Wednesday, January 10, 2007

عزال





إحساس غريب جدا لما تسيب بيتك و تروح بيت جديد..تسيب وراك ذكريات حلوة و ذكريات مرة


كل ركن فيه حكاية... و كل جدار عليه صورة بتشوفها بعينيك حتى لو كان الجدار فاضي مافيش عليه صور


أناسيبت البيت اللي اتولدت فيه و اتربيت فيه و اتعلمت فيه


البيت اللي سمعت جدرانه أول ضحكة ليه ...و فوق أرضة خطيت أول خطوة


كراسيه طفت معايا أول شمعه من شموع عيد ميلادي


و كل ذرة فيه بكت معايا يوم وفاة والدتي


ليه عزلنا؟...كان لازم لأسباب كتيرة


بس صعب جدا تسيب كل ذكرياتك وراك


لكن أدينا أهه بنفتح صفحة جديدة




---------------------------------

45 comments:

ذو النون المصري said...

اخيرا اثبت نفسي كاول معلق عندك يا ست سوسه هانم هنزل الكلمتين دول و بعدين اقرا البوست و اعلق عليه

ذو النون المصري said...

يا سوسه انتي احزنتيني جدا بهذا البوست انا اول مره اعلم ان والدتك توفاها الله ،الله يرحمها و يرحم جميع موتانا و البقاء لله،و كنت متخيل ان البيت الجديد بتاعكو قريب من البيت القديم او علي ابعد التقديرات في الشارع المجاور و انك لن تحتاجي تكوين صداقات جديده كي تحل محل الصداقات القديمه
كل هذا لم نتوقعه ابدا
انا اقدر طبعا قيمة الذكريات و اثار الماضي علي النفس الانسانيه و هذا الاعتزاز بالماضي هو خاصيه من خواص الانسان لانه هو المخلوق الوحيد الذي يدرك ان تيار الزمن يمر و انه سيفني وهذا الادراك هو سبب نهضة الانسان و شقاؤه في نفس الوقت
انا من لمحبين جدا للاحتفاظ باثار شخصيه للماضي ،تخيلي اني لازلت احتفظ بكراسات الرسم الخاصه بي من سنه 3 اعدادي و سنه اولي و ثالثه ثانوي و حينما اعود اليها لا يمكن لاي شخص اعرفه ان يتصور مدي سعادتي بها اشعر انها قطعه من الزمن لا قطعه من الورق كما يتخيل البعض
قطعه من الزمن جمدتها في ورقه تحوي بعض افكاري الصغيره
انا الان في السابعه و العشرين من العمر و كلما تقادم الزمن علي اوراقي اشعر بانها تزيد في القيمه لانها تحوي بعض زكرياتي البعيده انا احتفظ بها الان لاولادي حتي اقول لهم هذا ما كان يرسمه ابوكم حينما كان في المدرسه في مثل عمركم شعور جميل جدا كلما تخيلته تنتابني نشوة فرح و سعاده
انا حاسس بعمق ما تعانينه الان من التغيير الذي حدث فجاه في حياتك بالانتقال الي منزل اخر و تركك لبيت الزكريات بالامها و افراحها
اخيرا نتمني لكي جميعا ان يكون هذا البيت خير تعويض عن البيت القديم و ان تكون حياتك فيه افضل من حياتك الماضيه وان يتحقق لك فيه الرضا
و نرجو ان تطمئنينا علي الاحول
مش كله تمام و الحمد لله؟

ذو النون المصري said...

بالمناسبه انت عملتي في البيت الجديد مزرعة فجل زهبي و للا لسه؟

أميرة البلطجية said...

We have moved houses a couple of months ago. I dont usually react to big changes at the moment they happen. I take my time. First time for me to feel what you are talking about was when I went to the old place to finish collecting our stuff to empty the place for the new leasee.. I wont write much about that here.. I am going to blog that one day .. just wanted to say u r not alone in this, dear :)

واحـــد مـــــن الـنـــاس said...

سوسة العزيزة
ربنا يرحم والدتك ويدخلها فسيح جناته باذن الله

انا جربت احساسك ده من اربع سنين لما عزلنا من بيتنا اللي اتوفى فيه اخويا اللي اكبر مني
هاني الله يرحمه

نفس الاحساس بالظبط سبحان الله

بس مسيرك هتنسي ودوامة الحياة هتاخدك برضه يا سوسة ..

Anonymous said...

على قد ماكنت مستنى البوست الجديد لانك فعلا وحشتينا جدا انت وكتاباتك على قد ماحزنت لخبر وفاة والدتك ربنا يرجمها ويدخلها جناته ويصبركم

اما موضوع البيت الجديد صدقينى هاتبقى تجربة كويسه زيها زى اى حاجة جديدة بتعمليها لأول مره رغم وجود الم الفراق بالنسبه للبيت القديم بس كل حاجه بتعمليها واى صديق بتكسبيه فى المكان الجديد هايخلى لحياتك متعه اكبر
واسألينى انا ان صحيح فى بيتنا زى مانا بس 3 سنين ضابط احتياط كانى اتنقلت من بيت لبيت وبعدين 3 سنين شغال فى القاهرة بردة نفس الشعور واخيرا 2 فى الامارات ومازال العرض مستمرا كل مكان بتجربه جديدة
وشعور جديد
واصدقاء جدد
ربنا يجعل البيت الجديد قدم الخير عليكى وعلى كل اسرتك
وعايزين بوستات جامده وماعدش عندك حجة الراجل بتاع النت الى كان تحت البيت عندك سيبتيه مع البيت القديم
بس اوعى يكون نقل معاكم هو كمان

Anonymous said...

بداية القول الفاتحة لأمواتنا وأموات المسلمين

بسم الله الرحمن الرحيم

الحمد لله رب العالمين الرحمن الرحيم ملك يوم الدين إياك نعبد وإياك نستعين أهدنا الصراط المستقيم صراط الذين أنعمت عليهم غير المغضوب عليهم ولا الضالين .

صدق الله العظيم .

آمين آمين
أختي الكريمة سوسة

لقد مررت بأشد من هذه التجربة انه تجربه صعبه وثقيلة على النفس والروح أكثر لقد قضيت طفولتي وزهرة شبابي في صعيد مصر في محافظة أسيوط وانتقلنا إلى محافظة الإسكندرية في 1994 م وكان لهذا الانتقال اثر كبير يكدر النفس والروح .

انك أنتقلتي من منطقة إلى منطقة في نفس المحافظة تخيلي انكي أنتقلتي من القاهرة إلى صعيد مصر أو العكس

اهههههههههه اهههههههههههه

حاجة غريبة اهههههههههههه اهههههههههه واحد يتربا على شيء وبعد كده يلقي عكسه على طول الخط

التأقلم هو الحل لكن الذكريات سوف تطاردك وتخنق أفكارك وتنذل العبرات تباعا على حياتك الماضية

أتمني من الله أن يوفقك في الوصول إلى صديق صدوق محترم وان يلهم الصبر والحلم .

الأميره أوسه said...

كثيرآ ما أستيقظ ليلآ وأبحث عن ركن فى الغرفه أعتادت عيناى رؤيته فلا تجده
أنظر حولى فى دهشه وخوف ثم اتذكر أنى تركت سنين الأمان فى بيتى القديم
شعور موحش يتملكنى كلما تذكرت البيت والشارع و مدرستى القديمه أنه الحنين وحاجتى الى أشيائى القديمه التى يصعب نقلها مع الأثاث أنها بعض من النقوش على حائط تمثل طول قامتى فى طفولتى ومراهقتى
لم يمر يوم بعد خمسة عشر عام لم أحلم فيه
بالبيت القديم وأصدقاء الحى والجيران
فأراهم دائمآ فى أشكالهم القديمة دون أن يصيبهم الكبر وتقدم العمر وكأن حياتى تجمدت عند هذا العمر
أرغب فعلآ فى رؤيتهم وأحتضانهم لكنى تركتهم يومآ ومعى أمنيه كبيره
وحتى الأن لم يتحقق منها شىء
فما زلت أنا أوسه التى تهيم عشقآ بدمياتها القطنيه القديمه وعوالمها
التى أعتادتها ثم تركتها
كان الله فى عونك يا سوسه
حاولى التأقلم مع الوضع الجديد
و لا تعيشى فى الماضى مثلى
فالأمس أصبح ماضى
بنت خالتك أوسه
أميرة مصر وشبين الكوم سابقآ
وصاحبة مدونه فى شارع بلوج سبوت حاليآ

admelmasry said...

ياعيني ياعيني

تعالي بقي اقري بعد الاماكن وانتي هتصدقي كل حرف فيه ياروح قلبي


استني علي نفسك اسبوع كدا
وانتي هتلاقي عيونك الجمال دول اخدت بسرعة ع البيت الجديد

علي الناس فيه ع الدوشة فيه ع الهدوء فيه

بعد شهر واحد ارجعي بيتك القديم وابقي اكتبي احساسك كدا تاني وادي دقني لو ما حستيش بالغربة يا جميل



هههههههه
تحياتي

Amira said...

حبيبتي سوسه

أتمنى يكون بيتك الجديد مكان لذكريات مستقبليه أفضل

فكرت فيكي كتير النهارده
لما عرفت إن والدتك متوفاه

بس الله يرحمها
أكيد كانت بتدعي لك ربنا يحبب فيكي خلقه

أنا عمرى ما حشوفك جايز
لكن من خلال كلماتك الصريحه حبيتك و إحترمتك

ذكرياتنا في قلوبنا
مش بس في الأماكن

و على فكره أن كمان عزلت على بلوج تاني إسمه حكايات فريده
:)

http://hekayat-farida.blogspot.com/

Dananeer said...

ربنا يرحمها يا سوسه

انا عارفه اد ايه صعب ان الواحد يسيب بيته

معلش ربنا يعينك
و ان شاء الله تملى البت الجديد ذكريات حلوه
تربطك بيه

m_elsewedy said...

سوسة اززززززيك؟
احزنتينى طبعا بسبب موضوع العزال ده ربنا يقويكى وتقدرى تتأقلمى على البت الجديد بسرعة
حاجة صعبة

Anonymous said...

ذكرتيني بغرفتنا احنا البنات وحتى بعد ما تزوجنا كنا نزور ابي وامي ونذهب الى الغرفه نفسها وفضي البيت وتم تأجيره اخيرا بما في ذلك غرفتنا عندها انتحبنا باكيات قبلنا الجدران التي سمعت الاسرار والضحكات والاماني والخيبه
ودعنا نافذة النور والحريه والتأمل
كانت لحضات رهيبه كان الله في عونك
تجاوزت ما حدث ربما لانني زوجه ولي بيت الان
احن الى بيتي دائما ولاادري لماذا اتذكرة واتذكر معه الضهيرة وجلوسي لافكر ماذا سأفعل عندما تخف حرارة الشمس
أقرألك بأستمرار سنحت لى الفرصه لان اكتب لك
تحياتي

دسوقي said...

السلام عليكم

لما دخلت الكلية حاول والدي ان احن نبيع بيتنا ونعزل لمكان اقرب من الكلية

جدتي قالتلو اشتريلي قبر هنا
وامي قالت مش هاسيب البيت واحنا كمان

انا عارف شعور انك تسيبي بيت اتولدتي واتربيتي فيه

عزائي لك

واتمني انك ممكن تشاركينا الحوار هنا
http://talebteb.blogspot.com/2007/01/blog-post.html

تحياتي

Memo said...

الله يرحم الست و الدتك و عزائي ليكي و ربنا يرحمنا جميعا....احسيسك كلها واقعيه ... اعتقد ان الانسان بتتولد جواه مشاعر ناحيه الاشياء الي في حياته و اتعود عليها نوع من انواع الارتباط و الالفه و في عقله ديما بيفضل الشيء ده قيمته كبيره
حاولي تنسي في الدوامه الي اسمها حياه و الزمن اشطر طبيب
سلام

Anonymous said...

سوسه مش هيبقى صعب انك تنقلى فى بيت تانى شويه ولو جت فرصه تروحى بيتك الاولانى هتحسى بانه مش بيتك وانك عايزه ترجعى لبيتك الجديد ده عن تجربه وهموما كلها شهر والذكريات فى كل مكان موجوده ذكريات مدره الابتدائى وبعديها الاعدادى والثنوى والجامعه ودى الفايده من انك تنقلى انها تبقى ذكره حلوه او حزينه لكن هتعملى ذكرى غيرها ان شاء الله احلى

ذو النون المصري said...

سوسه انا عملت شات بوكس جديد و حسب نصيحتك الاخيره كانت اني اعمل الكود اسفل السايد بار و نجحت المحاوله لكن الشات بوكس ظهر في اسفل و عمق المدونه فارجو بيان مدي امكانية تغيير موقعه و هل ممكن يتحول الي يمين المدونه كما هو حاله عند الجميع ام لا حل اخر؟ارجو من يملك حل لها ان يفيدني و لكم جزيل الشكر

Gid-Do - جدو said...

مفروسة
دعاء الى الله عز وجل ان يرحم والدتك
تركت بيت اسرتى الذى تربيت فية ومنه الى بيت فى دولة عربية ومنها الى شقة فى نيويورك ثم شقة ثانية ثم منزل فى ولاية اخرى ومنها الى منزل فى ولاية ثالثة ورغم هذة التيهة فى بلاد الله الا ان اعز مكان واحب مكان واسعد لحظات حياتى حينما اصل فى اجازة الى بيت اسرتى ـ ان زكريات الطفولة والمدرسة والاصدقاء فى هذا المكان ـ لستى وحدك فى مشاعرك فكل من مر بالتجربة يعرف حقيقة شعورك ـ تحياتى ومبروك البيت الجديد

علا من غزة said...



كما الباقين الحقيقة اشتقت لكلماتك اللي بتدخل القلب دوغري ,, وكمان زيهم يمكن دي اول مرة اقرأ عن والدتك , ربنا يرحمها ويرحم جميع اموات المسلمين وربنا يصبركم ,,

بالنسبة لموضوع العزال ,, انا عندي خبرة "غير شكل" في التعزيل ,, انا والحمد لله رب العالمين عشت في حياتي في تسع بيوت,, منهم خمسة في غزة بس ,, غير الامارت ومصر كمان,, واخر مرة كانت من سنة ونص في البيت الأخراني ,, يعني ان شاء الله منه على بيت العدل او على الدارالآخرة ههههههههههه

تعرفي امك فكّرتيني ,, انا كتبت خاطرة زمان عن الموضوع ده ,, حبقى انشرها في المدونة قريبا بدال ماهي قاعدة كدة في الدرج

تحياتي ليكي يا ست الكل وما تنسيش تبقو تبخرو البيت الجديد

سلام

عبدالله مفتاح said...

يااااااااه يا سوسة
انا قضيت عمري كله في عزال
اول مرة عزلنا كنت في 3 ابتدائي سبت اصدقاء الطفوله ورحنا مكان بعيييييييد
بعد كده عزلت لمده سنه ورجعت تاني
وفي اولى ثانوي سبت البلد كلها وجيت مصر
حتى مصر عزلت فيها مرتين
يعني قضيت عمري عزال
فعلا حاجة مؤلمة

HANY said...

سوسة
انا حصلى الموضوع ده ,والمشكله هتقابلك فى احلامك , هتلاقى ان كل احلامك هتبقى فى البيت القديم , ودى هتديكى شعور بالشجن , رهيب جدا , بس اللزيز فى الموضوع ان احساس الشجن ده , ممكن يبقى فى مصلحتك , هيخليكى تشوفى حاجات كتير , مكنتيش واخده بالك منها قبل كده

اتمنى لكى , حياة سعيدة

وتقبلى خالص وأصدق تحياتى

Unknown said...

وطن المهد هو البيت الذي يشهد الصرخة الاولى
وطن التكوين هو الذي يشهد العثرة الاولى على عتباته في سعي المرء حثيث نحو طريقه وهو الذي يؤثث العمر بتفاصيل صغيرة تكون بمثابة البذرة الام للعمر كله
كوسادة تبللت بالدمع والعرق في ليالي طويلة تموج بالهواجس والمشاعر والرغبات
قلبي عندك يا ست سوسة لاشيء اقصى من ترك وطن التكوين
على فكرة وطن التكوين بتاعي بعيد عني كتير لاني في قارة وهو في قارة بس قريب مني جدا ومنك برضو
نمرة3 حارة يسري سلام متفرع من عبد الحميد حمدي متفرع من شارع الشهيد احمد عصمت عين شمس الشرقية

محمد عبد الغفار said...

هى كده سنة الحياه

انا عزلت فى حياتى 6 مرات كل مره بجرح والم وزكرى لا تنمحى

بس هعمل ايه هى كده سنه الحياه

عش ما شئت فإنك ميت واحبب ما شئت فإنك مفارق

Anonymous said...

انا لله وانا اليه راجعون


هذه القصيد للاخت سوسه عشان تخفف عنها شوية وعشان الاخوه المدونين كمان


o آه آه ضل نجمي غاب في طي
الدهور

o ذوا ذوا حتى هوي في طي سقمي ولا عثور

o أهواه يا هو آه ضاق بى ما حل لي من أمور

o وبقيت في دنيا هواي عانقً ذاك المسير

o أدوس أشواك الحياة بقلبي الدامي الضمور

o تزج بى أهوائي في دنيا المأسي والشرور

o تتصادم الأهواء بالأهواء يا روحي في بعض الأمور

o فتنئا عن الحق القوي ويودي بها ذلك الفتور

o أري نفسي وأري حياتي في رحله العمر

o المرير ما بين أهوال الحياة وما تحمله الضمير

o متسلقً شبح الحياة ككاهلً يحمل ضرير

o مقطع الأوصال نائي والفؤاد بلا بدور

o مترنح الخطوات مابين المزالق والصخور

o كم هالني شبح الظلام وراعني صمت القبور

o أنا لم ألملم آه وألملم من حياتي ومن تجاربي الأمور

o لا الندامة والآسي ودمع بى أضحي عسير

o هذا حصادي من حقول الكون الكبير ممزق الوجدان خاوي مشتت الأفكار

o حائر مرهق الأعصاب خاوي لا حيات ولا مصير

o لا احفل الدنيا تدور بأهلها
أو لا تدور هب المشيب قرب

o الرحيل والمنايا بى تدور يا حبيب دعك مني والغرور

o أري مصير في ضميري وما شقا لا الضمير يا حبيب دعك مني والفتور

o آن الأوان وفنيا الزمان ولا مفر من المصير انهض وصابر

o وغنم وبادر بالمحبة وبالسرور ولق ربك بقلب صباً يوم تدعي إلى النشور

o يقول ربى لي أحبابه هيا طوفوا بالجنان وبالقصور

o مع الحبيب وآل بيته هم خير خلقي مدي الدهور .

Anonymous said...

رحمها الله

اللي صنع الذكريات في البيت القديم
قادر ان شاء الله انه يصنع ذكريات له جديدة
ربنا يخليلك اسرتك الصغيرة


تحياتي

منتظرينك يا سوستييي

Anonymous said...

عفوا: بصراحة أنا مش فاهم ايه الدافع وراء
كل هذه التعليقات بخصوص مدونة "عزال" - الأمر غريب شوية - أعتقد أخصائى تحليل نفسى سوف يجد مادة خصبة هنا

Anonymous said...

أهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاه



ااهاهاهاها

والله عايز اتكلم لكن الاخ مدحت عنده حق

اهاهاهاهاهاهاهاهاهاهاهاها

ذو النون المصري said...

الدافع علي هذه التعليقات هو مواساه و تضامن و محاولة تخفيف واقع مرهق عن زميله نعرفها من مده طويله و نعتز بمعرفتنا بها يا سيد مدحت و يا سيد فارس

اروي الطويل said...

دا انا نفسى اعزل اصل انا مش عمرى عزلت غير واحنا مسافرين ومش فاكره التعزيل ده كمان خلاص كل تعزيله وانتى طيبه يارب المره الجايه تعزيله على بيت العدل

Utopian said...

البقاء لله

اللهم اودع المتوفاه فسيح جناتك

ذو النون المصري said...

سوسه هانم المفروسه انا ضفتك عندي كاول مدونه مفضله عندي و كنت ارغب في معرفة شيء هام و هو اين اكتب الاضافه الثانيه ؟هل يمون ذلك بمسح ما كتبته في الاولي ثم اكرر اسم الاضافه الثانيه ام ماذا؟ارجو ممن يعرف ان يبلغني عند قراءة سؤالي و للجميع خالص التحيه

soosa el-mafroosa said...

ذو النون المصري

مبروك يا سيدي

الفجلة الذهبية

الدوام لله

والدتي بقالها 4 سنين

بالنسبة لذكريات الطفولة
عايزة أقولك اني محتفظة بورق امتحاناتي من أولى و تانية ابتدائي و صوري و شهاداتي
و الربع او النص جنية اللي كاتبلي عليهم الأستاذ
و البراية اللي كسبتها في يوم من أيام سنة تالتة ابتدائي لما جبت الدرجة النهائية في الانجليزي

دانا حتى محتفظة بضفيرة من شعري اول مرة قصيته في 5 ابتدائي

عشان انا بحب احتفظ بكل الذكريات دي
فالفراق صعب عليا قوي

الفجل جاهز و في انتظارك

princess

thank you for sharing your experiance with me

فعلا الأصعب من ان الواحد يروح بيت جديد هو انه يروح البيت القديم أو يشوف حد تاني رايح يسكن فيه

واحد من الناس

الله يرحم أمي و أخوك و كل اموات المسلمين
و يجمعنا بيهم في الجنة انشاء الله

متهيألي حتى لو دوامة الحياة خدتنا برضه بيفضل احساسنا بالفراق كل اما نجيب سيرة المكان القديم أو نعدي من قدامه

أنا مثلا دلوقت و حتى بعد 4 سنين من وفاة والدتي لسه كل يوم الساعة 3 و تلت باستنى أسمع صوت رجليها ع السلم و هي جاية من الشغل

مهما الحياة خدتنا ..فيه حاجات صغيرة بتفضل تفكرنا باللي فات

مصري مغترب

ربنا يرحم جميع أموات المسلمين

هحاول أبص للتجربة من وجهة نظرك

مكان جديد و أصدقاء جدد
و أهي تجربة

soosa el-mafroosa said...

anonymous

ياااه من 94 و لسه الإحساس ده جواك؟
ربنا يستر و المرحلة دي تعدي عليا
انا ماقدرش أستحمل الإحساس ده كتير

aoossa

مش عايزة أقولك كام مرة قمت مفزوعة من النوم بعد ما لمحت السقف

ده مش سقف بيتنا

دي مش أودتي

ايه اللي جابني هنا؟

أن اتخطفت

و بعدين أقوم أقعد في السرير و أفتكر

جيراني أنا مش قادرة أتخلى عنهم

باروحلهم مرتين تلاتة كل أسبوع رغم بعد المسافة

تفتكري هابطل اروح مع الوقت

اتمنى انه مايحصلش

آدم المصري

لأ..لأ..لأ

ايه الرقة و الرومانسية دي كلها

والا دي تريقة؟؟؟

farida

مبروك يا فريدة ع البلوج الجديد

ربنا يجعله فاتحة خير عليكي انشاء الله

أمي الله يرحمها
مش عايزة أقولك انها اتوفت و هي بتدعيلي

هييجي اليوم المناسب و هاحكيلكم الحكاية دي

بس ابقوا حضروا مناديل كتير عشان قصة مؤثرة

و الله يا فريدة ربنا عالم انا اد ايه بحبك و باحترمك و باحترم عقليتك و أفكارك

ربنا يديم المحبة

soosa el-mafroosa said...

dananeer

الدوام لله

انشاء الله البيت الجديد تبقى ذكرياته كلها سعيدة

انشاء الله

m-elsewedy

حمدالله ع السلامة

دعواتك

إلهام

أهلا بيكي دايما

متهيألي ان ده السبب اللي بيخللي كل البنات يعيطوا و هم سايبين بيت العيلة على بيت العدل

مش بس خوف من الحياة الجديدة

لكن كمان حزن على الذكريات القديمة اللي لا يمكن تتعوض

د/دسوقي

طبيعتنا العاطفية بتخلينا نرتبط بالأماكن و الناس حتى لو مصلحتنا تكمن في تغييرها

ربنا خلقنا كده

بنمد جذورنا في الأرض و صعب جدا نخلعها

soosa el-mafroosa said...

memo

الله يرحمه و يرحمنا جميعا

خصوصا عند المصريين موضوع الإرتباط و الألفة دي

تلاقي الواحد جاي من بره بعد سنين غربة كتيرة عشان يبني بيت في البلد

كل الي بيشوفه بره مهما كان جميل مش ممكن ينسيه فترة طفولتة و صباه و الأماكن المرتبطة بيها

anonymous

تفتكر؟

مش عارفة

متهيألي هيفضل بيتنا القديم دايما بالنسبة لي هو بيتنا

و الجديد هو البيت الجديد و بس

يعني لغاية دلوقت مش قادرة أقول عليه بيتنا

ذو النون المصري

الشات بوكس بقى هايل و اتظبط و الحمد لله

بالنسبة للينكات

ادخل على التمبليت و انسخ السطر اللي انت كتبت فيه اول لينك و بعدين الزقه تحت اللينك الأولاني

مع تغيير الإسم و اللينك المرتبط بيه

و اعمل كده أي عدد انت عايزة من المرات

soosa el-mafroosa said...

gid-do-جدو

الله يرحمها و يجمعني بيها في الجنة انشاء الله

أنا سعيدة اني آخد نصيحة من حد خبره في العزال زيك يا جدو

و فعلا ذكريات الطفولة و الصبا

ليس لها بديل

3ola

والله انتي بنت حلال

فكرتيني بموضوع البخور ده

بس دانتي كمان خبرة جامدة قوي يا بنتي

9 بيوت بحالهم

الله يكون في عونك

عبدالله مفتاح

انت برضه خبرة في العزال يا عبدالله

هي الناس كلها كانت بتعزل الا انا و الا ايه؟

يمكن صعب عليا عشان انا عزلت و انا كبيرة كده

ده على كده يبقى العزال زي اللوز؟

على الأقل في انهم الإتنين مؤلمين

ربنا يصبرنا جميعا

soosa el-mafroosa said...

hany

انا مافكرتش فيه الصراحة موضوع الأحلام ده

تصدق لسه ماحلمتش في البيت الجديد ده ولا حلم؟
لكن أنا من دلوقت شفت حاجات كتير في حياتي كنت مرتبطة بيها و انا مش واخدة بالي

المنفي

الوطن

هي دي الكلمة اللي كنت بادور عليها

هي دي اللي بتوصف مكان الطفولة

فيها احساس كده بالأمان

يمكن لأن الواحد و هو صغير كان متخيل انه هيعيش هنا للأبد

و مش هيسيب المكان أبدا

mohamed a.ghaffar

ذكرياتنا هي الشئ الوحيد اللي بيقول احنا مين

هو اللي بنطلع بيه من كل مرحلة في حياتنا

و هو الشئ الوحيد اللي بيثبت اننا كنا موجودين

في مكان او زمان معين

soosa el-mafroosa said...

anonymous

مع الحبيب وآل بيته هم خير خلقي مدي الدهور


اللهم اوعدنا جميعا

واحشرنا اليك مع المتقين

epitaph

الله يرحمها

بكرة الوقت يصنع ذكريات جديدة

مش هتحل محل القديمة لكن أكيد هتملى الفراغ

وحشتيني و الله يا epi

مدحت

لا تعليق

فارس عبد الفتاح

برضه

لا تعليق

soosa el-mafroosa said...

أروى الطويل

يا ستي يا رب تعزلي و تروحي بيت العدل

بس العزال ده مشكلة

اللم و التجهيز و بعدين ترجعي تفرشي كل اللي لمتيه

نصيحة ..دبسيها في حد غيرك

utopian

آآآآآآآآآآآآآآآمييييييييييييييييييييين

سيبها على الله said...

العزيزة سوسة المفروسة
كم تألمت لنبأ وفاة المرحومة الوالدة ربنا يرحمها ويحسن اليها ويدخلها جنات عدن تجرى من تحتها الانهار لها الفاتحة منا جميعا....سوف تمضى بنا الحياة ولكن من نعم الله علينا انه خلق ايضا النسيان رغم انه من الصعب ان ننسى احباء لنا فارقونا ومانتمناه من الله وجل ان يجمعنابهم فى جنات النعيم...الاخت العزيزة سوسة
ربنا يجعل السكن الجديدبيت تمله السعادة والمحبة بين افراده ويجعل الحزن بعيدا بعيدا ن هذا السكن وآسف جدا لعدم الدخول على مدونتك لظروف الحياة والتى جعلت منا افراد غرباء حتى بين اقرب المقربين لنا ...تمنياتى لك وربنا يوفقك فى حياتك باذن الله تعالى ونراك على خير ...

Anonymous said...

هاي سوسة

Yasmine Adel Fouad said...

انا عارفه احساسك
تخيلى بقى احنا ظروف بابا فى الشغل كانت بتخيلنا نعزل كتير قوى
يعنى عزلنا يمكن 10 مرات او اكتر
مع الوقت دربت نفسى ما اعملش ذكرى مع اشياء

بس اول مرة ادركت الموضوع ده تعبت كتير
ومازالت لما بعدى جنب المكان اللى كنا فيه و عزلنا اول مرة بتأثر و ممكن الدموع تيجى فى عينى

بس دى سنة الحياة حاجه تعيش و حاجات تموت

chaos said...

بعد ما اتجوزت اهلي عزلوا من البيت، و ف مره مراتي سافرت هي و العيال أمي قلت لي تعالي بيت هنا هو مش ده بيتك !!!!!!!
الغريب كان رد تلقائي جدا و سريع و حقيقي قلتلها ده مش بيتي، البيت اللي انا اعرفه إتباع خلاص البيت ده انا معرفوش!!
فعلاً تضيع الذكريات احيانا مع ضياع البيت القديم
ربنا يعزيكي و تذكري دائماً الأحباء في القلب دائماً حتي لو غادرونا

Anonymous said...

سلام عليكم جميعا
ازيك يا سوسه؟؟؟ انا بجد حاسه باحساك وزعلك من الموقف دا لانه حصل معايا من سنه وكام شهر كدا.... احنا كمان عزلنا من احلى بيت شافته عينى وتركت زكريات طفولتى واحلى اصحابى وبجد كل مافتكر بزعل قوى :( لانى كنت بحب كل حاجه هناك بس احنا الحمد لله مسبناش البيت خالص... بس سيبينوه مقفول ومش بنروح هناك تقريبا خالص...... وكل ما يمر العيد عليا بزعل قوى لانى كنت متعوده من صغرى انى انا واصحابى نصحى بعض ونصلى صلاه العيد سوا وبعد كدا نتمشى ونخرج وبجد اول يوم عيد دا كنا كلنا متفقين مع عائلتنا ان اليوم دا مفيش فيه اى خروج ولا ى شئ الا بقى بليل يعنى بنتغدى مع بعض انا واصحابى ونرجع البيت بعد كدا بكام ساعه :( .. كانت ايام عيد بجد
بس بجد هتتعودى يا سوسه على الموضوع وان شاء الله هتتكيفى مع الوضع الحالى بس للاسف عمرك مهتنسى احلى ذكرياتك هناك .... بس برده زى مابنقول دى ذكريات
وان شاء الله تكونى ذكريات حلوه بردو فى بيتكم الجديد وتحبيه زى القديم وتمتلى كل نواحيه بالبهجه والافراح.... وبجد يا سوسه هيا الحياه كدا ..دايما هتتعلقى بحجات كتييييييير والظروف هتحنم عليكى بكدا... زى مثلا زمان كنتى اكيد متعلقه بالمدرسه قوى واصحابك هناك, وبعد كدا واحده واحده تكيفتى فى الجامعه , وبردو هتزعلى لما تتخرجى , وان شاء الله هتتكيفى مع العمل .. وهكذا الدنيا ودايما هتحبى ذكرياتك ودايما هتفتكريهه بس حاولى دايما تتكيفى مع جميع الظروف الى حوليكى علشان تعيشى حياه سعيده
وفى النهايه اعتذر على الاطاله وتقبلى منى كل الحب والتقدير
وان شاء الله اراكى فى مزيد من النجاح

Emtiaz Zourob said...

الف مبارك البيت الجديد ويارب يكون قدمه قدم السعد عليكم ..
الله يرحم امك ويجعل مثواها الفردوس الاعلى من الجنة .. فعلا البيت الاول بتظل ذكرياته عايشة معانا مهما انتقلنا لبيوت ثانية .. وعلى قولة علا ابقوا بخروا البيت الجديد ..

دمت بخير اختي العزيزة