Monday, May 26, 2008

دكتور فلة...نصير الحرية






لراجل اللي إسمه دكتور فله ده فارسني و فاقع مرارتي و بيركبني العصبي كل اما أشوفه ..شيء كده غريب و عجيب و مالوش أي تفسيربشكله بلكنته بجمهوره اللي بيفكرك بجمهور أوبرا كله ستات و بس مش عارفه ليه بمراته اللي مابيروحش في حتة غير و هو ساحبها وراه ..مش عارفة بتديله دعم معنوي و الا خايف لو سابها لوحدها تديله بمبه و تمشي مع حد عنده شعر و الا إيه ؟




أنا أساسا مش عارفة أنا بتفرج عليه ليه طالما فارسني قوي كده..بس للأسف معاد إذاعة الحلقة بتاعته على الإم بي سي 4 مابيبقاش فيه حاجة تانية أعملها فبمد إيدي ع الريموت و أنا عارفه كويس إني هتتفقع مرارتي بس تقول إيه..يظهر دي نظرية جلد الذات اللي ماشيه بيها بدل البطاقة عشان ماعنديش جيب ورا






المهم بأه الراجل العجيب ده دايما بيحاول يرسم لنفسه صورة المحايد المدافع عن الحق و الفضيلة و الأخلاق و العدل و الجمال و كل الحاجات الكميلة اللي عمكم بوش عايز ينزلهلنا على بطايق التموين






على مدى 3 حلقات بأه عرضلنا سي الدكتور قصة حب ..فظيييعة مريييعة شنيييعة بين بت عبيطة كده أمريكانية وواد أهبل فلسطيني إتقابلوا على "ماي سبيس" اللي هو حاجة كده زي الفيس بوك و البت و هي عندها 16 هربت من أهلها و قطعت تذكرة طيران و فلسعت على فلسطين..طبعا معروف رد الفعل..عيلتها صوتت و التليفزيونات الأمريكية صورت و الجرايد كتبت و تصدر الخبر كل وسائل الإعلام الأمريكية و إديها بأه ..دي اتعرضت لغسيل مخ..أصل الوادعايز يتجوزها عشان يدخل أمريكا و أمها تحمر في عينيها و تقولهم طب لو عايز ماجاش هو ليه..ده أكيد إرهابي..لأ لأ ده لازم إرهابي..لأ لأ لأ ده حتما إرهابي







المهم البت إتمسكت في الأردن و رجعت تاني لأهلها ..سنتين و البت لسه بتكلم الواد و الواد بيكلمها كملت 18 سنة من هنا و راحت قاطعة تذكرة الطيران و جري على فلسطين..و عيلتها وصلتها للمطار و بعدين قال إيه حسوا بغلطتهم فقالوا لازم يلجأوا لحد يجيبلهم بنتهم ..دوروا على سوبر مان ..إعتزل ..بات مان ..بيصيف..سبايدر مان ..مراته كانت واقفاله بالشبشب لحد مايخلصلها فمين الغسيل ..و لما مالقوش أي حد من السوبر هيروز بتوع أمريكا قالوا مابدهاش مافيييش غير دكتور فلة ..الفلة المناسبة في المكان المناسب







الراجل و عشان بيدور ع الحق و الخير و السلام و قريب يمكن يترشح لجايزة جورج دبليو سي للتعاون الدولي ..عملهم 3 حلقات ورا بعض.. و يكلم البت في فلسطين هي و الواد قاعدين جنب بعض و ماسكة في إيده زي الكابوريا و يقولها لازم تيجي ماما قلقانة عليكي يا قمر ..ماشي يا قطة ؟ ..طب يابني ماهي أمها دي اللي موصلاها المطار بنفسها إشمعنى يعني عايزاها دلوقت
..والا هيا بروباجندا فاضية و طلقتين في الهوا عشان يفكروا الناس بالفلسطينيين الوحشين اللي بيخطفوا البنات الأمريكان الشقر المسنكحين؟




المحروس و المحروسة


المهم البت يقولولها تعالي ..تقولهم لأ ..يقطعولها تذكرة تروح لحد المطار و ترجع تاني لحبيب القلب و تقولهم أبدا..لا يمكن أسيبه و لو بطلوع الروح..المهم فين و فييين بعد ييجي 3 أسابيع رجعت المحروسة لأهلها..و راحوا جماعه عند دكتور فلة و قالوله خلاص يا أونكل "ايفيري ثينج إز أوكيه" قالهم أببببدا ..أنا قلبي حاسس إنكم بتكذبوا عليا و قلب المؤمن دليله و انتوا عارفين قلب الأم ..البت قعدت تنهنه و تقوله ..ضربني أ أااه ..و شتمني بأمي و أبويا و مش عايزاه مش عايزاه..ماخدوش يا بابا ماخدوش يا بابا..الراجل راح واخد نفس عمييييق و ألقى خطبة عصماء عن المنطقة الخطر و الأصول المشكوك فيها و التصرفات المريبة بتاع الواد " الفلسطيني" ده و عيلته و كل اللي بيتشددوله









و كل دقيقتين يقول للبت أهم حاجة عندي إنك تعودي لأرض الوطن الأمريكي الحر"...أهم حاجة إنك ترجعي لتنعمي "بالحرية" ..لأ و الأنكت إن عيلتها مديالها كلمة سر تقولها لو حبت ترجع في أي وقت عشان يكلموا السفارة






و الواد طول ال3 حلقات يجيبوه و هو بيضحك ضحكة واحد مجنون و يركزوا على عينيه و يختاروله لقطات و هو بيبرق و كل اللي فاضل إنهم يرسمولوا فوق دماغه قرنين و دكتور فله يرفع إزازة بيرة و يحلف " و حياة النعمة دي على عيني والا تغور من وشي الواد ده إرهابي و عايز ياخد البت دي يحشيها متفجرات و يفرقعها في تمثال الحرية..عشان أمريكا تبقى من غير حرية..لكن الحمدلله إحنا قدرنا ننقذ الحرية...الله يخرب بيت دي حرية يا أخي ..عشان بت هابلة زي دي عمالة تلعبكم كلكم على الحبال و أولكم الواد الأهبل ده و بعدين هتعملوهالي قضية أمن قومي ..لأ و لما إتصلوا عن طريق القمر الصناعي بالواد و البت قالتله "إحنا لازم ننفصل" تسمعوا الأرشانات اللي في الصالة بيصقفوا و يصوتوا أكن البت قتلت بن لادن و الا بنت لهم برجين بدل اللي اتفرقعوا دول







و أمها تقوله ..باقولك إيه إوعى تكلم بنتي تاني يا مجرم..الواد يرد يقولها هو انتي يعني ماتتكلميش بأدب غير لما تبقي عايزة فلوس..تقوله فلوس إيه؟..انا ما اخدتش منك غير 500 دولار اللي بنتي كلمتك بيهم تليفونات ..هو انتوا تحبوا يعني و أنا أكع..يا بنت ال...أكن إنت يا أهبل كمان بتدفعلهم فواتيرهم..يا أخي منك لله ..يعني مجرسنا الجرسة دي و كمان بتبقشش عليهم؟ ده غير إن تذكرةالطيارة الأولانية اللي البت كانت رايحة بيها فلسطين كمان كانت على حسابه







البت يا خويا لعبت الناس كلها ع الشناكل في عبر المحيطات و القارات ..و في الآخر طلعت المشكلة إنها "قالت" إنها بتحب واحد من "فلسطين" يعني لو كان ده من كندا والا استراليا كانوا نصبوا النصبة دي و الا فرشوا المولد ده







النصيحة بأة بتاعت الدكتور فلة في آخر الحلقة للبت السهنة السهتانة دي ..إنتي بأة يا سكر إيه ..تغيري كل تليفوناتك و الصفحة على ماي سبيس دي تقفليها خالص مش عايزين إتصالاات بناس من دول غريبة و نواياها سيئة ..خليكي بس مع الأمريكان سيبك م العالم "الرابيش" التانيين دول ..أصلهم لا يعرفوا و لا يفهموا معنى كلمة حرية....أهممممم حاااااجة الحرية


43 comments:

Miss. Sosa said...

ههههه
بجد اسلوب عرضك رائع اوي
والواد اهطل ومتأمر على نفسه
انا كل اللي غايظني انه يدفع لها تذكر الطيارة و 500 دولار تليفونات
يعني بلد محتلة والبيه رايح يصرف علي الامريكان
بجد حاجة تفررررررررس

Ahmed Mubarak said...

ده انتي مشكله بجد

بجد اسلوبك مشكله

انتي عارفه ايه الي غايظني .. هوا بصراحة انا بحب البرنامج ده علشان بيعجبني منظرهم وهما بيعيطوا .. مره وحده جبها كذا حلقه عندها مشكله انها بتاكل ضوافرها ..
البت جعانها والناس مش لاقيه تاكل وعامله اكتفاء ذاتي ..

ما علينا
كمان الي فرسني ان شاب زي ده في مكان زي ده المفروض يكون تفكير تاني خالص

ولا ايه رايك

mohra said...

و الله دى غلطتك علشان بتتفرجى على ناس زى ديه....اللى حصل ده اقل من المتوقع..طبيعى يعنى...سيبك انت دمك شربات و الله

Unknown said...

غلطااااااااااااااانة والغلط راكبك كمان يا سوسة

بتتفرجى ع العته ده ليه من اصله

أقولك .. شفرى إم بي سي 4 دى وريحى دماغك .. ولا أقولك .. شفرى الدش كله .. ولا أقولك .. احرقى فى التلفزيون يابنتى بلا وجع دماغ

ايه الفرسة دى
:D

ذو النون المصري said...

انا بصراحه مش متابع ابو لمعه ده
بس واضح انه جزء الموضه الجديده التي تنادي و تقدم ما يطلبه الامريكيون
و هو واضح انه مخلص جدا لطلباتهم
بالنسبه للولد الفلسطيني هو واضح للاسف انه معندهوش دم اصلا
بيبقشش علي البنت و اهلها بتليفوناتها و تذاكر طيرانها؟
و فين اهله؟؟ و ايه موقفهم من عمايله؟
و بعدين البنت هي كمان مش عارف ايه نظامها بالظبط
سافرت له مره و بعدها بسنتين سافرت له تاني
و بعدين ترجع تهب في وشنا كلنا و تقول لا
طب ليه من الاول؟
اللي يغيظ
اللي قاعدين في القاعه و فرحتهم برفضها له و كان البنت عملت شيء مهول
فعلا شيء يغيظ
لكن اللي يغيظ اكتر من الكل
هو المعفن ابو لمعه اللي خلي للقصه شنه و رنه علي حساب سمعتنا

مصــــري said...

عزيزتي "سوسة"

دايماً احنا ارهابيين وهم رموز الحرية.

أقولك أنا شبه ملتحي "لحية خفيفة"
وكنت راكب المترو وركب اتنين "شاب وفتاة"
من شرق آسيا.

نظراتهم ليا وكأني هطلع "اربي جي"من جيبي وهفجر المكان.
نننيييييهههههههههههاااااااااااه

المشكلة الاكبر اني اسمي اسامة
بس مش بن لادن

الدكتور فلة مجنون اخر من مجانين امريكا.
والموضوع كان لازم يبقي بفرقعة عشان فيه كلمة عربي.

عرضك راااااائع جداً
واسمك شكله علي مسمي.

تحياتي
أسامة

جبهة التهييس الشعبية said...

منك لله منك لله منك لله
حرام عليكي هو انا ناقصة؟ يعني هو انا ضغطي واطي وانت بتعليهولي؟ ده انا غلبانة وباجري على مدونة ليه تعملي فيا كده؟ ليه تحرقي لي دمي ده انا مسكينة والبت شكلها ينتف عليه اصلا حسبي الله ونعم الوكيل وايه الاهبل ابن الهابلة ده؟ ايه اللي وقعه في البت دي ابن الدايخة وازاي الام بي سي تعرض حاجة زي دي؟ وانت شفتي الحلقة واتحرق دمك انا ذنبي ايه يتحرق دمي ع المسا؟ اعمل ايه انا دلوقت ياربي؟ اعمل ايه؟ انام ازاي؟ اكيد طول ما انا نايمة الليلة دي ح افضل اتخانق مع المخدة مش كفاية الخناق اللي باتخانقه كل ليلة وانا نايمة؟ ده المخدة دي لو نطقت ح ترمي نفسها من الشباك على اللي باعمله فيها
حرام عليكي عاااااااااااااااااا

محمد عبد الغفار said...

ياسلام على الناس اللى عندها ترف الفضاء اللى بيسمح لهم يتفرجوا على حاجات مستفزه عشان مش لاقيين حاجه يعملوها

ده قر صريح على فكره

محمد أسامة رسلان said...

أسلوب عرض تحفة بدرجة جامد جداً

:)

خالص التحية

محمد أسامة رسلان said...
This comment has been removed by the author.
Fahd said...

دي اول مرة ليا هنا وسوف اجاهد الا تكون الاخيرة

لي شوية كومنتات

في في علم النفس مرض عدم اللمؤاخذة اسمه الماسوشية وهو لذة تعذيب النفس

ساعات الواحد يتعمد يغيظ نفسه

دي حاجه

تاني حاجه
سبايدر مان ..مراته كانت واقفاله بالشبشب لحد مايخلصلها فمين الغسيل

ايه الحقد ده

اما ده سبايدر الواد الجامد العسل امال الغلابة اللي هما احنا هيتعمل فينا ايه

في وصف لاحمد خالد توفيق اراه مناسب ولكني في ناس بتفهمه غلط

لو عايز توصف واحد نشيط بشكل مزعج

عفريت يعني

بيقوله انت نشط كالمصيبة

To a friend said...

اتفرجت علي حلقتين من التلاتة لأني زيك وقت عرض البرنامج باكون فاضية و مفيش حاجة تانية اشوفها

الحقيقة الاسرة كلها عندي كانت بتتفرج فكان حرق دم جماعي

و ماما فضلت يومين - يا عيني - متضايقة اوي من الموضوع ده و رايحة جاية تسأل طيب يعني هو ليه الولد يعمل كده؟ طيب هو ليه ال ام بي سي تعرض ده ؟
طيب فين اهله(علي اساس ان هي ما عندهاش اهل)؟

النهاردة برضه حيعرض السيد فل حلقة بايخة عن واحد امريكي من اصل افريقي بيضرب و يزق واحدة امريكية بيضاء في الشارع.. ده طبعا من غير اي تحيز و مراعاة منه للحرية و المساواة و العدل الاجتماعي و البطاطس المحمرة

نيران said...

انا عتبي مش على دكتور فلة،

دا واحد بيتكلم من وجهة نظرهم هم، مش مشكلة، هو شايف الفلسطينيين ارهابيين وولاد خمسين في ستين، مش مشكلة، دي حرية شخصية،

أمريكا كلها قامت عشان بت هبلة، بردو مش مشكلة، دي حرية جماعية

بس انا عتبي على ابن الناس الكويسين الشاب الفلسطيني حيلة امه و ابوه دا

سايب القضية واللي فيها واللي جابوها واللي ولعوا فيها و الناس اللي بتموت و بتتشرد و بتتنيل على عينها، و رايح يحب واحدة امريكاننية؟

هل الشاب الأهطل دا كان في يوم طفل من أطفال الحجارة،

هل هو فعلاً فلسطيني؟

هل هو عنده دم؟؟

ما اعتقدش,,

بس الفكرة بقى مين يفهم دكتور فلة و اعوانه، ان الواد دا مش تبعنا

دا حتى الواد دا مش ارهابي زينا و بينادي بحقه في وطن محترم، و بينادي بحقه في الحرية؟

الله يخرب بيتك يا مرسي

و لو سمحتوا ماحدش يسألني مرسي مين

Anonymous said...

هههههههههه هو انتي مبتعرفيش تتكلمي جد ابداً ..
والله عالم فاضيه
المشكله ان الشعب الامريكي مصدق حكومته بكل سزاجه وشافنا ارهابيين ..

اسمع كمان انهم بيقولوا ع المسلمين هناك إنهم مبعوثين للتخطيط لعمل ارهابي .. وبقعدوا في الجامع يخططوا له ..

Anonymous said...

ياااااااااه انا من كتر الغيظ من البرنامج طلعت جرى على البلكونه عشان لما انفجر انفجر فى الهواء ..... ايه كميه الحقد اللى جوا الراجل دا وازاى الولد الفلسطينى يعمل كدا وازاى ام بى سى تعرض الحلقه دى وليه احنا اصلاا بقى نتفرج عليه....... بس هو برده لازم نتفرج عشان نعرف هما بيقولوا ايه علينا ...... وعلى فكره بقى دى مشاول مره دككتور فله يعمل كدا..... قال على راى المثل عادته ولا هيشتريها.. والله انا لسه متغاظه ومفروسه بس مش سوسه..هههه .. واكبر دليل على مدى غيظى انا بكتببلك وانا عندى امتحان ومحتاسه ومزنوقه فى المزاكره دا غير طبعا انجذابى لجمال اسلوبك الساخر وبقيت الحاجات التانيه وادعيلى .... روحى ربنا يديدكى على قد نيتك.........

اهو ده عيبه said...

يااااااااه ده اتارى الراجل ده سهونه قوى وانا مش عارفه
وعامل نفسه المصلح الاجتماعى

بس الحق على المغفل اللى حبها ولعبت بيه
لا وكمان بيدفع

ربنا يشفى

funckydoctor said...

ماهو لازم يعمل كده
نقول ايه بس
وانتى غلطانى بتتفرجى عليه ليه :D
لك تحياتى

رئيس جمهوريه نفسى said...

لما قريت البوست بتاعك عرفت انى فى نعمه لما قررت ااطع التلفاز وقنواته المختلفه بصى بقاء يا ستى العمليه مش حب ولا كلام عبيط القصه كلها استغلال من البنت للظروف بمعنى انها عارفه انها حترجع حترجع لامريكا المديا المتطرفه حتلجاء ليها تكتب قصتها وتاخده كام الف دولار وتتعمل فيلم كمان كام الف دولار وتتشوه صورة العرب
المديا المعتدله حتقول حجرو على عقل البت وتهف كام الف دولار كتاب برضه ومقالات واحاديث لما ترجع وفيلم
يعنى كسبانه كسبانه
انما دكتور فله القله المنفله انا اول مره اسمع عنه فى المطلق

Amr Ahmed said...

هي البت قافشة في الواد كده ليه

هي هيجري منها

ماشاء الله
جميع اطراف الموضوع هبل

والله يا سوسة انتي غاوية تتعبينا ايام الامتحانات دي
مااااااشي

المـــفـــــــقــــــــوعـــــة مــرارتـهــا said...

وتلاقي الواد واخد تمن المكالمات ولا تمن تذكرة الطيارة من المعونات اللي دايرين يلموها من شعوب العالم ومنهم احنا اللي مش لاقيين ناكل
رحمتك يارب

رئـــــيسـة حزب الأحلام said...

موضوع جميل
تحياتى لكى

Layla said...

ازدواجية تفقع المرارة...الحمدلله اني مش بشوف البرنامج ده

يعني هما واجعين دماغنا بالحرية و الديموقراطية..واول ما البنت تمارس حريتها وتعمل اللي هي عاوزاه يقولوها لأ!؟

ده برنامج يفقع بجد

كلمه said...

llooooooooooooooooooooll
b2aly kteeeeeeeeeeeeeeeeer 2wy ma2retsh 7aga keda

looool @ دوروا على سوبر مان ..إعتزل ..بات مان ..بيصيف..سبايدر مان ..مراته كانت واقفاله بالشبشب لحد مايخلصلها فمين الغسيل

bgd kont batsha2leb mel de7k
HILARIOUS post :D
nice work

Empress appy said...

تصدقى فرحانه فيكى بقى
عارفه ليه انا شوفت التنويه عن الحلقات دى وفهمت اللعبه هو انا ناقصه يا اوختى هطل على عته كفايه اللى احنا فيه
غير كده كلام نواعم برضه كانوا بينوهوا عن حلقه يوم الاحد اللى فات وحلفت ميت جزرة ما اتفرج عليها اصل اول كلمه فى البرومو قالت له ضربتها ليه
على فكرة اللى سمى البرنامج كلام نواعم ناس كويسه واللى بيقدموه ناس تجيب شلل رعاش ههههههههههههههههه

عروسة ننوسة said...

اسلوبك فى السرد ممتاز....تمنياتى بالتوفيق

amar hedar said...

لاول مره هبل امريكاني فلسطيني

ربنا ما يحرمنا من العبط

Phoenix said...

الله يسمحك ياسوسة

انا شفت حلقه ومن حرق دمى قولت بلاها سوسو وناديه وفله هى مش ناقصه

اجى عندك الاقيك عامله سرد تفصيلى يحرق الدم اكتر

بس الصراحه اسلوبك رائعه

خفف حرق الدم وبالاخص

لما كشفتى حقيقه اختفاء ابطال امريكا

(:

تحياتى ياقمر

rtrcbh said...

السلام عليكم ورحمه الله وبركاته
آختى الكريمة
لما أراك لم تشاركي معنا في حملتك إلى الآن ؟
أختى الكريمة : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أختي الفاضلة أن مشاركتك في هذه الحملة سوف يكون احد أسباب نجاحها ونشر لغتك
ندعوا إلى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

mohamed ibrahim said...

توبيك رائع يا سوسة
و بجد عرض الموضوع حلو
بس برضه انا مش فاهم
هو كل برنامج ليه غرض من عرضه
ايه بقي الغرض من البرنامج ده ؟
نفسي افهم

Mido The Rock said...

اولا بوست لذيذ جدا وبحييكى على اسلوبك...اما ثانيا ف كويس ان انا مبشوفش برنامج الدكطوووووووور فلة ده لأنى بجد مرارتى اتفقعت منه قبل ما اشوفه ....ثالثا الواد الأهبل اللى اعتقد انه مش فلسطينى اصلا وان كان كدة واللى بيبعزق فلوس اهله بتبعزق على مين يا اهبل يا حيلة امك مش هما دول اللى عاوزين يحرقونا ويبيدونا من الارض اصلا ....ولا هو زى ما المثل بيقول (اخيه عليه..نفسى فيه)
بجد بجد عاوز الحرق بجاز ولا بلاش الجاز خسارة فية...اخيرا ربنا يسترها من اللى جااااااااااى

Mafrousa said...

هههههههههههههههههههه
انتي إيه بقى...بتحني علينا ببوست كل شهر يعني ولا إيه
بدل ما تحطي صباعك على الريموت الساعه اربعه تعالى ادخلى و زورينا و انضمي لينا فى فريق الضاحكون.....اللي عاملا فرنسا و الرايق
تعرفيهم طبعا
ولا حتى شاركينا فرستنا
الراجل الفله القله ده انا بطلت الصراحه اتفرج عليه ...من بعد برضه لما جاب كام حلقه..حسيت انه بيستعبط الناس....فقلت يا بت يا مفروسة هوه بيستعبط الامريكان لانهم عبط اساساً انتي يستعبطك ليه...ومن يومها انا مش بتفرج عليه
تبقى تيجي تزورينا ...والله يا سوسة احنا عندنا حاجات حلوه...نعزمك عليها...و لو عامله رجيم ممكن نلاقيلك حاجه تفرسك عادي يعنى كله موجود
وحشتينا

aya said...

تصدقي بئا اني كنت هموت واتفرج علي الحلقات دي بس الامتحانات الله ياخدها لسه مخلصه النهارده
هههههههههههه
لا بجد طريقه عرضك زي ماتكوني مفروسه فعلا لا بجد انا كمان اتفرست انا بردوا حسيت ككده من الاعلان ان الحكايه فيها انه واديني عرفت االانه لا بجد بوست حلو وجديد جدا

Hard Headed GirL said...

اسمحي لي ان اطلق عليك لقب "كبيرة المدونين" :) مقدمة اعتذاري للجزيره ان كان التشابه في الالقاب يزعجها.انا من المتابعين لمدونتك ولو كان هذا هو تعليقي الاول . كما هو الحال دائما اعجبني اسلوبك المتهكم في عرض آخر "جرصه عالميه " للعرب . ليست المسأله خيبة امل او فقدان ثقه "بالاخوه الامريكان " فنحن نعرف من هم ولا نتوقع منهم ايّ خير المسأله هي ان برنامج تافه كهذا وضعنا في الزاويه كطالب شقي يعاقب في الصف، وبعد فركة اذن همس في مسامعنا "اريأيتم يا عرب كبف أنه بأمكان اي امريكي حتى لو كان مراهقة طائشه ان تذمكم وتشوه سمعتكم؟؟
لهذا لا الومك ابدا ان كنت قد "اتفرستي" ..مع تحياتي

Anonymous said...

ربنا يشفي كل مريض و اولهم الولد الفلسطيني
يروح يشوف اهله و بلده واللي بيعملوه فيهم الامريكان
و رايح يحب واحدة بنت....امريكان
والله انا عمري ما شوفت البرنامج دة و مش حفكر اشوفه عشان مراره الواحد مفقوعه خلقه من اللي بيشوفه كل يوم.
اخيرا....اسلوبك رائع في عرض البوست
وهي اول مرة اعمل كومنت عندك بس مش اخر مره ان شاء الله

Mohamed Hesham Safa said...

اهم حاجة الحرية ...

ذو النون المصري said...

جري ايه يا سوسه
انتي فينك من زمان
يعنيكل اللي بيحصل ده مش لاقيه فيه حاجه تستاهل تكتبي عنها
؟؟؟؟؟؟؟؟؟؟؟؟
اكتبي حتي عن الاهلي و الزمالك
ياريت تطلي علينا بسرعه و بلاش الغياب الطويل ده

حكيم النيل said...

بوست جميل فعلا, والمشكلة ان عندنا نماذج كتير من الاخ فلة بيروجوا للحرية الامريكية وكتير منهم فتحوا بوتيكات حقوق انسان علشان يعلمونا الحرية والديمقراطية.
يا ريت تمسحى التعليق التافه بتاع uspace
شكرا

Anonymous said...

عارفة هو ده العبط بعينه
واحد قالى قبل كده ان قمة العبط انك تخبط على باب الثلاجة لكنىة لم ا}يده لان قمة العبط هى الفرجة على اى شىء زى دكتور فلة المأنح بتاعك ده يا قطة دى اتلغت من زمااااااااااااان ابقى قوليوا انها بات يا حتة
ههههههههههههههههه
وعلى فكرة
ده اساسا تشويش على الفلسطنين
وعن الفلوس هى دى عاداتنا كعرب والله حتى المسنكحين منا بيعملوا كده
المهم بقى .... أخبار الجزء الانى ايه من عودة المسنكحة للسنكوح

semsem said...

ههههههههه
ةالله احلى حاجه فى الموضوع ده طريقه سردك ليه اللى تجنن بجد
شدتنى موت
يقطع الولاد على البنات اللى من الشكل ده فى يوم واحد يا ابنتى بلاوجع دماغ
لتفرجى على سبيستون
لو ام بى سى 3
اهو حتى الكرتون لما يهرجو فيه اسمه افلام كارتون

سلام يا قمر

يا مراكبي said...

إيه ده كله؟ أول مرة أسمع عن الموضوع ده .. هو أنا صحيح ما بتفرجش عالتليفزيون لكن لو حصل وإتفرجت يعني فما بأشوفش غير ميلودي أرابيا

هو أنا ناقص .. ده أنا صاحب مرض وعندي عيال عايز أربيهم ومش ناقص ضغط دم

صدى الصمت - عاشقة الورد - said...

الحقيقة أسلوبك لذيذ وظريف وكلنا مفروسين من دوكتور فيل بس انا بأقلب المحطة وأشوف كرتون أرحم بكتير بس انتى بقالك مدة مش بتكتبى جديد لية؟

serendipity said...

والله انتى زى العسل
جامده اوى دكتور فله دى
ضحكتينى من قلبى بجد
و كرهتينى فى الراجل

نور فريد said...

والله المشكله الأكبر في ابننا مش في بنتهم بنتهم امها قالت انها بتحب الشو والظهور وعملت كل ده عشان تلفت النظر ليها لكن المشكله في الفلسطيني الي ساب بنات فلسطين كلها وبنات العرب كلهم وماحليتش من العالم غير دي مليار مسلم مش عبجينو والدكتور فل معروف انو يهودي عيزاه يتعاطف مع المسلم الفلسطيني ايه ده ياسوسه وللعلم في حلقه كان بدافع فيهاعن الشواذ فسيبك من انسان بلا اخلاق وتعالي للمصايبنا
والشباب الي حليان ليه يتجوز اسرائيليات وغيرهم من الي كرهو بنات المسلمين والعرب وبنات بلدهم مايحلاش في عينهم غير اللحم الأوروبي والأمركاني يابنت بلاش كمان تكسري مجاديفهم يخدو وحده من العالم الثالث المتخلف ايه ده دول عيزين يتطورو تخلفيهم يوووووووه عيزين يجبو ولاد بجنسيات حلوه يطلشوهم منهم، يرجعو لبلدو يضرب اخماس في اسداس
مش غلطتهم غلطت شببنا الحلو الي بحب يخدم قضايا وطنه بكل الأشكال الأخلاقيه هو في احلى من الصلح نناسبهم عشان نتقي شرهم باسوسه شببنا عبقري بفكر لبعيد