في منطقتنا العربية باختصار ...البنت خيبة..من أول لحظه تصل فيها البنت الى الحياة ..أبوها اللي بيبقى واقف خارج أوضة الولاده ..أو حجرة العمليات ..يفرك يديه في حماسه و يجوب المكان ..رايح جاي ..مستني الممرضه ..أو الداية حسب حالته الإقتصادية..حتى تخرج و تبشره ..ألف مبروك ..فتنفرج شفتيه عن ابتسامة سعاده ..ما تلبث أن تختفي بمجرد ان يعرف نوع المولود ..بنت؟ ..ينطقها بخيبة أمل و يكاد يطلب من الممرضة الذهاب و التأكد مرة أخرى ..يمكن غلطت و الا نظرها ضعيف..و تنطلق أمه لتواسيه بالحنية المعروفه للحموات ..معلش يا بني اللي تجيب البنت بكرة انشاء الله تجيب الولد ..يعني بالبلدي ..هارد لك يا كابتشن ..خيرها في غيرها انشاء الله
و يدخل يهني البنية الوالده ..بابتسامه مش هاين عليها تطلع على خلقته ..و البنية مابتبقاش ناقصة ساعات تعمل نفسها لسه مدروخه م البنج حتى لو مش واخده بنج ..و أمها بتبقى مش عارفه تودي وشها فين ....و تقعد تمدح في البنت عشان تداري على خيبة بنتها - من وجهة نظر حماتها الأرشانه
هتقولولي الحاجات دي قديمه و ماعادتش بتحصل ..أقولكم والنعمه بتحصل ..و انا حاضرة أكتر من 3 مواقف من دي على مدى السنتين اللي فاتوا و الزوج بيبقى دكتور أو صيدلي ..و مرة واحد فيهم قعد يقول يا جماعه كل اللي يجيبه ربنا كويس ..الحمد لله ..و شوفته واقف على جنب و عينيه مرغرغه بالدموع ..رغم انه كان عارف من السونار انها بنت ..الا انه و لآخر لحظه بيمني نفسه ان السونار يطلع غلط و يجيله الولد اللي هيبقى يورث الأبعدية انشاء الله
و تعيش البنت و تترعرع داخل مجتمع بتسمع فيه سعاد حسني بتقولها البنت زي الولد ما هيش كمالة عدد ....لكن كل اللي بتقابله في حياتها يخليها تتأكد ان سعاد حسني دي اكيد كانت عايشه في السويد أو جاية من كوكب تاني
طب اسأل أي أب أو أم عن بنتهم ..يقولولك عسل و سكر ..احنا مابنفرقش بينها و بين أخوها أبدا ..لكن جواهم تعريف البنت ايه؟؟
طب بلاش تسألهم ..إسأل أي بنت ...بلاش أي بنت ..إسألني أنا...صحيح عمر ما حد منعني من حاجه ..لكن ده لأني من صغري ..عارفه حدودي .....و حدودي دي بتضيق يوم بعد يوم و سنة بعد سنه
وانا في إعدادي ..جت مدرسة العربي تحاول تعمل فريق تمثيل و عرضت عليا ..بصتلها كأنها مجنونة ..تمثيل ؟..تمثيل ايه ..البنات المحترمين ما يمثلوش ..عيب
وانا في ثانوية عامه..كل اللي حواليا قالولي ادخلي طب ..قلتلهم باقتناع ساعتها ..الطب مش مناسب للبنات ..أنا هادخل صيدله ..عايزينني أدخل طب و ابات بره البيت في نباتشيات ..عيب
دانا حتى ماحاولتش أفكر أدخل إعلام أو سياسة و اقتصاد ..ببساطه لأنها خارج محافظتي ..و بنت تخرج من محافظتها و تروح القاهرة و تقعد في بلد من غير أهلها....عيب
بعد ما اتخرجت ..جالي عرض أشتغل في شركة أدوية ...بس ازاي يعني ..بنت تقعد طول النهار في الشارع و تخش عيادات و تقعد مع رجاله في مكاتبهم لوحدها ...عيييييييب
وفي يوم حد جابلي عقد و سفر بره..كنت هطرده من قدامي ..بنت تسافر بره لوحدها ..اتجنيت..عيييييييييييييب
و كل ده من غير ماسأل حد و لا حد يجبرني على حاجه ..و ده مش دليل على اني مقتنعه بالأفكار دي ..أياميها كان في صراع جوايا ..بين رغبتي في عمل الحاجات دي كلها و بين غسيل المخ اللي اتعرضتله طول حياتي اللي بيخللي جرس انذار يدق في دماغي كل اما أحاول أعمل حاجه نفسي فيها...اشارة حمرا باحطها بنفسي قدام أي فكرة تهف على دماغي و مش متناسبة مع اللي اتربيت عليه طول حياتي
وايه اللي اتربيت عليه انا و بنات كتير جدا..الدونية ..و الخجل من كوني بنت ....حاسة دايما ان الخطر على بعد خطوة و المشاكل بتطل من كل باب...حاسة ان مش من حقي أعمل حاجات كتير ..و لا حتى من حقي اعترض على كده
طب انا مرة كنت عايزة أرشح نفسي في انتخابات اتحاد الطلبة ..بس خفت ..قلت اما أجس النبض و أحاول أعرف آراء اللي حواليا و ليا أمل والا لأ ..طبعا استبعدت الولاد ..قلت لو هانجح يبقى بالبنات ..رحت أتكلم مع زمايلي و كانت التعليقات..شوفي يا حبيبتي ..أنا باحبك آه بس انا ما أقدرش أدي صوتي لبنت ..طب ليه؟...البنات بصراحه ماينفعوش في الحاجات دي ..الولاد و بس ..طب انتي شفتي نموذج فاشل لبنت دخلت الإتحاد و ماعملتش حاجه ..أمممم لأ ...طب مين من الولاد يعني عمل حاجه مهمة تخليكي تصوتيله ...ولا حاجه هو حد بيعمل حاجه أصلا ...طيب مادام ماحدش كده كده هايعمل حاجه يبقى ليه ماتصوتليش ...اصوت لبنت ؟لايمكن الولاد بس اللي أصوتلهم
يعني حتى مش مقتنعين بنفسنا ..شايفين اننا مواطنين من الدرجه التانية ..مش الرجاله بس اللي بيعملوا كده ..لأ احنا كمان
وايه اللي اتربيت عليه انا و بنات كتير جدا..الدونية ..و الخجل من كوني بنت ....حاسة دايما ان الخطر على بعد خطوة و المشاكل بتطل من كل باب...حاسة ان مش من حقي أعمل حاجات كتير ..و لا حتى من حقي اعترض على كده
طب انا مرة كنت عايزة أرشح نفسي في انتخابات اتحاد الطلبة ..بس خفت ..قلت اما أجس النبض و أحاول أعرف آراء اللي حواليا و ليا أمل والا لأ ..طبعا استبعدت الولاد ..قلت لو هانجح يبقى بالبنات ..رحت أتكلم مع زمايلي و كانت التعليقات..شوفي يا حبيبتي ..أنا باحبك آه بس انا ما أقدرش أدي صوتي لبنت ..طب ليه؟...البنات بصراحه ماينفعوش في الحاجات دي ..الولاد و بس ..طب انتي شفتي نموذج فاشل لبنت دخلت الإتحاد و ماعملتش حاجه ..أمممم لأ ...طب مين من الولاد يعني عمل حاجه مهمة تخليكي تصوتيله ...ولا حاجه هو حد بيعمل حاجه أصلا ...طيب مادام ماحدش كده كده هايعمل حاجه يبقى ليه ماتصوتليش ...اصوت لبنت ؟لايمكن الولاد بس اللي أصوتلهم
يعني حتى مش مقتنعين بنفسنا ..شايفين اننا مواطنين من الدرجه التانية ..مش الرجاله بس اللي بيعملوا كده ..لأ احنا كمان
..
قريب باه بدأت أفوق م الكلام ده ..لكن لسه كتير عايشين في نفس الواقع و لسه كتير هييجوا و هايعيشوه ..و الضغط ده و الأفكار دي بتسيب في نفوسنا آثار كبيرة.. ..الظروف بتقولك اخرجي و اتعلمي واشتغلي ..و جواكي الإشارة الحمرا اللي بتخوفك من كل شئ و بتتهمك بالعيب لو حاولتي تخرجي لحظة من القطيع اللي انتي ماشية وراه ..طب لما أحس اني ماليش لازمة واني مواطنة من الدرجه التانية وبإني مشكله اهلي عايزين يخلصوا منها مع اول عريس و ان
قريب باه بدأت أفوق م الكلام ده ..لكن لسه كتير عايشين في نفس الواقع و لسه كتير هييجوا و هايعيشوه ..و الضغط ده و الأفكار دي بتسيب في نفوسنا آثار كبيرة.. ..الظروف بتقولك اخرجي و اتعلمي واشتغلي ..و جواكي الإشارة الحمرا اللي بتخوفك من كل شئ و بتتهمك بالعيب لو حاولتي تخرجي لحظة من القطيع اللي انتي ماشية وراه ..طب لما أحس اني ماليش لازمة واني مواطنة من الدرجه التانية وبإني مشكله اهلي عايزين يخلصوا منها مع اول عريس و ان
أي حاجه عايزة أعملها فيها شبهة ابداع او تفرد أواختلاف تبقى عيب و ما يصحش و مش من حقي ..طب مانا لازم تبقى ثقتي في نفسي صفر ع الشمال
مش بس الرجاله في مجتمعنا بيبصوا للستات عموما على انهم أقل منهم..لأ ده الستات كمان بأه عندهم اقتناع كامل انهم فئة من الدرجه النانية..قول لأي واحده على دكتورة كويسة ..تقوللك و هي الدكاترة الستات دول بيفهموا ..طب مدرسة خصوصية لأبنك ...لاااا يا راجل يا بلاش...بنات كتير لو قلتلهم حضروا ماجستير و الا دكتوراة ..ترد فورا ..ليه هو انا راجل؟...فقدنا الثقة في نفسنا و في كل جنسنا من كتر الزن على وداننا اننا ماننفعش في حاجه غير اننا نتجوز و نربي عيال فقط لا غير
و بصراحه مانقدرش نطلب من حد يثق فينا و يدينا حقنا ..الا لما نغير أفكارنا عن نفسنا الأول ..و سا عتها المجتمع كله كمان هيثق فينا و يفتحلنا كل الطرق ..من غير أي إشارات حمرا
...
72 comments:
الي الامام يا ليلي
سعيدة بانطلاقتك من عهود الصمت لتعبري عن كل ليلي
و كلنا ليلي
الي الامام لا تتوقفي
للاسف فضلنا سنوات طويله مقتنعين قهرا او سهوا باننا كمالة عدد...
ولكن ان لنا الان ان ننطلق ونتحرر
تحياتى وربنا يفك فرستنا جميعا
انا مش فاهم حاجة من الكلام دا
فعلً فيه بنات كتير نظرتهم كده للبنت إنها ماتنفعش فى الحاجات دى
بجد كلامك فى الجون .. وربنا يهدينا جميعاً
انا خلاص مش هاقول موضوع رائع واسلوب اروع لان دة بقى ثابت فى كتاباتك ياسوسة بس انا اعتقد ان الكلام دة اخر دفعة بنات عاصرتة هى دفعة جدتى الله يرحمها وبعدين جت محررة المرأة ماما سوزان الى اكبر من جدتى وحررة المرأة من اية؟ مش عارف ! بس المهم اتحررت من كل ما يتعلق بعاداتنا وتقاليدنا ودة الى عايزاة ماما سوزان وانا هنا باتكلم على البنات الى من عينة البنات الى بيطلعو مع الدكتورة الفاضلة هالة سرحان عينة الاخت هند الحناوى وعينة فتيات مسابقة ملكة جمال مصر وغيرها وحتى بعض الفتيات من جامعاتنا الغراء ونجح مخطط ماما سوزان واصبحنا لدينا رووبى جديدة كل يوم .
اما بخصوص ليلى فأعتقد انها كانت مبالغة شوية انا مثلا اختى درست مع اولاد وكانت بتروح دروس معاهم وكانت رئيسة اتحاد طلبة لمدة عامين (بس دة فى كلية بنات بس) بس كانت فى المدينة الجامعية فى محافظة تانية ودلوقتى بتشتغل مدرسة ومافيش اى مشكله لان احنا ربينها على الثقة وبعدين انا كنت بعامل البنات زميلات الدراسة والعمل بالاسلوب الذى احب ان تعامل بة اختى من منطلق نقة بنقة ولو زدت لزاد السقا
والخلاصة ياست سوسة الموضوع متعلق بالتربية فلا القسوة والرقابة الصارمة تنفع ولا الحرية الكاملة تنفع ولكن التربية السليمة على قيم مجتمعنا واخلاقياتة هى الحل الاساسى
التعليق الى فات دة بتاعى بس حبيت اعرفك
انتو متفقين ولا ايه
انتي و كلبوزه و عايزة اتجوز
شكلكو كده هتعملو انقلاب و لا هو مجرد توارد خواطر؟
خلاص فهمت الموضوع
انتو اتفقتو
ربنا يستر
البلجريات اتحدو يا رجاله
begad 3andek 7a2 fe elmawdo3 da.as girls in our society are either mo2adabeen we besma3o elkalam we yemsho ma3 elkatee3 or they r completely example of Rouby.lelasaf mafeesh 7oreya ella eza kant accompained with en7elal.fe3lan kollona Laila.nice post
طيب نبتدي الكلام بالصلاة على خير الخلق عشان الشيطان ميدخلش بينا
صلى الله عليك يا حبيبي يا رسول الله
هتكلم بالمصري مش بالفصحى عشان محدش يخاف
بداية انا شامم ريحة مش كويسه مش هقول ريحة ايه عشان المتصيدين ميمسكوش فيها
مبدئيا قريت معظم الكلام والمقالات اللي كتيت في موضوع انا ليلى
كلها مستخدمة الفاظ وتعابير مش موجوده في ثقافتنا العربية اولها الكلمه البغيضه اللي ادخلها جورج بوبر وامثاله وهي كلمه ذكوري
بالاضافه لجمل مقيته جدا كلها ترمي لنفس الهدف اللي هو البنت مظلومة ومقهورة
مفكرتوش في الراجل اللي يبقول لمراته متشتغلش بيكون قايلها كده عشان ميجبلهاش البهدلة
راجل بيرضى لنفسه البهدلة ولاة ان راجل (مدير او ما شايه يدايقها بكلمه
الراجل ده بيبص لمراته فعلا على انها ملكه متوجة على عرش النساء وبيكون حاسس ان الشغل ده مش ليها
هو بس اللي يتبهدل لكن هي لا
اشتغلت فترة في شركة كان الراجل بيبقل الذل والله وكان بيشتغل 5 ساعات بالليل مقابل 200 جنيه وكان بيرفض دايما ان مراته تشتغل
لكن طبعا المقالات اللي تناولت الموضوع ده تناولت نموذج الرجل السيء حاد الطباع كعادة كل المقالات اللي بتتناول الموضوع ده
عن نفسي بشكل شخصي انا لو طلبت من من مراتي متشتغلش مش لاني بقلل منها اطلاقا انا عندي استعداد اشتغل اليوم كله ولا اني اشوف مراتي مدايقه
انا وامثالي ذلك الرجل الذي تتحدثون عنه
لكن انا بقدر المراه جدا والموضوع مش تشتغل او متشتغلش الموضوع ان مهمة المراه الاولى في الحياة بيتها ده موضوع مفروغ منه طبعا هتقولولي ده بعد ما تتجوز طيب قبل الجواز؟
قبل الجواز بتكون بتشتغل
ما عيلنا طبعا الكلام ده هيقابله سيل من الاتهامات
لكن والله لو حد قرا القران هو موضح جدا راي الدين في عمل المراة اللي انا مش ضده مبدئيا
قصة سيدنا موسى
ما خطبكما ؟
البنتين مكانوش واقفين بيزاجموا الرجاله
كانوا واخدين جنب\
ولما سالهم ما خطبكما
قالو لا نسقى حتى يصدر الرعاء .... يعني مش بنزاحم الرجاله
والسبب؟ ابونا شيخ كبير
يعني لولا ان ابوهم شيخ كبير مكنوش هما طلعوا واشتغلوا لان الشغل مهمة الرجاله
يبقى عمل المراة مش حرام لما يكون في داعي ايا بقا كان الداعي
بس مفيش واحده تقول الداعي هو تحقيق ذاتي وتعمل بيتها
ده بخصوص العمل اللي انتي اتكلمتي عليه يا سوسة
الفكر اللي انتوا بتقولوه ده يا جماعه بيبتدي بكده وبينتهي بنوال سعداوي واقبال بركة
على فكرة انا تقريبا قريت اغلب كتب نوال سعداوي
والله معظم الكلام اللي اتقال مكتوب بنفس طريقة نوال سعداوي
نفس طريقة التفكير بتبدي كده وفي النص بنتحايل على الدين وفي الاخر نتطاول على الدين
مش بقلكم انا شامم ريحة وحشه
وبما انكم كلكم زي اخواتي فانا بنصحكم بلاش تمشوا على خطى هدى شعراوي ونبويه موسى
مش ملاحظين ان جوازات زمان كانت سعيده ودلوقتي معدلات الطلاق زادت جدا
احد اهم الاسباب ان البنت عايزة تاخد اكتر من حقوقها ومش عايزة تادي واجباتها
بجد والله انا خايف عليكم
بس الطريقة اللي بتفكروا بيها غلط
ولو مليتوا بيها نفوسكم هتخسروا كتير اوي
ذكوري؟ يا خبر
يلا كله على الله
يا سوسة يا جميلة
أريد فقط أن أوضح لكي شيئا صغيرا
السؤال الأزلي هنا هو:
هل النساء في بلدي مضطهدات؟
وطبعا الإجابة هتكون آلاف المقالات والكتب من نوعية كلنا ليلى
(ودا مفيهوش كلام إنه مظبوط)
بس أنا عايز كعادتي أعرض القضية عرضا مختلفا
القضية هي شبيهة جدا بالبيضة والفرخة
أيهما أولا؟
الأزمة يا عزيزتي الغالية هي أزمة اضطهاد "الإنسان" في مصر
كما قالت السيدة الفاضلة أروى الطويل
بلدنا دي - وبلادنا دي - ما هي إلا
كووم زبالة كبير
كل كيس زبالة بيدوس على اللي تحته
وكل ما يكون موقعك
لأي اعتبارات
في أسفل هرم الزبالة المجتمعي المقلوب
كل ما كان الضغط الزبالي أكبر
لذلك دعيني أعلنها من منبركي هذا
إنني ضد
كل الحركات النسوية في هذا البلد
ممن يطالبون بحقوق المرأة
ومساواتها بالرجل
أنا ضد كل الحركات المناصرة لحقوق الأقباط والمطالبة بمساواتهم بالمسلمين
أنا ضد أي مطالب تحررية فئوية لأي فئة في هذا البلد
لن تتحرر المرأة في هذا الوطن إلا إذا تحرر معها الرجل
ولن يتحرر القبطي في هذا الوطن
إلا إذا تحرر المسلم معه
دعينا إذن ننادي بتحرير الإنسان
فكرا وروحا وقلبا
يا عزيزتي كلنا ليلى
هذه البلد خصت رجالها بأصبح كلا منهم ليلى
وبيعمل دكر بس على ليلى اللي عنده في البيت
أختا كانت أو بنتا أو زوجة
كان نفسي آخد حريتي في الكلام
خصوصا أنني كطبيب نسا
عملت لسنوات في مجال الصحة الإنجابية
واشتغلنا أد كدة في موضوعات صحة المرأة وحقوقها
ومحاربة ختان الإناث
بس مش هينفع أتكلم
عشان فيه بنات بتتكسف
ومش عايزين يتساووا بالرجالة في عدم الكسوف
المشكلة إنه رجالتنا هم اللي بقوا ليلى همة كمان واتعلموا يتكسفوا
سلام يا أوختشي
أروح أعمل باديكير
عزيزتي سوووسة
رأيت بعد ما نزلت تعليقي تعليق المجاهد الوهابي عبدالله مفتاح
وبما أنني قد أعلنت من منبركي هذا
رفضي للفكر النسوي
والمطالبة بحقوق المرأة
ولكني رأيت رأي الأخ مفتاح
فدعيني أؤكد من جديد
أن هذا هو تحديدا النموذج المتجسد لكل قيم رديئة بني عليها عقل هذا المجتمع الذي يدعي أنه ذكوري إخفاءا لواقع أنه ليلى!!!
فيه بلد في الدنيا عايز يبقى محترم تبقى الشتيمة فيه والإهانة
أن تقول لرجل
إنت مراه؟
للأسف يا عزيزتي التحرير الحقيقي هو تحرير أمة
من غياهب الجهل والظلامية
ودعاة التخلف والرجعية
تحرير الإنسان لكي يصير من جديد
إنسانا
كلام الأخ مفتاح مثير للغثيان
ثواني اروح أتقيأ وأجيلك
القضية يا حاول تفتكرني
ليست في إن نوال كويسة ولا وحشة
القضية هي منهجية فكرية تسيطر على بني شعبي لا يرون فيها أي شيء سوى من منظور دا مع الدين أو ضد الدين
دا كافر ولا مش كافر
الأصل في الحياة هو التحليل وليس التحريم
أما الناس في بلادنا بتفكر بس من عقلية التحرم والتكفير
وهذه هي الأزمة
فلو معجبكيش نوال السعداوي تبقى كافرة
وهكذا هالة سرحان
(على الرغم من تفاهة ما تقدمه)
لا ننقدها من واقع ما تقدمه جيد أم غير جيد
له قيمة أم لا
بل من مهج الإيمان والكفر
(هالة سرحان مجرد مثال)
هذا المجتمع صار عنده هسس ديني مرضي
يحتاج إلى علاج ما إذا كنا نرغب في تغيير وتحرير الإنسان
مش بس تحرير المرأة في هذا الوطن
enty nasya kaman wa2d el banat zaman. alah a3lam lesa bye3melo keda wala la2!!
la2 b2a..el banat el mo7tarama 7atmasel w te3'any w te3ml eli heya 3aizah mn 3'er ma 7ad yeboselha basa we7sha ! ana nefsy ab2a 7orra b2a
nice nice nice post !
ana b2a 7a2olek 3la 7aga 7at7'aliki mafroosa aktar zaii
batkalem m3 arebty eli 3andaha 17 sana 3al gawaz w keda..bet2olee ya rab magebsh banat !!!
mogtama3 ****
يا نهار ابيض سيده روح منك لله اشوف يوم شبهك فيك
زى ما قلت عندى يا سوسة
نون النسوة لسة مجرد حرف مكمل من حروف اللغة العربية
متخيلين انه ممكن الاستغناء عنه بواو الجماعة
لكن جمع المذكر السالم؟؟؟
هو المسيطر السالم
-------
لااااااا لنموذج نوال السعدواى
بلاااااش خلص للامور
نعم لنموذج دكتورة حنان عشراوى
لية بنبص للنماذج المتطرفة ونتهم دايما اننا بنسعى لتحقيقها؟؟
------
تحياتى يا سوية
بصراحة يا سوسه
عندك حق فى كلام كتير قولتيه
كنت لسه باتكلم مع اهلى في انى محتاجة عشان انتزع منهم اى حق ليا انى اجاهد و لا كأنى ح اعبر القنال .. و انهم بيزدوا الضغط عليا و انا على وشك الانفجار
بس خير .. هو تقريبا الواحد بيدفع ضريبة التميز
تحياتي لكى يا عزيزتى
اولا يا سوسه المفروض دلوأتى بقى فيه وعى والكل عارف انا البنت او الولد
من عند ربنا (يهب لمن يشاء اناثا ويهب لمن يشاء ذكورا) ثانيا السبب الراجل ربنا والعلم قالو كدا
اما حكايه العيب اللى مشهورة فى كل حاجة عايزة تعمليها ما تنسيش انك فى بلد شرقى وعنده عادات وتقاليد متمسك بيها حتى لو غلط
اما دلوأتى البنت مش كمالة عدد لو بصينا هتلاقى ان معظم المناصب او المشروعات الناجحة ماسكها سيدات
ولا لو بصوا زمان مش بلقيس كان حاكمة لبلد
ولا حتشبسوت برضه مش كانت حاكمه بلد
لو فكروا وتعقلوا شويه
هيلا قوا ان دا عادات وتقاليد مش ليها اساس
العزيزة سوسة
اؤيد كلامك بخصوص الخطوط الحمراء التى للاسف اكتشفت اننا انا وانت و غيرنا وضعناها لانفسنا واصبحت امر واقع وعندما حاولنا تخطيها ظننا انه قد فات الاوان لكن بصراحة تخطيت العديد منها الان دون ان اشعر بحرج وكلما تقدمت للامام خطوة ناجحة نظرت بعين اللوم لاسرتى فقد كان بأمكانى ان احققها منذ وقت بعيد الا ان القيود باعدت بينى وبين اهدافى
الى كل ليلى تخطى الان الخطوط الواهية البالية لم يفت الاوان بعد
لما نطالب بتعدى امور الدين فلم تخالف اى منا شرعا ولا دينا عندما تبحث عن كيان مستقل
الدين ليس متجمد كما يصفه البعض الدين يمنحنا احترام وصلاحيات يجب ان نتمسك بها
ما نعترض عليه ليس الدين ولكن هو الموروثات البالية القديمة التى ليس لها اى اسس عقائدية
تحياتى يا سوسة ولست ابدا ليلى الضعيفة
اراكى ليلى ناشطة معبرة هادفة
للأسف التربية المصرية للبنت تعتمد على
احتقار المرأة لمجرد وجودها في الحياة ورغم أنه حتى في أوروبا يستبشر الأهل وحتى الأم بإنجاب الأولاد-الرجالة يعني-وتعتبره المرأة اثباتا لأنوثتها وقدرتها على الإنجاب إلا أن تربيتهم للفتاة لاتقوم من منطقنا الذي نتبعه وهذه الفكرة تحتاج بالطبع لتغيير ولكن كيف وفينك ياحكومة وحملات التوعية ومع ذلك أنا ضد أن المرأة تساوي الرجل فهي مقولة خاطئة لأن المرأة أعلى مكانة من الرجل فهي نصف المجتمع ومربية النصف الآخر أي أنها المجتمع كله وأعتقد أن المقولة الأخيرنة معروفة لكن من يفهمها
ربنا يهدي
انا كنت متأكد من الأول ان وجهة نظري فيكي صح يا سووووسه :)) فعلا لما قريت رأيك دلوقتي اتأكدت ان اختياري صح :))
بالتوفيق
فعلاً البنت في بلادنا العربية مظلومة مش بتقدر تستمتع بحياتها ذي الولد وفيه حاجة قريتها في كتاب ديني والصراحة فارساني شوية بتقول ان ايما امراة نامت وزوجها غضبان عليها فتلعنها الملائكة حتي تصبح
طب افرضي الراجل بيزعل من اي شيء
اللهم لا اعتراض
رد على سحر يا شيخ عبد الله مفتاح
يا سوية انتي كنتي في اعدادية و صغيرة شوية
انا كنت في الكلية و بابا رفض اني ادخل كورال الجامعة
:'(
بوست هايل
ربنا معانا
سيبك من نظرة المجتمع لانها كانت متوقعة الاخطر هو اللي انتي حسيتي بية من تنميط جواكي انتي نفسك مابتستعمليش حقك لانك بقيتي عضوة في نادي قمع البنات ودة اصعب انتي بتعترضي علي حقوقك وبتمنعيها عن نفسك ،، حلو اوي بقينا احنا السجان
انا باعمل كدة مع نفسي اوقات وبازعل من نفسي اوي بعدها،، يعني كلنا ليلي وكلنا ماما ليلي تحت التمرين
ماشاءلله عليكى وعلى كتاباتك
بجد قدرتى تخرجى اللى جواكى بأحساس جميل
أنت أنسانه رائعه يا سوسه
ربنا يكرمك
بس أنا سعلانه منك
كان ممكن تدخلى كلية أعلان فى القاهره
و تيجى تقعدى عندى تشرفينى والنعمه
مع أن أعلان مش حلوه
أنا بنت عمى عنبر عقبال أملتك كده
وأملة السامعين أخدت دبلون تجاره قسم
نسيج وبقت مهندزه أد الدنيا
العلام حلو يا ولاد
أنت عافه أنا طول عمرى شاطره فى البيلوجى والكيمست
أوجكسجين زائد منجنيز
يدينا ثانى أكسيد المنجنيق
معلش أنا براجع مع نفسى
والله العظيم بحب الكيميا أأوى
ونفسى أشتغل فى صيدلية عشان أخربها
أصلى متطلعه وعندى طموح
ياااه العمر جرى بسرعه وأنا نازله رغى وكلام
بس أنت كان ممكن تدخللى الكليات دى كلها أنت عارفه أنا اللى نزل مجموعى
أيه فى ثانويه عاميه أن ورقة الأجابه بتاعت امتحان الجغرافيا بتاعتى ضاعت
أو تقريبآ عملتها مركب أو طياره موش فاكره سلام بقا عشان الحق قطر النوم
سوسة أنا موافقة 100% على كلامك بخصوص الخطوط الحمرا اللى احنا حطيناها لنفسنا نتيجة التربية اللى اتربيناهاو أنا شايفة كمان ان الخطوط الحمرا دى كتيير منها ايجابى
لأنها جعلت عند الأنثى حياء
و دة أجمل ما فيهافالحياء شعبة من شعب الايمان فعن أبى هريرة رضى الله عنه، عن رسول الله - صلى الله عليه و سلم قال : " الإيمان بضع وسبعون شعبة، والحياء شعبة من الإيمان " و فى رأيى ان الأنثى تستطيع أن تثبت ذاتها ووجودها أكثرعند التزامها بحدود الحياء
و الرسول- صلى الله عليه و سلم فى حديثه لم يقصر الحياء على الأنثى بل شمل الحديث كلا الجنسين، و لو أن الذكر تربى على الحياءأيضا لاختلف المجتمع كثيرا
طبعا المفروض اني اعقل من اني ارد على واحد بيحاول يستفزني
ربنا يهدي وزي ما النبي صلى الله عليه وسلم علمنا فيما معناه ( ليس الشديد بالصرعة انما الشديد الذي يملك نفسه عند الغضب)
انا طبعا بردو مش هرد يا سوسة
بس انا هكتب ردي في البلوج عندي
يا ريت انتي كمان مترديش ولا كان في حاجة اتقالت في حقي
انا مش زعلان والله
خلينا نتواصل وليتطاول من اراد ان يتطاول
هذا الرد خاص بالأخت سحر
يا أخت سحر تلعن الملائكة الزوجة التى تأبى تلبية دعوة زوجها للفراش بدون عذر واضح كالمرض و الحيض و صيام الفرض فقط
و لا تلعن من غضب عليها زوجها لأى سبب من الأسباب الأخرى أو كما ذكرتى فى ردك كأن يكون الزوج دائم الغضب و يثور لأتفه الأسباب
هذا ما قل و دل آثرت عدم الإطالة
و إن أردت الاستفاضة فى الموضوع يمكنك ترك عنوانك فى مدونتى
أتركك فى أمانة الله
تقهر ليلى نفسها بنفسها احيانا
افتكر ان ده نقص قوة او ثقة .. ليلى مش بتقدر تتحدى وتقف فى وش المجتمع كتير
حتى فى دى محتاجين ناس تقتنع بينا كانسان من الجنس الاخر علشان نقدر نوصل لشئ جميل فى النهاية
سوسا
في ايه !!؟
انا شامم ريحة انقلاب
تمرد
ما كنت كويسة
:)
يا اخ ياسر محدش قهرها في البيت عشان عملولها غسيل مخ خلوها هي اللي بتقهر نفسها بالنيابه عنهم
لو مكنتش عملت كده كان القهر والتحكم و البهدله كلها هتظهر
الفكره مش في في التمثيل ولا في الكليه و الشغل الفكره في القهر النفسي اللي بيخلينا نفكر الف مره قبل ما نعمل حاجه احنا واثقين اننا عايزنها لمجرد خوفنا من التقاليد
موضوع جميل يا سوسه احيكي الف مره عليه
البوست جامد جدا من سوسة زي كل البوستات اللى فاتت.
والحقيقة انا بحس أن "الليلات مزودينها أوي" انا شايف ان الموضوع مش قهر واستعباد وكلام كبير بالمنظر ده، الموضوع شوية عادات علي تقاليد وقيم اساسية في تكوين الراجل الشرقي، يعني مبيحبس ان مراته تشتغل غلشان هو شايف الست اللي معاه في الشغل بيجرالها ايه، مش عايزها متحررة بشكل منحل حبتين علشان هو سامع ايه اللى بيتقال علي المتحررة اللى زيها.
وبعدين الشباب اللى طالع مش زي الشباب اللى كبر ، يعني شباب اليومين دول في منه كثير مش عارف هو عايز أصلا مراته تشتغل ولا لأ..
شباب أمتلأ خياله بنوع معين من الصورة الزهنية اللى يحب فيها أن يكون مع زوجته أو فتاته وكل هذه الصور غير مرتبطة بقهر المراة او قمعها بل علي العكس مرتبطة بالخروج علي الكورنيش ودخول السينما الى اخر ذلك
علي ما أعتقد
مصرى متغرب
رد على سحر
الاخت الفاضلة سحر الكلام الذى ذكرتية فى تعليقك هو حديث نبوى ولكنى لست متأكد من صحة الحديث وهناك حديث اخر ولكن هذا سندة ضعيف ان الرسول (ص) قال لو كان لى أن امر احد ان يسجد لغير الله لكنت امراً الزوجة ان تسجد لزوجها وسأتأكد من صحة الحديثين وقوة سندهما وافيدك ان شاء الله ولكن ليس معنى الحديث ان الاسلام يريد الذل للمرأة فلا يجب ان تنسين ان الذى اعطى للمرأة حقوقها هو الاسلام ولا يوجد شريعة او عرف او دين اعطى للمرأة وحرية مثل الاسلام فكلنا يعرف قصة الرجل الذى جاء الى الرسول (ص) وقال لة من احق الناس بخدمتى قال امك ثم امك ثم امك ثم ابوك والاسلام ايضا القائل الجنة تحت اقدام الامهات والاسلام ايضا هو الذى اعطى للمرأة حق الموافقة والرفض فى الزواج واعطاها حق الخلع الذى لجأ الية الان اصحاب الديانات الاخرى وحدد جميع حقوقها فى النكاح وفى الطلاق وحتى فى الميراث بل وفى الحياة ألم يكن يتم وءد البنات عند الميلاد قبل ظهور الاسلام ثم ان لله حكمة كبيرة فى وفاة ابناء الرسول الذكور وترك الاناث فكانت فاطمة هى حب رسول الله (ص) لنا فى سيرة الرسول والصحابة قدوة فى قصصهم لحرية المرأة وان القرأن بة من الايات التى تحث على احترام الانثى فى صورها المختلفة كالأم والاخت والزوجة الكثير .
اعود بك الى الحديث الذى ذكرتية معناه يا اختى والله أعلم ان تحاول كل زوجة استرضاء زوجها ونيل رضاة حرصا على حياتها الزوجية وحرصا على اسرتها وان تلتمس له العذر فى عصبيتة ونرفزتة وتلطف مابينهما من امور دعت الى هذة العصبية وتكون سكنا له وليس هناك ادل على ذلك من قصة الصحابى الجليل الذى خرج لعملة وترك ولدة الوحيد مريضا يبكى من الحمى و توفى الولد وهو فى الخارج فقامت زوجتة بغلق الباب على الفتى وهو جثة هامدة ثم أعدت الطعام ثم تزينت وعندما اتى زوجها سألها ما حال الغلام قالت لقد استراح فأكلا ثم مارس معها حياتهما الزوجية وعندما فرغ سألتة اذا اعطاك احدا امانة واراد ان يستردها فماذا انت فاعل قال اعطيها لة فقالت لقد استرد الله امانتة التى عندنا فقال ان لله وان الية راجعون تلك والله نعم الزوجة واخيرا لست برجل دين بل للاسف ان ضعيف جدا فى معلوماتى الدينية ارجو ان تغفرو لى اخطائى وأسأل الله ان اكون نفعت بكلامى هذا من قرأة
اختى سحر الاسلام اعطى للفتاه حقوقا اكثر مما تتخيلى وكلفها بواجبات كثيرة ايضا ولم يكن الدين ابدا مذلا او مهينا او مستعبداً للمرأة وانما نحن الذين اسأنا استخدام الدين وأسأنا تطبيقة والله لو فعلنا لأصبحنا احسن الامم
سأتأكد من صحة الحديثين وارسل لك تعليق بهما ان شاء الله
بتفق معاكي لكن أحب أقولك أن الحقيقة كده مش كاملة، الثقة في النفس مش حاجة بتكتسب بفعل شخصي، ده عملية نمو بيساهم فيها المجتمع والناس بشكل قوي جداً. يعني من الصعب جداً ان تلاقي البنات مؤمنين بنفسهم ويمكن كمان مش مكمن يؤمنوا بنفسهم لوحديهم أذا مكانش المجتمع وبالأخص الذكوري يدعمهم ويمنحهم دائماً الثقة من فين هتيجي الثقة. من فين هتلاقي أم بتدي ثقة لبنتها وهي طول عمرها معرفت يعني أيه ثقة أصلاً. من فين هتطلبي ن زميلتك ثقة وهي فاقدة الثقة في نفسها لأنها بنت. الحصول على هذه الثقة عملية طويلة ويجب أن تتم بدعم كل أطراف المجتمع ومش عملية نمو ذاتي منفرد وألا هتكون ضعبفة جداً، بس ده ميمنعش كل التغيرات الكبيرة بتبدء بحجات صغيرة، يعني لو أنتِ أديتي الثقة لبنت تانية ده هيفرق كتير، لو أديتي الثقة لبنتك ده هيفرق كتير، لو قلت لا وأعترضت على الحواليكي آلي بيقللوا منك حتى لو مستجبوش ده هيفرق كتير...
اتفق معاكي في حاجات, وفي حاجات تانية ماشوفتهاش على الاقل, عموما اكيد العيب مني.. بس حابب اقول ان المطالبة بحقوق المرأة لا تعني بالضرورة الهجوم على الرجل...
ربنا يوفقكم :)
يا ميت مليون خسارة
كلبوزة
ماحدش هيقف خلاص
بعدك على بالي
شكرا يا جميل يارب فك فرسة كل البنات
shabaskandrany
حقك عليا ..طب و بقية الناس دي فهمت ازاي؟
حاول تفتكرني
بلوجي و بقول فيه حكاية شخصية بس بتمس بنات كتير ..أنا عن نفسي مش حاسة حاجه غريبة
me
شكرا يا عسل ....ربنا يهدي الجميع
مصري مغترب
زي ما قلت قبل كده يا ريت تعمل بلوج و تكتب فيه ..بجد هيبقى هايل
تجربة اختك تجربة موفقه ..بس فيه بنات كتير في الأقاليم مدن و قرى محرومين من ثقة الأهل و حتى ثقة النفس
kazabaza
إحذر من البلوجريات ..نحن قادمون
يا عم ولا انقلاب و لا غيره ..دي بس فضفضة
anonymous
شكرا ليكي أو ليك مش عارفه..ياريت كنت ذكرت اسمك
نظرية لا حرية بدون انحلال دي اللي مخوفه الكل و بتتسبب في قمع البنات
الغريب
شكرا ليك ..يا ريت الكل يحس بينا
عبدالله مفتاح
بالراحه شوية يا اخ عبدالله ..انت فهمت الموضوع غلط خالص..هارد عليك في المدونة بتاعتك
تحياتي
reformer1976
قهر الإنسان في مصر بايد السلطات و النظام و مانقدرش نغيره الا على مدى طويل و طريق شاق ..بس ظلم المرأه بيد الرجل ممكن انت و أخوك و أخويا و أبوك و أبويا و أولادنا يغيروه ..يعني بايدنا مش بايد حد من فوق
كويس و الله ان عبدالله هو اللي خلاك تأيدنا ..سبحان الله يا أخي ..بس انت مناقشاتكوا دي بقيت أستناها في كل بوست ..جميلة جدا
حاول تفتكرني
كلامك صحيح..مش عارفه ليه كل واحده تفتح بقها و تقول يا جماعه مظلومه أو تعباه ..يقولولها انت بتتشبهي بنوال السعداوي ..الست دي أصلا ما باطقهاش
ألى سوسه
للأسف كلامك صحيح .. أنا اشتغلت فى الصعيد حوالى سنتين .. و حضرت الموقف ده بالظبط .. صديق أنجب بنت .. و فعلا انطبق عليه وصف القرآن ظل و جهه مسودا .. سومها رحت كلمته و قلتله أن الرسول عليه الصلاة و السلام قال خيركم من بشر بالأنثى .. يعنى أفضل الرجال هو من يفرح بالمولوده الأنثى .. أبتسم ابتسامه صفرا فى وشى ,, و ماردش .. بعدها بسنسن قريت زى كلنا ماقرينا عن الراجل اللى قتل بناته فى الصعيد .. طبعا المشكله الوثنيه اللاأخلاقيه دى متكرره فى بحرى و فى القاهر و فى اسكندريه و فى كل مكان على أرض المحروسه .. فعلا عندك حق .. لكن كمان بناتنا عليهم مسؤليه .. الحريه و الأحترام قيم تكتسب ولا تمنح .. و المراجع الأخلاقيه و الأنسانيه و الدينيه كتير جدا .. ممكن لبناتنا و أخواتنا و زوجاتنا الأستناد ليها و هو بيدافعوا عن أنسانيتهم ..
عموما من كلامك و كلام زميتك .. أفكر بجديه فى كتابة موضوع عن النظره الوثنيه للمرأه فى الدول الأسلاميه .. فعلا نحن مسلمين .ز لكن مازلنا ننظر للمرأه بطريقة عبدة الأصنام اللى كانوا بيؤدوا بناتهم فى يوم من الأيام من باب الرجوله الحقيقيه بالمفهوم الوثنى
تعيش سوسة
تعيش سوسة
دي أكبر مشكلة بتواجهنا ..عدم ثقتنا بنفسنا و الستات اللي بيقولوا على بعضهم ..دي ستات مخها فاضي ..و خايبة
لازم الإحترام يبقى طالع مننا الأول
برافو
batabeet
انشاء الله هنبقى كلنا أحرار و مش هيبقى فينا حد زي قريبتك دي ..النماذج دي هي اللي جايبانا ورا ...بكره يتحرروا من غسيل المخ
أروى الطويل
مش عارفه يا بنتي حظك كده معاه ..حتى لما يحاول يكحلها يعميها
شهروزة
مالها نون النسوة ..بخير و ساعات كتير أجدع من ميت واو جماعه
بنت سعد
أهلا بيكي في المدونة..كلنا قدرنا الكفاح و أكبر كفاح هو الكفاح ضد نفسنا و معتقداتنا البالية
moorgen
صح بس برضه في بنات أكتر مش بتحس انه من حقها تنجح و تعمل أي حاجه هي عايزاها لمجرد انها بنت ..و الولد او البنت مازالت للأسف متجذرة في اعماق الرجال حتى لو مش بيبينوا
tota
كلامك جميل جدا جدا ...يستاهل بوست لوحده ..ياللا بأه يا بنتي أكتفي البلوج بأه
أحمد المصري
"أنا ضد أن المرأة تساوي الرجل فهي
مقولة خاطئة لأن المرأة أعلى مكانة من الرجل فهي نصف المجتمع ومربية النصف الآخر أي أنها المجتمع كله وأعتقد أن المقولة الأخيرنة معروفة لكن من يفهمها"
ينصر دينك يا أستاذ خليييفه
zangoolaaa
شكرا يا رفيق ..يا رب دايما عند حسن الظن
sahar
على ما اعتقد يا سحر ان الحديث بيتكلم عن الست اللي تمنع زوجها من حقوقه الشرعية لأسباب واهية ..أو عشان تضغط عليه ينفذ طلباتها بشكل او بآخر ....و الله أعلم
reformer1967
شعللها شعللها
taty
كلنا بنعمل كده في معظم مراحل حياتنا و ساعات كتير بادينا احنا
saso
صح كلنا ليلى ..بس في النقطة دي بالذات ..يا ريت ليلى تغير نفسها
aoossa
يا حبيبتشي يا عسل..دانا أفتحلك صيدلية و تيجي تخربيها براحتك ..يا سلام
على فكرة حنفي موتني م الضحك..قطيعه تقطعه ..ربنا يصبرك عليه
أحلام سعيده يا أوستي
أمممواه
رانية
ما هو لو المجتمع بيربي الولد على الحياء زي البنت ماكانش هيبقى فيه مشكلة
بس برضه البنات اللي شايفه انها مش هتنفع في حاجه عشان هيا بنت ..و ده مالوش دعوة بالحياء
عبدالله مفتاح
رد في المكان اللي يريحك يا عبدالله ..و انا هاقرا البوست بتاعك و هارد عليه
violena
أهلا بيكي في المدونة...كلامك كله مظبوط و لازم ندور جوه نفسنا الأول
أكتب بالرصاص
ولا تمرد و لا بطيخ
شوية فضفضة على خفيف
yasser
لو قريت آخر فقرة هتعرف انا عايزة أقول ايه
bosbos
شكرا يا عسل على ردك على ياسر ..و أهلا ببيكي في المدونة..حاجه تفرح ليلات و عقلهم الكبير
dead man
شكرا ليك ..فعلا الشباب دلوقتي مش عارفين عايزين ايه ..فيه احساس بالضياع كده ..بس الرجاله المتزوجين برضه بيمارسوا شوية تصرفات غلط مع زوجاتهم و بناتهم ..و لو المسأله تقاليد ممكن نغيرها بان كل واحد يبأ بنفسه
مصري مغترب
شكرا بالنيابة عن سحر
eywitness
كل التغيرات الكبيرة بتبدء بحجات صغيرة،
جملتك دي هي اللي أنا أقصده ..لو كل واحده بدأت بنفسها..و بابنها و بنتها..التغير هييجي ..ببطء بس لازم هييجي
محمد حبيب
شكرا ليك على تفهمك ..يا ريت الناس كلها زيك
admelmasry
ماشي يا فقري ..انت داير في كل البلوجات تقول خسارة .. و هنا خلتها مليون ..طب يوم ما تبقشش عليا بقشش بحاجه كويسه
عموما مقبولة منك يا كابتشن..نردهالك في الأفراح
lastknight
تمام ..الناس كلها بتقول الموضوع ده انتها وانا الوحيده اللي بقول ياريت ..بس لسه موجود..حتى لو من جوه و مخبينه عن اللي قدامهم ..ياريت تعمل البوست ده ..مستنياه
wanna-b-a-bride
الله يخليكي يا عروسة..الستات دول بيفرسوني قوي الصراحه
ur bost bgd mn el bosts el 3bkrya 2lly 2retha don't care about what are they sayin
شردتوا للرجالة ربنا ينتقم منكم هو فيه ايه ؟ طيب واد ابن صرمة وشفتوه بالغلط يبقى كل الرجالة كده انبي دا احنا غلااابة ومالناش فالطيب واتحدى اللي تقولي ان الراجل اقوى من المرأة دا انتوا سوسه كلكم وتولعوا في اتخن شنب وسيبكم بقى من الحبتين بتوع زليخة دول وما تعملوش العملة وتجروا وتشتكوا وكمان تقترحوا العقاب اللي يقع علينا ومش هاقو لكم اكتر من اللي ربنا قاله انكم اشد من الشيطان نفسه وما قالهاش على الراجل فبلاش سهوكة بقى ربنا سبحانه وتعالى قال (إن كيد الشيطان ضعيف ) وقال (ان كيدهن عظيم ) هاتغالطوا في دول بردوا روحوا منكم لله يا كل ليلى ....... انا ستي زماااان كانت بتقول : لو اتعارك الراجل مع محراته يقلب على مراته يعني لازم هي اللي تتحمله علشان الزفته اللي ركبنها تعوم (المركبة بتاعة الحياة الزوجية) يعني ولا ايه اقوم اولع لكم في المرحومة ؟؟؟
مع اختلافي معكي في الرأي لكن احترم اسلوب كتابتك
اشكرك اخ مغترب
ولو ان المسلمين بياخدوا الدين وسيلة لازلال المراة والإسلام بريء منهم ومن أفعالهم فلو كل رجل تعامل مع المرأة كما حثه القرآن لما تواجدت ليلي المقهورة
وشكراً ياسوسة
سحر
يا جماعة انتوا اتهبلتوا كده ولا مؤاخذه
ده كله علشان ايه اللى حاسه بالظلم تقول لاهلها انا مظلومة فى كذا وكذا وخلاص الموضوع بسيط
أروى الطويل
انت ليه تعليقاتك كده
برضه سيبتى تعليق عندى غريب
بس تستخدمى لفظ أتهبلتوا
مش عيب كده يا أروى
أنا عارفه أنك لسه تجاربك محدوده
يمكن فكرك يتغير لما تدخلى الجامعه والعالم بتاعك دايرته توسع أكتر
أنتى فعلآ تفكيرك حنفنف خالص
بس بجد لسة في كده دلوقتي انا بصراحة شايفة ان البنت واخدة حقها تالت ومتلت ممكن علشان انا واخواتي بنات فمشفتش العنصرية والحجات الغريبة دي
بس اقولك حاجة يا سوسة انت اللي مقتنعة بالحاجة دي بنفسك يعني محدش اجبرك عليها حسب اللي فهمته من كلامك بس عارفة ف الاخر هو موضوع يفرس بجد لو في كده
يا بت انتى وهي وجعتوا راسنا بليلى هو حد قرب لكم واللى بيقربلكم يدوب مابيكملش كام دقيقه هههههههههه وبعد كده تشتكوا من التسرع والعجاله
خلاص يعنى انتوا عاوزين ايه نلبس طرحه ونمشى معاكم اوكى
بس كده هنعوز رجاله تتجوزنا اصل بنكسف وماتقولوش اننا وقفنا حالكم ف الزواج اصلنا هنسحب الرجاله منكم لاننا عارفين طلباتهم ايه وهنلعب لهم على نقطه الضعف
وماحدش يسالنى انا بكتب ايه لانى مش فاهم حاجه هههههههههه
سلام وزورنا تجدوا مايسركم وجيبت على الغدى لحمه وعقبال عندكم
أتفق مع الرفيقة سوسة في ردها الموجز والمعبر في الوقت ذاته على السيدة الفاضلة أروى بنت الدكتور الطويل (اللي بيشتري أدوية التأمين الصحي ويبيعها)
يا ريت يا سيديتي أروى كان المووع بالسهولة اللي انتي متخيلاها
قال إيه اللي عندها مشكلة ومظلومة تروح تقول لأهلها
وبس خلاص والحكاية بسيطة
يعني العبقرية أروى الطويل مسحت بجرة قلم قضية المرأة في مصر ومعاناتها لقرون من ظلم مجتمع عامل دكر (وهو كله ليلى)
يا سيدتي أروى
الموضوع كبير جدا
أحكيلك حادثة بسيطة هزت كياني كالزلزال
في يوم من الأيام أتى إلي في عيادتي بالأرياف أيام ما كنت طبيب بالأرياف
رجل ومعه ابنته
(البنت كانت عروسة عندها بتاع 14 سنة)
والبنت كان مفروض إنها تعبانة
والمفروض أكشف عليها كشف باطنة
عادي خالص
والبنت بحيائها الفطري
كانت مكسوفة تكشف نفسها أمامي
عادي جدا وقمة في الطبيعية من بنت في قرية مصرية بتنكسف وعندها حياء وفي سنها ده نصرفها طبيعي جدا
عم الدكر اللي هو الأب الغضنفر
حس إن البنت بتتدلع وإنها قليلة الأدب عشان مكسوفة تتعرى أدام الدكتور
فسخن الدم في عوقه
وفي لحظة خاطفة كالبرق
(وكالخبر الأسود)
هوى بكفه الثقيل كالمرزبة على وجهها الطفولي وسكعها قلم صوته رن في غرفة الكشف كقنبلة
شعرت بأن القلم كان على وجهي أنا
ولولا الملامة كنت انهرت في البكاء
بالنيابة عن الطفلة
شعرت برغبة أني أضرب الرجل بالجزمة أو أن أبصق على وجهه
لكنني مسكت نفسي واكتفيت بأن قلت له
(في ذهول)
"لأ مش كدة يا حاج ما تضربهاش كدة"
(يا برودي!!)
البنت لذهولي لم نبك برغم الألم
وقامت لترقد على ترابيزة الكشف وكأنها خروف سيق إلى الذبح
دي ما إلا مثال يا سيدتي أروى لملايين من البنات والستات في بلادنا اللل القصة دي ما عادتش تهزهم من كتر ما إنه عادي إنه الأب أو الزوج أو الأخ يضرب البنت أو الأخت أو الزوجة بالقلم أو حتى بالجزمة
وكله عادي
البنت في مصر يا ست أروى
بتتعرض لأعلى مستويات المهانة
آسف
أحط مستويات المهانة والإذلال
على مستوى العالم
بدليل الختان
نفسي يا سوسة نتكلم على موضوع الختان وتشوفي واحد زي عبدالله مفتاح هيقول إيه فيه وهيدافع عنه إزاي
وساعتها كلكم هتحصلوني على الحوض ونعمل حفلة تقيؤ جماعي
ايا كان كلامك فلا خيار عندي الا الاسلوب اللي انا اتربيت عليه وهو الحوار بادب واي محاولة منك لجرني لحوار من نوع اخر ستبوء بالفشل لانها حاجه انا لم اتربى عليها
بخصوص الختان الاناث ده مش رايي ولا رايك ده راي الطب
والطب هو اللي يقول اذا كانت هذه الفتاة بحاجه الى ختان ام لا
وفي كل الاحوال فالختان الفرعوني او ما يسمى بالسوداني مرفوض مرفوض
تقيا لوحدك بقا
سوسة المفروسة : نفس الموقف بتاع التمثيل ده حصل معايا وكنت في ابتدائي وكانت مسرحيه تاريخيه وجملة الاختبار اللي انا اتقبلت بيها(انا اعلم بدهاء العرب) وماما مرضيتش يومها وانا نسيت الموضوع
يعني مفيش حاجه اسمها غسيل مخ
تاني حاجة: بالظبط انا من الرجاله اللي مش بتحب يناتها تتكشف على رجاله هروح لاي عياده دكتورة من اللي كاتبين 24 ساعه وهتكون نايمه في بيتها وهتنزل للمريض مش ازمة يعني
تالت حاجه نطيتي انتي على موضوعين السفر برة ومصر والقعده مع راجل لوحدك طول النهار في مكتب بس مش مشكله عديها بس مش غسيل مخ بردو ده اسمه تربية
اخيرا بعتذرليكي جدا انا مقصدش انقد كلامك بعيد عنك انا كتبت عن كلامك لما البنات كانوا عايزين يفندوا كلام انا اخترت كلامك على اساس ان التعليقات عندك كتيرة....تقبلي اعتذاري
اظن ان الفكرة من التوبيك مش انقلاب و لا محاكمة ثقافتنا الفكرة ان فعلا في بلادنا افكار و تصرفات بتسيء للمرأة كبني ادم محترم لها حقوق و عليها و اجبات.
التوبيك ده يا شباب مش ثورة علي الرجال و لا علي المجتمع و لكنه رصد لمواقف كتير اوي بتتعرض لها كتير من البنات في بلادنا
اكيد في تطور في مجتمعنا حاليا و اكيد معاملة البنات في الاسر اتغيرت كتير و لكن لسه في افكار غريبة و تصرفات "مشينة" بتحكمنا
كفاااااااااااااااااااااااااااا
ااااااااااااااااااااااااا
ااااااااااااااااااااااااايه بقه
وديني لزعل منكم بجد, الموضوع كده خرج بره حركه فرديه.
انا بجد مش فاهم انتوا عايزين ايه.
عايزين تقولوا انكم مساكين, ماشي ياستي مساكين.
عايزين تقولوا ان الراجل ده كائن مستبد و ظالم و هوه اللي قهركم من زمان, ماشي برده مش فاهم يعني الراجل المفروض يعمل ايه؟؟؟؟؟؟؟؟؟؟
والله في ستات كتير شايفين شغلهم, و عاملين اللي عليهم جوا و بره البيت. وانا بقه مبحبش نظام المسكنه و السهوكه ده.
ذي ما في رجاله جبارين, في ستات عيزين قطع الرقاب.
و مينفعش ننظم الموضوع ده بالقوانين
Reformer1976:
انا برده قريتلك في كذا مدونه بس لسه مدخلتش عندك. كلنا بنرفض حالة ليلي و كلنا عايزين نغيرها و نمنع حدوثها.
موضوع الختان ده يعتبر موضوع خارج مجال المناقشه في البوست ده, و انا كمان اتمني اناقشه رغم انه قتل بحثاً فعلاً و لن يزيد الكلام عنه في هذه المدونه المحدوده نسبياً شياءً.
بس مين اللي قالك ان عبد الفتاح ده شخصيه وهابيه و مرائي كمان (ده علي حد كلامك في البلوج بتاع كلبوزه), بمعني اخر انت مين اداك الحق عشان تحكم علي حد بالصفات ديه. انا ضد اي نوعية من التصنيف بأن فلان ده كده شكلوا شيوعي نتن او رأس مالي متحزلق, حاول توسع افقق و تستوعب تباين الافكار من غير تصنيف و خليك متسامح "يأخي"ـ
ياسوسه,
عجبني ردك في الكومنتس قوي, و بس برده واخد علي خاطري حته زغنونه قوي قوي علشان طرحتي الموضوع بالكيفيه ديه و انا عارف اد ايه انتي تفكيرك واسع و ثقافتك عاليه, وعارفه ان مينفعش ناخد زريعة من مواقف فرديه الي تعميم قضيه مهمه ذي ديه, نبقي عملنا ذي الحملات الصليبيه لما دخلت بدعوي تحرير القدس و اول لما دخلت قتلت كل ساكنيها علي اختلاف ديناتهم و اعتقادتهم.
بالعربي متمشيش ورا حد و تناصريه لانه فقط يتفق معك في قضيه معينه, لانه لما هيمسك السلطه هيمشي يقتٌل في كل اللي في البلد.
و تحياتي و وحشتيني
احب اضيف حاجه ان موقف الرجاله اللي بتضايق من ولادت البنات دول برده بره و بيعصوا ربنا. و مش معني انهم بيعملوا كده و همه المفروض مسلمين يبقي يجي واحد ذي
Reformer1976
و يقول اصل البلد عندها هسس ديني, معلش "يأخ" انت بس لل عندك الشعور ده, و ذي مانت متمسك بدينك احنا كمان متمسكين بدينا. وألااااااا ايه؟؟؟
و كتها ايه ياللي عايزه خلف...ـ
الصديقة والأخت العزيزة
يسعدني جدا جدا ترحيبك بالإشعال والتوليع التدويني الذي أمارسه
ولكم أسعدني قولك:
مناقشاتكوا دي بقيت أستناها في كل بوست ..جميلة جدا
طب بجد أنا كنت خايف إنك تكوني بتتضايقي من السخونة والاشتعال التدويني
الحمد لله مانتيش عايزاها مدونة لايت
خفيفة ع المعدة وتنامي خفيفة
بالنسبة لموضوع إن أنا كنت ضد القضية
وغيرت اتجاهي هو دا مش الحقيقة
أنا بس الفكرة إني جذري قوي في أسلوب علاجي للأمور
ما بحبش أعالج بالمسكنات ولا أعالج بالقطعة
يعني فيه التهاب في الزائدة الدودية
ما ينفعش أعالج بمضادات حيوية ومضادات التهاب
الزايدة لازم تتشال!!
في تعليقي الأول وصلت معاكي إلى العلاج الجذري لأزمة ليلى الحقيقية!!!
العلاج هو تحرير الإنسان
تحرير الروح
تحرير العقل
تحرير القلب
تحرير الإنسان هو الحل!!
الأزمة إنك بتكتشفي إنه وانتي بتنادي بالعلاج الجذري
(اللي بعون الله أدامه سنين عشان يحصل)
(دا إذا حصل)
بتلاقي أمور تجبرك على إنك تعالجي باللي تقدري عليه
مسكنات مضادات حيوية
وتحاولي تحلي حلول جزئية
لأجل تخفيف الألم عن المتألمين والمقهورين
ودا بيخليكي بين نارين
إنتي عارفة إن الحل لازم يكون جذري
لكن في نفس الوقت
بتتمسكي بأي حل جزئي أو مؤقت
واهو شيء أفضل من لا شيء
شفتي نوعية العقليات التي ترد هنا في البوست؟
حتى من يدعوا إنهم منفتحين ومش وحشي ولا رجعيين خدوا الموضوع بسخرية تتناسب مع البرنامج اللي نزل على نظام التشغيل بتاعهم من سنين سحيقة
يا بنتي أنا أعتقد إن اضطهاد المرأة واعتباره حق من حقوقنا المكتسبة
(بل ونشرعه ونصبغه بالصبغة الدينية إذا لزم الأمر)
هو أمر متغلغل في كياننا لدرجة إنك هتلاقيه في الدي إن إيه بتاعنا كرجالة
(يبدو إنه جين محمل على الكروموسوم واي مش على الكروموسوم إكس ودا لمن لا يعلم كروموسوم موجود في الرجالة بس)
بصي الأخ اللي بيقول إنه احنا أصل بنخاف على ستاتنا
وبنخاف عليهم من اللي بيحصل للمتحررة المنحلة شوية
(لاحظي ربط التحرر بالانحلال)
والواحد عارف اللي بيحصل للمتحررات اللي معاه في الشغل
(هذه الصياغة هي إسقاط نفسي إن الشخص دا بيتحرش بالستات بحجة إنهم متحررات... مش بفتش في الضماير دا علم النفس يا اخوانا)
هو دا لب القضية!!
عندك واحدة في الشغل منحلة
وبيتعمل لها حاجات وحشة من ناس وحشة
(إنت مش منهم طبعا)
كم مرة حاولت تمنع المنكر
وتقول لاصحابك الوحشين
كدة كخ وحرام واللي بتعملوه دا يغضب ربنا؟
ليه دايما البنت هي اللي بتتلام لو حد اتحرش بيها أو حتى لو اغتصبت!!!
ليه حضراتنا كرجالة حاسين إنه لما صاحبي يتحرش جنسيا ببنت
(دي التسمية العلمية والأخلاقية لكلمة معاكسة)
يبقفى صاحبي دا فتك ومقطع السمكة وديلها
(مش إنه بني آدم حقير وواطي ومعندوش أخلاق)
ودايما نصب لعناتنا على البنات وإزاي أن هما اللي بيشجعوا الولاد بلبسهم وطريقة كلامهم
(مش كل واحدة لابسة محزق تبقى عاهرة ولا كل محجبة هي رمز الكمال والعفة)
(وكمان فيه محجبات هما مثال في الخلق والأدب... وفيه محجبات بيستخدموا الحجاب تمويه يخبي تحته بلاوي)
خلونا نتجاوز عن الظاهر شوية وندخل إلى الجوهر ... إلى القلب
الإنسان ينظر إلى العينين
(يعني ما هو ظاهر)
أما الله فينظر إلى القلب
بالنسبة لموضوع "الهسس الديني" أعتقد أن أغلب الشباب هنا يعرفون معنى كلمة هسس
الهسس هو عندما تسيطر عليك فكرة ما واحدة على كل عملياتك الفكرية
وتصبغ رؤيتك للأمور كلها بلون واحد ودرجاته
الهسس هو إن عينك ما تشوفش أي حاجة إلا من القالب الفكري الوحيد المتلبس في دماغ حضرتك
بعضنا عنده هسس جنسي
قتلاقي أي حاجة في الحياة يفسرها تفسير جنسي
زي فرويد مثلا
دا كان عنده - في رأيي - هسس جنسي
كل حاجة بياخدها على تحت
والبعض عنده هسس يساري
أو هسس علماني
أو هسس ديني
الهسس الديني مش هو إنك تكون ملتزم بدينك
(للأخ الذي أساء ترجمة الكلمة)
الهسس إنك تشوف كل حاجة في الحياة
في دنياكم التي أنتم أدرى بشئونها
من منظور واحد
هو الحلال والحرام
أو الكفر والإيمان
أو الانحلال والالتزام
هذه هي مصيبة الهسس
بكل أنواعه وشعبنا على اختلاف دينيه
هو شعب يعاني من الهسس
(الهسس الديني دا في جيناتنا)
(حتى الفرعون عندنا عبدناه وعملناه إله بسبب الهسس الديني والجميل أننا حافظنا على عقيدة عبادة الفرعون حتى اليوم بالرغم من إسلامنا ومن مسيحيتنا لكن يبدو أن هذه النقطة مما ينطبق عليه قصة هذه نقرة وهذه نقرة)
ليرحمنا الله!!!
بالمرة بقى في موضوع الختان
الأخ مفتاح اللي مش وهابي ولا متطرف
لأننا لا نفتش في القلوب
(دا هو ا حتى منفتح جدا بدليل إن اسمه مفتاح)
تفضل حب يظهر إنه راجل معتدل
وأفتى إنه لا هو ولا أنا
اللي نتكلم في موضوع الختان
(إن ما كنتش وأن الطبيب اللي بيشتغل نسا وتوليد ما يفتيش في الموضوع دا امال أجيب أم سعيد الداية اللي على أول الشارع تفتي فيه؟)
لكن الطب هو اللي يقول رأيه...
يابني الطب قال رأيه من زمان بس انت مخدتش بالك
(معلهش كنت نايم وما رضيوش يصحوك)
الطب قال كلمته وسماه التشويه الجنسي للإناث
والإسلام كمان قال كلمته والوهابيين ما بيعملوش العملة المهببة دي
(واخدين بالكوا من صدفة إنه الأخ مفتاح متفق مع الوهابية إنه ختان الإناث مش فريضة عكس جموع الشعب في مصر ما يؤمنوا... بس دا مش دليل إنه وهابي... وإن كنت سمعت إنه المطرب الوحيد اللي مش بيكفره هو محمد عبد الوهاب)
والمسيحية قالت كلمتها وأعلنت إن العملة السودا دي ضد الإنسانية وضد الله نفسه لما فيها من إهانة للجسد الذي خلقه الله
الختان يا أفاضل
(وهذا ردا على أن الموضوع مش موضوعنا هنا في هذه المدونة بتاعة ليلى)
هو أوضح تعبير عن اضطهاد العقلية الحنفية
(نسبة إلى حنفي المستبد وليس للمذهب الحنفي المعتدل)
لليلى الغلبانة
ومصادرة حقها في الحياة وفي الاستمتاع بما شرعه الله وأحله لها في الزواج
إن حنفي يا سادة "يقطع" على ليلى طل فرصة لأن تكون شريك كامل في علاقته بها
هو يريد أن يقهر أنوثتها
ويشوه خلقتها لكي ما يعمل دكر عليها
وهو لا مؤاخذى ليلى أكتر منها!!!
من جديد حرروا الإنسان تتحرر ليلى
Reformer1976 الي اللي اسمه
حاسب بس لتجيلك قرحة تاخد اجلك من كتر التقئ
انا مش عارف ايه سبب الحقد البغيض اللي يدل علي شخصيتك اللي انت شايله للاستاذ عبدالله و ايه غرضك من استفزازك ليه في كل موضوع
فعلا صدق اللي قال دع القافلة تسير و ..... تعوووووي
و بعدين انت ناططلنا في كل بوست و تقعد ترط في الكلام
مش ملاحظ ان ماحدش بيرد عليك غير سوسة و دا عشان هي صاحبة البلوج و لازم تحيي اللي داخلين عندها و دا من ذوقها مش اكتر
يا ريت تريحنا من كلامك شوية احسن تنتقل عدوي التقئ لينا من كلامك مش ناقصين قرفففف
معلش يا سوسةالرد جه عندك اصلي مش هاقدر اروح عنده فعلا مش طايق الراجل دا
Laila, we need to know your real problems, just tell them to us, but in our own way
خارج الموضوع
انا مش عارف انتى زعلتى ليه انا برضة ما كانت قصدى انى اجرحك لدرجةانك ترجعى للمدونة بتاعتى تانى بس بجد الكومن بتاعك نرفزنى لدرجة الامعقول
على العموم كان وقت نرفزة وخلص
وانا رديت على ىالبوست بتاعك تانى ممكن تشوفية بنفسك
انا اعتقد ان الانسان المصري عامة مهان و مضطهد وغير مؤتمن علي المسؤليه من قبل الحكومه المستبده و ان اي تحرير يجب ان يكون تحرير الشعب من الاستبداد.لان الاستبداد باختصار هو سبب كل المشكلات او هو القاسم المشترك بينها كلها والمؤلفين الذين كتبوا عن خطر الاستبداد كثيرين و الكل اجمع علي ان الاستبداد خطر علي الروح نفسها.انا نفسي قرات كتاب الكواكبي المشهور والذي اكد فيه ان الاستبداد خطر علي الحريه العقليه وانه سبب الفقر و الظلم عامة
ممكن لمن يرغب العوده الي كتاب الكواكبي او كتاب الاسلام و الاستبداد السياسي للشيخ الغزالي
اما بخصوص قضية المراه و موقف الاسلام منها فكتاب قضايا المراه بين التقاليد الراكده و الوافده للشيخ الغزالي يوضح الكثير من الاشكالات
بالنسبه لكلام reformer1976
فانا اؤيد رايه لان بلادنا فعلا في حاجه لتغيير كل شيء واخشي ان يكون الانسان المصري نفسه مطلوب تغييره
صباح العوانس
لما تتجوزى وتلاقى حد يبوس الواوا كله هايبقى تمام التمام
tab3an.. a7santi kawllan ya fatati. I agree with everything you said. See? I am a good man
إزيك يا سوسه
أولا موضوع الإشاره حمرا فيه مبالغه كبيره جداااااا
ثانيا العادات والتقاليد اللي موجوده عندنا موجوده عن خلفيه دينيه أنا معاكي على إنها ساعات بتتفهم وتتطبق غلط بس المهم إنها ليها أساس
ثالثا لو ماكنتيش بتحبي نفسك وتحترميها وتلبيلها متتطلباتها مش هتلاقي حد يتحايل عليكي علشان تعملي اللي في نفسك
بإختصار إنتي بتكسري نفسك قبل ماحد يكسرك
ايه يا بنتى انتى اعتزلتى ولا ايه
فين انتاجك
انا مستنى من زمان
Post a Comment