Monday, August 21, 2006

أحمدي نجاد إتكلم يا ..مييييينز






أخيرا سمح محمود أحمدي نجاد - الرئيس الإيراني المنتخب- بإجراء حديث تلفزيوني مع إحدي القنوات
الأمريكية و هي قناة سي بي إس و برنامجها الأشهر " 60 دقيقة " ..فقد عاد مذيع البرنامج - مايك والاس- من تقاعده أو إعتزاله لإجراء هذا الحديث الذي يعتبر نادر بالنسبة للرئيس الإيراني ..فهو لم يقدم سوى حديث واحد لإحدى الصحف الأمريكية و لم يدلي قط بأي حديث تلفزيوني لقناة أمريكية

قناة إم . بي. سي الرابعه أعادت إذاعة الحديث يوم الجمعه اللي فات ..الساعة 1 بعد منتصف الليل (عشان ماحدش يشوفه) مصحوبا بالترجمة...طبعا المذيع مابقاش مصدق نفسه انه قاعدمع نجاد..و الذي يعتبرعلى أعلى قائمة أعداء أمريكا الحاليين ..فقد إحتل بجداره محل ..عمكوا صدام حسين-الله يرحمه مقدما-و طبعا هو كل يوم حارق دم عمكوا التاني بوش ..اللي نفسه و منى عينه ينشرله صورة قي السجن بملابسه الداخلية زي بتاع عمكوا صدام ..و عمال يجر في شكلة و بيسويله حرب صغنتوته كده على قده على نار هادية

المهم الحديث بدأ ..و نجاد قاعد قدام المذيع ..قمممممر ..آه و الله الراجل قمور و تحس انه لسه طالع من فيلم هندي من بتوع عمكوا أميتاب باتشان (إنتوا عمامكوا كتروا كده ليه ؟) ما علينا ..الراجل متواضع و بشوش كده و شيك و أجمل ما فيه بساطته في لبسه..حتى و هما قاعدين حد من مساعدين نجاد بعتله ورقة صغيرة..المذيع الرخم قاله أنا لازم أعرف بتقول إيه الورقة؟..قاله بيقولولي أعدل الجاكيت ..المذيع قاله آه فعلا شيك قوي الجاكت ده ..نجاد قاله حاجه كده معناها "مانا لابسلك اللي ع الحبل ..كان لابس جاكت بيج مفتوح و تحته قميص فاتح و بنطلون بني ..حاجه بسيطه و شيك ..مش زي حد نعرفه يوم ما حب يعمل روش و صغنطوط و يقدر يستحمل 6 سنين كمان ..راح عامل حركة جبارة و قلع الكرافتة...تا تا تا تاااااا..و إلحق يا جدع ..حلق يا حدع ..احنا خلاص دخلنا عصر الروشنة..و عمكوا هيكل يصرخ (مش قلتلكم عمامكم كتروا)..إرفعوا أيديكم عن الرئيس ..زي مايكون نزل الإنتخابات ببرمودة والا حاجه ..قال يعني بقه لما يقلع الكرافته هيبقى روش و الا هيحس بالشباب يعني " هاي شلة"( ياادي النيلة ..كده برضه جرجرتوني في الكلام ..يا جدعان لسه متصالحه مع بابا مش حكاية بقه ..خلاص أسكت يا لساني ...هشششش)..المهم

الراحل يجيبه يمين ..يجيبه شمال ..مش عارف ياخد منه لا حق و لا باطل ..و نجاد قاعد قدامه يبتسمله ابتسامه تفرس ..يقوله إسرائيل ..نجاد يدخله في المشكلة النووية ..يقوله حزب الله انت بتموله ..يقوله ما أمريكا بتمول إسرائيل ..يقوله انت عايز تنتج قنبلة نووية ..يقوله احنا عايزين وقود عن طريق النووي و امريكا مش موافقه عشان عايزة تسيطر على كل موارد الوقود ..و بعدين بوش بتاعكم ده مابيفكرش غير في الحرب و مابيحلش أي مشكلة غير بالقنابل و انا بعتله رساله صغنتوته كده من 42 صفحه مش عارف ماردش عليها ليه؟

في نص الكلام المذيع زهق و قاله انت بتلف و تدور كتير ..خليك شجاع و جاوب بصراحه .. أن أن أن أااان..أنا قلت نجاد هيشيله هيلا بيلا و يرميه في الشارع ..بس ايه؟..آم مبتسمله ابتسامه واسعه كده و قاله ..أنا متشكر جدا ان انت جيت كل المسافه دي من أمريكا عشان تعلمني الشجاعه ...يااااه و جون وجون وجون ..أكنهم اتنين قاعدين ع القهوة بيلعبوا طاولة و بيحبسوا على بعض

وكل اما نجاد يطول شوية في إجابة سؤال ..الراجل الرخم يقفل عليه ..نجاد قاله انت مزعل نفسك ليه يا أخينا قاله انا أزعل دانا ليا الشرف اني قاعد معاك ,هو اناكنت أطول ..نجاد قاله انت شكلك كده زعلان لأني مابقولش اللي انت عايزني أقوله ..قاله لأ إزاي؟دانا عايزك تقول اللي عندك كله بس اختصر..نجاد شكله كان عايز يقلبه ..و فعلا قلبه بحتة طريقة ..قاله معلش سوري لازم أخلص المقابلة دلوقتي ..قاله ليه لسه بدري ..نجاد قاله سوري لازم أقوم عشان وقت العشا دخل و لازم أصليه حاضر ....ياسلام يا سلام ..طب بذمتكوا عمركوا شفته حد هنا .أ.ااااااااا..بلاش بلاش ..إنتوا أكيد فاهمين ..المعنى في بطن الشاعر

والله الراجل عسل ..مسلي كده..طب تصدقوا تصدقوا انه عمل بلوج بيكتب فيه ..آه و النعمه ..بلوج زي بتاعنا كده و تقدر تسيبله تعليق في العمود اللي على يمين الصفحه ..هوكتب موضوع واحد بيحكي فيه قصة حياته ..مش زي اللي مش عارفين أصولهم و مصريين والا إنجليز و الا منايفه (يووووه هش بقه قولنا) ..انا كان نفسي أسيب تعليق بس مش عارفه ..هو ده يخش تحت بند التخابر مع جهات أجنبيه والا حاجه ..مش عارفه بقه أنا زهقت ..كل الطرق تؤدي إلى طرة

بس انا عجبتني قوي فكرة البلوج دي ..عنوانه أهه على فكرة لو عايزين تشوفوه و تبعتوا رساله عليه ..و اللي يبعت يقول عشان نعد عليه من واحد لعشرة ونشوف هيرجع تاني و الا نبقى نعمله خاتمه ..ماحنا هنقسم نفسنا ..جزء يبعت رسايل و جزء يعمل خاتمة و جزء يبلغ
البوليس

العنوان أهه
http://www.ahmadinejad.ir/





اللي أنا بافكر فيه بقه ..أنت و هو و هي كمواطنين في البلد دي (أه انتوا مواطنين ..انتوا نسيتوا والا ايه؟) يعني لو حبيتوا انكوا تعملوا لـ -شخص ما- بلوج في هذا الوقع الإفتراضي ..الشخص ده يبقى مين ..و إسم البلوج هيبقى إيه و الجمله اللي تحت الإسم هتكون إيه ...ياللا نعملها تاج .. و الا بلاش نعملها مسابقة تبع وزارة الإعلام بتاعتي (أنظر البوست اللي قبل قبل اللي فات )..و جوايز المسابقه..هي هياها ..عندكوا الخيار مفتوح ..من أول الفنانة القديرة فيفي عبده إلى السيدة"---" انتوا عارفين
و من الفنان المتألق شعبولا و حتى فخامة "--" برضه انتوا عارفين

يالا بقه ورونا الشطارة و شدوا حيلكم .....الجايزة تستاهل و الا ايه

نموذج الإجابة

:الشخصية

: إسم البلوج

: الجملة التي تعبر عن المحتوى

: صورة البروفايل

وزارة الإعلام الكلبوزية تتمنى لكم حظا سعيدا

52 comments:

أم أحمد said...

انا قفلت النت علي البلوجر بتاعك وهاتك ياقراية عشان الفاتورة بس هايلة دي كلمة قليله عليكي انتي كنتي غايبه عني فين انا اول مرة ادخل بس خلاص هابقي هنا علطول وعاوزة اقولك اني غلطت غلطتك وقلت للي عندي برضه وجوزي اعترض من قبل مابدا انشر حاجه بس مش عشان خايف عليا من امن الدوله لانه متاكد اني جبانه وبمشي جنب الحيط لا خاف انشر مشاكلنا مع بعض واسرارنا ودلوقتي بيدخل البلوجر بتاعي مابيلاقيش سيرته واضايق اوd

Anonymous said...

ربنا معاكي ويوفقك يا كلبوزة

بس يا اخواننا احنا اينعم معجبين باحمدي نجاد وبكل الشباب الايرانيين دول عشان اعمالهم بصراحة قامت بهم وهم فعلا مجتهدين وعاملين شغل جامد وبيعملوا حاجات كتير منعنا منها الخاين العميل اللى ماسكنا..ولكن..يا اخواننا الشيعة وان قامت بهم أعمالهم قعدت بهم عقيدتهم..دول كفاااااااااااااااار يعني بيسبوا فى سيدنا عمر بن الخطاب و سيدنا ابو بكر والسيدة عائشة وبيقولوا فيهم كلام وقح جدا وبيكفروا كل الصحابة وبيشركوا مع الله قبور وبيسجدوا للقبور ومعتقدين ان فيه طفل صغير هو الولى بتاعهم وانه هيخرج من سرداب وحتى مكتوب فى اول بلوج احمدي نجاد الكلام ده..اللهم عجل خروج الولى واجعلنا من انصاره..يبقى احنا ناخدهم قدوة فى العلم الدنيوى والهمة العالية والشغل الجامد وردع الغرب..اوكي لكن منعملش منهم ابطال ونتبهم تماما زي ما اتبعنا الغرب قبل كدة لان ده الطابور الخامس الشيعي اللى هيدخل ديار الاسلام وياريت مننساش 200الف سني اتقتلوا فى العراق على يد فرق الموت الشيعية بمباركة ايران لتطهير العراق من السنة تماما وانشاء شرق اوسط جديد بس على الطريقة الايرانية(عودة الامبراطورية الفارسية بواجهة شيعية اسلامية)

وعموما مية مية البلوج يا سوسة وبجد انتي عبقرية وباحاول اقتبس من أسلوبك فى الكتابة اللى هو تقريبا - زي باقى شباب سننا ومرحلتنا - مقتبس من احمد خالد توفيق طول الله عمره

وربنا يوفقك
www.islamistbloke.blogspot.com

Anonymous said...

[ مختارات من عالم المدونات ]
http://www.rewayatnet.net/forum/showthread.php?p=424874#post424874

Ahmoss said...

Ofcourse I am happy for Negady to have all this passion, but don't you think it is too much from our side.
I have this feeling that we are not supporting him as much as we hate USA.

it is a very good post anyway.

moatassem bellah said...

مممم , عظيمة يا سوسة بجد كلام جامد قوي , و انا بحترمك قوي قوي عشان احمدي نجاد مش رئيس عادي و انا فعلا فخور انه ينتمي الي الاسلام و ان شاء الله نلاقي رئيس عربي زيه او حتي نصفه .

Anonymous said...

اللي فترة عم اقرا البلوغ هون وكتير حلو... وكلماتك روعة عنجد وبتضحكيني من قلبي على كلماتك...مع انه مرات صعب افهم بس مرسي كتير وانشالله على طول تبقي هيك وترسمي بسمة على وجوه اللي عم يزوروا البلوغ
Mireille

Anonymous said...

اللي فترة عم اقرا البلوغ هون وكتير حلو... وكلماتك روعة عنجد وبتضحكيني من قلبي على كلماتك...مع انه مرات صعب افهم بس مرسي كتير وانشالله على طول تبقي هيك وترسمي بسمة على وجوه اللي عم يزوروا البلوغ
Mireille

Dr. Tantawy said...

للأسف مشفتش البرنامج و ان كنت اتمنى اني اشوفه .. و اشوف الراجل السكره ده بيتكلم ازاي لأنه داخل دماغي جدا
بقولك ايه :) انا علشان بعزك يعني بفكر اكلمه ييجي يطلب ايدك :) ايه رأيك .. منها تتكلمي في السياسه براحتك و منها اقدر ازوره لأنه هيبقى جوز واحده من اخواتي .. هاااا .. موافقه

Anonymous said...

كأني شفت الحلقة معاكي

هممم

جيمي
اسم البلوج: الواد قلبه بيوجعه
صورة البروفايل: واد و معاه مصاصة علي شكل كرة ارضية
الجملة: ادخلوها محروقين..غرقانين..ميتين

soosa el-mafroosa said...

يعني ما حدش حل المسابقة غير ابيتاف

فين الذكاء و تشغيل المخ يا جدعان ..عليه العوض في الأسبوع السياحي الفزيع اللي هو الجايزة ..شدوا حيلكم ورونا الهمة

ملحوظه

هارد على كل واحد لوحده بكره لحسن بعمل سكان للكومبيوتر دلوقت

ابعتوا الحلول بقه ماتتأخروش

tota said...

هايلة يا سوسة
بس البلوج بتاعه بالفارسى يا ستى مفهمتش حاجة منه
بس برده الراجل عنده ثقة عالية فى النفس يظهر مسنود والله اعلم
بس مين يا ترى سنده ؟

بركاتك يا سيدنا
اسم البلوج جاتها نيلة اللى عايزة الخلف
صورة: صوره بوحة فوق الخروف وهو ماسك السيف
الجملة: انا قاعد على قلبكم

والكلام مفسر نفسه بقى
تحياتى

أُكتب بالرصاص said...

سوسا


هأقول لبابا

يا بنتي امشي جوة الحيط
اداري اليومين دول

:))

بس



بيني وبينك




كلامك كله صح

Ahmed Shokeir said...

سوسة

تدوينة جميلة فعلا بتدل على خلفية ثقافية عالية وذاكرة جيدة
لسه فاكره عمو صدام وهو بالسليب بيغسل الهدوم
ووقفّتك كلمة هيكل إرفعوا أيديكم عن الرئيس عشان خلع الكرافتة أيام الإنتخابات ، هو هيكل كان إيه تاني يعملوه ؟

الجميل ان دمك خفيف من غير استظراف وفيه موضوع في الآخر

Anonymous said...

مصرى متغرب
سوسة كالعادة كلام جامد وكبير واحمد نجاد دة بجد راجل بمعنى الكلمة يعنى الباقيين زى مانتى فهمتى بالظبط مش ...
عموما عايز اقولك ان الراجل اول مامسك الحكم باع الطائرة الرئاسية ودى كانت عادية وقال امها كبيرة ومعاة حاليا طيارة صغيرة جدا وبيستعمل سيارتة القديمة قبل مايمسك الرئاسة ولا مواكب تمويه زى بابا ولا طائرة لبابا وطائرة لاصحاب بابا وطائرة لماما واصحابها
مقولة قالتها صحفيه المانية ( فى كل مرة يصل فيها ***الى المانيا مشعر ان مصر هى اغنى دوله فى العالم والسبب انه يصل بثلاث طائرات كبيرة اى والله العظيم فى حين ان المستشارة الالمانية بتركب بالنفر نعم بالنفر يعنى بتقطع تذكرة عادى زيها زى اى راكب الا لو الموضوع عاجل بتاخد الكرسى الى جنب السواق وتحاسب على نفر كمان

كلمه said...

loool
2aakeny wlhy kont 2a3ed ma3aky btfarag 3la elbarnameg ...

hamdullh ya m3lm ..sha3`lna dma3`na 3shan eltag el3zeem bta3 sa3adtek

el3`etet

sorah : sora le saa3det elbasha odaam el3omra -eyha- w wa7da betsanedo 3shan sakaran w tb3an elwa7ed da mesh 3adel emam wl elwaa7da teb2a hend sabry

kelma t7t elesm : 2na 2arzl waaa7ed fel 3omara de

Anonymous said...
This comment has been removed by a blog administrator.
soosa el-mafroosa said...

SAHAR

أهلا بيكي ياقمر..منورانا ..خلاص أنا هاحجزلك كرسي في الصف الأول على طول..بس ما تبقيش تتأخري...جوزك كمان عما معاكي كده ؟ احنا عايزين نعمل ثورة و نتحرر منهم بقه ...يعني الواحد كمان مش هيعرف يفضفض و الا ايه؟

ahmed hendy

أنا مش كلبوزة أنا سوسة ..كنت كلبوزة زمان بس خلاص عملت رجيم

بالنسبة لنجاد ..أنامعجبه بمواقفه ماليش دعوة بعقيدته ..يعني مثلا بيعجبني شافيز و كمانبيعجبني في التاريخ غاندي ..و ده مش معناه اني باشجع عبادة البقر..انا باتكلم عن موقف سياسي مش ديني

بالنسبة للأسلوب أنا باكتب كده منزمان و ماعرفش أحمد خالد توفيق قوي ..ما قرتلوش غير 3 أو 4 روايات ..بس أسلوبه و أسلوبي و أسلوب معظم الشعب المصري واحد ..مزج الجد بالهزل..لو بطلنا نضحك نموت

رجل المستحيل

أنا سعيدة لنقلك الموضوع ع المنتدى ده لأنه بيخليني أتعرف على ناس أكترو أصدقاء أكتر ..و شكرا لذوقك انك بلغتني..لأن فيه ناس كتير ما بيهتموش انهم يبلغوني و ساعات بينسبوا المواضيع ليهم شخصيا ..شكرا ليك

soosa el-mafroosa said...

ahmos

عادي يعني ماهو عدو عدوي يبقى صديقي..و في زمن يندر فيه رجال المواقف ..لازم نعجب بحد بيتكلم بالشجاعه دي حتى لو كان كلام و بس

moatassem bellah

أخيرا تعليق ..أنا كنت فقدت الأمل انك هتعلق في يوم م الأيام

هو فعلا راجل محترم بس لما نشوف لما يتحط في اختبار حقيقي ..هو ده اللي هيبين معدنه بصحيح

mireille

يا الله شو مهضومى , تقبريني (صح كده و الا بعك) أهلا بيكي يا عسل منوره طبعا و انا سعيده جدا لما حد بيقوللي انه بيضحك معايا و ان البوستات بتعجبة..يا رب أبقى دايما عند حسن ظنكوا

دعاء غريب

أهلا بيكي يا دعء .زأنا فهمت كده انك قريبة سحر ..يارب دايما التجمع العائلي ده عندي على طول

soosa el-mafroosa said...

zangoolaaa

مش عارفة ليه انت نفسك توديني في داهية..قلنا يبقى اسمه تخابر مع جهات امنية ..و بعدين يابني ده شيعي يعني مايجوزش ..أقولك ..عندك
wanna b a bride
بتدور على عريس ..روح اعرض عليها كده يمكن توافق

على فكرة الحديث منشور على موقع شبكة سي .بي.إس..دور على جوجل بس و هتلاقيه

epitaph

أيوة كده أل واحدة تشارك في المسابقة ..برافو ..أنا متفاءله بيكي كده و حاسه انك انتي اللي هتفوزي و هتصيفي في طرة ..قولي انشالله

mizo

يا أخي مش عارفه ليه حتى من أيام الكلية بيجيبولي عسر هضم..بالذمة مش عندي حق؟

soosa el-mafroosa said...

tota

البلوج فيه فوق ع اليمين أعلام دول في مربعات صغيرة..لو عملتي كليك على علم السعودية هيقلب عربي على طول

أيوة انتي كده دخلتي في المسابقه ع الأسبوع بتاع طرة ..شدي حيلك المنافسة جامدة

أكتب بالرصاص

ايه ده احنا فينا م الخبص و الا ايه؟
مااااشي

ahmed shokeir

وحشتنا تعليقاتك..أخجلتم تواضعنا يا فندم ..و بعدين دي حاجات تتنسي؟ أصل انا قلبي أسود قوي و مش بنسى بسهولة

soosa el-mafroosa said...

مصري مغترب

هو الراجل كلامه يوزن النفوخ صحيح و بساطته كمانزي ما قلت أجمل حاجه فيه..ربنا يستر عليه..مستشارة ألمانيا
دي واضح انها جلدة يا عم ..ما عندهاش الرفاهية اللي عندنا ..سيبك منهم دي دول فقرانة مالنش دعوة بيهم..ياي..بنقرف

كلمه

احنا في الخدمة يا باشا..انا أمقق عيني و اتفرج و آجي أحكيلكم على طول ..ولا شهرزاد في زمانها

حل المسابقة جميل ..ضحكني جامج ..و الععمارة عموما فيها نماذج كتير تنفع


المشتركين بالمسابقة لحد دلوقت

epitaph

tota

كلمه

أنا هافضل فاتحه باب الإشتراك لحد الخميس و بعدين نقفله و نعلن النتيجه و نبقى نتفق على معاد نعمل فيه خاتمه للي هيفوز

بالتوفيق يا شباب

Anonymous said...

سوووسة رمز الفرسة فى بر مصر كله
اية الدماغ العالية دى؟ انا كمان شفت البلوج بتاع نجاد من فترة بس مفهمتش منة ولا ربع كلمة للاسف لانه فارسى...حبيت اسيب له تعليق..وبعدها خفت وكشيت...من باب ان الجبن سيد الاخلاق يعنى...الراجل يستحق اننا نرفع له القبعات عالياا..هو مش من بتوع الى الامام يا ريس ولا بطيخ...بوست جامد اوى...سلمى على بابا يختى

NoOR said...

علي فكره الشعب ده طماع قوي ما الراجل طلع قد من سنه كده وقعد يرغي مع الفيل الصغير عماد اديب لأ واتباسط معاه وهرج ده انا خفت الحاج عماد ينسي نفسه ويقله ياد يا سونه

كل ده وتقولوا الكلام البطال ده لأ اخص عليك يا شعب

BackBone said...

انا معاكي يا سوسه, الرجل ده بخلاف موقفه الديني لاكنه متميز و يكفي انه حتي علي رغم من الاخطاء العقيديه بتاعته الا انه مهتم بدينه و ملتزم بيه و مش بيحاول يخبيه زي العبيط بتاعنا ده...

:الشخصية
عمرو موسي

: إسم البلوج
البوب الكبير

: الجملة التي تعبر عن المحتوى
احنا ضيعين ضيعين ضيعين

: صورة البروفايل
جي اي اف. واحد عمال يخبط دماغه في الحيط.

moatassem bellah said...

نموذج الاجابة:
الشخصية:احمدي نجاد
اسم البلوج:القائد الشجاع
الجملة التي تعبر عن المحتوي: نحن بحاجة لرجل , يحكم بحكمة و يرفع كرامة شعبه مثل القائد احمدي نجاد

wanna b a bride said...

الشخصية: أحمد عز

اسم البلوج: ما تقدرش

الجملة اللي تحت الإسم: علي بابا بعد الضنا ..لابس حرير في حرير

الصورة: عيل صغير ..بيحاول يحط الهرم جوة جيبه

Dr. Tantawy said...

الشخصيه : بنت مصريه ( مش المدونه بنت مصريه لكن أي بنت في مصر ) وجب التوضيح

اسم البلوج : غلبتونا

وصف : إلى أول من نرى .. و أكثر من نحب .. و أشد من نكره .. و أرق من نقابل

صوره : بروفايل بنت تكون ملامحها شرقيه و ودوده جدا لكن في بوز يكون نص الوش بس اللي باين و الباقي مظلم .. يعني تعبير عن الجانب اللي مش بيبان من الست .. إلا متأخر ههههه

saso said...

اللة يسامحك .. انا كنت مفروسة اةة وانا بتفرج علي المقابلة بس ماضحكتش الا لما قريت كلامك
علي فكرة لازم تنقي مين اللي في عيلتك يقرا كلامك ومين لأ
لكن باباكي يا مفترية ؟ انا الحمد للة فهمت ماما انها صفحة واحدة يعني القديم بيتمسح وهي مسالمة وجميلة فهتصدق لكن بابا مش بيشوف غير مسنجر وموقع جريدة الاهرام وبس

الأميره أوسه said...

أيه ده
أيه الوصف ده كله
أنتى وصفتى الراجل حته حته
ده اعجاب بقا
طول عمرك كده زى القرع تمدى لبره
مش عاجبك كاظم الساهر بتاعنا
اللى قلع الكرفته مخصوص عشانك
بس بصراحه البوست ده تحفه
أنا قريته مرتين
وتأكدت أننا هنشرف فى نفس الزنزانه
هو الزنزانه بنات بس مفيش شوباب
خساره
خساره
شوباب
مفيش

...دنيتي said...

راجل
100 100

Adel said...

بالذمة اقولك ايه بعد اللي اتكتب ده كله
لكن اشارك معاكي فالمسابقة وامري للمولى استعنا عالشقى بالله
:الشخصية
استمارة من بتوع التنسيق

: إسم البلوج
رحلة عمري

: الجملة التي تعبر عن المحتوى
احنا ضيعين ضيعين ضيعين

: صورة البروفايل
مجموعة من العيال الفشلة اللي جايبين اقل من 100% قدامشباك التنسيق وهما جايبي 97% ومش لاقين كلية محترمة ولا زمان يا تنسيق .

Nouran said...

حلوووووووووووووووو اوي الكلام ده بس كويس انك مسكتي لسانك لحسن باباكي المرة دي مكنش هيعديها
بس انت وصفك حلو اوي انت كنت مركزة ف ايه ولا ايه وانت بتسمعي البرنامج بس انا مشفتش البرنامج ده تصدقي خلتيني اضايق اني مشفتوش من وصفك
اما بخصوص المسابقة فانا ما فيش فكرة والمسابقة هتقفل النهاردة لو لقيت حاجة جت ف دماغي هكتبها علطول :)

الأميره أوسه said...

سوسه
أنتى فين
كنت جايه أتغدى عندك
الظاهر أنك خرجتى
خساره
أروح اتغدى بقا عند الغريب
سلام

توهة said...

هااااااااى سوسه
البوست بتاعك حلو قوى بس كده بدلتى الاسامى بنقط ليه .. يعنى حدخل المعتقل لوحدى وأكل ميتى زينجر لوحدى لالالا مكنش العشم ... يالله ابقى زورينى
وعلى برنامج سيكستى مينت ده بيغظنى عايزين يطلعونا نحن الوحوش وهم الحمام ما علينا

بالنسبه للمسابقه "ع الله تكون الجوايز ثمينه"


الشخص ده يكون :- هتلر

اسم البلوج:- الصراصير تحت جزمتى

الجمله :- اديهم بالجزمه و هم ساكتين

اصلى بعز هتلر ويوم من الايام ححكم العالم وافترى فيه


يالله سلااااام

فانتازيااااااااا

Gid-Do - جدو said...

سوسة المفروسة وابيتاف واوسة مع بعض يبقى جدو التائب لازم يمشى والمثل بيقول لولاك يالسانى متلسعت ياقفايا
وكوندى ملكة جمال الكون والاكوان اللى جنبة كمان ونجاد فارس ـ مشتقة من مفروسة مش الراجل ابوحصان ـ كوندى علشان احلى منها

soosa el-mafroosa said...

shahrzad
أهلا يا حبيبتي ..بابا كمان بيسلم عليكي قوي..الموقع على فكرة ممكن يقلب عربي لما تضغطي على صورة علم السعودية اللي فوق ع اليمين.. و بعدين على رأيك الجبن سيد الأخلاق ..خلينا احنا مع فلافيلو...

noor

إحنا جبنا سيرة بابا سونة يا أخي بكلمة وحشة ..انت عايز تدبسنا و الا ايه.؟
backbone

بالظبط كده المهم الموقف ..و العقيدة دي بقه بينه و بين ربنا ..أهلا بيك في المسابقة

soosa el-mafroosa said...

moatassem bellah

wanna b a bride

zangoolaaa

أعضاء جداد في المسابقة ..بس زنجولا يظهر محروق شوية من حد معين

saso

إزيك بقالك كتير ما جيتيش..كان المفروض تنصحوني قبل ماعمل العملة المهببة دي و أوري بابا البلوج ..ياللا معلش أنا وريتله شوية بلوجات كده و فهم اني مش هاروح السجن لوحدي ..أهم حاجه الونس

soosa el-mafroosa said...

aoossa

شزفتي يا قمر..أنا سامعه انهم عاملين زنازين مشتركة بس دي لازم تقدمي فيها بدري عشان العدد محدود..و بالنسبة لنجاد ..طب بذمتك بذمتك مش الراجل قمور..كاظم الساهر اللي عندنا ده..خلاص يا أوختي ماعدش عارف يقف ..لكن دوكها لسه شباب

دنيتي

تمام كده

المزاجنجي

أول مرة تيجي ..صح ..ابقى تعالى على طول

حل المسابقه حلو ..بس مايساعدش انك تدخل بيه طره ..طره بتاخد موضوعات تانية ..و الا انت عايزنا نروح لوحدنا

soosa el-mafroosa said...

nouran

الحلقه على فكرة موجودة على موقع قناة ال سي بي إس ممكن تجيبيه من على جوجل..كده تفوتك المسابقه ..المفروض إنت أول واحده تدعم الوزارة..يالا معلش كلكوا بتبيعوا كده ..طب هاكتب اسمكوا في اللستة

aoossa

طب كنت تقولي يا حبيبتي ..دانا حته كنت عاملة بامية تستاهل بقك ..يالا المرة الجاية بقه..كلتي ايه عند الغريب بالمناسبة

فانتازيا

مافيش قلق من موضوع الدخول للمعتقل فرداني دي .. أنا خلاص اطمنت لننا هنخشه جمعاااء..و هنخلصلهم ع المايتي زنجر اللي في البلد

هتلر مرة واحدة ..دانت كده على مجلس الأمن عدل

gid-do-جدو

والله وحشتنا يا جدو .. إنت مابتجيش ليه؟؟؟

كوندي دي كوندي دي قمممر ..بس هما دايما بيكسلوا يحمضوا صورها و بيطلعولنا العفريتة

soosa el-mafroosa said...

نتــــــــــائج المســـــــابقة

المشـــــتركين:

epitaph>>>>>>>جيمي

tota>>>>>بابا سونه

كلمه>>>>>>بابا سونه

backbone>>>>عمرو موسى

moatassem bellah>>>>>>أحمدي نجاد

wanna b a bride>>>>>>أحمد عز

zangoolaaa>>>>>>البنت المصرية

المزاجنجي>>>>>>استمارة التنسيق

فانتازيا>>>>>هتلر


وبما ان لجنة فرز الأصوات لمست مدى الجهد و الإبداع الذي بذله المشتركون في بلورة أفكارهم الهدامة (قصدي المبدعة) فقد تقرر تعميم الجائزة و توزيعها على المشتركين بالتساوي ....و على رئيسة اللجنة القيام بإرسال أسماء المشتركين إلى المسؤل عن تنشيط السياحة بمنتجع طرة السياحي الدولي لإتخاذ اللازم

هييييه..مش هاخش طرة لوووحديييي

عوليس said...

طريقتك فى عرض الحديث ممتعه جرتنى اقراه للاخر رغم طوله

الأميره أوسه said...

بـتسألى أكلت أيه عند الغريب
أكلنا أكل ماتفكرنيش بقا
متكسفنيش
وروحت الصيدليه أشترى الصراصير
وعدوك على أللى حصل
الشقه عندى أتملت صراصير وخبط على شقق العماره كلهم احذرهم من غزو الصراصير
ماشى ياسوسه
مسيرى أردهالك
أأأأأأموه

Anonymous said...

مبروك علينا البامية..يوووه قصدي الجايزة
:))

Aladdin said...

متعرفيش امتى سيعاد هذا البرنامج؟!! بجد الواحد كده فاته كتييييييييييير.

توهة said...

لالالالالا ... محبش اتقاسم الجايزه مع حد ماانتى عارفه هتلر بقى .... ومجلس امن ايه ده دنا حشيله وأعمله مجلس ارهاب على عينك يا تاجر واللى مايشترى يتفرج كالعاده مش جديده

فانتازياااااااا الفتاكه

soosa el-mafroosa said...

عوليس

إحنا في الخدمة يا فندم ..شكرا ع التشجيع

aoossa

مااشي اللي ياكل لوحده يزور ..بس ايه رأيك في حبوب الصرايير .زتديكي المبرر انك تضربي التخين بالشبشب عل نفوخه و ماينطقش

epitaph

مبروك علينا الإتنين ماحنا هناخد البامية معانا في أسبوع الجايزة

فانتازيا

هايل هتلر ..و النبي مانتي زعلانه ..الجايزة كلها ليكي و أكيد مافيش حد هايعترض..ده طرة هتنور

أبو فروة

الحديث على موقع شبكة سي بي اس ع النت ..بس ماعرفش اذا كان هيتزاع تاني و الا لأ..

tota said...

سوسة
انا متبرعة بالجايزة لهتلر
انا صحتى على قدى والميتى زنجر بيتعب معدتى
روحو انتم وانا هحصلكم فى الفوج التانى
ميرسى على الجايزة هو قلبى ده اللى مضيعنى كل حاجة كده اتبرع بيها مش عارفة مصلحتى فين
تحياتى

Adel said...

سوسة منك للي كلت دراع جوزها انت مش فاكراني انا اللي كن ميت من كام يوم انا من زماااااااان وغيرت اسمي للمزاجنجى وعموما مش عاوز منك لا جوايز ولا غيرة انا باصيف على ماسورة ميه طافحه في اول الشارع ارحم من مليون طره بتاعتك دي

soosa el-mafroosa said...

tota

آدي التواضع و حب الآخرين اللي احنا محتاجينه ..ربنا يطمنا على قلبك يا جميل

المزاجنجي

ماشي ماشي طب ماتزقش ..مصيف سعيد يا باشا .بس خد بالك خد معاك ازازة بيروسول هتحتاجها

سمسم said...

والله انتى عسل جدا ياسوسة اعسل من احمدى نجاد كمان ...اختك سمسم

hot man said...

ياناس ياهو
ياجماعه انتم ليه تفتكروا ان الشيعه مش مسلمين؟
انا باقرا تعليقاتكم واتاسف من الفكر المنحرف الذي يحمله الاخوان السنه عن الشيعه
والله العظيم احنا مش زي ماتفتكروا
احنا مش بنشتم الخلفاء او الصحابه او امهات المومنين
طبعا في كل دين او مذهب ممكن فيه متعصبين ومتطرفين بيسئوا للدين بصوره عامه بس المهم احنا ماننصاع لهذه الاشياء ونشمت الاعداء بالمسلمين
علي كل اتمني من الله عزوجل الهدايه للجميعوالنصر للمسلمين والعرب
علي فكره انا ايراني بس افتخر بجذوري العربيه واسف علي حال العرب
وارجوكم قبل ماتحكموا علي الشيعه وعقيدتهم التي لاتخرج عن الاسلام ادرسوا واتعرفوا علي حقيقه المذهب الشيعي وبعدين احكموا

Anonymous said...

ابن بطوطة حمدلله على سلامتك الصور جميلة جدااا الله يوفقك يارب بحياتك وشغلك وشكرا لانك شاركتنا بجزء من رحلتك احترامي وتقديري