Saturday, June 09, 2007

طعم الأفراح


الإنتخابات العقيمة لمجلس الشورى-توريد المصريات رأسا لبيوت السعودية باشراف حكومي لضمان الشفافية-40 عام على النكسة و عدم
إثارة مسألة قتل الأسرى لأننا من الواضح أننا لا نثور الا اذا تكلم الأشقاء الإسرائيليين...حاجات تخنق و تغم...نفسي يعدي يوم عليا و أنا سعيدة فيه من أوله لآخره...زي زمان و أنا صغيرةو انا بافكر في الموضوع ده قريت تدوينة جميلة عند عمنا أحمد شقير... عن ذكريات الطفولة و الشباب..أرجعتني سنوات و سنوات الى الماضي السعيد



الصحيان مذعورة على فانتاستيكا اللي لغاية دلوقت ماعرفش معناها ايه؟..مرورا بغمض عينيك و امشي بخفة و دلع الدنيا هي الشابه و انت الجدع..هما لسه بيقولوها؟...حلاوة شمسنا و خفة ضلنا..و الكارثة ساعة ماسمع بالسلامة يا حبيبي بالسلامة بصوت فايزة أحمد أعرف اني أكيد أكيد متأخرة ع المدرسة اللي كنا بنروحها بحنطور قبل اختراع التوصيل بالتاكسيات..عم القن كان بيرصنا جنب بعض أكتر من 20 طفل و طفله في حنطور اذا شلت واحد من وسطهم يقعوا زي هرم ورق الكوتشينة..أنا كنت دايما أقعد جنبه قدام و أترعش كل اما يطرقع بالكرباج رعشة انتعاش مش خوف



أول يوم رحت المدرسة الأبلة حطتني في صف الولاد عشان ماما كانت بتقصلي شعري زي مي عبد النبي و شعري كان مداري على الحلق و ده الي خلف عندي عقدة متأصلة من الضفاير..كل البنات عندها ضفاير و انا لأ

في أيام المسائي التلفزيون ماكانش بيبتدي الا الساعة 10 و من الساعة 8 كان إرسال التلفزيون الإسرائيلي بيجي مكان القناة التانية و كانت دايما عليه برامج أطفال ماكناش بنفهمها لكن لازم نشوفها ماهو ماكانش فيه غيرها ...غواص في بحر النغم و عمار الشريعي في الراديو ..اليوم المفتوح على القناة الأولى اللي كان الجمعة و بعدين بأه الخميس و الجمعة و بعدين حد و تلات و خميس و بعدين فتحوا الأسبوع ع البحري



لية الأربعاء اللي كانت بالنسبة لنا عيد مع برنامج اخترنا لك..ماكجيفر اللي ماجاش ولا هييجي زيه و بعديها عرضولنا المهمة المستحيلة قبل ماتوم كروز يسرقها و يعملها فيلم
كل يوم و احنا قاعدين جنب أمهاتنا نتفرج على نوتس لاندنج و فالكون كريست و كولبيز نسأل..هو ده مش كان مات؟..هو ده متجوز مين؟..هما طلعوا اخوات؟..و بعديها ذا بولد آند ذا بيوتيفول..و من بعديها أوشين بنكدها و مللها
فيلم يوم الخميس الساعة 12 كنا بنجري واحنا راجعين من المدرسة عشان نلحقه.


.رحلات المدرسة كنا بناخد الساندوتشات و نمشي اتنين اتنين في جنينة الحيوانات و احنا ماسكين ايد بعض
العيش الفينو اللي لحقناه أيام ماكان ال10 سندوتشات بعشرة صاغ...ألبوم بم بم و الصور اللي جوااللبان ناكل اللبانه على بق واحد و نجيب غيرها يمكن تطلعلنا الصورة الناقصة و نحوش الصور في علبة كبريت و نبدلها مع بعض...شكولاتة كورونا اللبني أم ربع جنيه هي الهدية الرسمية لأي حد فينا من أي حد يزوره..الشيكولاتة اللي في الصالون اللي دايما نخلصها قبل الضيوف حتى مايلمحوها



صفاء أبو السعود و استعراض عيد الطفولة اللي بعدها باسبوع يكون محفوظ من كل المدارس و مرسوم في كل كراريس الرسم
لعب الصندوق في الفسحة و كهربا و استغماية فوق السطوح و حبة ملح و تماثيل اسكندرية في الحوشفستان العيد و الوقفة مع الخروف و العياط عليه أول مانعرف انه اندبح..فلوس العيدية اللي لازم تضيع هي و شنطة العيد في أول يوم
سمير و ميكي و ميكي جيب..هي بقت بكام دلوقت؟..على أيامي كانت ب جنيه و دي أياميها كانت ثروة ..ممكن تحسبوها لو عرفتوا ان كان فيه مجلة عراقية للأطفال مرشقة في كل صفحاتها بصور صدام ملونة و مصقولة و بخمسة صاغ


كل أسبوع بابا كان يجيبلي 10 قصص كل واحدة ب10 صاغ..المفروض انها لسن من 4-6 ..أول قصه فيهم كان اسمها حية رقطاء..مافهمتش رقطاء دي غير لما وصلت تانية ثانوي...و كل يوم خميس كانت ماما بتطلع نص يوم و تجيبلي قصة و هي جاية..بدأت بملف المستقبل و انا في 5 إبتدائي و بعدين بقيت مدمنة لأدهم صبري و مغامراته
السهر بالليل جنب الراديو لحد مانسمع اعترافات ليلية و نحكيها لبعض تاني يوم في المدرسة


يوم الجمعة سينما الأطفال
و أيام و ليالي و مجلة المرأة وعالم البحار(بساء الخير) وعالم الحيوان و حياتي..مواقف و طرائف و فيلم السهرة المهدى من وكالة الأهرام للإعلانإعلانات رمضان اللي بتتحفظ أكتر من النشيد الوطني(و ده مين حافظه أصلا)..يا أمو طاقية .طاقية حمرا...سلمى سلمى يا سلمى يا قمر الدين...صمدي يا صمدي ..وحوي يا وحوي...الكاميرا الخفية و الشقية و المستخبية...قبليها بشوية دوري النجوم و طارق حبيب ..فوازير نيللي و شريهان و ألف ليلة و ليلة..شكلها ساذج دلوقت لكن زمان كانت بتدي النكهة لليالي رمضان
الفانوس أبو شامعة اللي لااااازم يلسعنا بس لذيذ و برقبة أي واحد صيني من بتاع دلوقت


جيلي كولا و فلاش و اسباجيتوز و إزازة الكوكاكولا اللي كانت بربع جنيه و بقت أزمة لما بقت ب 35 قرش..طب و انا
أجيب 10 صاغ فكه منين؟
أخويا اللي كان بيلعب في الناشئين كرة قدم في مشروع لوزارة الشباب و الرياضة كل يوم تدريب كانوا يدوهم وجبة كان يعينلي علية المربى و علبة العصير..اللي كانت صفيح من بتوع قها..و أول مرة ادولوا مرتب كانت 3 جنية(كان تحت عشر سنين) جابلي منه قصة عشان عارف اني باحبهم


الواد الرخم في الشارع اللي بيستنانا واحنا راجعين من المدرسة عشان يزقنا أو يحدفنا بالطوب و يستنانا و احنا بنلعب و يخطف العجلة و ياخدها لفه أو يطلع يجري بالكورة أو يسرق كيس البلي أو يقطع فستان العروسة و نرجع لماما معيطين


ريحة الشوز و الشنطة الجداد بتوع المدرسة ..أول مرة أمسح بالأستيكة و أول مرة أطلع علبة الألوان...كوكي كاك و بقلظ و بندق و أخته بندقه..طلعت عطيه و بابا ماجد..عروستي و ماما سامية..كرنبة و ماما هالة ..و بقلظ و ماما نجوى
قصص هانز كريستيان أندرسون..البطة القبيحة ..عقلة الصباع..الحذاء الأحمر..كانت بتيجي الساعة 5 يوم التلات..مازينجر كان معاده مقدس الساعة 5 كل يوم و الصبح كابتن ماجد..ده بقه كان قالب الدنيا..كابتن ماجد كابتن ماجد ..عاد اليكم من جديد


ماتشات الكورة و الموسيقى المثيرة للأعصاب و هما بيعرضوا أسامي المعلق و المصورين..و أغاني ساندرا و الدوللي دوتس(مش كان اسمهم كده) و كل الأغاني الأجنبية اللي مانعرفش مين بيغنيها ولا بيقولوا ايه بس حفظنا الموسيقى لأنهم مابيعرضوش غيرها بين الشوطين...و قبل مايبقى فيه شوبير آخرهم كان يعيدوا الأهداف و كل سنة و انت طيب و اللي عايز من أباهتنا يتابع تعليق..يجيب الشباب و الرياضة..و احنا واقفين هنموت عايزين نحول نتفرج على المسلسل الأجنبي ع القناة التانية الساعة 9


الإنتظام في الصلاة أيام المدارس و الإحساس بالذنب و احنا بنسمع الأدان وقت الفيلم الأجنبي يوم الجمعة. عايزة أروح أصلي..طب أشوف الحتة دي بس...إجتماعات الزهرات و فريق الموسيقى و العرض الرياضي اللي بيخليك تفوت حصة والا حصتين كل يوم ..بالغيظة في زمايلك

أول يوم في أجازةالمصيف ..ريحة البحر و شكل الرملة و لايمكن نقعد لحظة في البيت جريان ع البحر نتنقع كل يوم أربع خمس ساعات و نعيط و احنا مروحين و نرجع زنوج و مقشرين



بابا و هو بيعلمني ركوب العجلة و اخويا بيتريق عليا شوية و يعلمني معاه مع انه أصغر مني بسنتين..ماما و هي بتعلمني أشتغل كنافاه و اللوحة اللي لسه ماكملتش شغلها لحد دلوقت ..أول مرة اشترينا الفيديو و كمية أفلام أميتاب باتشان اللي بقينا حفظين أغانيها


لقاء الشعراوي كل يوم جمعة و حديث الروح البرنامج الديني الوحيد اليومي اللي كان بيبقى خمس دقايق قبل نشرة تسعة و كل الناس تحرص تشوفه و ماحدش فاهم بيتكلم عن ايه


ملخبطة و بدون ترتيب..هي جاتلي كده و رجعتني لزمن جميل جميل جميل..
.زمن الطفولة السعيدة.



.زمن بطعم الأفراح

82 comments:

عصفور المدينة said...

تاني
!!!!!!!
ههههههه
أنا زهقت من الجماعة العواجيز دول
شوفي تعليقي هناك
:)

عصفور المدينة said...

و كل الناس تحرص تشوفه و ماحدش فاهم بيتكلم عن ايه


عجبتني جدا جدا جدا

غمض عينيك said...

سوسة المفروسة :)
ايام جميلة صح؟ انا مش عارف ليه بس بحس دايما ان الايام جي كانت احلى واصفي وكلها دفء وبركة في كل حاجة
انا مش كبير اوي بس برده عديت بحاجات كتير من اللي قولتيها
ياترى الواحد كبر ولا الدنيا هي فعلا اللي اتغيرت؟

تحياتي ليكي
واضح انك بتزوريني بس مسمعتش رأيك :)

محمد سمير

محمد عبد الغفار said...

اللى راح راح

بس مجبتيش سيره الليث الأبيض ولا انت بعد كده

Anonymous said...

مصر بقت حاجه تانيه حاجه ماسخه ومالهاش طعم
منه لله الى كان السبب

farfasha said...

انا عامله فكره جديده ويارب تعجبك
ياريت تقولى رايك فيها وماتنساش تشارك باى ذكرى عاوزاها
استفتح بيكى يعنى
تحياتى

Ma 3lina said...

يااااااااااه

رجعتينى لذكريات الطفولة العتيقة

تقريبا الشع المصرى كله يشترك فى نفس الذكريات ما عدا حكاية الحنطور دى

عجبنى البوست جدااااااا

Anonymous said...

post hayelllll :D

فارس عبدالفتاح said...

أتمني على الله العلى القدير ومن خلجات قلبي ومهجة نفسي

أن يوفقك في حياتك القادمة

مع بالغ التقدير والاحترام

Amr Ahmed said...

اياااااااام

بس انا حضرت حاجات كتير من ده

ايه ده
احنا عجزنا ولا ايه

Monzer said...

حسيت انك عمرك فعلا 250 سنة
وطلعتى معاش وطلعتينا احنا كمان معاكى
البكاء على الإطلال وعلى الديار
بس انت تعرف انت نسيتى حاجة نسيتى تاكسى السهرة
وسينما الاطفال سينما
والموسيقى الخنيقة بتاعة الراديوا الى بتفكرنى بجو المدرسة لغاية دلوقتى وشوب اللبن
وصوت مزيكة المدرسةبالذات لو ماكنتش رايح بالزي

بس تصدقى كويس انك فارقة معاكى الحاجات ده
بس ماتقلقيش أكيد بتشوفيها مع عيالك او لسه هاتشوفيها ان شاء الله

Anonymous said...

يا سلاااااااااااااام

ذو النون المصري said...

و الله ايامك و ايامنا ايام زمان كانت فعلا جميله جدا
مش عارف ليه دائما كل ما اي قريب من اقاربي كبار السن يتكلم عن زمان احس فعلا ان كان فيه في زمانهم شيء هام جدا
و ان زماننا تغير الي الاسوا
لماذا يكون احساسنا نحن ايضا بالزمن ان الماضي كان افضل
اعتقد ان هناك في تركيبنا الثقافي ما يميل كفة التفضيل الي الماضي و هذا يبدو جليا في الحركه السلفيه التي اجتاحت مجتمعنا الان
ربما تقديس الماضي يكون راجع لاسباب ثقافيه عميقه في النفس المصريه و هو ما يجعلنا نحب ماضينا و نعتبر انه كان افضل ايامنا
جايز
لكن عموما ذكرياتك جميله جدا
...................
بالنسبه للحشره المغربيه
اعتقد انه لم ينزل ترتيبه حتي الان بسبب الفضول الذي يستفز البعض بالذهاب لمدونته مما يحافظ علي ترتيبه في المقدمه دائما فالصدفه برايي جعلته في الترتيب الاول و الظاهر انه سيظل في الترتيب الاول بسبب الفضول الذي حفظ موقعه في ترتيبه حتي الان
فاي شخص كان هيحصل علي الترتيب الاول اعتقد انه كان هيفضل و هيبقي فيه
سواء الحشره المغربيه او غيره

None said...

قول للزمان ارجع يا زمان



يااااااااااااااااااه


بوست

رائع جداااااااااااااا


بجد
انا بعيط وان بقراه وبفتكرايام زمان ودلوقتى الواحد الهم راكبه
وزمان ولا كان حد هامه


هيا الدنيا كده

وسلاااااااااااام

Anonymous said...

بوست رائع بهنيكي عليه مع اني مش
مصرية بس حسيت في كتير اشياء مشتركة
بيناتنا
ايام زمان الها طعم تاني رمضان الاعياد التلفزيون حتى الاكل يلي كنا ناكلو بالصغر طعمو غير الكرتون كان رائع هيديك الايام
لمل قريتك كاتبة الكابتن ماجد قعدت اضحك لانو انا اليوم كلو عم غنبها ما بعرف شو جابة عبالي
ذكريات حلوة منتذكرا و منتاثر عليا
انشالله ما تتغير الدنية اكتر من هيك حتى عالاقل ولادنا يحملوا شي ذكرى حلوة معون
البلوج تبعك رائع حكياتك بيجننوا ومهضومين
صرلي زمان بقرالك وما بعلق
خليكي هيك مهضومة و قوية و فشي خلقك لانو اسلوبك رائع بالتعبير
وانشالله بكرا بس تفتح نفسي عالكتابة بظل هالاوضاع الزفت يلي عم نعيشها
بعزمك على مدونتي

mayooya

Monzer said...

آسف على التحليق خارج السرب
ولكن إيماننا بدفاعكم عن مبدا الحرية
ندعوكم للتضامن مع المدون عمر الشرقاوى المعتقل فى قسم طلخا

إثر قيامه بتغطية انتخابات مجلس الشورى
والله من وراء القصد
وجزكم الله خيرا

Anonymous said...

يااااااااااااااااه يا سوسة

اول ما قرأت الكلام قلت هى سوسة عندها 40 سنة واللا اية.....الكلام بعيد اوى....بس لما افتكرت شوية حاجات قلت ايوة ايوة انا فاكر الكلام ده.....اوشين و مسلسل هركليز وزينا وازازة الكولا انا فاكر انى فعلا شفتها وانا عندي 5 او 6 سنين وكانت صغيرة كدة اللى هى 190 مللي وكانت فعلا ب 35 قرش.....بس محضرتش موضوع الربع جنيه ده

يمكن البضائع اللى بتتباع هنا فى القاهرة غير عندكم فى اسكندرية

بس الاشياء المشتركة كتير

بس برامج التليفزيون الاسرائيلى دي مشفتهاش خاااااالص ولا سمعت عنها حتى

المهم....بوست رائع....فكرتيني بأيام زمان

مش عارف اعلق اقول اية غير....جزاك الله خيرا على لحظات الذكريات الجميلة دي

والسلام

فارس عبدالفتاح said...

اكتب كلماتي هذه وأنا عيناني غارقتان بالدموع وقلبي يعتصره الآسي والحزن من هول ما رأيت

رأيت زهرة شباب العرب والمسلمين في ارض فلسطين وهم يطلقون النار على بعضهم البعض وهذا ليس بجديد ولكن الجديد أن المواطنين العرب الأشراف من الفلسطينيين يقفون بين هؤلاء الشبان كي يفكوا الاشتباك وما ادمع عيني وهز وجداني وحرك صخور قلبي امرأة ( حرة ) واقسم على أنها ( حرة ) كانت تبعد احد الشباب المسلحين وتلقي بنفسها وروحها وعمرها بغية فك الاشتباك وإنهاء المعركة

وشب ( حر ) واقسم على انه ( حر ) يقول لهم ولإخوانه الذي يقفون كحائط بين المتحاربين من العرب والمسلمين الفلسطينيون يقول ( خلوهم يقتلونا خلوهم يقتلونا )

ويصمم على عدم مغادرة الشارع تحت صخ الرصاص

وشاب أخر( حر وشجاع ) يتصارع مع احد المسلحين ويحاول أن يبعد البندقية عن إخوانه من المسلحين الآخرين وعن نفسه وهو يمسك بهذا الشاب فيتملص منه الشاب ويصوب إليه البندقية ويهدده ولكنه راسخ في مكانه بل وأجبره على التراجع .

أقول وبعد إذن صاحبة المدونة وهي إنسانة فاضلة

كفي يا حماس كفاي يا حماس

وعودي إلى رشدك يا فتح عودي إلى رشدك يا فتح

وأتوجه إلى الله العلى القدير العظيم الحليم أن يعفوا عنهم وان يجمعهم وإيانا إلى الحق

وان يتقبل قتلاهم من فتح وحماس ويتجاوز عن سيأتيهم وان يغفر لهم ويرحمهم

وأنا أسف يا أخت ( سوسة ) على هذا التعليق ولكن غلبني انفعالي وسيطرت على عواطفي تجاه ما رأيت من منظر يذهب العقل ويحرك الوجدان إلى إخوان لنا في الدين وفى العروبة

وأتوجه إلى كل عربي غيور والى كل مسلم غيور أن يدعو لهم بظهر الغيب

وإنا لله وإنا إليه راجعون

ابوزياد الفاتح said...

هس بس
اسكتى خالص
اوعى تقولى كلمه زياده
احسن تروحى فى داهيه
التعديلات الدستوريه
تتيح لهم
حرية مراقبة كل حاجه فى حياتك
انت حره بعد كده
اتوقع انهم يعملوا تعديلات تخص المدونات
هانقول ايه
ديموقرؤاطيه اخر زمن
حسبنا الله ونعم الوكيل

شرفينى بالزياره على مدونتى
وعلقى برضه

boshra mohamed said...

اكتر افتت انتباهى لما انتى قلتى ان الف ليلة وليلة بقى شكلها عبيط برغم انها هى هى اللى كنا بنستناها بفارغ الصبر
انا فعلا حسيت الشعور ده لما جيت اتفرج عليها وهى بتتعرض فى دريم وبعد حلقتين ماقدرتش اكمل

محمد السيد..مش حاسكت said...

يااااااااااااااااااه ..

إنت كبيرة أوي كده ...

أنا حبيت اسلم .... بس ...

"لا للتمديد "...... ولا بلاش هنا .... أحسن يقفلوهالك ....

وبعدين اسيبك كام شهر ارجع ألاقي المدونة كده ... بسم الله ما شاء الله ...


http://www.mesh7askot.blogspot.com
مش حاسكت

أخـــ مسلمة ـــت said...

يااااااااااه

رجعتينا لايام حلوة اوي..ايام كلها براءة و سعادة

مع انها ما كانتش حلوة اوي علي المستوي السياسي برضه بس احنا ماكناش نعرف الحاجات دي كان كل همنا اللعب و الشيكولاته و بس

جزاكي الله خيرا

washwasha said...

زمان الزهق والملل كان ليه طعم حلو

كنا بنشغل وقتنا بحاجات مفيدة و الوقت كان مهما كان ممل لكن كان ليه طعم لاننا كنا خلاله بنحلم و نسعى لتحقيق احلامنا ونخطط لها بروقان ونفرح باي حاجة تشغلنا مهما كانت بايخة كنا بنحبها برده ( زي ما قلتي برامج الاطفال رغم بواختها لكن كنا بنستناها بفارغ الصبر)

لكن دلوقت دش وكمبيوتر ونت
في ملل من كتر الترفيه الي في حياتنا

حسيت بايام جميلة اوي
يا ريتها ترجع تاني

والله زمااااااان

شكرا عالفسحة الظريفة دي

Sally said...

بوست جميل
والمعاني اجمل
والاحساس أجمل وأجمل
ربنا يحلي ايامك كلها يارب
:D

Anonymous said...

هههههههههه على فكرة انا كمان اول مرة رحت المدرسة الابتدائى قعدونى مع الولاد بس علشان مكنش ليا مكان فى الفصل وكمان مكنش معايا حد غير جدو الله يرحمه وتقريبا انا اللى كنت مودياه مش هو فرمونى مع الولاد , بس على مين ده انا كنت ارجل من مية راجل


اهصحيح انتى نسيتى الحلبة الحصا ولا ايه بنشربها الصبح فى الشمس بتاعت البلكونة خاصة يوم الجمعه ونسيتتى استاذ 5 ابتدائى اللى كان بيدينا كل المواد عدا الانجليزى والضومة اللى كنا بنشتريها من الراجل اللى واقف على باب المدرسة وماما تقولك لا متجبهاش تانى هتكسر سنانك وانتى برده تجيبيها واللوليتا فاكراها دايما ماما تقولك يل بنتى ده الوان فى مياه وبرده احنا نجيبها ولايس كريم لا اسمه زمان جيلاتى ابو بريزة ده عارفاه كنا نجيب بالعشرة ونخبيهم تحت الصالون لحد ماما متنام علشان نعض ناكل بقى ونتروء اصلها كانت بتقول ان ده مش حلو علشان رخيص , وعلى فكرة انا كمان كنت بركب حنطور كان اسمه عم بيومى وكنت بتخانق كتير اوى مع العيال اللى معايا فى الحنطور وكنت دايما احب اقف مش اقعد وكان نفسى اركب جمبهواقوله سوق على مهلك سوق يا عم بيومى بس مجتليش الفرصة


يااااااااااااااااه يا بنتى فكرتينى بايام زمان ايام العز واكل الوز

بجد موضوع جميل ومدونة لذيذة وان شاء الله ابقى من من ضيوفك الدائمين

Anonymous said...

اتصالات سرية لإزاحته عن إدارة القناة


بوادر أزمة تلوح في الأفق بين حافظ الميرازي وقناة الحياة المصرية

أكدت مصادر مطلعة في قناة الحياة المصرية (تحت التأسيس) أن بوادر أزمة كبيرة تلوح في الأفق داخل القناة بسبب أسلوب إدارة مديرها حافظ الميرازي المذيع السابق في قناة الجزيرة القطرية. وقالت المصادر إن تصريحات الميرازي لصحيفة الحياة اللندنية قبل نحو أسبوع والتي تهجم فيها على مدير قناة الجزيرة وضاح خنفر بسبب ميوله القومية والإسلامية، قد فاقمت من الأزمة بعد انتقاد بعض العاملين داخل المحطة أسلوب حافظ الميرازي، واصطدامه مع المؤسسات الإعلامية الكبيرة. ويخشى عاملون داخل محطة الحياة المصرية أن يضعف الميرازي من انطلاقتها المتوقعة خلال أشهر قليلة بالنظر إلى عدم خبرته في إدارة المحطة، واستقطابه مدير مكتب الجزيرة السابق في موسكو أكرم خزام والذي أقالته الجزيرة بعد التحقيق معه في فضائح مالية وأخلاقية. وكانت أنباء تسربت قبل أيام تشير إلى وجود أزمة بين الميرازي والممول الرئسي للمحطة، وأن اتصالات بدأت بالفعل بين أفراد من طاقم الحياة المصرية والممول قد تسفر عن إزاحة الميرازي. وتضيف ذات المصادر أن أسلوب إدارة الميرازي يتسم بالعجرفة، وأن حالة من التذمر تنتشر بين الموظفين. وقد سبق لحافظ الميرازي مقدم برنامج من واشنطن على شاشة الجزيرة طيلة سنوات أن اختلف مع موظفيه في مكتب واشنطن، وتسبب ذلك في استقالة مراسلي الجزيرة طلال الحاج، وثابت البريدسي، ونظام مهداوي.

الجدير بالذكر أن حافظ الميرازي من المحسوبين على ما يسمى بالتيار الليبرالي الموالي للإدارة الأمريكية. كما تربطه علاقة وطيدة بعضو مجلس إدارة الجزيرة الليبي محمود شمام الذي يعتقد أنه العقل المدبر للمعركة المحتدمة في قناة الجزيرة مع القوميين والإسلاميين. وسبق لشمام أن صرح بأنه يسعى لتحويل قناة الجزيرة إلى تلفزيون ترفيه ومنوعات على شاكلة mbc، والتوقف عن تغطية الأحداث في فلسطين والعراق انسجاما مع الضغوط الأمريكية.

فارس عبدالفتاح said...

الاخ الفاضل Anonymous

انا لم اسمع عن قناة الحياة هذه كلا البتي ولا عن موضوع حافظ الميرازي ولا عن وصاح خنفر ولا عن القوميون العرب والاسلاميون فى الجزيرة


لكن اذا حدث وهو ما ادعوا الى الله ان يكون خطأ

هو جعل الجزيرة من قناه عربية اسلامية حره

الى قناة دعارة مقننه

واذا فعلت الجزيرة ذلك فانني اقول على الاعلام العربي الحر قد انتهي بلا رجعه الى الابد

ولكن الذي يبقى هم المجاهدون من القوميون العرب

والاسلاميون الاصوليون والسلفيون
(لانهم اي القوميون العرب والاسلاميون بشتي تفرعاتهم )

هم الوحدين الذي اذا نظرت على الجغرافيه العربية والاسلامية على الخريطة

تجد ان القومين والاسلاميون هم الوحدين الذي ( يقاومون )

ولكن القوميون لديهم فكره واضحة عن كيفية الحكم واليه نظام الحكم

اما الاسلاميون سواء اكانوا اصوليون او سلفيون

لا توجد لديهم فكره او اليه واضحة او محدده

هذا على حد علمي
وقد يرجع هذا الى انهم لم يتولوا نظام الحكم على الاطلاق

واني اضع امل كبير على القوميون والاسلامين الاصوليون والسلفيون


وشكرا على هذا الخبر

Anonymous said...

صفحة حياة صفحه جديده لقضايا الشباب
منتظرين مشاكراتكم

BYE BYE

Anonymous said...

سوسة هى سوسة تمشى الناس وترجع وهى زى ماهى فى السياسة سياسة مخضرمة فى التهريج بهلوانه وفى الرومانسية والاجتماعيات دكتورة على نفس

اية يابنتى الجمال ده انا على فكرة قريت كل بوستاتك الى فاتت بس ماعلقتش عليهم لكن لما قريت البوست ده قولت لازم اعلق علشان اقولك فكرتينا بأحلى ايام فى حياتنا ونستينا ولو للحظات حاضرنا

برافو عليكى ومستنى منك حاجة جامدة جديدة

.:.-=- ELGaZaLy-=-.:. said...

همممممممممممممم

عارفة طعم طبق الفول يتاع كل يوم الصبح فى الجيش

لا هاتعرفى الجيش منين صحيح

بص لو تحخيلت انك بتقعد 4 يوم تفطر فول

هاتعرف قصدى اية


هبا دى بقى مصر يا عابلة

اسكندراني اوي said...

يااااااااه رجعتينا سنين وسنييييييين
لايام الزمن الجميل
بس انتي نسيتي كمان تتكلمي على هاله حشيش والرنامج بتاعها يو الجمع الصبح ات يور ريكوست
ويوم الاربع بالليل برضه نفس البرنامج

يا خبر يا سووووووسه

روحي يا شيخه صغرينا سنييين طوال

mo'men mohamed said...

ايوووووووووه
رجعتينا أختى لأيام الواحد كل ما يفتكرها يشتاق ليها ويملأ نفسه اللهفه
بس جزاك الله كل خير
بس انا دايما بقول لنفسى انى مش لازم افكر فى اللى فات ولازم أكمل وأعيش يومى
ودايما فى نظرى ان النهارده احسن من امبارح حتى لو اشتاقتله

Anonymous said...

أحاسيس جميلة

وبتفكرني بالماضي الجميل


ربنا يديم أفراحك

دمت بخير

علا من غزة said...



مساء الخيييير

انا كنت محظوظة اني عشت فترة الابتدائي في مصر قبل ما نيجي على السجن ده الي اسمع غزة
وحاجات كتيييير - مش كتير معظمها الحقيقة- مريت بيها وبنفس التفاصيل

انا طول ما انا بقرأ وانا مزبهلة من كم التفاصيل الي فعلا مريت بيها وكما يبدو كل الاطفال الحلوين كمان مرو بيها

:]


بس ازاي قناة اسرائيل كانت تدخل على القناة التانية
!!

انتي كنتي عايشة في العريش ولا ايه

uogena said...

ياروايح الزمن الجميل هفهفى وخدينا للماضى وسحره الخفى .

تذكرت كلمات الاغنيه عندما هممت بكتابه تعليق ..
ذكرياتك جميله "سوسه" ..اعادتنى بشكل ما إلى أيام تترائى لى من بعيد عن زمان كان الأفضل فى عمر كان الأفضل .

"تعيشى وتفتكرى "

soosa el-mafroosa said...

عصفور المدينة

هما مين دول اللي عواجيز؟؟

مش ذنبنا بأه ان ذاكرتكم ضعيفة
:)
تحياتي

soosa el-mafroosa said...

غمض عينيك

الأيام فعلا كانت أبسط و البساطة في حد ذاتها فيها جمال
مش جمال اللي بالك فيه

دلوقتي الأيام زحمة و سريعة لدرجة انها بتتخطف منا ماحدش بيحس بيها

تحياتي

soosa el-mafroosa said...

mohamed a.ghaffar

لا ماوصلنيش موضوع الليث الأبيض ده

تقريبا انا بعد كده

soosa el-mafroosa said...

anonymous

عندك حق

soosa el-mafroosa said...

farfasha

فكرة هايلة

ان شاء الله هحاول أشارك

soosa el-mafroosa said...

ma-3alina

الذكريات واحدة

تحسي ان الشعب كله شخص واحد

تحياتي

soosa el-mafroosa said...

anonymous

shokrannn

soosa el-mafroosa said...

فارس عبد الفتاح

شكرا ليك
و لذوقك

يا رب التوفيق للجميع ان شاء الله

soosa el-mafroosa said...

amr ahmed

و ليه بس و لاعجزنا ولا حاجة
هيا بس تبان من زمان لأن الدنيا تغيرت تغير جذري في مصر

فيما يخص مجال الإعلام

soosa el-mafroosa said...

hapasa

ليه بس و لا 250 و لاحاجة ده هما 27 عمي

ليك حق في موضوع تاكسي السهرة
و نسيت كمان الكلبة لاسي و النينجا ترتلز و الباور رينجرز
و اللحن الرتيب الممل اللي كنا بنطلع عليه الفصول في المدرسة

بس برضه كانت أيام حلوة

تحياتي

soosa el-mafroosa said...

علي

فعلا

soosa el-mafroosa said...

ذو النون المصري

بس فعلا متهيألي الأيام بتتغير من سئ لأسوأ

يعني متهيألي ان الفايدة الوحيدة في الزمن اللي احنا عايشينه ده هي التقدم في عالم الإتصالاات و تكنولوجيا المعلومات و خصوصا سهولة استعمال النت

غي كده ..كله الى الأسوأ

الحشرة المغربية خلاص بأه المركز التاني

برايد و عايزة اتجوز وصلت للمركز الأول

soosa el-mafroosa said...

mayooya

اهلا بيكي
و اله منورة

أنا بافرح جدا على فكرة بالأصدقاء من خارج مصر

باحس كده ان المدونة بقت انترناشونال

الأطفال في كل مكان بيكون لهم نفس الروح

كلنا بنتغير لما بنكبر و نشيل الهم

أغنية كابتن ماجد دي النشيد الوطني لكل العرب

تحياتي

و في انتظار المدونة اللي اكيد هتكون جميلة زي صاحبتها

soosa el-mafroosa said...

hapasa

وصلت الدعوة

soosa el-mafroosa said...

islamist bloke

و الله ده هما 27 ..كتير برضه بس مش قوي

ازازة الكوكا اللي بربع جنية انا لحقتها في اولى ابتدائي

برامج الإسرائيلي دي انا لاحظتها لأني كنت مدمنة تلفزيون باتفرج عليه حتى و هو بيوش

soosa el-mafroosa said...

فارس عبد الفتاح

و ده اللي كنت باقوله و بادعي ليه

لا و ألف لا للحرب و القتال بين فئتين هما في الحقيقة فئة واحدة

وفروا السلاح يا أهل فلسطين للعدو الحقيقي المتربص بكم

soosa el-mafroosa said...

أبو زياد الفاتح

البوست ده في التمااام

ولا حد يقدر يمد ايده

د بوست في السيف سايد

تحياتي

soosa el-mafroosa said...

بحب السيما

خصوصا الحلقات بتاعة حسين فهمي و نجلاء فتحي

زمان كانت تقترب من الإعجاز
دلوقتي باحس اني عايزة اولع في روحي و انا باشوفها

masrry metgharb said...

ايه موضوع الحشرة المغربية ده
حد يعملى اب ديت لانا انا ماكنتش متابع

Nouran said...

سوسة عاملة ايه؟
جميل اوي البوست ده تحسي ان كل ذكريات الطفولة بتاعة الناس كلها زي بعض باستثناء السن والحجات بس شبه بعضها انا كانت ازمتي ف ازازة الكوكاولا لم بقت ب 40 قرش كده هيتبقى 10 صاغ بس من الخمسين قرش مكنتش عارفة اعمل بيها ايه لكن ال15 قرش كنت بجيب بيهم شمعدان احمر ياااه زمن دلوقتي الكوكاكولا الصغيرة ب75 قرش والكبيرة بجنية سبحان الله
ذكريااات وبكرة ايامنا ديه برضه تبقى ذكريات

Anonymous said...

سوسة هانم مفروسة

جزال.. جزال.. افندم .. شوف ازاى حضرتنا جعلناكم تكرهون عيشاتكم وتجدون فى ماضى حضرتكم اشرقات .. نعاهد حضرتكم ان نظل مخلصين فى اداء عملنا حتى نجعل من ماضى هذا الشعب الخزنقور خيرا من حاضرة ومستقبله

صاحب البوابــة said...

كم اعجبني استرسالك في ذكرياتك

حقيقة تحياتي

Anonymous said...

Dear Soosa mafrossa,

You are vereyold 250 years old hhhhaaa, it is not true of course i think tha you are the same old as me, what you told about the beatfull daus in the past, i can remember it , using hantour to go to school and the olt tv programs, you remember Al Alam ugani, the world is singing presented by hamdia hamdy , i deed with the song of Dolly dots, it is a dutch music band, i live in Holland and i saw them singing a few years a go. it is nice to think about the past but it wil not be back agian. Anyway have a nice day, it was my pleasure to visite your blog.

Sherif

The Netherlands

soosa el-mafroosa said...

محمد السيد

يااااااااااه

عاش من شافك

و لسه لا للتمديد لا للتوريث؟

و الله انت نفسك طويل
تحياتي

soosa el-mafroosa said...

أخت مسلمة

هي على المستوى السياسي هيا هياها

ما هو كله عصر فخامة الرئيس

soosa el-mafroosa said...

bestic

فعلا الملل زمان كان بيدفعنا للإبداع

فيه كام طفل دلوقت عنده وقت يتخيل

طفلة بتتخيل مع عروستها وولد ماسك عربيتين و فاكر انه في سباق

جلوقتي الإتنين على الكومبيوتر او البلاي ستيشان أو بيتفرجوا على هايفه على الدش

كانت أيام

soosa el-mafroosa said...

بالله المستعان

ألف مبروك على المدونة

مستنيين الشغل التقيل

soosa el-mafroosa said...

azres

فعلا الدوم و اللوليتا دول وقعوا مني

و سعيدة ان حد بيشاركني ذكرياتي المتشردة في القعاد مع الولاد و ركوب الحنطور

و اله فعلا أيام جميلة

فييين دلوقت
تحياتي و دائما في انتظار مشاركاتك

soosa el-mafroosa said...

مصري متغرب

متشكرين يا فندم ع الكلام الجميل

و الثقة الغالية

soosa el-mafroosa said...

elgazaly

الفول ؟..الا طبق الفول

بس مش بتاع الجيش-أكيد برضه كان حلو-لكن بتاع يوم الجمعة الصبح و احنا ملمومين حواليه بعد اسبوع كامل مافطرناش فيه معبعض

معلش الجيش للجدعان
:)
تحياتي

soosa el-mafroosa said...

إسكندراني أوي

صح آت يور ريكويست

مش بس اسمعه

لا كمان أسجله و أفضل اعيد و أزيد في الأغاني بقيت الأسبوع

soosa el-mafroosa said...

mo'men mohamed

النهاردة احسن من إمبارح؟

دي عكس وجهة نظري خالص

اتمنى بس ان بكرة مايبقاش أسوأ من النهارده

soosa el-mafroosa said...

صاحب المضيفة

ربنا يديم علينا

الأفراح القليلة الباقية

soosa el-mafroosa said...

علا-من غزة

أبدا يا علا و اله ماكنتش في العاريش ده كان ارسالها بيوصل الدلتا كلها

خصوصا قبل ما ارسال التلفزيون يبتدوا يعملوه من الساعة 7 مع صباح الخير يا مصر

soosa el-mafroosa said...

uogena

فعلا اغنية مناسبة جدا

لو كنت افتكرتها وانا باكتب كنت حطيتها في الإذاعة الكل يسمعها و هو بيقرا

soosa el-mafroosa said...

masry metgharab

الحشرة المغربية دي مدونة كانت واخدة المركز الأول في قائمة أفضل 100 مدونة ..لكن دلوقتي خلاص

soosa el-mafroosa said...

nouran

صحيح شركة الكوكاكولا دي عاملة أزمة في كل الأزمنة

بس أهي حلتها دلوقت

جنيه يعني جنيه ..ربنا يستر بأه لما يعملوه جنيه و ريال والا حاجة ..طب و انا اجيبلهم 20 قرش فكة منين؟؟؟

تحياتي

soosa el-mafroosa said...

ولي النعم

للأسف أفندينا الماضي أيضا كان في عهد حظرتكم

و الحاضر في عهد حظرتكم

و كما يبدو انكم مصرين أفندم ان المستقبل أيضا يظل في عهد حظرتكم

لنا الله

soosa el-mafroosa said...

صاحب البوابة

كم تعجبني تعليقاتك

المختصر المفيد

soosa el-mafroosa said...

شريف من هولندا

طب و الله كويس ان هولندا لسه مانستاكش الحناطير

و الا فيه هناك حناطير؟...يا حناطيرك يا هولندا

الدوللي دوتس لسه عايشين؟...بجد و الله

سبحان الله ..طب ماحنا نبقى ماعجزناش قوي يعني

تحياتي ليك و لكل المصريين في هولندا

موجي said...

مجتبى - السودان
إيه السخف ده .. ايه ده .. ايه اللي بتعملي فيه دا ياسوسة، حرام عليك ياشيخة ، ده السيد عباس جوجل نفسه مخترع التدوين ماخطرش على بالو انو الناس حاتكتب فيه بالطريقة دي، وإيه صورتك وانتي بطيري في فقاعات الصابون ، على العموم شوفي يابنتي انا إطلعت على عدد من كتاباتك وعلى الشكل العام للبتاعة بتاعتك دي اقصد (المدونة) وبصراحة انتي مجنونة ومحتاجة لطبيب نفسي، وانا حااتولى المهمة دي لو سمحتيلي ولو ما سمحتليش برضو لأنو المجانين مابيعرفوش مصلحتهم ودايما بيدعو انهم مش مجانين
بتسأليني علاقتي بالطب النفسي ايه. أنا طبعا عندي علاقة ، بصراحة مش علاقة أوي يعني عندى ابن خالتي لزم جارهم طبيب نفسي، المهم ياسوسة من مقالك بتاع الطفولة دا ومقالك الأخير بتاع مرور سنة واضح انو عندك انفصام في الشخصية والأعراض باينة أهو : عندك مثلا
الصورة بتاعت الفقاقيع دي شخصية
وعندك صورة البنت المتشعبطة في الكرسي دي شخصية تانية
وعندك كمان صورتك وانتي صغيرة على المقال دي شخصيتك التالتة .
بصراحة مش عايزك تخافي ، اجمدى واثبتي واسمعي من ابن خالة جار طبيب متمرس ، انتي ياسوسة عندك سوسة في مخك والحالة للأسف متأخرة، وانا ماقدرش اعملك حاجة بعد كدة لازم تسافري على كنكا وتعملي صورة أشعة محورية، صورة لراسك وصورة لكراسك اقصد مدونتك، تبعتيلي الصور بسرعة، عشان نحدد ميعاد للعملية ، وانا بطمنك أهو انو احتمال نجاح العملية صفر في المية ومن هنا بحيي كل المدونين صحابك وبقولهم شاركو في حملة التطعيم والتبرعات ليك، يعني لو في حد عندو قميص قديم أو قزازة دوا بايظ يبعتها على عنوان المستشفى، وعلى العموم الله معاك
والبقية في حياتك

ماتعيطيش ماتعيطيش .. دا انا بهظر معاك والله وعقبال مائة سنة يامجنونة

صديق جديد
وبرضو مفروس منك ..

Anonymous said...

مش لازم الكلام يتنسق
المهم يوصل الاحساس
وفعلا وصلني
برافو
:)

إيمــــان ســعد said...

ههههههه

يااااه يا سوسة

ذاكرتك قوية يا بنتى

انا برضه امى كانت بتقصلى شعرى ولزت احب الشعر القصير

و فعلا شعرى قصير

:)

و مكنتش بالبس حلق كمان

تحياتي يا سوسة و ربنا يجعل كل ايامك افراح

بنوتة said...

مواضيعك كلها حلوة
تحياتي
اتشرف لو زورتي مدونتي و علقتيلي
انا مدونتي لسه على البر لسه جديدة فا مفهاش غير مودوعين فا انا عايزة ازوئها و لو انتي سعتيني يبقى خير و بركة
تحياتي يا احلى سوسة

Anonymous said...

يا هبلة

Anonymous said...

بجد بجد انا عديت هنا بالصدفة وبجد متتخيليش انتي قولتي كلام ووصفتي احاسيس بالظبط زي ما تكون احاسيسي عن طعم الافراح
عجبني قوي وصفك الدقيق للحداث والافراح
وبجد ربنا يوفقك
تدوينة تحفة

شيمووووو

so4mp3 said...

شكراً على البوست الجميل وطريقة كتابتك جااااامدة