عزيزتي هايفا

إلى العزيزة هايفا ..

تحية طيبة و بعد ..

تابعت أنا و غيري من أبناء هذا الوطن السعيد أنباء زواجك الميمون و دخولك بيت العدل ..(أو قصر العدل بأه فالمقامات لازم تبأه محفوظة برضه)..و لا تتخيلي يا أختاه كم كانت سعادتنا و نحن نتابع هذا الخبر العظيم ..فعلا كنا سعدا.. دي سنة من أجمل السنين اللي مرت علينا ..مش بس سعادة دي سعادة مختلطة بالفخر لأننا قدرنا نحصل على واحدة من أعضاء مثلث الرعب الشهير (هايفا إليسا نانسي و شركاؤهم) و نضمها لمنتخب جحافل الستات و البنات المصريات خاصة إننا بقالنا سنين بنحاول نوفر بديل محلي ليكي و لأخواتك الفاضلات و مش عارفين ..(روبي كانت عاملة اللي عليها و الله لكن مايقدر على القدرة غير ربنا و يكفيها على الأقل شرف المحاولة).. دا احنا حتى بدأنا نطبق نظرية وحيد حامد في عمارة يعقوبيان "كل واحد حر في هدومه ياختي" فعشان كده بنرحب بيكي و بأذرع مفتوحة و قلوب صافية و بلا أي ضغائن من بتاعة زمان.. لكن دلوقتي و بما إنك بقيتي مننا و علينا و قريب جدا هتيجي تستقري في مصر و ستتكحل بك عين الوطن (حلوة مش كده) فخليني أقولك حاجة بسيطة شايلاها في قلبي أنا و قلة قليلة من المصريين ..إيه موضوع ال 9 مليون دولار ده ؟..أصل أنا عايزة أفهمك حاجة مهمة ..موضوع الملايين ده مش ماشي هنا قوي يعني ده حتى الأستاذ "طارق علام" لما كان بينزل زمان الشارع و يسأل الناس المليون ده فيه كام صفر و حياتك إنتي ما كانوا بيعرفوا ..طب أقولك حاجة تضحك و الله ولا ليكي عليا حلفان من كام سنة بس مصر كلها كانت بتدور على صورة جادون تجت كل غطيان الحاجة الساقعة عشان يكملوا بيها صورة عجلة و يكسبوها .جادون يا هايفا..حلمنا القومي كان جادون ..تقوليلي إنتي 9 مليون ؟..

مش هاقولك يا أختي إن مافيش حد في مصر عنده ملايين ..لأ يا حبيبتي موجودين ..بس السيستم هنا إن الناس اللي عندهم ملايين مابيتكلموش كتير في المواضيع دي قدام الناس التانيين اللي زينا عشان عنينا وحشة و حسادين و عشان بقية أحقاد طبقية قديمة مش عارفين نتخلص منها ..و برضه عشان مايجيش يوم و حد من الناس المغرضين اللي زينا اللي عينيهم تندب فيها رصاصة يلف حوالين نفسه حزام ناسف و يفجر نفسه فيهم والا حاجة.. يعني واحد من ال4 مليون مصري اللي تحت خط الفقر اللي ممكن يعدي عمرهم كله ما يشوفوش فيه حتة لحمة غير في المتحف ( ألا يجييبوا كام كيلو لحمة ال9 مليون دولار دول يا هايفا؟)..أو واحدة من ال9 مليون بنت اللي مش عارفين يتجوزوا عشان مش لاقيين تمن الجهاز ( يجهزوا كام بنت ال9 مليون دولار دول يا حبيبتي؟)..أو دكتور محترم من اللي قضى في التعليم 18 – 20 سنة و اتخرج بتفوق عشان يلاقي نفسه متعين بمرتب 600 جنيه (ألا هم ال9 مليون دولار دول يطلعوا كام 600 جنيه يا روحي ؟) ..أو الملايين اللي قاعدين على القهاوي من غير شغل ..أو الملايين اللي مش عارفين يشربوا كوباية ماية نضيفة ..أو الملايين اللي مابيعرفوش يجيبوا رغيف عيش من أي فرن ..أو الملايين اللي عندهم سرطانات و فيروس سي و بيموتوا عشان مش لاقيين تمن العلاج..و غيرهم و غيرهم..هي دي الملايين اللي احنا نعرفها يا قلبي لكن ال9 مليون دولار دول و حياتك إنتي مانعرفهم..ولا عايزين..

مش هنمنعكم تصرفوا فلوسكم و الله و لا يفرق معانا تصرفوها فين ..إنتوا بس ماتبقوش تقولولنا عشان إحنا أعصابنا خفيفة حبتين.. إحنا هنودي وشنا الناحية التانية و انتي إصرفي اللي تصرفيه..إصرفي 9 مليون ..10 مليون -11 (سوري ماباعرفش أعد أكتر من كده) لكن نصيحة من أختك الصغيرة ..بلاش يعني موضوع الكلام في الملايين في الجرايد و المجلات دي..ماتفسروش في وشنا ...ده الريس نفسه حط إيديه في الشق منكم يا شيخة..كمان هتنرفزولنا الراجل الطيب اللي ما بيتنرفزش و لا حتى للشديد القوي؟
..


.9 مليون دولار في ليلة؟..و 150 طيارة خاصة تنقل المدعوين ..دول كان ممكن يحرروا فلسطين .. هايفا يا روح قلبي ..خصيمك النبي يا نور عيني داري على شمعتك تولع ..بدل مانولع إحنا يا حبيبتي ربنا يخليكي و يهدي سرك ياااا رب ..و السلام ختام ..إمضاء واحدة مش مضايقة ولا واخدة على خاطرها ولا مفروسة خاااالصصصص خالص.

مسألة حسابية بسيطة

منتظر الزيدي + جوز جزمة = 3 سنين سجن

ممدوح إسماعيل + 1000 واحد مصري ميت = 7 سنين سجن

إذن

في نظر القانون

ألف واحد مصري ميت = جوزين جزم و فردة واحدة

و عجبي

طب ينفع كده؟

يعني أمك و بحبحت معاك بكلمتين ..تقفلها ع الوحدة؟..تمسك في كلمتين قالتهم بحسن نية و تبروزهم و تحطهملي صفحة أولى؟

http://www.moheet.com/show_news.aspx?nid=227478&pg=1

الست غلطت ..عادي بتحصل ..بقالها مده في شرم الشيخ فمش ملمس معاها قوي يعني إيه إهتمامات سيادتك إنت و هو ..مالها هي و مال العيش ..دخلها إيه في أنابيب البوتجاز..بطالة إيه و زحمة إيه و أزمة سكن إزاي يعني؟..تقرف نفسها هي ليه بالسرطان و همه التقيل ؟ ..تلوث إيه و جهل إيه و مرض إيه ؟..مش معقول يعني هييجي في دماغها إن 60 % منكم لسه لغاية النهاردة مش لاقيين كوباية ماية

تعرف منين هي الكلامة ده يعني ؟..ما انتوا مابتتكلموش ..ماحدش بيقول لها ..لا حد بيبعتلها مسج ولا بيضيفها ع الفيس بوك

الحقيقة الوحيدة اللي شايفاها و متأكده منها هي خطورة قضية الإتجار بالبشر ..فكان لازم "تكسر حاجز الصمت الدولي" و تتكلم ..رصاصتين في الهوا و شوية ألوان من اللي بتبرق في السما دي و برستيج قدام أصحابها الأجانب برضه .

أيوة "إحنا ضد الإتجار بالبشر" ..كلنا حكومة و شعبا ..جمعاااااااااااااااااء

و بكره هيعملوا حملة قومية يقوم على أساسها كل تلميذ في الإبتدائي و الإعدادي و الثانوي و كل طالب في الجامعة و كل موظف قطاع عام و قطاع خاص بالتبرع ب350 جنيه من مصروفه عشان يحرر أي مزة روسي أو سريلانكي أو فلبيني باعوها أو إشتروها في دولة صديكة شكيكة عميكة

من أجل حقوق الإنسان و حقوق الأجانب و حقوق العمالة و حقوق عين شمس

بالمناسبة لو حد خبيث حب يلمح إن إحنا ممكن يتطبق علينا هذا القانون الرحيم و ينوبنا من الحب جانب على أساس إن الشعب كله أساسا ملكية خاصة و بيتورث ..و هيتورث و ماحدش هيقتح بقه ..أحب أقوله إن ده ما إسموش إتجار بالبشر ..لأن الإتجار معناه إن فيه طرف هيبيعنا لطرف تاني و ده الحمدلله مش هيحصل ..مش عشان إحنا سعرنا غالي يعني و لا حاجة ..بس عشان مافيش عروض و ماحدش راضي يهوب ناحيتنا أو يشترينا ..يعني من الآخر إحنا بضاعة راكده و الناس الأصلة دول مستحمليننا بالعافية

فهمتوا بأه؟

من أوباما إلى السائرين نياما

مِن أوباما..

لِجَميعِ الأَعرابِ شُعوباً أو حُكّاما:

قَرْعُ طناجِرِكُمْ في بابي
أرهَقَني وَأَطارَ صَوابي

افعَلْ هذا يا أوباما..
اترُكْ هذا يا أوباما..
أَمطِرْنا بَرْداً وسَلاما

يا أوباما.
وَفِّرْ لِلعُريانِ حِزاما!

يا أوباما.
خَصِّصْ لِلطّاسَةِ حَمّاما!

يا أوباما.
فَصِّلْ لِلنّملَةِ بيجاما

يا أوباما

قَرقَعَةٌ تَعلِكُ أَحلاماً
وَتَقِيءُ صَداها أوهاما.
وَسُعارُ الضَّجّةِ مِن حَوْلي
لا يَخبو حتّى يتنامى.

وَأنا رَجُلٌ عِندي شُغْلٌ
أكثَرُ مِن وَقتِ بَطالَتِكُمْ
أطوَلُ مِن حُكْمِ جَلالَتِكُمْ
فَدَعوني أُنذركُمْ بَدءاً
كَي أَحظى بالعُذْرِ ختاما:

لَستُ بِخادِمِ مَن خَلَّفَكُمْ
لأُساطَ قُعوداً وَقِياما.

لَستُ أخاكُمْ حَتّى أُهْجى
إنْ أَنَا لَمْ أَصِلِ الأَرحاما.

لَستُ أباكُمْ حَتّى أُرجى
لأَِكونَ عَلَيْكُمْ قَوّاما.

وَعُروبَتُكُمْ لَمْ تَختَرْني
وَأنا ما اختَرتُ الإسلاما!

فَدَعوا غَيري يَتَبَنّاكُمْ
أو ظَلُّوا أَبَداً أيتاما!

أنَا أُمثولَةُ (شَعْبٍ) يأبى
أن يَحكُمَهُ أحَدٌ غَصبْا..
و(نِظامٍ) يَحتَرِمُ الشَّعبا.
وَأَنا لَهُما لا غَيرِهِما
سأُقَطِّرُ قَلبي أَنغاما

حَتّى لَو نَزَلَتْ أَنغامي
فَوقَ مَسامِعِكُمْ.. أَلغاما!

فامتَثِلوا.. نُظُماً وَشُعوباً
وَاتَّخِذوا مَثَلي إلهاما.

أَمّا إن شِئتُمْ أن تَبقوا
في هذي الدُّنيا أَنعاما

تَتَسوَّلُ أَمْنَاً وَطَعاما

فَأُصارِحُكُمْ.. أنّي رَجُلٌ
في كُلِّ مَحَطّاتِ حَياتي
لَمْ أُدخِلْ ضِمْنَ حِساباتي

أَن أَرعى، يوماً، أغناما

شعر: أحمد مطر

song for gaza

A blinding flash of white light
Lit up the sky over Gaza tonight
People running for cover
Not knowing whether they're dead or alive

They came with their tanks and their planes
With ravaging fiery flames
And nothing remains
Just a voice rising up in the smoky haze

We will not go down
In the night, without a fight
You can burn up our mosques and our homes and our schools
But our spirit will never die
We will not go down
In Gaza tonight

Women and children alike
Murdered and massacred night after night
While the so-called leaders of countries afar
Debated on who's wrong or right

But their powerless words were in vain
And the bombs fell down like acid rain
But through the tears and the blood and the pain
You can still hear that voice through the smoky haze

We will not go down
In the night, without a fight
You can burn up our mosques and our homes and our schools
But our spirit will never die
We will not go down
In Gaza tonight

We will not go down
In the night, without a fight
You can burn up our mosques and our homes and our schools
But our spirit will never die

We will not go down
In the night, without a fight

We will not go down
In Gaza tonight

عشرة ليهات حول الوضع في غزة

ليه "النظام المصري" كان بالغباء اللي خلاه يستقبل "ليفني" علنيا قبل الضرب بأسبوع؟..ما فيه مليون إجتماع بيحصل في الخفاء إشمعنى يعني ده اللي عملوه في العلن؟ ما كانوش فاهمين إنهم كده هيظهروا في عيون الجميع خونة و عملاء و بصراحة بقى اللي ظن فيهم كده عنده حق

ليه "أبو الغيط" بالغباء اللي دايما بيخليه يظهر و يتكلم بعجرفة إبن الباشا صاحب الوسية و هينزل يلسوع الكل بالكرباج؟..ما استفدش ليه من بساطة عمرو موسى و شعبيته عند الجميع

ليه "حسن نصر الله" بالغباء اللي خلاه يتخيل إنه هيطلع يبعبع بكلمتين فهتقوم ثورة في مصر و الجيش هيسيطر على القصر الجمهوري عشان سواد عينيه؟..ليه ضيع حب الكثيرين ليه و إعتبارهم له آخر أمل للعرب في هذا الأيام السوداء؟

ليه أعضاء "حماس" بالغباء و العند اللي بيخليهم يقسموا بالمقاومة لآخر قطرة دماء و 99% منهم يختبئون تحت الأرض و المواطن العادي هو من يدفع ثمن حماقاتهم و جعجعتهم فوق الأرض من دمائه و دماء أطفاله؟

ليه "قطر" بالغباء اللي مخليها تفتكر إنها لما هتشب هتطول و هتبقى قائدة العرب بالدينارين اللي بترميهم و الكلام الحقير اللي بتقوله على مصر في كل مناسبة تقدر تلوش سمعتها بكلمتين؟

ليه "قناة الجزيرة" بالغباء اللي خلاها تفتكر إنها لما تشيع الفرقة بين العرب من جهة و مصر من جهة هيكون فيه أي مكسب لأي جهة و أولهم قناة الجزيرة و ليه بعد ما الناس إعتبرتها قناة العرب الإخبارية الأولى ..تظل هي تسعى لتكون مجرد تليفزيون حكومي يبث دعاية لصالح "حارة" قطر؟

ليه "المصريين " بالغباء اللي مخليهم مصدقين إن دولتهم دولة كبيرة و ليها أي لازمة؟..دولة مش عارفة تنظم طابور عيش ..هتدخل حرب و كمان عشان خاطر دولة مجاورة؟

ليه "مبارك" بالغباء اللي مخليه نسى أصول اللعبة ..و بطل يشجب و يندد و مارضاش يعملهم مؤتمر عشان يعرضوا "مبادرة سلام تانية" زي اللي قدموها لإسرائيل قبل ما ترميها في صندوق الزبالة؟

ليه " العرب" بالغباء اللي بيخليهم يتشحنوا ضد مصر في ثانية و يقوموا ب 4 مظاهرات ضد سفارات مصرية في يوم واحد و مايهوبوش طول أسبوع بحاله ناحية أي سفارة إسرائيلية أو أمريكية؟

ليه "أنا" بالغباء اللي مخليني دلوقتي قرفانة جدا من حماس و قرفانة من "النظام المصري" لكن برضه مش عارفة ..إفتح المعبر وديلهم مساعدات و هات الجرحي عالجهم .. لكن نفتحه على وسعه و ننقل غزة عندنا و نقلب سينا مخيمات لاجئين؟.. و هل في الحالة دي إسرائيل هتبطل ضرب؟

حقيقة أشعر بالعجز ..تقدم بي السن قليلا لأرى صورة مختلفة عن العام الماضي و الذي يسبقه .." لاتلقوا بأيديكم إلى التهلكة" ..و رحم الله إمرء عرف قدر نفسه...و أدعي على إبني ..و أزعل م اللي يقول آمين

دماؤهم فوق أيدينا أجمعين ..لكن في الحقيقة ..مالهاش حل ..هاقول "حماس" السبب بصواريخ رمضان اللي بتقتل الفلسطينيين قبل الإسرائيليين ..هيقولوا عليا "مثبطة للعزائم و متخاذلة"..هاقول "النظام المصري" ممسوك من إيده اللي بتوجعه و مصر أساسا دولة زبالة ضعيفة مافيش منها رجا و مش فاهمة ليه ماحدش مصدق كده ..هيقولوا متشائمة..هاقول العرب اللي بيتفرقوا بسبب ماتش كورة لا يمكن هيتجمعوا ..إزهقوا بقى ياللي مستنيين تجمعهم و فكروا بشكل واقعي ..هيقولوا عدوة القومية العربية..هاقول يا رب حلها من عندك عشان أنا متأكدة إن إحنا ماعندناش حل ..هيقولوا متواكلة

قولوا اللي انتوا عايزينه ..بس بجد الوضع كله من جميع الأطراف بلا إستثناء ..مقرف و يقرف ..و يغم

و هاقولها تاني...مصر دولة ..زبالة...ضعيفة..مش عارفة تأكل أهلها قمح و بتأكلهم علف حيوانات..ممنوعة حتى من زراعة القمح بأمر أمريكي ..تبقى هتقدر تقمص منها حبيبة أمريكا إسرائيل...فيه زفت معاهدة هباب سلام ..و فيه زفت معونة طين أمركية ..و فيه جيش هناك و جيش جنبنا ..مش هيستنانا نعدي القنال المرة دي ...و إحنا بصريح العبارة أضعف من أضعف صرصار مرشوش فيليتو ماشي يتطوح..ظاهرة صوتية زي الكتاب مابيقول..نتكلم و نصرخ و نقول ريادة و أم الدنيا و الشقيقة الكبرى..لسه مصدقين؟ ...أنا شخصيا زهقت ..إزهقوا بقى

رحم الله الشهداء و شفى الجرحى و أعان الذين يحيون تحت القصف

أخاف أن أضيع دعوة في الهواء إذا دعوت لله أن يوحد العرب

"إن الله لا يغير ما بقوم حتى يغيروا ما بأنفسهم"

--

"و أعدوا لهم ما استطعتم من قوة و من رباط الخيل"

لكننا أصبحنا كمثل الحمار يحمل أسفارا

نختم القرآن في حياتنا مئات المرات دون أن نعمل به و لا أن نفهمه

جوه فصل خمسة أول

و إيه يعني أوباما كسب الإنتخابات المريكية

و إيه يعني هيبقى أول رئيس أسود للبيت الأبيض

مش مهم خالص إنه خرج من أقلية مستبعد إعتلاءها لكرسي الرئاسة

مش محتاجين ننبهر كل الإنبهار ده بيه لأننا عندنا حد نجح في إنه يعمل الل عمله منذ مايقرب من 20 سنة

الزمن كان 1989 المكان هو 5/1 و الشخص هو حضرتي

فشخصي العظيم تم إنتخابه في عام 89 لرئاسة فصل 5/1 رغم إني كنت من أقلية أقلية يعني

واحدة من 6 بنات في فصل فيه 47 ولد

قصة كفاح عظيمة بدأتها من أولى إبتدائي بعد ما كونت تشكيل عصابي من كل بلطجية الفصل كنت أنا زعيمته,,مرورا بأوقات كتير كنت باطنش أكتب أسامي الناس على السبورة عشان ما ياكلولهمش 3-4 خرازانات على لريق

إنتهاءا بالخطة الإنتخابية الجبارة لتوفير سندوتشات اللانشون و الجبنة الرومي لمراكز القوى في الفصل على حساب السيد الوالد

لكن بغض النظر عن كل الخطوات الذكية المغلفة بالذكاء الحزب وطني دي

كان فيه 47 ولد ..إنتخبوا بنت من 6 بنات في الفصل...عشان تبقى رئيستهم

كان فيه مجموعة من المصريين إنتخبوا إنتخاب حر و إختاروا بإرادتهم شخص لمجرد إنهم شايفين إنه الأصلح و مافيش حد حاول يأثر عليهم و لا يمنعهم من ممارسة الحق ده

لما كبروا ال47 ولد دول

مين اللي خلاهم سلبيين و غير مباليين

و مين الي خلاهم يصنفوا المرشحين على حسب دينهم أو جنسهم مش على أساس صلاحيتهم

مين اللي خلاهم يكرهوا يأدوا دورهم و ينسوا يعني إيه بطاقة إنتخابية و لجنة و صوت؟

مين اللي كتم و لسه بيكتم صوتهم

و لمصلحة مين

الإجابة يمكن واضحة ..بس برضه لازم أسأل نفسي السؤال

بابص لبلدنا و أحوالها الإنتخابية

و ديمقراطيتها التي تدعو للرثاء


و أتمنى من جوايا لو كانت بلدنا كلها جوه فصل خمسة أول

( يمكن ساعتها أبقى أنا رئيستها ؟..والا بلاش أنا ليا أهل عايزينني يا خويا)

نهى و فاروق و أشياء أخرى

من أعمال الوزير المثقف الفنان الديمقراطي الليبرالي العالمي فاروق حسني

1-و إذا كانت نهى رشدي صحيح إسرائيلية ..رغم إنها أثبتت إن ده مش صحيح..لكن حتى إذا كانت..هل من حقك تمد إيدك و تتحرش بيها في الشارع؟..دي رخصة مثلا والا حاجة؟

2- روقة الجن رجع تاني و بيصرح بإن الأديان الأرضية لازم تحترم و اللي بينكرها جاهل و متخلف ..حد يفهمني الراجل ده لسه قاعد على كرسي الوزارة ليه لحد دلوقت؟..ما فيش في البلد مثقف غيره والا عشان مصر تثبت إنها متسامحة مع المواطنين السيكو سيكو والا إيه بالظبط؟

3-شرطة المترو قبضوا على شابين كسروا زجاج فرملة الطوارئ و شدوها عشان المترو قفل و فصل أم عن بنتها الطفلة الصغيرة..الإتنين دول إتقبض عليهم بعد الجريمة البشعة اللي عملوها دي في الوقت اللي ماحدش عارف فيه مصير السواق اللي قفل الباب على رجل شابة و إتسبب في إنفصال راسها عن جسمها و مقتلها الأسبوع اللي فات قبل شهر من جوازها ..لكن عموما بنحيي إدارة مترو الأنفاق ..على الأقل فرملة الطوارئ إشتغلت المرة دي

4-مدرس في المحلة نزل ضرب في 15 تلميذ بعصاية المقشة و العيال إتنقلوا للمستشفى ..15 تلميذ ..في سنة ستة ؟...المشكلة مش في إنه ضربهم ..المشكلة إنهم سكتوله ..كانوا إتلموا عليه هم ال15 و ظبطوه ...إيه العيال الخرعة دي؟

save epitaph's blog

We are a group of Egyptian bloggers really bothered by the blockage of the two-year-old blog "Epitaph_87" ( http://www.epitaph-87.blogspot.com/) along her gmail account (epitaph87@gmail.com), since October, 4th , 2008. She has sent you her problem and requests on Google Help Center and Blogger Support, but in vain. We wish that you'd help us retrieve that blog and account and answer the requests of our fellow blogress, sending you from (epitaph_1987@hotmail.com), and hopefully ASAP!
Just for notice, we have published this problem on our blogs!!

Thank you!
soosa el-mafroosa

www.soosamafroosa.blogspot.com


-------------------------------------------------------------


طبعا كلنا عارفين ابيتاف
مدونتها اتعمل عليها هاكينح و شركة جووجل مطلعة عينها مش راضية ترجع المدونة و علشان كدة احنا مجموعة مدونين اتفقنا انه يوم 12 اكتوبر كلنا ح اننشر الصيغة الانجليزية التالية علي مدونتنا..ونبعت لبلوجر عشان تقدر ابيتاف/هاجر انها تراسل جووجل لمرة اخيرة بمجموعة لينكات تدويناتكم ..عشان يردوا علي مطلبها بارجاع المدونة

هي بقت كده؟

مش عارفة الصراحة أقول إيه

لا تعليق

نتكلم بالليل

المشهد الأول

مجند بقوات الإنقاذ يتحدث في محموله مع مسئول كبير

يا فندم ياقندم فيه إشارة بتقول إن فيه عبارة إسمها السلام بتغرق و عليها ألف واحد

المسئول الكبير ينظر في ساعته و يجيب المجند

طب..نتكلم بالليل

و يغلق السكة في وجه المجند الذي ينظر للمحمول في ذهول

المشهد الثاني

موظف صغير يتحدث في محموله مع مسئول آخر كبير أيضا

يا فندم يا فندم المجلس بيولع و كل المستندات بتتحرق

ينظر المسئول الكبير في ساعته

مش وقته مش وقته..نتكلم بالليل

الموظف ينظر للمحمول في عدم فهم ثم يرفع عينيه ليتابع ألسنة اللهب

المشهد الثالث

مواطن مقهور يتحدث في محموله مع مسئول -و الله العظيم تلاتة- كبير

يافندم يافندم الجبل وقع ع الناس ..شوفولنا حد يطلعلنا الجثث

يرفع المسئول الكبير ساعته أمام عينيه

يابببني أصبر شوية..و بعديها نتكلم بالليل

ينهى المسئول المكالمة و ينظرالمواطن بقهرللمحمول ثم يرميه ليتحطم على الأرض

الحمدلله ..عرفنا سر التأخير المستمر لكل جهود الإنقاذ في أي كارثة مصرية أصيلة

فكل المسئولين يملكون خطوط فودافون حيث شعارهم

ما تفوتش لحظة...فوتلك بتاع ست ساعات

و ابقى قابلني...برضه بالليل

طراطيش

أنظروا لهذا الوجه البريء و العيون الطفولية الرقيقة...طب ده حد يزعل منه..يطلع بتصريح زي "تجريم نقل الأعضاء بين المسلمين و الأقباط"..تزعلوا منه ليه؟..انتوا مش عارفين إن ده معاه أكبر شهادة في البلد؟ شهادة يعامل معاملة الأطفال

آه المجلس ولع..آه ماكانش فيه طفايات و لا رشاشات و لا صفارات إنذار ..و آه ..بيخلوكوا تركبوا الحزام و تلبسوا الخوذة و ماتتكلموش في الموبايل و انتوا سايقين ..إجراءات سلامة ..يا شعب ياللي ماتعرفش يعني إيه إجراءات السلامة...يا اللي غرقتوا العبارة و حرقتوا قطر الصعيد و سممتوا أكياس الدم و سرطنتوا المبيدات بغباؤكم المستحكم و قلة إتباعكم لإجراءات السلامة و قلة أدبكم كمان...ليكوا شوق في حاجة ..هه؟

هزيمة و هزيمة و تعادل.....هو الأهلي خلاص؟...خلاص...خلاص كده والا إيه؟

إمتحانات الكادر..نياهاهاهاهاها..و النعمة فرحانة فيهم ..أولا من اللي كانوا بيعملوه فينا زمان ..ثانيا ده حقد من صيدلانية مقهورة مابتاخدش أجازة في الصيف و لا مكافأه إمتحانات..و عملوا كادر للمدرسين و الأطباء و قريبا سواقين الميكروباص و طنشوها

آه الصراحة فرحانة فيهم بقه

فتوى في السعودية لتحريم إرتداء الملابس اللي عليها صورة مهند و تحريم الفرجة على المسلسل من أصله

و قبليها من كام سنة أصدروا فتوى تحريم فرجة العيال السعوديين على البوكيمون و فتوى تحريم الفرجة على ستار أكاديمي

الناس دي فاضية؟

كيف تقتل بطل أوليمبي؟

1-

حط قدامه كل عراقيل الدنيا ولا تطلعه بطوله ولا توفرله إحتكاك

هع هع ..مش بطل ..خليه يشرب

2-

إكسر نفسه و إكسر دماغه و إكسر مناخيره علشان مايجيلوش زكام

هيء هيء مش عامل فيه نجم يبقى يقابلنا بأه

3-

لو حسيت إنه هيبتدي يتغر سيبه برااااااحته لحد ما يبوظ نفسه بنفسه لا تعالجه نفسي و لا تتفاهم معاه و لا تقربله

هههههه والا فاكرينني مستر مياجي و هاطلعلكم فتى الكاراتيه؟

4-

إركنه ع الرف لما يترب..خليه في كوزة لما نعوزه..لسه أرررربع سنين لحد الأوليمبيكيات الجاية ..مش فاضينله دلوقتي خلينا في إبراهيم سعيد

نياههههههههههههههاااااااااااا والا فاكر نفسه اهم من الأهلي و الزمالك و الشرقية للدخان

أقولك

إختصارا لكل الكلام

لو عايز تقتل بطل أوليمبي

ماتتعبش نفسك و تفكر كتير

هاتهولنا على مصر

و إحنا هنقتلهولك بإيدينا و بعدين نمسحها في العلم

و كل تمثيل مشرف و انت طيب يا كابتشن

عندما تفقد القدرة على الإنفراس

سهاني العيد الثاني للمدونة السنة دي و عدى من غير ما آخد بالي



الملاحظة المهمة إن مواضيع السنة التانية أقل بكتير من السنة الأولى

ملاحظة دايما بينبهني ليها الصديق الصدوق "ذو النون المصري"1



يمكن لأني قربت أفقد القدرةعلى الإندهاش



قانون تنظيم البث الفضائي اللي عايزين يحبسونا بيه و يخلونا نقضي أجازاتنا في منتجع طره السياحي



براءة ممدوح إسماعيل على خلفية أغنية يبقى إنت أكيد أكيد في مصر



حوارات (احمد عز) اللي هايدي لكل شاب طن حديد ببلاش من زكاة المال بتاعته ربنا يجعل بيت المحسنين عمار و على رأي المثل " من دقنه و افتل له"

بنزين 80 و العلقة اللي كنت هاكلها أنا و بابايا و أخويا في بنزينة بسببه



أفلام الصيف و خالد يوسف اللي مش هيحرم غير لما ربنا يفتحها في وشه 7 غرز عن قريب قادر يا كريم



أخبار مسلسلات رمضان و تكاليفها و التساؤل عن مغزى المصاريف دي كلها في بلد مش لاقي رغيف عيش مصداقا لقول الشاعر "أقرع و نزهي" و سلملي ع الريادة



حاجات بقيت باستقبلها عاااااااااااااااديييييييييييييييييي



ما اللي يعيش ياما يشوف و اللي يعيش في مصر يتمنى إنه يفقد البصر



حتى متعة الإنسان المصري الأخيرة في القدرة على الإندهش و الشعور بالفرسة قربت تنقرض من عندي



بجد بجد..حاجة تفرس

لكن عموما ..كل سنة و انتوا طيبين

دكتور فلة...نصير الحرية

لراجل اللي إسمه دكتور فله ده فارسني و فاقع مرارتي و بيركبني العصبي كل اما أشوفه ..شيء كده غريب و عجيب و مالوش أي تفسيربشكله بلكنته بجمهوره اللي بيفكرك بجمهور أوبرا كله ستات و بس مش عارفه ليه بمراته اللي مابيروحش في حتة غير و هو ساحبها وراه ..مش عارفة بتديله دعم معنوي و الا خايف لو سابها لوحدها تديله بمبه و تمشي مع حد عنده شعر و الا إيه ؟

أنا أساسا مش عارفة أنا بتفرج عليه ليه طالما فارسني قوي كده..بس للأسف معاد إذاعة الحلقة بتاعته على الإم بي سي 4 مابيبقاش فيه حاجة تانية أعملها فبمد إيدي ع الريموت و أنا عارفه كويس إني هتتفقع مرارتي بس تقول إيه..يظهر دي نظرية جلد الذات اللي ماشيه بيها بدل البطاقة عشان ماعنديش جيب ورا

المهم بأه الراجل العجيب ده دايما بيحاول يرسم لنفسه صورة المحايد المدافع عن الحق و الفضيلة و الأخلاق و العدل و الجمال و كل الحاجات الكميلة اللي عمكم بوش عايز ينزلهلنا على بطايق التموين

على مدى 3 حلقات بأه عرضلنا سي الدكتور قصة حب ..فظيييعة مريييعة شنيييعة بين بت عبيطة كده أمريكانية وواد أهبل فلسطيني إتقابلوا على "ماي سبيس" اللي هو حاجة كده زي الفيس بوك و البت و هي عندها 16 هربت من أهلها و قطعت تذكرة طيران و فلسعت على فلسطين..طبعا معروف رد الفعل..عيلتها صوتت و التليفزيونات الأمريكية صورت و الجرايد كتبت و تصدر الخبر كل وسائل الإعلام الأمريكية و إديها بأه ..دي اتعرضت لغسيل مخ..أصل الوادعايز يتجوزها عشان يدخل أمريكا و أمها تحمر في عينيها و تقولهم طب لو عايز ماجاش هو ليه..ده أكيد إرهابي..لأ لأ ده لازم إرهابي..لأ لأ لأ ده حتما إرهابي

المهم البت إتمسكت في الأردن و رجعت تاني لأهلها ..سنتين و البت لسه بتكلم الواد و الواد بيكلمها كملت 18 سنة من هنا و راحت قاطعة تذكرة الطيران و جري على فلسطين..و عيلتها وصلتها للمطار و بعدين قال إيه حسوا بغلطتهم فقالوا لازم يلجأوا لحد يجيبلهم بنتهم ..دوروا على سوبر مان ..إعتزل ..بات مان ..بيصيف..سبايدر مان ..مراته كانت واقفاله بالشبشب لحد مايخلصلها فمين الغسيل ..و لما مالقوش أي حد من السوبر هيروز بتوع أمريكا قالوا مابدهاش مافيييش غير دكتور فلة ..الفلة المناسبة في المكان المناسب

الراجل و عشان بيدور ع الحق و الخير و السلام و قريب يمكن يترشح لجايزة جورج دبليو سي للتعاون الدولي ..عملهم 3 حلقات ورا بعض.. و يكلم البت في فلسطين هي و الواد قاعدين جنب بعض و ماسكة في إيده زي الكابوريا و يقولها لازم تيجي ماما قلقانة عليكي يا قمر ..ماشي يا قطة ؟ ..طب يابني ماهي أمها دي اللي موصلاها المطار بنفسها إشمعنى يعني عايزاها دلوقت
..والا هيا بروباجندا فاضية و طلقتين في الهوا عشان يفكروا الناس بالفلسطينيين الوحشين اللي بيخطفوا البنات الأمريكان الشقر المسنكحين؟

المحروس و المحروسة

المهم البت يقولولها تعالي ..تقولهم لأ ..يقطعولها تذكرة تروح لحد المطار و ترجع تاني لحبيب القلب و تقولهم أبدا..لا يمكن أسيبه و لو بطلوع الروح..المهم فين و فييين بعد ييجي 3 أسابيع رجعت المحروسة لأهلها..و راحوا جماعه عند دكتور فلة و قالوله خلاص يا أونكل "ايفيري ثينج إز أوكيه" قالهم أببببدا ..أنا قلبي حاسس إنكم بتكذبوا عليا و قلب المؤمن دليله و انتوا عارفين قلب الأم ..البت قعدت تنهنه و تقوله ..ضربني أ أااه ..و شتمني بأمي و أبويا و مش عايزاه مش عايزاه..ماخدوش يا بابا ماخدوش يا بابا..الراجل راح واخد نفس عمييييق و ألقى خطبة عصماء عن المنطقة الخطر و الأصول المشكوك فيها و التصرفات المريبة بتاع الواد " الفلسطيني" ده و عيلته و كل اللي بيتشددوله

و كل دقيقتين يقول للبت أهم حاجة عندي إنك تعودي لأرض الوطن الأمريكي الحر"...أهم حاجة إنك ترجعي لتنعمي "بالحرية" ..لأ و الأنكت إن عيلتها مديالها كلمة سر تقولها لو حبت ترجع في أي وقت عشان يكلموا السفارة

و الواد طول ال3 حلقات يجيبوه و هو بيضحك ضحكة واحد مجنون و يركزوا على عينيه و يختاروله لقطات و هو بيبرق و كل اللي فاضل إنهم يرسمولوا فوق دماغه قرنين و دكتور فله يرفع إزازة بيرة و يحلف " و حياة النعمة دي على عيني والا تغور من وشي الواد ده إرهابي و عايز ياخد البت دي يحشيها متفجرات و يفرقعها في تمثال الحرية..عشان أمريكا تبقى من غير حرية..لكن الحمدلله إحنا قدرنا ننقذ الحرية...الله يخرب بيت دي حرية يا أخي ..عشان بت هابلة زي دي عمالة تلعبكم كلكم على الحبال و أولكم الواد الأهبل ده و بعدين هتعملوهالي قضية أمن قومي ..لأ و لما إتصلوا عن طريق القمر الصناعي بالواد و البت قالتله "إحنا لازم ننفصل" تسمعوا الأرشانات اللي في الصالة بيصقفوا و يصوتوا أكن البت قتلت بن لادن و الا بنت لهم برجين بدل اللي اتفرقعوا دول

و أمها تقوله ..باقولك إيه إوعى تكلم بنتي تاني يا مجرم..الواد يرد يقولها هو انتي يعني ماتتكلميش بأدب غير لما تبقي عايزة فلوس..تقوله فلوس إيه؟..انا ما اخدتش منك غير 500 دولار اللي بنتي كلمتك بيهم تليفونات ..هو انتوا تحبوا يعني و أنا أكع..يا بنت ال...أكن إنت يا أهبل كمان بتدفعلهم فواتيرهم..يا أخي منك لله ..يعني مجرسنا الجرسة دي و كمان بتبقشش عليهم؟ ده غير إن تذكرةالطيارة الأولانية اللي البت كانت رايحة بيها فلسطين كمان كانت على حسابه

البت يا خويا لعبت الناس كلها ع الشناكل في عبر المحيطات و القارات ..و في الآخر طلعت المشكلة إنها "قالت" إنها بتحب واحد من "فلسطين" يعني لو كان ده من كندا والا استراليا كانوا نصبوا النصبة دي و الا فرشوا المولد ده

النصيحة بأة بتاعت الدكتور فلة في آخر الحلقة للبت السهنة السهتانة دي ..إنتي بأة يا سكر إيه ..تغيري كل تليفوناتك و الصفحة على ماي سبيس دي تقفليها خالص مش عايزين إتصالاات بناس من دول غريبة و نواياها سيئة ..خليكي بس مع الأمريكان سيبك م العالم "الرابيش" التانيين دول ..أصلهم لا يعرفوا و لا يفهموا معنى كلمة حرية....أهممممم حاااااجة الحرية

حرمت يا ريس

مش عارفة ليه بيتهيألنا ساعات بأمخاخنا الضلمة دي ..إننا عارفين مصلحتنا

الشيطان بيوسوسلنا و بيوزنا نطالب بحاجات مش فاهمين عواقبها إيه

يعني إيه الأجور تزيد..هما يعني هيجيبولنا منين؟..من جيوبهم..ماحنا عارفين لا عندنا موارد و لا عندنا ثروة سمكية و لا بترول تحت ألغام العلمين ممنوع نستخرجه ولا قمح ممنوع نزرعه ولا آثار و لا صناعة و لا تجارة و لا قناة سويس و لا فلوس ضرايب ولا تحويلات الشقيانين في الخارج ولااااا أي حاجة

و بعدين نتقمص قوي لما يزودولنا البنزين و الأسعار عشان يوفرولنا العلاوة اللي هتخلينا نواجه الزيادة في البنزين و الأسعار

!!!!!!!!!!!!!!!!!!!!!!!!!

طب و نزعل لييييه؟..ماحنا اللي اتسحبنا من لساننا

إمتى هنفهم إن الريس و الوزارة عارفين مصلحتنا أكتر منا؟

يعني زيادة و زودوكم..دلع و دلعوكم...لعبوكم كل الألعاب

يبقى بتشتكوا ليه بأه؟؟

أنا شخصيا حرمت

و باقولهالك يا ريس بالفم المليان

حرمت أقول عايزة زيادة في المرتب..لأنكم أكيد ساعتها هتزودوا البنزين و الأسعار

حرمت أقول عايزة رعاية صحية على مستوى..طالما مش هاقدر على أسعار المستشفيات لما هتقلبوها كلها خاصة

حرمت أقول عايزة تعليم نضيف..طالما مرتبي و مرتب أهلي كلهم مش هيقضوا مصاريف سنة بعد ماتلغوا التعليم الحكومي و اللي نفسه يتعلم يبقى يتعلم في جامعة من جامعات ولاد الناس الكويسين

حرمت أطالب بالديمقراطية..طالما هي من وجهة نظركم إننا نتكلم زي ماحنا عايزين و بعدين انتوا تحبسونا زي مانتوا عايزين

حرمت يا ريس

و مش هافتح بقي و أطالب بأي حاجة تاني

حرمت يا ريس

و الله حرمت

نظرة محلاوية..مرعوبة

آه كان فيه بلطجية ..مأجورين

آه كان فيه حركات غريبة من الأمن و فيه ناس قالت إنهم شافوا بلطجية نازين بالشوم من جوه عربيات الأمن المركزي

يمكن كانت حركة عشان يشيلوا المحافظ ..عشان يغيروا مدير الأمن..عشان يبقى فيه 50 ألف عسكري أمن مركزي موجود في المحلة (اللي هيا عاملة للكل كالو في دماغهم)بشكل يومي

يمكن بدأت كده

لكن

الناس العادية و بالذات الشباب

التكسير العشوائي و نظرية " أنا هانتقم من المجتمع بالطوبة دي اللي هاضربها في المحل ده أو هولع في القطر انشالله يولع باللي فيه

دي ناس طهقاااااااااااااااااااااااااااااااااااااااااانة

شفت بعيني ستات كانوا بيشجعوا ولادهم

روح يا وله ولعلهم في البلد يمكن يحسوا باللي جوانا

إجري يا وله كسر مع زمايلك

واحدة فيهم كانت واقفة على شريط القطر ..قلتلها يا ستي حاسبي القطر جاي تتعوري..قالتلي إلهي يدهسني و أرتاح من اللي أنا فيه

حد واخد باله من الناس دي؟

حد فكر لو ماكانش فيه أمن ساعتها الموضوع كان هيوصل لإيه؟

مش باشكر الأمن على وجوده -طبعا- لكن بصراحة.......خايفة

حاسة إن اللي خرجوا يوميها قريب قوي هيخرجوا تاني و يبقوا عاملين زي الفلسطيني اللي بيفجر نفسه في سوق أو في أتوبيس

بس الفرق ان ساعتها المصري مش هيكون عنده قضية غير انه يخلص من الذل اللي هو فيه و ينتقم من البلد ككل

و الفرق التاني ان اللي هيموتوا و هيتصابوا مش هيكونوا أعداء ..دول هيكونوا إحنا

اللي انا شفته يوم 6 إبريل يخليني أخاف...مش من 4 مايو..لأ..من يوم تاني هيكون التكسير و الخطف و يمكن الإغتصاب و القتل هو سماته المميزة

حسيت في عيون الناس دي انهم مستبيعين و فاضلهم خطوة واحدة و ينفجروا اليأس اللي جوا اعيون ده شيء مرعب بجد..طول عمرنا يأسين ..لكن يأسنا جوانا بنخبيه بضحكة.بنكتة.أو حتى بخناقة..لكن اليأس الصافي ده...ما فيش حاضر و مافيش أمل في مستقبل

البلد دي ممكن بكل سهولة تتحول لعراق تانية أو لبنان تانية...مش محتاجين أمريكا تيجي تحتلنا عشان نعمل كده..الضغط لوحده هيعمل كده

حد خايف زيي كده؟..والا أنا عندي بارانويا؟

طب حد حاسس من اللي فوق؟..حد شايف حالة البلد و هي نازلة من فوق الجبل زي كرة التلج و الكرة بتكبر شوية بعد شوية لحد ما هتدمر كل حاجة

حد خايف؟

إنتوا فهمكوا بطيء قوي

مانشيت الأهرام في الطبعة الأولى النهاردة بيقول

مبارك يؤكد على ضرورة التوسع في غزو الصحراء و إنتاج الحبوب

إزاي إحنا قبل كده مافكرناش في ضرورة التوسع في غزو الصحراء و إنتاج الحبوب

طب و ليه الريس قعد 27 سنة على ماقرر يأكدلنا على ضرورة التوسع في غزو الصحراء و إنتاج الحبوب

لأ لأ لأ ..هو أكيد قبل كده فهمنا ضرورة التوسع في غزو الصحراء و إنتاج الحبوب

بس إحنا أكيد اللي مافهمناش ضرورة التوسع في غزو الصحراء و إنتاج الحبوب

أو يمكن الموضوع كان محتاج 27 سنة على مانفهم ضرورة التوسع في غزو الصحراء و إنتاج الحبوب

.

أصل إحنا فهمنا بطيء قوي

سمعوهم

!!!!جعانيييييييييييييييييين

لغوش..يا حضري

و ليه نتكلم عن الحكومة ؟...و ليه نجيب سيرة الأسعار؟..وليه نطالب برفع المرتبات؟

..

لأ لأ لأ ..نتكلم عن الحضري أحسن

...الأهم ..فالمهم

.

.

آه يا شعب مخبوط على راسه