مش عارفة ليه بيتهيألنا ساعات بأمخاخنا الضلمة دي ..إننا عارفين مصلحتنا
الشيطان بيوسوسلنا و بيوزنا نطالب بحاجات مش فاهمين عواقبها إيه
يعني إيه الأجور تزيد..هما يعني هيجيبولنا منين؟..من جيوبهم..ماحنا عارفين لا عندنا موارد و لا عندنا ثروة سمكية و لا بترول تحت ألغام العلمين ممنوع نستخرجه ولا قمح ممنوع نزرعه ولا آثار و لا صناعة و لا تجارة و لا قناة سويس و لا فلوس ضرايب ولا تحويلات الشقيانين في الخارج ولااااا أي حاجة
و بعدين نتقمص قوي لما يزودولنا البنزين و الأسعار عشان يوفرولنا العلاوة اللي هتخلينا نواجه الزيادة في البنزين و الأسعار
!!!!!!!!!!!!!!!!!!!!!!!!!
طب و نزعل لييييه؟..ماحنا اللي اتسحبنا من لساننا
إمتى هنفهم إن الريس و الوزارة عارفين مصلحتنا أكتر منا؟
يعني زيادة و زودوكم..دلع و دلعوكم...لعبوكم كل الألعاب
يبقى بتشتكوا ليه بأه؟؟
أنا شخصيا حرمت
و باقولهالك يا ريس بالفم المليان
حرمت أقول عايزة زيادة في المرتب..لأنكم أكيد ساعتها هتزودوا البنزين و الأسعار
حرمت أقول عايزة رعاية صحية على مستوى..طالما مش هاقدر على أسعار المستشفيات لما هتقلبوها كلها خاصة
حرمت أقول عايزة تعليم نضيف..طالما مرتبي و مرتب أهلي كلهم مش هيقضوا مصاريف سنة بعد ماتلغوا التعليم الحكومي و اللي نفسه يتعلم يبقى يتعلم في جامعة من جامعات ولاد الناس الكويسين
حرمت أطالب بالديمقراطية..طالما هي من وجهة نظركم إننا نتكلم زي ماحنا عايزين و بعدين انتوا تحبسونا زي مانتوا عايزين
حرمت يا ريس
و مش هافتح بقي و أطالب بأي حاجة تاني
حرمت يا ريس
و الله حرمت
33 comments:
ايوه والله حرمت بالجامد
الرحمه يارب
حرمت زي بوجي ما قال
وحشتيني يا سوسه والله العظيم
بس انتى توقفتي مده طويله شويه
وانا كمان مقصره في المتابعه
ياريتنا نحرم اننا نحرم.
مقالة رائعة ورائحة السخرية خفيفة.
واتمني قبولي زائر لمدونتك
ولا حرمتي.
أسامة
واناكمان زيك حرمت
ده احنامفتريين اوي
و أنا كمان حرمت
بس الصراحة مش عارفة احرم اقول
حسبي الله و نعم الوكيل فيك يا ريس
حسبي الله و نعم الوكيل فيك و في اللي جابوك و خلوك و سابوك و هايخلو ابنك و ابن ابنك و ابن ابن ابن ابنك
حسبي الله و نعم الوكيل في حاشيتك.. و لو انك مش محتاج حاشية
حسبي الله و نعم الوكيل في الحرامية و اللي اتعدمت عندهم ريحة الذمة و الضمير
حسبي الله و نعم الوكيل
حسبي الله و نعم الوكيل
إلخ إلخ إلخ...
شطورة يا سوسة .. ايوان كده برافون عليكى .. اديكى يا امورة فهمتى اللعبة ماشية ازاى .. مش بيقولك اللعب مع الكبار ..
ال ايه يا سوسة يا اختى اليهود زمان ايام ما كانوا فى مصر كان الفراعنة مضطهدينهم و مطلعين عين الى جابوهم .. شوفى انتى بقى الحكومة الى كانت مطلعه عين اليهود هتعمل فينا احنا ايه:)
طيب والله انا مأخدتش حاجه انا قطاع خاص متنيل
وانا مالى ااكل عربيتى ايه عصير قصب طيب والله القصب غالى
وبعدين ايه نحرم دى لا طبعا خالص هنقول بس واحنا بنجرى هههههههههه
الصراحه كل ما ادخل مدونتك بحس بالحيره مش عارف اضحك من خفة دمك ولا ابكي علي حالي وحال اهلي وحال ولادي الي لسا مجوش وياريتهم ما ييجو عشان ميتزلوش زي ما احنا اتزلينا .. سوسا المفروسا ليكي كل تحياتي وتقديري ويا ريتني اقدر اقول زيك " حرمت يا ريس " لكن اعمل ايه في دماغي الناشفه كل ما احرم ارجع تاني اعاند واقول لا
وارجو منك زيارت عيساوياتي
عزيزتي المفروسة
يظن كثيرا من المصرين بالخطأ ان هذه البلد بلادهم رغم ان هذه البلد بلد الريس وعائلته ومحاسيبه واحنا ضيوف عن
عندهم وهما كتر خيرهم متحميلنا بس مش معني كدة ان الضيف يطلب طلبات من صاحب البيت كفاية عليه قوي انه مستضيفه الحكومة بتحاول تفهنا كدة بس لأننا دماغنا علي قدنا فمش قادرين نفهم لكن كتر التكرار بيعلم الشطار
يارب بقي نفهم
تحياتي لكي
كل الزيادات استطعت ان افهمها
إلا السولار اللى القرش فيه بيبطح الفقير بلا رحمة
انا حرمت من زمااااااااااان
حرمت كل حاجه ...بطلت اعترض....(حتقولى عليا بفشر علشان الوست بتاعى يعنى حقولك من الكبت ..بعيد عنك)
باكل اى حاجه و كل حاجه و انا ساكته...يحطوا موبيدات...همه برضه ادرى علشان الدود اللى فى بطننا اللى ما بتشبعش يموت.......
يغلو البنزين...طبعا علشان اللى بيفكر يحرق اى حاجه يراجع الميزانيه مليون مره.....يحطوا ضرايب على المدارس..علشان اللى ناوي يعلم ابنه فى الزمن الجميل ده ياخد على دماغه
......انا حسكت و احرم
ما هو لازم تحرمى
وجنب الحيطة تمشى وما تتكلمى
هيا دى الحرية هيا دى الديمقراطية
يارب نور طريقنا
وهات لينا اللى ينور
طريقنا ومستقبلنا
مفيش احلى ولا ارق من الدعاء والرجاء
ونورتى مدونتى بجد
بس المرة الجاية خليكى جنب الحيطة
وما تسندى عليها اوى
لااحسن هديتى الجنب الامامى
تحياتى
حرمتى
علشان تسكتو بقا
عمر الحداية ما ترمى كتاكيت
وعمر المصرى ما هيفضل معاه غير فتافيت
والبلد بتاعتهم مالناش فيها أى تيت
والمدونة جامدة من غير تنتيط
لا عمرك هاتحرمى ولا هاتعرفى...
عزيزى الرئيس
طظ فيك...
المقالة جميلة اوى يا سوسة
يارب تكونى بخير
انا لسة محرمتش ومش هـ حرم وهم اللي لازم يحرموا يستهزئو بينا ولازم يدونا حقوقنا ولازم حاجات كتير تتعمل بس المهم اننا محدش فينا ييأس ويقول حرمت يا ريس
مصرى متغرب
مش عارف اخرتها معاكى ايه ياسوسة كل ما اغيب وارجع اقول سوسه هاتعقل وتبطل تتعب مخها وتعيش زى بقيت الشعب الى عايش وكل الى فى دماغه جوزيه هايمشى ولا هايجدد عقده مع الاهلى وحسنى عبدربه هايروح الاهلى ولا الاسماعيلى ارجع الاقيكى برده بتتكلمى فى السياسة
اتمنى تكونى حرمتى بجد وتفهمى ان بابا حسنى قصده مصلحتنا وبيعمل كل حاجه كويسه علشان خاطرنا ومش قصده خالص انه يجوعنا ويشغلنا علشان ما نفكرش زى ما كنتى انتى فاهمه
واخيرا بجد بجد البلد دى خلاص ماتت ومش نافع فيها اصلاح
وسلام بقى بدل ما اتحبس
لماضة
مش كده برضه
و حشاني يا بنت إنتي
ابقي تعالي بأة
---------------------
مصري
منور المدونة يا أسامه
بس أنا خلاص هيا دي نظريتي الجديدة
لااااااااازم نحرم عشان ماتجيش على دماغنا
والا إيه؟
محمد مفيد
مش كده و النبي
إفترا افترا يعني
---------------------
نيران
لا يا جماعة
لازم نقدر هو بيتعب عشانا أد إيه
قلتوله هات علاوة
جابها
هيعمل إيه تاني يعني؟
koko
مش كده يا أختشي بالذمة
و على رأيك
اليهود من كتر اللي عملوه فيهم جاتلهم قفلة في النفسية و ماشيين ياكلوا في الناس
أمال إحنا هنعمل إيه بس
-----------------------
appy
أنا بأة قطاع عام
و اتبشبشت على الآخر
بيقولك إن فاتك المير
خد اللي بعده
عادي يعني
عمرو عيسى
ور تعيط ولا تضحك
إنضم معايا لحزب المفروسين
أكبر حزب في البلد
هاود بس و قول حرمت و الريس هيجيبلنا كلنا حاجة حلوة
-------------------------------
mostafarayan
مين بيظن الظن الوحش ده
لا يا فندم كلنا عارفين
بلدنا ؟..أنا شخصيا عمري ماشربت من نيلها ولا جربت أغنيلها
محمد عبد الغفار
طب يا بختك إنك قدرت تفهم كل الزيادات
عقبالي
------------------------
واحدة مفروسة
براوة عليكي كده إنتي عضوة في حزب المفروسين اللي حرموا
العضويات مفتوحة بس بشروط تعجيزية
لنيل العضوية مطلوب من كل عضو 10 أرغفة عيش من اللي برده
.
.
إبقوا قابلوني
tamen nabil
"وهات لينا اللى ينور
طريقنا ومستقبلنا"
و ده هيجي منين ده
إييييييه
ربنا يبعت
---------------------
funkydoctor
و عجبي
:)))
elgazaly
يااه
إنت كنت فين
طولت الغيبة
مدالله ع السلامة
بس إيه الشجاعة دي
بالراحة ع الريس شوية
ده شمعة بتحترق عشانكم
إنتوا ليه مش واخدين بالكم من كده
هه؟
------------------------
tamer sala7
أحسدك على شوية المل اللي باقيين عندك دول
انا بأه
بح ..خلاص..مافيش على رأي الست نجلا
مصري متغرب
أنا عملت حاجة؟
مانا باقول حرمت أهه
دانا المرة دي بالذات عداني العيب و ازح
ألا يعني إيه أزح دي؟
و بعدين انتوا في الأمان هناك
احنا هنا اللي بنتحبس
مش انا يعني دول هما
:)
تحياتي
شوفوا يا جماعة
انتوا زعلانين ليه ؟
انتوا طلبتوا زيادة
هم رفعوا اسعار
اصل لما يرفعوا فلوسكم
هتشتروا حاجات كتير
يعني هتكععوا البلد كتير
يبقي ايه لازمتها الكع الكتير
نرفع دي قدام دي
بتفكروني بدرجات الرأفة عندنا في الكلية
احنا عندنا 30 درجة رأفة
نقوم لما ينضافوا لينا
نبص نلاقي درجات الاقسام اترفعت 30 درجة هي كمان
مش انتوا الي عاوزين
اشربوا بقي .
من ناحية الفرسه فأنا مفروس جداً
انضم .. وماله منضمش ليه .. هما يعني الي انضموا مفروسين اكتر مني ولا يعني مفروسين اكتر مني ..
بس هو مقر الحزب دا فين ؟
حبينا نناديكى تيجى تحضرى اول عيد ميلاد للمركب عندنا
ما تتأخريش
يانتى ياسوسة
خلاص صوتك وصل للريس وعرف انك حرمتى خلاص هههه
فى انتظار جديدك
دى عاشر مرة اخش
وابقى تعالى طلى مش مكتوب عليا اطل على اصاحبى وهما انفيض
ههه
ربنا يوفقك
.
تحياتى
كان فيه عالم بيتكلم عن التطور في الذكاء البشري و قال كلمه لازلت اذكرها
قال
سنظل و الي الابد نصطاد السمك بالصناره و الفاره بمصيدة الفئران
دلاله علي عدم تطورها العقلي
و يبدو ان نفس الكلام يصدق علينا الان
سيظل مبارك يصيدنا بالعلاوه و الي الابد الا اذا تطورت عقولنا و يدو انه حرم علي عقولنا التطوير لاجل الا نفلت من مصيدته
للاسف
مفيش
فايدة
:(
حرمتم تفتحوا بقكم وتطلبوا أي حاجة خلاص؟
أيوة كده إرجعي لعقلك .. صحيح شعب قاصر مش عارف مصلحته
المرحلة الجاية ما حدش يفتح بقه بغرض التنفس كمان .. وإلا هنجمرك الهواء
مقاله جامده
واول زياره ومتكرره ان شاء الله
ما كان من الاول
تحياتى
أحببت خفة دمك رغم الحزن الساكن بداخلي على حال بلدنا
ربنا يصلح حالها وحالنا
مستنية زيارتك لمدونتي اللى لسه جديدة خالص
دعاء
Post a Comment