Friday, February 02, 2007

أشياء لا يصدكها عكل









وقوع 6 قتلى في المواجهات بين فتح و حماس..إستشهاد أحد نشطاء فتح بانفجار عبوة ناسفة وضعت من قبل حماس..وقوع 24 قتيل في (مناوشات) بين فتح و حماس ..الجماعة يظهر مش لاقيين حد يقتلهم عملوا إتفاق يخلصوا على بعض..ماهم أصلهم زينا عندهم زيادة سكانية بس لسوء حظ الحكومة الفلسطينية..فلسطين ماعندهاش عبّارات



>< إعلاميون و مسؤلون سعوديون ..إكتشفوا إكتشاف مذهل..إن المشجعات اللي كانوا بيشجعوا الفريق السعودي في خليجي 18 مش سعوديات..لأنهم ببساطة كانوا كاشفين شعرهم..دعوة للإخوة السعوديين للوقوف على سلم أي طائرة من طائرات الطيران السعودي أثناء هبوط الطائرة في مطار القاهرة..قال مش سعوديات قال :)صح صح



>< أحد شيوخ الأسرة المالكة بالكويت يتبرع ب 346 مليون دولار للفقراء الكويتيين...هي الكويت أصلا تعدادها كام واحد؟..و الفقرا اللي فيها دول يطلعوا أد ايه؟... بيقولك كان فيه 3 عيال مرة بيلعبوا استغماية في الكويت عيل منهم راح إستخبى في قطر...346 مليون...دووولاااااار...طيب




><الحكومة الإسرائيلية تعين عربي مسلم في لأول مرة في الحكومة..و لكنه وزير بدون حقيبة..و النبي يا جدعان حد يطلع منديل نلم للراجل قرشين يجيب بيهم حقيبة ..أمال يعني يروح الحكومة من غيرها..ده حتى الميس تمده و ممكن زمايله يدولوا على قفاه..من غير حقيبة ..النبي تتوكس>



>< دولة قطر تقرر منح الحكومة المصرية 120 مليون دولار كمساهمة منها في تطوير سكك حديد مصر....يا ترى هيجيبوا كام قطر جديد بالفلوس دي..و كام فيلا في مارينا عشان يقعدوا يناقشوا فيها منين يجيبوا القطورات دي؟...ياللا...كله يهون من أجل الوطن



>< أنيس الدغيدي..خدوا بالكوا من الإسم..كاتب و محلل ..أصدر كتاب حاليا بالأسواق بيقول فيه ان صدام ما اتعدمش ..اللي اتعدم واحد تاني..قديمة..الجديد بأه ..ان عدي..ماتقتلش و اللي اتصور و هو مقتول واحد تاني..و ايه كمان..قصي..برضه مش هو اللي اتقتل و اللي اتصور و هو ميت برررضه واحد تاني..الكبيرة بأه..و لا ده حتى برزان التكريتي اللي اتعدم و لا حتى هو اللي كان بيتحاكم ..ده بررررضه و بكل تأكيد و ثقة ..واحد تاني
إتضح من هذه الأقوال العبقرية ان الشعب العراقي عبارة عن 10 مليون واحد و 10 مليون شبيه



><مصادرة أموال 29 من ثروات قيادي الإخوان..على أساس ايه حضرتك بتصادر الأموال..إشتروا بيها سلاح؟..فجروا بيها عربيات؟...و الله العظيم مافيه أنكت من اللي حاصل بين الحكومة و الإخوان ده في أي حتة في العالم..الجماعة المحظورة اللي ليها 88 عضو في مجلس الشعب..بالظبط - من وجهة نظر الحكومة- زي سفاح المعادي لما يدخلوه مجلس الآباء..و عجبي



>< حين نطالب بالتغيير ..لابد و أن يكون البديل حاضر في الأذهان ..و من يقدر على تحمل مسؤولية بلد بحجم و مكانة مصر-ده لو لسه ليها مكانة- لابد و أن يتمتع هذا الرئيس بحب و تقدير الجماهير و من أجل الأصوات العالية المطالبة بتسمية نائب للرئيس..أرى أن يكون الرئيس ناضج العقل ذو شعبية بين المواطنين العاديين و أن يكون النائب متمتعا بروح الشباب و طاقتة و تأييد كبير بين أوساط الشباب و لا أجد شخصيتين يهتف بإسمهما بقوة و حماس غير أمل مصر و محبوبين الجماهير



النائب تامر حسني..و الريس.... مرتضى منصور





آه يا منطقة مافيهاش راجل

57 comments:

ياء said...

كل دا من نكد الدنيا

بس انا ليا طلب

ياريت تغيرى النائب من مطرب التجنيد الى مطرب العنب لاننا شعب بنحب العنب

وادعى ان الدوله فى عصرهم تحقق ايرادات افلام العنب

Anonymous said...

لا مش عايزين نائب الريس مطرب التجنيد عايزين نغير شوية ميبفاش الريس الجاى خريج ميرى أنا بقترح يكون ابو تريكة الراجل اتوظف فى البترول وبيقولو اى حد من طرفة هيتوظف

Islamist Bloke said...

مقال عشرة على عشرة يا سوسة
و الف حمد الله على السلامة
ومرحبا بالمقالات الجامدة وننتظر المزيد

عازفة الكمان said...

بجد عندك حق هي منطه ما فيهاش راجل

عبدالله said...

مقال جميل يا سوسه بيناقش اكتر من حاجه مهمه
بس الي واجعني قوي موضوع فتح و حماس ايه الي بيحصل ده و مين الصح و مين الغلط ده كده القتلي بسبب الهزار ده اكتر من القتلي بايد الاحتلال
ربنا يستر و الناس دي تعقل شويه و الخونه الي في النص يبانوا و الكل يرجع يضرب في الاحتلال تاني

اما موضوع المشجعات السعوديات فده بجد عامل قلق هنا في السعوديه انا بشوف بشر كتير بتتكلم عنه
الكل مش مصدق هوا ايه ده مش عارفين ان الحريم دول اول ما بينزلوا مصر مش بيقلعوا الحجاب بس لا بيقلعوا حاجات كتير تانيه طبعا مش الكل و لاكن الاغلبيه للاسف

اما عن التغير
فلا امل حاليا للتغير لعدم وجود شعب اصلا والي يلاقي شعب يتصل يقول فين علي تلفون عشر تساعات و هيسكب ربع جنيه

تحياتي

Dr. Tantawy said...

فلسطين بجد من اكتر المواضيع حرقا للدم حاليا .. هيجننوني


بالنسبه للكويت .. تعداد سكانها الكويتين حوالي مليون و نص .. منهم حوالي 20 ألف تحت خط الفقر فعليا .. ده غير البدون اللي مش معاهم جنسيه برغم انهم عايشين فيها من زمان .. يعني فعلا من بره هلا هلا و من جوه يعلم الله .. فيها ناس غلابه كتير

المشجعات السعوديات دول عينه .. انزلي الخليج و انتي تشوفي الحال وصل لأيه
.. بس يالا .. ماحنا عندنا الانيل في مصر .. اللي يدور يا ما هيلاقي ههههه



عودا احمد يا ام خميس :)) بجد بلد مفيهاش راجل .. بس انا موجود هههه

spellz said...

رجالة إيه بس دنا بدور عليهم بقالى 21 سنة و مش عارفة الاقيهم.
very nice post

spellz said...

رجالة إيه بس دنا بدور عليهم بقالى 21 سنة و مش عارفة الاقيهم.
very nice post

زحل الفلكي said...

مفيهاش حد بيحاول يبص من بره الصندوق

كل الناس في كل العالم بتفهم في كل حاجه موجوده في كل حته تانيه في العالم ماعدا الحتة اللي هي قاعده فيها

برووووم

يعني من الاخر احنا فاهمين في قضية فلسطين وهم فاهمين في قضيتنا
وكل الناس بتفهم في كل حاجه ماعدا الحاجه اللي ليها علاقة مباشره بيها

مش غريبة برضه

نرجع ونقول اه اصل المشجعات مش سعوديات
وسلملي على المنطقة

محمد عبد الغفار said...

حاجه تقرف

كلام لوجيك said...

مدونتك جميلة جدا ومواضيعك هايلة ومميزة

بالنسبة لموضوع الاخوان ففعلا دي اكبر نكته
تنظيم معروف وجماعة علنية وليهم 88 عضو في البرطمان ...اقصد فى البرلمان وكوادرهم معروفة ، ليهم مرشد عام معروف وكمتب سياسى كامل
وفى الاخر الحكومة تقولك جماعة محظورة!!! فين الحظر اللى بيتكلموا عليه بقى؟؟
بلد غريبة والله
يمسكوا فى المحترمين وخيار الناس ويسيبوا الحرامية ورجال الاعمال الفاسدين وناهبى المال العام

زمن مقلوب وحكومة مختلة وعندها شهادة معاملة اطفال

بالنسبة لمشجعات السعودية فأقدر اقولكم هتروحوا بعيد ليه؟؟ انزلوا دبى وشوفوا هناك الخير اللى اصوله
مهازل مؤلمة
دبى قريبة منهم وبينزلولها بالسيارات كمان
ومحدش يعرف حد هناك وخد راحتك بقى

بالنسبة لموضوع الكويت
للاسف انهم بيرفهوا عن المرفه اصلا
امبارح قريت فى جريدة الوطن الكويتية ان فى واحد كويتى كان مأجر بيت بستة الاف دينار كويتى في السنة
اي ما يعادل 120 الف جنيه مصري
وقعد سنة كاملة من غير ما يدفع
وكمان ساب البيت وراح أستأجر بيت تانى اغلى بألف دينار
صاحبة البيت رفعت عليه قضية وكسبتها
فوجئت بعديها بشيك وصلها بالمبلغ المطلوب سداده من بيت الزكاة الكويتى
ولما اتصلت وسألتهم ازاي تصرفوله المبلغ ؟؟ دا شخص غنى ومقتدر وراح استأجر بيت تانى بايجار اغلى
دنا بتبرعلكم سنويا وبدفع زكاتى عندكم عشان الغلابا ، تقوموا تدفعولوا هو؟؟
ردوا عليها وقالوا منقدرش نتأخر عن مواطن مزنوق

عرفتم بقى فلوس التبرعات دي بتروح لمين؟؟
وعجبى

خالص تحياتى ودمتم بالف خير

masrry metgharb said...

ايييييييييييييييه
بتقووووووووول اييييييييييييييييه
ايه الكلام الجامد ده

طبعا موضوع فتح وحماس لاتعليق علشان انا قرفان

اما موضوع المشجعات السعوديات فزيهم زى الايرانيات الواحده من دول بتقلع كل حاجه وهى فى الطيارة وتلاقى الخيمه الى كانت داخله الطيارة خارجه منها غزاله من غير هدوم ( مش بس كاشفة شعرها) لا وهما بجد ياسوسه قمرات ولاد الحلال والله انهم اكثر من اللبنانيات فى القلع

موضوع الكويت على الاقل الناس بتتبرع ولا انتى زعلانه علشان مش من الكويت
ليه يارب ماخلقتنيش كويتى
على فكرة هنافى الامارات بيدو للطفل المواطن من يوم مايتولد حاجة اسمها اعانه كانت 500 درهم رفعوها للضعف السنه دى يعنى الواد المولود لسه بياخد الف درهم وانا شغل اكثر من 12 ساعه باليوم وراتبى بالاوفر تايم يادوب يعمل اربع عيال الا ربع اه يابلد
ده غير انهم علشان يشجعو الجواز بيدو للعريس المواطن 80 الف درهم اعانة جواز حتى لو كان مليونير

على فكرة 120 مليون بتوع القطارات مش هايجيبو اى حاجه لان غير فيلل مارينا فيه البوفيه الى هايجى بالطيارة من امريكا ولا فرنسا ولا يعنى الناس يفكرو وهما جعانين مش كفايه ان هما رايحين مارينا فى البرد ده علشان خاطر الشعب ده احنا صحيح ناس مش بنقدر

اظرف نكته بجد موضوع المحظورة دى
هههههههههههههههههههههههههههههههههههههههههههههههههههههههههههههههههههههه
امال لو ماكانتش محظورة كانو جابو واحد من الجماعه مندوب ينام فى كل بيت مصرى قال محظورة قال
هههههههههههههههههههههههههههههههههههههههههههههههههههههههههههههههههههه

اما بخصوص التغيير انا معترض
ازاى تنسى بقيت الكفاءات الى موجودين فى مصر زى الاخ البطل القائد سعد الصغير والاخ البطل الزعيم محمد سعد
ويمشى الشعب كله يرقص علشان نسيطر على الوسط
قصدى وسط البلد

لما كان احمد زويل راجع مصر بعد نوبل ماحدش استقبله فى المطار
لكن لما مطرب التجنيد طلع من السجن كان فى استقباله اكثر من 20000 شاب وفتاه

تفتكرى شعب زى ده لسه فية امل ؟؟؟ايظن

ياشعب تافه مع احترامى للاخ عمر راضى

tota said...

سوسة المواضيع جامدة
بس سؤال مين المزة اللى فوق دى ارهابية ولا ايه اصل لو ارهابية يبقى كويس قوى النيو لوك دى

عجبنى قوى التبرع للفقراء فى قطر اصلى معرفش هو الفقير هناك عنده كام مليون

وكمان التبرع بتاع السكة الحديد طبعا هيروح لمستحقيه ازاى تظلمى الامة وزعمائها هيروح كله هيروح صدقينى بس مش عارفة فين هيروح

تحياتى

علا من غزة said...



ملاحظات في محلها كالعادة يا سوسة

تعرفي اني بكتبلك دلوقتي وانا سامعة صوت الرصاص ,,

لا ما تخافيش دول شوية عيال بيلعبوا العاب نارية

بس بيلعبوا بمستكبل البلد ,,

اااااخ يا قلبي

تحياتي

Anonymous said...

يا أخت سوسة

المفروض عليك
ما تحطي صورة المشجعة السعودية في البلوج لأنكي بذلك تساعدين على الاستهزاء بكلمة "" التوحيد أصل الإسلام والدنيا والدين "" هذه نقطة للتوضيح مع الأسف .



ثانيا : حماس وحركة ثورية إسلامية بمعني انه حركة جهادية في أصل تأسيسها ، أما فتح في أصل تأسيسها حركة ثورية قومية وطنية ، فهم يتفقان في نقطة الثورية ويختلفان في نقطة المرجعية السياسية .


فتح أضحت مؤسسة بيروقراطية مثلها مثل النظام الحاكم في مصر الآن .


أما حماس أظن أنها تخلت عن المرجعية الدينية بعد المؤامرات التي قامت بها إسرائيل وأمريكا ومنظمة التحرير والإخوة العرب وأولهم مصر .


فتبنت الفكر الثوري بمعني رفع السلاح بدون مرجعية غير إثبات الذات فأصبحت فلسطين اليوم بين العنجهية الفتحوية العميلة ، والحماسية التي فقدت بعض من إسلاميتها ومرجعيتها ، وراحت إلى ساحت القتال لتصفية حساباتها داخليا لأنها لا تستطيع أن تصفي حساباتها خارجين .


هذا ما يحدث بالضبط في قطاع غزة وأنا مع حركة حماس في كل ما تفعله لكن أريد أن تكون لديها مرجعية موحده أما ثورية إسلامية وأما ثورية بأي مرجعية محترمة تخدم الفلسطينيين والأمة العربية ككل ، المهم أن تثبت على رأي حتى لا تهتز صورتها أمامي وأمام من يحترمون حركة حماس الإسلامية .


ولكن الشباب الذين يقتلون خسارة على الإسلام والمسلمين والعرب القوميين أمثالي ، ونحتسبهم شهداء عند الله ونرجو أن يكونوا من الذين تنطبق عليهم الآية القرآنية الكريمة .


بعد بسم الله الرحمن الرحيم : وان طائفتان من المؤمنين اقتتلوا فأصلحوا بينهم وان بغت احدهما على الأخرى فقاتلوا التي تبغي تحت تفئ إلى أمر الله فان فائت فأصلحوا بينهم إن الله بحب المقسطين ...... صدق الله العظيم .


اختنا الكريمة المحترمة سوسة :


هنا في ثالثا : أريدك أن تقرئي وتحللي ما اكتب بدقة شديدة ووضوح تام الخليجيون يعانون من مرض السفه ، والنفاق الاجتماعي ، هذا ما لمسته وفحصته ونقبت فيه مع نفسي وقارنته بين المجتمع المصري والمجتمع الخليجي ككل .


في مصر كل شئ على عينك يا تاجر اللي عايز أي شئ يجده إذا أراد الالتزام يجده ومن يريد الانحراف يجده واضحا جليا كبزوغ الشمس .


أما في الخليج النار تحت الرماد تريد من يقلب الرماد حتي يكتشف النار هذا للمغتربين عن البلد .


أما أبناء البلد يعرفون وينافقون وينكرون وتأخذهم العزة بالاسم ويدعون أشياء هم يعرفون تمام المعرفة أنها غير صحيحة على الإطلاق .


رابعا : المصيبة الكبيرة في وطننا العربي ( الكويت ) هي اغني دول العالم نفطيا ولديها اغلي عملة في العام على الإطلاق .


لا يوجد في دولة الكويت مصلحة ضرائب أو مصلحة تموين تراقب الأسعار فبالتالي تدخل الأسعار إلى الكويت بأقل الأسعار وتباع بستمائة في المائة وأحيانا أكثر .


أما الموضوع الثاني : أن دولة الكويت كباقي الدول الخليجية بل أكثرها سفها وإسرافا في دول الخليج ودول العالم كله .


وموضوع المواطنة : قد أشار أخ فاضل إلى هذا الموضوع وأشار إلى الأشخاص غير محددي الجنسية ( البدون ) .


وأحب أن أضيف انه يوجد في دولة الكويت مواطن من جنسية درجة أولى ومواطن من جنسية درجة ثانية ومواطن من جنسية درجة ثالثا وهذا مثبت في أوراق الجنسية والأوراق الشخصية الثبوتية .


وهذا الموضوع يطول شرحه ناهية عن التفرقة بين المواطنين في الوظائف وفى الرواتب وفى المهازل التي تسمي دومات ( الشغل أو العمل ) .


وسوف أرسل لكي على الإميل تلخيص قد قمت به شخصيا لكتاب ليس بدرجة مهمة ولكن أردت أن أتربح منه بعض المال لأني اعمل في رابطة الاجتماعيين الكويتية ، وهذا ما أتاح لي أن أري جمعيات النفع العام من قريب في دول الخليج العربية والمسخرة التي تحدث في وطننا العربي ككل والتي يطلق عليها مؤسسات المجتمع المدني .


أما موضوع الحكومة الإسرائيلية فلا تعليق على ذلك .


أما موضوع قطر والإعانات المالية فشكرا كثيرا لدولة قطر أخر الراعين للقومية العربية ........... ولكن .


اها اها اها أي ....... أما إيناس الدغيدي فهيا إنسانة ساقطة لا تستحق أن يعلاق على كلامها .


أما مصادرة أموال الإخوان أظن انه أخر حل لحسني مبارك حيث انه لم يثبت إلى الآن أنهم يمولون من جهة خارج ، فراح يونفضهم بطريقة ملفته للنظر .


أما موضوع نائب الرئيس : فان فاقد الشئ لا يعطيه .

أحمد المصري said...

على رأي واحد ..نسيب الفلسطينين يقتلوا في بعضهم لحد ماالجماعتين دول ينقرضوا وبعدها نبدأ نفكر ..كده يبقى أحسن ..حلوة 10 مليون شبيه دي 00فعلا أشياء لا يصدقها عقل ..المشكلة فيكي ياسوسة إني لازم في كل مرة ألاقي
كلمة من بديهيات المجتمع الحالي 00
طب ماهو أساسي بلد زي دي يبقى مافيهاش رجالة ..ولا انتي بتفضفضي وخلاص
أحسن برضه لحسن نطق من جنابنا00
ربنا يفك الغمة 00
مع تحياتي 00
والسلام عليكم0

3rby said...

وجعتيني يا سوسة
بس ايه الحقيبة ديه صحيح؟

مـحـمـد مـفـيـد said...

يخرب عقلك بجد
بوست شافي وافي
بس ايه الابداع ده ماتروحي تشتغلي في النشره

Amira said...

دايما بتضحكينا و تبكينا في نفس الوقت يا سوسه

تحياتي

Mongey said...

ظريف موضوعك وفعلا موضوع السعودية مستفز و كل حاجة و الكويت انا شايفهم احرار
و الافضل اننا نهتم بهمومنا الي مبتخلصش

kaed said...

عزيزتى سوسة سوف أستعير رد قرأتة فى جرنان الكرامة إذا كانت حكومة إسرائيل فيها واحد عربى فالحكومات العربية كلها يهود
على فكرة الجافا سكريبت بتاع الجزيرة و صلك و لا لأ

None said...

بجد هتفضلى طول عمرك سوسه المفروسه
بجد انا فعدت طول البوست وانا بقرا عمال اضحك

بجد بوست جامد جدا وفكرته حلوه

وفعلا بلدنا مينفعش الا يبقى ريسها مرتضى والنايب تامر حسنى و
ممكن بعد كده نعمل استفتاء على تشكيل الوزاره
من المشاهير
وسلاااااام

Utopian said...

الصوره جامده و مستفزه!!

الكزميديا السوداء بيبقي ضحكها مر اوي

بس سيبك انتي
ال 3 عيال اللي كانوا بيلعبوا استغمايه دي جامده اوي
loool

Anonymous said...

كله كووووووووووم
وموضوع السعوديات ده كام

ههههههههه

فعلا يتفرجوا عليهم في مطار القاهرة

اه يا بلد عايزة ولد
بس انا مش فاضي

ذو النون المصري said...

المتبرع الكويتي
قرات في العام الماضي في جريدة الاخبار ان سعوديا تبرع ب 40 مليون دولار لجامعتين بالولايات المتحده الامريكيه علي ما اذكر هما جامعة بوسطن و جامعة جورج تاون ،و قال انه اراد بالتبرع ان يعطي الامريكيين فكره جيده عن العرب خاصة بعد ان ساءت صورتهم بعد احداث سبتمبر
..................................
و في نفس عدد الاخبار ان مصطفي العقاد قبل موته اراد ان يخرج فيلما جيدا عن صلاح الدين يكون رساله للغرب توضح قيم الاسلام لكنه تعطل بسبب مشكلة التمويل و قفز الي الواجهه ممول سعودي وافق علي كل الشروط لكنه اشترط ان تبيت معه
النجمه البطله ليله واحده مقابل ذلك
..................................
و اخر تبرع لحديقة حيوان بريطانيه ب10
مليون دولار لانه راها علي حال كئيبه بعكس حالتها البهيجه التي راها عليها في زيارات سابقه و علم ان تلك الحال بسبب قلة التمويل فنفحهم عشرة ملايين دولار
..................................
في بوست عند شهروزه بتاريخ الجمعه 17 نوفمبر 2006 حكت عن تبرع زوجة زعيم قطر ب 2 مليون دولار لمدرسه اسرائيليه
لانها مدرسه محرومه من الخدمات و مهستكه
..................................
يعني من الاخر زي ما الزميل فارس عبد الفتاح ما قال
الناس دي عندها حالة سفه في انفاق المال و ربنا قال و لا تؤتوا السفهاء اموالكم فما بالكم بشعب حكامه الذ1ين يتصرفون في امواله سفهاء كان يجب ان يمنعوا شرعا من التصرف في اموالهم كان يجب الحجر عليهم
هذا راي الشرع فيما اعتقد
بقول فيما اعتقد لاني لست ممن يحق لهم ان يقولوا بالفتوي
لكن لماذا يتجنب رجال الدين هناك الحديث في الامر و يصدعون رؤسنا بالنقاب و اللحيه!!!!!!!!!؟
..................................
الحكومه الاسرائيليه
انا علي راي الزميل انه عادي لان حكوماتنا كلها صهاينه
..................................
المنحه القطريه
غيران و الله ان احنا نمد ايدينا لاي حد عموما و لمن اعطي فقراء الصهاينه خصوصا و بعدين اكيد الفلوس دي راحت من قطر علي سويسرا مش علي مصر
..................................
انيس الدغيدي
اسمه غريب فعلا لانه شبه ايناس الدغيدي و كمان بينهم شبه اخر هو بيعمل دعاره فكريه و هي بتخرج دعاره غيرها المهم المفروض لو راجل ينكسف و يغير اسمه
كان فيه كتاب صدر بعد احتلال العراق مباشرة قال صاحبه بيحلم و يقول ان صدام هو السفياني و انه سياتي بجيش قوامه اربعين الف مقاتل و انه سيقضي علي الامريكان نهائيا في العراق قريبا ....الخ ...و في الاخر مطلعش سفياني ولا حاجه
..................................
الجماعه المحظوره
يا محني ديل المحظوره عروستنا حلوه و اموره
..................................
نائب الرئيس
الله يسمم بدنهم كلهم قادر يا كريم

www.blogs4arab.com said...


يسعدنا تشريفك
www.blogs4arab.com

Ahmad Hegab said...

بجد كلامك فى الجون

شر البليه ما يضحك و انا حاموت من الضحك

Anonymous said...

انا اسف لاني قراءة انيس الدغيدي


ايناس الدغيدي

Anonymous said...

عسل والله ياسوسه فعلا شر البلية ما يضحك

أُكتب بالرصاص said...

اتفق معك
في بعض النقاط
رغم اختلافي معك
من قبل في بعض البوستات

هاتقولي لي ايه اوجه الاتفاق وايه اوجه الاختلاف
اقول لك
يا سيدتي انها امر شرحه يطول
وانا الليلة مشغووول

عايز الحق ماتش الاهلي و بترول منوف

مريض نفسى said...

فى الطريق الى الحرية دائما هناك خسائر يسميها المسلمون المتشددون شهداء ويسميها المتحضرون من البشر ضحايا وقتية لزوم بلوغ الهدف المنشود وهو فلسطين خالية من العنف والدماء واصحاب فتاوى التكفير والادمغة الخالية من التفكير
فلاول مرة تقوم قيادة فتح بسلوك المسلك الطبيعى لاى قيادة محترمة تسعى لبناء دولة مسالمة تصد العنف بدلا من ممارستة والتشجيع علية ضد مواطنين امنين فى بيوتهم وبلداتهم
ويظل فى النهاية الحديث عن شبية صدام حسين الطاغية المقبور حديثا تنقصة الادلة والبراهين وهو فقط يستغل لتشوية الخطوات الجبارة التى تخطوها الحكومة العراقية المنتخبة لتحرير العراق من عقود من التخلف والديكتاتورية والنيل من التضحيات الغير مسبوقة من جانب امريكا لنشر السلام ومحاربة الارهاب والتخلف

Unknown said...

هنقول ايه بس

دنيتنا كلها بقت شئ لا يصدقه عكل

حسبى الله ونعم الوكيل

صحيح كنت هنسى .. مدونتك ومواضيعك حلوة أوى
:)

Unknown said...

هنقول ايه بس

دنيتنا كلها بقت شئ لا يصدقه عكل

حسبى الله ونعم الوكيل

صحيح كنت هنسى .. مدونتك ومواضيعك حلوة أوى
:)

Unknown said...

هنقول ايه بس

دنيتنا كلها بقت شئ لا يصدقه عكل

حسبى الله ونعم الوكيل

صحيح كنت هنسى .. مدونتك ومواضيعك حلوة أوى
:)

sherehan84 said...

هم يضحك وهم يبكي
دمك شربات يا سوسه

Ush said...

مع زيارتي الاولى للبلوج اهنيكي على روح الفكاهة الساخرة و طبعا اهنيكي على حظك الحلو جدا لوجودك فى وطن و زمن مليء بالعجائب التى يمكنك السخرية منها اذا كانت لديك روح السخرية الرائعة المتوفرة لديكِ...
ضحكت كثيرا على الكويتي اللى راح يستخبى فى قطر " حلوة جدا " و طبعا على الرئيس المنتخب و نائبه..
تعليق بسيط بالنسبة لحماس..طول عمر حماس هى الدرع و السيف للمقاومة و لكن الامور اختلفت تماما بعد الوصول للسطلة..الخوف من الاخوان المسلمين اصبح هاجسا لدى الحكومات و بعض الشعوب
و يجعله عامر

Amr Ahmed said...

عسل والله يا سوسة

بس انا زعلان منك

انتي مش عارفة اني كنت عندك دكتور المرارة بس هيفاء

تيجي انتي تزوديها

كل دي بلاوي مرة واحدة

جرعة مكثفة

دائما متألقة

تحياتي

soosa el-mafroosa said...

ياء

عينيا ليك يافندم
و عندك واحد مطرب عنب و صلحة

طب ينفع نخليه رئيس وزرا

أهو من العنب لللب يعني قريبة

friends
أهلا بيك في المدونة

أبو تريكة هنخلية رئيس مجلس الشعب
و أهو يبقى أقصر في طريق التعيينات

مرضي كده يا عم؟

islamist bloke

أخجلتم تواضعنا

mizo

إيه يا جماعة شعبية سعد الصغنن المهولة دي؟

وصلت لحد بلاد الفرنجة؟

ماشي يا ميزو ..جبناه رئيس وزرا و دينا هتبقى نايبته..حلو كده؟

انت تسلملي على اخواتنا السعوديين في الداخل و انا أسلملك على أسيادنا المنايفة هنا
يجعل كلامنا خفيف عليهم

و إيدينا تقيلة
:)

rasha

سيبك الأمل في الجنس اللطيف

soosa el-mafroosa said...

عبدالله

هما العرب كده لما يلاقوا نفسهم فاضيين شوية يقوموا يقتلوا في بعض
للأسف طبيعتنا و مش عارفة إذا كنا هنقدر نغيرها

السعوديات لما بيجوا عندنا بيبقوا حرانين شوية معلش

الشعب..بيشتي يا باشا في أسوان..أسبوع عشر أيام كده و هيرجع انشاء الله

-----------------------

dr.tantawy

الفلسطينيين بيقولوا اتفقوا..في انتظار إشتباك آخر

الكويت؟؟؟؟إنت ادرى ..الصراحة مش متخيلة

احنا في مصر عيني عينك و احنا معترفين و بندعي بالهداية ..الدور و الباقي ع اللي دافنين راسهم في الرمل

مين خميس ده؟؟

آآآآآه..قصدك مرزوق؟
بيسلم عليك..إبقى تعالى

spellz

ليه بس كده؟

موجودين و الله ..أو على الأقل كانوا موجودين في خلال ال21 سنة دول

supernova

طبعا
.
.
يوصل

mohamed a.ghaffar

عندك حق

ساكاماكا نيوز

أشكرك جدا و أهلا بيك على طول

حلوة قوي حكاية البيه الكويتي ده

و النعمة دولة مسلية

soosa el-mafroosa said...

massry metgharab

مبروك على تفعيل البلوج
عايزين نشوف الشغل الجامد

و النعمة اللي انت بتقوله ده صحيح؟؟
العيل اللي بتولد بيدولوا كام؟؟

و اللي بتجوز بيقبضوه كام

يا عم شوفلنا الجنسية بتاعهم دي بتتاخد ازاي

بلا فقر

محمد سعد ..آه و الله نسيته فكرتني

نعمله بأه وزير الداخلية
مش يليق؟

السعوديات قمرات.؟؟؟...فين غض البصر يا سيد:)
:)
;)

tota

المزة دي مستوردة يا أختشي بشوكها من جدة ..ده الموديل الجديد

ما المنحة الياباني راحت و الأماني كمان راحت
هتيجي يعني ع القطري

3ola

ربنا معاكوا يا علا
على رأي المقولة
اللهم احمني من أصدقائي أما أعدائي فأنا كفيل بهم

على فكرة مش ناسية التاج ..انشاء الله هاعمله

فارس عبد الفتاح

الصورة طبعا مش مقصود بيها كده خالص

مش عارفة إزاي انت مع حماس في كل اللي بتعمله
دول هما و فتح بيعملوا حرب اهلية
فعلا حاجة تنقط و تعل

معاك في موضوع الخليجيين اللي بيكدبوا عينيهم و يغطوا عقلهم و مش شايفين اللي بيحصل جوة بلدهم قبل براها

إسراف دول الخليج شئ مفروغ منه
لو استغلوا الفلوس دي استغلال صحيح ماكانش أي عربي إحتاج أي حد
بس نقول ايه؟
له في ذلك حكم

د/أحمد المصري
يعني يا دكتور
لا قادرين نغير حاجة
ولا كمان عايزنا نفضفض
طب إزااااي

داحنا نتشل يا دكتور

والا ايه؟

soosa el-mafroosa said...

3rby

سلامتك يا عربي

من غير حقيبة يعني لسه ماحددلوش وزارة
وزير من منازلهم يعني

محمد مفيد

النشرة بتاع التليفزيون المصري دي

يعععع

يا عم طب قول روحي اشتغلي في الجزيرة

farida

هنعمل ايه يا فريدة
هم يبكي و هم يضحك

mongey

يا سلام ؟ ايه الحظ السعيد ده

عربي و مونجي مع بعض
و الله منورين يا شباب

موضوع السعودية مستفز ..و موضوع الكويت مستفزبرضه

دول بيغيظونا دول و الا ايه؟
و بعدين اللي يطلع صدقه مايخليها في السر
لازم يعني الغيظة دي

kaed

الجاف اسكريبت وصل شكرا ليك..بس لسه مش عارفه ألاقيله مكان في التمبليت
بافكر أحول بيتا

المقولة حلوة جدا..و صحيحة

كلمه said...

saba7 elfol ya sosa :D
wlahy wa7ashny elblog da 2a5er 7aga :))
post gamed ya m3lm ... eb2y fakary te3mly el2a5bar b3d keda :D

masrry metgharb said...

استاذة سوسة

اولا الجنسية مش بيعطوها لأى حد كدة وصعبة جدا اصعب حتى من الجنسية الامريكية والانجليزية

اما بخصوص القمرات انا باتكلم عن الايرانيات مش السعوديات

اما بخصوص غض البصر فهو موجود بس الى بيعملوه فى نفسهم يخلى غض البصر مستحيل بس ادينا بنحاول والله المستعان

Anonymous said...

يا أخت سوسة الحاجة اللي تنقط وتعل تقصديني أنا واللي حماس وفتح .


إذا كنت أنا فأني أجيبك وإذا كانت حماس وفتح برضو أنا أجيبك والجواب واحد .


أولا : عايزك تفهمي ولا يغيب عن بالك في أي رد أو مشاركة أني إنسان صعيدي يعني يوجد في ثقافتي الجنوبية رفع السلاح إذا تعثر التفاهم أو الحل وهذه سياسة الأمم الحية .

يوجد حل أخير وحل فعال هو السلاح في حينها أكون أو لا أكون بمعني ابن عمي أو اخوي ظلمني وحاولت أن اخذ حقي منه بصور عدة مثل أن اشتكي لباقي العائلة أو أني أشوف ناس محترمين يحفظون السر ويكلمونه بينهم وبينه أذا نجح هذا كفا الله المؤمنون شر القتال.

أما إذا لم ينفع هذا الحل يكون على أن اخذ حقي بيدي وإلا المفروض عليا أن اقتل نفسي أو ارحل من هذه البلدة أو أعيش في عاري بين عشيرتي وبين أهل قريتي وفى تلك الحالتين عار .

فما بالك إذا خانني بمعني انه لم يتعاون مع الخصم بطريق مباشرة ولكن بسكوته وتخاذله ساعد خصمي علي ذلك وانه من المفروض عليه أن يكون أمامي في القتال والحرب ............ فيكف يكون تصرفك يا أختي العزيزة .

عندنا في محافظة أسيوط الثار اندثر من محافظات الصعيد مثل سوهاج وقنا ولكن إلى الآن يوجد حمل السلاح علني في الشوارع إلى الآن مع أن الحكومة أو الشرطة قابضة بقبضة من حديد على محافظة أسيوط ومع ذلك لا تستطيع أن تسيطر على ذمام الأمور بنسبة 60 % في أقصي حالاتها الأمنية .

لأنهم أصحاب عرف وتقاليد ويوجد عندهم الصراحة الأدبية في كل شيء إذا أراد أن يخلق مشكلة يكون الضرب علني في الخلاء أو في الشوارع أو في البيوت وكل العائلة تشترك في هذه المشكلة ولا يستطيع احد أن يتخلف عن حمل السلاح .

تعرفين لماذا يا أخت سوسة سوف يقتل من أهلة لأنه بذلك قد خانهم وأصبح عب أمني وأدبي عليهم لأنه ممكن أن يقتله الخصم ويحسب عليهم قتيل وهم لا يريدون أن يخسروا في الحرب مهما كلفهم ذلك من أشياء كثيرة لا أول ولا أخر لها .

وممكن أن يكون كبش فداء للخصم ليقيموا عليه الصلح بين العائلتين وبذلك هو لا يوجد لدية حل أخر إلا الانخراط في هذه الحرب شاء أم أبى .

ولا تنتهي هذه الخصومة إلا إذا اعترف خصمه به انه قادر على مناوأته ومناوأة أي احد أخر داخل القرى أو خارجة بذل يكون له المجد والعزة ويستطيع أن يعيش في سلام بعد أن يكون قد خسر كل ما يملك من ماديات ولكن كسب المعنويات منها .


ويتبرع كل بيت بأكثر من شاب لتجنيده في هذه الحرب ويكون فاقدين فيه الأمل أن يعيش يعني وقود لهذه الحرب فيه بدل فاقد وبدل تالف من كل بيت في العائلة .

من لم يكن معي فهو ضدي قالها ( بوش) أكثر من مره فهل احد من الإخوة الفلاحين بتوع !!! بحري

تنبهوا ووعوا وفهموا وتيقظوا واستعدوا لمثل هذه الكلمة بالطبع لا لا لا لا

لأنهم في طبعهم وثقافتهم الخوف وحب العيش مش مشكله أذاي عايش المهم أنهم عايشين وخلاص .

مع انه يوجد مثل في ثقافتنا الصعيدية يقول الإنسان إذا حس انه غير مهم أو فقد كرامته أو أمر ذا قيمه على نفسه أو تهكم إنسان على غيره من الناس فيقول (عايش قلت موت )

أما نحن الصعيده في الجنوب من آلاف السنين في النزاعات القبلية والطائفية !!!

بين النصاره ( المسيحيين ) وفى حين أخر الحكومة ذات نفسها ،،

ونعتز بهذا ونعتبره عز ومجد وفخر لنا نحن الصعيده في حين لا يستطيع احد في مصر الشمالية أن يفعل مثل هذه الأفاعيل على الإطلاق .

هذه ثقافة مصر الجنوبية التي أسسها وأسس مصر الجنوبية وضم مصر الشمالية أول موحد للقطرين صعيدي هو مينا موحد القطرين الصعيدي وأحمس قاهر الهكسوس الصعيدي وجميع الاحتلالات الخارجية لم وتؤثر على ثقافة مصر الجنوبية ولم تدخل فيها كما فعلت في مصر الشمالية والدليل على ذلك لا يوجد اثر تاريخي أو ثقافي في مصر الجنوبية منذ نشأتها إلى الآن .


يا اختنا العقلة سوسة لا تنسيين حرب سيدنا على كرم الله وجهه بينه وبين معاوية ابن أبي سفيان رضي الله عنه ، ولكن علي أبو الحسنيين كرم الله وجهه هو أولى بالخلافة من معاوية .

Anonymous said...

بجد يا سوسه كلامك رائع جدا وجميل ومفيد وفعلا عندك حق لان الشئ الوحيد الى ناقص علشان تكمل هيا الريس مرتضى والنائب تامر "ربنا يخليهوم لنا":) وعلى رايك.... وعجبى

soosa el-mafroosa said...

fnan_geology

سوسة و سأظل سوسة إلى الأبد

الفرسة بأه..ربنا يتوب علينا منها يااارب

utopian

الصورة ليه مستفزة الناس قوي

كل واحده حرة تتصور جنب علم بلدها ..إشمعنا البنات بتوعنا في كاس الأمم

هو بس عشان الشهادتين المكتوبين على العلم بتأثر فينا
بس بالنسبة لهم هو علم بلدهم و بيتصوروا جنبه

أما العيال اللي بيلعبوا استغماية
نفسهم في حتة واسعة يلعبوا فيها و يا عيني مش لاقيين


epitaph

منورة يا إبي

فعلا هيا المشكلة في الفضا


ذو النون المصري

مش عارفة موضوع السفه ده خاص بالخليجيين بس و الا احنا برضه لو معانا شوية فلوس زيهم كده كنا اتبرعنا لبناء مستشفى الكلب بطوكيو؟


blogs4arab


حااضر
من عينيا

soosa el-mafroosa said...


ahmed_h

بعد الشر عليكم م الموت
انشالله هما و اللي يتشددلهم
يا رب


أروى الطويل

إزيك يا ست البنات
و الله محشاني جدا جدا جدا


أكتب بالرصاص





عروستي


مريض نفسي


الخطوات الجبارة التى تخطوها الحكومة العراقية المنتخبة لتحرير العراق

التضحيات الغير مسبوقة من جانب امريكا لنشر السلام ومحاربة الارهاب والتخلف

مش فاهمة نظرية حضرتك ايه بالظبط؟

و الا أنا لازم أضع اسمك المستعار في الحسبان؟؟

مش تريقة و الله ده مجرد استفسار


إنسانة



أهلا بيكي دايما في المدونة

حلوة بقراءها


sherehan84


منورانا يا زميلة
إزي وزارة الصحة في عهدك

ليكي وحشة برضه
البوست ده و الله لم الحبايب كلهم


volcano


أهلا بيك في المدونة
أول مرة و مش هتكون انشاء الله الأخيرة

soosa el-mafroosa said...


amr ahmed


مايخلصنيش زعلك يا عمرو
بس انتوا أصحابي
و لازم تشاركوني فرستي


كلمه

هو إيه موضوع آخر حاجة دي

أنا باسمع الكلمة دي كتير اليومين دول

ده مصطلح جديد في قاموس الروشنة
طب قوله يا جماعة ..مش عايزة أحس اني من العهد البائت

بافكر و الله أثبت الفقرة دي كل شوية زي النشرة بتاع نوران


masry metgharb

طبعا يا عم دي جنسية متكلفة و بتيجي بمصروفها لازم تبقى صعبة طبعا
جنسية محترمة و متكلفة ..لازم تبقى صعبة
زي جنسيتنا كده :)

ربنا يقويك على غض البصر
أنا عارفة ان الظروف ماتشجعش


فارس عبد الفتاح


اللي ينقط طبعا حماس و فتح

لا يمكن أقول كده على حد باعتبره من أصدقاء المدونة
ماتجيش مني دي أبدا
بس أنا باختلف معاك
انا مش شايفة موضوع السلاح ده حل لأي مشكلة بين أخوة أو أصحاب
يمكن عشان مش صعيدية
جايز
و مش معنى كده ان في طبعي و ثقافتي الخوف و حب العيش و خلاص زي مانت بتقول
و مش رفع السلاح ضد أخويا أو صديقي هو اللي هيحفظلي كرامتي و الا هنرجع لشريعة الغاب
تحياتي


semsem89


مش عارفة ليه مش مصدقني يا سمسم
مرتضى و تامر هما الحل
و بكرة تشوفوا
أهم حاجة حب الجماهير
و كله بعد كده يهون

اروي الطويل said...

ياختى وانتى كان حد بيشوفك
دا حتى ولا هاين عليكى تعدى
على فكره انا عاوزه ايميلك او انتى ضيفينى عندك اعملى اى موقف كده هاقولك على شوية حاجات حلوه اوى هتفرحك
سلااااااااااام

soosa el-mafroosa said...

اروى الطويل

يا ختي و الله مشاغل
الواحد مابقاش عارف راسه من رجليه
إيميلي هيتشرف بيكي يا قمر

soosamafroosa@yahoo.com

بس ماتدوريش عليا ع الشات ..ماباشيتش
للأسف عندي عقده و مابحبوش

مستنيى منك ايميل

شجره الدر said...

هههههههههههههههه
ضحكه كبيره
صفراء بقى حمرا
مش مهم المهم ان التعليق الوحيد اللى لقيتنى بقولو هو الضحكه دى
سوسه
دانتى مفروسه بشكل
والله عندك حق
عجبتنى اوى بتاعه تامر حسنى


تحياتى

soosa el-mafroosa said...

شجرة الدر

تسلملي ضحكت
صفرا..حمرا
يا ستي ..أهو كله برتقال

تحياتي

ذو النون المصري said...

مبروك ياسوسه علي شريط الاخبار

Anonymous said...

عفوا عفوا يا سوسة

بسم الله الرحمن الرحيم

ربنا افتح بين قومنا بالحق وانت خير الفاتحين


صدق الله العظيم

يذاع الان فى نفس هذا التوقيت الذي اكتب فيه هذه المشاركة يذاع لقاءعلى قناة الجزيرةالاخبارية ... بين


الدكتور الشيخ / يوسف القرضاوي شيخ مشايخ السنه

والمرجع الشيعي الكبير والسياسي/ على هاشمي رفسنجاني

رئيس مصلحة تشخيص النظام الايراني والرئيس السابق للجمهورية الاسلامية الايرانية


عاشت الثورة الخمينية

وعاش الشيعه الذي يمثلون الشعوب الحية فى هذه المنظقة العربية التى لا يوجد بها رجل واحد



اسف اخت سوسة الفاضلة ولكنك تبحثين عن رجل فى هذه المنطقة بعد موت الزعيم البطل جمال عبدالناصر


عاشت ايران واعاش الثورة الشيعية


والله يرحمك يا زعيم


وانا لله وانا الية راجعون



...................................


*- حكم سيوفك في رقاب العزلى وإذا نذلت بدار ذل فرحلي .

*- وإذا الجبان نهاك يوم كريهتن خوفن عليك من ازدحام الجحفلى .

*- فعصى مقالته ولا تحفل بها وأقدم إذا حق اللقاء في الأولى .

*- واختر لنفس مكنتا تعلوا بها أو مت كريمن تحت ظل القسطلى .

*- فالموت لا ينجيك من أثاره حصن ولو شيد ته بالجندلى .

*- موت الفتى في عززتا خير له من أن يبيت أسير طرفا أكحلى .

*- لاتسقنى ماء الحياة بذلتن بل فسقني بالعز كاس الحنظلى .
*- ماء الحياة بذلتن كجهنمي وجهنم بالعز الطيب منزلي .

يا قلبي يا غريب said...

السلام عليكم ميت فل يا حاجه سوسه كلامك يتوزن دهب...ممكن بقي عشره جرام علشان اخطب ..لنا لله و الي الله المشتكي

Islamist Bloke said...

هو حضرتك بتكتبي بوست واحد كل شهر مثلا...ده على غرار البومات عمرو دياب عشان ما يحرقش نفسه فى السوق يعني؟

عايزين برودكشن عالى يا سوسة....انتى البرودكشن بتاعك ما شاء الله تمام فى الكواليتي عايزين بأة الكوانتيتي

فى الانتظار
سلام

Anonymous said...

بسم الله الرحمن الرحيم
السلام عليكم ورحمة الله وبركاته

بدلا من قعود البعض و البكاء كالنساء على ما يحدث للمسلمين او السخرية من انفسنا الدالة على قلة الحيلة الا من اللسان السليط

اولى بنا الاصلاح في كل مجال .. يعني مثال بسيط .. لا يجوز نشر هذه الصور و امثالها.. كلمة لا اله الا الله محمد رسول الله توضع على سافرة!!
ونحن نتفرج و عادي يعني .. لم يتمعر وجه رجل واحد بسبب إلف مثل هذه المشاهد ..هذه الفتاة كانت لتضح حجابا على رأسها لو وجدت من اهلها و مجتمعها رجال يعلموها ما هو الدين


المفروض لا نسأل من اين تاتي الهزيمة بعد رؤية هذه الصور وردود الافعال عليها

صحيح .. هناك ذكور و هناك رجال!! ولكن لا نراهم عادة

مررت قدرا ولن امر ثانية