Friday, September 22, 2006

هتشربوه يعني هتشربوه






أظن بعد مؤتمر الحزب الوطني الأخير ده اللي ماكنتش فاهماله هدف و لا معنى و لا طعم..ما عدش ينفع بأه يبقى فيه جوانا بارقة أمل ان جيمي مش جاي..كل حاجه في المؤتمر تكاد تصرخ ..هتجيبها كده ...هتجيلها كده ..هيا كده ..من أول طلعته البهية من فوق المنصة اللي ملطوعالنا في كل الجرايد و نشرات الأخبار لحد تأكيدات معظم أعضاء الحزب الموقر ..انه من حقه يترشح و لو اترشح ..ده مش هيبقى توريث ..الشعب هو اللي هيختاره
في برنامج القاهرة اليوم مثلا كان حسام البدراوي يجاهر بها صريحه ..هو حر يترشح و الناس حره و هترشحه..آه هترشحه و ده شئ مفروغ منه


طب تخيل كده بكره الصبح بابا حسني - بعد الشر بعد الشر بعد الشر- اتكل ..(ايه ده مين بيقول يا رب؟...ياعسكري خده ع الحجز )......كنا بنققول ايه ؟..آه لو حصل يعني بعد الشر عنه و انشالله اللي يكرهوه و بغض النظر عن آراء العلماء اللي بتؤكد انه مش من الفصيلة اللي بتموت وان بطارياته ليثيوم و مدى الحياة ..لكن هنفرض فرضا حصل ..هيحصل ايه؟؟؟؟
الدستور بيقول الأحزاب اللي ليها نسبة محدده من مقاعد مجلس الشعب هي اللي من حقها ترشح عضو منها ..حتى لو من كرم أخلاق (رجال ) الحزب الوطني سمحوا لكل الأحزاب يتقدموا بمرشحين -..هنفاجأ بلسته زي اللسته بتاع السنة اللي فاتت فيها شخصيات هلامية مالهاش أي لازمة ..و اللي له لازمه هيتحبس..و نلاقي الحزب الوطني هيعمل تمثيلية ظريفة زي بتاع اليمن ..و النبي يا جيمي تترشح ..لا ياجماعه مش عايز ..و مش عايز ليه يا جيمي داحنا هنريحك ..ياجماعة لا عندي النية و لا الرغبة ...و رحمة أبوك مانت قايل لأ ,خلاص بأه حلفناك بالغالي ..آه لو ماكنتوش بس تحلفوني ...حاضر يا جماعه ..أنا مش عشاني ..أنا عشان مصر


و حركة كفاية تعمل مظاهرة .. و يمكن الإخوان يعملوا اعتصام و يقعدوا يدعوا عليهم في صيام الإتنين و الخميس ..و بعدين ؟...و بعدين؟................بس خلاص..خلاويص على رأي نيللي
الناس المثقفة هيتسد نفسهم و مش هيروحوا ينتخبوا (كالعاده) و كل اللي هيعملوه انهم هيهزوا دماغهم و يمصمصوا شفايفهم و يقولوا ..آدي اللي كنا عاملين حسابه..و الناس اللي بتاخد عشرة جنية عشان يدوا صوتهم كتير ..و الأمن اللي بيمنع الناس يدخلوا اللجان أكتر ...و الناس باه اللي عندها بطاقة انتخاب و بيروحوا عشان خايفين من الغرامة هيبصوا يلاقوا لستة أسامي ما يعرفوش منها غير واحد بس..و بعبقرية المصري المعروفة في كل المجالات و بالحكمة الزلية اللي مخليه مافيش حد بيتعامل معانا الا لازم يدينا على قفانا و احنا نقوله كمان ..هيختار الراجل أو الست دول اللي يعرفه ..ما هي الحكمة بتقول اللي نعرفه أحسن من اللي مانعرفوش


و البعض بصراحه له آراء عبقرية عظيمة ..زي الراجل اللي اتصل بالقاهرة اليوم و قال ...يا جماعه ده واحد عايش مع ريسنا و معاشرة كرئيس أكتر من 25 سنة ..يعني عنده خبره عظيمة مستقيها من ريسنا الحكيم ..يبقى ليه نضيع خبرة كبيرة زي دي على مصر ..ليه مانستفدش منه ؟؟؟ ..و بعدين مافيش توريث ولا حاجه ..الريس لو كان عايز يورث كان ورث علاء ..لكن جمال هو اللي خبره و بصيرة و لازم مانضيعهاش على نفسناو من هنا ..


و من موقعي هذا ..أهنئ الشعب المصري جملة و أفرادا بتولي الرئيس جمال مبارك و من وراءه تامر جمال مبارك اللي هيكون طبعا عاشر أبوه بتاع 30 سنة و استفاد من خبرته و ده مش معناه ان الحكم في مصر هيمشي على أساس التوريث لأن لو جمال عايز يورث الحكم كان ورث ابنه لؤي (انت عارفين انه البكري)..و هلما جرةفياللا يا حبيبي انت و هو...غمض عينيك و سد مناخيرك و اشرب...مر شوية صحيح بس مفيد عشان تخف و تبقى حلو...تخف من إيه ؟ من اللوثة اللي انت عايش فيها و التهيؤات اللي بتجيلك ان السيناريو ده مش هيحصل...هيحصل غصب عنك و هتشرب ..يعني هتشرب

-------------------------------------------------------------------
إقرأوا أيضا موضوعي عن مصلحتكم في
أن يتولى جمال مبارك حكم مصر
هنا

42 comments:

Nouran said...

هيه انا اول كومينت عايزة لفة قمر الدين -ابيتاف هي اللي حطت القانون ده- اولا حمدلله ع السلامة بعد الغيبة الطويلة دي
ثانيا سبحان الله بابا كان لسه بيقولي نفس الكلام من شوية انت كنت سمعانا ولا ايه الموضوع بقى واضح وضوح الشمس ومحدش هيتكلم والموضوع مش توريث ولا حاجة وتحيا مصر وتحيا ماما سوزي وكفاية كده ع الشعب هيطمع
اه هو جيمي خلف امتى انا معرفتش الموضوع دهيعني خديجة هانم بقى اسمها ام لؤي هههههههههههه

Khaled gad said...

المفروض احزاب المعارضة دلوقتى تفكر ازاى هتواجه جمال لما يمسك الحكم علشان تستعدله

sara... said...

لا بقه
لا بقه
والله العظيم كده حرااااااااااااااااااااام
والله لانا معيطه
عاااااااااااااااااااااااااااااااااااااااااااااااااااااااااااااااااا

عبدالله مفتاح said...

فنانة يا سوسة كلامك كله حقيقي
خصوصا حتة انا برشح نفسي لان الشعب عايزني ومصر محتجاني وانا مقدرش اردش على مصر
الكلام ده هيحصل بجد بجد هيحصل

Gid-Do - جدو said...

سوسة المفروسة

المفروض ياسوسة تغيرى اسمك واقترح ـ تبقى سوسة المفروسة قوى او جدا بيتهيقلى جدا فيها مزيكة وممكن تبقى جدا جدا ـ انت لية يابنتى ياحبيبتى بتحقيدى على الجدع الشاب الحليوة ؟

انت متعرفيش المثل اللى بيقول ابن الوز عوام يعنى الوز النونو يطلع من البيض يعوم على طول

هتيلى مثل كدة يقول ان ابن المفروسة عوام مفيش يبقى ابن الوز يكسب

لازم امشى شايف مخبر على النصية ـ سلام يامفروسة جدا

Montage said...

lel asaf en Gamal haykoon ra2ees ghasb 3an kol el nas la2n mafeesh 7ad f masr beye3mel haga gher e3tesam, w da hayhemo f eh?

Also, unfortunately kol el7arakat el mo3arda beyatazahroo w yemdo wara2a bet2ool ennohom against el tawreeth w bas.fa useless awe.

I'm still optimistic en mostaheel el sha3b yoskot law Gamal ran for president, afteker di el haga el momken te2awemhom....

Ahmed Shokeir said...

امبارح حلمت اللهم اجعله خير ان البطارايات الليثيوم على غير العادة خلصت ، وفعلا اكتشفت في الحلم ام مصر الولاّدة ق اصابها العقم من كثرة حبوب منع الحمل اللتي تعاطتها خلال الربع قرن

خلاص تعاملوا مع الموضوع كانه واقع واحلامي ماتخيبش واسألوا وحيد الاقصري وفوزي غزال

اروي الطويل said...

ياه انا السابعة ياحلاوة دايما ببقى الخمسين او الستين كده يعنى
وبعدين باباك اكيد اكيد ما قرأش البوست ده
تعرفى انا والله قبل ما ببدأ قرايه بكون بضحك فعلا

Anonymous said...

ضحكتينا و بكيتينا في نفس الوقت
فعلا ، لازم تشرب
كلنا هنشرب

tota said...

سوسة المفروسة قوى جدا خالص
لازم تحاولى تخلصى نفسيتك من السواد اللى جواها
الولد وارث الشكل والسياسة العقيمة قصدى العميقة من باباه اللهى يتحقق حلم كل واحد والبطارية الليثيوم تفرقع قولى امين وبيلعب بولينج وعضو فى الحزب الوطنى الديكتاتورى المصرى وعامل جمعية شباب المستقبل وهيقبض الاول وابن ماما سوزان واخو علاء وابن اخ واخت وقريب ونسيب عائلات ثابت
هل فيكى يا مصر المحروثة من يحمل مثل هذه المواصفات حتى يرشح نفسه ولو فيه واحد لما يرشح نفسه ويكون فيه المواصفات المطلوبة يا ترى يا هل ترى الانتخابات هتكون نظيفة والقطنة ما بتكدبش ولا عادى يعنى زى كل سنة عندك معندكيش بطاقة اسمك اتكتب ورشحتى وفلترتى وانتخبتى والف مبروك

سيناريو سليم يا سوسة ومحتاجين بس معجزة علشان الى متوقع ده ميحصلش
سوستى بحب اسلوبك الحقيقة انت هايلة
تحياتى

Anonymous said...

we malo ya sha3b eshrabo eshrabo 3ashan tenso
a3ouzo belah da7a ramadan 3l abwab same7na ya rab

Anonymous said...

صحيح يا سوسوا سيبك من موضوع الحزب الوطني ده ..، إحنا سمعنا إنك علمانية من أتباع الحزب الوثني

صحيح الموضوع ده ؟

Anonymous said...

من أكتر الحاجات إلي عجباني في الحزب الوطني الهزلي فعلا بجد
و مع إنوا حزب رجعي و متخلف و بتاع بلطجية و نسوان
لكن من أكتر حسانته
أنه جالس على أنفاسكم هيموتكم من الغيظ
(!!)
فعلا حاجة جميلة جدا
أهوا بردوا منوا في بعضوا بيتاكل
عقبال ما يقضي الحزب الحاكم على الخوان المفلسين و العلمانين و الشيوعين و الحزب الوطني كمان
و كل الزبالة الفكرية إلي في بلد
و أسأل الله جل و علا في اليلية الطيبة دي أن يهدي الرئيس و أولاده و ييسر له بطانه الخير و يصرف عنه بطانة الشر و الفساد
و يكبت شركم

يا عالم يا ربش

مفلس افندى الرايق said...

طيب ممكن ابقى زودى السكر علشان اعرف اشرب

انا هاشرب علشان مافيش غيره مشروب متوفر
وهو ده المشروب الوحيد اللى معاه صلاحيه

بالف هنا

واللى نعرفه احسن من اللى مانعرفوش ههههههههههه

كل سنه وانتى طيبه تعالى اشربى شاى بقى

أحمد المصري said...

معتقدش الشعب حيقبل واحد كداب يحكمه السيناريو حيحصل- إن شاء الله-لكن أعتقد في حراك سياسي أو فوران سياسي حيصل بعديها لئلا قول يارحمن يارحيم على مصر

عمر said...

يعنى يا سوسه بدل ما تعزمينا على شويه تمر هندى او قمر الدين بمناسبه رمضان مش لاقيه الا القرف دة حتى برة مصر ورانا ورانا ربنا يرحمنا..........يعععععععع

Anonymous said...

كدة نوران تكسب القمر الدين
ماشي

المهم

انا محروق دمي
من جيمي؟؟

ابدااااااااا
منك يا سوسة

متغاظة من جيمي ليه يعني
ده برج الجدي
يعني مننا و علينا

استغفر الله العظيم يا رب
و كمان بتبشري علي باب حسني
اعوذ بالله

ده رمضان كريم يا بنتي

سلام عليكم بقي عشان اعصابي
مالي؟؟ ما انا ماخدتش القمر الدين بتاع اول تعليق
هههههههه

Adel said...

سوسة الننوسة جبتي ايه جديد علشان الخلق دي كلها تعلق وتهللك عادي هو جاي جاي وحتى سمعته بيقولك وغلاوتك لاجي (على طريقة محمد صبحى ( كل سنة يا قمر وانت طيبة افطري فوسط اهلك احسن لك خلاص البلد دي مش بتاعتنا وعلى راي ابراهيم عيسى حكومة وطلع لها شعب...ودقن ههههههههههه

Anonymous said...

اولا كل سنة وانتم طيبين وثانيا انا مش هاعرف اخد راحتى علشان احنا سابقينكم بيوم يعنى احنا صايمين انهاردة بس مش مشكله عموما ياسوسة كالعادة بعد غيبة رجعتى ببوست جامد بس على رأى المزاجنجى (مساء الفل ياباشا ) مافيش جديد بقالنا ربع قرن واحنا عارفين ومن وهما فى اللفة الموضوع متقسم عايز الشخشيخة ولا اليويو ؟ يعنى عايز السلطة ولا الفلوس ؟ عوعو اختار الفلوس وشارك ب99.99% من المشاريع الاستثمارية فى البلد (اوعو تسألو كل دة منين لان دة معروف ... ايوة من مصروفة اصله كان غاوى توفير ) اما بابا جيمى (باعتبار ماسوف يكون ) اختار انه يعانى من نفس معاناة السيد الوالد ويشيل المسئولية عنه وعلى رأى الست صفاء أبو السعود ان دة مش تكليف مش تشريف ولا فخفخة ولا ملك وجاة هههههههههههه
عمنا هيكل بقى حلل الموضوع بطرقة تانية وقال ان ابو بطاريات ليثيوم فكر وقال الشعب عايز مين بعدة فقال انا عايز اعين نائب وعمل استفتاء وطلعت النتيجة كالاتى عمرو موسى والجنزورى وعمر سليمان وابو غزالة وبدأ المخطط الذرى موسى اترمى فى الجامعة العربية ومش هايطلع لانة كل مايقب على السطح يغرقوة تانى والجنزورى متحددة اقامتة وعمر سليمان شغال رايح جاى تل ابيب - غزة مغروس هناك ومش هايطلع غير على ظهرة وشايلينة أربعة
وانا بحكم اتصالاتى الجامدة قوى مع الاجهزة المختلفه احب اقولكم ان الشعب هايطلع يهتف باسم جمال مش مصدقين اسمعو السيناريو دة :- البطاريات تفضى وفجأة جمال على الكرسى باليل والناس نايمة يصحو يلاقو قرار جمهورى بالغاء قانون الطوارءى (لان هما مش محتاجين قانون علشان يلمو الى مش متربيين وبيغلطو فى النظام ) والقرار التانى تأميم الشركة المصرية للبان شركة مساهمة مصرية (وبردة علاء الى هايشترى الأسهم ) ونطلع احنا فى مظاهرات بالروح بالدم نفديك ياجمال .....ويظهر قدامنا ويقول ايها الشعب انا بس كنت قاعد على الكرسى لحد ماتجيبو حد تانى يمسك لكن دى مسئولية صعبة ارجوكم انا باعلن انى بانتنحى واحنا نقول (..... ..... لاتتنحى ) وتانى بالروح بالدم نفديك ياجمال ) وساعتها ينزل دمعتين على خدة ويقول لن احنا ياعينى ضغطنا علية وقدام اصرارنا الشديد قرر انة يستمر بس لابد ان نساعدة على الاستمرار
حد يقولى مين الى هايبقى فى المظاهرة دى اقولك ياالمظاهرة يالمعتقل تختارو اية ياحلوين وبعدين لو حطينا الشعب كلة فى المعتقل مش مشكلة هانلبس الامن المركزى ملكى ويقولو بالروح بالدم نفديك يا أبو لؤى

Me2nour said...

ياللا كله زي بعضه مافتكرش إن لو حد تاني غيره مسك البلد هيفرق

كل رمضان و نحن غلى الله أقرب و كفاية نم يا سوسة في رمضان :)

Dr. Tantawy said...

فعلا على رأي توته .. ايه السواد ده

ماله جيمي انشاء الله .. راجل زي العسل و دمه خفيف

سمعتيه وهوه بيهزر مع حسين عبدالغني مدير مكتب الجزيره . . والله انا حبيته .. اهه تغيير برضه يبقى عندنا رئيس روش ههههههه

admelmasry said...

كل شنة وانتي طيبة يا بنتشي

رمضان كريم ..

Anonymous said...

بجد يا سوسو أنا عاوز أعرف إيه هوا منهجك الفكري

هل أنت تنتمي إلى الطائفة التكفيرية أم تنتمي إلى العلمنة الكفرية!! ؟
و لا إنت خلطبيته مهروسة و مفروسة مش أكتر ؟
كل الجراثيم الفكرية و الفطريات و الطفيليات و البكتريا سالبة و موجبة الجرام و بقية الزبالات الفكرية الحية التي تعشش في أمخاخ كثير من شعبنا الغلبان تدعوا إلى الإنقلاب على السلطة و تختلف في كل شيء إلا على سب و شتم و خلع الحكام و لعنهم و حاشيتهم و أولادهم

لكن التساؤل بعد ما تخلعوهم ما هو الحال ..ستطحنون في بعض و تدور الكرة من سب و شتم إلخ إلخ إلخ

المشكلة أكبر من الحكام المشكلة فيكم أنتم صدقوني

و الأهم بدلا من هذا الكيد المستمر لحكومة شعبنا ماذا تريدي بعد ذلك ؟.
ما المنهج الذي ستنصبيه لنا لعله أرذل و أغبى و أظلم
هذه هي المشكلة الحقيقة و التخوف الرئيسي

أنا لست معك أبدا في طريقتك الهمجية بداية و متأكد أنك مهروسة و مدعوكة و متخبطة منهجيا نهاية

الإصلاح ليس من هاهنا يا ناس يامخربين

لم أرى تعليق واحد حكيم يعقلك وسط كل هذه التعليقات

طيروا و انطحوا
و لأنكم في الطريق الخطأ و أمام صخرة كبيرة
فقد أوهى قرنكم الوعل
ليس من هاهنا الطريق
أعيدوا النظر
و كفاكم كذب و تخرصات و تفتين

Anonymous said...

من فضلك ردي عليا و ريحيني
أنا عاوز أعرف كيف تكفرون عذرا تفكرون ؟
نعم
كيف تفكرون؟

wanna b a bride said...

رمضان كريم يا سوستي

ربنا يفك فرستنا جميعا انشاء الله و يجي رمضان الجي و كلنا بخير و سعادة

soosa el-mafroosa said...

nouran

لفتين قمر الدين و كوباية عرقسوس من عندي يا ستي ..أنا عندي أغلى منك يعني يا شمعه منورة؟

جيمي اكيد هيخلف أمال يعني هيمسي حافي ...بس ايه رأيك في لؤي مش بالذمة حلو


بحب مصر

وهي فين أحزاب المعارضه دي أصلا

sara

ولو بتيجي بالعياط ماكانش حد بطل...دا امر واقع
يالا اشربي يا بنتي ..بس ماتكتريش في الشرب

عبد الله مفتاح

يااااه أخيرا كتبت حاجه عجبتك ...الحمدلله

gd-doجدو

والله وحشتنا تعليقاتك

ماتخافش من المخبر اللي ع الناصية ..ه تبعي أصلي بلم التعليقات آخر النهار و أسلمها قسم قصر النيل

ابن الوز ده هيورينا وز وز اللي كلناه بط بط

كل سنة وانت طيب يا جدو

soosa el-mafroosa said...

شهرزاد

انت اوبتمستيك ..بس أنا بسسيميستك

ما فيش أمل يا بنتي احنا بقينا زي الفراخ اللي عايزة تاكل و تنام و بس

ahmed shokier

مصر ولادة طبعا ..خصوصا في فرع المنوفية ده ..شديد ..ملاحظ ان النسل كله ولاد ..كله رويسا عشان مايبقاش فيه حجه ..رجاله من ضهر رجاله

أروى الطويل

تصدقي بابا قرا و ماعترضش ..سبحان الله مش فاهماه الراجل ده خالص

blue magnifier

نورت المدونة ..شرفنا على طول بس من غير بكاء

tota

يا بنتي أسلوبك انتي اللي رائع
اعملي للمدونة بتاعتك أكتيفيشان بأه ..مسانيين الإبداع

soosa el-mafroosa said...

anonymous

احنا كلنا بنشرب حاجه أصفرة كل يوم ع الرق


حلبة

الصولجان
.
.
.
.
طيب

مفلس أفندي الرايق

اشرب اشرب ولا يهمك

اشرب شاي منين ..يبقى مابقيتش مفلس باه

انا عايزة ساندوتش لحمة

أحمد المصري

تفتكر؟...انا عن نفسي فقدت الأمل خلاص

عمر

يا عيني قطعت قلبي و تلاقيك نفسك في التمر هندي

ربنا يفك حبسك ..قصدي غربتك وانا هابعتلك بتاع العرقسوس ع المطار

Dr. Tantawy said...

انا اتنفضلي جامد النهارده هههههه

soosa el-mafroosa said...

mizo

آه قال شبع قال
دا حتى المثل بيقول..البحر يحب الزياده

epitaph

ايه يا جماعه ..فيه أزمة قمر الدين في البلد والا ايه ...داحنا عندنا كتير

كله من خير بابا حسني الله يخليه يا رب

يخليه عنده ..مش عايزينه

المزاجانجي

الحقد اشتغل أهه
يا عم مزنوق في تعليقين قول ...أنا رقبتي سداده ..بس هتحقدلنا ع التعليقات بتاع حبايبنا ليه بأه ..ده رمضان كريم

كل سنة و انت طيب و الأسرة كلها بخير

مصري مغترب

أولا كل سنة و انت طيب...شفت الناس كلها صامت الا احنا

لأ و لسه على لستة المبعدين هتلاقي عبد السلام محجوب ..و رشيد محمد رشيد

ومحدش هيقدر يفتح بقه

ويا اما البطاريات تفضى يا إما يعملوا الجزء التاني من بابا أوبح و بابا يحط أبيه ع الكرسي

و يمكن يقول دي فترة انتقاليه فترة واحده بس ..زي ما باباه عمل أول ما مسك

يالا ..يا سيدي هي كانت بلدنا يعني


me2

هابطل نم لما رمضان يبتدي

مش هابطل قوي ..ماقدرش ....هاحاول عشان خاطرك

مجرد أحاثيث

اثرب يا حبيبي كل المية اللي انت عايزها ..بلضه مل يا حبيبي هنعمل ايه

قثمتنا كته


dr.tantawy

انت غيرت اسمك ليه ...آه عقدة الدكاترة اللي لازم يعرفوا الدنيا كلها انهم دكاترة..حط ع الإسم هلال بالمرة:)))

هو من ناحية ظريف ..فهو ظرييييييف موت موت الصراحه ..يعني هايجيبه من بره؟

soosa el-mafroosa said...

admelmasry

ايه يا بني جرالك ايه كفالله الشر
انت بتخلص و الا ايه

الصولجان

.
.
.
برده طيب

wanna-b-a-bride

كل سنة وانت طيبه يا برايد و السنة الجايه تبقي في بيت العدل انتي و كل البنات و يبقى الكل بخير انشاء الله

dr. tantawy

صحيح أنا رحت أدور في الحتت اللي انت قلت عليها مالاقيتش حاجه

ايه اللي حصل؟

أُكتب بالرصاص said...

سوسة

ادخلي ذاكري
او أقرئي قرآآآن



والا اقولك .اديني بابا اكلمه


خلي الشهر ده يعدي على خير

hero said...

تعرفي يا سوسة ايه اغرب حاجة في مؤتمر السنة دي انهم عايزين يرجعوا البرنامج النووي المصري تاني وطبعا بيقولوا انه هيبقى برنامج سلمي وانهم بيدرسوا ثلاث مشاريع لانشاء محطات للطاقة النووية النظيفة
بس انا بقة اموت وافهم ايه المغزى من التوقيت اشمعنا اعلنوا الحكاية دي في مؤتمر الحزب الوطني ؟

farida said...

طيب
ما كلنا فهمنا يا سوسه و اتفرسنا

في مشكلتين
الاولى فرستنا اللي حتفقع المراره
و لو نزلنا تظاهرنا و قلنا لا بقى
انتي عارفه حيحصل فينا ايه
و الامن المركزي ما يتوصاش
ممكن نحل المشكله دي
إزاي؟؟

بإن كلنا كلنا نعتصم في البيوت
يعني احنا كل مظاهره ننزلهم الشارع و يضربونا على قفانا

يجرى ايه لو مره كده اول يوم في توليه الحكم
آلاف من الموظفين المطحنونين المظلومين امتنعوا عن الذهاب للعمل او النزول من اساسه احتجاجا

ساعتها مش حيقدر الامن المركزي يطلع يضربنا في بيوتنا
ممكن يقطعوا عننا المياه و الكهرباء
لكننا حنكون عاملين حسابنا

اصل مش ممكن بعد الفقر و الذل اللي وصلنا له و برضه ساكتين كده

تخيلي مثلا 40% من الشعب المصري معتصم في بيته احتجاجا

فضيحه دوليه


انا واخده الفيلم ده من فيلم مديحه كامل بتاع الستات لما اعتصموا كده و الدنيا فضت
و الله هو ده الحل مع الحكومه
الفساد خنقنا و تعبنا
بنشتغلكم و تسرقونا و تهينونا
و كمان تذلونا و لا ترحمونا
و لواتظاهرنا تضربونا
خلاص و لا شغل و لا نزول
لغاية ما الحكومه الفاسده تتغير
او لغاية ما جمال و اعوانه يعرفوا ان الشعب مش بينتخب
بقالنا 24 سنه مش بننتخب

نيجي بقى للمشكله التانيه و الاهم
لو جمال لم يمسك الحكم
نرشح مين؟؟
لقد قضوا على الاحزاب و التجمعات و لم يلمع طوال السنوات الماضيه سوى الاسماء الفاسده
لازم يكون في حل
في ناس موافقه على جمال بالسبب ده
بيقولوا مين غيره حيمسك؟
انا حليت المشكله الاولى يا سوسه

قولي لي نعمل ايه في التانيه

3rby said...

بيستعهبطوا يا عم هيرو...زي كده السبعين مليون فرصة عمل وبيت لكل من هو علي ارض مصر حتي النمل...وعشرين الف مصنع


عالعموم والله يا سوسة انتي نكدية الي ابعد الحدود...يا شيخة احنا صايميين...ليه بس بتقلبي علينا المواجع


رمضان كريم يا مفرسة مش مفروسة

علا من غزة said...

صحيح انا مش مصرية ومكن تفتكرو ان الموضوع ده ما يهمش الا المصريين .. لكن بجد الفرسة والنكد واصلني من الحكاية دي من كلامكم .. ومغيوظة من نفسي لأن يوم ما حصل السيناريو ده في سوريا (في ابن برج الأسد) قلت اكيد الكلام ده مش ممكن يتكرر تاني ,, زقتها مكنتش متشرفة بالابنين الحلوين جمال وشيرين .. ربنا يصبركو ويقويكو واحنا معاكو حتى النصر او الشهادة

saso said...

ولو انها مش هتبقي مفاجاة من ساعة طائر البشاروش السوري والناس مجهزة نفسها للمسلسل
عارفة يا سوسه اللي مزعلني بجد
لو حبيب قلبنا اللي اختارناة وبايعناة ومعاة لماشاء الله زي ما هو بيقول اتقلب وفصل شحن مين ممكن يقعد مكانه ع المنصة وننشن عليه
المصيبه اني مش لاقية حد عندك انتي اقتراح؟

Ma 3lina said...

Ur an amazing writter bgd mash alah 3leeky , ana mot 3la nafsy min el de7ek min mawdo3ek ,2a2ol ih 7asbia alaho we n3em el wakeeel fehom

Juka said...

Hallo,

Tab enty etfarasty wenty bettab3y el2akhbar.. anna kont hennak fe Sharm be7okm shoghly we kanet ayam 3agiba. Jimmy we Khadiga ray7een. Jimmy we Khadiga gayeen. Di kanet speaker fe wa7da men elsessions. Be2amaret eih amoot we a3raf. Allah 3alina ya zaman.

Anonymous said...

اقسم بالله العظيم انك بنت جدعة قوى قوى قوى
وكلامك اطربنى جدا
انا عموما فلسطينى بس لفت بالى خفة الدم فى الاسلوب والقوة والتعبير
وسعة الحيلة والتفكير

ومبروك عليكم جيمى لأنكم حتشربوه زى باقى الدول واهو عرفنا الرئيس سلفاً ونسبة الاصوات كمان
وليييييه الغلبة؟؟؟؟؟؟؟؟؟؟؟؟

islamventura said...

بعد الشر ان شاء الله الشعب اللى الوحش

واحـــد مـــــن الـنـــاس said...

والله انا ساعتها هعمل كل شيء اقدر عليه
ميهمنيش ايه اللي هيحصلي
بس بجد هيبقى عااااار اني اعيش في مصر وهيا متورثة

لاني لو بعتبر نفسي حر فعلا ..مرضاش بتوريث بلدي

ولو وصل الامر لتفجير نفسي او عمل عملية ارهابية
فاقسم بالله هعملها

...قال احمد عرابي رحمه الله : لقد ولدتنا امهاتنا احرار والله الذي لا اله الا هو اننا لن نورث ولن نستعبد بعد اليوم ...
بعد اليوم ...


شكرا على كلامك اللي يفرس يا سوسة