Saturday, August 12, 2006

القطط العميا









أنا باعترفلكم إني غبية...غبية جدا كمان..و دي أول مرة في حياتي أعترف بكده..و السبب ان بابا سألني انتي بتعملي ايه ع النت كل يوم ؟..فبغبائي المستحكم وريتله المدونة...الصراحة عجبته جدا ..موضوع مرسى مطروح و موضوعات شعبولا و الأفلام السخنة ..لدرجة انه نقل إسم المدونة ووزعه على كل أصحابه عشان هما أو ولادهم يدخلوا و يتفرجوا ع المواهب.. وأنا أقوله يابابا بلااااش ..هتوديني في داهية ..و الراجل الطيب مش فاهم أنا باقول كده ليه؟...ماهو مش عارف نيتي السودة و المواضيع المنيلة اللي بتزن في دماغي نفسها تطلع و تنط على صفحات المدونة...لحد ما لقيته من يومين قايم من ع الكومبيوتر أصفر الوجه جاحظ العينين مذهول السحنة...فيه ايه يا عم الحاج ؟؟..الراجل بصلي شوية كده كأنه بيشوفني لأول مرة ..و خد نفس عميييييق و فجأة انطلق زي المدفع الرشاش...ايه اللي انتي بتهببيه ده؟ انتي اتجنيتي ف عقلك؟..عايزاهم يجوا يسحبوكي ع المعتقل؟..انتي ماشفتيش الكرنك؟..ماعداش عليكي الهجامة..ماتأثرتيش بأي فيلم من أفلام التعذيب بتاع نادية الجندي؟؟....فيه ايه بس يا بابا ايه اللي حصل؟...مش عارفه ايه اللي حصل ؟ انت فاكرة نفسك هدى شعراوي والا نبوية موسى (مين نبوية موسى دي؟) ..يابايا يا حبيبي و الله مافيها حاجه مانا كتبت الكلام ده قبل كده في عشرينات ماجراش حاجة, وبعدين الناس بتكتب أكتر من كده بكتير و ماحدش بيجراله حاجه ..أنا ماليش دعوة بالناس كل اللي انا عايزة ان الهباب اللي انتي كاتباه ده يتشال ..

خلصت المناقشه على اني قلت ..ماشي انشاء الله ..و طناش يعني ..بس يعيني بدأت ألاحظ ان بابا كل اما الباب يخبط يقوم يتنفض- خايف ييجوا ياخدوني- وكل شوية الاقيه يبصلي كأنه خلاص بيودعني ..والله الراجل صعب عليا ..بس برضه كرامتي و الفرسه اللي جوايا والتمرد و النار اللي ف دمي خلاني مش قادرة أمسح البوست ..بس قررت اني أكتب بوست جديد فوقه يعني كحل وسط انه يخف الموضوع على بابا شوية

و هي دي من رأيى مشكلة الجيل اللي فات ..مش مصدقين ان الأمور اتغيرت شوية ..الحقيقة رغم كل المشاكل و البلاوي اللي موجودة في مصر الا اني باعترف اني باكتب و انا مش خايفة و ان اللي بنكتبه دلوقتي لا يمكن كان حد يقدر يكتبه من سنتين اتنين بس و هو مش خايف على نفسه...قناعتي دي جتلي في لحظة ما شفت مظاهرة لكفاية ع الجزيرة مباشر..كانوا بيهتفوا و يقولوا ( يسقط ..يسقط حسني مبارك) ..أنا كان هيغمى عليا ..مش مصدقه و عايزة أمد ايدي جوة التلفزيون احطها على بقهم ..انتوا اتجنيتوا؟ بتقولوا ايه ..و استنيت ان بتوع الأمن المركزي يفتحوا عليهم الرشاشات ...مافتحوش.. استنى حد يجي يلمهم ع المعتقلات ..ماتلموش..أستنى ان حد ييجي يشد الكاميرا بتاع الجزيرة و يرميها في الأرض ماحصلش ..في اللحظة دي حسيت ان فيه حاجه اتغيرت و فيه ابواب كتيرة اتفتحت..دانا زمان كنت ساعات و انا باسمع النشرة باسرح و لما يقولوا اسم الريس ..أقول عليه الصلاة و السلام

لكن بابا و كل اللي في سنة مش مقتنعين ..ده حتى في الإنتخابات الأخيرة خاف يدي صوته لحد تاني لايكون متراقب ..و في انتخابات مجلس الشعب ادى صوته لمرشح الحزب و كان تبريره ..هو ده اللي أعرفه و بعدين مش عايزين مشاكل

النظام اللي احنا كنا عايشين فيه في مصر السنين اللي فاتت دي كلها كان مخلي الناس مش بس قطط مغمضه ..لأ قطط عميا ..بس دلوقتي إدوا القطط فرصة انها تفتح شوية ...و لو حتى بعين واحدة
بيني و بينكم ..هاكتب برضه اللي انا عايزاه..ماهو يا إما كده يا إما هموت م الفرسة اللي انا فيها

------------------------------------------------------------------------------------------------


هم يبكي و هم يضحك



موضوع ظريف قوي بتاع العيال المصريين في أمريكا ده ..انا لما سمعت الموضوع أول مرة قعدت أااااااضحك ..لما عيطت من كتر الضحك

الموضوع للي ما يعرفوش ان جامعة المنصورة عملت تبادل مع جامعة أمريكية يروح عدد من طلاب الجامعه لأمريكا عشان يتدربوا لمدة شهر و يتعرفوا على آخر الطرق الحديثه في التعليم هناك وييجي عدد من الطلبة الأمريكان عشان يجيلهم تخلف هنا...

المهم المسؤلين في جامعة المنصورة -يظهر- من منطلق ثقتهم الفزيعه في الطلبه بتوعهم ومعرفتهم بالصفات الأصيلة للمواطن المصري اللي ترميه في أي حته فيفوت في الحديد ..بعتوا لأمريكا 17 طالب ..من غير مشرف
وصلوا العيال أمريكا من هنا و هوووب 11 واحد منهم فكوا م المطار..الجامعه الأمريكية تستنى العيال ال 17 يجوا مالقيوش غير 6 ..طب و الباقي؟؟..كل سنة و انت طيب يا باشا ,شافوا مصلحتهم..خليك لذيذ بقه و ماتقفش في وش مستقبلهم ..دول جايين و ناويين و النية لله انهم هيرفعولكم شأن أمريكا بأفكارهم العبقرية و ذكاءهم الخرافي ..أو ع الأقل خالص هينضفولكوا الأطباق اللي بتاكلوا فيها ..فايدة لينا و ليكوا يعني

طبعا البهوات العباقرة ماتخيلوش للحظة اللي هيجرا بعدها ... ومش هارشين ان اللي كان بيحصل قبل 11 سبتمبر غير اللي بيحصل بعده يا فالح انت و هو ..الراجل مدير الجامعه بلغ البوليس..إمسك يا جدع حلق يا جدع ..العيال دول إرهابيين إسلاميين و أعضاء في خلية و جايين يفجروا أمريكا من جوة...و الإف .بي.آي عملت نشرات بصورهم و اتحطت ملصقات بأسماؤهم و أوصافهم في كل أنحاء أمريكا و التلفزيونات تذييع طول النهار

المهم 4 اتقبض عليهم و اتنين ياعيني هروا على نفسهم و جروا سلموا نفسهم لأقرب قسم شرطة وجاري البحث عن الباقي

يااا عباقرة يا مفتحين ..طب واحد يهرب ..اتنين ..مش 11 ..خلاص اليأس وصل للدرجة دي..خد عندك بقه اعتقال و تحقيق و ايه رأيك في حماس و انت مع حزب الله و الا ضده و ايه صلتك بتنظيم القاعده و بتشجع الأهلي و الا الزمالك..و بتحب روبي و الا هيفا...و أكيد هيتعملهم قضية ممكن جدا ياخدوا فيها حبس ..و ما أدراك كا السجون الأمريكية ..العيال هترجع بايظه خالص ..ده إذا رجعوا و ما تشحنوش على جوانتاناموا و الا حاجه..و حظهم الإسود ان الموضوع جاي بعد حكاية كشف مؤامرة تفجير الطائرات اللي في انجلترا ..يعني شكلهم كده زي مايكونوا المجموعه التانية اللي هتنفذ في أمريكا
اللي يفرسك بقه ان العيال دي معظمهم من أسر بسيطه و بعضهم من قرى.....و أهلهم أكيد كانوا معظمهم عارفين ان العيال دي هتفلق ..ماهو كل واحد فيهم دافع 22 الف جنيه عشان الكورس اللي هياخدوه في شهر في أمريكا؟؟ مافتكرش انهم ماكانوش عارفين..ما هو 22 ألف جنيه دي مابتجيش بالساهل و لا تتدفع لعيل عايز يتعلم انجليزي.متهيألي اعتبروه عقد عمل و بيشتروه ..مع إن العيال كلهم لا معاهم شهادات و لا كملوا تعليمهم يعني كبيرهم يغسلوا اطباق..ده لو حد سابهم يغسلوها

يعني كل الكلام اللي بيتقال عن أمريكا و اضطهاد العرب و العداء للإسلام و المسلمين والناس اللي بتقلع ملط و تتفتش في المطارات لمجرد ان شكلهم شرق أوسطي .. و كل الحاجات دي ما خلتش دماغكوا تشتغل شوية و تفكر ان انتوا كده رايحين في داهية لا محالة؟؟؟

بس برضه مش قادرة ألوم عليهم ..اليأس م البلد و احوالها يخلي الواحد يرمي نفسه في المحيط

42 comments:

Anonymous said...

andek haq ya sossa fi kol elli etkal

HANY said...

صباحووو ازيك يا سوسه , متفتكريش عشان والدك بقولك كده يبقى مش وطنى او انه مش كاره للنظام , بل على العكس ده ممكن تلاقيه شارك فى مظاهرات كتير قبل كده بس موضوع انك بنته ده برضه حاجه جامده ميقدرش يستحملها , وبينى وبينك انا مبكنش مبسوط لما الاقى بنات فى مظاهرات ماشيه جنبى , بالعكس دى حاجه بتضايقنى طيب انا وبايع الدنيا واللى فيها وأهلى عارفين كده وكتبت وصيتى من زمان ومع أول فرصه تظهر ادامى انى اروح حزب الله هروح وعادى جدا انما البنات ليه خلاص البلد مفيهاش رجاله , انا مع المدونات ومع ان البنات تعبر عن رأيها بس برده تعبر بطريقه ميكنش فيها خطر , وبالنسبة لموضوع ان فيه حاجه فى مصر اتغيرت فانا بقولك لا مفيش حاجه اتغيرت المظاهرات دى بتطلع من زمان قوى مش قصدى كفايه طبعأ انا قصدى طلبة الجامعات والمظاهرات اللى بتطلع بعد صلاه الجمعه كل اللى حصل فى مصر ان فيه ناس ليها صله بالاعلام فبقى يركز على مظاهراتهم واعتصاماتهم انما احنا غلابه يا بنتى , وتحولت المظاهرات من حدث شريف الى حدث له ابعاد سياسيه وغير ذلك , ما علينا وجعتلك دماغك انا عارف , وتحياتى

مـحـمـد مـفـيـد said...

احييكي علي البوست الجامد ده وعلي الاسلوب البسيط والموضوع المعبر جدا

أُكتب بالرصاص said...

صقفة كبيرة هنا يا جدعان

والله
حكم ، درر ، هرر !!

اولا موضوع والدك ،
باباكي عنده حق ،

لكن مايمنعش اني اعمل برضه اللي في دماغي
بيفكرني زمان ايام ماما لما كانت بتخاف عليا

ودلوقت ، انا لما اخاف على ابني ، بس ,,خوف مختلف ، لاني فاهم ، ولاني عايز اطلعه صاحب مبدأ حتى لا قدر الله مات في سبيل هذا المبدأ

بالنسبة للفلاحيس الهاربين

والله هم يضحك
وهم يبكي

واسلوبك حلو

farida said...

ازيك يا سوسه
فرستي ابوكي ياختي بالرعونه بتاعتك دي
يعني ايه رعونه!!؟
يعني انتي هايجه زي القطه اللي مغميين عينها و مش عارفه اللي حيجرى لها
و الله يا سوسه انتي عسل
تفتكري المدونات دي متراقبه و هم مستنين يلمونا مره واحده
و الله ياختي انا لسه ما دوستش في موضوع السياسه ده
مش خوف و الله بس اصله تقيل على قلبي شويه
نتكلم و مفيش فايده
المهم قول لي ازاي الواحد يخبي ال
IP ADDRESS
بتاعه
اصل كل واحد بعد كده هيتمسك من لغلوغه
قصدي من أي بيهه

BackBone said...

طب ما طالما انتوا حسين بالفرق بتاع زمان و دلوئتي و فرق الحريات و الأراء

مش تتلموا بقه و تحمدوا ربونا... و الا تتنمردوا علي اللي خلاكوا تتكلموا زي مانتو عيزين كده ... ده سعادت ظابط الامن المركزي لما هيمسكنا

بسي يا مفروسه... لما تحبي تنقدي انقدي زي مانتي عيزه بس بلاش تغلطي و تشتمي.

اوعي يهزك يا سوسه لا أمن دوله و لا هاكرز و لا حتي فيلم الكرنك...اصلك بتتكلمي عن اللي الناس حساه. و ابوكي معلش سيبيه يخاف عليكي ده حقه ذي مانتي حقك تقولي رأيك و تكتبي.ـ

كله واحد يعمل اللي عايزه و سلميلي علي
libertarianism

Dr. Tantawy said...

سيدي الفاضل والد الوزيره المناضله سوسه المفروسه

تحيه طيبه .. اما بعد

ان الواقع المصري يحتم علينا ان نسير وراء ضوء الديمقراطيه التي منحتها لنا حكومه مبارك الفاضله
تيرا .. تيرا تاااا .. تيرا را را
ان مصر .. هيه امي .. نيلها لونه بمبي

مممم .. ألى الامام يا سوسه
و ربنا يعين اهلك عليكي و يصبر على ما سيبتليكي به الله في القريب العاجل

العيش والحلاوه عليه .. و اهلك في عنيه .. اي طلبات انا حاضر ولا يهمك
كله علشانك يا مصر

tota said...

بصى يا سوسة
بصيتى كده ربنا يكرمك
بابا عنده حق
والحقيقة ان البلد المفروض فيها رجالة ولان احنا مش عارفين نساهم بأى حاجة علشان هما مش بيعملو اصلا حاجة فمعندناش غير الكلام
بس مش عاييزة يكون عندك ثقة زايدة قوى كده انهم بيحترمو البنات وبيفتكروهم اختهم او امهم او بنتهم لا روحى شوفى مدونة التعذيب وانت تعرفى الرجولة فى بلدنا من السادة الافاضل حراس الامة ربنا يجعل كلامنا خفيف عليهم
بس ده مش هيخرس لسنا علشان معدش عندنا غيره
اطمن يا بابا سوسة وطنيتك موروثة سوسة مش جايباه من بره وماتخفش
تحياتى

Anonymous said...

( رسالة لوالد سوسة )

مرة قطة سيامي
شافت أستاذنا سامي
بيبيع الأمتحان

أستاذ سامي شافها
هددها أنه عرفها
و هيسقَّطها كمان

القطة ياعيني خافت
لتقول علَّي شافت
تسقط في الأمتحان

نتيجة القطة بانت
و النتيجة كانت
كل القطط عميان
كل القطط عميان

" من وحي بوست القطط العميا للأديبة المهووسة سوسة المفروسة"

Anonymous said...

upgrade للقصيدة

( رسالة لوالد سوسة )

مرة قطة سيامي
شافت أستاذنا سامي
بيبيع الأمتحان

أستاذ سامي شافها
هددها أنه عرفها
و هيسقَّطها كمان

القطة ياعيني خافت
لتقول علَّي شافت
تسقط في الأمتحان

يا قطة يا عبيطة
هاتي طرمبيطة
و أفضحي اللي كان

أدي نتيجتك بانت
و النتيجة كانت
قطة من العميان


" من وحي بوست القطط العميا للأديبة المهووسة سوسة المفروسة"

سؤراطة said...

(مين نبوية موسى دي؟)""
الأستاذة نبوية موسى أول مصرية تحصل على البكالوريا، وأول ناظرة مدرسة من النساء

أنشأت وأدارت عدد من مدارس البنات وكانت صاحبة مدرسة "بنات الأشراف"، وكانت من أول من شجع ودافع عن تعليم الفتيات وصاحبة مجلة: "الفتاة"

من أشهر من تخرج تحت يدي الأستاذة نبوية موسى الدكتورة سميرة موسى عالمة الذرة المصرية

لطيف الزجل المكتوب من من المعلق المجهول

صاحب البوابــة said...

عزيزتي سوسوة المفروسة

تحياتي


بوست أكثر منة رائع

استمرى ولا تترددي

وتحية خاصة لسانشو صاحب الزجل الجميل

BackBone said...

يا سانشو متزعلش مانت اللي علقت من غير ما تلوججين.

الزجل دمه خفيه فعلاً

اروي الطويل said...

وهو فى حد يعمل العملة السودا دى شفت بقة كمان شويه حيقولك الغيها وبعدين الواحد اعصابه تتعب كده ويتنرفز ياستى امن دوله ايه بس من سجن خارجى لسجن داخلى عادى يعنى وهو الاخ بقولك سوييت خمس نجوم يعنى

Anonymous said...

بصى يا سوسة يا اؤختى..طالما السي الوالد وزع نشرة باسم مدونتك على كل المعارف والاصحاب والاحباب واللى مش احباب ...يبقا اطمنى وسليمة ان شاء اللة وعظم اللة اجركم...يا بنتى دة انا اخويا الصغير حيبوس رجلى عشان يعرف مدونتى فين وانا معلقة لة الطرشة خاااالص عشان ميشمش خبر باللى انا باكتبه او اللى انتوا بتكتبوه..تقومى تديها لاكبر راس فى البيت يختى؟؟...الراجل يا عينى معذور فى الزع اللى انتى سببتيه له..لما شاف البلاوى دى وكمان اية؟؟ عازم عليها وجة بحرى كله.
اما بقا العيال بتوع المنصورة دول فيستاهلوا ضرب الصرم..دى عيال عايشة فى غيبوبة..لسة فى وهم الحلم الامريكى العبيط اللى بيحشوه لهم فى راسهم فى المدارس والجامعات..وطالما مش بيتابعوا ولا بيعرفوا يبقوا يستاهلوا اللى يجرى لهم...حد يروح للنار برجليه؟؟ عيال معتوهة ومعوقة ذهنيا فعلااا
تحياتى الك وللوالد الطيب

soosa el-mafroosa said...

الغريب

شكرا على مرورك و تشجيعك..قلبي معاك في موضوع مدونتك دي ..بس انشاء الله تبقى لأحست م الأول بكتير ..بالنسبة لموضوع مدونة جديدة ..مش هاقدر ..انت بنفسك حسيت إحساس انها تتاخد منك غصب عنك ..أنا متأكدة انه إحساس وحش قوي ..مش عايزة أجربة
باب شوية كده و هينسى و انامجهزاله جوله في مدونات كتير عشان يصدق ان الناس بتكتب براحتها و مابيحصلهمش حاجة ..وبعديها يمكن يقطنع

hany

موضوع ان بابا طلع في مظاهرات دي انا متأكده انه ماحصلش..بابا من النوع اللي بيخاف على ولاده زي عينيه وزيه زي الملايين من الأبهات في البلد دي كل أملهم انهم يربوا العيال و يجوزوهم و بكده يبقوا عملوا اللي عليهم ..سياسة البلد اللي خلت الكل يمشي جوة الحيطة مش بس زيها ...بالنسبة لموضوع البنات في المظاهرات أنا معاك انه مش صحي خالص ..بس فيه بنات كتير بتفهم و بتحس - مش زي مامعظم الرجالة فاكرين ان البنات مش فاهمة حاجه و مش حاسة بالبلد- بس أهو موضوع المدونات ده جه فرصة اننا نعبر عن اللي جوانا ولو حتى بالكلام ..ماهي مش هتبقى خنقه من كل جهة

anonymous

شكرا

soosa el-mafroosa said...

محمد مفيد

شكرا على مرورك ..وعلى الدعم المعنوي

أكتب بالرصاص

شكرا يا فندم ع الكلام الحلو ..أنا عارفه ان بابا معذور انا من مده صغيرة ماكانش ممكن أصدق ان الكلام ده ممكن يتقال عادي كده يعني

farida

مافيش مانع انه يتفرس شوية ..مش هو اللي جابني الدنيا دي ..يشيل بقه شوية ..هو أنا هتفرس لوحدي يعني؟

بالنسبة للمراقبة..طبعا كل المدونات متراقبة ..من باب العلم بالشيء ..لكن بالنسبة للم متهيألى احنا في الأمان إلى حد ما ..لا طلعنا في مظاهرة و لا أعضاء في حزب ولا جماعة ..و ال آي بي ..أتطمني ..ما بيستخباش

soosa el-mafroosa said...

حاول تفتكرني

ما هو دي الأسطورة اللي في دماغ الجميع ان فيه مخبر في كل مكتب و علو كل قهوة و تحت كل كرسي
..
..
والله جايز!.. استنى كده لما أبص

backbone

حيرتني منين ما خافش و منين ماغلطش..و الكرنك ده بالذات ما حدش يقوللي ماتخافيش منه ..أنا لازم أخاف و من خاف سلم

مين اللي أسلملك عليه ده يا خويا؟...ده حقن و الا شرب؟

zangoolaaa

الرسالة وصلت لبابا يا اخويا..انا حاسة كده ان انت نفسك اتحبس..مش عارفه ليه ..يابني مش انت اللي معييني وزيرة..و الا هو فض مجالس

بس حلوة نيلها لونه بمبي دي..هو انت ساكن فين بالظبط؟

m_elsewedy said...

انتى شكلك موجودة دلوقتى فى المدونة الحقى ردى علية بقى
:D
قبل ما تمشى

غلطانة وستين غلطانة انتى عارفة انه ممكن يتضايق بسبب حاجة زى كدة لانه خايف عليكى عنده حق يعنى فا هو حل من اتنين لاما تسمعى كلامه او تعملى مدونة تانية
:D

soosa el-mafroosa said...

tota
ماشي يا قمر..برضه رجل ورا و رجل قدام..شوية مش هيخرسوا لساننا و شوية ماتتكلميش كتير ..مااشي هامسح البوست خلاص إذا كان ده يريح رجال الأمن الساهرين على راحة الوطن ..هو انا باكتب في الأهرام و الا إيه؟

سانشو

على فكرة أولا القصيدة جميلة جدا جدا و معبرة و عجبت بابا كمان..أنا باحب الزجل جدا ..لأنه الأقرب لوجدان المصريين و بيعبر عن كل اللي جوانا و بنفس الطريقه اللي موجودة جوا نفوسنا و بطريقه أبلغ - في نظري- من الفصحى

ثانيا انت حققتلي حلم قديم ان انا أو ع الأقل كلامي يكون السبب في كتابة قصيدة

socrates

شكرا على المعلومات القيمة..على فكرة انا عارفاها كويس بس البوست ماكانش يستحمل حصة تاريخ

شكراع المرور ..هنستناك على طول

soosa el-mafroosa said...
This comment has been removed by a blog administrator.
soosa el-mafroosa said...

صاحب البوابة

شكرا ع المرور و ع الدعم المعنوي

أروي الطويل

يعني الحق عليا عايزة ادخله الكرن الواحد و العشرين و واحة الديمقراطية في الشرق الأوسط؟

sharzad

الله يطمنك يا أختي يعني خلاص..الوداع..خلاص خلاص هاشيل البوست عشان الكل يستسريح ..عليه العوض في الديمقراطية يا جدعان

soosa el-mafroosa said...

سويدي

حتى انت يا سويدي.؟

طب غلطانه في ايه؟

في البوست نفسه و الا في اني وريتله البلوج

شور عليا ياخويا ربنا يكرمك..أشيل البوست خالص؟

مستنيا ردك و رد الجميع

m_elsewedy said...

غلطانة انك ورتيله البلوج من اصله
عامة حكاية انك تشيلى البوست دى ترجع ليه هو يعنى هو خلاص قفلت معاه خالص ومش مديكى ريىء حلو ولا عادى كبر دماغه شوية؟
لو كبر دماغه شوية خلاص خليه غير كدة اسمعى كلامه

Anonymous said...

ولايهمك من بابا ياسوسة

مستنيكي يوم عيد ميلادي نشوف سوا الناصر صلاح الدين

هابعت حد ياخدك عشان تشوفيه بجد

نيييااااااهاهاها

Ahmoss said...

والله كلامك كله صح بس انت ما فكرتيش في سبب هذا التغيير وهل ده سبب خارجي ولا داخلي؟

lastknight said...

شوفى يا سوسه .. أنا فكرت كنير فى موقف الوالد .. و بصفتى اب و باعشق بنتى و باخاف عليها .. الحقيقه مش فادر أغلطه فى اللى عمله .. بس أنتى كمان كان ممكن تتصرفى .. وريتيله مدونه و ماعجبتهوش .. قوام قبل ما يعترض تعملى مدونه جديده و فيها الموضوع و ماتقوليلوش .. مش تخليكى نبيهه كده و تتصرفى ؟؟
عموما تحياتى لك على المدونه الملغاه .. لأنها كانت رائعه .. و أيضا تحياتى لوالدك الموقر .. الذى تدفعه مشاعر حبه لأبنته للعمل على حمايتها حتى لو كان هذا سيحرمنا من قصه رائعه

Nouran said...

يا سبحان الله بابا بيقولي كده وده السبب اللي قلت اني غلط اني ورته البلوج ويقولي شفتي عملوا ايه ف الاء بتاعه موضوع التعبير واقولوا يا بابا هياخدوا ع كلام عيله ف ثانوية عامة كل ده علشان كتبت موضوع اقرب ما يكون الى العبط باسلوب استهزائي عن الحكومة المبجلة اصلا حد منهم هيخش يقرا احنا كاتبن ايه ويخدونا يالله باباهتنا ولازم نسمع كلامهم ومنزعلهمش ونطيب خطرهم وفي الاخر نعمل اللي ع مزاجنا ولا يهمنا
اما العباقرة اللي طفشوا رايحين يغسلوا اطباق هناك ولا ايه يعني من قله الاطباق ف مصر
المهم يا سيادة وزيرة الاعلام انا شفت سويدي بعتلك التاج اعملي علشان يبققى غطا عليكي - انا كنت هبعتهولك بس سويدي سبقني- ماشي الكلام

Anonymous said...

يا سوسة يا فرسانى خلي البوست مش حيكون انقل من غيرو يعنى...خلاص يختى اللى حصل حصل وامرك للة...متبقيش بس تفرشى بالمدونة كدة يعنى..طيب احنا هنا يا اختى ستر وغطا على بعض...ههههههههههههههههه ..لاء البوست حلو ولذيذ...مش تحذفيه

eZz said...

2alby m3aki ya sosa :) yala tameneh homa ma3zoreen men eli bishofooh, take care

Nouran said...

بصي انا بدات نشاطي الوزاري تعالي شوفي البوست الجديد
انت رحتي فين ؟؟؟؟؟؟؟؟؟؟؟؟

Dr. Tantawy said...

يا بنتي مش موضوع خوف والله .. احنا مبنخافش غير من اللي خلقنا :) ههههه
سيروا على بركه الله .. بس المهم عايزين مشروعات جاده .. الوزاره بتاعتنا اسمها ( دولة لأصلاح الدوله ) يعني عايزين مشروعات لرجل الشارع اللي هوه واقف على الناصيه تحت .. عايزين الناس تقرا مشاريعكم و تنفذها لوحدها بدون جهاز رقابي ولا عيون امنيه تتابعهم .. عايزين مشاريع الناس بمجرد ما تقراها تقول اللللللله و تبتدي فيها لوحدها

وبالتوفيق داااااااااااااائما

soosa el-mafroosa said...

بابا حسني مبارك

حاضر يا بابا حسني هو انا اقدر ارفضلك طلب ؟..بس هاجيب كل اللي بيدخلوا هنا معايا ..أصلنا حالفين مانروح أي حتة غير مع بعضشينا

ahmos

متهيألي تمثال صدام حسين لما وقع كل واحد خاف على لغاليغه

mizo

لا يا عم مش معقول يعني ماسمعوش عن 11 سبتمبر..بس هو المشكلة في الفهلوة اللي عايشة في دمنا ..و نظرية أنا أفوت في الحديد و احنا اللي دهانا الهوا دوكو ..و لو الناس كلها اتقفشت انا بعون الله ماحدش يقدر يلمسني
ياللا ربنا يتولاهم

soosa el-mafroosa said...

lastknight

شكرا على تشجيعك بس المشكلة ان ابويا لئيم شويتين يعني مش هيخيل عليه موضوع البوست الجديد فوق القديم مانا جربت يومين كده قبل مامسح البوست و برضه مافيش فايده ..يالا بقه أبويا ولازم أعديله امال هو مخلفني ليه؟

nouran

أخيرا لقيت حد مشاركني في خيبتي ..بالذمة مش احنا عبط ..ياللا اهو الواحد بيتعلم من أخطاؤه ..يوم مافتح قناة فضائية أكيد مش هاقوله..بالنسبة للعيال بتوع المنصورة ..أهم برضه يعملولنا واجة في أمريكا ان احنا نضاف

سانشو

مانا هاعديها عشان كده بس و الله
أنا زرت مدونت على فكرة ..مدونة جميله و الزجل اللي فيها فعلا راقي

soosa el-mafroosa said...

shahrzad

خلاص يا أوختي ..سبق السيف العزل..أديني شليها على ما الأمور تهدى شوية ..ربنا يسهل ..المهم ان الحبايب كلهم قروها و المعظم عجبته..ده أهم حاجه عندي

ezz

أشكرك على تعاطفك بس خليك فاكر تيجي على طول لأن تعاطفك لوحده مش كفاية..لازم تنورنا على طول

nouran

أيوة كده المفروض الكل يبدأ النشاط الوزاري ..أمال هتحبس لوحدي والا إيه؟

zangoolaaa

ماشي يا باشا ..بس افتكر انك أول واحد بتبيع ..بس احنا برضه على العهد ..احنا م الحرارا يا زنجولا

كلبوزة لكن سمباتيك said...

القلم الجميل و الروح المرحة و الكلمة المعبرة
انت يا سوسة
من اجمل ما كتبتي
بجد
عجبني تعبير القطط العمياء و عجبني كمان تعليقك علي الطلاب الهاربين
اتمني لك كل توفيق
جبتي كلمة يفلق دي منين هههههههههه
انتي عسولة
قبلاتي

alzaher said...

ربما أكثر منك حظا فيما يتعلق بموقف السيد الوالد، فأبي كان احد قادة الحركة الطلابية في السبعينيات ودخل المعتقل لأول مرة وهو أصغر مني سنا أي انه يرى أن ما أفعله اليوم هو نفس ما فعله وهو في سني ، الوالد واخد موقف حيادي فهو لا يشجعني على الذهاب الى المظاهرات ولكنه في نفس الوقت لا يمنعني عنها واذا حدث والتقينا في مظاهرة كما حدث يوم التحرير فانه يعطيني توجيهات لسلامتي اكتشف بعد التفكير انها صائبة كعدم الاشتباك مع الأمن مثلا والاستفادة من خبرات "عتاولة المظاهرات"أما المدونة فقد شاهدها مرة واحدة فقط وأعجبته ولكنه "مش فاضي"لمتابعة كل ما أكتبه عليها
:)

sadlife said...

اسلوبك جميل جدا
بس اية العاملة الهباب دي جد برضه يعمل كدة
استحملي بقة اللي ح يحصلك من باباكي يا مفروسة

توهة said...

انتى على طول مفروسه كده براحه شويه
ههههههه
المهم أنا برده كان بابا بقولى متنشريش الموضوع الجديد ده حتروحى فى داهيه بس على مين خليته يصحح الاملاء ونشرته وقلتله فقال الشكوى اليك يارب وسكت ياعينى غلبان بس انا عايزه أعرف هم بعرفوا أصحاب المدونات إزاى

وعلى العموم لو قبضوا علينا نخليهم يجبلنا عيش وحلاوه مع بعض وأهو يبقى بنا عيش وأروانه هههههههههه

بالنسبه لموضوع العيال دى هو هم يضحك وهم يبكى صحيح بس مش مبرر انى الحاله ضنك هنا يقوموا يعملوا كده ده إسمه هبل

ماعلينا هم هبل والهبل كتير

مع تحيات فانتازيا

soosa el-mafroosa said...

كلبوزة

شكرا يا كلبوزة يا قمر

مالها يفلق ؟...خلاص يا ستي ..خليها يقلٌع..حلوة؟

alzaher

يا بختك ..بس يمكن لو كنت إنت بنت كان الأمر اختلف مع باباك

theendlife

شكرا ع الإطراء..(إيه الإطراء دي ..جت منين؟) ..وانا اعترفت ام انا اللي جبت ده كله لنفسي ..معلش هنعمل ايه بقه

فانتازيا

يعني مش بابايا لوحدي..هي شوطة ماشية في البلد و الا ايه

هما بيعرفونا عن طريق ال آي بي ..زي اللي بيظهر في العداد يقول انت من دولة ايه ..أ÷م بيعرفوا كده بس بيعرفوا انت من دولة و شارع و بيت و شقة ايه..العيش و الحلاوة بقم موضه قديمة ..أنا عايزة "مايتي زينجر" و خلي البطاطس على جنب

العيال بتوع المنصورة ربنا يتولاهم ..دول هياكلوا ضرب

ذو النون المصري said...

اهلا سوسه انا من المتابعين للمدونه و معجب جدا باسلوبك حقيقي سهل وممتع و هذه ميزه هامه في النصواتمني انك تضيفي اسم مدونتي عندك
اسم المدونه ذي النون المصري
هي مدونه جديده اولها كان الجمعه السادس من اكتوبر ولكي مني خالص التحيات
ذي النون المصري

Anonymous said...

Best regards from NY! Kick butt sports quotes Joint pain supplements Web site development and promotion+ prepress plotters canvas camping chair footrest