من فضلك لو سمحت يا أخ لو سمحتي يا أخت
انا باطلب منكم و بترجاكم ..انتوا ليه منشفين دماغكم كده؟ ليه موش عايزين تتحركوا؟
يئستوا ؟
زهقتوا ؟
مش عشاني ..عشانكوا
مافيش حاجه بعيده على ربنا ..ممكن ..والله ممكن ..ليه لأ
أمال بتدخلوا هنا ليه
امال كل اما يتفتح موضوع الفساد و التمديد و التوريث بتتحمسوا و تتكلموا ليه؟
هي أخرتها اننا نكلم بعض؟..و نسمع بعض؟..وبس
طب مانجرب
نحاول ليه لأ؟
نحاول ليه لأ؟
مش هانخسر كتير..كلها مشوار كله على بعضه مش هيعدي نص ساعة مشوار صغير للقسم
أيوة القسم...ليه؟
كل اللي عدى سنه 18 سنة قدامه فرصة من دلوقتي لغاية آخر يناير يسجل اسمه في الكشوف و يطلع البطاقة الإنتخابية
من فضلك يا أخ انت ..ليه بتقول يوووه؟
وانتي ليه بتهزي دماغك و تتنهدي و تبصي للسقف؟
طب استنوا استنوا ..هدوا نفسكوا
يا جماعه الموضوع سهل جدا و عن تجربة مابياخدش وقت خااالص
دانا اللي بنت رحت و عملتها ..انت يااللي راجل ملو هدومك خايف ليه؟
وانتي ؟ ..خايفة تدخلي القسم؟
مش بعبع يعني و مش بيتلككوا و مستنيينك عشان يعتقلوكي ..عندهم كتير..و التعامل كله مع الموظفين مش مع الشرطة خالص
كل اللي محتاجينه صورة البطاقة و بس و تروحوا تملوا استمارة واحده و بعدها باسبوعين تروحوا تستلموا البطاقة بتاعتكم
طب لازمتها ايه؟
أقولكم ..دلوقتي طبعا يتهيألكم مالهاش لازمة ..مافيش انتخابات ولا حاجه تحتاجها
أقولكم ..ساعة مابيبقى فيه انتخابات و يبقى نفسكوا يبقى فيه بطاقة عشان تنزلوا تنتخبوا بيكون باب الإستخراج للبطاقات مغلق
هتقولولي لسسسسه 4 سنين على انتخابات مجلس الشعب و 5 على انتخابات الرئاسة ..يعني لسه بدري مش هاقولكم غير جملة واحده..الأعمار بيد الله ...أظن مفهومة
هتقولولي صوتنا مش هيغير حاجه
هقولكم الناس في انتخابات المجلس اللي فاتت قبل المرحلة النهائية - بتاعت التزوير و مصطفى الفقي- الناس قالت كلمتها و اتسمعت
فوق التمانين من الإخوان و فوق المائة من المستقلين نجحوا رغم انف الحزب
صحيح المستقلين انضموا بعد كده للحزب -أو أجبروا على الإنضمام مش فارقة- لكن ده النهاردة ممكن بكرة كل حاجة تتغيرو البلد تتغير
و مش هتتغير طول ماحنا حاطين إيدينا على خدنا و بنتفرج من بعيد
يمكن في يوم من الأيام انا وانت وانتي واللي زينا يقدروا ينتخبوا حكومة ونظام مختلف
حكومة توفرلنا أمن عشان ماحدش يتحرش بينا في الشارع
حكومة ماتوفرش حماية لواحد اتسبب في قتل ألف واحد في عبارة و تسهله هروبه
حكومه ما يبقاش أهون شئ عليها هو الشعب اللي المفروض بتخدمه
حكومه مايسيبش رئيسها الناس بتموت و يروح يتفرج على ماتش كورة
حكومة ماتلومش الغلابة المحروقين في قطر انهم هم اللي أغبيا و مابيعرفوش يركبوا قطارات
حكومة ما تغليش البنزين و السولار على كيفها و تتحرق البلد باللي فيه
احكومة ما تسامحش في دم ولادها اللي بيتقتلوا ع الحدود و تكتفي بالشجب والإستنكار
حكومة تحكم بلد يتقدر فيه العلم و المتعلمين و ماتبقاش الغلبة للعيبة الكورة و الراقصات
يا رب ماكون بانفخ في قربة مقطوعة
ماهي مش هتبقى فرسة و قطع نفس ع الفاضي
من فضلك ..لو سمحت
من فضلك ..لو سمحتي
روحوا طلعوا البطاقة الإنتخابية
يمكن
84 comments:
بسسسسسس
قفشتك يا سوسة
اول واحد ارد اهو
يالا ابسطي يا ستي
تحطي البوست من هنا
تلاقي الرد بعد 10 ثواني :)
بصي يا ستي
انا عن نفسي فاهم كلامك كويس ...ورحت القسم قبل كده (((ربنا يبعده عننا يارب)) عشان اطلع بطاقة انتخابية ..بس هما قالولي اني ممكن انتخب بالبطاقة الشخصية
والحمد لله عرفت انتخب
وممكن اي شاب عايز ينتخب بالبطاقة الشخصية ..يسأل هل اسمه موجود في كشوف الانتخابات ولا لأ ...
بس بجد يا سوسة ..كلامك ده بيدل على حاجات كتير اوي اوي اوي فيكي
بجد ربنا يبارك فيكي ويكرمك في حياتك
ويديكي
على قد نيتك في اصلاح البلد ده اللي خربوه المفسدين
يااااااااااهههههههه
يا خساره
كان نفسي اكون صاحب تعليق اول ولو لمره واحده
ماشي يا اخ واحد من الناس
كسبت انت المره دي
لكن مش مشكله اهي راحت لواحد صاحبي
يا اخت سوسه انا سعيد جدا بان فيه بنات بالوعي العالي ده
لا ..وكمان صاحبة دعوه لعودة الوعي السياسي كمان
انا شايف ان الناس فعلا زهقت و ياست و مللت ومفيش حد مصدق اي حد
الناس خلاص عايزه اما ثوره تجيب حقوقهم (انقلاب عسكري علي طريقة عبد الناصر)او محتاجه نكسه تصحيهم و تصحي النخبه الحاكمه
أنا بضم صوتى لصوتك
وأن كان ليه تجربه مع الأانتخابات سيئه
بس ده من سنين
أنى روحت أرشح واحد لمجلس الشعب ومعايه واحد قريبى واتضح أن حد صوت بداله يعنى الأصوات كانت بتتاخد وأحنا فى بيوتنا والضابط قاله أنت مش رشحت جى ليييييييييييييييييييييه
أنت عارفه لو الناس تضمن نزاهة الأنتخابات فى كل لجان مصر
كل الناس هاتروح بنفسها ومهما حاولوا يشتروا أصوات مش هايقدروا
وصدقينى ده عمره ماهيحصل غير برقابه من قبل الجيش أو جهه أجنبيه وده مش عيب ولا حرام المهم أننا نوصل لأنتخابات حقيقيه
القضاه خلاص ملهومش هيبه ,اصغر ضابط ممكن يبهدل مستشار
فى دهاليز العمل السياسى فى مصر فى فضايح ومؤامرات ودسائس
فيه ناس ماتت من سنين (توفت) ورغم ده روحهم بتروح تنتخب وكمان بتروح تصرف علاج التأمين الصحى وتصرف معاشات
ولهم مميزات أكتر من ناس على قيد الحياه
ورغم كده أنا معاكى لأخر المشوار لما أشوف أخرتها أيه فى البلد دى
بالمناسبه أنت ضغطك كام
أنا ضغطى واطى على طول ممكن من الفرسه
اللى جاتللى مؤخرآ
أفوتك بالعافيه أأأموه
شعار المرحله
الله الوطن الفرسه
جميلة فرستك دى ياسوسه بس التجربة خير برهان،، عن نفسى يئست وجدا، وشايفة انه مفيش امل ،،، مش سلبية ولكن التجربة خير برهان، احنا عاوزين الف سنة ضوئية علشان كشعب نتغير ونعرف فعلا ندافع عن حقوقنا ، ولما توصلى لسنى كده حتعرفى ليه يئست، لم تفضلى تناهدى وتجاهدى ويطلع عين اللى خلفوكى ومتعرفيش حتى تاخدى ابسط حقوقك يبقى لازم تكرهى العيشه واللى عايشينها مش بس تيئسى وتقولى مفيش فايدة...
تحياتى لحماسك وفرستك
هي فكرة برضة بس عارفة لما اطلع بطاقة الاول
هابقي افكر اعمل بطاقة انتخابية
ههاها
بس عارفة بجد فكرة شغالة يعني
علي الاقل يبقي عملنا الي علينا
كويس انك فكرتيني بالميعاد ده قبل الانتخابات بتاعت الرئاسه اللي فاتت كنت عايز اصوت - ربنا يكرم ونصوت كلنا - عالريس -متفهمونيش غلط يا جماعه انا قصدي اديله صوتي - بس مكانش عندي بطاقه انتخابيه قلت اعملها قبل ما يقولولي الباب اتقفل او اتوارب قوم ايه الاقيهم بيعملوها شهرين في السنه بس لكن وحياة الغاليه لأعملها المرادي علشان اختار واقول اختارناه اختارناه واحنا معاه لمشاء الله -اللي هي الانفنيتي - سبحان من له الدوام
يقولون أن الظلم لا يصنع ثورة الأحساس بالظلم هو من يحرك الناس ليثوروا ويغيروا من أنفسهم
يمكن أحنابقى معندناش دم .....يمكن
العزيزة سوسة
احييك من كل قلبى على هذا الموضوع الخطير والذى ان امكننا ان نصل به الى اغلب الشباب عندها اقول انه
ربما
بامكان شعبنا ان يحدث التغيير والذى بات حتميا من اجل هذة الامة التى تتلاعب بمصيرها مجموعة لا هم لهم
الا
الكراسى التى يجلسون عليها .....وبما ان موضوع من هذا القبيل يجب ان نقوم بنشره فى كل مكان فاننى
اقترح عليك ان نقوم بنشر الموضوع على طريقة التاج صابنى والذى انتشر بين المدونين بطريقة مدهشة وسريعة
ولسوف ابدأ بنفسى فى نشر الموضوع مع الاحتفاظ بحقك فى الملكية الفكرية...وعليه اقترح لمن يقوم بنشر
الموضوع ينوه ان صاحبة الموضوع هى الاخت سوسة المفروسة.....هذا مجرد اقتراح وانتظر الرد وشكرا لك
مرة اخرى مع خالص تحياتى
Soosa. You're idea is innoviative, but far from applicable, and ultimately, ineffective, why?
We all heard about last year's "Ta3deel Dostoory raqam 1243123"... however, you'll notice that eversince, not ONE single "known" newspaper has bothered writing the exact script of this modification in the Egyptian Constitution.
Why? Well I was lucky (or unlucky) enough to read it in a law school University book that belongs to a relative of mine studying law in Egypt. Maskhara. The rough translation of the paragraph at the end of the modification goes something like this:
-The entire processes of electing, voting, gathering the votes, counting the votes, and confirming the count of the votes will all be under the total control and responsibility of "Lagnit Al-Intikhabat el-re2aaseyya". The decision and all previously mentioned process are NOT to be monitored by any other governmental/non-governmental party. The decision and processes are NOT subject to opposition, criticism, or unacceptance by any parties.
So who is this "Lagnit el-intikhabat el-re2aaseyya" responsible for virtually everything regarding these "elections"? The "lagna" consists of.... nine indiviuals (!!). Who are they? One, is the parilment member with the highest experience. The 2nd, is the head of the counsellor congress. 4 others are people "mash-hood lahom bil mo7aayada" :D:D and I can't remember the others, but basically, they all belong/are loyal to the same ruling party...
So, regardless the votes, the process, let me tell you something: MET3AFFILA, MET2AFFILA, MET2AFFILA.
I actually couldn't believe what I was reading in the Egyptian Constitution book. I mean, I was expecting something like this, but NOT THIS. Met2affila. Me2affila. Met2affila.
Soosa, I read in your article that you are using the parliment's latest results (with el-ekhwan winning and all) as proof that, *it* is possible. However, now that you know, the entire voting process is different than the presidential voting process. Entirely.
و الله نبقي عملنا اللي علينا
علشان لما نسئل ميكنش فيه اي تقصير (ولو ظاهري ) و لو حد قال معملتوش اللي عليكم نقول ...لأ عملنا بس هما المزوزين ...و ينضاف ذنب من الذنوب لجبل السيئات بتاعهم :)
قاوم فيداك الاعصار
لا تخضع فالذل دمار
و تمسك بالحق فان الحق سلاحك مهما داروا
قاوم فيداك الاعصار
و تقدم فالنصر قرار
ان حياتك وقفة عز تتغير فيها الاقدار
يا ايها الكبار - جوليا بطرس
مع خالص تحياتي :)
ياريت للبطاقه الانتخابيه فايدة .يلا ما علينا
انا شايف طول ما حال البلد زي ما هو
يبقى ملهاش لزمه
لما يكون في احترام للمصري على ارضة
اكتر من الاجنبي ابقى اطلع البطاقة
ولما يكون مفيش سرقه في البد ابقى اطلع البطاقة
لكن طول ما الوضع كدة ملهاش لزمه البطاقة
تحياتي
والله تستاهلي التحيه علي تذكيرك للناس
احييكي علي المبادره الرائعه دي ويمكن
لاننا خلاص والله اتخنقنا
قبل اصدار بطاقة انتخابات لنفسي
اطالب الحكومة باصدار بطاقة نزاهة لنفسها
اية فايدة التصويت
و التزوير عيني عينك؟!!!
الفائدة الوحيدة ان يوم الانتخابات بيبقي اجازة و اهي فرصة افسح العيال
لا بجد ربنا يباركلك ياسوسه ويكرمك لانك بجد عملتى حاجه فى بلوجر كتيره ومواقع كتير بتتكلم فى السيايه لكن منصحتش الناس ولا قالتهلم انهم يخدوا خطوه وتوعيهم وتعرفهم بان فى دلوقتى ممكن تطلع البطاقه الانتخابيه
تحيه من ليكى
و الله يا سوسة انت بنت جدعه جدا جدا جدا
يعني مدونات كتيرة و قليلة بتتكلم في السياسة و تسب في النظام لكن ماحدش فيهم قال قوموا غيروا و اعملوا اللي عليكم
أحييكي و هاخد بنصيحتك و هاروح أطلعها ..مانا أصلي عديت ال18 من زماااان
للأسف
تحياتي
احييكي من اعماق قلبي
بس
تضمنيها نزيهه
هيهات
على العموم التجربه خير دليل
ياي عايزاني أروخ أنتخب وصباعي يتعاص فوشيا؟؟؟
لأ يختي أنا مقاطع
ودي إيجابية بس على الطريقة المصرية
برضه عمر قناوي بيقول لي لازم أروح أطلع بطاقة انتخابية وانا اللي حاسس إنه المقاطعة أشد دلالة من المشاركة في انتخابات مزورة
لما تعرفي إن الـ 88% اللي نجح بيها بابا حسني هي 88% من 23% من من يحق لهم الانتخاب تقدري تحسبي شرعية الراجل
الـ 88% من الـ 23% تطلع تسعتاشر في المية بس
أنا مازلت من الـ 77% الصامتى صمتا إيجابيا
مش بقول الكلام دا في العموم وكأنه الصواب المطلق
ناقشوني وخدوا وادوا معايا ويا تقنعوني يا اقنعكم
بيعجبني فيكي تفاؤلك الذيادة تفتكري صمتي هايجيب نتيجة
حال البلد لا يدعوا للتفاؤل اعذريني علي تشاؤمي بس قولي لي فيه حاجه تدعوا للتفاؤل
حسبى اللة ونعم الوكيل
دة شعارى الرسمى للمرحلة القادمة
يا سوسمة يا حبيبتى انا عندى بطاقة انتخابية
ورشحت فى انتخابات الرئاسة ايمن نور
وسقط الراجل بفعل فاعل
قلنا وماله يمكن الناس رشحت مبارك من ورا قلبها من باب اللى نعرفه احسن من اللى منعرفوش
جات انتخابات مجلس الطين والوحل
اديت المدعوق صوتى لمرشح الاخوان
الراجل اكتسج باربعة وعشرين ألف صوت ضد مرشح الوطنى اللى نابه أربع الاف صوت بس
تعرفى حصل اية؟؟
بتاع الوطنى قدم استشكال
ورغم ان الفارق فى الاصوات كبير جدا ويمنع مجرد الاعادة
حكمت المحكمة الموقرة ببطلان الاصوات لمرشح الاخوان
والاعادة لصالح الوطنى
ولحد دلوقتى دايرتنا مالهاش مندوب تحت القبة
تعرفى عملت اية أما عرفت النتيجة؟؟
شقيت البطاقة نصين ورميتها فى اقرب كيس زبالة قابلنى
بس وماله يا سوسة
اطلع بدل تالف يا سوسة
عشان خاطرك يا سوسة
مع انى عارفة انه مالوش لازمة يا سوسة
فى الاخر حناكل البطاقة يا سوسة
ومازلت اتمسك بشعارى للمرحلة القادمة
عندك حق يا سوسة. يا ريت نبقى ايجابيين شوية مش نقضيها كلام وخلاص
العزيزة سوسة
لاول مرة افخر بسلبيتى
لا احمل بطاقة انتخابية فى بلد الانتخابات فيها غير نزيهة
قد افكر ان احمل بطاقة انتخابية عندما يكون الاختيار موجود اما الفرض فهيهات هيهات ان استخدم صوتى واقهر ليفرض على صوت لم ارشحه من الاساس
انا اتفق مع الحج جرجس انا حجب الصوت هو منتهى الايجابية فى بلد لا تنعم بالديموقراطية وحكم الشعب بالشعب لصالح الشعب
انما نحن فى بلد تحمل اسم الديموقراطية ولكنها ديكتاتورية ملكية
الحكم فيها ليس من الشعب ولا لصالح الشعب
لو ضمنتى نزاهة الانتخابات وان صوتى لمستحقه اول من يسجل اسمه سيكون انا
تحياتى
عاشت الدكتورة توتا نصيرة المظلومين والمهمشين
أخيرا أنا وتوتا اتفقنا على حاجة الحمد لله
كدة أقدر أموت يا توتا يا حبيبتي وقلبي مستريح ومفيش في نفسي حاجة
لأ لسة
مش هموت قبل مشوفك يا توتا وانتي وانتي...
وانتي...
(لأ مش في بيت العدل )
(أنا الحاج جرجس مش الست والدتك)
قبل مشوفك وانتي بتتملي مدونتك تدوينات قوية وجامدة طحن
كدة خلاص أموت وانا مرتاح
خلي عندك أمل
انا ناوي اول لما اخلص ارشح نفسي ف الانتخابات
مرشح مستغل عن دايره شرش ابو لمونه
ادعمووووني في الانتخابات القادمه
بصى بأه يا ست سوسه انا بقالى 10 سنين عاوز اطلع بطاقه مصريه شخصيه مش عارف
انا معاى بسبور امريكى ورخصه سواقه امريكيه وكله امريكى. بس انا نفسى لما انزل مصر انزل كانى مصرى مش سائح. فحاولت اعمل البطاقه الشخصيه علشان اعمل بسبور مصرى. واقسم لك ان للى انا شفته ينفع يبقى فصه من قصص الف ليه وليه
فقررنانحن الاحتفاظ بالاوراق الامريكيه وصرف النظر عن البطاقه المصريه ولو ان نفسى فيها
انا شخصيا لا تجارب لي في استخراج البطاقه لان عمدة القريه كان في الانتخابات و دار علي البيوت بيت بيت صور بطاقات الشباب الشخصيه و طلع لهم البطاقات الانتخابيه ووصلها لبيوتهم
لانه هو المستفيد الاول طبعا
واحنا بعده
عزيزي اتنين آر
رأيي قطع بطاقتك المصرية يا بني وامشي مقطع البطاقة ولا حد هيقدر يفتح بق أمه معاك
الحاجة التانية
في مصر بسبورك الأمريكاني ده يفتح لك جميع الأبواب المغلقة
بما فيها لجان الانتخابات
صدقني كمواطن أمريكي هنروح وتنتخب ومن غير بطاقة انتخابية أو حتى شخصية
الحياة بسيطة
وخليك كووووول
عاشت مصر حرة مستغلة
ولتسقط أمريكا بلد الحرية وحقوق الإنسان
وسلم لي ع سد الحنك
A great idea Soosa, I a afraid that farsetic tezeed after any coming elections. However i ask all people to have an election card valid for any time. Who knows?
Reformer1976
شكرا يا باشا ع التعليق ان شاء الله انا حاى مصر كمان شهر والمفروض نتقابل. انت عاوز تضحك بأه. انا قلت اعمل البطاقه دى من السفاره علشان العقول هناك منيره شويه عن قسم حى المنتزه. فوصلنا لخانه المهنه فانا قلت له انى شغال فى التسويق فقالى من نقدر ش نكتب كده لان شغلك حه اجبنيه وما عندهمس ختم النسر. سألنى أخر مؤهل علمى قلت انا فاضلى زقه ع الماجستير قال لى لا اخر مؤهل علمى من مصر. قلت لا يوجد لانى مشيت من ايام ثانوى. والبكالريوس والماجستير من نيويورك الحبيبه فالرجل مش عارف يكبت المهنه ايه فقلت له مش عايز دين البطاقه يا عم الحاج انزل مصر على انى سايح احس
تصدقى وتؤمنى بالله أنا ماشى فى موضوع أستخراج البطاقة ده بقالى 6أشهر ببساطة لأنى محل أقامتى مختلف عن محل الميلاد واهو الحمد لله هانت وقربت أستلمها الشهر ده
تشكرى على التنويه الجميل ده
العزيزة سوسة
انا ادليت بصوتى فى خمسة انتخابات رئاسية فى امريكا
كلها اسبوع باذن الله واكون فى مصر المحروسة واوعدك انى راح اطلع البطاقة الانتخابية ـ حتكون اول بطاقة انتخابية فى تاريخ حياتى فى مصر ـ
وانا عندي امل ومش مع المقاطعة السلبية ماهو يا جماعة بيتحط الصوت كده كده واحنا مش موجودين فلو من باب حرقة الدم اروح احطة انا من باب قفل الباب عليهم حتي مش اكتر.. علي الاقل اعرف حطوة ولا لسه مستنينني
سوسة دايما بوستاتك حلوة.. وده احلي كمان
واضم صوتي إلى صوتك
ومش بس كده
لازم نكون ايجابيين
ونروح الانتخابات
علشان الورقة الفاضية
هتتملي بمعرفتهم
ومش بس كده
لا
وندي صوتنا للي يستاهل
للي مش محتاج منفعة دنيوية
وسلم لى على الحزن الوثني
على فكرة يا سوسة انا لاحت السنه اللي فاتت ومشوني ومش طلعولي البطاقه الانتخابيه
بس انتخبت بردو
هروح تاني يمكن يرضو
والله دعوة مشجعة انا هاروح ان شاء الله مع ان الواحد يدخل غرزة اضمن من دخول القسم بس نعمل اللي علينا شكرا علي الدعوة
بوست حلو بس انا لسالي سنة وكام شهر
بس عاوز افهم لما اموت هايستفادوا ايه لو ماعنديش بطاقة انتخابية
واحد من الناس
هو ده العشم برضه ..عموما عشان انت أول رد ليك جايزة
..الفجلة الذهبية ..
ابسط يا عم
انت من الناس الإيجابية و صح مادام اسمك في الكشوف تقدر تنتخب
اللي اسمه مش في الكشوف هو اللي لازم يروح يأيده
ذو النون المصري
ما نزعلش المرة الجاية تبقى انت الأول و تاخد الفجلة انت كمان...ولا يهمك
موضوع الثورة أو النكسة دي في ايد ربنا ..
احنا اللي في ايدينا البطاقة و صوتنا في الإنتخابات
يبقى نعمل اللي علينا
aoossa
الله الوطن الفرسة
أهلا بيكي يا أوستي في طريق الكفاح
ولازم مانبطلش نروح و ندي أصواتنا لأن ده اللي هيخليهم مايحطوش صوت حد تاني مكاننا
لو كل واحد راح ماحدش هيدي صوته مكان حد
أما عن المتوفين بأه
فالداخلية كتر خيرها
هي عارفه انهم أكيد كان نفسهم يصوته و مالحقوش فبتحققلهم أمنيتهم الأخيرة
ماتظلميش الداخلية يا أسأوستي
أمممواة
بعدك على بالي
لا أنا مايرضينيش انك تيأسي
لو لسه فاضل ألف سنة ضوئية على مانتغير يبقى لازم نبتدي نشارك من امبارح و مانستناش لغاية بكرة
لازم نحاول
والا هيبقى منظرنا ايه قدام نفسنا
لو كل واحد خاول ياخد حقه يبقى ماحدش هيركبنا بعد كده
صدقيني احنا أكتر ..بعد كده هما اللي هيخافوا مننا
mongey
هو انت لسه ماطلعتش بطاقة؟؟؟؟؟؟؟؟؟
ليه يا مونجي هو انت أقل من 16 سنة؟؟؟؟؟؟
لا ماتقوليش ..طب عموما هي البطاقة من 18
ابقى فوت علينا بعد سنتين
الساعة 12 الضهر
noor
انشاء الله الصويت هيبقى جماعي
يووة قصدي التصويت التصويت
انا فكرتك أهو بالميعاد
روح طلع البطاقة بأه عشان تصوت للريس أو ابنه أو ابن أخوة
أهو أي منوفي والسلام
البلد دي من غير المنايفة تغرق
أحمد
هيحصل يعني هيحصل
بس لازم الأول نرجع الإيجابية لحياتنا
و نرمي السلبية ورا ضهرنا
واحده واحده
كله هيتغير انشاء الله
سيبها على الله
شكر على التشجيع
انا كمان من رأيي ان الموضوع لازم ينتشر بين المدونات
انا حاولت أنشره هنا و في المجموعه البريدية اللي انا عضوة فيها
ياريت انت كمان تنشره عندك
المهم اننا نحاول نعمل حاجه
قبل انتهاء الميعاد
المهاجر المصرى
شوف يا ابني
لو معاك جنسية تانية غير المصرية يبقى كدة فلة أوي
حضرتك تيجي كسايح أشرف لك وتحط رجلك في عين التخين
وغالبا لو حبيت تصوت بالباظابورت الأمريكاني كمان هيقولولك أهلا وسهلا على راس أبونا من فوق
لكن عايز تسوق الهبل ع الشيطنة وتطلع بطاقة انتخابات مصرية من سفارتكوا اللي هناك يبقى يا أخي
لا مؤاخذة
انت مفكر نفسك فين
إنت أكيد أكيد في مصر
(ما هي السفارة برضه أرض مصرية حتى لو في بلاد الغربة)
ما تنساش تجيب لي الدي في ديز والمجلات معاك يا ريس
راسلني على إيميلي عشان لما تيجي نشوفك
reformer1976@yahoo.com
يا أستاذة سوسة
هو انتي ما بترديش إلا على المؤيدين لرأيك وبس ولا إيه ؟
فين ردك يا أستاذة على رأيي المضاد أنا والدكتورة توتا؟؟؟
ولا انتي ديموقراطيتك تكيل بمعياريين؟
لأ لو كدة حرصي مني
أنا ديمقراطيتي زي الله يرحمه السادات ديموقراطية لها أنياب
وكله هييجي ع المفرمة
tarek
انا معاك ان القوانين كلها متخلفة و معوقة
والتعديلات اللي بتحصل في مواد الدستور هلامية و و مالهاش أي فايده
لكن طول ماحنا قاعدين نتفرج و بس مافيش حاجه هتتغير
مابقولكش عتتغير بكره والا بعده.لكن لازم نبتدي ناخد خطوة خطوة لحد مانوصل
شمس الدين
تمام يا شمس
حتى من باب أضعف الإيمان
لكن كمان طول ماحنا بعاد..هنشجع اللي بياخدوا حقوقنا ع الظلم و التزوير كمان و كمان
salateenoo
وائل عباس بيقول ان الفيديو ده من العيد الكبير السنة اللي فاتت؟؟؟؟
دماغ ماك
الله يجازيك يا أخي
مش تحذر ان البنات مايروحوش و مايشوفوش الكلام ده
بالعربي
طبعا عمر ما هيبقالها فايده
طول ما حنا بنرميها ورا ضهرنا
واحده واحده الوضع هيتغير
صدقني
lionking
و طول مانت سايبهم يعملوا اللي في مزاجهم
و قاعد تتفرج من بعيد
يحترموك والا يحترموني ليه؟؟
و ما نيل المطالب بالتمني
ولكن تؤخذ الدنيا غلابا
daktara
تشكر يا دكترة
و لو واحد بس استجاب
انا راضية
محمد مفيد
شكرا ليك يا محمد
و ياريت المسألة دي تتنشر و الشباب كله يستجيب
كلبوزة
طب قوليلي ايه الحل
نركن احنا على جنب و نسيبهم يعملوا اللي عايزينه؟
يا كلبوزتي ماتعلميش العيال السلبية
و ابقي خديهم فسحيهم ووريهم الصناديق و القضاة
ولما يضربوا القضاة فرصه تشاورلهم و تقوليلهم
لو ماشربتش اللبن هتبقى زي عمو
fnan&dodee
شكرا ع التحية
همتكوا معايا نوعي الناس اللي بيبقى نفسها ساعتها يطلعوا البطاقة
و ساعتها الوقت بيبقى فات
wanna b a bride
برافو يا برايد
بس اوعي يجيلك عريس من هناك
لو سوابق معلش..لو ظابط مانصحكيش
أم العيال
شكرا يا أم العيال
ولو مش نزيهة النهارده بكرة والا بعده تبقى نزيهة انشاء الله
reformer1976
على فكرة لو هاتروح تنتخب انا ممكن أوصيهم يجيبولك حبر لونه على الموضه
فوسفوري أو بستاش أو حتى موف ليلاه
ولما تقعد في البيت يا حاج جرجس
و هما يحطوا بدالك صوت في الصندوق
نبقى عملنا ايه
داهما أحب ما على قلبهم انك ماتجيش ناحية اللجنة
هما الكسبانين
لكن احنا هنستفيد ايه
مش هيفضلوا يزوروا على طول
بكره يجيبلهم لجنة م الأمم المتحده تراقب
و غلاوتك عندي هيحصل
sahar
الإنتخابات اللي فاتت تدعو لشوية تفاؤل
صحيح في الآخر زوروا
صحيح النواب كلهم كده كده مالهومش لازمة
بس برضه في حاجه اتغيرت
و أول الغيث قطرة
شهروزة
معلش يا شهروزة
عشان خاطري يا شهروزة
و غلاوتي عندك يا شهروزة
و الله كله هيتغير انشاء الله يا شهروزة
اتمسكي بصوتك لحد مايبقاله قيمة انشاء الله
mano
ياااااارب ..من بقك لباب السما
tota
طب انتي عايزاني أضمن نزاهة الإنتخابات ازاي يا توتة ؟
هو انا عمك فتحي سرور و الا أونكل حبيب العدلي
طب و طول ماحنا مقاطعين..ايه اللي يخللي الوضع يتغير
والا هنستنا حد من بره يغيرهولنا؟
هو احنا ليه مش عايزين نتحرك و بنستسهل كلمة وانا مالي
تعالوا يا جماعة غيروا الدستور واضمنوا نزاهة الإنتخابات و غيرورا الحكومة
ليه السلبية؟؟بلاش نظرية ماليش دعوة دي يا توتة
الوضع مش هيتغير غير لما احنا نقرر نغيره
تحياتي يا توتة و خليكي ايجابية
dr.tantawy
طبعا عندي أمل و عمر و احمد عثمان تانية اول امال ايه؟
كل الدعم ليكي يا زنجولا العزيز
2r
مش عارفه أقولك ايه
بس بصراحه أول مرة أسمع عن حد معاه بسبور أمريكاني و عايز يطلع واحد مصري
ربنا يجبر خاطرك يارب
مقتنعه بتفاصيل تدوينتك يا سوسه
وخلتنى اخد قرار
قدامى شهر واتم الـ18 واروح اطلعها على طول
ومنه اعمل زياره للقسم ...كان نفسي اشوفه من جوه من زمان بس كله في السليم
وعلى رأيك محدش ضامن عمره
:')
طبعا انا مقتنع تماما بالفكرة عايز اقولك اني باصمم دلوقتي حملة للتوعية عشان القيد بالجداول الإنتخابية... انا مش حزب وطني بس واحد صديقي منهم دلهم عليا :)
انا داخل اعلق علي حاجة تانية خالص .. شكرا ليكي يا فندم داخل مدونتك ولا بيا ولا عليا الصبح قبل الشغل سمعتيني اغنية - اللي أظنه لؤي - نكدتي عليا وخليتي دموعي تنزل وضربتيلي اليوم !!
:) انت ملكيش ذنب اكيد انا باهرج.. بس شكرا انك خليتيني اسمع الأعنية لأني ولو بعد ميلون سنة مكنتش هاسمعها
ذو النون المصري
يا سلام على وعي عمدتكوا ده؟
بهزر طبعا مفهوم هو طالعهالكم ليه
بس مش مهم هو مش هينتخبلكم ..يعني هو كتر خيره طلعها
وانتوا اعملوا بيها اللي يرضي ضميركم
smara
من ناحية فرستي اللي هتزيد بعد التزوير
هي مش هتزيد ولا حاجه انا اتعودت على كده
بس برضه نعمل اللي علينا
حاول تفتكرني
والله برافو
قلت في ايجاز كل اللي نفسي أقوله
شكرا
elgharep
انشاء الله نهنيك قريب على استخراجها
بس قبل كده بهنيك على اصرارك في استخراجها
gid-do-جدو
يا رب يا جدو تدي صوتك في 5 انتخابات مصرية رئاسية برضه
تفتكر هيحصل؟؟
ربنا كبير
تحياتي يا جدو ع الوعي السياسي
saso
ازيك يا ساسو يا عسل
هو ده الكلام تعالوا نمشيها من بابا حرق الدم على رأي ساسو الجميلة
أكتب بالرصاص
ألف تحية ع الكلام الموزون ده
عبدالله مفتاح
روح يا عبدالله السنة دي هيطلعوها انشاء الله
هاوصي عليك ماتخافش
miro
عفوا
ماتخافش ...زي شكة الدبوس
مصطفى اسماعيل
أولا شكرا
ثانيا العفو
ثالثا تروح و تيجي بالسلامة انشاء الله
كله هيتحسن باذن الله بس احنا نتحرك
3rby
كل سنة وانت طيب مقدما
لسسسسسه سنة و كااااام شهر
الأمل فيك بأه ..انت جيل المستقبل
reformer1976
من غير مفرمة من ناحيتك و لا منصة من ناحيتي و لا حاجه
الطيب أحسن
أنا رديت أهو يا باشا ..خبي أنيابك بأه
18goosebumps
تحياتي ليكي يا عسل
ولو عايزة أي حاجه في رحلتك الى القسم قوليلي
عيش حلاوة ..فيش تشبيه..ختم نسر
احنا في الخدمة
ezz
انت مصاحب حد من الحزب...كده مش حلو
بس عشان خاطرك هنعديها
سوري يا فندم ع النكد و الدموع
بس على فكرة اللي بيغني مش لؤي ده محمد عدوية ابن احمد عدوية
معلش هابقى أحط حاجه فرايحي انشاء الله
سوسة يا مفروسة .. تصدقى بقي انى انا مفروس اكتر منك .. مفروس من السلبية وعدم المبالاة .. لكن والله فرحت لما لقيتك مهتمة بالموضوع ده .. ربنا يكرمك يا رب .. قولى امييين ..
العزيزة سوسة
لما اروح واكتب اسم المرشح ويتغير الصندوق كله ويصبح لصوتى لا معنى
يكون هذا ايجابية؟
ولما اقعد فى بيتى لانى متاكده ان صوتى سواء روحت او مرحتش مش هيغير نتيجة بالعكس ده هينقص من حجم اصواته كاجمالى اصوات بتكون دى سلبية؟
الايجابية زى ما انت قلتى هى المطالبة بالتغيير هى المطالبة بنزاهة الانتخابات ومصداقيتها
رفض التصويت ليس فى مجمله سلبية حجب الصوت حتى لا يستغل افضل لدى ان اضع صوتى ليتم تزويره واستبداله بصوت اخر هذا ما اظنه من وجهه نظرى وسيلة تغيير
لن يغير احدهم طريقة الانتخابات اذا استمرينا ننتخب وهم يزورون او لو شجبنا وهتفنا وتظاهرنا فى بلد لا مجال فيها لحرية الكلمة
لكن ربما امتناع الكل عن الانتخاب كنوع من انواع الاعتراض على الانتخابات المزورة يكون هو الوسيلة الايجابية لفرض الرغبات
مثل امتناع العمال واضرابهم لتحقيق هدف ايجابى بفعل سلبى
ليس كل امتناع سلبية
ربما سلبية هدفها الايجابية
يا رب تكون وصلت فكرتى انا والحج جرجس اللى اكيدعارفة انه مش انسان سلبى
أنا مش سلبي وأوزعة
أنا إيجابي واهبل
كويس والله ان فى حد لسه فاكر احمد عثمان ثانية اول كنت فاكر ان انا بس اللى كده ، طيب انا عديت 18 وهروح اطلع بطاقه انتخابيه وهنغير الحكومه فى يوم من الأيام بس سؤال مهم مين بقى اللى هيغير الشعب عشان يقبل الحكومة الجديدة
طيب بس يا اهبل
كل يوم بغوص فيه في بحر التدوين باطبع بلؤلؤة جديدة ظيب آدي حد جديد في قائمة المواقع المفضلة!
tota
الحاج جرجس
توتا يا حبيبتشي..شكلك كده زعلانة
طب مش تزعلي مني دانا بحبك و الله
يا ستي بلاها الإنتخابات اللي هتفرق البلوجرية عن بعضشيهم
بصي يا توتا طبعا انا احترم جدا رأيك و رأي الحاج جرجس
أحترمه و أقدره لكني لا أتفق معاه و أرفضه
حقي..ديمقراطية بأه و بتاع
بصي هما مش فارق معاهم انك ماتروحيش
مش هيغلبوا يعني .بالعكس انتي كده بتديلهم الفرصة انهم يجيبوا حبايبهم اللي بياخدوا 10 جنيه و يخشوا يعلموا ع الهلال
على الأقل لو رحتي هيبقى صوتك قدام صوتهم
لكن لو ماروحتيش هيبقى صوتهم هما بس و الجماعه مش هيخسروا حاجه و لا هيأثر معاهم عدم مرواحك
فيه تزوير ؟...آه فيه تزوير ..بس بيقل
و مش هيقل ولا يخيفي طول ماحنا قاعدين في بيوتنا و بنقول مش لاعبين
و في الآخر كل احترامي ليكي و للحاج جرجس
و الإختلاف في الرأي لا يفسد للود قضية
mohamed a.ghaffar
طبعا دا أحمد عثمان ده من ذكريات الطفولة البريئه
كويس انك هتطلع البطاقة
بالنسبة للشعب..هو الشعب بتاعنا يعرف يقبل الحكومة أو يرفضها
عم قول يا باسط
anonymous
ليه يا عم كده..خليك سريلاكس
ابن مر
شكرا ليك
نورت المدونة
أنا معاكي ميه في الميه
هو ده التفكير السليم
اه يا سوسة مانا عرفت انه محمد عدوية ... عايز اقولك اغنية صباح الكآبة بس حلوة جداً وخلتني اعملها فيديو من فيلم انا باحبه فيه شوية كآبة برضة يلا ما هي باظت بقي :)
سوسة
مين فى الدنيا يقدر يزعل منك
ما بالك انا اللى كمان بحبك
تحياتى ودايما يفضل الود يا جميلة
تسلميلى
كنت من كام يوم عند اللى ما يتسموش فى القسم ( باعمل فيش و تشبيه مش حاجة تانية ) وقال اييه _ خير اللهم اجعله خير _ الاقى اوضة عليها يافطة مكتوب عليها للتسجيل فى الجداول الانتخابية
والله افتكرتك على طول وقلت لما اجرب اعمل زى الناس المفروسين دول
واهه كده كده المجانيين اصواتهم باطلة
( مش برضه اللى بيروح ينتخب حد غير عمو بيبقى مجنون و صوته باطل )
عزيزتى سوسة
لا يقدر سعدتك يقول لا للحكومة الجديدة والجديدة بالذات ، وهقلك ليه ، لأن شعبنا العريق المحترم ابو 7000 سنة حضاره وبعد احقاب متعاقبه طويله من الأفساد والتضليل والإهمال اصبح شعب لا يعمل لا ينتج لا يحب النظام يعشق البلطجه والأهمال والفهلوة والتسهيل والقفز فوق كل قاعده وكل نظام ، والحكومه الجديده هتحارب ده كله والمتفعين منه فلن يطيق احد صبراً عليها
انا مش متجنى على الشعب المسكين الغلبان ولا بضيع حقه فى انه مطلوم لكن ده اللى وصلنا اليه فعلاً وامثله ذلك كتيره ، واى واحد عاوز يطبق اى نوع من النظام والإحترام والدقة والجدية فى حدود مسئوليته ايأ كانت هذه الحدود بيواجه بحرب شعواء من شلل المنتفعين والمستفيدين والمارقين والمستمرأين للوضع فالحكومة الجديده دى هتكون بتحارب الشعب اللى بالشكل ده ،
بجد زى مالحكومه الحاليه عاوزه تتغير وتتحرق بجاز الشعب كمان محتاج يتغير ، صحيح مش كله بس السواد الأعظم منه
كفايه احتجاج بأه ودعوه لللأننا نثور ابوس ايديكو حد يقولنا خطوات العمل........احس زيوكو زى جرايد المعارضه كشف الحقائق و تعرفوناالبلااوى الى بتحصل لكن نفسى حد يدلنا نعملللللللللل ايييييييييييييييييييييييييييييه يعنى نلم بعض ونقوم نتضرب على قفانا محنا مش هنقوم تانى نتشرد ويضيع مستقبلنا ؟؟؟ هو مفيش حد يقولنا خطوات العمل ولا ايه
عفوا العزيزه الجميله المتميزه فى اسلوبها فالكتابه جالى حول ورديت فى موضوع غير الموضوع كنت بكتب فى صفحه تانيه ميرسى على الموضوع الرائع وسورى مره تانيه
لحد دلوقتى مروحتش و ضميرى بيأنبنى
حاولت مره
و معرفتش اوصل للقسم
و بعدين دلوقتى خايفه
ان شاء الله حاحول قبل الشهر ما يخلص
Post a Comment