Friday, March 02, 2007

عشان خاطر عيونهم



موضوع التاج ده أنا نفسي أفهمه من اول مادخلت البلوجر
يعني إيه فايدته و مين اللي بيبتديه و هل فعلا إجابات كل واحد بتهم الباقيين
مش عارفة ..بس أنا شخصيا لأن الناس اللي بحبهم و باحترمهم بيطلبوا مني أعمله بعمله ..بس ..عشان خاطر عيونهم


أول تاج من علا مراسلتنا في غزة


خمس أشياء ماحدش يعرفهم عني؟
أمممممممممممممممممممممممممممأنا على فكرة بصيت على إجابات علا و لقيت حاجتين تلاتة مشتركين بيننا..و الباقي ربنا يسهل


أول حاجة
أنا باتكلم مع نفسي كتير جدا..مش كلام داخلي و كده..لأ باتكلم مع نفسي بصوت عالي زي المجانين و مرتين تلاتة كده ظبطت نفسي باعملها قدام الناس و ساعتها عملت نفسي بادعي أو باغني و خلاص
شكلي كده هاضرب قريب


تاني حاجة
أنا مدمنة مسلسلات أمريكية و خصوصا السيتكومز يعني المسلسلات الكوميدية..و من كتر فرجتي عليها أنا دلوقتي و الحمدلله بافكر بالإنجليزي و بعدين أترجم الكلام عربي
مانا بقولكم مخي هيضرب قريب


تالت حاجة
رغم اني دايما من وانا صغيرة عشرية و باحب الكل و الكل بيحبني و الحمدلله إلا اني وانا في تالتة إبتدائي كان فيه بنت بتاخد معانا درس و كانت بطيئة شوية و كان الأستاذ دايما يضحك عليها و يهزءها قدامنا و من كتر ماعمل كده انا كمان كنت باضايقها في الكلام لحد ما مرة عيطت من كلامي و لغاية دلوقتي كل أما بافتكر الموقف ده باتخنق من نفسي و ماباعرفش عملت كده ليه بس تقريبا هو تأثير المدرس ده..ربنا يسامحه و يسامحني
بس هي دي المرة الوحيدة اللي ضايقت فيها حد بالطريقة دي


رابع حاجة
كان فيه واحد في آخر شارعنا بيبيع بقوليات و حاجات من ديو انا كنت مصاحبة شوية عيال كنا كل اما نعدي من قدامه نخطف شوية سوداني و نطلع نجريمرة قفشنا و قالي افردي إيدك و زي الأفلام بقيت أنقل السوداني من إيد لإيد ورا ضهري لحد لما وقعت السوداني على الأرض و الراجل سابني أمشي بس بصلي بصه لسه فاكراها لحد دلوقت و طبعا مفهومة اني ماكررتهاش تاني


خامس حاجة
مرة كسرت قفل بتاع المسقط بتاع عمارتنا رغم ان صاحب البيت لو كان عرف كان سجنيبس كان فيه قطة صغيرة محبوسة لمدة 3 أيام من غير أكل و لا شرب و كل السكان كانوا مش عارفين يوصلولها و خايفين يكسروا القفلاستنيت في يوم و كسرته لما ما كانش حد شايفني و خرجتها و بعدين رجعت القفل زي ماكان
شششششششششششششش
ماتقولوش لحد..مستقبلي حلو كهجامة مش كده؟
----------------------------------------------------------


تاني تاج من د/طنطاوي

اللي بيتهمني إني بعتهم خلاصأنا على العهد يا طنطاوي


اية اللي حيحصل لايميلك لما تموت؟

عادي..هيفضل المدة اللي بيسمحوا بيها و بعدين هيفرقع من كتر الرسايل اللي فيه أو الشركة تلغيه اديت الباس وورد لحد قبل كده؟لا لا لا يا بابا لا


لو اه كانت طبيعة علاقتك بيه اية؟

انظر الإجابة اللي فوق


اسمك؟سوسة ..ليه ..فيه كبسه والا ايه؟


اسم الدلع المشهور وسط اصحابك؟حد يقدر يدلعني؟؟

..دانا كنت قطعت خبره

عمرك؟بين ال20 و ال30..و انت و ذوقك بأه

برجك؟في الأهرام القوس ..في الأخبار الجدي..بس انا بصراحة مابافهمش في الكلام ده


مجال دراستك؟صيدلة ...للأسف


شخصيتك نوعها ايه؟شخصية قيادية..ممكن أوديك في داهية و انت مبسوووووط و بمزاجك..قلبي أسود حبتين ماباعرفش أنسى الإساءة خالص..عشرية و متكلمة..لمضه حبتين تقدر تقول..باتكلم في كل المجالات و ده ياعات بيخنق مني بنات كتير


المود بتاعك؟ساخر سودوي..باتوقع البلا قبل وقوعه و أضحك على نفسي قبل ماأضحك على التانيين


وقت فراغك بتعمل فيه ايه؟الفرجة على الأفلام و المسلسلات الأجنبية أساسية و لو مالقيتش حاجة تنفع في الدش أدور عليها على النت..البلوج كمان شغل وقت فراغي بشكل كبير و بعد كده القراية اللي دلوقتي بقت أقل كتير من زمان للأسف


الاكلة المفضلة؟بابقى في أسعد حالاتي لما آكل حمام محشي ..خصوصا اني شاطرة في عمايلة حتى اسألوا بابا


الصفات اللي خدتها من بابا؟القلق ..و قبل ما أخرج من البيت في أي مشوار لازم أبقى راسمة خطته تمام خطوة خطوة عشان أرتاح


الصفات اللي خدتها من ماما؟الله يرحمها..كانت لماحة و بتفهم في كل شئ..عشان كده لو كانت طرف في أي محادثة كانت بتملا محلها تمام

اكتر 6 حاجات بتكرهها؟ـ الغباءـ الغيرة ـ الشاتـ -الخروج عن الأدب و خصوصا اللي بيعتبروا نفسهم مثقفين و بيعتبروا الخروج على كل التقاليد هو طريقهم للحرية ـ الوسايط بكل أنواعهاـ الناس اللي بتلزق في المواصلات بكل سماجة ولازم يفوروا دم الواحدة و يخلوها تعمل 3-4 خناقات كل يوم ع الصبح


اكتر 6 حاجات بتحبها؟ـ عيلتي ..أبويا و اخويا و أمي الله يرحمهاـ بلوجر..عشان اداني فرصة أتعرف على ناس كتير بحبهمـ النشيد القومي ..رغم انه رخم و بايخ و مالوش معنى لكن أكتر حاجة باحب أسمعها و أتأثر بيها
بس ..تخيلوا اني ماباحبش أي حاجة تاني ..مش باقولكم شخصية سوداوية؟


الشغل بالنسبة لك؟ خنقة و ربطة و مجال مالوش أي علاقة من قريب ولا بعيد بشخصيتي و لا إهتماماتي ..لكن أعمل ايه فشلت و جبت مجموع عالي و يادوب أقنعتهم بالعافية اني مادخلش طب ..بصيت لقيت صيدلة لابسه في وشي..قدري باه هاعمل ايه؟


ايه الكمبيوتر والانترنت بالنسبة لك؟أصدق أصدقائي


الخمس حاجات اللي ماحدش يعرفها عني هي ؟ـ ماحدش يعرف مودي في أي يوم هيبقى إيهـ ماحدش يعرف انا بافكر في ايه الا لما يتنفذـ اني عندي موهبة أفهم أي شخص قدامي بمجرد ماتكلم معاه مرة أو مرتينـاني ملولة جدا جدا جدا ..بابدأ في ميت حاجة في نفس الوقت و أزهق و أسيبهم كلهم من غير ماكمل أي حاجة فيهم ـ للأسف انا من النوعية اللي بترضى بنصيبها و تتأقلم معاه ..ناقصني شوية طموح للأسف مش موجود فيا

-------------------------------------------------------


التالت من سمسم


اسم مدونتك؟سوسة المفروسة
لماذا اخترته.. ماذا تقصد به؟و الله مانا فاكرة أنا كنت باكتب بالإسم ده في عشرينات ..باعلق يعني مش باكتب مقالات ..و مش عارفة اخترته ليه ..بس انا دايما مفروسة من كل شئ..و فيه ناس كتير بتتهمني اني سوسة و بافهم كتير ..مع اني بريئه من التهمة دي


هل فكرت في إغلاق المدونة.. والسبب؟ساعات أحس اني عايزة اعتزل لما أحس اني زهقت و ان الكلام مافيش منه فايدة ..و بعدين أرجع أقول أديني بانفس يدل ما اطق


صورتك ف المدونة، رمزيتها؟أنا دورت على حاجة فيها غيظ أو فرسة و في الاخر لقيت الصورة دي ..واحدة بتنفخ ..يمكن من زهقها يمكن من غيظتها لكن أهي بتنفخ حتى لو بتنفخ في الهوا


طبيعة كتابتك في المدونة بشكل عام..
في كل الحاجات اللي بتفرسني ..سياسة بأه أخبار المجتمع .أخباري أنا.اللي بيفرسني باقوله و خلاص


لماذا تدون أصلاً؟تنفيس ..فضفضة..مشاركة آراء


أحلى جملة قيلت لك في وصف مدونتك؟السهل الممتنع


التعليقات بالنسبة لك.. أهميتها؟و إيه المدونة بدون التعليقات..على الأقل الواحد مايحسش انه بيكلم نفسه..ده غير اني في اوقات كتير باستفيد من التعليقات معلومات قيمة ماكنتش أعرف عنها حاجة ..أو أشوف وجهة نظر تانية ماكنتش شايفاها


أحلى بوست كتبته.. ضع اللينك.. ثم اذكر لماذا؟البوست بتاع أفلام الصيف أيام حرب لبنان..كان بسيط و معبر و ظريف..حتى أنا اللي ما بيعجبنيش حاجة عاجبني

http://soosamafroosa.blogspot.com/2006/08/blog-post.html
كمان الموضوع بتاع مرسى مطروح باعتبره مقال صحفي بجد ..منظم كده و بالصور اللي مصوراها بايدي..كمان كان أول حاجة اتنشرت من المدونة ..اتنشر في عشرينات
http://soosamafroosa.blogspot.com/2006/07/blog-post_14.html

أفضل مدونة قرأتها.. يمكن اختيار عدة مدونات؟كتير ..مثلا مصرنا بتاع اخويا طنطاوي نضارة شمس بتاع عمنا شقير
و ناس كتير كتير حطاهم في المفضلة على يمين المدونة


أفضل بوست قرأته.. يمكن اختيار أكثر من بوست.. ؟من نضارة شمس -المرآهمن حكايات فريدة-بوست جميل عن الفالانتاين


هل خسرت صديق بسبب كتابة هنا؟الحمدلله ماحصلش
حد قل أدبه ف التعليق.. إيه رد فعلك؟كان فيه واحد كده دخل مرة و كتب كلام في غاية قلة الأدب و كرره في حوالي 30 تعليق تحت بعض
هاعمله ايه يعني ..مسحتهم


أسوأ مدونة.. الإجابة إجبارية.. ويمكن اختيار عدة مدونات.. هي كتيرة أصلاً :) ؟كل مدونات المثليبن و مدونة الواد عبد الكريم
أسوأ بوست.. لازم تجاوب.. ويسمح بتعدد الاختيارات؟أي بوست من عند الواد عبدالكريم
أسوأ مدون.. ما هو حاتجاوب حاتجاوب؟انظر الإجابات السابقة


انشر الآن بشكل حصري بوست لم تجرؤ على نشره من قبل.. مش محتاج أقول إجباري؟ البوست أنا نشرته فعلا و بناءا على تعليمات السيد الوالد شلتهفيلم الريس حوحومش هاقدر أنشره تانيبس اللي عايزة هيلاقيه في المجمع عند علاء و منالمتهيألي لسه موجودبس انا مش مسؤوله انا مسحته ياباشا و ماليش دعوة باللي عايزين يقروه


46 comments:

ذو النون المصري said...

حلو كده
اديني باعلق كاول معلق مره جديده
مش عارف الكام لكنها ممكن تكون الثالثه
مش عارف الجايزه ايه المره دي
انا خلاص اخدت الفجله الزهبيه و الكرات الزهبي
شوفي حاجه حلوه بقي مش كله خضار كده
ز للا هو موصوف في الصيدله
عموما انا قريت بعض ذكرياتك و سعدت بها و التاجات فكرتها حسب ظني هي وسيلة القاء مزيد من الضوء علي شخصيات المدونين لانها تعتبر مختفيه خلف الشاشات
و انا اعتقد انها وسيله جيده و فيها نفع
فيه حاجه بقي كنت عاوز اعرفها
انتي فعلا فكرتي في قفل المدونه؟طب ليه؟
انا بوجه اللوم ليكي علي هذا التفكير
و اوعي تكرري التفكير في موضوع اعتزال التدوين ده ابدا بعد كده
المفروض تعرفي ان فيه ناس تانيه خلاص اعتبروكي صديقه ليهم رغم انهم لم يروكي و ميعرفوش عنك غير انك سوسه المفروسه
ووسيلة التواصل بينك و بين الاصدقاء دول هي التدوين و مهيش مكلفه قوي تكاليف هذا النوع من الصداقه
سليم كلامي؟؟؟
اوعي تفكري في الاعتزال تاني
جهزي الجايزه بس يارب متكونش جرجير او فلفل اخضر

kaed said...

اية ياأم المفاريس أنا سمعت إنك فكرتى تقفلى المدونة على فكرة عايز أقولك حاجة و اللة ابنتى الكتابة فى المدونات دى بتريح الواحد و بتخلية يفك عن نفسة شو ية المهم أنا التانى بعد ذى النون ياترى الجايزة بتاعتى إية أمبول كاتامين ولا صوديوم بنتوثال

Anonymous said...

السلام عليكم
انا سفاح الفراخ بس مش عارف اكتب من المدونه علشان مقفوله بيقلوا فيها فيرس
المهم ازيك يا بت يا سوسه كلامك زي كل مره فل الفل انا بدعي ان ربنا يكرمك و تتجوزي واحد بن حلال و تطلعي الحج السنه دي انتي و جوزك طبعا..انا بحب اقرء الكلام بتاعك اصله كلام جامد و و يتاقل بالدهب
ان شاء الله هشقر علي المدونه بتعتك بكره قبل صلاه العصر
يلا سلام

Anonymous said...

اختنا سوسة أول مرة قراءة فيها بلوجك دي كانت أول مره في حياتي أقراء بلوج ودي أول مره اعرف معني كلمة بلوج أو مدونة وكانت عن طريق الصدفة .

وبعد قراءتي لموضوعاتك عرفت بعدها جوانب بصيته من شخصيتك وملامحها فأنت نبيه نجيبه سريعة ردت الفعل لا تتركين شيء يمر من تحت يدك بسهوله وبساطه تستغلين طلقة لسانك في شد انتباه أي إنسان أظن أن حركاتك سريعة لا تحبين الهدوء وأنت مع أي شخص إما تبادرينه بالأسئلة أو تملقيه بالنظرات المستفزة إما تتجاهليه كي تتركي انطباعا عن شخصيتك .

مزاجية إلى حد كبير جداً تحبين الظهور في التجمعات وليس هذا غرور تطمعين أن تكوني محط تفكير وتحليل الآخرين عنيده إلى درجه فوق المتوسط وشخصيتك مرحة منفتحة كرثة كبيرة إذا أي إنسان سلمك عقله وبالأخص إذا كان من غير جنسك ، لم تقابلي إلى ألان إنسان اقوي منك في الشخصية وإذا حدث سوف تكرهيه وإما تهربي من المكان الذي هو فيه .

رومانسية إلى درجه كبيرة ولكن في داخلك لا تحبين إظهار مشاعرك مدلله في البيت ومحاطة بكل العناية ، تشكين وتحللين في كل حركة ورد فعل أو سكون حتى لو لا إرادية حتى تحلليها وأيضا ردت فعلك الشخصية الإرادية ولا إرادية ولأي إنسان تعرفيه وتحولين أن تحتويه وبعد ذلك تسيطري عليه .

وبعد ذلك تدعين انك طيبة .

أههه أهههه أهههه أهههههه

أنا أسف هذا ما تخيلته وارجوا أن تأخذي كلامي على انه واحد صعيدي قاعد على ألدكه .

شعر الإمام / الحلاج شيخ المتصوفين .

• إني ارتقيت إلى طودا بلا قدما خاضه روحي وقلبي منه مرعوب .

• حصباءه جوهر لم تدني منه يدً ولكنه بيد الإفهام منهوب .


• أعمي بصير واني أبله فطن ًولي كلام إذا ما شئت مقلبو .

• وفتية عرفوا ما قد عرفت فهم صحبي ومن يحظى بالخيرات
مصحوب .

• تعارفت في قديم الذر أنفسهم فأشرقت شمسهم والدهر غريبُ .

• ينادي المنادي باسمها فأجيبوا ودعوا روحي عن نداء تجيبُ .

• وما ذاك إلا أننا روح واحداً تداولها جسمان وهو عجيبُ .

Amira said...

ازيك
مبسوطه انك كتبتي حاجه شخصيه بخفة دمك بعيد عن السياسه

انا مش عارفه ليه يا سوسه الفتره الزمنيه ما بين كتابتك طالت
زهق و لا انشغال؟

خفة دمك المعهوده بتوحشني
و اسلوبك و فكرك

اعترافاتك الخمسه كانت مذهله بالنسبه لي
و بتأكد تحليل شخصيتك اللي كتبتيه بعد كده

انا مش بحب التيجان و لا حلبسها تاني ابدا

و بقول الظاهر دي خطة من امن الدوله لتحليل شخصياتنا و دراسة توجهاتنا
و ربنا يستر

Amira said...

آه على فكره

شكل البلوج الجديد عاجبني جدا

ممكن تقولي لي عملتيه ازاي؟

بس فعلا حلو و الف مبروك

ذو النون المصري said...

الصوره دي اكيد صورة كولينا الحكم الايطالي لكرة القدم
هي و للا لا؟
صورك دايما معبره
انا فاكر صورك المضحكه من ايام القطط العميا
هههههههههههه

أُكتب بالرصاص said...

من وفوايد التاج ان الواحد بعرف المخفي عن المدون
بس مش عارف ليه ماباقتش متحمس اجاوب على التيجان

وكل تاج يجيني اطنشه
كأني ماشفتش



المهم

لينا عودة

Nouran said...

لولولولولولي معرفش هي طلبت معايا ازغرط
بس ايه الصورة الجامدة ديه قمر بالستر فعلا هههه
حلوة اجابتك يا سوسة بتبين فعلا انك مفروسة بس التاجات ديه فكرتها حلوة يعني بحس انها ممكن تكون وسيلة المدونين يعرفوا بيها بعض اكتر وف النهاية حاجة لذيذة برضه بنكتبها :)

Anonymous said...

أيها / السادة والسيدات الاماجد

أسف على الإزعاج ونحيط عناية سيادتكم باني أقدم اسمي آيات الاحترام والتقدير لرجل يعتبر من أخر الرجال المحترمين في الوطن العربي والأمة الإسلامية .

بعد الزعيم الراحل / جمال عبد الناصر رئيس جمهورية مصر العربية .

والشيخ / زايد آل نهيان أمير دولة الإمارات العربية المحتدة .

والدكتور/ مهاتير محمد رئيس وزراء ماليزيا .

والإمام / الخميني زعيم الثورة الشيعية الإيرانية .

وأخيرا تحية إجلال وتقدير للسيد العقيد / على ولد محمد فال

قائد الانقلاب العسكري على ولد الطائع رئيس الجمهورية الإسلامية الموريتانية والذي أسس لانتخابات حرة خلل سنة بعد الانقلاب واشترط على نفسه انه لان يرشح نفسه للانتخابات أو أي من القيادة العسكرية .

وستقام الانتخابات بعد أسبوع من تاريخه : ‏04‏/03‏/2007 م .

فهنيء للشعب الموريتاني والأمة الإسلامية والعربية .

وشكراً لحسن استماعكم ،،،

علا من غزة said...



يعني طلعنا زملا في الجنان الرسمي هههههههههه

مع اني مش عارفة ايه علاقة ان الواحد يكلم نفسه وانه يكون مجنون :p

وبعدين انا عرفت سر الفرسة المستمرة اللي عندك ,,,,, كلية الصيدلة !!

لا بعيد الشر انا مش صيدلة ولا حاجة ,, دي اختي :) والحمد لله يعني كل البيت بيعاني معاها من المواد الغريبة والهم الأزلي الي هي عايشة فيه
مع انها من اوائل الدفعة

ومعلش عندي رجاء ,, اوعي تقولي مفيش فايدة من الكلام ,, طول ما هي مصر فيها شباب وبنات زي امثالك اكيييد اكيييد لازم يكون في فايدة

تحياتيي

ولا اقولك زي كلمة اختي الشهيرة :) كناية عن الصيدلة

تحياتي لمن دمرت حياتي

ههههههههه

Dr. Tantawy said...

فيكي الخير يا بنتي والله :( انا عمال امسح دموعي بمنديلي من الفرح

ههههههه


ليكي وحشه والله :) كنتي فين من زمان يا بنتي .. هوه الشغل صعب اوي كده

طب انا بدأت امتياز و متبهدل اخر بهدله :) اعمل ايه

chaos said...

helppppppppp
http://chaosalways.blogspot.com/2007/03/to-tota.html
plz check it out

soosa el-mafroosa said...


ذو النون المصري


انت أخدت الفجل و الكرات

خدلك بأه سندوتش طعمية يمشي معاهم

المرة الجاية هديتك مفاجأأأأة

علبتين لبن أطفال مدعمين تبيعهم زي مانت عايز

ياللا يا عم ماحدش قدك

بالنسبة لقفل المدونة و الله لسه لغاية دلوقتي بافكر في الموضوع ده

مش عارفة زهق ملل يأس

ربنا يسهل

و انا و الله باعتز بكل صديق ليا عن طريق المدونة و بازعل قوي على الناس اللي باقعد مدة ماشوفهومش

soosa el-mafroosa said...

kaed
و الله يا قائد معاك حق في موضوع الفضفضة

بس لما الملل و اليأس بيستبد بالواحد بيتصرف تصرفات غريبة

يعني ساعات الواحد يقف مع نفسه و يقول و ايه الفايده

فيه ايه اتغير أو هيتغير

بس ربنا يسهل انشاء الله

علب اللبن كتير اطمن

soosa el-mafroosa said...

سفاح الفراخ

يا أهلا بيك و بكل الفراخ

البيتا عملها فيك

انا فيه ناس كتير مش شايفين المدونة بعد التحويل للبيتا

منهم لله اللي اخترعوه

شكرا ع الدعوة الحلوة يا باشا

طب مالسفاحين طيبين وولاد حلال اهم

أمال ايه الإشاعات اللي بيطلعوها عليكم دي

متجمعين عند النبي انشاء الله

soosa el-mafroosa said...

فارس عبد الفتاح

شكرا على تحليل الشخصية الدقيق ده

معظمه صح بس فيه برضه حاجات غلط
زي

حركاتك سريعة لا تحبين الهدوء

تملقيه بالنظرات المستفزة

مدلله في البيت(أنا جدعة جدا على فكرة و ماليش في الدلع الا في حدود بسيطة جدا(


بس الباقي تقريبا كله صح

soosa el-mafroosa said...

farida

الفترة كبرت يا فريدة لأني بدأت أقول

و ايه الفايدة

ايه هيتغير

و إمتى

بدا اليأس يتسرب الي حماسي

و خاسة اني بانفخ في قربة مقطوعة انا و الكل


هي شكلها فعلا خطة من أمن الدولة

ياللا اشوف وشك بخير

ماتنسيش الحلاوة

البلوج جبتله تمبليت من الموقع ده

http://www.isnaini.com/blogger-templates

soosa el-mafroosa said...

ذو النون المصري

هو كولينا

و الله رجل أمور مش كده

soosa el-mafroosa said...

أكتب بالرصاص

بصراحة
أنا برضه ما بتحمسلهاش خالص

بعملها بس
عشان اللي بعتوهالي مايزعلوش

soosa el-mafroosa said...

nouran

بشرة خير الزغروطة يا نورا

لو عجبتك التيجان دي و فيه حاجة فيهم لسه ماعملتيهاش

هدية مني التلاتة

ياللا افرحي و زقططي و اعمليهم

كلهم

soosa el-mafroosa said...

فارس عبد الفتاح

عاجبني فيك اهتماماتك الواسعة

في حين ان ناس كتير ماتعرفش اللي بيحصل حتى جوا البلد

soosa el-mafroosa said...

علا

زملا يا حبيبتي أمال

أنا لما قريت اجاباتك قعدت أاااضحك

ماكونتش متخيلة ان فيه حد خلل زي كده

طلعنا اتنين

بس انا جنني الصيدلة

انتي ايه السبب باه؟


مصر؟؟

و الله خايفة عليها م اللي باشوفوا كل يوم

soosa el-mafroosa said...

dr.tantawy

طبعا طبعا يا طنطاوي يا أخويا

الناس لبعضيها

و انا لا يمكن اأخرلك طلب

شرف ليا انك بعتلي تاج

أقوم أنا أطنش

طبعا مايصحش أبدا

الدنيا كلها صعبة

ربنا يوفقك

انت امتيازك فين صحيح؟

soosa el-mafroosa said...

chaos

أنا أصلا كنت بافكر احصلها

Amyra said...

سوسة

على فكرة انتي لا حتضربي و لا حاجة ده اللي مش بيكلم نفسو هو اللي حيضرب قريبا ان شاء الله
و حكاية اللغات دي متتخضيش انا اكثر انا ساعات و انا بفكر في موضوع تجيني افكار بالعربي و اخرى بالفرنساوي و اخرى بالانجليزي
يعني في اخطر منك
ها
و كمان يا سوسة كملي و خليكي دايمامفروسة عشان لو ماتفرسناش حنموت
حنموت

تحياتي

صاحب البوابــة said...

اجاباتك رقيقة ومعبرة

لكنني اتفق معكِ في اننى لا اعلم ما فائدة تلك ( التاجات ) التى تمرر بإستمرار

تحياتي بعد عودتي الثانية الى عالم التدوين

الدبور said...

انا برضو بيتحدف عليا تاجات وحاجات من دي بس مش عارف يعني ايه تاج اساسا
بس لقيت اسئله و الناس بتجاوب فعملت زيهم و خلاص
بس فكرة حلوة انك تجمعيهم كلهم وتكتبيهم في بوست واحد

تحياتي
الدبور

Anonymous said...

السلام عليكم
ازيك يا بت يا سوسه يا مفروسه
طبعا انتي عارفه انا مين انا و اعوذ بالله من قوله انا سفاااااااااااح الفراخ
شوفي يا بت يا سوسه انا بحب كلامك الي زي الفل و علشان كده بقولك اي حد يزعلك من العيال بتوع التدوين سيبي رساله عندك بس و اسم البعيد علي شبابه مااااااشي
و هعدي بكره هشقر علي المدونه بعد صلاه العصر
يلا سلام

Anonymous said...

السلام عليكم
بت يا سوسه انتي مش عايزه تكتبي تاني يا نهار اسود علي كل الي بيكتبوا في المدونات انا هولعها هخربها عليهم لو حد كان زعلك ..انتي لازم تكتبي علشان ناس كتير هتروح فيها ..انت فاهمه ..انتي عامله زي الملبه الي بتنور في العتمه و بفرح زي العيال لما بقرء كلامك
يلا اسيبك و طلعي الكلام الي جواكي خلينا نثقف و نتعلم منك يا معلم
يلا سلام

Memo said...

الف حمداله على السلامه

Anonymous said...

كل المواضيع ظهرت يا سوسة بعد الغاء شريط الجزيرة .. انا ماكنتش شايف و لا موضوع واحد

فرى

أحمد العربي said...

مش قادر أمسك نفسي من الضحك بالمناسبة دي مدونة جديدة ياريت تشرفيني

Anonymous said...

ياااااااااااااااااه
أخيرا عرفت أشوف المدونة بتاعتك
حقيقى بجد فرستينى
كل مرة أدخل الاقى الصورة اللى فوق والصفحة كلها بيضاء
المهم ياستى
أولا مش عايزك تقلقى على مصر ولا مستقبلها
مهما حصل مش هايحصل أكتر من اللى حصل لينا
تانيا انتى زهقتى علشان مش حاسه ان فى تغيير وانك بتنفخى فى قربه مقطوعه
ياستى انتى تعملى اللى عليكى وخلاص
أكتبى عن طموحاتك , احلامك , أهدافك فى الحياه, يوم فى حياتك , كده يعنى
وشوفى القصة دى
حتة زلطة صغيرة كانت محشورة بين طوبتين كبار
فهى زهقت من انها صغيرة ومزنوقه بين الطوب الكبير فقالت لا
انا احسن حاجه انى انتحر وارمى نفسى من مكانى
وفعلا اتجننت ورمت نفسها ووقعت . المهم الزلطة دى كانت فى جسم سد كبير قوى حاجز وراه الميه فبما ان الزلطة وقعت الميه راحت متسربه من الفتحة اللى الزلطه عملتها وراحت مكسرة السد كله شفتى بقى النهاية كانت عاملة ازاى
كله وقع
يعنى كل اللى عايز اقوله ليكى ماتفقديش الأمل
أمال تعيشى ازاى؟
علشان كده كنت عايزك تغيرى سوسه المفروسه الى اى حاجه تانيه
وبعدين ياستى انا لاحظت ان فى صيادلة كتير قوى مدونين
ايه الحكايه؟

ودمتى بألف خير وصحة وسلامه

فارس عبدالفتاح said...

يا اخت سوسه


انت ناسيه اني مناصر للقومية العربية والاسلامية الجهادية


يعني لاذم اكون ببص على كل حركة فى وطننا العربي والاسلامي وبعدين اشوف العالم كل

بجميع قومياته واعراقه واجناسه

وجميع اديانه

يعني انا من حوالى يوم كنت بتابع فليم وثائقي عن انديره عندي رئيس وزراء الهند فى الستينيات حتي اوخر الثمانينيات

وما فعلته بالسيخ قام متمرد من السيخ فى الهند واحتمي بمعبد فقامت انديره باقتحام المبعبد وقامت مذبحه بين الجيش والهندوس داخل المعبد


وكانت انديره من المناصرين للقومية الهندية ولم تفرق بين هندوسي ولا بوزي ولامسلم ولا مسيحي


كانت تدعوا الى القومية وهذا دليل على ان القومية هي اخر الحلول هيا والاسلامية الجهادية


او عن قصة محمد على جناح مؤسس باكستان التى استقل بها عن الهند ولا عن حضارت المايا التى كانت فى امريكا بين القارة الجنوبية والشمالية
ولا عن البوطيين البرابرة الذين دمرة حضارة روما الاسطورية

وحضارات وقوميات كثيرة وعديدة

ومثلا الغواصة كورسك الروسية التى غرقت فى البحر الشمال التى كانت غواصة اسطورية ومخيفة لم اري او اسمع عن غواصة بمثل هذا الشكل او الحجم او الامكانيات القتالية

وانصحك وانصح الاخوة الاماجد من الاعضاء المسلمين والمسلمات الى متابعة الجزيرة الوثائقية

قال رسول الله صلى الله عليه وسلم فى حديث ما معناه

رب~ مبلغ اوعي من سامع

صدق رسوله الكريم

soosa el-mafroosa said...

nada

ربنا يخليكي ياندى
طمنتيني على نفسي

انت كمان؟
و انجليزي و فرنساوي؟

بس
يبقى فيه حاجة في الماية

تحياتي

soosa el-mafroosa said...

صاحب البوابة

أهلا بعودتك
في انتظار المواضيع الجامدة
انشاء الله

soosa el-mafroosa said...

الدبور

مش عارفة
نفسي أعرف مين أول واحد بيعملها

مين اللي بيخترعها
بيقول الداخلية بتلم عننا معلومات
و بعدين هتلمنا على أساسها

soosa el-mafroosa said...

سفاح الفراخ

هو ده العشم برضه

هحاول ألملك أسماؤهم
و نتفق على الطريق سوا

ابقى ابعتلي لينك المدونة
لو ربنا كرم و فتحتها

soosa el-mafroosa said...

anonymous

و له انت رفعت معنوياتي

أطمنت ان ورايا رجالة ياكلو الزلط

أيوة كده الواحد يحس بالعزوة

عاش التدوين و الناس الحلوة

soosa el-mafroosa said...

memo

الله يسلمك
حمد الله على سلامتكم انتم

soosa el-mafroosa said...

فري
كله من خيرك

ألف شكر ليك

على النصايح الجامدة

soosa el-mafroosa said...

أحمد العربي

ألف مبروك على المدونة

انشاء الله أزورها قريب

soosa el-mafroosa said...

حسن محمود

معلش

هي مشكلة المدونة اكتشفت انها في شريط الأخبار بتاع الجزيرة

مش عارفة مشكلته ايه بالظبط

بس الأخ فري هو اللي نبهني ليها

شلته و كله بأه تمام التمام

قصة الزلطة دي معبرة جدا

هحاول أقاوم إحساس اليأس

بس الفرسة ماوعدكش اني هابطلها

طول مانا صيدلانية و طول مانا عايشة في البلد دي

soosa el-mafroosa said...

فارس عبد الفتاح

ربنا يوسع من مداركك و يزيد ثقافتك
كمان و كمان

الواحد بيفرح لما بيحس ان لسه فيه ناس زي كده موجودة في البلد

تحياتي

Anonymous said...

السلام عليكم
ازيك يا بت يا سوسه يااااااااااااااا مفروسه
عامله ايه؟؟انا زعلان منك الاول انتي عارفه انا مين
انا و اعوذ بالله من قوله انا سفاااح الفراخ
ايوه انا زعلان منك علشان كنت عايز اثقف شويه و اقرء كلمتين من كلامك الي زي العسل بس انت شكلك كده حد زعلك و لازم اعرف الي زعلك و سيبي الباقي عليا
اكتبي يا سوسه علشان لو انتي ما كتبتيش بجد انا هولع في المدونات كلها
بكره هعدي اشقر علي المدونه بعد صلاه العصر
يلا سلام