سهاني العيد الثاني للمدونة السنة دي و عدى من غير ما آخد بالي
الملاحظة المهمة إن مواضيع السنة التانية أقل بكتير من السنة الأولى
ملاحظة دايما بينبهني ليها الصديق الصدوق "ذو النون المصري"1
يمكن لأني قربت أفقد القدرةعلى الإندهاش
قانون تنظيم البث الفضائي اللي عايزين يحبسونا بيه و يخلونا نقضي أجازاتنا في منتجع طره السياحي
براءة ممدوح إسماعيل على خلفية أغنية يبقى إنت أكيد أكيد في مصر
حوارات (احمد عز) اللي هايدي لكل شاب طن حديد ببلاش من زكاة المال بتاعته ربنا يجعل بيت المحسنين عمار و على رأي المثل " من دقنه و افتل له"
بنزين 80 و العلقة اللي كنت هاكلها أنا و بابايا و أخويا في بنزينة بسببه
أفلام الصيف و خالد يوسف اللي مش هيحرم غير لما ربنا يفتحها في وشه 7 غرز عن قريب قادر يا كريم
أخبار مسلسلات رمضان و تكاليفها و التساؤل عن مغزى المصاريف دي كلها في بلد مش لاقي رغيف عيش مصداقا لقول الشاعر "أقرع و نزهي" و سلملي ع الريادة
حاجات بقيت باستقبلها عاااااااااااااااديييييييييييييييييي
ما اللي يعيش ياما يشوف و اللي يعيش في مصر يتمنى إنه يفقد البصر
حتى متعة الإنسان المصري الأخيرة في القدرة على الإندهش و الشعور بالفرسة قربت تنقرض من عندي
بجد بجد..حاجة تفرس
لكن عموما ..كل سنة و انتوا طيبين
16 comments:
كل سنة وانت طيبة يا سوسة و صحيح انت مش بقيتي بتكتبي كتير و
و اصلا عملتلك تهنئة بعيد ميلاد البلوج ع النشرة:)
كل سنة وانت طيبه يا سوسة مرة تانيه و عقبال كل سنة بس تكتبي كتير بقى بتوحشني مواضيعك والله
كل سنه والبلوج بخير
وعقبال 555555 سنه
ويارب تبقى مفروسه علطول
وسلام
أولاً كل سنة و انتي طيبة
تعرفي، كل ما كانت تحصل حاجة تفرس، اجري على الكمبيوتر اشوف انتي كتبتي ايه على البلوج،
الاقيكي ما كتبتبش
الف يومين تلاتة و ارجع تاني،
بردو ما كتبتيش
تحصل حاجة تاني انأح من الحاجة الأولانية و اجي اشوفك كتبتي عن الأولانية ولا التاني الاقيكي بردو ما كتبتيش..
قلت ولابد البنت فقدت قدرتها على الإنفراس
و اهو طلع كلامي صح
بصي يا سوسة
الانفراس هو الحق الوحيد الذي يكفله لك الداستور المصري حاليا..
و الحق الأخير
و الحق المحتوم
حتى دا عايزة تتنازلي عنه او تفقديه
لا..
عيب
و غلط
انتي لازم تقاتلي عشان ترجعي تكتبي عن فرستك و فرستنا تاني
عشان من الواضح..
ان المفروسين كتروا..
و دواعي الفرسة بقت بالكيلو
و مدعومة كمان
تحياتي يا قمر :)
كل سنه ومدونتك في تالق ياسوسو
وكل سنه وانتي عارفة تنقدي اللي مش عجبك ... اصل حقيقي واللهي انك تشوف الاشياء علي حقيقتهادي نعمة في ناس مبتوصلهاش ... وساعاتببقي واحده من الناس دي
و انتي طيبة يا جميلة و اتمنى لك عام تدويني ناجح
قدرتنا على الفرسة و الطهق تتلاشى
و الصدمة الأولى مع سماع اي قرار او حكم او قانون تكاد تتشابه
اصابنا التبلد بعض الشئ ربما من كثرة الضربات و الصفعات
نحتاج يا عزيزتي لمكان نعامل فيه كبشر حتى تعود الينا ملكاتنا المفقودة
تحياتي العامرة لشخصك الجميل
كل سنه و انتي طيبه و ياريت السنه التالته تكون افضل من السنتين اللي فاتوا
انا عملتلك تهنئه بعيد ميلاد المدونه عندي
و تهنئه حاره لشهروزه لانها خلاص تزوجت امس
.....
عقبال الجميع
ع رايك والله
بدانا نفقد القدره ع الغضب كمان
الظاهر قربنا نبقى مسخ
كل سنة و انت طيبة يا سوسة و ان شاء الله تعاودك قدرتك علي الاندهاش تاني
و ربنا يخلي ليك المدونة و العلاقاتالطيبة اللي عمليتها من التدوين لان فعلا دول اخر الناس اللي عندها عقول في بلدنا بدون محسوبية ولا وصوليه :))
عقبال مليون سنة تدوين
كل سنه وحضرتك طيبه وعقبال مليون سنه
انا قرات المواضيع السابقه وكنت دايمن ما ادخل علشان اشوف الجديد لكن للاسف مكنتش بلاقى حاجه جديده
ياريت تكتبى كتير
وكل سنه وانت طيبه
كل سنو وانت طيبة يا سوسة .. وربنا يدهشك ويفرسك زى منتى عاوزة .. :]
تحياتى
عارفة امتى هتفقدى القدرة على الانفراس بجد ؟
لما كلنا نشرف فى منتجع طره السياحى علشان نتعرف ببعض اكتر
ههههههههههههههه
بس بعد ما نكسر الحجارة زى افلام فريد شوقى
عموما أهى بتخرب واللى بيحاول يلحقه قالب واللى بيقاوم واللى بيناضل واللى واللى
الاهم بقى اللى نايم فى العسل نوم
عموما ربنا يستر
انا كنت فاكره انا بس اللى كده
عامتن (بالنون اهه) ده مش مبرر انك ما تكتبيش
كل سنه وانتي طيبه يا سوسه
وعقبال 10000 سنه تدوين
تحياتى لقلمك المبدع المتألق متمنيا له مزيدا من التميز وكل سنة ومدونتك رائعة كالمعتاد
دخل الشتا
كل سنة وانتى طيبة يا سوسة يا مفروسة
تم اضافة مدونتك فى … مدونة اعجبتنى ” دليل المدونات المفضلة للمدونين والقراء العرب ” بناءا على رغبة احد (المدونين / القراء)
نرجوا ربط مدونتك معنا …..
shofha.blogspot.com
تشرفنا زيارتك ويهمنا رايك فى المدونات المفضلة لك …
بالتوفيق دائما
ادارة المدونة
من الآخر انا فعلا اتفرست وانت فعلا طلعت سوسة بجد!!
ايه ده كله يااستاذة يامستفزة ؟؟
ماتيجى نعمل هدنة فى رمضان
وكل سنة وانت طيبة
ورمضان كريم
مدونتك رائعة
Post a Comment