Friday, August 24, 2007

الشعب الزملكاوي الشقيق

zamalek2



ولما الزمالكاوية ثاروا و صرخوا و قالوا...كفاية...يا حازم...كفاية...يا حازم...قعدوا الناس في الدول المجاورة للدولة الزمالكاوية يفكروا...هو حازم ده عمل ايه؟...يكونش بقالوا 26 سنة مش عايز يسيب مكانه...يكونش مجهز ابنه عشان يلعب في الفرقة بعده رغم انف الجميع...يكونش مجوعهم...يكونش معطشهم..يكونش بيلم اللي بيهتفوا ضده في الماتشات و يحبسهم في غرف الملابس تحت المدرجات....يكونش واخد العيلة و قاعد في شرم و سايب الفرقة باللي فيها ياكلوا في بعض...يكونش معين فريق مدربين احتلوا المركز ال26 كأفشل فريق مدربين على مستوى العالم..يكونش بيخللي بتوع الأمن يعذبوا المشجعين...يكونش سايب الجهل و المرض سارح في أجسام و عقول المشاهدين...يكونش متحيز لرواد الدرجة الأولى و هو و ابنه واصحاب ابنه نفسهم الدرجة التالتة تولع باللي فيها..يكونش مابيدورش على اللي بيتهرسوا و بيتحرقوا و بيغرقوا و بيتاكلوا و يوم ماياخد باله منهم يدي أهلهم ملاليم؟



غريب أوي حازم ده...أكيد عمل كل ده ..لكن ايه اللي كان مصبرهم عليه ..ماهو واحد بيعمل العمايل السودة دي كلها كان لازم الناس تثور عليه من زمان...لكن الصراحة الراجل طلع في قمة الأدب..خد بعضه و روح وقال خلاص مش عايزينني أقعد في بيتنا


بس يا ترى بقية الشعوب المجاورة للشعب الزملكاوي الشقيق إمتى هتقول كفاية؟؟



و ياترى اللي هيسمع بودنه كلمة كفاية...أو مايسمعش و يسأل المدام..ايه؟..بيقولوا ايه؟..هينسحب برضه في أدب و في هدوء



أشك



يوم ماسمعت الهتافات في ماتش الزمالك شفت بعين الخيال أبو جمال داخل ماتش من المتشات و الجمهور كله عن بكرة أبيه بيهتف...كفاااية..يا حسني..و هو يبصلهم شوية في هدوء و بعدها يعمل بايديه حركة فلفل شطة الشهيرة و مش بعيد يطلعلهم لسانه



قاعد على قلبكم يا ولاد الفراعنة...انتوا فاكرينني حازم والا ايه؟؟


..

52 comments:

عصفور المدينة said...

لطيفة جدا رغم إني ماليش في الكورة
بس قريتها قلت أما أشوف حازم المفتري ده
بس عادي وبتحصل

يا مراكبي said...

من ساعة ما نشرتي حتى لا تذهب وراء الشمس ما كنتش متوقع إني ألاقي بوستس جديدة .. لكن الحمد لله شكلك كده لسه في السليم

آخر 3 بوستس عجبوني جدا

أما البوست الجميل ده واللي بيفكرني بإن قصر القبة ما لوش بلكونات .. فأحب أقولك إن حازم اللي تقصديه بعون الله قادر على العطاء لأجيال كتيرة قادمة وما لوش بديل كمان

فارس عبدالفتاح said...

والله أنا مش عارف بتتكلمي على أيه بالضبط عن حازم إمام والكوره المصرية أم عن حسني مبارك والأسلوب المتبع في إدارة الدولة بصفة عامة .

وأول مرة فعلا أجد في موضوعاتك نوع من التكلف .

فإذا كان الموضوع عن الكرة فانا لا اعرف شيء عنها لا من قريب ولا من بعيد وأؤمن بأن كل من يشجعون الكوره في مصر هم ضحايا هذا النظام وأنهم فعلا يستهلون أن يكونوا هكذا ..

تعلمين إني مقيم في حد الدول العربية وإذا أذيع متش كوره في التلفيزيون تجدين المصريين في المقاهي وفى الشقق متجمعين بطريق مقرفة وإذا نظرت إليهم انظر إليهم باحتقار واشمئزاز ..

وأقول لنفسي أي مواطن كويتي يستطيع أن يضرب اتخن شنب من مصر ولا يستطيع مصري أن يدافع عنه لأنه ببساطة إذا فعل فان المصريون والسفارة المصرية لان تسأل عنه وإذا سأل وهذا مستحيل سوف تمنع من رؤية مواطنيها إذا كان دخل احد المخافر ( قسم الشرطة) ..

من حوالي شهر اتهم شاب مصري من الأقصر بأنه اعتدي على أطفال واخذوا يطلقون التهم ويستدلون على تهمهم بأنهم راقبوه بالقمر الصناعي وأقمار التجسس .. كلام يخل الإنسان يضحك ويستحقر العرب وبالأخص الكويتيون


والله هذا الكلام حصل وأعلنت عنه الجرائد القومية الكويتية .

ومرة ثانية تعذيب شباب مصريين في احد المخافر بتهمة التزوير وهذا ما لا يستطيع احد داخل الكويت أن يفعله لأسباب أنا علمها جيداً .

وبعد هذا تجد المصريين يشاهدون الكورة وأحيانا تجدهم تدب بينهم الخلافات بسبب الكورة ..

وبعد ذلك تعلن وزارة الداخلية الكويتية أنها لا تسمح للسفارة المصرية برؤية مواطنيها ..

مع انه لا يوجد قانون دولي يمنع دولة أن تري مواطنيها المحجوزين في أي دول في العالم ..

وإذا نظرت إلى المتشات التي تذاع في التلفزيون تجد الشباب والنساء والبنات والرجال في الإستاد بآلاف ..

ويدفعون أموال لدخول هذه المباريات وقد تصل إلى آلاف الجنيهات المصرية أحياناً ،، وتري التصفيق والتهليل والرقص والدلع من البنات ..

وبالأخص إذا علمت أن التلفزيون يصورها وبعد كده يقولون أن مصر مفلسه وتعاني من الكساد وأنها في حالة اقتصادية وسياسية خانقة ..

فأين هذا الكلام إذا شاهدة احد المباريات ..

يعني حاجة تخلى البني ادم المصري الذي يعاني فعلا يحتقر هذا الشعب ويحتقر حتى من ينادي بالإصلاح السياسي وبعد ذلك تجد الشعب يرقص في الإستاد ..


أما عن الأخ الطيار وابنه ..

من حقهم أن يفعلوا هذا وأكثر طالما الشعب المصري المغفل يفعل هذا في متشات الكوره وغيرها ....

Anonymous said...

مصرى متغرب

يخرب عقلك انا اعتقد الحاج ما شافش البوست ده لانه لو كان شافه كان اقل حاجة كسر الكمبيوتر وفجر المدونه وكنت انا بعتلك ورد على القصر العينى

عموما يا سوسه هانم الموضوع ان الناس الى شايفه كل الحاجات دى ما قالتش كفاية ل أبو جمال لان احنا رجالة ووقفنا وقفة رجالة زى عم محمد ما قال
لكن قالو كفاية لحازم لانه ضيع كورة
تخيلى كل اهتمامنا دلوقتى فى الاتى
الدورى انهارده مين هايكسب وهالة سرحان راجعه روتانا ولا لا وفيلم هنيدى عمل كام وهو اكتر ولا محمد سعد وحسنى عبد ربه هايلعب فين هو ده المهم
مش تقولى شعب بيتحرق فى القطارات وبيغرق فى العبارات ويموت على الطرقات ويتسمم فى المستشفيات .
خدعوك فقالو الشرطة فى خدمة الشعب
الحقيقة الشرطة لتعذيب الشعب


أقولك فزورة

مرة بلد عندهم نيل مش لاقيين مياه يشربو ولا يستحمو وبلد عندهم صحرا بيزرعو قمح ويبيعوه للبلد الاولى ويكتبو على الشيكارة من بلد الصحراء الى بلد النيل

اذا عرفت اسماء البلدين اتصل على 0900900900900900
يا بلد

اقولك نكته كمان وزير مسئول فى الدولة الى فى الفزروة بيقول ان المشكله بسيطة وهاتتحل فى غضون ال25 سنه الجاية ومش عايز الناس تقلق
ههههههههههههههههههههههههههههههههههه

عمرو غريب said...

حازم اما نجم كبير في قلوب الجماهير الزمالكاوية و الذي حدث من هتافات جماهير ضدة هذة الهتافات تعتبر من قلة ولا تعبر علي الاطلاق عن الجماهير الزمالكاوية اما بخصوص ما حققة النجم حازم امام فأنا اتفق معاكي انة لم يحقق القدر الكبير من البطولاط علشان تعشقة الجماهير الزمالكاوية كل هذا العشق ولكنة لة كارزمة خاصة في قلوب الجاهير الزمالكاوية وهذة الكارزمة هي السبب في كل هذا العشق لان حازم امام من عائلة زماكاوية ابأ عن جدا حيث والدة كان لاعب و جدة ايضا

Unknown said...

اكاد اجزم ان الانسة سوسة استطاعت بهذا المقال الكوميدي الاسود ان تفعل ما يعجز عن فعله اباطرة الصحافة المعارضة ومفكري التنوير

وذلك لان الاسقاط جاء على الكورة
وما ادراك ما الكورة والزمالك والاهلي بالنسبة للشعب المصري

عن طريق الكورة بس ممكن تعمل تغيير جذري واصلاح شامل في البلد
شو حكاية الكورة مع المصريين مش عارف؟

المنتخب القومي المصري الان لما يدخل في مباراة ضد اي منتخب اخر الشعب المصري يقف جمبه اكتر ما وقف جمب الجيش المصري لما عبر القنال في 73

ليه المصري ما بينتابو الاحساس الوطني العارم الا في متشات الكورة
وما بيفتكر انو مصر هي ام الدنيا الا في مدرجات الاستاد

مدرجات الاستاد لها تأثير الف مرة من مدرج نقابة الصحفيين مثلا
الي بيتم عليه مظاهرات واعتصامات كتير ضد بطش النظام وتسلطو على الشعب الغلبان

حتى في فيلم ليلة سقوط بغداد استوقفني مشهد
حسن حسني بيقل للبطل انا هسيب عندك شريط فيديو في انجازات مصر من بعد حرب اكتوبر لغاية النهاردة
الانجاز الوحيد كان هدف مجدي عبد الغني في كاس العالم 92

وفي فترة حكم السادات كانت الكورة هي بمثابة الافيون للشعب لما يحب السادات يمرر اي مصيبة على البلد والناس بتشم كورة وده الي قالوالشاعر الفاجومي احمد نجم وغناها الشيخ امام

اعتقد في النهاية انو ما راح يتغير شي
وللعلم احنا في غزة في عندنا متعصبين للاهلي والزمالك زي مصر ويمكن اكتر
بس طبعا مش قد تعصبهم لفتح او لحماس

وياريت الجميع يحذو حذو الاخت المفروسة في الاسقاط
يمكن يتغير شي

islamz said...

بقي حازم برده .. ماشي ..
انا مقتنع ببوست حتى لا تذهب ورا الشمس .. هههههههه
بس تصدقي نفسي في ماتش من الماتشات الجماهير تهتف وتقول الهتاف الجميل الاخرانى ده ;)

تحياتى وكفاية يا مب..ــــازم

هههههه

بوست رووووعة

Unknown said...

معقول الزمالكوية قدروا يقولوا كفاية يا حازم

لو الحكاية كدة

انا هاقول كفاية لحد الصبح

بس حازم يحس على دمة

بوست جامد

break said...

هههههههههههههههه
عسولة اوى اوى
بيعجبنى اسلوبك اوى فى الكلام فى السياسة
بس خلى بالك من نفسك يا بنتى
و احنا بندعو سخسوختى للدخول هنا
لانها من اكتر الناس اللى بتشجع الحكومة
و حسة اننا بنظلمها و بنيجى عليها و نيتنا وحشة
بجد من احلى البلوجات اللى شفتها
ان مكنش احلاهم يعنى
:)

Layla said...

جامد جدا البوست

بتخيل لو الجماهير عملت مع الحج ابو جمال زي ما عملت مع زيموس...ساعتها يبقى كويس قوي لو وقفت على على حركة فلفل شطة وموصلتش لحركة ابراهيم سعيد...الراجل دة ابيح وممكن يعمل اي حاجة
:D

shorouk said شروق سعيد said...

شوفي هو أنا عندي تعليقين
التعليق الأولاني على حازم اللي بالي بالك و بيني وبينك ده زي ما أنتي وصفتيه بالظبط إلهي ربنا ينتقم منه و نشوف فيه يوم
أما حازم التاني فمع إني أهلاوية طحن بس مش عايزاة يعتزل

على فرة أسلوب رائع جداً جداً

khobayb said...

هههههههه
تدوينة عشرة على عشرة
بجد
عشرة على عشرة

ما هما الجماهير مش عارفين يتشطروا على حازم ، فبيتشطروا على حازم !!

حسن ارابيسك said...

احنا فينا من تطليع اللسان
بقولك تعمليش فيا ثواب وتدليني على بلد المحبوب
في بلد المحبوب محدش بيطلع لسانه لحد
محدش بيقعد على قلب حد

Gemyhood said...

لا تسالوا عن اشياء ان تبدى لكم ..هاتعملكم حاجات وحشة

لا تجادلى و لا تناقشى

هيه كدة

أحمد المصري said...

يااااه كنت لسة حكتب مقال عن الكورة بس مش بالمعنى ده..انتي أحسن طبعا00

حياة الأحلام said...

أزيك يا مفروسه ولو أنى ماليش فى الكوره وشايفه أنهم 22 واحد بيجروا ورا كوره ما يجبوا كوره تانيه هههههههه
بس عموما يارب نقوووووووووول كفايه حرام حرام بس مش كلهم زى حازم فى ناس بتقعد على قلب الواحد لما بيموت من الخنقه
ربنا يفكها من عنده
بوست شديد وأجمل ما فيه التوريه

He and She said...

Bossi. Ana 3andi fekrah. Ana 3aref ennek fe3lan soosa wa fe3lan mafroosa wa makboota. You just edit the post and I will publish it for you from NY. 7ad 3ando 7aga 3andena? 7ad ye2dar yemesena?
By the way. In Tunisia the regime is more rigid than us. At least we can talk. There they can not even talk, so there is a group of mafroseen zayyek. Every one edits a post, emails it to a friend in France and from France that friend publish all the posts. They can read there posts but unfortunately they have no access to the feed back comments. They are so organized and united in an amazing way. I am sure those guys well do something to their Country one day. I shared a personal email with two of them who explained to me why nobody responded to my comments. Though the blog looks like it belong to one person but it is a window for many writters. Great Idea.I dont know how they found one another and how they got united like that.
Here are some links if you want to have idea
http://attounissia.blogspot.com/
http://imedhabib.blogspot.com/

kafrawy said...

طب

و اللة

مانا ماشى

عاقد ع قلبكم

هة بقة

ورينى هاتعملى اية

الملاح التائه said...

أول حاجه بابص عليها في المدونة
البروفايل بتاع صاحب المدونة
الكتب المفضلة
ونائب عزرائيل
وفارس الرومانسية يوسف السباعي
أول رواية شدتني لإلتهام كل الروايات التى تصل اليها يدي
مثقفة رومانسية حالمة
فاتن حمامة
ملاك الشاشه
رقيقه
مزيكا
وفيروز
والأرستقراطية الغنائية
زوق راقي
من البروفايل باقرر رأي مبداى عن صاحب المدونة
شخصية سوسة المفروسة بكل تأكيد جميلة
......
حازم بقى مشكلتة فى قدرية
وعلى رأي اللى انا مش فاكر اسمة
فتش عن المرأة
دمتى مفروسة

مهبول ومهبوله said...

متخفيش يامفروسه في امل لسه في جماهير الاهلي وعندك الاسماعيلي جاي في الطريق وكمان الدوري صخن اوي
وحاسس بتغير لاعيبه في ملعب الوزاره مع الاحتفاظ بالمدير الفني الاجنبي ماما امريكا

مع تحيات
مهبول

EGYPT EYES said...

اسمحيلي أسجل أعتراضي الأول باسم الزملكاويه على المقارنه بين الفنان والرجل التاني
ياسلام على جرأة الزملكويه بيقولو لحبيبهم بنحبك كفايه كده
الواحد كان بيتمنى أن مصر كلها تكون زملكاويه لأسباب واطنيه بحته طبعا D:

انكسارات .. احمد البوهى said...

احييكى على ذكاءك ..حقيق تناولتى موضوعك بطريقة جميلة وذكية للغاية
.....
الاسقاط على موضوع يشغل الراى فكرة جميلة ربما اغفلها البعض
....
تحياتى

soosa el-mafroosa said...

عصفور المدينة

آه شفتوا حازم مفتري ازاي

مش عارفة بتوع الزمالك دول كانوا صابرين عليه ده كله ليه؟

soosa el-mafroosa said...

يا مراكبي

ماتخافش عليا

عمر الشقي بقي

ليه بتفكرتي ان قصر القبة مالوش بلكونات أنا كنت بحاول انسي نفسي الحقيقة المرة دي

soosa el-mafroosa said...

فارس عبد الفتاح

كرة القدم أفيون الشعوب العربية و ليست المصرية فقط

بس متهيألي انت مافهمتش بالظبط انا أنا مقصدي ايه من البوست

تحياتي

soosa el-mafroosa said...

مصري متغرب

تصدق الحاج شكله مالمسش معاه البوست لأنه أهلاوي صميم

تلاقيه لقى اسم حازم في الول و الشعب الزملكاوي عنوان قال أما استنى لما تكتب عن أبو تريكة
:)

احنا فعلا رجالة ووقفنا وقفة رجالة..خصوصا في طوابير العيش

على فكرة أنا حليت الفزورة و الرقم مابيجمعش

بس النكتة حلوة مووووووت
و ياما هنضحك على نكت من دي

و أدي احنا قاعدين

soosa el-mafroosa said...

عمرو غريب

و بهذا يتضح يا عمرو انك فرد من أفراد الشعب الزمالكاوي الشقيق

هنيئا للزمالك بكم

soosa el-mafroosa said...

المنفي

اخجلتم تواضعنا

اللقطة من فيلم ليلة سقوط بغداد وقعاتي من الضحك أول ماشفتها

هي دي انجزات المصريين بعد أكتوبر

من 73 للآن نحن شعب بلا انجازات

و القيادة لعبت ورقة الكورة زي الكتاب مابيقول
الناس دي تاخد امتياز في مادة تفريغ عقول الشعب المصري

حقيقي نجحوا 100%..منهم لله

تحياتي للجميع في غزة

soosa el-mafroosa said...

islamz

خليك انت في السيف سايد يا إسلام مش عايزين نخسرك

سيبلي أنا بأه الأوفسايد

أنا ادها و أدود

:)أوعى تصدق-دانا غلباااان

وادينا مستنيين الهتاف الأخراني

يمكن

soosa el-mafroosa said...

مش فاهم حاجة

لقد فعلها الزمالكاوية حقا

يا رب بقية فرق الدوري تحس
:)
تحياتي

soosa el-mafroosa said...

break

و الله الكلام في السياسة ده بيطلع فقط من فرستي

ماكانش ليا فيها زمان

بس خلاص مش قادرة بأه
:)
تحياتي

soosa el-mafroosa said...

marvel-واحد زهقان

تفتكر الموضوع يوصل لحركة ابراهيم سعيد

ممكن لو التلفزيون مش بيصور

حازم ده تطلع منه أي حاجة..ماستبعدش

soosa el-mafroosa said...

انسانة من مصر

بين حازم و حازم تفرق كتير

ربنا يدي كل واحد على أد نيته


تحياتي

soosa el-mafroosa said...

خبيب

و هيفضلوا كده متشطرين على حازم الغلبان

و يسيبوا اتاني طايح فينا

قدرنا هنعمل ايه؟

تحياتي

soosa el-mafroosa said...

حسن أرابيسك

وانا لو اعرف مكان بلد المحبوب ايه اللي يقعدني أتفرس هنا؟؟

كان زماني سبقتك عليها

لو عرفتلها عنوان ياريت تقوللي عليه

soosa el-mafroosa said...

mr.gemyhoood

منور المدونة

هحاول أبطل أسأل

فعلا الواحد بيستفيد ايه يعني غير زيادة الفرسة؟؟

تحياتي

soosa el-mafroosa said...

احمد المصري

العقول العظيمة دائما تتلاقى في الأفكار

ايه ده مين فتح التلفزيون؟
:))

تحياتي

soosa el-mafroosa said...

حياة الأحلام

و ياريتنا نفسنا نعمل حاجة

داحنا نفسنا بس حد ينطق

و يقول كفاية

صعبة دي؟

تحياتي

soosa el-mafroosa said...

he&she

دخلت على لينك من اللي انت حاطتهم

فعلا مجهود يشكروا عليه

ربنا يهدي الي عندنا بس و مايغنوش على نفس اللحن

احنا لسه لغاية دلوقتي بكتب اللي احنا عايزينه

الله اعلم بكره هيحصل ايه؟

soosa el-mafroosa said...

kafrawy

هنعمل ايه يعني

هندعيلك

ربنا يدليك على اد نيتك

دي كفاية قوي
:))

soosa el-mafroosa said...

الملاح التائه

سعيدة اني أقابل حد بيحب نائب عزرائيل

كتير بيلوموني على حبها

أما فيروز فالمحبين كثر..فمن لا يسطتيع حب فيروز ..لابد و ان يكون فاقدا جزءا من قلبه

حازم مشكلته في قدرية

و حازم التاني مشكلته قدرية...ربنا وحده القادر على حلها

ادام الله الفرسة علينا جميعا

soosa el-mafroosa said...

مهبول و مهبوله

تفتكر الأهلي و الإسماعيلي مش هيخزلونا

الأمل في ربنا كبير

soosa el-mafroosa said...

egypt eyes

معلش بأه


حكم الزمن اننا نقارن بين الأول و التاني

مصر كلها تكون زملكاوية

أشك
:p

soosa el-mafroosa said...

inksarat

أخجلتم تواضعنا

ياريت موضوع أبو جمال هو اللي يشغل فعلا بال الشعب المصري

العاشق للكرة و الناسي لبلده

تحياتي

Nouran said...

بقى الثعلب الصغير -حازم امام يعني- عمل كل ده
لا حول ولا قوة الا بالله بس اصلا حازم معندوش ولاد صبيان هو فيه بنات ممكن تلعب ف الفرقة -ديه حته رخامة - بس عندك حق هو مش حازم وع حازم بتاع الكورة انا بجد مش عاريزاه يتعتزل ولا يقعد ف بيتهم
اما حازم التاني فمظنش ر هيعتزل حتى لو كل الشعب قالوله كفاية :(

ذو النون المصري said...

يااااااااااااااااااه
جيت متاخر
لكن ما علينا
كله بسبب اعطال النت
المهم اني انا لا اعتقد ان الزعيم ممكن يترك شعبه لوحده و اعتقادي هذا شامل لكل الزعماء العرب الذين لم تري البشريه مثلهم

غمض عينيك said...

حلوة اوي
منه لله حازم مش عايز يسيب الملعب خالص
اظاهر ان الشعب الزملكاوي لازم ينزل الملعب بكل تقله عشان حازم يمشي
لازم الزمالك يبقى فوق الجميع
احسن خلاص مافضليش غير سمعة وبهتت بردو

تحياتي ليكي
حلو التشبيه ده
بيرفيكت
محمد سمير

خيرالدين said...

بعيدا عن الهزار

ليه الشجاعه خدتنا مع حازم ونسيناها مع كل الفسده اللى موجودين

ليه جالنا قلب نقولها لحازم ونسينا حسنى

لان الكوره فعلا عندنا اهم من حياتنا
بالعكس لان لو الكره مهمه عندنا مكناش بقينا فى اخرالتصنيفات

امال ليه؟؟؟
لاننا مصريين

على فكره انا زملكاوى

فارس عبدالفتاح said...

نأيتي على الراجل يا دكتر

دا انتي باين عليكي سرك باتع الراجل طلعت عليه اشاعات انه كان هيروح فيه ..

الواحد يخاف على نفسه بعد كده

Eric Matt said...


هاهاها بوست شرير خالص يا سوسة

ربنا يستر علينا

بس اسلوبك جميل ما شاء الله

تحياتي لك من ماناساس البلد وفاكرك يا ناسيني

يا مصر اكتب إليكي رسائلي said...

يسرني ان اتقدم بخالص التهاني وأطيب التمنيات
لكم والأسرة الكريمة والأصدقاء
بمناسبة حلول شهر رمضان المبارك ،
أعاده الله علينا وعليكم وعلى مصرنا الحبيبة
بالخير واليمن والبركات
تقبل الله وكل عام وانتم بخير

Anonymous said...

ربنا يعين الشعب الزملكاوي ويثنع الشعب الاهلاوي والاسمعلاوي ويقفم ايدوحده ويقولو كفاااااااااااااااااايه كفااايه في وش اللاعب الرخم ده (كل الاحترام للاعب الكبير المحترم حازم ايمام ولا اوجه له اي اسائه)