Sunday, May 06, 2007

مفروسة منك

من يومين تلاتة أصدرت مجلة التايم الأمريكية لائحة بأسمامي 100 شخص في كل المجالات أثروا على العالم السنة اللي فاتت ..تضمنت اللائحة بعض المفاجآت من أهمها عدم وجود اسم جورج بوش من ضمن لائحة المؤثرين في الناس..بمعنى تاني انه مالوش لازمة ولا فارق مع حد


المفاجأة بالنسبة لي كانت في الأسماء العربية القليلة اللي كانت موجودة في اللائحة
الملك عبدالله ملك السعودية
شيخ المجاهدين أو الإرهابيين -حسب وجهة نظر اللي بيقرا-أسامة بن لادن
و عمرو خالد


توقفت شوية عند اللي كاتبينه عن عمرو خالد في المقالة اللي بتشرح ليه اختاروه
وصفوه بأن شهرته بين شباب الوطن العربي تماثل شهرة نجوم الروك اند رول..و ان أسلوبه الجديد في الدعوة من الأسباب اللي جذبت ناحيته الشباب بالإضافة لأناقته و بدلاته الليكلها من ماركات عالمية و قمصانه اللي كلها ماركة هوجو بوس(كان فاضل شوية و يجيبوا ماركة الـ.. زي ما عملوا مع صدام)..و قالوا ان الناس بتقتنع بكلامه بشكل كبير خصوصا الشباب اللي بيتابعوا برامجه و موقعة الإلمتروني بشغف و اقتناع


سألت نفسي سؤال واحد..هو فين عمرو خالد دلوقت؟


أنا عارفه انه موجود و لسه بيقدم برامجه و لسه بيكتب في الموقع بتاعه على النت
لكن انا ماباقتش حاسه بوجوده زي زمان
مانكرش انه أثر في حياة شباب كتير و منهم أنا و ربنا ان شاء الله يجازيه على كده..لكن تصرفاته في السنتين الآخرانيين دول حيرتني جدا
يعني بعد كل الحماس اللي كان بيبثه في الشباب ..مشروع ضد التدخين و الملابس القديمة و محو أمية الكومبيوتر و غيرها ..مشاريع كانت جذابه جدا في أولها و لقت صدى كبير جدا عند كل الشباب لكن ...و بعدين


حسيت ان عمرو مع بداية كل مشروع من دول كان كأنه يقوم بحملة دعاية ضخمة لمسحوق غسيل ..بس مايهموش كتير الناس هتنبسط بيه والا لأ..و لا يهمه ان الناس تستمر في استعماله والا لأ..كل المهم ان الناس تعرف انه بيعلن عن المنتج ده أو المشروع ده ..و بكده يبقى عمل اللي عليه


مش عايزة أحكيلكوا كمية الحماس اللي كانت موجودة مع كل مشروع ..و الشباب اللي كانوا من قديم الأزل بيدوروا على قدوة او مثل اعى أو شخصية قيادية يمشوا وراها لقوا أخيرا في عمرو خالد غايتهم و لو كان في لحظة قاللهم ارموا نفسكوا في النار كانوا عملوها ..فجأة لقوا نفسهم واقفين في نص الطريق و فجاة بيدوروا عليه مالقهوش..ناس كتير جالها احباط و اللي كان بدأ يتحسن رجع أسوأ من الأول بمراحل و رجعوا تاني يدوروا على حد تاني يمشوا وراه



الصدمة الكبيرة اللي جاتلي انا و جت لناس كتير مؤخرا..هي اختياره للأخ المواطن الشريف المجاهد"تامر حسني" لأداء تتر برنامجه الجديد...قمة التناقض اللي ربنا خلقه في الدنيا
يعني انت بقالك سنين منومنا مغناطسيا انا كل همي صلاح الأمة أنا كل اللي هاممني نهضة بلادنا و يوم ماتنقي حد يغني مقدمة برنامجك تنقي البيه ننوس عين امه اللي هرب من خدمة الوطن و نصرة البلد اللي بتقول عليها بقالك سنين..فين القدوة و فين المثل اللي بتقدمهولنا بتقديم واحد هرب من شرف خدمة الوطن لأ و كمان زور شهادة و اتنين عشان ينفد بجلده من كام شهر في الجيش مش حتى حرب والا حاجة


اذا كان رهان عمرو خالد كان على اجتذاب جمهور الننوس الأمور الفافي ..فاعتقد انه خسر الرهان..مش بس خسر جمهور تامر لكن كمان خسر الكتير من محبيه اللي اتصدموا بقرار عمرو الإنضمام لشلة الطبالين الشعبية المساندين لتامر كفته



و مهما كانت مبرراته ..فالعاية لا تبرر الوسيلة


أستاذ عمرو..مفروسة منك

68 comments:

Anonymous said...

قال عمرو خالد قال
صح النوم يا عمرو

الرجاء زيارة الرابط التالي
http://www.sunna.info/books/amr_khaled.php

Mada said...

مع أحترامي لكل اللي قلتيه ومع اقتناعي التام بوجهه نظر البعض في بعض تصرفات عمرو خالد وخاصه الاخيره وان كنت ارى في كلامك بعض التحامل
أه عمرو خالد مفروض انه قدوى وانه تحت المكرسيكوب ولكن هو كمان بشر والناس اللي شجعها مفروض انها تكمل من بعده مش معنى انه هو غير اتجاهاته او افكاره اننا نبطل نقتنع بفكره صح هو قالها
واسف للتطويل
شكرا

فارس عبدالفتاح said...

الاساس فى الاسلام وعلى كل مسلم الزهد فى الدنيا والطمع فى الاخرة والتفقه فى الدين والتخلاق بالاخلاق الحسنة التى شرعها الاسلام


هذا اساس الاسلام وجوهره

وان تطلب العلم من العلماء وليس من الدعاة ،،،،،

محمد عبد الغفار said...

افرغ ما فى جعبته واكتفى

Anonymous said...

http://injis.wordpress.com/2007/05/06/the-thinking-blogger-award/

Anonymous said...

بداية أنا مش من محبي متابعة عمرو خالد , مش ضده لكن مش متابعاه و مش مقتنع بالنسبة لي

الأهم اني ماباطقش المدعو تامر حسني من قبل موضوع التزوير , و احتقرته بعد فضيحة التزوير و التهرب من الخدمة العسكرية

بصفة عامة موافقة على كل كلامك باستثناء كلامك عن التناقض في غناء تامر لتتر "دعوة للتعايش" (أنا ماشفتش البرنامج ولا سمعت التتر لغاية دلوقتي) لأني بصراحة شفت في الحركة دي نوع من التعايش فعلا , اتنين مقفترض متناقضين و بيشتغلوا مع بعض

الأهم اني من زمان نفسي اتكلم عن التعامل مع المدانين جنائيا بعد تنفيذهم للأحكام , و رأيي ان مفترض اننا نتعامل معاهم كأن شيئا لم يكن , و عشان كدا شايفة في الحركة دي تعايش حقيقي من أكثر من زاوية

و بردو ماباطقش تامر حسني

Amr Ahmed said...

اولا لازم تغيري اخر جملة

انتي سايباها عمرو كده

حددي عمرو مين

هههههههه

هي يمكن نقطة مش في صالح عمرو خالد
انه مش بيكمل مشروعاته

بس هو المفروض ميعملش كل حاجة بنفسه

ده فرد

ايه خلاص جه الوقت اللي بنعتمد فيه علي فرد

امال احنا فين

اما بقي الزفت تامر حسني

فده بقي ظاهرة

ده جنن البنات والشباب برضو
بس البنات اكتر

البنت كانت بتدافع عنه والله لو كنت شتمت ابوها مكنتش انفعلت كده
وانتي عارفة اني مفروس زيك

كان هيجلي القلب ساعتها
كفاية عليا ان المدونين مبيحبهوش
تحياتي
وربنا يخليلك الفرسة

Anonymous said...

السلام عليكم
اسلوب مثير متميز كعادتك سوسو

وبالنسبخ للمجله فالجميل ان لسه في عرب بيعتبروا من اكثر 100 شخص تاثيرا

نيجي بقي لاستاذ عمرو خالد
واللي كلنا عارفين ان شكله واستايله كانوا ليهم تاثير كبير في انتشاره ودي مش حاجه جديده

اما عن المشروعات
فهو كان بيفتح طريق للافكار علشان الفكره تنتشر ويبقي لها قبول والناس هي اللي تكمل وكل واحد وصبره واقتناعه للفكره مفيش حد بيشرب حد الدين بالمعلقه كل واحد وصدق نيته كل واحد واحساسه بالفكره
حتي الرسول ادنا المنهج والصحابه والتابعين هما اللي كملوا وفي ناس من الصحابه مشفتش الرسول


اما اختياره لتامر حسني علشان يعمل التتر
فانا شيفاها حاجه تضفله مش تاخد منه
الاغنيه كلماتها هادفه يعنيها تامر / ابو خاطر مش مشكله
لكن تامر هنا هيضيف اكتر... ليه؟؟؟
لانه خارج من السجن وخلاص نفذ العقوبه فالمفروض من المجتمع انه يتقبله
ودي سنه الرسول لما ساله عمر اتصلي عليها وهي زانيه
قال صلي الله عليه وسلم لقد تابت توبه لو وزعت علي البلده لكفتها
ومحدش يقولي مين قالك انه تاب لان الله اعلم بالسرائر
ودا التعايش اننا نستخدم الفن الهادف لصالح الدين
واننا ندي مثال حي للتعايش بين اتنين مختلفين جمعناهم بحلقه وصل

Anonymous said...

ايه بس يا سوسة..محسساني ان تامر حسني بقي جاسوس....ايه يا جماعة ...كل الشباب دلوقتي اللي بياخد تأجيل من الجيش بيفرح مش كده واللا ايه؟؟؟؟انا طبعا ضد التزوير بس مش كل واحد غلط غلطة يبقي ندبحه........انا علي فكرة مش بسمع اغاني بس تامر ده مسلم مصري مش جاسوس ولا باع وطنه يعني

بالنسبة للمشاريع فهناك مئات العراقيل فمش عايزين يكون حكمنا من بعيد كده وبرنامج التعايش الجديد دا ممتاز وانا واسرتي مش بنتجمع الا مع البرنامج ده

عمرو خالد مش ملاك بس اهو واحد بيحاول يعمل حاجة.........احنا نسأل نفسنا بقي احنا بنعمل ايه

خطــاب said...

و الله موضوع تامر حسنى ضايقنى جدا

بس فكرت كدة شوية

و ان شاء الله هكتب رأيى بشكل مفصل لاحقا فى مدونتى

soreal said...

ya sub7an allah! I just finished seeing this when I started reading ur blog.


I think amr khaled madlom men nas keteerah ...
fe ra2ye.. howa mojtahed fe zaman qala feeh almojtahedon. wa elmojtahed qad yoseeb wa qad yo'7te2

rebena yejazeeh we yjazeena 3la 2ad nawayana.

Islamist Bloke said...

يسلم فمك

بجد انا بقالى شهر اقول فين سوسة ومش بتكتب لية بس عارف انك يوم ما بتكتبي بتنزلى بحاجة جامدة

الله عليكي يا سوسة

والله احنا كنا لسة فاتحين الحوار ده عند اميرة البلطجية والحوار مبيخلصش وفيه ناس تحبه وناس تقول لا ده كخة بس انتى كدة تمام اوى اوى....انتى قلتى الخلاصة....من واحدة لا بتحبه ولا بتكرهه بل بالعكس محايدة تماما وكانت بتتبعه قبل كدة ودلوئتى شافت الحقيقة

واحب كمان اوى اوى اشكر الاخ فى اول تعليق اللى كتب عنوان الصفحة دي

شكرا جزيلا اخى وجزاكم الله خيرا

والسلام

Islamist Bloke said...

بالنسبة للموقع اللى الاخ فى اول تعليق اورده

مش شايف ان الموقع ده او الردود دي شديدة شوية؟

يعني انا افهم طبعا غيرة علماء الحديث على الامر وان الحرف فى علم الحديث بيفرق....وعارفين يا عم ان الزبون جاهل شوية بس مش على كل حرف هقف له....كدة يا اخواننا الناس تقول تلكيك....طيب ما الشيخ عمر عبد الكافى-نفس جماعة الاخوان المسلمين اللى ينتمى ليها عمرو-برضة كان بيغلط فى الاحاديث شوية وربنا يغفر لنا اننا جبنا سيرته هنا كدة بس الفكرة اشمعنا ما عملناش كدة بالشكل ده معاه

مش عايزين حد يقول الاخوة بيتلككوا وبيتشددوا وكدة

ربنا يهدينا ويهديكم

امين

t3ban said...

طب ليه ميكنش يأس من الأصلاح
أو وصل للي عايزه من وجهه نظره
أو أتضعط عليييييييييييييييييه

وجع دماغ said...

أعتقد اننا جميعا نحمل تقديرا ×اصا فى قلوبنا للأستاذ عمرو خالد
ولكن عمرو خالد كما تعلمنا منه ليس فوق مستوى الأنتقاد فهو بشر يخطىء ويصيب
وملحوظاتك عليه نشعر بها جميعا وهذا لا يعنى أنه تحول بين يوم وليلة الى شيطان رجيم
ولكن لكل جواد كبوه وأتمنى أن يصل صوتنا اليه

Anonymous said...

شيخ واتلم علي صبي عالمه
بدون ان نظلم احد
ماهي النتيجه المرجوة من ذلك؟
والله مش بعيد ممكن يجيب لنا رقاصة علشان الوسط يبقي اكتمل

FTM said...

بصى , هو عشان نكون عقلانيين حتى فى انفعالاتنا لازم لما يحصل موقف مش مبلوع من حد عمل حاجات حلوة كتير اننا نقف عند الموقف او التصرف دة

انا معاكى مية فى المية فى احساسك و انا كل اما اشوف الموضوغ دة فى مدونة باعلق علية , انا ارفض موقف عمرو من تامر حسنى و عقلى يرفض اى تبريرات يصوغها أى احد لمحاولة تبرير الموقف و لكن...

لا يعنى ذلك ان عمرو خالد انقلب شخص مرفوض مية فى المية هو بس لنا تحفظات على تصرفات منة كحال كل البشر و يظل لة أعمالة الصالحة التى حبب بها الملايين فى الدين و يكفى اسلوبة الممتع الذى لا ابالغ ان قلت انة اهم انجازاتة انة عمل نقلة فى اسلوب الخطاب الدينى و ارفض ما يطلوقونة علية من موضة و ما شابة ذلك
فهو انسان قدم للمجتمع قيمة لم يقدمها اولي الأمر

و لنتذكر ايضا فى حكمنا و رؤيتنا الهادئة للموقف انة لة كارهين و أعداء ينتظروا ان يقع عشان تكتر سكاكينة و مش لازم ننجرف لاتجاة بدون تفكر


يعنى اللى باقولة مجرد تعقل فى الفكر و إعمال العقل و اولا و اخيرا اى انسان شيخ او صاحب دعوة هو معرض للخطأ و الإسلام لا يمثلة أفراد

و شكرا لأسلوبك الجميل فى عرض الموضوع
تحياتى لكى

تامر أبوعرب said...

بصي ياسوسة أنا مش من متابعي عمرو خالد لكنه بالفعل له تأثير سحري علي طبقة معينة وكانت مهمشة دينيا فيما سبق وهي طبقة الأثرياء والفنانين الذين لم يكن لهم أي صلة بالدين ولايعلمون شيئا عن أحكامه فاحتواهم عمرو خالد واستطاع التأثير فيهم وشيئا فشيئا حبا كثير منهم نحو التدين لأنه حدثهم بما يفهموا وبسط لهم الدين ليعلموا وظهر عليهم بمظهر شيك كما ألفوا لذا أري أن خالد يستحق أن يكون من أكثر الشخصيات تأثيرا

Unknown said...

عمرو خالد مش هدفة المباشر انه يدعو الناس لإنهم يكونوا مسلملين متدينيين لأقصى حد

ولا قصده انه يعمل مشاريع ويخلي الناس تكمل فيها للآخر

عمرو في رأيي كان مهتم بإيقاظ الناس من سباتهم
ماشي في نفس السكة بتاعه التنمية البشرية واستخدام الطاقة الكامنة اللي جوه الانسان
حتحسي في كلامه تأثير مشابه لكلام د. إبراهيم الفقي.. ماعدا طبعا ان ابراهيم الفقي مش بياخد الطابع والحافز الديني قوي

عمرو خالد عايز يوري الشباب انهم يقدروا يعملوا حاجة.. واداهم تجربة في المشاريع اللي اتعملت.. ماكملش... طبيعي لأن ده مش هدفه من الاساس..

ولو كل واحد عمل مستنى قيادة عمرو خالد عشان يعمل حاجة.. فعمرو حينظم ايه ولا ايه..

انا مش متابعين عمرو خالد.. لكن مش ضده
ماعجبنيش تأثيره على الناس اللي حسيته زيادة عن اللزوم.. كأن فيه تنويم مغناطيسي.. بس هو راجل بتاع NLP متمرس
ومش عيب انه يستخدم ده..

المشكله ان الناس بدل ماتصحى وتفوق بمساعدة.. سلمت نفسها لسه وخلاص.. مش كل الناس طبعا.. بس كتير
اللي يوقف مشروع عمله وبذل فيه مجهود لمجرد ان عمرو خالد مابقاش فاضي يتابع المشروع ده.. دع فعلا انسان سلبي كان مسلم دقنه لعمرو وخلاص..
ودي مش غلطه عمرو... أو يمكن عمرو تقل العيار حبتين في الاقناع

عمرو مش حيعيش ولا حيفضل بشهرته وتأثيره للأبد.. هو كان عايز يصحي الناس.. ومش حيفضل يصحي فيهم عشرين سنة.. الا لو كان كل شوية حيجيب طريقة جديدة يصحي بيها

انا مش من معجبينه.. بس احترمك يا عمرو..

شهيدة said...

سوسة

انا بجد معاك في كل اللي قلتيه

انا كنت بشوف برنامج عمرو خالد "صناع الحياة" وحاولت أتابعو كتير وكمان مليت استمارة البطالة

لو لسة حد فاكر هي بقت فين

لكن لقيت ان كل حاجة كانت كلام وبس مش أكتر

على كل حال
العمل لاصالح النابع من قلب صافي ونية صادقة بيستمر وبيكمل وبيبقى صداه وتأثيرو لكل السنين
هو ده المقياس اللي لازم نفكر فيه

تحياتي على موضوعك

Anonymous said...

انا كمان انصدمت

لاني مالاقيتش اسمي مكتوووب

مش دا حرام ؟

ذو النون المصري said...

انا ايضا لا اتابع الدين و علومه من خلال الاشرطه لاني لا احب البقاء ساكنا منتظرا ما يجود به مولانا ايا كان فانا احب اكثر القراءه و منها احصل علي ما اريد
بالنسبه لعمرو خالد فانا سمعت عنه كتير جدا من الناس قبل ما اتابعه شخصيا و تابعته فقط في برنامجه الاشهر صناع الحياه و اعجبني جدا جدا و اعجبتني الافكار المتميزه التي قدمها في البرنامج من مثل زراعة اسطح المنازل
لكن لا نعرف اين هذه المشروعات الان؟
كان من الواجب ان يوظف عمرو خالد امكلنياته و طاقاته في مشروع واحد حتي يؤتي ثماره بدلا من اللعب في كل ميدان ثم في النهايه بلا محصول
او بمحصول ضعيف
لو كان ركز جهوده في مدينه واحده فقط و زرع اسطح منازلها لكان من الانجازات الدعويه الهائله التي كانت ستحسب له
لكن اري انه اهمل جهوده في منتصف الطريق

BaTresYa said...

أممم ... مش عارفه يا سوسه بس بصراحة مش معاكي ...لأن أي برنامج أولا المذيع أو المقدم ملوش اي علاقه باي حاجه غير بالكلام اللي هيقوله ...وثانيا ..مش ممكن يكن عمر خالد شاف مين اكتر مغني الشباب بتحبه علشان كدا خلاه يغني التتر دا في حال أنه هو اللي اختار اللي بيغني ..و أخر حاجه بقى أن مش مشكله مين إللي بيعرض الحاجه بقدر مهو بيأثر في الناس ... يعني أنتي مثلا لما تقرأي كتاب بتتعلمي منه حاجات كتير جديد صحيحة .. هتتغير المعلومات اللي فيه لو عرفتي انه اللي كاتبه ناقله من مكان تاني مثلا ..والله أعلم بالنيات...وعلى فكره انا مش بحب تامر سواء قبل ما يتسجن او بعد ما اتسجن

zenzana said...

يااااااه
هو احنا لسه في مجلات عالمية بتفتكرنا؟

بس مش ملاحظة ان موضوع تامر حسني وعمرو خالد دا قديم

http://shahzad12.blogspot.com/2007/03/blog-post.html#comments

soosa el-mafroosa said...

anonymousa

اللينك اللي انت حاطه فيه حاجات صعبه قوي

الحقيقة للأسف ماعنديش الخلفية الفقهية اللي تخليني أحكم على الكلام المكتوب

soosa el-mafroosa said...

mada

اذا كنا هنعتمد على موضوع المفروض ده ..يبقى مش هنوصل لحاجة

الشباب المصري نتاج سياسة طويلة من الأنامالية المطبقة بمنتهى الحماس من الأهل و المدرسة و الدولة عشان كده كان لازم عمرو خالد يدرك-اذا كان فعلا ما أدركش- ان الشباب ده عايو متابعة و صعب جدا انهم يكملوا منهم لنفسهم

soosa el-mafroosa said...

فارس عبد الفتاح

صحيح طلب العلم من العلماء فقط

بس أوقات بيبقى فيه شخصيا ربنا بيرزقها القدرة على التأثير في الناس و جذبهم ناحية طريق الصواب

بس لازم الناس دي تتحمل مسؤليتها و تقوم بها على اكمل وجه و الا يبقوا ضيعوا الهبة اللي ربنا وهبهالهم

soosa el-mafroosa said...

mohamed a.ghaffar

خير الكلام

ممكن قوي يكون عندك حق
بس انا متهيأليان أضواء الشهرة خرجته عن طريقه و الشهرة ليها سحرها
ياإما يقدر يقاوم و يرجع يا إما يستمر زي ماهو

soosa el-mafroosa said...

juka

شكرا جدا جدا جدا ليك على الترشيح بتاعك
من كتر ما عالم البلوجر بيكبر كل يوم و كل يوم بيظهر مدونات جديدة

فالواحد بيبقى سعيد جدا ان مدونته ليها تأثير و اللي فيها بيوصل لناس كتير رغم كتر عدد المدونات

شكرا ليك و للوصف الجميل للمدونة

و ان شاء الله أكتب بوست قريب و أمرر التاج

soosa el-mafroosa said...

bluerose

سعيدة جدا لمشاركتك ليا في كره تامر حسني

بس مش عارفه مش مقتنعة قوي بموضوع التعايش مع المدانين أمثاله

لنه اولا لا إعتذر و لا ندم و بعدين الدنيا كلها فاتحاها تعايش معاه ع الرابع مش ناقصه عمرو خالد كمان

soosa el-mafroosa said...

بالله المستعان

على فكرة انتي من الناس القليلة

لأ - انتي الوحيدة- اللي لسه بتدلعيني

موضوع العرب المؤثرين

ما هم العرب بقوا مسلط عيهم الأضواء-الى حد ما- بعد 11 سبتمبر و حرب العراق و القصص دي

و بعدين هما بيختاروا العرب اللي بيأثروا في العرب

و مافيش سياسيين عشان كلهم كذابين

بالنسة للمشروعات

اللي بدأ طريق يكمله و يشرف عليه ولا ما يبدأوش من الأول

يعني مثلا قال لموا الهدوم القديمة و انا هاعملها معارض

و ماكملش

هاوديها دارفور

و ماحصلش

و قيسي على كده حاجات كتير


أما عن تموره

فو الله هو مش ناقص تعايش..ده الناس معيشينه ع الآاااااااخر و مش ناقصه حاجة أبببببدا

koukawy said...

انا اكتر حاجه فقعتني لما عمل اعلان للشيخ صالح ان سرقة الوصله حرام و انهم لازم يشتركوا في ال art

soosa el-mafroosa said...

مصراوي

تامر صحيح مش جاسوس بس احنا لو في وقت حرب كان اتضرب بالرصاص

بس بغض النظر..احنا اتعودنا ان كل حاجة في برامج عمرو خالد بتبقى لهدف و انا الصراحة مش فاهمة ايه هدف غناء تامر حسنيو هو لسه طالع فريش من السجن و نمره 1 في الغنا في الأفراح و خلافه

همرو بيحاول يعمل حاجة...تمام ماقلتش حاجة..بس لما واحد يطلع من أهم 100 شخصية مؤثرة في العالم يبقى متهيألي لازم يحاول اكتر من كده

soosa el-mafroosa said...

خطاب

و احنا في الإنتظار

soosa el-mafroosa said...

soreal

شكرا على اللينك

و عمرو مش مطلوب منه انه يعمل حاجات مستحيلة

بس كل المطلوب انه يتابع الي هو بدأه

soosa el-mafroosa said...

islamist bloke

ماهو لازم يبقى فيه حاجة تتقال-بمعنى أصح تفرس- عشان ينفع تتكتب

و بجد انا كنت زمان اللي يقول كلمه عليه أعوره

بس دلوقتي اكتشفت فيه شوية متناقضات

ماتنفيش اجتهاد الرجل..بس تنزله من المنزلة اللي كنت حاطاه فيها

تحياتي

soosa el-mafroosa said...

t3ban

يأس دي صعبه و الا كان قعد في بيتهم بأه

وصل للي هو عايزة..ده عذر أقبح من ذنب و هو كان وصل لإيه؟

اضغط علييه؟..دلوقتي ؟..بعد مارجع مصر ..يمكن ده كان الشرط؟؟؟؟؟

جايز

soosa el-mafroosa said...

وجع دماغ

صحيح كلامي لا يعني اني أقول ان الراجل تحول من ملاك الى شيطان

و ياريت صوتنا يوصل له لأن الإنسان كل اما بيشتهر بيبعد عنه الناس اللي ممكن يصارحوه بأخطاؤه لصالح طبالين الزفة

soosa el-mafroosa said...

أشرف

و هذا هو سؤالي
ايه الهدف

و ايهالنتيجة؟

soosa el-mafroosa said...

ftm

هو فعلا عمل نقلة في اسلوب الخطاب

و جذب ليه فئة ماكانتش مهتمة بالدين من أساسه و كان أي حد فيهم بيقلب قناة التلفزيون لو لمح برنامج ديني

و لكن لازم نقف عند أخطاؤه و ياريت لو توصله اعتراضاتنا

عشان ما ينتهيش عمرو خالد و نسمع بعد كده سؤال

عمرو خالد مين؟

soosa el-mafroosa said...

تامر أبو عرب

الخوف ان بعد تأثير عمرو خالد على طبقة الأغنياء و الفنانين

انهم هما دلوقتي اللي يأثروا عليه

لانتمنى ذلك..ربنا يحفظه من الفتنة

soosa el-mafroosa said...

mahmoud

و اذا كان ده الهدف و بعدين مانجحش فيه

يبقى ايه الفايده

أيوة هو لو عايز يصحي الشباب يفضل يصحيهم 20-30 سنة زي ماتيجي

طالما قدم نفسه على انه راجل صاحب هدف

يبقى لازم لا يمل محاولة تنفيذ الهدف دف

و الا مايستحقش يبقى من 100 شخص مؤثرين في العالم

soosa el-mafroosa said...

شهيدة
سعيدة بمرورك جدا

لو الموضوع وقف لحد الكلام و بس يبقى ياريته مابتدى مواضيع مدام مش ناوي يكملها

ياريته كان بس استمر في قصص الأنبياء و الصالحين طالما كان ناجح في ده
و ماخادش بيد الشباب و بعدين سابهم في نص الطريق و منهم اللي رجع أسوأ مما كان

soosa el-mafroosa said...

طهقان

أنا و الله اللي لسه مصدومة منالموضوع ده لحد دلوقتي

بقة انت مايكتبوش اسمك

ايه ده الناس دي اتعمت و الا ايه
:)

soosa el-mafroosa said...

ذو النون المصري

كلامك صحيح

يمكن لو كان ركز على مشروع واحد لحد ما اكمله كان زمانه هو و المشتركين معاه دلوقتي بيتفاخروا بيه

لكن شتت جهوده في كذا اتجاه

و في الآخر ما وصلش لأي هدف

soosa el-mafroosa said...

batresya

بالنسبة لموضوع انه مذيع و بس

فعمرو خالد مش كده
هو كان مدير البرامج الدينية الموجهة في قناة اقرأ و كان بيشرف على كل شئ من الألف للياء

و متهيألي هو كده برض في برنامجه الأخير

و متهيألي اختيار تامر سببه الوحيد تأثيره في الشباب صغير السن

مش لاقيه أي مبرر تاني لإختيار شخص زيه عشان يغني تتر برنامج زي ده

تحياتي

soosa el-mafroosa said...

zenzana

آه و الله تصدقي

التايم بجلالة قدرها

موضوع تامر و عمرو و موضوع عدم اكتمال المشروعات و موضوع ترشيح مجلة التايم كله من وجهة نظري مرتبط ببعضه

soosa el-mafroosa said...

koukawy

فعلا الإعلان ده كان يفقع هو كمان

هو من ناحية الوصلة غلط

بس برضه اللي بيعملوا الشيخ صالح ده مش مظبوط

و بعدين ايه اللي يحط عمرو في موقف زي ده

الله أعلم

رينـــــــــــا said...

هو اشمعنى عمرو خالد اللى المفروض ميغلطش!!

ياجماعه هو معصوم
دا بشر وبيغلط
مش معنى كدا اننا كل نفس يخرج منه نحاسبه عليه
الراجل دا عمل كتير والله
ولولا فضل ربنا الاول وفضله مكناش معلش عرفنا بقيت الشيوخ
اللى ظهرت بعد ظهور عمرو خالد

كل الشيوخ دا مش كانت موجودة من زمان!!!!!!

هو كان سبب فى انهم يظهروا اوى بعد انتشار الوعى الدينى
وبعدين هو قال مليون مرة انه مش شيخ ولا صاحب فتوة
هو داعيه بياخد با ايدينا لاول سلمه
واحنا نكمل بئا
مش المفروض يعنى يفضل معانا للاخر
لان دا اجتهاد فى الالتزام
على الاقل هو اتحرك وعمل حاجة احنا بئا عملنا ايه!!!
قاعدين بننتقض وبس

هو انا قلتلك ازيك (ايموشن مكسوف(
معلش اصل انا كمان مفروسه اوى من انها نحطوط تحت الميكرسكوب كدا
اوعى تاخدى كلامى محمل هجوم عليكى
انا والله بس مصدقت لقيت حد بيتكلم عنه علشان اقول رأى
كان محشور فى زورى
معلش جت فيكى انتى بئا:D:D
هو انتى مبتجيش ليه؟؟ما تبقى تيجى :D

طولت عليكى معلش
سامحينى

break said...

انا أخدت اكبر صدمة فحياتى فعمرو خالد
اد ايه الراجل دا كان ماثر فيا ففترة من الفترات
كان بالنسبالى شخص يكاد يكون مثالى
وبعدين
بئا فجأة يظهر وفجأة يختفى
فى اوقات كتيرة كان المفروض يطلع ويتكلم فيها ومظهرش
كان فين من احداث العراق و لبنان
كان فين وكان فين
انا مبسمعش البرنامج الجديد حاليا
مبيجيش على بالى اصلا انى اسمعه
فكرتينى بالذى مضى

فارس عبدالفتاح said...

اههههههه اهههههههأي

يعني النصاب صاحب الموهبة في السيطرة على عقول الناس لازم يستغل موهبة في النصب على الناس واستغفالهم !!

( وأنا لا اعني عمرو خالد )

هذه النظرية نظرية غير علمية يا { دكتورة } المفروض أن تستغل هذه الموهبة بعد تعليمها تعليماً صحيح ودقيق ومتخصص .

كما تفعل أوروبا وأمريكا واليابان والصين وروسيا أيام زمان أيام الاتحاد السوفيتي

وان هجرة العلماء العرب بسبب الاعتماد على الفهلوة والتفتيح والبلطجة أحيانا .

الذي يستخدم الأساليب العلمية ويستغل المواهب في مصر هو الحزب الوطني يقوم باستقطاب واستدراج المواهب الفردية وتعليمهم وتفعيل علمهم في المحافل السياسية ونعطي على هذا مثال على سبيل التذكير كان هناك موهبة فذة في علم الكلام والجدال ،،، لدرجة إنني خيل لي انه تلاميذ من تلامذة الجاحظ أو ابن عطاء ألا وهو .... كمال الشاذلي !!! .

إنسان موهوب ولكن استغل من الحزب استغلال قذر بمعني ( كلمة حق أريد بها باطل )

العلم يصنع كل شي كما قال رسول الله فضل العالم على العابد كفضلى على سائر البشر أو كما قال صدق رسول الله صلى الله عليه وسلم .

وإذا كان الإنسان عالماً يستطيع أن يجذب العالم كله إلى علمه ومذهبه ودينه وقوميته وشخصيته إذا أراد ولكن إذا حدث هذا ..!!!

فقد خرج عن طريق العلم لأنه أراد به مصلحة شخصية وهذا يتنافي مع العالمين العارفين بالعلم .

أخيراً المقصود العلم ثم العلم ثم تفعيل العلم ووضعه في مكانه الصحيح فالحكمة وضع الشيء في مكانه الصحيح والحكمة ضالة المسلم .

sherehan84 said...

بعيد عن مشاعري تجاه عمرو خالد
قريت بوستك بحياديه تامه
وبصراحه عندك حق في كل كلمه قلتيها

.:.-=- ELGaZaLy-=-.:. said...

هممممممممممممم


كل اناء بما فية ينضح وان طال الزمن

soosa el-mafroosa said...

رينا

ولا زعلت من كلامك يا جميل ولا حاجة

ولا أنا قلت ان عمرو خالد فوق مستوى البشر و مابيغلطش

أنا كل اللي صعبان عليا انسان كنت مستبشرة بيه خير انه هيغير ناس كتير

و اتحرك خطوتين و بعدين محلك سر

يمكن أنا اللي زيي زي ناس كتير رسمتله صورة أكبر من حجمه لأني كنت مستنية شخص زيه من زمان

هي تقريبا غلطتي انا

soosa el-mafroosa said...

مركب ورق في البحر

الصدمة حصلت لناس كتير
و ناس كتير لسه بتغالط نفسها

و ناس مقتنعة بيه و بتقول ليس في الإمكان أحسن مما كان

ربنا يهديه و يهدينا

soosa el-mafroosa said...

فارس عبد الفتاح

وجهة نظر

soosa el-mafroosa said...

sherehan84

قصدت اني أكتب الموضوع بحيادية

لأني لا أكره الرجل

و لكني لم أعد من المهللين

و هو في الآخر أحسن من غيره

بس كان املي في شئ أكبر من كده

soosa el-mafroosa said...

elgazaly

أوجزت و أجزت

زحل الفلكي said...

السلام عليكم ورحمة الله وبركاته
ازيك يا سوسة
كنت عايز اتكلم عن مضمون البوست فيه بس حاجه انا نفسي اعرفها
ليه اللي بيتكلم في الدين بنعاملة انه لازم يكون بيفكر زي الشيوخ والائمة
واللي بيغلط كتير ويكون مثلا كذاب او تعاملاته وحشة
وييجي يقول مثلا ياللا نصلي نروح متريقين عليه
كل واحد ليه قناعاته الشخصية واهدافة المستقبليه
الراجل نفسه يعمل حاجات كتير
بدأ بمشروع صناع الحياه ومن قبلها برامج الدعوة
لكن مشروع صناع الحياه مماتش بإبتعاده عنه
علشانه لو مات ببعده عنه يبقا اصلا من الاول مبدأش
مستمره جمعيات صناع الحياة في كل انحاء الوطن العربي
والمشاريع بتاعت الجمعية ماشية
ومن غير قيادته علشانها فكره
اتزرعت ولازم تنمو
بالنسبة لموضوع البرنامج
انا مش رافض وجود تامل في التتر
لأن ده بيدل على مضمون البرنامج التعايش
وعدمن رفض الاخر لمجرد اننا مش بنحبه او مش عايزينه
واللا ايه
:)

مسلم said...

السلام عليكم و رحمه الله و بركاته

أول مره ليه في هذه المدونه...و مع إنك كنتي و ممكن لازلتي زعلانه مني

إلا إني حبيت أعلق و أمشي

موضوع الأستاذ عمرو خالد أنا كنت قد أثرته في بوستين متتاليين...و الأستاذ عمرو فعلا زي ما انت قلتي...في آخر سنتين تحول فكره تماما

و تحديدا من بعد ما سافر و شاف بلاد الخواجات...تمام زي رفاعه الطهطاوي لما سافر فرنسا كقائد و مرشد ديني للبعثه فعاد بعد خمس سنوات ليشيد بروعه طرق الرقص الأوروبي

وجدنا الأستاذ عمرو خالد و بعد أن ملأ الأرض بأسلوبه و إجتذب الشباب بدعوته وجدناه يلتمس طريقاً آخر في الدعوه

طريق أهم قوائمه كيف تكون مسلماً بتلمع

و إنه مفيش مانع تكون مسلم و تعيش زي ماهم عايشين في أوروبا

يعني تحب و تتحب و تغني و ترقص مفيش مشاكل أبدا

المشكله في برنامج الأستاذ عمرو خالد الاخير لا تقف عند الطامه الكبري بوجود تامر كمغني للتتر و لا موسيقي التتر الصاخبه

لاااا...المشكله الأكبر و الأطم في محتوي البرنامج و مضمونه الغير سوي

و تناوله لسيره الأئمه الأربعه من زوايا تخدم هدفه و غايته

من زاويه لا تبني و إنما تهدم

أنا لم أشأ أن أتخذ موقف من يعلق علي شئ لم يراه و لكني آثرت أن أتابع البرنامج بنفسي

و لا حول و لا قوه إلا بالله

البوست الذي كتبته موجود علي مدونتي أرجو لو قرأتيه

mahmoud said...

سوسة

لازم حد يكمل مكانه
هو حيمسك ايد الشباب عشان يسندهم ويمشو شوية.. لكن مش حيفضل ماسك ايديهم على طول

زي الطفل الصغير اللي بيتعلم المشي وكل حاجة بمساعدتنا في الأول
زي سنة الحياة

مايتفعش ابدا نعتمد على حد انه يفضل ممشينا كتير

ده في الحياة العملية ناس كتير بتبتدي مشاريع وغيرها بيكملها...
دي طبيعة الحياة

اللي زرع وعمل.. مستنى ايه تاني من عمرو عشان يكمل؟؟
بلاش يتقدم.. على الاقل يحافظ على اللي عمله...

وربنا يجيزيكي خير على المدونة بتاعتك
انا بقيت باتابع الاخبار من خلالها :)

Fantasia said...

Great post. I agree with you 100%.

Anonymous said...

السلام عليكم
دى تانى زيارة لمدونتك وبصراحة عجبتنى جدا اسلوبك حلو وجذاب ودمك خفيف جدا وده مهم
اسمحيلى اختلف معاكى يمكن هكرر بعض كلام من الاخوة والاخوات اللى علقوا على موضوعك
انا بمنتهى الصراحة زعلت جدا من موضوع الاخ تامر ده رغم انى سمعت رد الاستاذ عمرو على النقطة دى بس برضه انا معترضة
الاخ تامر يمكن يكون اتعظ ويمكن ناوى يتوب والله اعلم بس اللى عندى ان زى ماهو ده اللى بشوفه قدامى
لكن الاستاذ عمرو حاول يقف معاه يمكن يكون سبب فى هدايته والاعمال بالنيات اولا واخيرا
عمرو خالد شخصية رائعه بس فى النهاية بشر ممكن يخطىء
ومش فوق اى نقد
وكمان هو بشر يعنى مش هيقدر يحول التراب لدهب هو بيوقف الشسباب على اول الطريق ويقولهم امشوا فيه وانا موجود وقبله ربنا
ارجو عدم التحامل عليه لانه بيواجه وواجه ضغوط كتيرة
لانه عايز يصلح الشباب
لكن لو كان مطرب او ممثل كانت البلد رحبت بيه والحكومة فرشتله الارض ورد
اتمنى تزروى مدونتى

Abo Amr said...

و الله يا ست سوسة انا عندي رأي مختلف شوية

مش لازم عمرو خالد يعمل كل حاجة
لازم ناخد المبادرة كمسلمين

ثانيا و الله العى و اعلم

انا عرفت ان رجوعه لمصر كان بصفقة مع الحكومة
ترجع مصر بس تسكت خالص
بلا مشاريع لبلا دعوة بلا كلام فاضي
و عليه اصبح منبره الوحيد هو الموقع
و البرامج اللي فيها همة و جهاد و حث للشباب ماتت خلاص

معذور برضه

على فكرة انا بحبه جدا في و نلقىالاحبة

Anonymous said...

دي اول مرة ازور مدونتك
واعدت اقرا اقرا اقرا لغاية ما جيت للموضوع ده
افتكرتك هتبقي مفروسة من حد اللي اخبارهم بتفرسنا كل يوم على الجرايد والاخبار
بس لما كملت الموضوع اتصدمت..

حسيت ان عمرو مع بداية كل مشروع من دول كان كأنه يقوم بحملة دعاية ضخمة لمسحوق غسيل ..بس مايهموش كتير الناس هتنبسط بيه والا لأ


هو المهم ان احنا نتبسط؟ ومين مكنش مبسوط من شخص لقينا فيه بداية اصلاح لامتنا .. انا منساش الفترة اللي كان فيها برنامج صناع الحياة.. صحيح ماتابعتوش بس كنت براقب ايه اللي بيحصل من بعيد .. والمشاريع اللي اتطرحت وتم تنفيذها لسه موجودة
بس اكيد الاستاذ عمرو مش هيقف لغاية المرحلة دي وبس
لازم يكمل الطريق
دعوة للتعايش برنامج انا بعتبره زي برامج التنمية البشرية بس بدل ما تقري كتاب" الرجل من المريخ والمرأة من الزهرة" اللي انتشر كتير اوي من فترة .. الاستاذ عمرو بيجيبلك نموذج من دينا .. الائمة الاربعة
والمظهر محدش ينكر انه بوابة الدخول
وانتي لو باباكي استاذ جامعة او بيشتغل في مكان احتكاكه بالناس كتير في ندوات او مؤتمرات اكيد مش هيبخل على مظهره (اللي هو عامل مهم في التعامل( ببدل او قمصان ماركات
بس احنا هنا في مصر بنعتبر اللي بيشتري هدوم ماركات بيبقى قصده غالبا انه يرسم وضع معين ليه عند الناس
وبعدين دي حرية شخصية يلبس اللي يريحه مادام هو قادر على كده
وحتة ان الشباب لقوا نفسهم في نص الطريق دي مش صحيحة
بس يمكن لانك ماشفتيش نماذج لناس قادرة تكمل وهي فعلا بتكمل ..
الدال على الخير كفاعله .. مش عشان ادل واحد على الخير يبقى لازم اسحبه من ايده واوديه بنفسي .. اذا مكنش هو عايز يعمل من نفسه عمره ما هيوصل لحاجة

وحتة ان تامر حسني هو اللي بيغني التتر بتاع البرنامج هو كان رد عليها وقال بما معناه اننا لازم نحاول نزود من الجزء الخيَر جوة الشخص
ومعتقدش ابدا انه كان قصده يلم جمهور تامر حواليه
وياستي مش يمكن العمل ده يهدي تامر ولو بعد سنين
ولا لو ربنا هدى تامر حسني هنفضل نعايره بسجنه وتزويره؟
انا لا مجنونة تامر ولا حاجة
بس مش عارفة هيفرق معاكم ايه مين اللي بيغني
طب لو غناها واحد جديد مش يمكن كان ليه سوابق واحنا مانعرفش ساعتها بس هتقبلو الاغنية والبرنامج
وانا قريبت شوية من التعليقات اللي اتكتبتلك
احب اقول ان هدف البرنامج الأخير بناء مش زي ما اتقال انه هدام
ماقلش ارقص ولا غني
قالك شوف حاجة مشتركة
وماترفضش الاخر عشان دينه ولا جنسيته
لاقي مساحة مشتركة تجمعكم عشان تستفيدو من بعض
ودي خطوة عشان ننهض بالامة ونخليها متفتحة بالمعنى الصحيح
انا بتابع لقاءات عمرو خالد اكتر من برامجة .. لو تابعتوها هتفهمو ايه اللي بيحصل وايه المقصود من ورا البرامج بتاعته اللي يمكن الناس تشوفها مالهاش دعوة ببعض
انا طولت اوييييي
ياريت تقبلي اعتذاري :)

Anonymous said...

رغم ده كله
مدونتك عجباني واكيد دي مش هتبقى اخر زيارة
اعتذر للمرة التانية عن التطويل

Moony said...

انا احب اوضح لك حاجه ان فية مشاريع كتير لعمرو خالد ف جامعه المنصورة و هو تقريبا بيجى كل سنه يتابعها و يتابع الناس اللي شغالين فيها يعنى انا ف الكلية بقالى اربع سنين شفتوا جه يجى 3 مرات و لا حاجه
و الصراحه صناع الحياة عندنا عاملين شغل عااااالى
و بعدين تامر حسنى انتى يعنى شوفتيه جاب تامر حسنى يلقى خطبة و موعظه و هو عمرو خالد قال انه جاب تامر حسنى يمكن ينصلح حاله و بعدين انتى مزعلة نفسك عشان تامر هرب من الجيش(انا اصل مبطقش تامر حسنى ده و صوته اصلا وحش)بس عادى ان جدتى الله يرحمها كانت قالت لى مرة ان زمان كان الناس ممكن تقطع صوباع ابنها عشان ميروحش الجيش
الجامده بقه ان فى ناس تسمى عايلين بنفس الاسم يعنى شهادتين مكتوب عليهم نفس الاسم :D
طب انا هسالك سوال ياتري جيمي دخل الجيش ؟؟؟؟!!!مجتش بقى على الضفضدع تامر حسنى

Unknown said...

:D
انا جيت هنا بالصدفة
كنت ناوية اعمل مدونة اسميهاا مفروسة
بس قولت اعمل سيرش الاول ليكون حد مستخدم الاسم دا
ووصلتلك
ومبسوطة بجد انى وصلتلك

متفقة معاكى فى كتير من اللى قولتية
خصوصا تمووورة واغاانى تمورررررة
وانا من حزب الكاارهين والقرفنين من تمووووورة

اما عن عمرو خالد
انا شايفة انه فتح لنا الباب
وشاور على بداية الطريق
اما الباقى
فهو مسؤوليتنا احنا
مش مسؤوليتة هو
عمرو خالد فكرنى بالظبط بأيام هوسة التنمية البشرية
والمحااضرات اللى الواحد كان مموت نفسه ف الجرى وراها
وتطلعى بكمية طااقة غير طبيعية
ومع الوقت الطااقة بتتحول ل...فسسسسسسسس

واتعلمت مع الوقت ان كل اللى يحصل بعد طلوعى من المحااضرة
مسؤوليتى
مش مسؤولية لا العلم اللى اخدتة ولا المحاااضر

عارفة صدعتك
يااا رب ما تتفرسى منى :D