بقالي أكتر من شهرين باستنى اليوم ده عشان أحتفل بعيد ميلاد سوسة الأول..و برررضه نسيته..أول يوم دخلت فيه
عالم التدوين و اسمي دخل تاريخ بلوجر كان يوم 14 يونيو 2006
و من بعد اليوم ده و انا حياتي اتغيرت..بأه فيه مسؤولية جديدة في حياتي و هي المدونة ..كأني اتبنيت طفل صغير و بقيت مسؤولة عنه ..شكله ..حجمه ..محتواه..أجمله و أكبره و آخد بالي منه..برضه مسؤوليه كبيرة
أول مرة سمعت عن التدوين أصلا كان في موضوع على موقع عشرينات و كان عن فوز مدونة عراقية بجائزة
عالمية..دخلت على اللينك و شفت المدونة اللي كانت بالإنجليزي و بعد كده قريت في التعليقات على الموضوع ان فيه كمان مدونات بالعربي و سألت بعض المعلقين و كان الرد من "عبد الله مفتاح" و اللي كان صاحب مدونة و اداني عنوان مدونته و مدونة "بنت مصرية" اللي كان عليه لينكات لمدونات كتير ..قضيت أيام و أيام أدخل على مدونات مختلفة و أقرا و أقرا ..و جذبني الموضوع جدا و قررت اني أبدأ المدونة بنفس الإسم اللي كنت باعلق بيه في عشرينات.و أقول كلام من القلب و العقل و المرارة.
و كان اول بوست"أول الكلام"بتاريخ 14 يونيو
و ماكانش عندي ادنى امل ان حد يعلق عليه..طب و يعلقوا عليه إزاي و مين يعرف اني عندي مدونة أصلا و بعدين هما كلهم شكلهم اصحاب و كلهم بيعلقوا عند بعض..طب أعلق على مواضيعهم و الا لازم يكونوا عارفينني الأول؟...مانا ماكنتش أعرف أي حاجة و تجربتي في التدوين بدأت بنظام لو عايز تعلم ابنك العوم ارميه البحر و لو عايز تعلمه الجري اربطه في القطر...م الآخر يعني ..عمياني
و كااااانت المفاجأه بعد نشر البوست ب3 أيام جالي أول تعليق و كان من "سيبها على الله" ..كنت هاموت من الفرح ..و بقيت مستغربة جدا ..طب هو لقى المدونة إزاي و لحد دلوقتي ماعرفش..و كان بصراحة ذو فضل كبير عليا في بداية المدونة لدرجة انه رفعلي ملف خاص فيه معلومات عن كيفية اضافة الصور و الشات بوكس و الموسيقى و اللينكات و كان بصراحة نعم العون ليا في بدايتي المتعثرة
و هكذا توالت البوستات و توالى الأصدقاء اللي بعضهم اختفى و بعضهم مازال على العهد و اتعرفت على ناس كتير في هذا الواقع الإفتراضي اللي إداني الأمل في ان لسه فيه ناس في مصر بتقرا و بتفهم و أهم حاجة ...بتعترض..بعد ماكنت فقدت الأمل في الناس ..كل الناس..لكن بلوجر وحده أثبتلي ان لسه فيه أمل
سنة طويلة حصلت فيها أحداث كتير..في مصر عموما و في هذه المدونة خصوصا ..زي الأخ..اللي دخل يؤيد إسرائيل داخل التعليقات على بوست "أفلام الصيف الساخنة" أيام الحرب بينها و بين حزب الله و اللي لميت عليه المجتمع التدويني كله و الصراحة الناس ماقصروش و ظبطوه تظبيطة ماتظبطهاش مدون في قسم..و الخناقات المشتعلة بين بعض المعلقين...في أي موضوع يكون له بعد ديني زي موضوع "يهدي من يشاء" و موضوع "فاروق حسني و الحجاب"
من الأحداث المهمة أيضا " التجمع البلوجري الأنثوي" لجروب "كلنا ليلى" اللي قلب علينا المدونين و أخرج شبح سي السيد من جوا البعض
و من العلامات المهمة كمان في السنة دي ظهور اسم سوسة المفروسة على صفحات الجرائد الإلكترونية و المكتوبة
زي موضوع "يا فرج الله" اللي اتنشر على موقع عشرينات و من بعده "فعلها البطل شعبولا" اللي اتنشر برضه في عشرينات و من بعدها في جريدة "العربي" و دي كانت أول مرة أشوف حاجة أنا كاتباها بايدي منشورة في على صفحات الجرائد و انا اللي كان نفسي يتنشرلي أي حاجة انشالله حتى على حبل الغسيل
و طبعا مش ناسية يوم ماتخطيت خط من الخطوط الحمرا اللي بابا حاطتهالي بالنسبة للكلام في السياسة و الشخصية الغير مسموح لي بالمساس بيها و يوميها بعد كل التوسلات و الإقناع مافيش فايده و اضطريت اني أمسح بقية بوست"تفتكروا مين" اللي كان يتضمن سيناريو فيلم" الريس حوحو" و رد فعلي كتبته في بوست " القطط العميا" عن غبائي في اطلاع بابايا على المدونة و في تخيلي لوجود هامش من الحرية يخلليني أقدر أقول اللي أنا عايزاه من غير ماخاف..من وجهة نظري الهامش ده موجود ..لكن بابا من جيل لا يمكن سيقتنع بحاجة زي دي
مجرد أمثلة من مواضيع عاشت و طلعت من جوايا على مدار السنة و فيه غيرها مواضيع كتير و كل موضوع أثر فيا و أتمنى انه يكون أثر في حد من اللي قراه
تحية لأصدقاء الأمس و أصدقاء اليوم و أصدقاء الغد ان شاء الله...تحياتي للمداومين على الحضور و اللي غابوا ...تحياتي للمعلقين و القراء السريين اللي بيقروا و مابيعلقوش...تحياتي لكل اللي حاطلهم في قايمة المفضلة و اللي حاطت سوسة في قايمة المفضلة...تحياتي لكل اللي أعرفهم و اللي لسه هاعرفهم في هذا الواقع الإفتراضي الجميل عبر هذا الإختراع الرائع المسمى بالإنترنت و من خلال هذا الإبتكار البديع المسمى بالتدوين
سنة عدت ..و مين عارف يمكن السنة الجاية نحتفل بتاني سنة ل "سوسة المفروسة" إذا كان لينا عمر
-------------------------------------------------------
تحديث
الشكر الجزيل لأخي "ذوالنون المصري" على أجمل هدية في عيد ميلاد سوسة
88 comments:
كل سنة و انتى بالف صحة و المدونة موجوة وبتزوديها
بس مش لافى كلام تانى , غير نراكى قريبا :)
كل سنة وانتي والمدونة بخير 00ننتظر المزيد0
مع تحياتي00
والسلام عليكم0
سوسهكل سنه وانت طيبهاوان شاء الله نشوف أجمل ما عندك فى السنة الجديدة
السلام عليكم
كل سنه وانتي مبدعه ومتألقه والي الامام دائما
وتتناسب هذه الذكري مع مرور عام ايضا علي دخولي التدوين
ربنا يدى لمدونتك طولة العمر
وكل سنه وهيا طيبه
وربنا يديكى طولة العمر وتعيشيلها
تحياتى
بجد انا ممتنلك جدا يا سوسة
انتي صاحبة الفضل في اني اهتم بعالم التدوين اساسا
انتي من اول المدونات اللي شفتها
انتي ومدونة اروى الطويل
وبجد فرحت جدا لما سألتك عن كيفية عمل الشات بوكس
وانتي جاوبتيني
سبحان الله
اول ما بدأت التدوين مكنتش بعرف البوست بيتعلم ازاي
ودلوقتي الحمد لله المدونة شغالة وتصميمها حلو
يالا فيكي الخير يا سوسة
كل سنة وانتي بخير
وكل سنة ومدونتك المفروسة بخير
وعقبال ططعاشر سنة
نسيت
ربنا يحفظ مدونتك ويديلها طولة العمر يارب
ويبعد عنها الفيروسات والهاكرز والحاقدين الشتامين
قولو امين
امييييييييين
كل سنة يا سوسة وأنتِ غير مفروسة .. خالص أمنياتي بالتوفيق..
يا خبر أبيض بجد
سنة علي المدونة طيب يا جماعة مفيش حد يقول كنا جبنا هدية للست سوسة يعني كي بورد او موس
علي العموم الف مبروك وكل سنة وانت ومدونتك بخير وفرسة المفروسين
ياسلام يا ست سوسه هانم!!!!!!!!!!!!؟
كان نفسي اكون اول المهنئين بالعيد الاول لميلاد سوسه المفروسه
انا طبعا اقر و اعترف ان سوسه المفروسه تعتبر من اهم المدونات التي اطلع عليها كل عدد منذ ان عرفتها من حوالي تسع شهور و لم يمر عدد دون ان اقراه و شاركت فيها في حوارات و مناقشات ساخنه و بارده احيانا لكن كانت الاجواء فيها ممتعه فعلا
فرحت جدا لمرور سنه علي ميلاد سوسه و اتمني ان تتطور بلا توقف و ان تستمر في تزويدنا بالمزيد من القفشات التحليليه للوقائع السياسيه و الاجتماعيه
انا ايضا اقر بان واحده من المدونات التي تعلمت منهن الكثير جدا هي سوسه بدءا من عمل عداد المدونه و عمل الشات بوكس و عمل قائمة المفضله
حاجات كتير سالت عليها هنا و الحمد لله كله تمام
ادام الله علينا نحن اسرة المدونين و متابعي سوسه المفروسه الود و الحب و الصداقه ابد الابدين
و كل سنه و انتي طيبه و عقبال 100 سنه و اكتر
كل سنة وانتى مدونة ... ومدونتك منورة بتدويناتك
واتفضلى منى الهدية دى
http://www.aghareed.net/greetings/cards/birthday4.gif
كل سنة والتدوين منور بيكي ياسوسو
كل سنة ومدونتك من أقوي المدونات تاثيرا ... كان في أستفتاء علي اقوي المدونات تاثيرا في قرائها ورشحتك لانك من أكثر المدونين تاثيرا في
انا أول مرة دخلت فيها علي مدونتك جالي انبهار من رووووعه اسلوبك وقعدت اقري المدونه كلها وبجد أثرتي فيا أوي
ومزلتي ماثره فيا
ولما لاقيت تعليقك لاول مرة في مدونتي مكنتش قادرة اصدق نفسي
سوسة بحلها معلقة عندي
لا لا مش ممكن
هي تقريبا نفس فرحتك
باول تعليق عندك
دا لو مكنتش انا فرحت أكتر شوية
جعلكي الله دوما
ساعيه للخير
مؤثرة في الخير
كان نفسي اكون أول المهنئين
كل مرة أقول انا هبقي أول واحدة اعلق المرة الجاية
انا بردك مش هقطع الأمل
بس بجد كل سنة ومدونتك
متميزه ومتفرده وأكثر تاثيرا
يا أهلا بالتليفزيون...
إيه ده انت كملتي سنة بسرعة كده ؟؟
ممممم ..ماشي طالما كده كده بقي ...أعترف لك ..
كنت من ألذ الناس علي عشرينات فعلا سعادتك ... ويمكن وصلت لمدونتك بالحملة الفزييييييييييييييييعة اللي كنت عاملاها علي عشرينات ...
ويومها استغربت اسمك .... سوسة ولا ....؟؟
يلا مش مهم ... لكن الأهم إن مبروك بجد السنة دي ..
وفعلا يمكن انقطعت فترة طويييييييلة عن الدخول عندك لأفاجأ بعد كده بالمستوي اللي وصلتي له ...
ألف ألف ألف مبروك .... وعقبال عشروميت سنة .. ومتبقيش تحرمي عشرينات منك يا افندم ....
ربنا يوفقك يا سوسة
بصراحة انا بزعل لما بدخل عندك والاقيكي ماكتبتيش جديد
كنت بدخل يوميا فى الاول وبعدين بقيت ادخل اسبوعيا وبعدين اكتشفت حاجة اسمها ار اس اس فييد بس برضة مكسل اعملها لكل الصفحات اللى بتصفحها (: وعشان كدة بفضل برضة التصفح العشوائى
(:
صباح الفل
ياريت نقرا منك دايما.... وانتى كمان تبقى على العهد...... مش عايزين ييجي يوم نصحى نلاقى كل الناس بتقول خلاص يا جماعة كانت فكرة وفشلت.... اقفلوا المدونات وكبروا دماغكوا..... انا كمان-واسمحي لى- حاسس نفسي من جيل الأوائل..... من جيل اللى عملوا المدونات فى يونيو و اغسطس 2006 ..... لان الواحد بصراحة شايف ان العملية اتزحمت اوى اوى وكله واخدها تجربة وكله بيكتب اى حاجة و اى حاجة (مش كل حاجة) وكل واحد يفتح مدونة لمجرد انه يعمل مدونة وبعدين يكتب فيها موضوع واحد ويقلب الحوار من دماغه
مش كل الغرب عامل مدونات..... اللى بيحب الكتابة وبس... لكن احنا هنا ماشيين بنظرية مشروع السايبر و السنترال اللى بيكسب يبقى ادخل انا كمان واعمل مدونة..... وربنا يهدي(ياريت محدش يفهم من كلامي انى بقول انى من الصفوة مثلا وان الموضوع لازم يكون محدد على ناس بعينها) انا كلامي واضح وبسيط
خلي بالك من نفسك يا سوسة ومن مدونتك.... و خليكي على العهد ..... لان الدنيا كلها بتخلف دلوئتى و ربنا يهدينا اجمعين
والسلام
اه ونسيت اقولك.....خليكي برضة على نظامك واكتبي وقت ما تحسي انك عايزة تكتبي..... مش عشان طلبات القراء يعني
ولو ان الحياة اليومين دول فيها الف حوار وكنت مستنيكي ترغى فى موضوع غزة وحماس وفتح وكدة بس على ما يبدو ان الموضوع مستهلك اوى وانتى مش عايزة تفتحيه هنا..... مع انه يفرس
والسلام
اطال الله بقاءك واعزك واكرمك
سنه حلوه يا جميل
سنه حلوه يا سوسه
سنه حلوه يا جميل
انتي بتعملي عيد ميلاد وانا اول امبارح كنت عامل السبوع
هههههههههههههههههههههه
على فكره انا برضه بدات كده انا بقرا مدونات من فتره طويله اوي
ويادوب لسه بتهته في سكه التدوين
على فكره في ناس من المدونيين دول يجب الواحد يقف عندهم ويتعلم منهم نظرتهم للحياه
وناس تانيه ايدك منهم والارض
كل سنه وانتي مدونه
وعقبال 100 سنه تدوين
تقبلي تحياتي
كل سنة و انتى طيبة و ببوستاتك منورانا
و دايما رافعة اسم صيدلة عالياااااااا
مبروك يا سوسة وكل سنة وانتى طيبة ويا رب السنه الجاية تبقى اجمل واحسن ومدونتها تكون اجراْ واقوى
وان كان اجراء من كده يودى ورا الشمس
Dear SOosa, happy birthday for you and for your blog, it is indeed a verey nice blog. I have no blog but i read a lot of the gyption blogs and for someone as me who do live anymore in egypt, it lets me know that in egypt some people stil saying no agianst the goverment which keep them under pressure, you can say that your blog and other blogs is my window to egypt it is different from the officiel windoa which calls national pers like Al Ahram and Akhbar, it is the same all the time. Anyway have a nice day and keep writing my dear, mybe i shall invite you to visite my blog after a few weeks.
About ypou post about teh beatuful days in egypt doe you stil remember the guy who sells DOOM , and Foul Soudani this seller come to stand behinde the school waal during the break, you can buy candy, doom , do you know Doom and patata, there were a great days
have a nice day
Sherif
كل سنة وانت طيبة ياسوسة وعقبال كل سنة تتحفينا ببوست زي ده كله فرحة
تحياتي
محمد سمير
كل سنه وانتى طيبه يا سوسه
وعقبال لما تكملى وتوصلى لميه سنه
وانا مش هنسى
انك اول واحده تحط تعليق عندى
وانا كنت متابع مدونتك قبل معمل مدونتى
وكنت اتمنى تعلقى عندى وكنت بقول ياعم دى بقالها كتير وشكلها مشهور هتخش تعلق عندى ليه
ولقيتك اول واحده تعلق عندى
وكل سنه وانتى طيبه
وسلااااااااام
كل سنه و انتي طيبه سوسه
مدونتك من اجمل المدونات فعلا الي الواحد لازم يعدي عليها مستنين مزيد من التألق السنه التانيه ان شاء الله
تحياتي
أنا أول مره أعدى في المدونه
بس لقيتها لذيذه و جذابه
و قريت موضوعات كتير فيها
ربنا يوفقك .. و نقرالك على طول
سلام
سوسة هانم مفروسة
انت فرحان هانم وانا ولى النعم زعلان كتير مش بس من انت لا ..لا زعلان من كل اللى اكتب كلام مش جوزال عن ولى النعم
شعب خنزاقور احنا اتعب كتير علا شانة
هو اكتب مدونات افضح حكومات اكتب عن ابننا عن زوجتنا
سوسة هانم نحن لا نفعل شئ غير نكدس اموال وهذا حقنا وشاطرات من ابننا ليش شعب خنزاقور زعلان من تهليبات
السلام عليكم ياسوسة
كل سنة وانت طيبة
أول مرة أدخل مدونتك ..أعجبتنى بحق فهى ذات أسلوب محبب إلى النفس ساخر من كل شىء لكن له هدف بناء..
تحياتى
كل سنة وانتى بالف صحة وسعادة وكدة
...
كل عام وأنتِ بألف خير
وننتظرك عند التدوينة المليون
تحياتي
kol sana w enty tyba ya sosaaaaa
ba2aly keteer magetsh 3andek
bs eshta ....3o2bal 1000 sana kaman :D
سنة حلوة يا سوسة
عارفه بمناسبة تشبيهك للمدونة ببنتك
انا مرة مدونتي كان فها مشكلة
مكنتش بتنشر بوستات جديدة
كنت كتئب جدا
امي قالت لي ذي ما يكون عيل من عيالك عيان
رديت عليها وقلت لها كتر
ده مدونتي يا عالم
مش عارف ليه مفهمتش ؟
كل سنة وانتي طيبة يا أستاذة وعقبال مئة سنة تدوين
تحياتي
بجد المدونة اكثر من رائعة
واول ما شفتها علطول حطيتها فى المفضلة عندى لحسن الجهاز يهنج ويضيع عنوانها من عندى
احنا قلنا كلسنة وانت طيبة
بس فين الجاتوه والساقع
ماينفعش كده
شغل منايفة ولا ايه (((:
كل زنه وانتي طيبه :) تصدقي بالله انا برضه نسيت موضوع العيدميلاد ده .. بس يالا .. خيرها ف غيرها ههههه
ان شاء الله المدونه تكبر و تكبر و تكبر لحد ما تبقى جرنان او لحد ما يتقبض عليكي :) ايهما اقرب ان شاء الله ههههههههه
تحياتي الى ست الكل :) سوووووسه المفروووووسه و تمنياتي لها بزوال الفرسه و العوده الى العالم الحقيقي الحلو الحنين الطيب الجميل
كل سنه و انت طيبه يا سوسه
و عقبال 100 سنه
كل سنة وانت طيبة
وعقبال سنيين كتير اوىىى
من التدوين
-
-
اسم سوسة المفروسة
كل ما اشوفه ابتسم
-
-
ادعةك لزيارة مدونتى
-
تحياتى
كل سنه وانت ىطيبه يا سوسه يا جميله
كي سنة و لإنت طيبة و عقبال 100 سنة
كل سنو وانتي طيبة وانشاء الله المدونة في تقدم دائما
كل سنة وانتي طيبة يا سوسة
انا فعلا اول مرة اخش علي مدونتك
وبالصدف طلع في يوم ميلادك
انا كده محظوظ
عقبال تشليون سنة
والف مبروك
وياريت تكوني استفدتي من السنة ديه في التدوين
لا تنسينا من دعائك
كل سنة وانتى طيبةةة
لاقيتك بتشكرى اللى بيقروا ومابيعلقوش زى حلاتى قلت لأ لازم يبقى عندى دم واعلق
:D
ويارب عقبال السنة التانية والخامسة والعاشرة وال100 كمان
ربنا يديكى الصحة وطولة العمر ويخلى المدونة فى ميزان حسناتك
اللهم امين
تحياتى
:)
كل سنه وانتي طيبه وبالتوفيق ان شاء الله
تحياتي
هابي بيزي يويو سوسة
هابي بيزي يويو سوسة
كل سنة وسوسوة وانتي بالف خير ودايما مبدعه
ومتالقة
انا فعلا قريت اسمك في اكتر من جريدة سواء منشورة او الكترونية
يلا يا عم
بكرة تتشهر اكتر واكتر
ومش في يعرف يكلمك بقي
:))
حافظي علي المدونة بجد
وكل سنة وانتي وهي للمرة التانية بالف خير
يا سلاااام
الف مبروك
كل سنة وانتي طيبة و المدونة دايما فوق :D
انا برضه مدونتي هتكمل سنة كمان اسبوع وللا عشر ايام
كل سنة وانتى متالقة وافضل واقدر على العطاء ربنا يوفقك
كل سنة وإنتي طيبة يا سوسة
بجد بجد التدوين ده فعلا نقل حياتنا نقلة تانية خالص وفي أقل وقت ممكن .. يمكن من أحلى الحاجات اللي بأعتبرها فعلا نعمة كبيرة لينا كلنا
إن شاء الله السنة الجاية تكون أحسن وأحسن وتمتعينا أكتر وأكتر
كل سنة بتعدي علينا احنا المدونين بتدينا مسئولية اكبر لان اسمائنا بتتعرف و الناس بتتوقع مننا الافضل و الاحسن
مسئولية انتي اكيد ادها و ادود
انا كمان فات عليا سنة
و اتمنى اجي اهنيكي بمرور خمسين سنة على مدونتك
و شاعتها حنكون انا و انتشي كراكيب
تحياتشي
كل سنة وانتو طيبين يا جماعة
انتي يا سوسة بجد من اهم المدونين المصريين وانا كمان من الناس اللي مدونتك هي اللي شجعتني اعمل مدونة لنفسي
بالزبط من ايام موضوعك ايام الصيف الساخنة والقطط العميا
يااااه ,, هو الكلام ده فات عليه سنة
ان شالله ييجي اليو الي تعلني فيه اعتزالك عن الفرسة ,,
ودمتي ذخرا للمملكة البلوجرية المتحدة
كل سنه وانت طيبه يا سوسه ويا رب بلوجك يفضل جمييييييل علطوووووول ويفرسنا ويمتعنا كمان وكمان :)
ensan
كل سنة و انت بخير
مش محتاجة كلام كتير..الإحساس وصل
أحمد المصري
كل سنة و انت طيب
و ماتقلقش طالما الواحد عايش في مصر يبقى هيتفرس أكتر و أكتر و هيكتب أكتر و اكتر
أين المفر؟
mo'men mohamed
شكرا ليك
و ان شاء الله السنة الجاية أحلى
محمد مفيد
شكرا ليك
أخجلتم تواضعنا
و كل سنة و انت طيب و مدون على طول
nmohamed gado
يارب يدينا كلنا العمر
و كل الأمور تتظبط
و يكن مانحتاجش نتفرس ولا نكتب
تفتكر هنعيش ليوميها؟
واحد من الناس
أخويا علي
و الله انت من الناس اللي حسيت انهم زي أخويا الصغير
و الحمد لله دلوقتي التلميذ بأه أستاذ
و فعلا لو ليا أي يد في دخولك عالم التدوين فده شئ أعتزبيه
كل سنة و انت طيب
ويارب يبعد عن الكل
الفيروسات و الهاكرز ...و أمن الدولة
:)
تحياتي
قلم جاف
تفتكروا هيجي اليوم و أبقى غير مفروسة
أشك
تحياتي
شاويش
السنة و الله عدت هوا
كأني لسه فاتحة المدونة و بارش قدامها امبارح
ايييييه..دنيا
كل سنة و انت طيب
ذو النون المصري
أخويا ذو النون
طبعا لو قعدت احكي على هديتك الرائعة و البوست المخصوص مش هاقدر أقولك انا سعيدة أد ايه
نظرتي فيك و في ذوقك كانت في محلها
انت فعلا من اكتر الناس المحترمة اللي قابلتها في عالم التدوين وواحد تاني من اخواني في هذا العالم الجميل
و كفاية مناقشاتك الهادئة اللي عمرها ما تخطت اي خطوط حمراء..و تعليقاتك التي أشهد بأني أستفيد منها دائما
تحياتي و شكري العميق
ادام الله الود
بنت أبيها
شكرا ليكي يا قمر على ذوقك
من زمان ماحدش بعتلي كارت ولا جابلي هدية في عيد ميلادي
الجميل مايهديش غير الجميل
:)
تحياتي
بالله المستعان
شكرا ليكي يا سالي على كلامك الجميل
فعلا من اجمل مميزات عالم التدوين هو الإلتقاء بناس محترمة مثل شخصك الكريم يمكن مش مقدر للواحدة تقابلهم في الحقيقة
شئ يشرفني و يسعدني إن أي موضوع ليا يكون مؤثر في أشخاص أحترمهم كثيرا
تحياتي
محمد السيد
شفت بأه الأيام بتعدي ازاي
كاننا لسه امبارح في عشرينات وانت مازلت على العهد
لا للتوريث لا للتجديد
عشرينات دي كانت بيتي الأول و مازلت ان لها كل احترام و تقدير
تحياتي لجميع أصدقاء عشرينات
islamist bloke
ان شاء الله الفكرة مش هتفشل
انا بس لأنني باتفرس كتير ماباحبش أرفع ضغطكوا معايا
خصوصا اذا كانت فيه احداث مغطياها مدونات اخرى بأسلوب جميل
باقول مالوش لازمة اعيد و أزيد في كلام اتقال قبل كده
عشان كده يمكن ساعات اتاخر شوية كمان ظروف النت عندي مش تمام
و بالنسبة للزحام ..هي دلوقتي بقت موضه زي حاجات كتير
بس اللي هيستمر هو اللي فعلا عنده حاجة يقولها و هو ده اللي هيفضل لو نفسه طويل و مازهقش
طالما انت من جيل الأوائل أيضا
يبقى كل سنة و انت طيب مقدما
و انا على العهد
ماتخافش
فارس عبد الفتاح
شكرا ليك يا أخ فارس
و كل سنة وانت بألف خير
كل سنة وانت طيبة
وعقبال السنة الكتير بقى
سلام
معلش لنا جبي متاخره بس كا سنه وانتى بخير الحقيقه الكلام المباشر فالسياسه مش بحبه ولكن افضل اذا كان ممزوج بتاثيرها على المجتمع والافراد فى قالب سهل وبسيط ودا الحقيقه اللى عجبنى عندك وكمان كلامك هادف مع ان دمك خفيف.. فرصه جميله انى اشوف مدونتك
كل سنة و انتى طيبة يا سوسة
و السنة الجاية ان شاء الله ما تبقيش مفروسة بأذن الله
و اجمل سلام و تحية
و عقبال مليون سنة
اسكندراني اوي
صوتك حلو قوي على فكرة
و ألف مبروك على السبوع و عقبال البكاري
و نباركلك قريب إن شاء الله
ma-3alina
كل سنة وانتي طيبة
يا رفيقة الكفاح
مصري مغترب
شكرا ليك يا مصري
ان شاء الله السنة الجاية احلى بالبوستات و المعلقين
و نفضل بعيد عن ورا الشمس ده
شريف
شكرا ليك و انا سعيدة ان أنا وغيري نكون عيونكم اللي بتبص على مصر وانتوا براها
يارب بس مايخزقولناش عيوننا و نلطش في الضلما كلنا
بالنسبة للراجل بتاع الدوم..طبعا ده تراث ولا يمكن تخلى منه مدرسة مصرية
بس مش عارفة لسه موجود والا انقرض
تحياتي لكل الطيور المهاجرة
غمض عينيك
شكرا ليك
و ان شاء الله ربنا يدينا عمر و نحتفل مع بعض على طول
fnan_geology
كل سنة وانت طيب يا فنان
و عقبال المية جميعا ان شاء الله
انا طبعا ليا الشرف اكون اول المعلقين عندك
لأن مدونتك فعلا جميلة و ممتعة
تحياتي
عبدالله
شكرا ليك على الكلام الجميل
يا رب تكون المدونة دايما عند حسن الظن بيها
sameh
يا أهلا بيك دايما في المدونة
سعيدة انها عجبتك
مستنينك على طول
ولي النعم
ولا يهمك ولي النعم
في كل مكان الكلاب تعوي و القافلة تسير
في مصر بس الكلاب تسير و القافلة تعوي
استمر استمر...سدد الله خطاك
د.حنان فاروق
أهلا بيكي أول مرة
و ان شاء الله ماتبقاش الأخيرة
elgazaly
وانت طيب و كده
:)
صاحب البوابة
كل سنة وانت طيب
المليوووون
يا مين يجيب عمر
الفرسة لوحدها تنقطني و تجيبني الأرض
اوتحتها
كلمة
كل سنة وانت طيب
طولت الغيبة صحيح
لعل المانع خير
أحمد عبد الفتاح
يا رب السنة الجاية تبقى أحلى من السنة دي اللي ماكانتش ولا
بد
بس كانت حلوة بالتدوين
المدونة بنتي و اكتر من بنتي كمان
اللي عنده مدونة بس هو اللي ممكن يحس بينا نحن المدونون
مراقب مصري
يااااااااااااااااه
المدونة نورت والله
ربنا أعلم انت من الناس اللي دايما كنت انتظر تعليقاتهم
و احزنني كثيرا طول الإنقطاع
عود احمد
monzer
كلامك بيسعدني و بيشرفني
و بعدين ولا يهمك لو العنوان ضاع
انت أدخل على جوجل بس و اكتب سوسة المفروسة يجيبك هنا
على طول
رغم كثرة المفاريس لكن لا يوجد الا سوسة مفروسة واحدة
أنا ماليش دعوة بالمنايفة على فكرة..ولا حتى هوبت ناحية المنوفية
من قريب أو بعيد
dr.tantawy
كل سنة وانت طيب
متهيألي برضة مدونتك اتعملت تقريبا في نفس التوقيت
ان شاء الله المدونة تكبر
بس بلاش موضوع القبض ده
احنا غلابة يا عم و مانستحملش
و بعدين طول عمرنا نقول السجن للرجالة ..مالهم البنات بأه
:)
تحياتي ليك و للعالم الحلو الحنين
mariam
كل سنة وانت بألف خير يا مريم
منورة المدونة
آه يا دماغي
كل سنة وانت بخير
و التدوين دايما منور بأهله
الحمدلله اني بارسم بسمة على وجه حد
ده شئ يسعدني
تحياتي
camera girl
كل سنة وانت أطيب يا قمر
مصري
شكرا ليك
و كل سنة وانت بخير
عمرو غريب
يا أهلا بالشباب الصاعد
أيوة كده ان شاء الله فيه امل
شكرا على التحية
تحياتي
هاني جبر
شكرا ليك يا هاني
سعيدة بمجيئك
وان شاء الله ماتبقاش آخر مرة
أعتقد اني استفت من سنة تدوين
لكن الواحد كل اما بيعيش بيتعلم
إنسانة
يا اهلا يا أهلا بالقراء السريين
انا عارفة ان فيه كتير لأني ساعات باعمل كده
ألف ألف في المدونات و مالحقش أسيب تعليق
شكرا ليكي و اهلا بيكي على طول
تحياتي
ابن ناصر
كل سنة وانت بألف خير
شكرا ليك
smraa alnil
شكرا ليكي يا قمر
النشر في الجرائد شئ طبعا يسعدني
لكن يحملني مسؤولية اكبر
كل سنة وانتي بألف خير
ادام الله الود
abdelrahman ayyash
كل سنة وانت طيب بمناسبة عيد ميلاد مدونتك
و عقبال السنين القادمة
و تبقى أحلى ان شاء الله
إمام الجيل
كل سنة وانت بخير
ربنا يقدرنا ان شاء الله
يا مراكبي
فعلا مجرد وسيلة للفضفضة بالنسبة لناس كتير
مجرد شباك نبص منه على بعض
و نعرف اننا مش لوحدنا و فيه ناس كتير بتحس باللي إحنا
بنحس بيه
المشاركة شئ ممتع و التدوين فعلا أثر في حياتنا كتير
تحياتي
sampateek
ألف مبروك على عيد ميلا مدونتك يا سمباتيك
فاكرة في اول المرحلة كانت الناس دايما بتقرن أسماءنا انا و انتي
و اوسة و شهروزة مع بعض..اكننا دفعة واحدة في التدوين
دلوقتي المجتمع التدويني بيكبر كل يوم
و التميز فيه أصبح أصعب
كل سنة وانتي دايما متميزة و دايما سمباتيك
علا من غزة
منوراني على طول يا علا
انتي كمان من الناس المحترمة جدا الي حسيت اني اكتسبتهم
كأصدقاء خلال السنة دي
رغم ان كل علاقتنا هي التعليق على البوستات لكني بجد باحس
اني فعلا باعرفك
ان شاء الله يجي يوم نعتزل الفرسة كلنا
يااااارب
nouran
وانت طيبة يا نوران يا جميلة
و ماتخافيش عمر اللي بيفرس في مصر ماهيخلص أبدا
تحياتي
عين ضيقة
كل سنة وانت بخير
عقبال السنة الكتير فعلا
:)
بنت القمر
يا ستي ولا متأخرة ولا حاجة
اهلا بيكي على طول
سعيدة ان الأسلوب عجبك
مستنياكي على طول
تحياتي
بيجاسوس المصري
شكرا ليك
و يا رب مابقاش مفروسة
بجد باتعب قوي
تحياتي
كل سنه وانتى طبه يا سوسه وان شاء الله دايما فتقدم مستمر
بجد مدونتك من ضمن المدونات الى فعلا فى شده الاهميه وبنستفيد بجد منها فى حجات كتير
جزاكى الله كل خير ووفقك باذن الله دائما
سلاااااام
والله يا سوسه حاجه غريبه
الواحد مش عارف ايه الشعب الفافى دا الى موراهوش اى مسؤليات ولا حسين باى حاجه
الدوله تعبه نفسها وهما ولااااا هنا
ال ميه ال ايه يعنى 11 يوم؟؟؟ مش كفايا انهم كانو بيلاقوهه قبل كدا متوفره دايما خلاص يعنى جت عل كام يوم دول
وايه الاوشاعات المغرضه دى لى بيقولوهه على فيروس سى
دا كلام دا يعنى كدا يظلمو المستشفيات الحكوميه الى بتخدم الشعب
والله شعب ابن شعب صحيح
يعنى نعالجهم برمز مادى مش عاجب منعالجش مش عاجب ... دول لازم يخدو على دماغهم
على رايك الناس دى ملو البلد
ربنا يبعدنا عن امثالهم
سلاااااااام
والله يا سوسه حاجه غريبه
الواحد مش عارف ايه الشعب الفافى دا الى موراهوش اى مسؤليات ولا حسين باى حاجه
الدوله تعبه نفسها وهما ولااااا هنا
ال ميه ال ايه يعنى 11 يوم؟؟؟ مش كفايا انهم كانو بيلاقوهه قبل كدا متوفره دايما خلاص يعنى جت عل كام يوم دول
وايه الاوشاعات المغرضه دى لى بيقولوهه على فيروس سى
دا كلام دا يعنى كدا يظلمو المستشفيات الحكوميه الى بتخدم الشعب
والله شعب ابن شعب صحيح
يعنى نعالجهم برمز مادى مش عاجب منعالجش مش عاجب ... دول لازم يخدو على دماغهم
على رايك الناس دى ملو البلد
ربنا يبعدنا عن امثالهم
سلاااااااام
كل سنه وانتي طيبه
وعقبالي كده يارب مايتنشرلي على حبل الغسيل على السطوح حتى لو شُورط
وبالمناسبه الحلو دي أنا عازمك عندي على طبق فول مدمس في مدونتي
Post a Comment