من أيام موضوع تحرشات وسط البلد اللي قامت بسبب وسط دينا و سعد الصغير ..و موضوع عماد الكبير اللي خلا الناس تبطل تشتري مقشات لغاية لما مصانع المقشات قفلت و من بعد كل كليبات التعذيب اللي ظهرت على المدونات ووصلت لوسائل الإعلام الرئيسية -من بعد ده كله بأه فيه إحساس قوي كده بين المدونين ان احنا صاحيين قوي و مابنفوتش حاجة و ماحدش لامؤخذه يقدر يضحك علينا
احنا لينا جهاز إعلام خاص بينا و مالناش دعوة بالعالم اللي بره عالمنا دي خالصو لو حاول حد فيهم يصهين على موضوع أو يطنشه..مين ده اللي يعديهاله ..لا دانتا ماتعرفنيش دانا المدون الجن اللي ماتفوتنيش فوته
آه و الله الإحساس ده عند ناس كتير...لكن مهما كانت ثقة الناس دي في نفسها..برضه و لو ..اللي ماسكين الإعلام عندنا دول يا جماعة أساتذة .بالتعاون مع الأجهزة المعنية - وخدوا بالكم من الأجهزة المعنية دي-الناس دي في أكثر الأوقات بتمشينا بره في نفس الطابور مع بقية القطيع المسمى الشعب المصري
قضايا يتسلط عليها الضوء و قضايا تندفن بالحيا..و نظرية عصا موسى الشهيرة بافتعال حدث أو قضية و تكبيرها و تسليط الضوء عليها لغاية لما بقية القضايا مهما كانت أهميتها..تبان تافهة و مالهاش لازمة جنب القضية المفتعلة دي..
و الناس الناصحة اللي زينا و زي بقية الشعب المصري الفهلوي بتقع في الفخ و هاتك يا كلام و مناقشات و محاورات بكل الجدية و الإهتمام لغاية لما الأجهزة المعنية تقرر انها تشغل الناس بقضية جديدة يغطوا بيها على حاجة جديدة أو على نفس القضية اللي هما أصلا إخترعوها من لاشئ
هالة سرحان,هدم الأقصى ,أكياس الدم الفاسدة,سفاح المعادي و إنفلونزا الطيور
دول شوية القضايا اللي شغلت الناس في الفترة الأخيرة
حديث المدينة على رأي السمج مفيد فوزي
طبعا مفيش مبرر لشرح أسباب عدم وجود التعديلات الدستورية كموضوع من المواضيع اللي تهم الناس ..لأنه بساطه..مايهمهومش
الدنيا اتشالت و اتهبدت على موضوع سفاح المعادي و بعدين ..هسسسسسسس
وسائل الإعلام عن بكرة أبيها فتحت موضوع أكياس الدم الفاسدة و بعدين ..هششششششش
انفلونزا الطيور التركيز اللي كان عليها السنة اللي فاتت يوهمك ان خلاص الناس عماله تطب ساكتة في الشوارع و رغم ان الموضوع استفحل بصورة مخيفة السنة دي بالذات بالنسبة للإصابات البشرية و الوفيات الناتجة عنها ..إلا اننا ماسمعناش أي حد بيجيب سيرتها السنة دي ..لأنها ببساطة ماعادوش محتاجينها يشغلوا بيها التاس..فيه مواضيع تانية أهم
مواضيع أهم زي إيه؟؟؟هدم الأقصى؟؟لااااااااااااااااااااااا
مصر و الدول العربية و الإسلامية اللي قامت عن بكرة أبيها في مظاهرات و شجب و اعتراضات و لم تبرعات أيام مقتل الدرة ..لم تحرك ساكنا و هي شايفة الجرافات الإسرائيلية بتبتدي أول سطر في قصة تانية من قصص المهانة العربية محاولة تانية من محاولات هدم رموز الإسلام و المسح بكرامتنا تراب المنطقة كلها
ماشفناش حد يعني طلع و اعترض و لا شجب و لا عيط ولا غنى و لا إعتصم ..اللهم إلا مظاهرات الأزهر اللي بقت عادة أكتر منها فعل إيجابي
كل ده ليه ؟؟لأن "الأجهزة المعنية" لسه مش شايفه فايدة للتركيز على الموضوع لأن التركيز عليه غالبا هيؤجج المشاعر الإسلامية عند الشعب المصري و ده معناه ارتفاع ضمني للإخوان اللي بيعرفوا دايما يتصرفوا في مواقف زي دي بما يزيد من شعبيتهم..طب و ليه وجع الدماغ..سك يا عم ع الموضوع و إخترع موضوع جديد
هالة سرحان..موضوع ظريف و مسلي و هيخلي الناس تقول و تتناقش و تتكلم و تنسى أي حاجة تانية
هالة سرحان...لسسسسسسه فاكر
قال يعني هالة زرقان دي أول مرة تتكلم في المواضيع اللي زي وشها دي..قال يعني ماهياش شايلة لواء تلويث سمعة مصر على مدى 20 سنة و من خلال 3 قنواتقال يعني مفاجأة للجميع ان معدين البرامج و مقدميها بيفبركوا مواضيعها و ضيوفها و تقاريرها
هي صحيح دقت أول مسمار في نعشها لما جابت سيرة ظباط الداخلية و قالت ان بعضهم بيشغل البنات دول و بيقبض من وراهم-بس الموضوع هيتكتم عليه و هيخلص هيخلص..بعلاقاتها بأه ..بفلوس الوليد..أهه هيخلص في وقته و في معاده و لما يلاقوا حاجة غيره يشغلوا بيها الناس
و نرجع تاني نمشي زي القطيع و نقطع في أي حتة لحمة يرموهالنا على الأرض عشان نفضل موطيين و مانرفعش عيوننا ولا رؤوسنا......أبدا
