آه كان فيه بلطجية ..مأجورين
آه كان فيه حركات غريبة من الأمن و فيه ناس قالت إنهم شافوا بلطجية نازين بالشوم من جوه عربيات الأمن المركزي
يمكن كانت حركة عشان يشيلوا المحافظ ..عشان يغيروا مدير الأمن..عشان يبقى فيه 50 ألف عسكري أمن مركزي موجود في المحلة (اللي هيا عاملة للكل كالو في دماغهم)بشكل يومي
يمكن بدأت كده
لكن
الناس العادية و بالذات الشباب
التكسير العشوائي و نظرية " أنا هانتقم من المجتمع بالطوبة دي اللي هاضربها في المحل ده أو هولع في القطر انشالله يولع باللي فيه
دي ناس طهقاااااااااااااااااااااااااااااااااااااااااانة
شفت بعيني ستات كانوا بيشجعوا ولادهم
روح يا وله ولعلهم في البلد يمكن يحسوا باللي جوانا
إجري يا وله كسر مع زمايلك
واحدة فيهم كانت واقفة على شريط القطر ..قلتلها يا ستي حاسبي القطر جاي تتعوري..قالتلي إلهي يدهسني و أرتاح من اللي أنا فيه
حد واخد باله من الناس دي؟
حد فكر لو ماكانش فيه أمن ساعتها الموضوع كان هيوصل لإيه؟
مش باشكر الأمن على وجوده -طبعا- لكن بصراحة.......خايفة
حاسة إن اللي خرجوا يوميها قريب قوي هيخرجوا تاني و يبقوا عاملين زي الفلسطيني اللي بيفجر نفسه في سوق أو في أتوبيس
بس الفرق ان ساعتها المصري مش هيكون عنده قضية غير انه يخلص من الذل اللي هو فيه و ينتقم من البلد ككل
و الفرق التاني ان اللي هيموتوا و هيتصابوا مش هيكونوا أعداء ..دول هيكونوا إحنا
اللي انا شفته يوم 6 إبريل يخليني أخاف...مش من 4 مايو..لأ..من يوم تاني هيكون التكسير و الخطف و يمكن الإغتصاب و القتل هو سماته المميزة
حسيت في عيون الناس دي انهم مستبيعين و فاضلهم خطوة واحدة و ينفجروا اليأس اللي جوا اعيون ده شيء مرعب بجد..طول عمرنا يأسين ..لكن يأسنا جوانا بنخبيه بضحكة.بنكتة.أو حتى بخناقة..لكن اليأس الصافي ده...ما فيش حاضر و مافيش أمل في مستقبل
البلد دي ممكن بكل سهولة تتحول لعراق تانية أو لبنان تانية...مش محتاجين أمريكا تيجي تحتلنا عشان نعمل كده..الضغط لوحده هيعمل كده
حد خايف زيي كده؟..والا أنا عندي بارانويا؟
طب حد حاسس من اللي فوق؟..حد شايف حالة البلد و هي نازلة من فوق الجبل زي كرة التلج و الكرة بتكبر شوية بعد شوية لحد ما هتدمر كل حاجة
حد خايف؟
18 comments:
ممممممممممم
هو اكيد محدش يوافق علي التخريب طبعا يا بيللا
بس حكاية ان الامن بيسيب الناس تكسر علشان يطلع
ان المظاهرات تخريب
ربنا يستر بقي
خايف طبعاًوسيأثم وقتها الجميع
المحرض والمحرك والفاعل والحكومة والشعب وحتى انا وانت
السلام عليكم
للاسف السيناريو دا
هيحصل بس مش هيطول المفسيدن ولا المتسببين في كل دا حاجة
لانهم خرجوا برا القاهرة في الرحاب ولا في الساحل الشمالي ولا شرم ولا اي حتة نضيفة تانية بعيد عن عامة الشعب الغلبان الحقيقي
القنبلة الموقوتة هتنفجر فينا احنا بس
هما اللي غلطوا و احنا اللي هندفع تمت جريمة لم نرتكبها
ربنا يستر فعلا بجد
ربنا يستر
فعلا حاجة تخوف قوى , ربنا يستر و يعدى السنين الجاية على خير
احنا فعلا بقينا طهقاااانين , لأن النظام خلاص خنقنا
يا جدعان مفيش بلد فى العالم بيحصل فيها زى مصر
تتصوروا ان بلاد زى باكستان و زيمبابوى تحصل فيها انتخابات نزيهة بجد و تفوز فيها المعارضة
مصر قطر سواقه عنده 80 سنة , و مقعد ابنه على حجره
للاسف كلنا الان بما فينا المفكرين بيعتمدوا علي ستر ربنا و الكل بيدعي علي مستقبل مصر ربنا يستر
كام مره مفكر يقول من اقواله كل ما افكر في مستقبل البلد اقول ربنا يستر
حاله غريبه فعلا وصلنا لها كلنا و للاسف بالقيادات المفكره بعد ان عزلهم النظام عن المجتمع و شل فاعيلتهم تماما
مش عارف ليه انا مش واثق ابدا ان مصر هتخرج من هذه الحاله
حاسس ان الله يلعنه مبارك سمم جسم البلد و سمم ترابها و هواءها و مياهها
حاسس انه سمم المانخ في مصر ككل بما فيها الافكار في العقول و حتي الاجنه في البطون
مع احساساتي هذه لا اعتقد اني ممكن اكون مطمئن لاحوالنا و حكاية اننا مش محتاجين امريكا اعتقد فعلا اننا ممكن نقع في نفس المطب
ممكن نتحول لنوزج للفوضي الغير خلاقه
و ربنا يستر
انت اكيد ما سمعتيش النشيد الوطني الجديد للست كوكب الغرب شرين عبوهاب
بلدنا امانه في ادينا
بس انشاء الله أول ما تبقي بلدنا نبقي نعليها ان شاء الله
بيقولك البزين غلووووووووووووووووووه
امممممممممممممم
بصى ياستى
السلام عليكم الأول
موضوع إنفجار البلد دا شئ مفروغ منه لأننا خلاص بقينا قاب قوسين أو أدنى من الإنفجار بس طبعا الدخلية كما إتعودنا منها لن تسمح بذلك مهما كلفها الأمر والتكلفة دى بتكون أروحنا يعنى الموضوع منتهى
أما إن البلد أوضعها تتحسن دا موضوع فى إيد الشعب الناس اللى بتفرح بالرشاوى اللى بتتوزع فى الانتخابات واللى بيرشح واحد عمره ماسمع بيه ولا بيشوفه الا أيام الانتخابات
لازم كلنا نشغل دماغنا شويه ونرشح اللى نثق فى مقدرته على تمثيلنا
لا نخاف سوى من رب العزة
ربنا يصلح الحال يا سوسة يا رب
تحياتي
amr ahmrd
أولا
بيللا مين؟؟
صباح الخير بالليل يا عمرو..معلش ده أكيد تأثير المذاكرة
ثثانيا
ربنا يستر فعلا
محمد عبد الغفار
و المشكلة إني حاسة إنه قرب قوي
ربنا يستر بجد
شمس الدين
على رأيك
ما اللي بيسرق بيروح مارينا
و احنا اللي هتبهدل فيها
نوبية جدا
حلو قووووي موضوع القطر ده
ربنا يستر بس و مايولعش بينا كلنا
و سعتهاتفتكروا هيفضلوا والا السواق و ابنه هينطوا و يسيبونا؟
ذو النون المصري
الصورة سودا و للأسف مش باين فيها أي بارقة أمل
مافيش نور في آخر النفق
النفق اتقفل علينا من الناحيتين
noor
يعني الواحد لو حب يدلق على نفسه جركن بنزين و يولع في روحه يعوزله كام كده بالتقريب
والا مش هنلاقي نولع في روحنا كمان؟
haney ahmed
ما هي المشكلة إن أي حد بيشغل دماغة إنت عارف بيروح فين
يبقى إيه الحل
بجد مش عارفة
eric matt
يا رب يكون الداء كافي
لكن مافتكرش
تحياتي
فعلا هيحصل كده وحنكون من جوانا مش من احتلال أمريكى أو اغتصاب صهيونى طالما حاميها حراميها
Post a Comment