Saturday, July 21, 2007

حب و عرفان...لماما سوزان







الأسبوع اللي فات في نشرة أخبار حتى لا تذهب وراء الشمس ..كنت كتبت نبذه عن الحملة الإنسانيه اللي بدأتها ماما سوزان لمحاربة الختان



لكن الأسبوع ده بصراحة انسانيتها و كرمها فاقوا كل توقعاتي لنجدها تقوم بعمل انساني نبيل آخر..بتبنيها حالة هند..الطفلة ذات ال11 عاما التي حملت و انجبت طفلة على أثر الإعتداء عليها..كانت تعليمات الأم الحانية بنقل الأسرة بأكملها الى مدينة جديدة و عطاؤهم ضقة بديلة مع صرف 1000 جنيه للأب لمساعدته على بدء حياة جديدة



الحقيقة قعدت أتحيل مستشارين ماما سوزان و هما بيبلغوها بالحالة دي..أكيد رد فعلها اللي حصل و قتها هو هواه اللي حصل وقت مابلغوها بموضوع بدور و قضية الختان..بكاء و شحتفة ووضع اليد على الرأس و مش بعيد في ساعة عصرية كشفت راسها و دعت على اللي كان السبب


زبالة


و قعدت أفكر..طب ليه المستشارين دول مش بيقلولها على بقية الحاجات اللي بتحصل في البلد..ماهي الست مش هتقطع نفسها يعني...يعني أكيد لو عرفت ان فيه أطفال شوارع و بنات و شباب مصدر أكلهم الوحيد من الزبالة ..كانت عملتلهم حملة...لو عرفت ان فيه قرى و مدن كاملة كل سكنها تقريبا بيعانوا من الفشل الكلوي لأنهم ماشربوش كباية ماية نضيفة بقالهم أكتر من تلاتين سنة..كانت ادت ميسدكول لوزير الري و حلت المشكلة..لو بس بلغها علم ان نسبة سرطان الأطفال في مصر من أعلى النسب في الشرق الأوسط لدرجة انهم بيعملوا مستشفى طويلة عريضة و بيلموا فلوسها من الأطفال في المدارس و الجامعات تطبيقا لنظرية" من دقنه و افتله "على أساس انهم هما اللي هيتعالجوا فيها مستقبلا..كانت رهنت اسورتين من الشبكة اللي جابهالها بابا حسني و بنت لنا 4-5 مستشفيات



لكن يا جماعة ..قولوا للست ..عرفوها..هي مش فاضية تنزل البرلس ولا تروح قلعة الكبش..يعني لو بس تبلغوها هيا هتتصرف على طول



خصوصا اليومين دول ..الست تحسوا انها شادة حيلها بعد ماكانت كسلت شوية الكام سنة اللي فاتوا...خصوصا بعد ما ديجا ظهرت على الساحة..ماما سوزان صحيح أمنا كلنا لكن برضه واحدة ست..بصت للبنت كده لقتها صغيورة و روشة و بتضرب شعرها فحلقي و بتلبس فساتين بكتف واحد و بتلعب كرة قدم ..قالت لأ بأه مابدهاش ..هتاكل الجو مني بأه و الا ايه.


.و هوووب..حملة القراءة للجميع فيها يسرا و أبو تريكة..حملة ضد الختان فيها المفتي..حملة الطفل أولا و دائما لتحسين الخدمات الصحية للتلاميذ بعتت جابتلها ناس من انجلترا...و بعدين موضوع شقة هند و عيلتها



يا سلاااام ..شفتوا الست ..دينامو...صحيح هي كوعت شوية الفترة اللي فاتت ..لكن المنافسة بتسخن..و الحاجة أم الإختراع



صحيح يا ماما سوزان ..لا هايدي ولا ديجا...ده الدهن في العتاقي


61 comments:

Anonymous said...

انا من ساعت ما قرأت حكاية الألف جنيه
وانا قاعد انا وخالتك دهقانة نحسب فيهم ، هايتصرفوا ازاي؟

وقعدنا نتخيل ..ان موف طويل عريض يتمطع ويتفرد ويصرف ألف ملطوش لعائلة طالعة من كارثة

يعني بيزودوا الهم عليهم

تحياتي لك

Amr Ahmed said...

سوسة

مش عارف انتي ارشة ملحة ديجا ليه

تكونيش كنتي بتحبي جمال

وهي خطفته

قولي قولي

وبعدين اااااااااااالف جنيه

وجايين علي نفسهم ليه كده

فى القلب said...

يا لهو بعد العياط ألى الناس عيطته ده كله فى البرنامج والتليفونات الى نازله على ودنه بتتحسبن على حصل
والمزيع والمزيعه
هرونا من أول الحلقه
الملف خلاص ماعانا
مش هيتأفل
ألا لما نغيب حق البنيه أطمأنو كل ده
وبتأولى
ألفففففففففف أيه
الفففففففففففففففففففففففففففف
عفريت وحدايه ينططوهم
حسبى الله ونعم الوكيل

مصر هى أمى said...

يا بنتى كل الكلام ده اونطة
حملة ايه وقراءة ايه ولا حتى اطفلة الام هند انتى تفتكرى ان الشعب ده فارق اصلا معاهم كل الكلام ده دعاية وخلاص علشان المنظمات العالمية تتكلم وتشكر وتعيد وتزيد فى الانجازات العظيمة اللى محدش عارفها

طب قبل ما الشعب يمسك كتاب ويقرا يوفروله ميه الاول يشربها ولا هما مسمعوش عن ثورة الجراكن الموجودة فى كل محافظات مصر

فارس عبدالفتاح said...

ما تفعلة سوزان وما يفعله جمال وما يفعله حسني مبارك وما يفعله الحزب الوطنى بسياساته الاعلامية على الاطلاق هو بختصار بسيط وصريخ

الديماغوجية فى حد ذاتها

ذو النون المصري said...

الله يخرب عقلك يا شيخه
هههههههههههه
كوعت و الدهن في العتاقي!!!!!!!؟
انت منين ؟؟؟
اوعي تكوني من بولاق و لا باب الشعريه
صحيح اسم علي مسمي
سوسه
...........
ديجه اكيد ناويه تعمل شويه شغل علشان تثبت نفسها كسيده اولي قادمه لمصر و المفروض طبعا انها تحاول تزيح الوليه القديمه من مكانها لكن القديمه استحاله تركن نفسها علي الرف و تسكت علي كده فاكيد المشاكل بينهما جايه جايه
بالنسبه للطفله المسكينه اللي لسه لم تعبر مرحلة الطفوله و صارت ام بالقهر و القوه انا صراحه اتغميت بشده من الخبر لاني قريته من ايام و مش قادر اتصور نمط حياتها القادمه هيكون ازاي
هل ممكن تتجوز في يوم من الايام مثلا و تلاقي من يرعي الطفل ام كتب عليها الشقاء هكذا للابد
شيء مش قادر اتخيله
اما ماما سوزي فاكيد حملاتها مش لخير و لا لغيره
مجرد تجميل صوره لا اكثر
سياسه يعني
سيدة خير و انسانيه و شكلها كانت منمره هي و جوزها علي جايزة نوبل لكن مش اي حد ياخدها
جميل البوست كالعاده
تحياتي

Islamist Bloke said...

عارفة يا سوسة المشكلة فى اية؟

نوعية الكتب بتاعة مهرجان القراءة للجميع

صدقيني اعتى المثقفين فى مصر مش بيقدروا يتصفحوا العناوين فضلا عن المحتوى

الكتب دي موجهة لرجل الشارع البسيط والعادى.........يبقى المفروض يكون فيها كلام مفيد


انما كل اللى فيها من نوعية.......الحرب الامريكية العالمية....نظرة فى تاريخ الامبريالية الامريكية وحاضرها ومستقبلها

وكتاب تانى اشتريته ومعرفتش ارجعه......ألبير كامي وأدب الوجودية

و: عمائم وطرابيش....مصريون عاشوا فى باريس

صدقيني الكتب مش بتتباع وبعدين يروحوا يرجعهوا مخازن تانى عشان مش اتباعت ويقولك المواطن مش مثقف ومش بيقرا مع اننا بننزل له الكتب



اما موضوع الطفلة الام


حسبنا الله ونعم الوكيل


والسلام

دكتور مستكنيص said...

والله انا شايف الست دي مش وحشة علي الاقل بتعمل حاجة ملايين غيرها كتير اوي مسئولين ولا بيعملوا اي حاجة
مطلوب منها فعلا اكتر من كده
بس مش مطلوب منها كل حاجة
للاسف سيدتي احنا في بلد ظروفه تخلينا نفرح لو اي حاجة بسيطة اتعملت
عارفه؟ هقولك مثال
كنت بفكر اعمل تحقيق صحفي عن حتة المرضي اللي مستشفيات الجامعة اللي بنستخدمهم في الكلية كحالات واللادمية اللي بيتلقوها مقابل العلاج المجاني وكده فوانا بقولهم علي الفكرة دي في المجلة لقيت زميلتي بتقوللي يامحمد مش بيتعالجوا في الاخر؟ احمد ربنا نتكلم عن اللي مش لاقيين علاج احسن
وهكذا ابتسمي انتي في مصر

Anonymous said...

أزيك يا سوسه
صحيح هم يضحك وهم يبكى يااااه 1000 جنيه هيعملوا أيه ولا أيه دول يعيشوا بيهم 20 سنه قدام وبعدين ما يجوش فرده شراب ديجا ولا حتى فرده جزمه العتاقى
هنقول أيه غير حسبى الله ونعم الوكيل
أحنا ممكن نديهم مسد كول ياخدوا بالهم من أطفال الشوارع وكل الحاجات دى اصلها حاجات تافهه مش بياخدوا بالهم منها وراهم اهتمامات تانيه
يلا الحمد لله وأصبر على جار السو
تحياتى ليكى
نرمين

friend said...

ازيك ياسوسه

ياجماعه انتوا مستغربين الالف جنيه ليه دي ثوره في زمانا هذا
وياسلام بقي لو يأخدوهم برايز وشلانات شوفوا يطلعوا كام بقي مش بقولكم ثروه وانتوا مش عارفين

شويه شويه هيزودوهم ويدوهم سره من الدنانير
تحياتي
تميم

Anonymous said...

سلام عليكم


شوفتى بقى الناس الوحشه كانت ظلمه ماما ازاى :(
ماما عامه الى عليها وزياده ومحدش مقدر ولا حاسس بمشاغلها

تبقو تكلفو نفسكم يا جماعه ولو اى حاجه ناقصاكم ادوها مسد وهيا تظبطكم على طووووووووووووووووووووول

وموضوع الميه دى متنسوش توصلوهولها وهيا كتر خيرها هتعمل الى تقدر غليه باذن الله


يسلم ايدك يا مفروسه
قصدى يا سوسه

امممممممممممم

لا برده مش ينفع

المهم يسلم ايدك


سلااااااام

Amira said...

ضحكتيني مووت

ايه يا بت الأرشنه اللي انتي فيها دي

طبعا
لازم تغير مش حماه

و البنت زي ما قلتي واكله الجو بقالها وقت

بس حرام
انا واحده من اللي استفادوا من مشروع القراءه للجميع لسوزان مبارك
و بعتبره حاجه كويسه هي عملتها

بس لما رجعت تاني السنه دي تروج له بعد ما كان نام خالص
فكرت زيك كده
انها عاوزه تبان تاني على الساحه
و انها غارت من زوجة ابنها

بس يا سوسه بوست تحفه رجعتينا لخفة دمك المعهوده
و بوستاتك الممتعه
تحياتي

هوندا said...

اصل طالما المشكله موجود منها كتير وبقيت عااااادى زى اطفال الشوارع وبقيت جزء م المجتمع اتصرف عنها النظر انما لما تبقا حاجة جديدة بقا وحاله فردية وقضية راى عام زى مابيقولو يبقا لابد من المساندة عشان يدارو عليها بدرى بدرى والناس تقول ده الست عملت كذا وكذا

hosnysoliman said...

العزيزه سوسا
كما وعدتك بازياره..ومؤكد انها ليست المرة الاولى واظن انها لن تكون الاخيرة..وللعلم انا ازور كثير من المدونات ولا اعلق اعليها وذلك لانها فى الحقيقة عبارة عن تاكيد لحالة الاحباط والغم الذى يعيش فيه الشعب المصرى اليوم..ليس هناك مكان يمكن ان نجد فيه بعض من الامل او الفرح والبهجة..كله غم فى غم..لهذا ارى ان التعبير عما يحدث سواء الايجاب او السلب ما هو الا نوع من انواع تفريغ شحنات خاصة بكل مدون..وقدر الاستفاده من الامر نادر..الا انه اليوم قد ازددت معلومه كنت متحير ممن يكون ديجا هذا لان ما اعرفه بهذا الاسم هو الفنان الفرنسى العالمى عاشق رسم الباليه اديجار ديجا
لهذا سالت نفسى فى البدايه ما العلاقة بين سوزان مبارك وديجا ولكنى فهمت اخيرا بعد ان قرات التعليقات..اشكر لك الزياره مرة اخرى

Dr. Tantawy said...

ماما سوزان بتسلم عليكى و بتقولك خدى بالك من نفسك هههههه
و اقد اعذر من ننزر

Anonymous said...

أحبك ياسوسة
لما تكوني مفروسة
م القرع والكوسة
ف مصر المحروسة

أطيب الأمنيات
من واحد بيعدي ساعات

koukawy said...

هي فعلا الست دي ليها شوية حاجات كده
كويسه ياللا مين عارف قدام في ايه

kaed said...

ياة
ألف جنية بحالهم
بزمتك مش كتير
إية الكرم دة
أنا عايز أعيط

الأميره أوسه said...

نداء عاجل
الى ماما سوزان الحبيبه
أنا مضطره أتنازل وأطلب منك المساعده مع أنى أميره
ومشكلتى هى أن الراجل الى أسمه عم كفته اللى فاتح سايبر جنب البيت عندنا قرر يجيب ضلفها يعنى يعزل وبالتالى سحب من عندى خط الدى أس أل أبو عشرين جنيه وبكده أتقطعت صلتى بعالم المدونين من ساعتها
ومش عارفه أتكلم مع سوسه المفروسه بنت عمى و لا قادره أعمل شات مع الأصدقاء
المهم عشان ماطولش عليكى وتنامى منى
ياريت لو تعملى حملة جديده
على مستوى مصر
تحت شعار أوسه والشات
وياريت لو تكملى جميلك وتشتريلى عربيه صغيره أروح بيها الشغل
وصدقينى كل ده فى مصلحتك ومصلحة الشعب
بليز ماتتأخريش
خاصة أن مشكلة النت لاتقل اهميه عن مشكلة قلعة الكبش
أو مهرجان الشيشه للجميع
باى بقا
لو عوزتينى بقعد فى نادى اللوترى بتاع العمرانيه الغربيه من الساعه خمسه للساعه تسعه
وسلامى بقا للجميع
خاصة عمو زكريا عزمى وأونكل نظيف رئيس وزارة العتبه والحى السادس
===========================
سوســـــــــــــــه
وحشتينى وأسفه أنى بستغل المدونه بتاعتك
أخبارك أيه
بحبك بشده

خيرالدين said...

على فكره هى عملت اللى عليها فى البرلس
أول ما عرفوها انها منطقه فى دوله جنبنا كده بسرعه بعتوا مساعدات من المياه المعدنيه مع عساكر الامن المركزى علشان اللى يرفض ياخد الميه يسقوها له بالقوه

خايفين علينا من العطش
انا حاسس اننا ظالمينهم

صاحب البوابــة said...

طبعا شكر وعرفان

اليس نحن عبيداً عندهم

:(

------------

ارجو ان تنضمى الينا في حملة ( افضحوا تجار الكيف )

التفاصيل في مدونتي

سأنتظرك

Sally said...

طب ياسوسو مقلتناش هيدبروا المبلغ ازاي وله هيجيبوا منديل قماش ويحاولوا يلموا المبلغ من ذوي القلوب الرحيمه للي عايزين يساهموا معاهم في التبرعات

حصان بري said...

ياستي ماما سوزي دي سكره
وماتنسيش انها انجليزيه اصلا ..... والغريب اعمي ولو كان بصير

ثم انتي عارفه الالف جنيه دي جابتهم ازاي؟
استغفر الله العظيم في الناس
صحيح خير تعمل شر تلقي

يلا هي وجوزها وولادها في ثوره واحده وعلي سيريلانكا , وهبقي اديلها الف جنييه معاها تبدا حياه جديده

علي فكره المدونه بتاعتك تحفه وقريت اكتر من موضوع فيها

تحياتي يا سوسه:) يا مفروسه

Mohamed Hesham Safa said...

والله منا عارف اللي الحاجات الكتير اللي اتعملت في الاخر من (ماما) سوزان هي محاولة للظهور تاني ولا غيرة من ديجة اللي هتاكل الجوعلى رأيك ...

يس عارفة ... المنافسة دي أولا وأخيرا هتبقى في صالح المستهلك ... الل هو احنا ...

والسـ ختام ــلام

رجل من غمار الموالى said...

كلام جميل
حبيت بس اسجل اعجابى
سلام

Ma 3lina said...

هييييييييييييييه

الف جنيه و جاية على نفسها ليه اكده
دول ميجبوس سمنة و كام كلو لحمة هيا الست دى متعرفش ان الحاجات غليت

و بعدين جيجى مش هتساهم بحاجة كدا

يالا ما عليناا

م said...

طيب يعنى الالف جنيه دول منين
تحت اى بند يعنى يا ولاد الحلال
وباى صفه اصلا الست بتصرف فلوس للناس

الطائر الحزين said...

هند ايه بس انتى مش واخدة بالك ان كله بيمثل على كله لازم كل فترة كدة حاجة تلهب الاعلام ويتكلم فيها ليل نهار وانس الماية والزبالة والكهرباء وسلم لى على الصرف اصحى والبنية التحتية
على فكرة حصيلة الضرائب على المبيعات 97 مليار يطلعوا كم 1000 جنية دول

تحياتى

Unknown said...

السلام عليكم
معذوره ماما سوزان مش فاضيه تنزل تشوف المشاكل دي الله يكون في عونها ويخليلها الحاج مبارك قصدي بابا مبارك
بس الموضوع ده بجد تحفه

soosa el-mafroosa said...

طهقان

و هي الأل جنيه دي شوية؟

دول يجيبوا يجي ألف سندوتش فول

احنا هننهب والا ايه؟

تحياتي لخالتي طهقانة

soosa el-mafroosa said...

amr ahmed

مش عارفة يا اخي مش نازلالي من زور البينة دي

من اول ماسمعت انها ماكنتش تعرف ان فيه حاجة اسمها ربع جنيه مخروم

soosa el-mafroosa said...

في القلب

هي الناس هتقطع نفسها يعني

انتوا عارفين فيه كام حالة انسانية زي حالة هند دي؟

هيجيبولكوا فلوس منين يعني؟

soosa el-mafroosa said...

مصر هي امي

الكتب أهم

انت مش عارف انهم في كل حتة بيقولوا القراءة غذاء العقل

هنا في مصر خليناها غذاء و شراب العقل

يعني وفرنالكوا الكتب اهه ماحدش باه يسألنا لا على أكل و لا على ماية

soosa el-mafroosa said...

فارس عبد الفتاح

أكيد
!!!!!!!!!
ولو اني مش فاهمه قوي موضوع الديماغوجية دي

soosa el-mafroosa said...

ذو النون المصري

ايه ده ؟
هي الدقن في العتاقي دي
made in bolaa'?

ولا كنت اعرف

جايزة نوبل بعينهم

هما فاكرينها سايبة والا ايه

soosa el-mafroosa said...

islamist bloke

فعلا هي اول ماكتب القراءة للجميع طلعت اول سنتين كانت متميزة و انا جبت منها كتب كتير مفيدة
خصوصا روايات الكتاب الكبار

لكن بعد كده بتوع الجرايد بأوا يبيعوها لبتوع اللب من كتر ما هما بيطبعوا كتب لا يمكن تدخل جوا اهتمامات الشباب العادي

soosa el-mafroosa said...

دكتور مستكنيص

صحيح مبدأ مش كفاية عليهم انهم بيتعالجوا ده ماشي في كل مستشفيات البلد

وانا شخصيا باسمع الكلمتين دول كل يوم

بس من ناحية ماما سوزي...لا مش كفاية اللي بتعملوا

في التلاتين سنة اللي فاتت لو كانت نزلت من برجها العاجي و عملت اي مشروع عليه القيمة

يمكن كان يبقالها قيمة عندنا دلوقتي

soosa el-mafroosa said...

nermeen

تصدقي أضفتيلي معلومة جديدة

اول مرة اعرف ان ديجا بتلبس شرابات

بس هي ماما سوزي فعلا مستنية الميسد كول

بس يا رب ماتكونش موبينيل

عشان شبكتهم زي الزفت

soosa el-mafroosa said...

جزر

فعلا تصدق لو ادوهم المبلغ برايز و شلينات يبقى أفيدلهم

أهو ينفعهم في أجرة المكروباصات

يركبوا بيهم يجي بتاع 3 ايام

كتر خيرهم برضه

soosa el-mafroosa said...

smsma89

شفتوا باه الظلم

اهو انتوا اللي مقصرين في الميسدات

لو بس تشحنوا و تقدروا ترنيولها

ماكانش ده باه حالنا

soosa el-mafroosa said...

farida

أيوة شفتي يا فري

ماحدش ياخد باله من حركات الستات دي الا احنا

مشروع القراءة للجميع في الول كان متميز

لكن بعد شوية

خلاااااص

و مش عارفة ايه اللي رجع فكرها بيه السنة دي

يحي العظام و هي رميم

بس اذا عرف السبب بطل العجب

soosa el-mafroosa said...

honda

هي الست يظهر قاعدة قدام برنامج تسعين دقيقة

يعني هي و معتز تحس انهم دمهم من دم بعض

كل اما معتز يقول حاجة تجري جري على دفتر الشيكات

الف هنا ..500 جنيه هنا

و اهي الست بتحاول تعمل اللي تقدر علية من خلال اللي بتخنصره من مصروف البيت

هو صحيح مصروف البيت بتاعها كام مليون؟

soosa el-mafroosa said...

hosnysoliman

من دواعي سروري اني أزود معلومات حضرتك

خاصة ان معرفة ديجا دي من اهم ادوات العبور للمستقبل

أسعدني جدا حضورك للمدونةاللي هي زي مابتقول مجرد وسيلة من وسائل الفضفضة

مش مضمون انها هتكون وسيلة من وسائل التغيير

لكن اهو احسن مانطق

أشكر ليك زيارتك و أشكرك أيضا على محتوى مدونتك
فهي اكثر من رائعة

soosa el-mafroosa said...

dr.tantawy

ماما سوزان و الله دي عزيزة عليا جدا

لما تشوفها ابأه قولها فين فلوس الجمعية ..هي نست الدور والا ايه؟

soosa el-mafroosa said...

anonymous
أهلا بيك و بكل الناس اللي بتعدي ساعات

و طالما بتحبني وانا مفروسة

تبقى بتحبني على طول

تحياتي

soosa el-mafroosa said...

koukawy

اهو على رأي المجتمع الإنتخابي المصري

الي نعرفه احسن من اللي مانعرفوش

ربنا يستر من السنيورة اللي جاية

soosa el-mafroosa said...

kaed

عيط عيط

و كلنا هنعيط


العياط في الحلم فرج

soosa el-mafroosa said...

الأميرة اوسة

ألف الف ألف ألف ألف

حمدالله على السلامة
انتي فين يا بنتي

طب و الله التدوين كان ناقص كتير من غيرك

عود احمد


عموما اعمليلي بانر حلو كده عن هم كفتة بتناع السايبر و انا اعمللك عليه حملة فشر حملة لا و النبي يا عبده اللي عند وائل عباس

و هنسميها

لاو النبي يا كفته

تحياتي

soosa el-mafroosa said...

e7na

ياجماعة انتوا مش فاهمين أصل الحكاية

كل الموضوع انها ماضية عقد دعاية مع احدى شركات المياه الغازية

و هيوصلوا قريب لكل القرى بدل الماية بيبسي

يعني الست عايزه تدلعكم أهه

بس مين يفهم و يقدر

soosa el-mafroosa said...

صاحب البوابة

حملة قيمة للغاية

مش غريبة منك

احييك عليها

ربنا يوفقك ان شاء الله

soosa el-mafroosa said...

بالله المستعان

ده ده مصروف الحفيد

الواد عشان قلبه رحيم زي جدته

قرر انه يتبرع بيه للبنت دي

مش باقولكوا عيله كلها خير في خير

soosa el-mafroosa said...

حصان بري

أهلا بيك في المدونة

تنورها دايما ان شاء الله

سوزي انجليزية أصلا لكن مصرية قلبا

و ده بيبان دايما من حنيتها مع المصريين

لدرجة اني مستغرة لغاية دلوقتي ليه ماحدش اداها لقب
أم المصرين

مع انها امنا كلنا

امنا الغولة

soosa el-mafroosa said...

mohamed hesham

فعلا المنافسة في صالحنا يا فندم

يعني بكره خديجة تبقى التبرعات بتاعها بلدولار

و هنبتدي المكايدة بأه

soosa el-mafroosa said...

رجل من غمار الموالي

شكرا

و اهلا بيك دايما

soosa el-mafroosa said...

ma-3alina

ديجا ماتساهمش في الحاجات البيئة دي

هي هتستنى لما تيجي حادثة شيك بتاعت ناس هاي

و ساعتها تبقى تحللهم أزمتهم و تديهم تبرع يصيفوا في مارينا

بعد ماكانت ظروفهم ياي مش هتوديهم غير الغردقة

soosa el-mafroosa said...

محمد الهنداوي

الألف جنيه دول متخنصرين من مصروف البيت

يعني من جيب بابا حسني رأسا

soosa el-mafroosa said...

الطائر الحزين

نظرية عصا موسى شغالة على طول في مصر

و طلع اي موضوع و لغوش لغوش على المفيد

97 مليار ايه؟

ماتبالغش يا مواطن

دول هما 32جنيه و نص

soosa el-mafroosa said...

الأميرة ميرامار

شكرا ليكي يا ميرامار

الست برضه مشغوله مع عمك الحاج

مش كل يوم تنقعله رجليه في ماية و ملح بعد مابيقضي ايوم لف على كعوب رجليه عشان خاطركم

و هي كعوب رجليه دي مسؤوليه سهلة

كان الله في العون

فارس عبدالفتاح said...

الديماغوجية


كلمة يونانية في الأصل تعني العمل الشعبي أو العمل من أجل الشعب. ولكن هي اليوم تأخذ معنى تجريحي، إذ تدل على مجموعة الأساليب والخطابات والمناورات والحيَل السياسية التي يلجأ إليها السياسيون لإغراء الشعب أو الجماهير بوعود كاذبة أو خدَاعة. وذلك ظاهريا من أجل مصلحة الشعب، وعمليا من أجل الوصول الى الحكم.

لذا فإن الديماغوجية : هي موقف شخص أو جماعة يقوم على إطراء وتملق الطموحات والعواطف الشعبية بهدف الوصول الى تأييد الرأي العام ..

kafrawy said...

و تستمر الحملات

بين ابتسامة

وااااااة

Phoenix said...

الا صحيح ياسوسه ايه الكلام الغريب ده

انا بقا مش هقول 1000جنيه ايه

ولا حتى المنافسه بينها وبين السيده الجديده

اللى مش عارفه هيتقال عليها ايه

ماما ديجاولا اختنا الكبيرة ديجا
الا صحيح هيبقا اسمها ايه

سيبك بقا من الكلام اللى فوق ده وتعالى هنا اقوليلى

انتى فعلا مقتنعه ان مستشارين سوزان

هما اللى بيفكره وهى لا تفقه شئ ومش تعرف هى عايشه فين

ولا تعرف المشاكل اللى فى مصر

طيب ازاى