كفاح العرب....المسلح

العرب -رؤساء و شعوب- يكافحون من أجل حقوقهم بكل الوسائل...بالأحضان..بالقبلات...بالتاتو...بالتي شيرت "المثير" للإهتمام..أو بشرب "المر" من أجل شعوبهم

يعملوا اللي يعملوه لو ده هيجيب حق من الحقوق الضائعة...لكن...لاتعليق

بالأحضان ..بالأحضان ..بالأحضااان

و أبوس إيدك كمان ..بس شوفيلنا حل

كتر خيري مش طالعة مظاهرة أهه؟...هاقطع روحي يعني

موقع حيوي للمطالبة بحقوق الإنسان...مش كده؟

مش عشاني..ده عشانكوا و الله..أستغفر الله..صب يابني صب

جلالة الملك

الملك فاروق الأول

ما حصلش قبل كده في تاريخ الأعمال الدرامية ان الشباب المصري يتأثر بعمل درامي بهذا الشكل..عن مسلسل "الملك فاروق" اتكلم..رغم ان المسلسل كان بيتعرض على قناة واحدة بس بعد ما مؤلفته طلعت روحها عشان التلفزيون المصري ينتجه لكن ماحصلش ..لسبب بسيط..ان المسلسل ينصف الملك فاروق ..الذي كان تشويه صورته مهمة قومية لكل صحفي أو إعلامي منذ قيام الثورة حتى الآن

رغم ان المسلسل من وجهة نظري عابه التطويل و زيه زي كل المسلسلات المصرية كان فيه فترات ملل كبيرة..و عيبه الأكبر انه من وجهة نظري برضه خلص فجأة...كان يبقى أجمل بكتير لو امتد و صورلنا حياة الملك المخلوع بعد ما انطرد من بلده و عرشه..في رأيي كانت دي هتبقى قمة الدراما..انفصاله عن ناريمان و تخليها عنه و رجوعها مصر بعد خلعه..أخواته اللي خرجوا عن طوعه هما و أمهم خصوصا الأميرة فتحية و أمها نازلي اللي تحولوا من الإسلام للمسيحية ..التعمق في مشاعره بعد مابقى مطرود و مالوش شغله ولا مشغله ..كانت فعلا هتكون مجموعة حلقات ثرية جدا لو كانت اتعملت

الملك فاروق و الملكة فريدة والأميرة فريال

تأثير الحلقات على كثير من الشباب فكرني بتأثير"رأفت الهجان" علينا زمان...أول مرة كنا ندرك ان فيه حاجة اسمها مخابرات و نفرق بينها و بين أمن الدولة...و اول مرة نحس اننا ممكن نطلع أذكى من إسرائيل في حاجة.."دموع في عيون وقحة" ماكانش له نفس التأثير لأن أداء عادل إمام و إفيهاته و حكايته مع جوجو و مش عارفة مين كانت طاغية شوية على القيمة الوطنية للعمل

المرة دي المسلسل كان مفاجأة لمعظم اللي شافوه..لأول مرة الناس يشوفوا الجزء ده من تاريخهم بعين تانية..لأول مرة الناس تفكر ان فاروق ممكن مايكونش فاسد ولا فاسق ولا خاين..لأول مرة يشوفوا حاجة خارج كتاب التاريخ و المعلومات المغلوطة و المفتراه..لأول مرة يبتدوا يفكروا في الملك السابق كإنسان..و في مجتمعات كتيرة و بالذات على الإنترنت..بدأ الشباب يتساءلوا عن الفترة دي و الملك و العيلة المالكة كلها..ولأول مرة بيشغل الموضوع ده حيز تفكيرهم

الصورة الرسمية للملكة ناريمان بفستان الزفاف

فمثلا على الفيس بوك..هتلاقي ناس جمعت مئات من صور العائلة المالكة و أرخوا ليها.هتلاقي دعوات لزيارة قبر الملك فاروق و الدعاء له.و هتلاقي تعاطف تااام مع الملك فاروق..و انبهار بأخته الأميرة فوزية امبراطورة ايران و تشكك في الملكة ناريمان اللي سابته بعد خلعه ب3 شهور و اعجاب بموقف فريدة اللي رغم الطلاق جت مخصوص عشان تحضر جنازته و دعوات كثيرة على نازلي أمه المتمردة قوية الشخصية و ضعيفة العقل

الأميرة فوزية أخت الملك فاروق و إمبراطورة إيران فيما بعد

أسماء لم تكن تحتل أي مساحة في تفكير أي شاب مصري..لكن المسلسل أجبر الكثيرين على التوقف لحظة و مراجعة التاريخ و الحسابات..و الواقع أيضا أجبر الكثيرين على التوقف لحظة و التفكير...طب الثورة كانت صح والا غلط..الناس دي اشتغلونا والا ايه..طب كان يجرى ايه لو فضلت الملكية

و تفاجأ وانت على الفيس بوك بناس فعلا و بجد..بتطالب برجوع الملكية..من باب انهم كانوا ناس شبعانه و ماكانش حد فيهم هيسرق البلد..هل ده تأثير مسلسل والا يأس من الواقع اللي بيخنقهم بيد من حديد والا رعب من مستقبل يكاد يكون مجهول..الشباب بيحاول يلاقي طريق للهرب من واقعه في صورة الماضي اللي صوره المسلسل نضيف مليان سرايات و قصور و ناس مزينين بالجواهر و النياشين بعيدا عن صور الفلاحين و الموظفين اللي تجاهلهم المسلسل و غابوا عن تفكير الشباب..

الملكة نازلي في شبابها

أيا كانت أسباب هذا الإهتمام و دوافعه..ففريق عمل هذا المسلسل يستحق الشكر ..بمؤلفته المصرية و مخرجه و بطله السوريان و انتاجه السعودي و بقية أبطاله المصريين

تيم حسن

فأي عمل ينقلنا من خانة المشاهدة لخانة التفاعل و التفكير ..يستحق كل الإحترام..

ماعادش ليك فيها يا كابتشن

كل سنة و انتوا طيبين

بعيد عن شنبكوا

طب واحد قال عليك عيان...أجر عجلة و لف بيها البلد و قول أنا حيطه أنا صخر..ضد العيا و الكسر ..لكن تزعل منه ليه؟

طب واحد قال عليك اتكلت..خليهم يعملولك اوبريت و يغنوا و يقولوا الصحافة فييين واحد صاحي أهه..لكن عايز تسجنوا ليه؟

طب ناس فرحوا لما سمعوا الإشاعة...شوف عملت ايه عشان يفرحوا فيك...لكن تطنشهم و هما بيصرخوا من الجوع و من العطش ليه؟

طب ليه اعتبرتها اهانة...هو الموت علينا احنا -بس-حق؟

طب ليه معاونيك نفوا الإشاعة باستغراب بيقول..انتوا فاكرينه بيموت زيكوا والا ايه؟

هي غريبة؟؟..هي بعيدة؟؟

شكلها فعلا بعيدة

بعيدة عن تفكيرك...و عن شنب كل الي مستنيها

الشعب الزملكاوي الشقيق

ولما الزمالكاوية ثاروا و صرخوا و قالوا...كفاية...يا حازم...كفاية...يا حازم...قعدوا الناس في الدول المجاورة للدولة الزمالكاوية يفكروا...هو حازم ده عمل ايه؟...يكونش بقالوا 26 سنة مش عايز يسيب مكانه...يكونش مجهز ابنه عشان يلعب في الفرقة بعده رغم انف الجميع...يكونش مجوعهم...يكونش معطشهم..يكونش بيلم اللي بيهتفوا ضده في الماتشات و يحبسهم في غرف الملابس تحت المدرجات....يكونش واخد العيلة و قاعد في شرم و سايب الفرقة باللي فيها ياكلوا في بعض...يكونش معين فريق مدربين احتلوا المركز ال26 كأفشل فريق مدربين على مستوى العالم..يكونش بيخللي بتوع الأمن يعذبوا المشجعين...يكونش سايب الجهل و المرض سارح في أجسام و عقول المشاهدين...يكونش متحيز لرواد الدرجة الأولى و هو و ابنه واصحاب ابنه نفسهم الدرجة التالتة تولع باللي فيها..يكونش مابيدورش على اللي بيتهرسوا و بيتحرقوا و بيغرقوا و بيتاكلوا و يوم ماياخد باله منهم يدي أهلهم ملاليم؟

غريب أوي حازم ده...أكيد عمل كل ده ..لكن ايه اللي كان مصبرهم عليه ..ماهو واحد بيعمل العمايل السودة دي كلها كان لازم الناس تثور عليه من زمان...لكن الصراحة الراجل طلع في قمة الأدب..خد بعضه و روح وقال خلاص مش عايزينني أقعد في بيتنا

بس يا ترى بقية الشعوب المجاورة للشعب الزملكاوي الشقيق إمتى هتقول كفاية؟؟

و ياترى اللي هيسمع بودنه كلمة كفاية...أو مايسمعش و يسأل المدام..ايه؟..بيقولوا ايه؟..هينسحب برضه في أدب و في هدوء

أشك

يوم ماسمعت الهتافات في ماتش الزمالك شفت بعين الخيال أبو جمال داخل ماتش من المتشات و الجمهور كله عن بكرة أبيه بيهتف...كفاااية..يا حسني..و هو يبصلهم شوية في هدوء و بعدها يعمل بايديه حركة فلفل شطة الشهيرة و مش بعيد يطلعلهم لسانه

قاعد على قلبكم يا ولاد الفراعنة...انتوا فاكرينني حازم والا ايه؟؟

..

عواد باع عرضه

الراجل باع و قبض التمن..أتفاقية أسلحة بعد حظر استمر منذ التسعينات...مفاعل نووي لتحلية مياه البحر من فرنسا..مساعدات طبية لتطوير المستشفيات الليبية من "بلغاريا"..و لأننا شعوب اعتادت أن تباع ولا تقبض الثمن فلا يسعنا الا أن نشكر الأخ القائد...على الأقل ماباعش ببلاش

حب و عرفان...لماما سوزان

الأسبوع اللي فات في نشرة أخبار حتى لا تذهب وراء الشمس ..كنت كتبت نبذه عن الحملة الإنسانيه اللي بدأتها ماما سوزان لمحاربة الختان

لكن الأسبوع ده بصراحة انسانيتها و كرمها فاقوا كل توقعاتي لنجدها تقوم بعمل انساني نبيل آخر..بتبنيها حالة هند..الطفلة ذات ال11 عاما التي حملت و انجبت طفلة على أثر الإعتداء عليها..كانت تعليمات الأم الحانية بنقل الأسرة بأكملها الى مدينة جديدة و عطاؤهم ضقة بديلة مع صرف 1000 جنيه للأب لمساعدته على بدء حياة جديدة

الحقيقة قعدت أتحيل مستشارين ماما سوزان و هما بيبلغوها بالحالة دي..أكيد رد فعلها اللي حصل و قتها هو هواه اللي حصل وقت مابلغوها بموضوع بدور و قضية الختان..بكاء و شحتفة ووضع اليد على الرأس و مش بعيد في ساعة عصرية كشفت راسها و دعت على اللي كان السبب

و قعدت أفكر..طب ليه المستشارين دول مش بيقلولها على بقية الحاجات اللي بتحصل في البلد..ماهي الست مش هتقطع نفسها يعني...يعني أكيد لو عرفت ان فيه أطفال شوارع و بنات و شباب مصدر أكلهم الوحيد من الزبالة ..كانت عملتلهم حملة...لو عرفت ان فيه قرى و مدن كاملة كل سكنها تقريبا بيعانوا من الفشل الكلوي لأنهم ماشربوش كباية ماية نضيفة بقالهم أكتر من تلاتين سنة..كانت ادت ميسدكول لوزير الري و حلت المشكلة..لو بس بلغها علم ان نسبة سرطان الأطفال في مصر من أعلى النسب في الشرق الأوسط لدرجة انهم بيعملوا مستشفى طويلة عريضة و بيلموا فلوسها من الأطفال في المدارس و الجامعات تطبيقا لنظرية" من دقنه و افتله "على أساس انهم هما اللي هيتعالجوا فيها مستقبلا..كانت رهنت اسورتين من الشبكة اللي جابهالها بابا حسني و بنت لنا 4-5 مستشفيات

لكن يا جماعة ..قولوا للست ..عرفوها..هي مش فاضية تنزل البرلس ولا تروح قلعة الكبش..يعني لو بس تبلغوها هيا هتتصرف على طول

خصوصا اليومين دول ..الست تحسوا انها شادة حيلها بعد ماكانت كسلت شوية الكام سنة اللي فاتوا...خصوصا بعد ما ديجا ظهرت على الساحة..ماما سوزان صحيح أمنا كلنا لكن برضه واحدة ست..بصت للبنت كده لقتها صغيورة و روشة و بتضرب شعرها فحلقي و بتلبس فساتين بكتف واحد و بتلعب كرة قدم ..قالت لأ بأه مابدهاش ..هتاكل الجو مني بأه و الا ايه.

.و هوووب..حملة القراءة للجميع فيها يسرا و أبو تريكة..حملة ضد الختان فيها المفتي..حملة الطفل أولا و دائما لتحسين الخدمات الصحية للتلاميذ بعتت جابتلها ناس من انجلترا...و بعدين موضوع شقة هند و عيلتها

يا سلاااام ..شفتوا الست ..دينامو...صحيح هي كوعت شوية الفترة اللي فاتت ..لكن المنافسة بتسخن..و الحاجة أم الإختراع

صحيح يا ماما سوزان ..لا هايدي ولا ديجا...ده الدهن في العتاقي

حتى لا تذهب وراء الشمس

1

يقول بعض المغرضين أنه الأسبوع اللي فات 7 تلاميذ بين سن السابعة و التاسعة دخلوا مستشفى تعليمي لأخذ جرعات من الأنسولين لعلاجهم من مرض السكر ..و لأن المستشفى مستشفى تعليمي مصري كما يجب ان يكون ..أصيب التلاميذ السبعة بفيروس سي...ياسسسسلام..طب ما جايز العيال السبعة دول راحوا يحلقوا عند حلاق واحد..جايز هما السبعة عملوا نقل دم ..جايزاحدى الدول المعادية نقتهم من بين الشعب المصري و حقنتهم بالفيروس من أجل الإضرار بمستقبل الشعب المصري..ياسسسلام لااازم يعني يكون المستشفى هي السبب ...مش كفاية الحكومة بتعالجكم ببلاش...ايه البطر ده؟...جتكوا القرف ماليتوا البلد

2

بررررضه الإسبوع للي فات قلة مندسة من أبناء محافظة كفر الشيخ طلعوا على الطريق الساحلي الدولي و قطعوا الطريق..و منعوا ان أي حد يعدي...ليه يا بيه منك له؟...قال ايه.. الماية مقطوعة عندهم بقالها 11 يوم...ياسسسلام..ده ايه الرعونة دي.. ايه عدم تحمل المسؤولية ده..فييين الصبر..فييين الجلد..فييين احفاد الفراعنة..ماحدش فيهم فكر لحظة في أجدادةالفراعنة كانوا عايشين إزاي؟..ولا كان عندهم صرف صحي و لا كهربا يعني حتى ماكانوش يقدروا يشغلوا لا مروحة ولا تكييف..ده غير ان ماكانش عندهم تلاجات ولا ديب فريزر..و مع ذلك حد منهم اشتكى؟..حد إعترض؟..بالعكس بنوا لكم أهرامات و معابد لسه عايشين من خيرها لحد دلوقت..ايه يعني لما تعيشوا عيشة الأجداد 11 يوم؟..دول حتى ماكملوش أسبوعين.الناس دول.مافكروش انهم يعلموا عيالهم قيمة الصبر و تحمل الصعاب..مافكروش في منظر البلد خصوصا الأجانب و العرب اللي ماشيين على الطريق رايحين مارينا..مافكروش منظرنا قدامهم هيبقى عامل ازاي؟

و بعدين ايه يعني مافيش ماية...اشربوا بيبسي يا أخي..جتكوا البلاوي بوظتوا منظر البلد

3

إلى الأخوة المحموقين قوي بسبب رفع العلم الإسرائيلي في ستاد القاهرة بعد حصول منتخب إسرائيل المشارك في البطولة الدولية لسلاح الشيش على المركز التالت...نؤكد لهم مرة أخرى أن إسرائيل دولة صديقة و بيننا و بينها إتفاقية سلام ..و بعدين مين في الدنيا أجدر من إسرائيل عشان ندعوها تحتك بالمنتخب الوطني في لعبة "السلاح"...متهيألي الكل عارف ان موضوع السلاح ده لعبتها...و بعدين يا خويا منك له ليها..محروقين قوي من العلم المرفوع في الإستاد ..طب ماهو مرفوع على سفارتهم من 78 ..صحيح على رأي المثل..قال يا بابا علمني الغتاتة ..قاله تعال في الهايفة واتصدر

4

السيدة سوزان مبارك تبنت بنفسها حملة شعبية ضد ظاهرة الختان..و الحملة تجئ في هذه الأيام بعد وفاة طفلة بسبب جرعة بنج زائدة أثناء إجراءها للعملية ..واحد رخم هيقوللي و هي الحملة دي ماعملتهاش قرينة الرئيس من زمان ليه؟..أقولله إن السيدة قرينة الرئيس أول مرة تسمع عن الموضوع ده ..لأنها طبعا لو كان عندها خبر ماكانتش أبدا إتأخرت...هي بس كانت مشغولة شوية مع قرينة الرئيس القادمة بتلف معاها على الدكاترة عشان تطمن على الوريث إبن الوريث..و بهذه المناسبة السعيدة سوف نذيع بعد النشرة الأغنية الوطنية الهادفة

كايدة العزال أنا من يومي...إيوة أه

5

يووووه كل أما حد يقع من البلكونة في إحدى الدول الصديقة تعملولنا هليله و تقعدوا تقولوا مخابرات و تجيبوا سيرة إسرائيل الشقيقة..هو انت مخكوا مش هينضف أبدا من نظريات المؤامرة دي..طب و احنا نعملكوا ايه اذا كنتوا حتى مش عارفين تقفوا في البلكونات زي بقية خلق الله..نعملكوا مادة و ندرسها في المدارس و نسميها "التربيةالبلكونية" أمركوا عجيب والله...و بالنسبة لصديق النشرة اللي باعتلي ايميل فيه سؤال مهم أحب أطمنه....اطمن يا أستاذ يحيى سعيد مرزوق.

.قصر القبة... ..ليس به بلكونات

و الى اللقاء مع نشرة اخرى من قناة الحزب الوطني الإخبارية حيث شعارنا

حتى لا تذهب وراء الشمس

.

.

سنة حلوة يا سوووسة

بقالي أكتر من شهرين باستنى اليوم ده عشان أحتفل بعيد ميلاد سوسة الأول..و برررضه نسيته..أول يوم دخلت فيه

عالم التدوين و اسمي دخل تاريخ بلوجر كان يوم 14 يونيو 2006
و من بعد اليوم ده و انا حياتي اتغيرت..بأه فيه مسؤولية جديدة في حياتي و هي المدونة ..كأني اتبنيت طفل صغير و بقيت مسؤولة عنه ..شكله ..حجمه ..محتواه..أجمله و أكبره و آخد بالي منه..برضه مسؤوليه كبيرة

أول مرة سمعت عن التدوين أصلا كان في موضوع على موقع عشرينات و كان عن فوز مدونة عراقية بجائزة

عالمية..دخلت على اللينك و شفت المدونة اللي كانت بالإنجليزي و بعد كده قريت في التعليقات على الموضوع ان فيه كمان مدونات بالعربي و سألت بعض المعلقين و كان الرد من "عبد الله مفتاح" و اللي كان صاحب مدونة و اداني عنوان مدونته و مدونة "بنت مصرية" اللي كان عليه لينكات لمدونات كتير ..قضيت أيام و أيام أدخل على مدونات مختلفة و أقرا و أقرا ..و جذبني الموضوع جدا و قررت اني أبدأ المدونة بنفس الإسم اللي كنت باعلق بيه في عشرينات.و أقول كلام من القلب و العقل و المرارة.

و كان اول بوست"أول الكلام"بتاريخ 14 يونيو
و ماكانش عندي ادنى امل ان حد يعلق عليه..طب و يعلقوا عليه إزاي و مين يعرف اني عندي مدونة أصلا و بعدين هما كلهم شكلهم اصحاب و كلهم بيعلقوا عند بعض..طب أعلق على مواضيعهم و الا لازم يكونوا عارفينني الأول؟...مانا ماكنتش أعرف أي حاجة و تجربتي في التدوين بدأت بنظام لو عايز تعلم ابنك العوم ارميه البحر و لو عايز تعلمه الجري اربطه في القطر...م الآخر يعني ..عمياني

و كااااانت المفاجأه بعد نشر البوست ب3 أيام جالي أول تعليق و كان من "سيبها على الله" ..كنت هاموت من الفرح ..و بقيت مستغربة جدا ..طب هو لقى المدونة إزاي و لحد دلوقتي ماعرفش..و كان بصراحة ذو فضل كبير عليا في بداية المدونة لدرجة انه رفعلي ملف خاص فيه معلومات عن كيفية اضافة الصور و الشات بوكس و الموسيقى و اللينكات و كان بصراحة نعم العون ليا في بدايتي المتعثرة

و هكذا توالت البوستات و توالى الأصدقاء اللي بعضهم اختفى و بعضهم مازال على العهد و اتعرفت على ناس كتير في هذا الواقع الإفتراضي اللي إداني الأمل في ان لسه فيه ناس في مصر بتقرا و بتفهم و أهم حاجة ...بتعترض..بعد ماكنت فقدت الأمل في الناس ..كل الناس..لكن بلوجر وحده أثبتلي ان لسه فيه أمل

سنة طويلة حصلت فيها أحداث كتير..في مصر عموما و في هذه المدونة خصوصا ..زي الأخ..اللي دخل يؤيد إسرائيل داخل التعليقات على بوست "أفلام الصيف الساخنة" أيام الحرب بينها و بين حزب الله و اللي لميت عليه المجتمع التدويني كله و الصراحة الناس ماقصروش و ظبطوه تظبيطة ماتظبطهاش مدون في قسم..و الخناقات المشتعلة بين بعض المعلقين...في أي موضوع يكون له بعد ديني زي موضوع "يهدي من يشاء" و موضوع "فاروق حسني و الحجاب"

من الأحداث المهمة أيضا " التجمع البلوجري الأنثوي" لجروب "كلنا ليلى" اللي قلب علينا المدونين و أخرج شبح سي السيد من جوا البعض

و من العلامات المهمة كمان في السنة دي ظهور اسم سوسة المفروسة على صفحات الجرائد الإلكترونية و المكتوبة
زي موضوع "يا فرج الله" اللي اتنشر على موقع عشرينات و من بعده "فعلها البطل شعبولا" اللي اتنشر برضه في عشرينات و من بعدها في جريدة "العربي" و دي كانت أول مرة أشوف حاجة أنا كاتباها بايدي منشورة في على صفحات الجرائد و انا اللي كان نفسي يتنشرلي أي حاجة انشالله حتى على حبل الغسيل

و طبعا مش ناسية يوم ماتخطيت خط من الخطوط الحمرا اللي بابا حاطتهالي بالنسبة للكلام في السياسة و الشخصية الغير مسموح لي بالمساس بيها و يوميها بعد كل التوسلات و الإقناع مافيش فايده و اضطريت اني أمسح بقية بوست"تفتكروا مين" اللي كان يتضمن سيناريو فيلم" الريس حوحو" و رد فعلي كتبته في بوست " القطط العميا" عن غبائي في اطلاع بابايا على المدونة و في تخيلي لوجود هامش من الحرية يخلليني أقدر أقول اللي أنا عايزاه من غير ماخاف..من وجهة نظري الهامش ده موجود ..لكن بابا من جيل لا يمكن سيقتنع بحاجة زي دي

مجرد أمثلة من مواضيع عاشت و طلعت من جوايا على مدار السنة و فيه غيرها مواضيع كتير و كل موضوع أثر فيا و أتمنى انه يكون أثر في حد من اللي قراه

تحية لأصدقاء الأمس و أصدقاء اليوم و أصدقاء الغد ان شاء الله...تحياتي للمداومين على الحضور و اللي غابوا ...تحياتي للمعلقين و القراء السريين اللي بيقروا و مابيعلقوش...تحياتي لكل اللي حاطلهم في قايمة المفضلة و اللي حاطت سوسة في قايمة المفضلة...تحياتي لكل اللي أعرفهم و اللي لسه هاعرفهم في هذا الواقع الإفتراضي الجميل عبر هذا الإختراع الرائع المسمى بالإنترنت و من خلال هذا الإبتكار البديع المسمى بالتدوين
سنة عدت ..و مين عارف يمكن السنة الجاية نحتفل بتاني سنة ل "سوسة المفروسة" إذا كان لينا عمر

-------------------------------------------------------

تحديث

الشكر الجزيل لأخي "ذوالنون المصري" على أجمل هدية في عيد ميلاد سوسة

طعم الأفراح

الإنتخابات العقيمة لمجلس الشورى-توريد المصريات رأسا لبيوت السعودية باشراف حكومي لضمان الشفافية-40 عام على النكسة و عدم

إثارة مسألة قتل الأسرى لأننا من الواضح أننا لا نثور الا اذا تكلم الأشقاء الإسرائيليين...حاجات تخنق و تغم...نفسي يعدي يوم عليا و أنا سعيدة فيه من أوله لآخره...زي زمان و أنا صغيرةو انا بافكر في الموضوع ده قريت تدوينة جميلة عند عمنا أحمد شقير... عن ذكريات الطفولة و الشباب..أرجعتني سنوات و سنوات الى الماضي السعيد

الصحيان مذعورة على فانتاستيكا اللي لغاية دلوقت ماعرفش معناها ايه؟..مرورا بغمض عينيك و امشي بخفة و دلع الدنيا هي الشابه و انت الجدع..هما لسه بيقولوها؟...حلاوة شمسنا و خفة ضلنا..و الكارثة ساعة ماسمع بالسلامة يا حبيبي بالسلامة بصوت فايزة أحمد أعرف اني أكيد أكيد متأخرة ع المدرسة اللي كنا بنروحها بحنطور قبل اختراع التوصيل بالتاكسيات..عم القن كان بيرصنا جنب بعض أكتر من 20 طفل و طفله في حنطور اذا شلت واحد من وسطهم يقعوا زي هرم ورق الكوتشينة..أنا كنت دايما أقعد جنبه قدام و أترعش كل اما يطرقع بالكرباج رعشة انتعاش مش خوف

أول يوم رحت المدرسة الأبلة حطتني في صف الولاد عشان ماما كانت بتقصلي شعري زي مي عبد النبي و شعري كان مداري على الحلق و ده الي خلف عندي عقدة متأصلة من الضفاير..كل البنات عندها ضفاير و انا لأ

في أيام المسائي التلفزيون ماكانش بيبتدي الا الساعة 10 و من الساعة 8 كان إرسال التلفزيون الإسرائيلي بيجي مكان القناة التانية و كانت دايما عليه برامج أطفال ماكناش بنفهمها لكن لازم نشوفها ماهو ماكانش فيه غيرها ...غواص في بحر النغم و عمار الشريعي في الراديو ..اليوم المفتوح على القناة الأولى اللي كان الجمعة و بعدين بأه الخميس و الجمعة و بعدين حد و تلات و خميس و بعدين فتحوا الأسبوع ع البحري

لية الأربعاء اللي كانت بالنسبة لنا عيد مع برنامج اخترنا لك..ماكجيفر اللي ماجاش ولا هييجي زيه و بعديها عرضولنا المهمة المستحيلة قبل ماتوم كروز يسرقها و يعملها فيلم
كل يوم و احنا قاعدين جنب أمهاتنا نتفرج على نوتس لاندنج و فالكون كريست و كولبيز نسأل..هو ده مش كان مات؟..هو ده متجوز مين؟..هما طلعوا اخوات؟..و بعديها ذا بولد آند ذا بيوتيفول..و من بعديها أوشين بنكدها و مللها
فيلم يوم الخميس الساعة 12 كنا بنجري واحنا راجعين من المدرسة عشان نلحقه.

.رحلات المدرسة كنا بناخد الساندوتشات و نمشي اتنين اتنين في جنينة الحيوانات و احنا ماسكين ايد بعض
العيش الفينو اللي لحقناه أيام ماكان ال10 سندوتشات بعشرة صاغ...ألبوم بم بم و الصور اللي جوااللبان ناكل اللبانه على بق واحد و نجيب غيرها يمكن تطلعلنا الصورة الناقصة و نحوش الصور في علبة كبريت و نبدلها مع بعض...شكولاتة كورونا اللبني أم ربع جنيه هي الهدية الرسمية لأي حد فينا من أي حد يزوره..الشيكولاتة اللي في الصالون اللي دايما نخلصها قبل الضيوف حتى مايلمحوها

صفاء أبو السعود و استعراض عيد الطفولة اللي بعدها باسبوع يكون محفوظ من كل المدارس و مرسوم في كل كراريس الرسم
لعب الصندوق في الفسحة و كهربا و استغماية فوق السطوح و حبة ملح و تماثيل اسكندرية في الحوشفستان العيد و الوقفة مع الخروف و العياط عليه أول مانعرف انه اندبح..فلوس العيدية اللي لازم تضيع هي و شنطة العيد في أول يوم
سمير و ميكي و ميكي جيب..هي بقت بكام دلوقت؟..على أيامي كانت ب جنيه و دي أياميها كانت ثروة ..ممكن تحسبوها لو عرفتوا ان كان فيه مجلة عراقية للأطفال مرشقة في كل صفحاتها بصور صدام ملونة و مصقولة و بخمسة صاغ

كل أسبوع بابا كان يجيبلي 10 قصص كل واحدة ب10 صاغ..المفروض انها لسن من 4-6 ..أول قصه فيهم كان اسمها حية رقطاء..مافهمتش رقطاء دي غير لما وصلت تانية ثانوي...و كل يوم خميس كانت ماما بتطلع نص يوم و تجيبلي قصة و هي جاية..بدأت بملف المستقبل و انا في 5 إبتدائي و بعدين بقيت مدمنة لأدهم صبري و مغامراته
السهر بالليل جنب الراديو لحد مانسمع اعترافات ليلية و نحكيها لبعض تاني يوم في المدرسة

يوم الجمعة سينما الأطفال

و أيام و ليالي و مجلة المرأة وعالم البحار(بساء الخير) وعالم الحيوان و حياتي..مواقف و طرائف و فيلم السهرة المهدى من وكالة الأهرام للإعلانإعلانات رمضان اللي بتتحفظ أكتر من النشيد الوطني(و ده مين حافظه أصلا)..يا أمو طاقية .طاقية حمرا...سلمى سلمى يا سلمى يا قمر الدين...صمدي يا صمدي ..وحوي يا وحوي...الكاميرا الخفية و الشقية و المستخبية...قبليها بشوية دوري النجوم و طارق حبيب ..فوازير نيللي و شريهان و ألف ليلة و ليلة..شكلها ساذج دلوقت لكن زمان كانت بتدي النكهة لليالي رمضان
الفانوس أبو شامعة اللي لااااازم يلسعنا بس لذيذ و برقبة أي واحد صيني من بتاع دلوقت

جيلي كولا و فلاش و اسباجيتوز و إزازة الكوكاكولا اللي كانت بربع جنيه و بقت أزمة لما بقت ب 35 قرش..طب و انا

أجيب 10 صاغ فكه منين؟
أخويا اللي كان بيلعب في الناشئين كرة قدم في مشروع لوزارة الشباب و الرياضة كل يوم تدريب كانوا يدوهم وجبة كان يعينلي علية المربى و علبة العصير..اللي كانت صفيح من بتوع قها..و أول مرة ادولوا مرتب كانت 3 جنية(كان تحت عشر سنين) جابلي منه قصة عشان عارف اني باحبهم

الواد الرخم في الشارع اللي بيستنانا واحنا راجعين من المدرسة عشان يزقنا أو يحدفنا بالطوب و يستنانا و احنا بنلعب و يخطف العجلة و ياخدها لفه أو يطلع يجري بالكورة أو يسرق كيس البلي أو يقطع فستان العروسة و نرجع لماما معيطين

ريحة الشوز و الشنطة الجداد بتوع المدرسة ..أول مرة أمسح بالأستيكة و أول مرة أطلع علبة الألوان...كوكي كاك و بقلظ و بندق و أخته بندقه..طلعت عطيه و بابا ماجد..عروستي و ماما سامية..كرنبة و ماما هالة ..و بقلظ و ماما نجوى
قصص هانز كريستيان أندرسون..البطة القبيحة ..عقلة الصباع..الحذاء الأحمر..كانت بتيجي الساعة 5 يوم التلات..مازينجر كان معاده مقدس الساعة 5 كل يوم و الصبح كابتن ماجد..ده بقه كان قالب الدنيا..كابتن ماجد كابتن ماجد ..عاد اليكم من جديد

ماتشات الكورة و الموسيقى المثيرة للأعصاب و هما بيعرضوا أسامي المعلق و المصورين..و أغاني ساندرا و الدوللي دوتس(مش كان اسمهم كده) و كل الأغاني الأجنبية اللي مانعرفش مين بيغنيها ولا بيقولوا ايه بس حفظنا الموسيقى لأنهم مابيعرضوش غيرها بين الشوطين...و قبل مايبقى فيه شوبير آخرهم كان يعيدوا الأهداف و كل سنة و انت طيب و اللي عايز من أباهتنا يتابع تعليق..يجيب الشباب و الرياضة..و احنا واقفين هنموت عايزين نحول نتفرج على المسلسل الأجنبي ع القناة التانية الساعة 9

الإنتظام في الصلاة أيام المدارس و الإحساس بالذنب و احنا بنسمع الأدان وقت الفيلم الأجنبي يوم الجمعة. عايزة أروح أصلي..طب أشوف الحتة دي بس...إجتماعات الزهرات و فريق الموسيقى و العرض الرياضي اللي بيخليك تفوت حصة والا حصتين كل يوم ..بالغيظة في زمايلك

أول يوم في أجازةالمصيف ..ريحة البحر و شكل الرملة و لايمكن نقعد لحظة في البيت جريان ع البحر نتنقع كل يوم أربع خمس ساعات و نعيط و احنا مروحين و نرجع زنوج و مقشرين

بابا و هو بيعلمني ركوب العجلة و اخويا بيتريق عليا شوية و يعلمني معاه مع انه أصغر مني بسنتين..ماما و هي بتعلمني أشتغل كنافاه و اللوحة اللي لسه ماكملتش شغلها لحد دلوقت ..أول مرة اشترينا الفيديو و كمية أفلام أميتاب باتشان اللي بقينا حفظين أغانيها

لقاء الشعراوي كل يوم جمعة و حديث الروح البرنامج الديني الوحيد اليومي اللي كان بيبقى خمس دقايق قبل نشرة تسعة و كل الناس تحرص تشوفه و ماحدش فاهم بيتكلم عن ايه

ملخبطة و بدون ترتيب..هي جاتلي كده و رجعتني لزمن جميل جميل جميل..

.زمن الطفولة السعيدة.

.زمن بطعم الأفراح

إلى أين يذهب بنا الأزهر

بعد الفضيحة أم جلاجل و الجرسة أم حناجل اللي اتعملت لمصر و المصريين من حوالي اسبوعين على موقع العربية و المواقع التانية اللي نشرت الفتوي العبقرية "إرضاع الكبير"و اللي صدرت عن رئيس قسم علم الحديث بالأزهر و اللي مش عارفة المسلمين كانوا عايشين قبلها إزاي
و التي لحقتها فتوى أخرى لعالم آخر من علماء الأزهر و هو المفتي بجلالة قدرة عن التبرك ب"بول " الرسول

دلوقتي بأه من حق كل الناس التساؤل بجدية عن جدوى هذا الكيان المسمى بالأزهر
الأزهر ككيان و رمز (كان) في يوم من الأيام المنارة التي يشع منها الإسلام من مصر و الى العالمين العربي و الإسلامي..و من قبلها كان مهد للثورات الوطنية ضد الإستعمار بمختلف جنسياته
في يوم من الأيام(كانت) الفتوى التي تصدر من أحد علماء الأزهر تصدق بدون مناقشة و تحفظ بدون ذرة شك في نفس متلقيها
لم يكن تأثير الأزهر محصورا بالعالم العربي بل امتد بجدارة الى خارجه حتى أنه يقال ان الطائرة التي كانت تقل احد شيوخ الأزهر لم يستطع قائدها أن يهبط في أرض مطار العاصمة النيجيرية لإفتراش النيجيريين الأرض ترحيبا بشيخ الأزهر في احدى زياراته

الآن شيخ الأزهر"طنطاوي المهاود" يصدر فتاوى من نوعية ..على نساء المسلمين خلع حجابهن و اطاعة القوانين الفرنسية..و من قبلها فتواة التي أطلقها على القناة الأولى الإسرائيلية حين سؤل عن العمليات الفدائية التي يقوم بها الفلسطينيين و أفتى أنها مجرد عمليات إنتحار ..و من وقت ليس بعيد أقال أحد أعضاء لجنة الإفتاء لقوله بعدم شرعية مجلس الحكم العراقي..و كان هذا بعد أن كان طنطاوي قد أفتى أنه لا مانع من التعاون مع الجيش الأمريكي طالما سيخلص المسلمين من رؤساء في مثل ظلم صدام

و هكذا و بعد فتاوى طنطاوي و فتاوي غيره من شيوخ الأزهر التي تتسبب في كثير من البلبلة و نثير التساؤلات داخل نفوس ضعيفي الإيمان و تشككهم في دينهم في الوقت الذي من الواجب على علماء الأزهر فيه ممارسة مهمتهم في نشر الدين و تعاليمه الصحيحة خاصة بعد الحملة الشرسة على الإسلام و الأصوات القادمة الينا من الخارج و التي تصوره كدين للتخلف و الرجعية ذو تعاليم غير متلائمه مع العصر الحالي

في الوقت الذي فيه حملات التنصير على أشدها في أواسط أفريقيا و جنوب شرق آسيا و الدول العربية في شمال أفريقيا..في الوقت الذي يذهب فيه المبشرين الى القبائل و الأدغال و الأحراش للدعوة إلى دينهم تاركين وراءهم الحياة المترفة الرغدة و الأهل والأصدقاء..باذلين في سبيل دعواهم الجهد و العرق و المال...يغرق دعاتنا في نومهم و يختفي دور الأزهر المرجو في إرسال الدعاة المؤهلين الى جميع أرجاء الأرض بخاصة تلك التي يوجد بها حاجزا للغة بين قومها و بين الإسلام يستمر المبشرين في جولاتهم يوما بعد يوم محققين بعضا من أهدافهم في تحويل المسلمين المذبذبين الذين فقدوا الثقة في دعاتهم كما فقدوا الثقة في كل شئ آخر

و هنا داخل الدول العربية التي (كانت) من قبل تفخر بالأزهر و تطمئن الى أنه طالما الأزهر مازال قائما فلن يضل مسلما أبدا..يوجه علماء الأزهر كل يوم ضربة هادمة لأساس هذا الصرح بمعاول صنعت من فتاوى مثيرة للجدل لا يهم أي مسلم معرفتها بل إن ضررها لهو أكبر بكثير من نفعها

ونرررررررررجع لنظرية المؤامرةهل دي مهمة أخرى ناجحة من مهمات الجهاز الحكومي المصري لإخراج الدين من الحياة اليومية للمواطن العادي بإفقاده الثقة في علماؤه و ذلك عن طريق تولية أولوا الثقة بدلا من أولوا العلم..المطيعين بدلا من المشاغبين..و المهاودين بدلا من المقاومين

إلى أين ذهب الأزهر.و إلى أين يذهب بنا الأزهر

جسر مصر السعودية....عليك واحد

الإسبوع اللي فات اتنشر خبر في كذا جريدة -منهم الأهرام- ان الأسبوع ده الملك عبدالله خادم الحرمين مالك السعودية هيقوم بوضع حجر أساس جسر بين مصر و السعودية ..طوله 50 كم و يصل بين تبوك بالسعودية و شرم الشيخ بمصر

الجسر المفروض انه هيخدم ملايين المعتمرين و الحجاج و العمالة المصرية في السعودية ..بالإضافة لأنه هيكون ممر سهل و سريع للسياحة العربية و بالذات الخليجية للمرور عن طريقه لقضاء الأجازات القصيرة في مصر

الفكرة قديمة اقترحها الملك الراحل فهد على الرئيس مبارك منذ سنوات عديدة و توقفت الفكرة و عادت مرة أخرى للظهور على السطح بعد غرق السلام 98 و مقتل 1000 شخص كانوا على متنها ميتات تنوعت ين الحرق و الغرق و القتل عن طريق أسماك القرش

طبعا اول ما قريت الخبر قلبي وجعني و قلت لنفسي

too little too late

يعني لو كان الجسر ده اتبنى من كام سنة مش كان زمان الغلابة اللي أكلهم سمك القرش و الراقدين دلوقت في مقبرة جماعية في قلب البحر الأحمر بفعل"مجهول" حتى الآن ..مش كان زمانهم وسط أهلهم و كان زمان ألف أسرة ما انكسرش قلبها و ضاع عائلها و انقطع رزقها

و رجعت أقول " أستغفر الله العظيم" ..لو ..تفتح عمل الشيطان..ده نصيب و قدر..و حطيت النكد و الغم على جنب و استبشرت خير

استبشرت خير بخطوة اتأخرت كتير ..بس الحمدلله مادامت جت ..هيبقى فيها خير كتير

يعني أولا ..هتحمي ناس كتير من مخاطر عبارات لا تصلح للإستخدام الآدمي لأنها أصلا لنقل المواشي

ثانيا هترحم ناس كتير من المرور عبر الأردن و قرف المعاملة و الإنتظار بالساعات و الأيام لعبارات لا ليها نظام و لا مواعيد ..و كمان هترحم الناس من ميناء السويس و المعاملة غير الآدمية من مصريين لمصريين زيهم

ثالثا توفير مادي كبير لناس غلابة ماعاهمش سعر تذكرة الطيارة منهم اللي راجع بعد المرمطة في الغربة و نفسه حد يوفر عليه مرحلة أخرى من مراحل المرمطة و منهم اللي مسافر يأدي عمره و حج و المعاملة اللي بيتعاملها بتخليه يخرج عن شعوره و يبوظهم قبل مايعملهم أو تبوظ عليه روحانياتها و تديلوا طابع الغم و النكد المصري قبل ما يروح

رابعا: الخليجيين اللي هيبقوا رايحين جايين بسياراتهم ..و تنشط سياحة اليوم الواحد ..خميس و جمعة أو أربع و خميس في مصر

خامسا: غالبا التكلفة كلها هتدفعها السعودية و احنا هنستفيد برسوم العبور اللي هتدخل كرش الحكومة من غير ماتدفع ولا مليم..

و لأول مرة في التاريخ و فور نشر الخبر على موقع العربية توالت التهاني من الجانبين المصري و السعودي ..من المرات القليلة اللي تلاقي فيها الشعب المصري و السعودي متفق على حاجة و مش نازلين شتيمة في بعض

طب كويس جدا..الخطة موجودة و التمويل موجود و الهدف واضح و سامي و الشعبين موافقين ...يبقى ايه المشكلة

و اذا بكرسي في الكلوب يضرب الليلة كلها و يقلبها غم في غم

جريدة المساء نشرت التصريحات الرئاسية عن المشروع

أنا لا يممممممممممممكن أوافق على حاجة زي كده..ازززززززززززززاي ..انتوا عايزين تبوظوا شرم الشيخ

الحقيقة في اللحظة دي كان نفسي أولع في نفسي

إزااااي ..أنا مافكرش في موضوع زي ده؟..إزاي أنانيتي المتناهية تسبب في اني أنسى ان جسر زي ده هيخللي الرعاع اللي زينا يوصلوا لشرم

شرم الحضارة شرم الثقافة شرم الإباء و التحدي..طبعا ..إلا شرم..نموت نموت و تحيا شرم

حرفيا ..لازم كلنا نموت عشان شرم

لازم ابن الراجل اللي فوق ده يموت عشان القمرات اللي تحت دول دول ياخدوا حمام شمس..طبعا

ازاي نعرض سياح شرم و دهب اللي أكتر من 75% منهم اسرائيليين لشوية رعاع زينا؟

انتوا عايزين المصريين رجليهم تاخد على شرم؟..و يوم ماييجوا يعملوا فرح ابن جيمي مايلاقوش حتى نضيفة من المصريين؟

ده على أساس انه من المنطقي المصري اللي مش لاقي تمن تذكرة الطيارة و بيسافر بري من و الى أرض الغربة و البهدلة هييجي يصيف في شرم و هيجيب معاه المدام و الأولاد و اللي اشتغل بيه في سنة يضيعه في اسبوعين

و على أساس ان شواطئ شرم مفتوحة على وسعها مش مخصصه لقرى سياحية و فنادق خمس نجوم ماحدش يقدر على تمن نص نجمة منهم

و كمان المعتمر و الا الحاج اللي جاي من أرض الحج ..هيلاقي نفسه خد جرعة ايمانية أكبر من اللازم فيقول في نفسه أطري المسائل بأه بيومين في شرم أتفرج فيهم ع الأجانب و المايوهات ماركة "صنع في ألمانيا أو ايطاليا أوحتى تل أبيب"

حاجة غريبة جدا ازاي أنا مافكرتش في كده...رغم ان بعض الأفكار الغبية جات في دماغي زي مثلا ان الجسر ممكن يوصل لمنطقة خارج شرم بكام كيلو أو حتى بعيد عنها 10-15 كيلو و ساعتها مش هيبقى فيه مشكلة

لكن لاااااااااااااا..المشكلة برضه موجودة هتخللي الناس دول اللي بسموهم مصريين يقربوا من أرض شرم الشريفة و قاطنيها ال"في .آي .بي"..يبقى لا..لا و ألف لا

يا جماعة احنا من قديم الأزل عارفين وظيفتنا كمصريين في هذه الحياة...احنا لازم نموت..و نتبهدل ..و نتمرمط في بلدنا...بس السياح ..لأ..لأ..و ألف لأ

ولا جسر ولا يحزنون..ايه يعني 1000 والا 2000 والا حتى مليون يموتوا في سبيل شرم

شرم شرم ..تحيا شرم

نموت نموت..و تحيا شرم

مفروسة منك

من يومين تلاتة أصدرت مجلة التايم الأمريكية لائحة بأسمامي 100 شخص في كل المجالات أثروا على العالم السنة اللي فاتت ..تضمنت اللائحة بعض المفاجآت من أهمها عدم وجود اسم جورج بوش من ضمن لائحة المؤثرين في الناس..بمعنى تاني انه مالوش لازمة ولا فارق مع حد

المفاجأة بالنسبة لي كانت في الأسماء العربية القليلة اللي كانت موجودة في اللائحة

الملك عبدالله ملك السعودية

شيخ المجاهدين أو الإرهابيين -حسب وجهة نظر اللي بيقرا-أسامة بن لادن

و عمرو خالد

توقفت شوية عند اللي كاتبينه عن عمرو خالد في المقالة اللي بتشرح ليه اختاروه

وصفوه بأن شهرته بين شباب الوطن العربي تماثل شهرة نجوم الروك اند رول..و ان أسلوبه الجديد في الدعوة من الأسباب اللي جذبت ناحيته الشباب بالإضافة لأناقته و بدلاته الليكلها من ماركات عالمية و قمصانه اللي كلها ماركة هوجو بوس(كان فاضل شوية و يجيبوا ماركة الـ.. زي ما عملوا مع صدام)..و قالوا ان الناس بتقتنع بكلامه بشكل كبير خصوصا الشباب اللي بيتابعوا برامجه و موقعة الإلمتروني بشغف و اقتناع

سألت نفسي سؤال واحد..هو فين عمرو خالد دلوقت؟

أنا عارفه انه موجود و لسه بيقدم برامجه و لسه بيكتب في الموقع بتاعه على النت

لكن انا ماباقتش حاسه بوجوده زي زمان

مانكرش انه أثر في حياة شباب كتير و منهم أنا و ربنا ان شاء الله يجازيه على كده..لكن تصرفاته في السنتين الآخرانيين دول حيرتني جدا

يعني بعد كل الحماس اللي كان بيبثه في الشباب ..مشروع ضد التدخين و الملابس القديمة و محو أمية الكومبيوتر و غيرها ..مشاريع كانت جذابه جدا في أولها و لقت صدى كبير جدا عند كل الشباب لكن ...و بعدين

حسيت ان عمرو مع بداية كل مشروع من دول كان كأنه يقوم بحملة دعاية ضخمة لمسحوق غسيل ..بس مايهموش كتير الناس هتنبسط بيه والا لأ..و لا يهمه ان الناس تستمر في استعماله والا لأ..كل المهم ان الناس تعرف انه بيعلن عن المنتج ده أو المشروع ده ..و بكده يبقى عمل اللي عليه

مش عايزة أحكيلكوا كمية الحماس اللي كانت موجودة مع كل مشروع ..و الشباب اللي كانوا من قديم الأزل بيدوروا على قدوة او مثل اعى أو شخصية قيادية يمشوا وراها لقوا أخيرا في عمرو خالد غايتهم و لو كان في لحظة قاللهم ارموا نفسكوا في النار كانوا عملوها ..فجأة لقوا نفسهم واقفين في نص الطريق و فجاة بيدوروا عليه مالقهوش..ناس كتير جالها احباط و اللي كان بدأ يتحسن رجع أسوأ من الأول بمراحل و رجعوا تاني يدوروا على حد تاني يمشوا وراه

الصدمة الكبيرة اللي جاتلي انا و جت لناس كتير مؤخرا..هي اختياره للأخ المواطن الشريف المجاهد"تامر حسني" لأداء تتر برنامجه الجديد...قمة التناقض اللي ربنا خلقه في الدنيا

يعني انت بقالك سنين منومنا مغناطسيا انا كل همي صلاح الأمة أنا كل اللي هاممني نهضة بلادنا و يوم ماتنقي حد يغني مقدمة برنامجك تنقي البيه ننوس عين امه اللي هرب من خدمة الوطن و نصرة البلد اللي بتقول عليها بقالك سنين..فين القدوة و فين المثل اللي بتقدمهولنا بتقديم واحد هرب من شرف خدمة الوطن لأ و كمان زور شهادة و اتنين عشان ينفد بجلده من كام شهر في الجيش مش حتى حرب والا حاجة

اذا كان رهان عمرو خالد كان على اجتذاب جمهور الننوس الأمور الفافي ..فاعتقد انه خسر الرهان..مش بس خسر جمهور تامر لكن كمان خسر الكتير من محبيه اللي اتصدموا بقرار عمرو الإنضمام لشلة الطبالين الشعبية المساندين لتامر كفته

و مهما كانت مبرراته ..فالعاية لا تبرر الوسيلة

أستاذ عمرو..مفروسة منك

بارك حسين أوباما ...الرئيس الأمريكي المسلم

مع اقتراب نهاية حكم المأسوف على شبابه قريبا بإذن الله "جورج دبليو سي"تشتد المنافسة بين المرشحين لخوض انتخابات الرئاسة للعام 2008 وبالطبع قبل الخوض في المنافسة النهائية يقوم كل حزب بإجراء انتخابات داخلية لترشيح احد اعضاؤه في السباق الرئاسي..ووسط عدد كبير منالمرشحين المتواجدين على ساحة المنافسة حاليا تتركز الأضواء على السباق الدائر داخل الحزب الديمقراطي بين مرشحيه هيلاري كلينتون - التي تحلم بانهاء الحظر على دخول النساء للمكتب البيضاوي- و باراك اوباما المرشح الأسود الذي يحظى بتأييد المثقفين و الشخصيات العامة بالإضافة للأقليات

و يرى المراقبين ان فرصة اوباما كبيرة في التغلب على هيلاري و باقي المرشحين و الفوز بترشيح الحزب الديمقراطي ليصبح أول أمريكي أسود يتم ترشيحه من قبل الحزبين الرئيسيين في أمريكا و يكون لديه الفرصة ليصبح اول رئيس أسود للولايات المتحدة الأمريكية

لكن فرصة اوباما تتعرض للخطر بسبب الشائعات المغرضة التي تثار حوله

ليست شائعات نسائية كزوج منافسته كلينتون ولا شائعات اقتصادية ولا سياسية ..لكنها دينية




فهو متهم بأنه مسلم..فباراك أوباما واسمه بالكامل باراك حسين اوباما من أم امريكية بيضاء وأب كيني مسلم..التقته الأم أثناء وجوده في بعثة لإستكمال دراسته الجامعية في الولايات المتحدة و ارتبطا و تزوجا و جاء الإبن ثم رحل الأب عائدا بلاده بعد الإنفصال عن زوجته تاركا الإبن في رعاية امه و عائلتها

و بعد سنين قليلة تلتقي الأم و تتزوج بمسلم آخر..ألا انه هذه المرة كان اندونيسيا لترحل الأسرة باكملها الى بلد الزوج و يدخل باراك اوباما الإبن احدى المدارس الإسلامية لمدة عامين ثم ينتقل بعده الى مدرسة اخرى قبل عودته النهائية الى امريكا ليقيم مع جديه لوالدته

و بالطبع اتهام باراك -الذي يحمل نفس اسم والده- بالإسلام هو اتهام أخطر مايكون في نظر الناخب الأمريكي اليوم..في ظل ظاهرة الإسلاموفوبيا المنتشرة في أمريكا بعد هجمات الحادي عشر من سبتمبر

ولا يبخل اوباما بوقته ولا مجهوده في سبيل انكار هذه الشائعة"المغرضة" عن كونه مسلم متخفي و لا يدخر وسعا في انكار انه انتمى يوما الى هذا الدين او آمن بمبادءه

و يقوم مؤيديه كل يوم على الإنترنت و في الجرائد و المجلات بتفسير كل تفاصيل حياته التي اقتربت في كثير من الأحيان الى الإسلام.و تفنيد كل الإتهامات التي يكيلها له معارضيه

حتى أنهم توصلوا الى طريقة لنفي تهمة الإسلام حتى عن أبيه بقولهم أنه قبل رجوعه الى كينيا كان قد انتمى الى الإلحاد الذي أقنعته به أم أوباما حيث كانت ملحدة و لم تكن تؤمن بأي دين
كما انهم وضحوا ان زوج أمه الإدونيسي كان مسلما بالإسم فقط و لم يكن يؤدي أيا من تعاليم دينه و لم يكن يشجع أبناؤه على ادائها

و هكذا يقوم باراك حسين أوباما و معاونيه و مؤيديه في كل يوم بمحاولة محو هذه الإشاعة المغرضة و تقديمه الى الناخب الأمريكي كمسيحي ملتزم

و في ظل هذا التركيز على الإسلام و الجدل القادم حول أوباما .تجد المسلمين كالعادة في ثبات عميق و لم و لن يتنبه أي منهم الى وجود فرصة سانحة في توضيح معالم الدين و تحسين صورته لدى المواطن الأمريكي و بالتالي في العالم ..ثم نتساءل بعدها

لماذا يخافوننا
لماذا لا يحبوننا
و لماذا لا يفهمون ديننا

جمهوملكية ..زي الكتاب مابيقول

مصداقا لقول جدتي الله يرحمها "إن فات عليك الغصب خليه بجميلة" فأنا من مدونتي هذه و من موقعي هذا أتقدم بخالص التهاني و الأمنيات
القلبية -و اللي في القلب في القلب- لفخامة سمو ولي العهد الأخ جيمي و فخامة سمو السيدة الأولى -مستقبلا- ديجا...شفتوا الدلع جيمي و ديجا في أسامي ألافرنكة أكتر من كده توحي بالتقدم و إقتحام القرن الواحد و العشرين من أوسع أبوابه

فقد قرر جيمي أخيرا و بعد مدة تقرب من السنة إستغلها في تكوين نفسها و الدخول في عدة جمعيات من أجل سداد أقساط التلاجة و السخان

قرر أخيرا كتب كتابه على الآنسة ديجا يوم 28 أبريل الحالي

طب ده كتب الكتاب ..طب و الفرح إمتى؟

خدوا عندكوا بقة ..و الله إنتوا ماتعرفوا أنا ماسكة نفسي من العياط إزاي و انا بكتب السطور دي..متأثرة متأثرة يعني...جيمي الإبن البار المطيع المحب الحنون قرر إن دخلته تبقى يوم عيد ميلاد الأب الحنون بابا حسني
يوم 4 مايو الميمون

إهئ إهئ إهئ ..أااااااااااااااااااااااااه

(فاصل من العياط و الشحتفة)

شفتوا الحب وصل لغاية إيه شفتوا حاجة زي كده في أي حتة بالذمة ده ولا حتى أوروبا ولا الدول المتقدمة..

بس يا جماعة بما إني زي ماقلتلكوا كده قررت إني أخلي الغصب بجميلة فانا قررت إني أكون جمعية جديدة تدين بالولاء للجمهوملكية المصرية و المباركة لولي العهد و حرم ولي العهد ..في مقابل شوية مطالب بسيطة جدا

بما إنها بقت توارث و جمهوملكية و كلنا إعترفنا ضمنيا بولي العهد ..فخليها جمهوملكية زي الكتاب مابيقول

يعني مثلا لازم يوم كتب الكتاب يبقى أجازة ..أما الأفراح فتمتد لسبعة أيام .تاخد فيها كل المدارس و المصالح الحكومية أجازة طويلة للإحتفال بالعرس الميمون

سمو ولي العهد ليلة الفرح يخرج على الناس بحصان أبيض أو إف-16 بيضا مش هنختلف و يرمي على الشعب 20-30 كيلو دهب من الأصلي بتاع سويسرا ده و ياريت فخامة أبو ولي العهد برضه يرش رشة بمناسبة عيد ميلاد جنابه ال79-ربنا يطول في عمره ياااااااارب

تقوم الدولة بإصدار قرار بإن أي ولد إسمه جمال على إسم ولي العهد و أي بنت إسمها خديجة على إسم مرات ولي العهد يتم إعفاءهم من مصاريف التعليم مدى الحياة إكراما للإسمين الكريمين دول و دي هتبقى غالبا الفرصة الوحيدة اللي تسمح لأبناء الطبقات المتوسطة و الدنيا بالتعليم بعد تنفيذ خطة الدولة في إلغاء مجانية التعليم إلا لأبناء الناس الكويسين

يتم مد الولائم التي تتكون من اللحمة المحشية باللحمة و ذلك مدة أيام الفرح السبع على ان يتم تقسيم الشعب كله على السبع أيام دول بحيث إن الشعب المصري كله يدوق اللحمة على الأقل مرة واحدة في حياته و بعد كده يبقى يحلف باليوم ده و يشيلها جميلة لولي العهد إنه كان السبب في إنه داق اللحمة و اللي قاله سنين و سنين بيسمع عنها بس في الأساطير

و طبعا ماينفعش الموضوع يعدي من غير شوية بقششة كده ع الموظفين يعني يمكن ربنا يكرمه ولي العهد و يدي تعليمات انهم يطبقوا الكادر اللي بيقولوا عليه ده ..أو ممكن يعمل زي ولي العهد الليبي اللي طلع مرة الصبح و قرر إن كل مرتبات الموظفين بالدولة هتزيد 250% .

..يعني هي ليبيا كانت احسن مننا والا يعني ولي العهد الليبي أحسن من المصري والا ايه؟


أمال يا جماعة ما هو لازم نطلع بأي فايدة من الموضوع امال يعني نفضل هبل كده و نطلع من المولد بلا حمص

أهو شوية مطالب حتى لو هايفة بس في النهاية أحسن من نبح الصوت و الزعيق و الصويت و بعدين برضه هينفذوا الخطة الحكيمة بتاعهم..جمهوملكية جمهوملكية ..بس نعيش

عاشت الجمهوملكية المصرية
عاشت الجمهوملكية المصرية
عاشت الجمهوملكية المصرية

قالوا لها الله لا يريدك فأرقدها في جوار الرسول

ممكن تحسوا و انتوا بتقروا القصة دي انها قصة زي عشرات القصص الي بتقروها على عشرات المنتديات
و ممكن تشكوا إنها تأليفه لأن صعب انها تتحقق بتفاصيلها دي في الحقيقة
لكني أقسم ليكوا انها حقيقية و كل تفصيلة فيها حصلت أمامي و لا مجال للتشكيك فيها

بدأت "هـ" حياتها في بيت مصري تقليدي و أسرة متوسطة كآلاف الأسر في كافة أنحاء مصر ..و جاءت إلى الحياة بعد أخ و أخت و جاء بعدها أخ و أخت ..و كعادة الطفل الأوسط في أي أسرة ,كانت تعيش داخل عالم خاص بها ,فأكثر الإهتمام داخل الأسرة يوجه للأخ الكبير و الأخت الصغيرة

و أمضت "هـ"طفولتها و شبابها في الظل ..في هدوء..لايكاد يشعر بها أفراد أسرتها..لاتفتعل المشاكل و لا تحمل مشاكلها لأحد..تعتمد على نفسها ..في لعبها .في دراستها و تحتفظ بتفاصيل حياتها لنفسها ..فكل أخ و أخت منشغل في تفاصيل حياته و يكفي الأم و الأب عبء تربية 5 أبناء دون الدخول إلى تفاصيل أحاسيسهم و مشاعرهم ..يكفيهم أنه لم يأتي يوم بات فيه الأبناء بدون عشاء ..و لم يمر عيد دون أن يفرح الأبناء بثياب جديدة و إن لم يتيسر الجديد في كل عيد كانت إحدى النزهات العائلية كفيلة بأن تبيت الأبناء و البنات في سعادة في يوم عيدهم

شبت "هـ" و صارت فتاة تنتظر فارسها ليأخذها إلى عالمه الخاص و تأخذه إلى عالمها الخاص الذي لايدري أحد عنه شيئا..إنتظرت الحب و العاطفة و لكن جاء الزواج تقليديا ..زواج صالونات كما يقولون ..لكنها لما وجدت في شريك حياتها طيب الأخلاق و حسن العشرة قنعت بحياتها و إستمرت في تأسيس أسرتها الصغيرة حتى منّ الله عليها بطفلة أغدقت عليها حبها و حنانها و بعدها بأكثر من عام جاءت البشائر بقروب انضمام طفل جديد للعائلة..فرحت "هـ" بتحقق حلمها الوحيد في تكوين أسرة صغيرة وبث أطفالها الحب و الحنان الذين لم تنالهما في طفولتها..إلا أن "هـ "إستشعرت بعض التعب في حملها الثاني و ساورها القلق ..وحين ذهبت لإستشارة الطبيب كانت المفاجأة ..تعاني "هـ" من روماتيزم بالقلب و الحمل يهدد حياتها..تذكرت "هـ" حين كانت صغيرة و أصابها المرض الشديد سألت امها أبوها إن كان يجب عليهم إحضار طبيب للصغيرة المحتقنة بالحمى ..فأشار الأب على الأم بالكمادات الباردة مع أقراص خافضة للحرارة و مش عاوزين وجع دماغ..أطرقت "هت" برأسها في إستسلام للأمر الواقع و قضاء الله و هزتها رفضا لإقتراح الطبيب بإجهاض حملها خوفا على حياتها

و إحتملت "هـ"آلام الحمل و الولادة و جاء للدنيا صبي صغير أكملت به أسرتها الصغيرة و أكملت رسالتها معه و أخته حتى أخرجتهما شاب و شابة متحملان للمسؤلية حسنا الخلاق متفوقان في دراستهما

و بعد أداء رسالتها تجاه أولادها ..و بعد توفيرها لمبلغ صغير عن طريق التوفير و الإقتصاد..جاء الوقت المناسب لما كانت "هـ" تحن و تشتاق إليه ..أداء فريضة الحج و زيارة الرسول "ص"..و لأن المبلغ الذي وفرته قد لايكفي الحج السياحي ..تقدمت باوراقها كآلاف الناس إلى "القرعة" السنوية ..و انتظرت على أمل أن يبعث لها الله دعوته فتجيبها ملبية ..ولكن ظهرت النتيجة و لم تكن من المحظوظين..حزنت "هـ" و لكنها لم تفقد الأمل ..قدمت في "قرعة"أخرى في محل عملها و ظهرت النتيجة ..و للمرة الثانية لم تكن من المحظوظات..انتظرت للعام التالي ..و النتيجة هي هي..و في العام الثالث ..لم تتغير النتيجة كثيرا ..ظهرت نتيجة "قرعة" وزارة الداخلية و للعام الثالث على التوالي ..ذهبت "هـ" للبحث عن إسمها في كشوف المحظوظين ..و لكن حزنها استمر..فإسمها مازال يخاصم كشوف المحظوظين بأداء الفريضة و زيارة الرسول...ليلتها كانت تحدث إحدى قريباتها على الهاتف و راحت تشكوا لها حزنها ..فردت عليها القريبة..أظن أنه بات واضحا أن الله لا يريد زيارتك .فقط من يحمل نفسا طيبة و روحا صافية هو من يدعوه الله لزيارته و من الواضح انك لست من هؤلاء

و لم تحتمل "هـ" ألا تكون من هؤلاء كما تقول قريبتها و انفجرت في البكاء و هي التي لم تبكي في حياتها إلا مرات تعد على أصابع اليد الواحدة و غرقت في حزن عميق لم تستطع الأكل و لا الشرب ولا النوم

قضت ليلتها كاملة في الصلاة و الدعاء إلى الله و سؤاله ..لم يكن يتردد على لسانها إلا سؤال واحد

لماذا لا تريدني يا رب ..لماذا لا تريد أن تتقبلني ..أنت أعلم بأني لم أسئ لأحد في حياتي ..اللهم إني لاأعترض..إقبلني يا رب ..أدعني يا رب

و باتت ليلتها على سجادة الصلاة بين الدموع و الدعاءو حين أتى الغد ..أتت معه المفاجأه

إنها القرعة التي يجريها محل عملها ..لقد أجروها أربع مرات..و في كل مرة يعتذر الشخص الذي وقعت عليه القرعة ..فهذا لا يستطيع أن يترك أمه المريضة و ذاك يفضل الإنتظار حتى يذهب هو و زوجته ..و هذه اعتذرت لظروف صحية و تلك لا تريد ترك إبنها الطالب في الثانوية العامة دون متابعة

و جاء الخبر ل"هـ" في اليوم التالي لسهرتها و دعاءها إلى الله..لقد دعاها الله و تقبل دعاءها و عليها فقط تلبية الدعوة

و ذهبت "هـ"إلى أرض الحج الطاهرة ..و كعادتها في حب مساعدة الآخرين كانت تقوم -و هي المريضة بالقلب- على مساعدة زميلاتها الكبيرات في السن ...علمت إحدى الحاجات التي لم تكن تعرف القراءة و الكتابة كيف تحفظ بعض صور القرآن لتتعبد بها

و أخذت على عاتقها مساعدة إحداهم في قول أدعية الطواف حين أخذتها في يدها و كانت تقرأ لها الدعاء لتردده من وراءها

و بعد أن أتمت الحج و عادت كالصفحة البيضاء ..آن الأوان لزيارة مدينة الرسول..و بمجرد أن وضعت قدمها على أرض المدينة الطاهرة ..أحست بانها وطنها الذي كانت تبحث عنه

و بعد قضاء عدة أيام في زيارة المدينة الطاهرة حان موعد الرحيل..أعدت"هـ" حقائبها و كتبت على كل هدية إسم صاحبها و توضأت و إستعدت للنزول للصلاة في مسجد الرسول و لكنها شعرت ببعض التعب فقررت الصلاة في الفندق حتى تشعر بالتحسن و تنزل لتصلي في المسجد آخر صلاة قبل مغادرة المدينة المنورة

إلا أن الله أبى إلا أن يكون مستقرها في المدينة الطاهرة التي أحست بأنها وطنها الذي تبحث عنه..شعرت ببعض التعب و اتصلت زميلاتها في الحجرة بالمسعفين نزلت معهم على قدميها و دخلت عربة الإسعاف و لكنها خرجت منها إلى المستشفى التي فاضت فيها روحها و رجعت إلى بارئها

وافتها المنية في هدوء كما عاشت حياتها في هدوء..لم تشغل أحدا بحياتها و هي حية ..و لم تتعب أحد ا في أية تجهيزات حين قرر الله أن يختارها

و حين جاء ميعاد مواراتها التراب..اختار لها الله أطهر مكان على وجه الأرض..فهل يوجد أطهر من البقيع؟؟

و هل يوجد أشرف من جوار الرسول و صحابته و أزواجه؟

حين قالوا لها إن الله لا يريدك لم يكونوا يتخيلون أن الله سيختار لها أفضل خاتمة..حاجّة..مصلية..متوضئة..و في جوار الرسول


عاصرت القصة و عايشتها..فهي قصة أمي...التي توفاها الله في موسم الحج منذ أربعة سنوات..في هذه الأيام حين يوجه كل شخص تحية لأمه ..و يقول لها ..كل عام و أنت بخير..لا يسعني إلا أن أقول..رحمك الله يا أمي..رزقنا الله حسن خاتمتك

تحريك المياة الراكدة

اكتشفت الأسبوع ده حكاية ماكنتش اعرفها خاااااااااااااااالص...أكيد برضه انتوا ماكنتوش تعرفوها
تصوروا ..تخيلوا...الأشقاء الإسرائيليين ..بيقولوا ان فيه قلة قليلة منهم قتلت "شوية" أسرى مصريين في الحرب القريبة اللي حصلت من كام سنة دي اللي اسمها حرب الأيام الستة ..زي الأشقاء الإسرائيلين مابيسموها
حصلت إمتى الحرب دي يا سوسة؟؟ ..إمتى؟؟..إمتى؟؟..آه بيقولوا من يجي 40 سنة كدة سنة 65 باين أو 66 ..لأ لأ لأ باينها 67

طبعا كان فيه ناس كده غير جديرة بالثقة بيبرطموا بالكلام ده من مدة كده
حتى بيقولوا سنة 95 اكتشفوا مقبرتين جماعيتين في العريش..ده حتى كان فيه ناس غريبة كده كانوا بيقولوا ان عدد الأسرى اللي اتقتلوا عدى الميات ووصل للآلاف ...تخيلوا من كدبهم و افتراهم ..قال بيقولوا انك لو طلعت بالطيارة على ارتفاع معين فوق بعض أجزاء الصحرا في سينا..هتشوف بقع زيت كبيرة..و بيفسروا ده ان دي جثث الأسرى اللي اتحللت و بعد السنين دي كلها اختلطت بالرمل و سببت البقع دي

شوفوا حتى اللينك اللي تحت ده ..هتلاقي كلام كتير من المصريين الغير جديرين بالثقة بيتكلموا عن أسطورة قتل الأسرى المصريين دي
http://www.khayma.com/internetclinic/yhoodgraegept.htm

طب بذمتكوا لو الكلام ده كله صحيح ..كانت حكومتنا سكتت لغاية دلوقت؟؟؟
كانوا الناس اللي متفرغين لرفع القضايا على روبي و هايفا و عادل إمام دول سكتوا؟؟
كانوا الناس اللي بيطلعوا يتشنجوا في التلفزيونات و يقولوا آآآه يا سمعة مصر سكتوا؟؟
طبعا لأ
أنا شخصيا ماكانش ممكن أصدق ان حاجة زي دي حصلت
إلا لما سمعت الكلام بنفسي من أفواه الأشقاء الإسرائيليين
هو ده الكلام اللي أكد ليا و للكل ان حاجة زي دي حصلت
و هو ده الكلام اللي خللا الناس تتكلم و تعترض بعد ماكانوا واخدين تعسيلة بسيطة لمدة 40 سنة

لكن طالما الكلام جه من جيراننا الحبايب...يبقى هو ده الكلام الوحيد اللي يتصدق
و طالما القنوات الإسرائيلية أذاعت فيلم وثائقي عن الموضوع ده..يبقى هي دي المعلومات الوحيدة المؤكدة
كلام الإخوة الإسرائيليين "فقط" هو اللي عرفنا الموضوع ده اللي ماكناش نعرفه من زمان
لكن تقوللي كلام زمايل الشهدا..أو البدو اللي شافوا الموضوع ده بعينيهم...لااااااااا ماعطلكش

ميعادنا القادم سنة 2047..عندما يقوم الإخوة الإسرائيليين بعمل فيلم وثائقي عن غرق العبارة..و عندها فقط يمكن حد يتحرك و حد يتحاكم
لأن -فقط- كلام الإخوة الإسرائيلين هو ما يمكن ان يكشف الحقائق .. -فقط- كلام الإخوة الإسرائيليين هو القادر على تحريك المياه الراكدة

عشان خاطر عيونهم

موضوع التاج ده أنا نفسي أفهمه من اول مادخلت البلوجر
يعني إيه فايدته و مين اللي بيبتديه و هل فعلا إجابات كل واحد بتهم الباقيين
مش عارفة ..بس أنا شخصيا لأن الناس اللي بحبهم و باحترمهم بيطلبوا مني أعمله بعمله ..بس ..عشان خاطر عيونهم

أول تاج من علا مراسلتنا في غزة

خمس أشياء ماحدش يعرفهم عني؟
أمممممممممممممممممممممممممممأنا على فكرة بصيت على إجابات علا و لقيت حاجتين تلاتة مشتركين بيننا..و الباقي ربنا يسهل

أول حاجة
أنا باتكلم مع نفسي كتير جدا..مش كلام داخلي و كده..لأ باتكلم مع نفسي بصوت عالي زي المجانين و مرتين تلاتة كده ظبطت نفسي باعملها قدام الناس و ساعتها عملت نفسي بادعي أو باغني و خلاص
شكلي كده هاضرب قريب

تاني حاجة
أنا مدمنة مسلسلات أمريكية و خصوصا السيتكومز يعني المسلسلات الكوميدية..و من كتر فرجتي عليها أنا دلوقتي و الحمدلله بافكر بالإنجليزي و بعدين أترجم الكلام عربي
مانا بقولكم مخي هيضرب قريب

تالت حاجة
رغم اني دايما من وانا صغيرة عشرية و باحب الكل و الكل بيحبني و الحمدلله إلا اني وانا في تالتة إبتدائي كان فيه بنت بتاخد معانا درس و كانت بطيئة شوية و كان الأستاذ دايما يضحك عليها و يهزءها قدامنا و من كتر ماعمل كده انا كمان كنت باضايقها في الكلام لحد ما مرة عيطت من كلامي و لغاية دلوقتي كل أما بافتكر الموقف ده باتخنق من نفسي و ماباعرفش عملت كده ليه بس تقريبا هو تأثير المدرس ده..ربنا يسامحه و يسامحني
بس هي دي المرة الوحيدة اللي ضايقت فيها حد بالطريقة دي

رابع حاجة
كان فيه واحد في آخر شارعنا بيبيع بقوليات و حاجات من ديو انا كنت مصاحبة شوية عيال كنا كل اما نعدي من قدامه نخطف شوية سوداني و نطلع نجريمرة قفشنا و قالي افردي إيدك و زي الأفلام بقيت أنقل السوداني من إيد لإيد ورا ضهري لحد لما وقعت السوداني على الأرض و الراجل سابني أمشي بس بصلي بصه لسه فاكراها لحد دلوقت و طبعا مفهومة اني ماكررتهاش تاني

خامس حاجة
مرة كسرت قفل بتاع المسقط بتاع عمارتنا رغم ان صاحب البيت لو كان عرف كان سجنيبس كان فيه قطة صغيرة محبوسة لمدة 3 أيام من غير أكل و لا شرب و كل السكان كانوا مش عارفين يوصلولها و خايفين يكسروا القفلاستنيت في يوم و كسرته لما ما كانش حد شايفني و خرجتها و بعدين رجعت القفل زي ماكان
شششششششششششششش
ماتقولوش لحد..مستقبلي حلو كهجامة مش كده؟
----------------------------------------------------------

تاني تاج من د/طنطاوي

اللي بيتهمني إني بعتهم خلاصأنا على العهد يا طنطاوي

اية اللي حيحصل لايميلك لما تموت؟

عادي..هيفضل المدة اللي بيسمحوا بيها و بعدين هيفرقع من كتر الرسايل اللي فيه أو الشركة تلغيه اديت الباس وورد لحد قبل كده؟لا لا لا يا بابا لا

لو اه كانت طبيعة علاقتك بيه اية؟

انظر الإجابة اللي فوق

اسمك؟سوسة ..ليه ..فيه كبسه والا ايه؟

اسم الدلع المشهور وسط اصحابك؟حد يقدر يدلعني؟؟

..دانا كنت قطعت خبره

عمرك؟بين ال20 و ال30..و انت و ذوقك بأه

برجك؟في الأهرام القوس ..في الأخبار الجدي..بس انا بصراحة مابافهمش في الكلام ده

مجال دراستك؟صيدلة ...للأسف

شخصيتك نوعها ايه؟شخصية قيادية..ممكن أوديك في داهية و انت مبسوووووط و بمزاجك..قلبي أسود حبتين ماباعرفش أنسى الإساءة خالص..عشرية و متكلمة..لمضه حبتين تقدر تقول..باتكلم في كل المجالات و ده ياعات بيخنق مني بنات كتير

المود بتاعك؟ساخر سودوي..باتوقع البلا قبل وقوعه و أضحك على نفسي قبل ماأضحك على التانيين

وقت فراغك بتعمل فيه ايه؟الفرجة على الأفلام و المسلسلات الأجنبية أساسية و لو مالقيتش حاجة تنفع في الدش أدور عليها على النت..البلوج كمان شغل وقت فراغي بشكل كبير و بعد كده القراية اللي دلوقتي بقت أقل كتير من زمان للأسف

الاكلة المفضلة؟بابقى في أسعد حالاتي لما آكل حمام محشي ..خصوصا اني شاطرة في عمايلة حتى اسألوا بابا

الصفات اللي خدتها من بابا؟القلق ..و قبل ما أخرج من البيت في أي مشوار لازم أبقى راسمة خطته تمام خطوة خطوة عشان أرتاح

الصفات اللي خدتها من ماما؟الله يرحمها..كانت لماحة و بتفهم في كل شئ..عشان كده لو كانت طرف في أي محادثة كانت بتملا محلها تمام

اكتر 6 حاجات بتكرهها؟ـ الغباءـ الغيرة ـ الشاتـ -الخروج عن الأدب و خصوصا اللي بيعتبروا نفسهم مثقفين و بيعتبروا الخروج على كل التقاليد هو طريقهم للحرية ـ الوسايط بكل أنواعهاـ الناس اللي بتلزق في المواصلات بكل سماجة ولازم يفوروا دم الواحدة و يخلوها تعمل 3-4 خناقات كل يوم ع الصبح

اكتر 6 حاجات بتحبها؟ـ عيلتي ..أبويا و اخويا و أمي الله يرحمهاـ بلوجر..عشان اداني فرصة أتعرف على ناس كتير بحبهمـ النشيد القومي ..رغم انه رخم و بايخ و مالوش معنى لكن أكتر حاجة باحب أسمعها و أتأثر بيها
بس ..تخيلوا اني ماباحبش أي حاجة تاني ..مش باقولكم شخصية سوداوية؟

الشغل بالنسبة لك؟ خنقة و ربطة و مجال مالوش أي علاقة من قريب ولا بعيد بشخصيتي و لا إهتماماتي ..لكن أعمل ايه فشلت و جبت مجموع عالي و يادوب أقنعتهم بالعافية اني مادخلش طب ..بصيت لقيت صيدلة لابسه في وشي..قدري باه هاعمل ايه؟

ايه الكمبيوتر والانترنت بالنسبة لك؟أصدق أصدقائي

الخمس حاجات اللي ماحدش يعرفها عني هي ؟ـ ماحدش يعرف مودي في أي يوم هيبقى إيهـ ماحدش يعرف انا بافكر في ايه الا لما يتنفذـ اني عندي موهبة أفهم أي شخص قدامي بمجرد ماتكلم معاه مرة أو مرتينـاني ملولة جدا جدا جدا ..بابدأ في ميت حاجة في نفس الوقت و أزهق و أسيبهم كلهم من غير ماكمل أي حاجة فيهم ـ للأسف انا من النوعية اللي بترضى بنصيبها و تتأقلم معاه ..ناقصني شوية طموح للأسف مش موجود فيا

-------------------------------------------------------

التالت من سمسم

اسم مدونتك؟سوسة المفروسة
لماذا اخترته.. ماذا تقصد به؟و الله مانا فاكرة أنا كنت باكتب بالإسم ده في عشرينات ..باعلق يعني مش باكتب مقالات ..و مش عارفة اخترته ليه ..بس انا دايما مفروسة من كل شئ..و فيه ناس كتير بتتهمني اني سوسة و بافهم كتير ..مع اني بريئه من التهمة دي

هل فكرت في إغلاق المدونة.. والسبب؟ساعات أحس اني عايزة اعتزل لما أحس اني زهقت و ان الكلام مافيش منه فايدة ..و بعدين أرجع أقول أديني بانفس يدل ما اطق

صورتك ف المدونة، رمزيتها؟أنا دورت على حاجة فيها غيظ أو فرسة و في الاخر لقيت الصورة دي ..واحدة بتنفخ ..يمكن من زهقها يمكن من غيظتها لكن أهي بتنفخ حتى لو بتنفخ في الهوا

طبيعة كتابتك في المدونة بشكل عام..
في كل الحاجات اللي بتفرسني ..سياسة بأه أخبار المجتمع .أخباري أنا.اللي بيفرسني باقوله و خلاص

لماذا تدون أصلاً؟تنفيس ..فضفضة..مشاركة آراء

أحلى جملة قيلت لك في وصف مدونتك؟السهل الممتنع

التعليقات بالنسبة لك.. أهميتها؟و إيه المدونة بدون التعليقات..على الأقل الواحد مايحسش انه بيكلم نفسه..ده غير اني في اوقات كتير باستفيد من التعليقات معلومات قيمة ماكنتش أعرف عنها حاجة ..أو أشوف وجهة نظر تانية ماكنتش شايفاها

أحلى بوست كتبته.. ضع اللينك.. ثم اذكر لماذا؟البوست بتاع أفلام الصيف أيام حرب لبنان..كان بسيط و معبر و ظريف..حتى أنا اللي ما بيعجبنيش حاجة عاجبني

http://soosamafroosa.blogspot.com/2006/08/blog-post.html
كمان الموضوع بتاع مرسى مطروح باعتبره مقال صحفي بجد ..منظم كده و بالصور اللي مصوراها بايدي..كمان كان أول حاجة اتنشرت من المدونة ..اتنشر في عشرينات
http://soosamafroosa.blogspot.com/2006/07/blog-post_14.html

أفضل مدونة قرأتها.. يمكن اختيار عدة مدونات؟كتير ..مثلا مصرنا بتاع اخويا طنطاوي نضارة شمس بتاع عمنا شقير
و ناس كتير كتير حطاهم في المفضلة على يمين المدونة

أفضل بوست قرأته.. يمكن اختيار أكثر من بوست.. ؟من نضارة شمس -المرآهمن حكايات فريدة-بوست جميل عن الفالانتاين

هل خسرت صديق بسبب كتابة هنا؟الحمدلله ماحصلش
حد قل أدبه ف التعليق.. إيه رد فعلك؟كان فيه واحد كده دخل مرة و كتب كلام في غاية قلة الأدب و كرره في حوالي 30 تعليق تحت بعض
هاعمله ايه يعني ..مسحتهم

أسوأ مدونة.. الإجابة إجبارية.. ويمكن اختيار عدة مدونات.. هي كتيرة أصلاً :) ؟كل مدونات المثليبن و مدونة الواد عبد الكريم
أسوأ بوست.. لازم تجاوب.. ويسمح بتعدد الاختيارات؟أي بوست من عند الواد عبدالكريم
أسوأ مدون.. ما هو حاتجاوب حاتجاوب؟انظر الإجابات السابقة

انشر الآن بشكل حصري بوست لم تجرؤ على نشره من قبل.. مش محتاج أقول إجباري؟ البوست أنا نشرته فعلا و بناءا على تعليمات السيد الوالد شلتهفيلم الريس حوحومش هاقدر أنشره تانيبس اللي عايزة هيلاقيه في المجمع عند علاء و منالمتهيألي لسه موجودبس انا مش مسؤوله انا مسحته ياباشا و ماليش دعوة باللي عايزين يقروه