات كله فرحان بـ ولى العهد بالشكل داااا
بجد احساسكم الرقيق دا ومشاعركم الجميله هتضاف فى الوايت ليست عند سمو الملك ادام الله عمره اللى سمعت انه قرب عال80

ياللا ولادايم الا وجه الله

تحياتى

SoRsaRaa said...

اهم الانباء فى عالم التدوين:
ــــــــــــــــــــــــــــــــــــــــــ

"مسابقه افضل موضوع"
http://best-post.blogspot.com/

"من أجل مدونات نظيفة"
http://5fadfada.blogspot.com/2007/04/blog-post_20.html

"تصميمات الشعار وأكوادها"
http://takhareef-sorsaraa.blogspot.com/2007/04/blog-post_21.html

ياريت تشرفونا وتشاركوا معانا فى المواضيع دى

Anonymous said...

انا مش شايف تعليق مناسب لموضوع 4 مايو دا غير الجملة اللى كانت بتتقال فى فيلم الزوجة الثانية : " ياسلام عالحنية, يا سلام عالإنسانية"

Abo Amr said...

قادني حظي العاثر اثناء قضاء الاجازة في مصر
اني اكون في صلاح سالم مع والدي رايحين لدكتور
اثناء كتب الكتاب في دار القوات الجوية
و طبعا وقفنا يجي نص ساعة و في الاخر اضطرينا نهرب من جوة مصر الجديدة رغم ان ده طول المشوار يجي ساعة و شوية

احلى تعليق سمعته
عن الزحمة في الشارع اثناء كتب الكتاب

جمال بيكتب الكتاب
و احنا واقفين في الجو التراب
و عجبي

belhana said...

مجهود رائع

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول