عزيزتي هايفا

إلى العزيزة هايفا ..

تحية طيبة و بعد ..

تابعت أنا و غيري من أبناء هذا الوطن السعيد أنباء زواجك الميمون و دخولك بيت العدل ..(أو قصر العدل بأه فالمقامات لازم تبأه محفوظة برضه)..و لا تتخيلي يا أختاه كم كانت سعادتنا و نحن نتابع هذا الخبر العظيم ..فعلا كنا سعدا.. دي سنة من أجمل السنين اللي مرت علينا ..مش بس سعادة دي سعادة مختلطة بالفخر لأننا قدرنا نحصل على واحدة من أعضاء مثلث الرعب الشهير (هايفا إليسا نانسي و شركاؤهم) و نضمها لمنتخب جحافل الستات و البنات المصريات خاصة إننا بقالنا سنين بنحاول نوفر بديل محلي ليكي و لأخواتك الفاضلات و مش عارفين ..(روبي كانت عاملة اللي عليها و الله لكن مايقدر على القدرة غير ربنا و يكفيها على الأقل شرف المحاولة).. دا احنا حتى بدأنا نطبق نظرية وحيد حامد في عمارة يعقوبيان "كل واحد حر في هدومه ياختي" فعشان كده بنرحب بيكي و بأذرع مفتوحة و قلوب صافية و بلا أي ضغائن من بتاعة زمان.. لكن دلوقتي و بما إنك بقيتي مننا و علينا و قريب جدا هتيجي تستقري في مصر و ستتكحل بك عين الوطن (حلوة مش كده) فخليني أقولك حاجة بسيطة شايلاها في قلبي أنا و قلة قليلة من المصريين ..إيه موضوع ال 9 مليون دولار ده ؟..أصل أنا عايزة أفهمك حاجة مهمة ..موضوع الملايين ده مش ماشي هنا قوي يعني ده حتى الأستاذ "طارق علام" لما كان بينزل زمان الشارع و يسأل الناس المليون ده فيه كام صفر و حياتك إنتي ما كانوا بيعرفوا ..طب أقولك حاجة تضحك و الله ولا ليكي عليا حلفان من كام سنة بس مصر كلها كانت بتدور على صورة جادون تجت كل غطيان الحاجة الساقعة عشان يكملوا بيها صورة عجلة و يكسبوها .جادون يا هايفا..حلمنا القومي كان جادون ..تقوليلي إنتي 9 مليون ؟..

مش هاقولك يا أختي إن مافيش حد في مصر عنده ملايين ..لأ يا حبيبتي موجودين ..بس السيستم هنا إن الناس اللي عندهم ملايين مابيتكلموش كتير في المواضيع دي قدام الناس التانيين اللي زينا عشان عنينا وحشة و حسادين و عشان بقية أحقاد طبقية قديمة مش عارفين نتخلص منها ..و برضه عشان مايجيش يوم و حد من الناس المغرضين اللي زينا اللي عينيهم تندب فيها رصاصة يلف حوالين نفسه حزام ناسف و يفجر نفسه فيهم والا حاجة.. يعني واحد من ال4 مليون مصري اللي تحت خط الفقر اللي ممكن يعدي عمرهم كله ما يشوفوش فيه حتة لحمة غير في المتحف ( ألا يجييبوا كام كيلو لحمة ال9 مليون دولار دول يا هايفا؟)..أو واحدة من ال9 مليون بنت اللي مش عارفين يتجوزوا عشان مش لاقيين تمن الجهاز ( يجهزوا كام بنت ال9 مليون دولار دول يا حبيبتي؟)..أو دكتور محترم من اللي قضى في التعليم 18 – 20 سنة و اتخرج بتفوق عشان يلاقي نفسه متعين بمرتب 600 جنيه (ألا هم ال9 مليون دولار دول يطلعوا كام 600 جنيه يا روحي ؟) ..أو الملايين اللي قاعدين على القهاوي من غير شغل ..أو الملايين اللي مش عارفين يشربوا كوباية ماية نضيفة ..أو الملايين اللي مابيعرفوش يجيبوا رغيف عيش من أي فرن ..أو الملايين اللي عندهم سرطانات و فيروس سي و بيموتوا عشان مش لاقيين تمن العلاج..و غيرهم و غيرهم..هي دي الملايين اللي احنا نعرفها يا قلبي لكن ال9 مليون دولار دول و حياتك إنتي مانعرفهم..ولا عايزين..

مش هنمنعكم تصرفوا فلوسكم و الله و لا يفرق معانا تصرفوها فين ..إنتوا بس ماتبقوش تقولولنا عشان إحنا أعصابنا خفيفة حبتين.. إحنا هنودي وشنا الناحية التانية و انتي إصرفي اللي تصرفيه..إصرفي 9 مليون ..10 مليون -11 (سوري ماباعرفش أعد أكتر من كده) لكن نصيحة من أختك الصغيرة ..بلاش يعني موضوع الكلام في الملايين في الجرايد و المجلات دي..ماتفسروش في وشنا ...ده الريس نفسه حط إيديه في الشق منكم يا شيخة..كمان هتنرفزولنا الراجل الطيب اللي ما بيتنرفزش و لا حتى للشديد القوي؟
..


.9 مليون دولار في ليلة؟..و 150 طيارة خاصة تنقل المدعوين ..دول كان ممكن يحرروا فلسطين .. هايفا يا روح قلبي ..خصيمك النبي يا نور عيني داري على شمعتك تولع ..بدل مانولع إحنا يا حبيبتي ربنا يخليكي و يهدي سرك ياااا رب ..و السلام ختام ..إمضاء واحدة مش مضايقة ولا واخدة على خاطرها ولا مفروسة خاااالصصصص خالص.