مبدئيا نعرف المسلسلين دول لضحايا التلفزيون المصري..و طبعا معروف ان التلفزيون المصري سبب لأجيال ورا اجيال أمراض عقلية مستعصية أخطر بكتير من سرطانات يوسف والي ..اي آر اختصار لجملة " إيميرجينسي رووم " أو غرفة الطوارئ ..يعني الجزء م المستشفى اللي بتروحله الحالات المستعجلة من حوادث و غيره .. و ده مسلسل أمريكاني بدأ يتزاع من يجي 14 سنة و لسه مستمر ..و هو من أشهر المسلسلات في العالم
طب ايه سي إس آي ؟؟ ده اختصار كمان "حصة انجليزي
معلش" ..اختصار لجملة " كرايم سيين انفستيجيشان" يعني التحقيق في موقع الجريمة ..رفع البصمات و أخذ عينات الدم و ال دي ان ايه و الحركات دي .. و ده مسلسل كمان من أشهر المسلسلات و بقاله بيتعرض ييجي 6-7 سنين
المسلسلين دول انا اتفرج على حلقة منهم و اتفتح في العياط و مالقاش حد يسدني الا لو داسوا على رجلي الشمال ..مش عشان بتأثر بالجرايم و الجثث و الحالات المرضية و القصص دي ..لالااااا ..دانا جامده جدا و اعجبكم و لا يأثر فيا الكلام ده...أنا بصراحه بعيط و اتقهر على اللي بيحصل للبني آدمين في مصر ..أنا عشان باشتغل في مستشفى و شايفة قدامي كل يوم ازاي المرضى و ساعات الموتى في مصر بيتعاملوا ..بيجيلي حالة هلع لو حاسيت بشوية برد و الا لو قربت م البوتاجاز أو حتى و انا باعدي الشارع ..بخاف موت ..بس مش م الموت ..بخاف أدخل مستشفى و يحصل فيا اللي باشوفه بيحصل في الناس
طب تعالوا نقارن بين اللي بيحصل عندنا و عندهم ..هتقولولي بتقارني واقعنا بمسلسلاتهم ..أقولكم سوري ما شفتش واقعهم بعيني بس كمان انا عارفه ان المسلسلات دي بتعبرعن جزء كبير من اللي بيحصل في الحقيقة عندهم
في مسلسل إي آر..بيبتدي
تعاملهم مع الحاله في ان عربية الإسعاف بتتصل بالمستشفى و تبلغهم انا معايا مريض اسمه كذا و ضغطه كذا و فصيلة دمه كذا و حالته كذا..على ماييجوا يكونوا الممرضات حضروا الدم و المعدات و استنوا العربية برة المستشفى و لو كان المريض لما وصل قلبه واقف تلاقي الدكتور نط فوقه و هو ع النقاله و يبتدي يعمله تنفس صناعي و هما جرينه على أوضة العمليات عشان مايضيعوش وقت..و حتى لو المريض ده غرقان مثلا و بقاله ربع ساعه قلبه واقف ..تلاقيهم عمالين يدوا صدمات و حقن و دم و ممكن بعد مده تلاقي المريض قلبه بدأ يدق تاني
طب تعالوا نقارن عندنا ...المريض أصلا مابيلاقيش عربية اسعاف تنقله و لو حصلت حادثة و طلبت الإسعاف ..زيهم زي النجده و المطافي ما بيردوش على موبايلات و ما بيستجيبوش غير بعد الإتصال التالت (لضمان الجدية).. و ماتلاقيهومش يجوا جري الا لو كان في الحادثة أجانب..و لما تتكل على الله و تنقل المريض بنفسك للمستشفى أولا لو حالته خطيرة مافيش مستشفى هيرضى يستقبله "زي مايكونوا بيستقبلوا الأصحاء فقط " ..و لو دخل أول حاجه يقولولك ..تأمين ادفع في الخزنة و يستنوك لما تدفع الأول قبل مايعالجوا المريض..بيصر دم بأه ..مصارينه طالعه بره..عينيه قربت تلزق في قفاه ..مش مشكلتهم..و بعدين يقولولك روح هات ..شاش و قطن و بلاستر و رباط ضاغط و جبس و سرينجات و مكروكروم و ياريت سندوتشين مخ من عند الراجل اللي جنب المستشفى و انت راجع ...و بعدين يطلعوا يقولولك ..دم .. عايزين دم ..تعالى اتبرع و ياريت 5-6 معاك..نصيحه عبيلهم كيس صلصة طماطم ..كده كده هيبيعوه و مش هايدوه للمريض اللي انت جايبه....و ممكن قبل ما المريض يدخل العمليات ..تلاقي دكتور جه يقيسله النبض ما يلاقيش ..أو ممرضه ترفع ايده و تسيبها تترزع زي الأفلام و يغطوا وشه و يقولوا البقية في حياتك ....طب يا عم حاول ..صدمتين كهربة كده و الا حقنه لتنشيط القلب و الا حاجه ..لاااا
دماغنا بأه ..فيه منه كتيير ..الدنيا مش هتقف يعني
..
في سي إس آي بأه ..الموضوع أنكت بكتير ..دول بييجوا بعد ما الحادثه تحصل و مايبقاش فيه مريض ..بيبأه فيه اسم الله عليكم كده ..قتيل ..ييجوا بأه يلموا ..دم..بصمات..شعرايه لونها أشقر على كتف الجاكته ..زي ما كانت ماما بتعمل مع بابا ..فتله لونها غير لون البنطلون..و بعدين يبعتوا ده كله للمعمل و يقعدوا يحللوا فيه ..و يبعتوا اسم الله على مقامكم الجثة للمشرحه ..في المشرحه يشقوا الجثه كده بقصه شيك جدا على شكل حرف واي ..و يطلعوا كل اللي فيها ..الراجل ده مضروب بالرصاص ..لكن لأ بص الدم مانزلش بعد الرصاصه يعني كان ميت قبلها ..ده مخنوق ...الجثة دي بأه فيها خرم جنب الودن وواحد تني في الصباع الكبير ..ده اثر تيار كهربي ..ده ميت متكهرب
دانا مرة شفت حلقة خدوا بصمات القاتل من فوق رقبة الضحية اللي كان خانقها
و مرة واحد ضرب واحد بالبوكس في صدره ..شالوا الجلد و خدوا بصمة البوكس بتاعه من على الأنسجه اللي تحت الجلد
شوفوا بأه المحاكمة بتاع بني مزار و قارنوا ...يومين عشان يعرفوا الواد مقاس رجله 42 والا 45 ..لأ و بعتوا جابوا خبير جزم ..ألا خبير جزم ده يبقى خريج ايه ؟..و الا عامل دكتوراه في البلغ والا ايه النظام يعني؟
و الجلابيه اللي خدوها يحللوها ..قال قصوا كل الحتت اللي فيها الدم و حللوها و دابت يا عيني و هما بيحللوها ..و النبي ايه ..ليه بيحللوها في ماية نار؟؟
لأو الأنكت الراجل بتاع المعمل قالك أصل انا مالقيناش بصمات عشان البيوت كانت من الطوب اللبن ...وهي أصلا بيوت أسمنت و باينه في الصور ...و بعدين ماااشي هاديك عقلي و امشي حافية ...مافيش باب ؟؟...مافيش شباك سرير الواد اتركن عليه و هو بيقول بسم الله الله أكبر و بيغز...اذا كان اللي بيتكلم مجنون فالمستمع عاقل
رغم ان القضية حتى بعد حكم البراءة ده لسه ماخلصتش ..بس بتوع الداخلية مش هيطلعوا نفسهم عيال يعني..و الواد ده هيشيلها هيشيلها
أما عن المصري ..حي أو ميت ..فالصراحه ...مالوش لازمة
لنا الله
37 comments:
زى مابيقولوا اللى مامتش من العبارة اومن انفلونزا الطيور او من سموم يوسف والى او من حوادث القطارات او او او من الخنقة , هيموت فى المستشفى
وكله تحديد للنسل وطرق ذكية لحل مشكلة الازمة السكانية
هو مش اللى يتظلم و يصبر ليه ثواب عند ربنا , يبقى كل ثانية عايشينها فى البلد دى بناخد عليها ثواب
ده المستشفيات الكبيرة فيها مصايب اكتر من كده مره اشتغلت في مستشفى تخصصي كبير المهم جت حاله في الطوارئ و حصلت مصيبه كلمو السويتش و قالو للبنت الجديده اللي في السويتش تقول كود بلو قامت البنت مافهمتش و اعدت تدور على الكود او الزرار الازرق الي حدوس عليه زي ما فهمت المهم لحقو المريض بس هي محدش لحقها غير جواب الرفد
و لسه ياما حنشوف
اللى يدخل مستشفيات مصر عيان يخرج ميت
الطب عندنا صفر علي الشمال والمستشفيات عبارة عن صفايح زبالة او مشاريع تعتمد علي النصب. بلوج جميل تحياتي
بجد انتى مالكيش حل موضع يجنن وجامد جدا لعلمك انا من متابعى حلقات المسلسلين دول وعارف الى انتى بتتكلمى فية دة وياما عشت ايام سودا فى المستشفيات المصرية لان بيتنا جنب المستشفى واى واحد معرفة او قريب او صاحب كان يلجأ لنا لما تبقى عندة ورطة وشوفى الذل الى بيشوفو المواطن المصرى فى المستشفيات الحكومية وما ادراك دكتور امتياز وتلاقية عامل مكتبة استراحة للممرضات واحتمال تلاقية بيتسنكح مع اى واحدة منهم فى اى جنينة او حتى الخرابية الى ورا المستشفى طيب الراجل عيان هاتو دكتور يقولو مافيش اديلو اسبرين او استنى لما الامتياز يجى او استنى للصبح الداكترة هايجو على طول والصبح دى على فكرة يعنى الساعة 10 وبيمشو 12 منهم نص ساعة مكالمات تليفونية من زباين العيادة على الموبايل ونص ساعة يصبخ على الممرضات والباقى يقرف العيانين وعلى وشة تكشيرة واحد بيعالج ناس قرفان منهم
دم اية الى انت جاية تقولى علية مافيش دكاترة اصلا علشان تكشف وبعدين انتى بتقولى افراد الاسعاف بيدو تقرير عن المريض قبل مايوصل طيب الزاى عم ابراهيم الى مابيعرفش يفك الخط ومعاه عم سيد ( على فكرة بيشغلو العربية بالنفر فى المناسبات والمواسم ) هايعرفو يقيسو ضغط ونبض وفصيلة دم هههههههههههههههه
نكتة حلوة انتى عارفة انهم اليومين دول مابيشلوش العيان اصلا بس يدو النقالة لأهله ويقولولهم احنا فى العربية هاتوة وتعالو . دة بفرض انهم سابو الشيشة وراحو اصلا بعد مالناس اتصلو بيهم وطبعا تحذير للمصريين لو عندك حد مريض وعايز اسعاف اتصل قبلها ب48 ساعة لان الطرق زحمة والعربية متأجرة لمرعى الطعمجى بينقل فيها الساندوتشات لأسوار المدارس خلال الموسم الدراسى دة غير حجر الشيشة انت وحظك لو فى اخرة ماشى لو لسة فى الاول يقولك استنى لما اسحب نفسين
طيب والله العيانين بيجوا يبيعوا الدوا بتاعهم لبابا فى الصيدليه وبيكونوا عاوزين ياخدوا المضاد الحيوى بالقرص
حاجة تفرس يعنى
بس برضه وكالعاده بوست تحفه
انا مصدقاكى يا سوسة
انا تابعت على الجزيرة برنامج وثائقى من ملفات الاف بى اى ..وجريمة بشعة فعلا..ومفيش مشتبه فيه..تعرفى؟ مخلوش ذرة تراب فى مسرح الجريمة الا وفصصوه..تعرفى وصلوا للمجرم من اية؟..من شعرة كانت على فوطة الوش وشعرة زيها بالضبط فى كيس المكنسة الكهربائية..فحصوا الشعرات لقوها بتحتوى على بيض قمل..اة واللة العظيم بيض قمل...حتى الخواجات مقملين مش احنا بس...فحصوا الدى ان اية بتاع الشعرات وبتاع بيضة القمل على اساس انه متغذى من دم صاحبه واخدوا عينات تحاليل من كل من كان حتى ماشى جنب البيت فى اليوم دة طلع صديق الاسرة الصدوق اللى استضافته واكرمته كام يوم..والبعيد اعترف وقر بالبلوة اللى عملها..شفتى وصلت لحد اية؟ شعرة فى فوطة الوش وزيها فى المكنسة الكهربائية...فى حادثة بنى مزار بقا لو كنتى شفتى الجرايد والصور وقتها ملابس الضحايا اللى كانوا لابسينها مرمية على ارضية الغرف محتاسة دم..طاقية الراجل الكبير اللى كان لابسها وقت ما اندبح ملقحة على الكنبة ولا حد قرب منها..وقال جايبين خبير جذم..ماهو دة اخرنا يعنى ولا مؤاخذة...اما المستشفيات بقا فحدث ولا حرج..انا نفسى حصلت لى حادثة شخصية والضحية اخد فيها كمان بعد ما رموه فى الاستقبال تلات ساعات يتصفى دمه ...علاج غلط..زود النزيف الداخلى وراح فيها اللة يرحمه...من وقتها وانا اخدت عهد على نفسى مادخلش مستشفى حكومى او خاص...مش خوف ..لاء..عشان ماطقش من الفرسة وانفجر فيهم فى الاخر
تحياتى
أنت بتقضى البريك بتاعك فى المشرحه
والله حاجه توجع القلب
يعنى الفساد وعدم المبالاه مشكله عامه
طيب الدكتور والممرضه ليه بيعملوا كده
طيب ممكن أحكيلك حكايه
بتقوللى لأ
هاحكى يعنى هاحكى
مره والدتى وهى ماشيه فى الشارع وقعت رجلها أتسكرت ف راحت المستشفى
المهم رجعت من الكليه لقيت كده
طيران على المشتشفى
روحت لقيتهم طالعه من العمليات
والممرضه بترمى شوز والدتى على وشها
وهى فى البنج المهم كلتها حتة علقه
وجابوا الأمن وأنا عملت فيها مهمه
وخلصت وبعد كده طلع أن لازم تروح للدكتور تانى لأنهم بوظوا رجلها
أحكيلك حكايه تانيه والنبى والنبى
خالى وهو فى المشتشفى كان بياخد أكسجين
أكتشفنا أنه ميت لأن الممرضه مهتمش تغير الأسطوانه وسبحان الله مات من الأهمال ومامتش من السرطان اللى منتشر
وعمال يقش فى عيلتنا
سوسه بنت خالتى والنبى لو حصلتلى حاجه
تبقوا أركنونى على جنب وبلاش مشتشفى
أأأأأأأأموه
أيوه شفتى أروى الطويل بتقول أيه
كده هى بلغت عن باباها
بيشترى دوا التأمين الصحى
ألووووووو وزارة الصحه
أنا أوسه وعندى بلاغ مهم
ألووووووووووووو
الدكتور الطويل بيشترى أدوية التأمين
أيه بتقولووو عادى وأنتى مالك
طيب الحق عليه
سوسه
الأغنية اللى انتى حطاها على البلوج جميييييييييلة اوى, كلماتها شدتنى بس مش كلها واضحه, لو عندك كلماتها يا ريت تبعتيها لى على الإيميل و يبقى كثر خيرك
شكرا
وأسفه تعليقى مش بخصوص البوست بتاعك
عارفه يا سوسه إيه المشكله
إن الكل مشترك في غلط الحاله الطبيهالمتدنيه اللي في مصر ... دي مشكله متقدريش ترميها على الحكومه
لا دي إنعدام إنسانيه من أصغر تمرجي لأكبر دكتور
حتى لو كانت الحكومه مبتدفعش حاجه للدكاتره
كفايه إن السنه اللي بيقضيها في المستشفى " التكليف أو النيابه" كفايه بس يتقي فيها الله و يوهبها لربنا و يحترم آدمية البني آدم اللي بين إيديه
لكن الكل بيكبر دماغه و يرمي الغلط على النظام
سوسة المفترية
الموضوع ده قاسى قوى بس مهم طبعا وهتلاقى حكايات الى مالا نهاية
وفى المشتشفيات الخاصة قبل الحكومة
هقولك على قصة عمو الله يرحمه
بعد حادثة عربية على الطريق السريع نقلوه هو واولاده على مستشفى القصر العينى القديم
وبعد حوالى 7 ساعات وصلنا ليه فى حجرة فيها حوالى 15 بنى ادم ما بين على الارض وعلى السراير وتحت السراير ويا حرام كان مش عارف يتنفس كويس علشان فى كسر فى الضلوع فجابو ليه انبوبة بوتجاز باين كده والخرطوم من غير ماسك وحطوه فى بقه على امل يشد نفسين يعنى
والرجل المكسورة حاطو حديدة كده اسمها توماس معرفش ايه دى لغاية لما يشوفو قالبين طوب وجبس لزوم المرمة
طبعا الشهامة اخدتنى ورحت نقلته بعربية اسعاف مجهزة بقى وعلى الفرنساوى عدل وادفع التأمين والمعاشات وغيره ونبتدى نعمل الاشعات والتحاليل بسرعة قبل اى حاجة والراجل عمال يوصينى الوصايا العشر ويضحك ويتكلم معانا ويدخل يعمل الاشعة من هنا وضلعه مكسور ونفسه مش مستريح واقلب واعدل وقوم ونام راح قلبه واقف فى ساعتها وفضل 24 يوم فى غيبوبة تامة وبعدها الله يرحمه
يعنى داخل بضلع ورجل مكسورة وخارج بتوقف فى كل وظائف الجسم
ومصحوبا بمصاريف تعدت الثلاثين الف جنيه
طبعا المسلسلات دى بتقتلنى لما بشوف الانسان بيتعامل هناك ازاى والشىء اللى عندنا ده بيتعامل ازاى
يا اطباء مصر اتقو الله فى اهل مصر
وحسبى الله ونعم الوكيل فى غياب الضمير الانسانى
تحياتى
سوسة انت فرستيني مسلسلات ايه بس انا هاحكي لك على واقعة شخصية اخر مسخرة وعمار يا وزارة الكحة انا من يجي ست سنين جاني الم في صدري مش فاهم له ولا مستحمله وكنت مش عارف لا اقعد ولا اقف ولا اتنفس المهم رحت مستشفى من الصغيرين اللي في الاحياء هما مجازا مستشفى لكن فالواقع عيادة بس فتحوها على الخرابة اللي وراهم الخلاصة جه الدكتور وقاس الضغط 240/130 اداني لاسيكيس لما هراني ومفيش فايدة واحدة ست بجلابية سودة قالت للي معايه ده لازم يروح معهد القلب وفعلا عملوا برايها وللاسف المعهد شاف الورقة (الريبورت) بتاعه المستشفى وقاسوا الضغط وعرفوا ان انا كده من اكتر من ساعتين ومفيش فايده الدكتور خد مراتي على جنب وعمل ابن حلال وكلمها بمنتهى السرية يا حاجة خدي جوزك البيت يموت هناك احسن لانه هنا هايدخلوه المشرحة ... (راجل محترم مش كده ) المهم انا مراتي موظفة في كلية الطب وعارف كل الاشكال الواطية دي قالت له طيب اديني تقرير وانا اروح به لمستشفى تاني المهم بنلف من 9.30بالليل لغاية 8.00 الصبح ونفاجأ ان انا من الساعة 9.30 دي وانا عندي جلطة في القلب ولا حدش كان عاوز يستلمني ولولا فضل الله كان زماني بااااااااي وريحتك من خلقتي وكتاباتي دي فانت بتتكلمي عن اشياء انما انا عاصرت هده الاشياء ولا عزاء للبني ادمين ام العيال بتقولك عاملة السويتش فصلوها طيب انا اعمل ايه في اللي شافوا بنتي 15 سنة(كارديك ارست )يعني توقف بالقلب وماتت وهما عاوزين يعملوا تحاليل للكالسيوم لنا الله نكدت عليكي صح اشوفك على خير سلام بقى لاحسن ضغطي علي قوي
كان الخليفة عمر بن عبد العزيز رضي الله عنه يقول "اذا صلح الرأس فلا بأس على الجسد" والعكس تماما هو الصحيح فالسمكة تفسد من رأسها ، فمادام رأس فاسدا عفنا عطنا فلا عجب ولا غرابة في ان تنهار كافة المؤسسات في كل المجالات :الصحة -التعليم-الثقافة-الفنون...الخ ونصيحتي لكم لا تحاربوا فروع الشجرة الفاسدة بل لنتعاون جميعا لنقطع جذرها
ملحوظة:معظم المسلسلات المشار بها الكثير من المبالغات الدرامية لذلك لا اتصور ان من الممكن الاعتماد عليها كصورة حقيقية للواقع الأمريكي
الداخل مفقود والخارج مولود
السطر الاخير هو التعليق المناسب علي البوست
ابتسمي عزيزتي انتي في مصر
حبيبة ألبي سوسة موضوعك جميل كالعادة... (هو بس محتاج يتسخن حبتين... هاهاهاهاها ... بهزرررررررررر!!!)
أحكيلك حكاية من واقع الحياة العملي
في يوم من الأيام من حوالي تلات شهور
جيراني اللي جنبي لقيتهم
بيخبطوا عليا الساعة أربعة الصبح!!
(ملحوظة أنا طبيب)
جري دخلت البيت عندهم
لقيت الأم على السرير غائبة عن الوعي
بتنهج وصوت نفسها عالي
والقلب كان بدأ يتوقف!!!
أثناء ما كانوا بيحكوا لي إيه اللي حصل
كنت بدأت أعمل لها تنفس صناعي
ومحاولة إنعاش القلب
(طبعا طلبوا الإسعاف قبل حتى ما يطلبوني)
الست كانت ما زالت حية
القلب بينبض خفيف
والنفس بيتاخد بصعوبة
مع إسعافاتي الأولية كان بيبدأ قلبها ينبض
ونفسها يمشي بصعوبة
حوالي ساعة إلا ربع من لما طلبوا الإسعاف
لم يأت الإسعاف!
ظللت أحاول أنعش القلب والتنفس
(كان الكلام دا أمام زوجها وبنتها وعائلتها وعائلتي)
وبعد مرور وقت طويل لم تصمد السيدة
تحشرج نفسها مرات ومرات
توقف القلب مرات
ولم تُجد محاولاتي لإسعافها نفعا
ماتت بعد أكثر من 45 دقيقة
من محاولاتي لإسعافها
أتى الإسعاف أخيرا
بعد أن كانت تلك السيدة (48 سنة) قد ماتت!!!
ماتت بين يدي
وكم هو مؤلم جدا فوق ما يتخيل بشر
أن ترى شخصا يموت بين يديك وأنت تعلم
(على الأقل علميا)
أنه من الممكن إنقاذه
لو فيه إمكانيات معينة
(طبعا الأعمار بيدي الله)
لكن فيه حاجة اسمها استهتار
وحاجة اسمها لا مبالاة
ودي ما لهاش علاقة بإن الأعمار في يد الله
نعم الأعمار بيد الله
ولكن هناك من يقتل ضد مشيئة الله
سواء قتل عمدا أو إهمالا
النتيجة واحدة
الموت!
في بلادنا النفس الإنسانية
(التي كرمها وحرمها الله)
رخيصة جدا!!!
أحكي لك حاجة أكثر إيلاما...
أيام ما كنت في الامتياز
(من ست سنين)
كنت في ليلة سهران
في الإي آر بتاعتنا في قصر العيني
اللي هي بالبلدي استقبال الطوارئ
(هنا بقى أنا مش في بيت وقاعد بالجلابية زي الحادثة اللي فاتت)
أنا في أكبر مستشفى في مصر
والمجهز بأحدث تجهيزات
المهم
أم جت الساعة اتنين بعيلها
اللي عنده تلات سنين على كتفها
الأم بتقول ابني وقع من على السرير
من نص ساعة
وعادي مكنش فيه حاجة
بس فجأة لقيته دروخ زي منتو شيفينه كدة
في الحال اتصلنا بالبيه بائب جراحة المخ والأعصاب
(يعني احنا مقصرناش في حاجة)
البيه كان نايم في السكن
خد بتاع ربع ساعة على ما صحي ورد على أمنا
خد ربع ساعة تاني على ما نزي يشوف أم العيل
طلب إشاعة مقطعية على مخ العيل
(عادي دا صح مش عيب)
المسافة بين الاستقبال وقسم الآشعة
(مستشفى قصر العيني دي شوارع)
مسافة تاخد ربع ساعة تاني مشي
وعلى ما الأستاذة نايبة الآشعة نزلت
(آدي عشر دقائق تاني)
وعلى ما جهزنا الولد للآشعة
(ملحوظة كنت أنا من صاحب الطفل وأمه في رحلتها من الاستقبال إلى الآشعة وما بعد ذلك)
اكتشفتا في النهاية إن عنده نزيف في المخ
وبالتالي محتاج عملية تربنة
عشان ننزل النزيف على وجه السرعة
(وخدين بالكوا!!)
(بعد أكثر من ساعة إلا ربع بنتكلم دلوقتي عن السرعة)
فجأة تحولت الحالة إلى حالة طوارئ
دلوقتي بس بقت طوارئ
(مش على ما العيل أثبت للجميع إنه بيموت بجد)
على ما نزلت بيه جري على قسم العمليات
فوجئت بيه دخل في كاردياك أريست
يعني القلب وقف!!!
كانت أول مرة أواجه الموقف دا في حياتي
الممرضة كانت في اللحظات دي بتحلق له راسه عشان عملية التربنة
وانا فوجئت بالقلب وقف
برضه تنفس صناعي وهو على الترولي
لحد ما دخلت بيه العمليات
في العمليات حولوه طبعا على الإي آر تاني
عشان نعمل له تنفس صناعي وإنعاش قلب (يدوي)
لك أن تتخيل حرقة الدم والأعصاب
أنا ومجموعة من زملائ ظللنا نتبادل
عمل التنفس الصناعي للولد
لمدة خمس ساعات
والواد كان بيستجيب
يتنفس شوية لوحده والقلب يشتغل
ولو وقفنا النفخ
(بكيس الهواء)
يقف القلب ويقف النفس
طبعا الحل كان في أن ينقل على طول لجهاز تنفس صناعي آلي
(بس مكنش فيه جهاز فاضي!!)
تخيل مجموعة أطباء مساكين بيتبادلو النفخ
بإيديهم في كيس الهوا المدعو أمبوباج
ولو حد فيهم تعب قلب الولد بيقف
في مرحلة من المراحل سلمت الأمبوباج لزميل لي
وخرجت إلى حديقة الاستقبال
وانفجرت في البكاء
حسيت بالعجز
الولد كان قمة في الجمال
شعر ناعم وعينين خضر
(ما زال قلبي بيوجعني كل ما افتكر القصة دي)
حسيت إننا كلنا مقصرين وكلنا قتلة!!
في النهاية مات الولد!!
والوساخة بقى لما البيه النايب بتاع المخ والأعصاب
ضغط على الأهل عشان يمضوا على إقرار أن الولد جه المستشفى ميت
وفهمهم أنه لو ما عملوش كدة مش هيستلموا جثة الولد إلا لما يتشرح
وانتوا مش عايزين بهدلة
صرخت في وسط زملائي الامتياز بلفظة مش كويسة
شعرت أني أريد أن أقطع هذا النايب باسناني
جميعنا سكتنا
جميعنا شاركنا
جميعنا طرمخنا
حتى أهل الولد
كفاية عليكم كدة
اما انا اعمل ايه ياسوسه اللى شوفت عمليه للقطه اللى كنت مربيها وخبطيتتها عربيه والاسعاف جت والدنيا اتقلبت عليا فى امستردام وكانوا عاوزين يلغولى الاقامه لولا ربنا ستر انا بقى مفروس على الطبيعه مش من المسلسلات ربنا يسبرنى
هي دي مصر يا عبلة
بما انك جبتي سيرت اي آر .. و حرقتي دمي لأني بعشق المسلسل ده و مع كده بطلت اتفجر عليه لأني كنت بشوفه على ام بي سي بليل و اصحى الصبح اروح المستشفى اعمل عكسه تماما مع العيانين .. فقررت اني لازم اختار واحد من الاتنين .. و طبعا الواقع هوه الاقرب .. فقررت مقاطعه البرنامج نهائيا ههههه
انا عارف المسلسلات اللي بتقولي عليها ديه...بس حكاية البصمات اللي علي قفا الواد ديه مش مصدقها...مش مصدقهم هم.....المسلسلات الجامدة بجد باه:friends,buffy...مش تقوليلي اس اس اس اي سيب وداني...والله انا مره كنت باتمشي في المنطيئة عندشنا ففي واحدة جالها جالطة....ربع ساعة بنكلم في الاسعاف وهم ميردوش....خالي اللي مات قريب ده...امي واختي كانوا بيزروه في العناية المركزة...قال ايه قالولهم مافيش الكيس بتاع الريجليين ادخلوا حافيين......اختي بتقولي لما دخلت لقت مية كده مطينة منظرها مقرف والدكتور داخل بجذمته
هم يبكي وهمي يضحكـ إحنا في الآخر هنصفصف على ألف وهما اللي ماسكين البلد علشان طبعاُ البلد مش تبوظ مشكورين على مجهوداتهم العظيييييييييمه لنا الله فعلاً انا عمري مادخلت مستشفى في مصر وربنا ما يحوجني
طب حاجه اوسخ بقه انتي عارفه بره في قسم مكافحة المتفجرات في روبوت صوغنن كده بحوالي 3 مليون جنيه و الحمدوا لله الشرطه المصرية اشترته بس ركناه و مبتستعملوش عارفه ليه؟؟؟؟؟؟؟؟؟؟؟؟؟
اصل المجند اللي عندنا لو راح علشان يفتح عبوه مشكوك فيها و انفجرت فيه فالوحدة كبيرها هتدفع 40,000 جنيه و بالتالي كانت النتيجه انهم بعد ماشتروا 3 روبوت من الصغنن ده و سافروا امريكا 3 شهور تدريب عليه بتكلفه عدت ال300,000 المشروع اتلغي و اصبح الروبوت ده بيستخدم بس لما يكون في عرض للجماعه الخواجات او للباشا الكبير الريس,,,ـ
احنا ضيعين ضيعين ضيعين
ازيك يا سوسه البلوج بتاعك حلو اوى
اقولك حكايه
انا صاحبتى فى طب علاج طبيعى وبتعيط فى اليوم بتاع التدريب بتاعها بتروح مستشفى اسمها تقريبا ام المصريين..خدتى بالك من الاسم
المهم
ليه بقه بتعيط
لان يا عينى العيانين اللى هى المفروض بتتدرب عليهم
يبقوا تحت رعايه دكتور ودكتور مساعد وبعدين متدرب زيها كده
المهم الدكتور بيبقي فى مكتيه بياكل ساليزو
والمساعد عامل فيه الشخصيه الهامه ومخلى المسؤليه على المتدربين الغلابه اللى هم فى سنه 2تانيه..انا مش فاهمه ايه الهبل ده
المهم
بتحكيلى مصايب بقه
دخلت مرة على عيانه وفى ادها البتاعه اللى مكتوب فيها الحاله على انها حاجه فى الكتف
فالبت بدئت تعملها مساج لكتفها
اذ تفوووجأان الست وهى بتدردش معاها كده حبتين
بتعانى من رقبها اساسا (يعنى التشخيص غلط)والست بتيجى من شهر كل يوم تحاول تفهمهم الا انهم حلفوا عليها وعلى رقبتها مهى متعالجه لا كتف يا تروح
البت صحبتى حاولت تفهم الناس
الدكتور المساعد قلها لو هتلكى كتير هتسقطى من الاخر كده البت اتكتمت والست بتيجى المستشفى بقالها 30 يوم ال ايه علشان الكشف بجنيه..كانت دفعتهم مرة واحده عند اى دكتور معفن..اكرملها والله
يلا بقه مش عايزة اقولك على الناس اللى بتموت فى معاهد السرطان علشان بس مش قادرة يا عينى تدفع عشان تتعالج
هو احنا ليه بقينا كده
والله دى حاجه صعبه
البلد دي ربنا يصبرنا عليها ويسترها معانا ومتيحوجناش لمستشفياتها يارب
نسيت عاوزة اسالك عملتي التطورات اللي عندك دي ازاي ياعم ياعم مدونتك بقت قصر ماشاء الله ولا قوة الا بالله
انا عايز ايميلك يا رفيقه سوسه
اجيب ايميلك منين
اقولك لو مش عايزه تكتبيه على البلوج ابعتيهولي على ايميلي اوكي
blog_masrena@hotmail.com
قلبتي عليا المواجع..أنا لولا باشتغل بعيد عن الحاجات دي شوية كنت قعدت في بيتنا و ما رحتش الشغل أبدا
بحب مصر
تعددت الأسباب و الموت في مصر واحدّ
أم العيال
الكدب خيبه هو ايه البو كود ده ..بس مادام كانت المفروض تعرفه و ماعرفتوش يبقى العيب ع اللي مدربها و اللي معينها و المفروض هما كمان يتحاسبوا مش بس الصغيره اللي يضحوا بيها
islam yousef
عشان كده احسنله مايخشش
أهلا بيك
فانتوماس
كل حاجه للأسف صندوق زباله لن المصري شايف نفسه زباله و مايستاهلش
منور المدونة
مصري مغترب
و الله انت عسل و دايما رافع معنوياتي ..أنا نفسي تعمل بلوج بجد بتكتب حلو جدا
العيان اللي أهله بيشيلوه للإسعاف دي عسل .. و اللي بيوصل السندوتشات للمدارس ده
ههههههههههه
مسخره
أروى الطويل
طب ما هو باباكي لازم يبيع المضاد الحيوي بالقرص دي حاجه مقدسه في مصر..داهما فاضلهم شوية و ياخدوا دوا الكحه بالبق
فضحتي بابا علر رأي أووسه
شهروزة
تصدقي آه ..أنا كمان شفت الحلقه بتاع القمل دي ..و الله حاجه تكسف المفروض على الأقل نبقى رواد في موضوع القمل ده
ربنا ما يرقدلك جته في مستشفى يارب
أوسه بروسلي
ايه يا بنتي الجمال ده ..ضربتي البت علقه ..لا و الله الواحد مايخافش طالما يعرفك ..ورانا رجاله
مش هاوديكي مستشفى ماتقلقيش.هاوديكي مارينا..يا شيخه هي دي اللي تطول العمر
أوسه بدران
طب داري على البنت وباباها..صاحبتنا برضه
jannah
و حياتك انت انا برضه عارفه كلامها بالشبه و مش واثقه ميه ميه انها صح!!!
farida
تمام يا فريده ..أصلا لو كل واحد حس ان الراجل أو الست دي هتتعلق في رقبته يوم القيامه ..ماكانوش عملوا كده
tota
معلش يا توتا ..بس الموضوع فارسني ونفسي من زمان أتكلم فيه ..سوري قلبت عليكوا المواجع
المزاجانجي
سوري اني فكرتك بالذكريات دي ..بس والله لازم حاجه تتعمل و الناس تعترض و ياريت لو كل واحد يحصل معاه حاجه زي دي يرفع قضيه ع الدكتور و المستشفى ..10-12
قضية و الكل هايعرف ان الله حق
alzaher
تمام ..بس على الأقل أرواح الناس أولى من أي شئ باتقاء الله فيها
إبـ راهـيـم
تمام ..المستشفى اللي انت فيها جايز آدمية شوية ..بس الحكومية..مجزرة و مزبله
أحمد المصري
ربنا ما يحوجنا ليهم
محمد مفيد
مانا مبتسمه على طول حتى شوف:(((
reformer1976
حكايت الولد دي أثرت فيا جدا و خصوصا وصفك لأد ايه انك اتأثرت و عيطت عليه من اليأس
بس ياريت لما تبقى دكتور كبير شويه ماتبقاش زي الدكاتره اللي انت بتحكي عليهم دول ..ماتنساش الرحمه
عمر
يا عيين و القطة اتعورت..و لسه سايبينك ..لأ مالهمش حق..افرسني كمان أصلي ناقصه...ربنا يصبرك
ademelmasry
ماشي يا عنتر
zangoolaaa
هو انت منهم ..يا كابتشن اتعلم من إي آر ..يمكن تغير حاجه
3rby
و الله يا اخي عنك حق ..ما هو الواحد لو مشاها
buffy& friends
ماكانش اتفرس
batresya
ربنا ما يحوجك ياااارب
backbone
امال عايزهم يبوظوا الروبوت يا كابتن ..أما انت غريب قوي
انت مش عارف انه عهده؟؟
sara
منورة يا سارة
يا بنتي اكيد الكتف موصل ع الرقبه ...بس أكيد صاحبتك مش واخده بالها
showbash
أهم حاجه ان الفسفوسة راحت ..الباقي آثارجانبية..أو آثار الحكيم اللي تحسبه
sahar
يا رب مايحوجك ليهم و لا حد من ناحيتك يااارب
اللي يعجبك في المدونه اضغطي عليه هايوديكي لموقعه اعملي ريجيستريشان و اعملي منه في بلوجك
wanna b a bride
يا بنتي خليكي انت في الجواز ..بلاش المواضيع الحزايني دي يا عسل
شر المستشفيات في مصر ما يضحك .. والمستشفى في مصر خاصة مستشفيات القطاع العام أماكن مسلية ، ويعمل على جعل الأجواء أكثر تسلية وإثارة صغار العمال والموظفين من عين (خلي البلد تاكل) .. والذي حول السكوت على تصرفاتهم المستشفيات إلى إحدى رموز الفوضى في مصر..
أما عن إي آر فهو "دراما عمل" .. بمعنى أنها تدور حول العمل وعلاقاته كمحور للأحداث مستغلاً مشاهد الحياة اليومية لإلقاء الضوء على معالم الشخصيات .. سمعت إنه "حيتضرب" يعني حيتقلد في مصر من إخراج شريف عرفة وبطولة يسرا .. واختير له اسم مبدئي "اللحظات الحرجة".. ربنا يستر..
أما موضوع بني مزار فمن أوله لآخره مسلسل عك .. وضعف في إجراءات الضبط وجمع الأدلة يؤكد إن الواسطة وصلت لمدى مرعب داخل هذا الجهاز الحساس .. وإذا كان دة الوضع في الصعيد غير السعيد فكيف الحال في قاهرة المعز حيث المكاتب المكيفة والدلع كله؟
بالزبط زي الحالة عندنا في غزة ..
تلاقي المريض عندنا يدخل مستشفى الشفا عندو نزلة برد يخرج منها الشهيد البطل .. وهو كلو رايح على الجنة ..
وياريت على الاهمال والتسيب وبس .. لأ ده في حاجات اجمد يا بنتي .. تلاقي الجنازة الي طالعة من المستشفى بيطلقو فيها رصاص في الهوا .. بيزفوه للحور العين بقى .. ومش مشكلة بقى لو وقع واحد ولا اتنين مجاريح ولا عجزة.. ولا حتى "شهيد بطل" تاني ..
خليها على الله
I have a serious question, why our hospitals are like that? I never had a good answer myself despite the fact that I worked as a physician in Egypt for a few years then I had to escape every day's pain by coming to work here in the states.
Hatem Elgabaly was a very good radiologist, how is he doing as a health secretary?
ER is nothing compared to what really happens in the ER,especially advanced trauma center, I have witnessed cases that survived with stab wound to the heart.
Let us know what's going on in Egyptian hospitals.
Moe-New York
Post a Comment